Sacred Texts  Bible  Index 
Polyglot  KJV  Sep  Vul 

1 Samuel (1 Shmuel) Index
  Previous  Next 

Tanach (Hebrew): 1 Samuel (1 Shmuel) Chapter 5

1 ‏וּפְלִשְׁתִּים֙ לָֽקְח֔וּ אֵ֖ת אֲר֣וֹן הָאֱלֹהִ֑ים וַיְבִאֻ֛הוּ מֵאֶ֥בֶן הָעֵ֖זֶר אַשְׁדּֽוֹדָה׃

2 ‏וַיִּקְח֤וּ פְלִשְׁתִּים֙ אֶת־אֲר֣וֹן הָאֱלֹהִ֔ים וַיָּבִ֥יאוּ אֹת֖וֹ בֵּ֣ית דָּג֑וֹן וַיַּצִּ֥יגוּ אֹת֖וֹ אֵ֥צֶל דָּגֽוֹן׃

3 ‏וַיַּשְׁכִּ֤מוּ אַשְׁדּוֹדִים֙ מִֽמָּחֳרָ֔ת וְהִנֵּ֣ה דָג֗וֹן נֹפֵ֤ל לְפָנָיו֙ אַ֔רְצָה לִפְנֵ֖י אֲר֣וֹן יְהוָ֑ה וַיִּקְחוּ֙ אֶת־דָּג֔וֹן וַיָּשִׁ֥בוּ אֹת֖וֹ לִמְקוֹמֽוֹ׃

4 ‏וַיַּשְׁכִּ֣מוּ בַבֹּקֶר֮ מִֽמָּחֳרָת֒ וְהִנֵּ֣ה דָג֗וֹן נֹפֵ֤ל לְפָנָיו֙ אַ֔רְצָה לִפְנֵ֖י אֲר֣וֹן יְהוָ֑ה וְרֹ֨אשׁ דָּג֜וֹן וּשְׁתֵּ֣י׀ כַּפּ֣וֹת יָדָ֗יו כְּרֻתוֹת֙ אֶל־הַמִּפְתָּ֔ן רַ֥ק דָּג֖וֹן נִשְׁאַ֥ר עָלָֽיו׃

5 ‏עַל־כֵּ֡ן לֹֽא־יִדְרְכוּ֩ כֹהֲנֵ֨י דָג֜וֹן וְכָֽל־הַבָּאִ֧ים בֵּית־דָּג֛וֹן עַל־מִפְתַּ֥ן דָּג֖וֹן בְּאַשְׁדּ֑וֹד עַ֖ד הַיּ֥וֹם הַזֶּֽה׃ ס

6 ‏וַתִּכְבַּ֧ד יַד־יְהוָ֛ה אֶל־הָאַשְׁדּוֹדִ֖ים וַיְשִׁמֵּ֑ם וַיַּ֤ךְ אֹתָם֙ בעפלים בַּטְּחֹרִ֔יםa אֶת־אַשְׁדּ֖וֹד וְאֶת־גְּבוּלֶֽיהָ׃

7 ‏וַיִּרְא֥וּ אַנְשֵֽׁי־אַשְׁדּ֖וֹד כִּֽי־כֵ֑ן וְאָמְר֗וּ לֹֽא־יֵשֵׁ֞ב אֲר֨וֹן אֱלֹהֵ֤י יִשְׂרָאֵל֙ עִמָּ֔נוּ כִּֽי־קָשְׁתָ֤ה יָדוֹ֙ עָלֵ֔ינוּ וְעַ֖ל דָּג֥וֹן אֱלֹהֵֽינוּ׃

8 ‏וַיִּשְׁלְח֡וּ וַיַּאַסְפוּ֩ אֶת־כָּל־סַרְנֵ֨י פְלִשְׁתִּ֜ים אֲלֵיהֶ֗ם וַיֹּֽאמְרוּ֙ מַֽה־נַּעֲשֶׂ֗ה לַֽאֲרוֹן֙ אֱלֹהֵ֣י יִשְׂרָאֵ֔ל וַיֹּ֣אמְר֔וּ גַּ֣ת יִסֹּ֔ב אֲר֖וֹן אֱלֹהֵ֣י יִשְׂרָאֵ֑ל וַיַּסֵּ֕בּוּ אֶת־אֲר֖וֹן אֱלֹהֵ֥י יִשְׂרָאֵֽל׃ ס

9 ‏וַיְהִ֞י אַחֲרֵ֣י׀ הֵסַ֣בּוּ אֹת֗וֹ וַתְּהִ֨י יַד־יְהוָ֤ה׀ בָּעִיר֙ מְהוּמָה֙ גְּדוֹלָ֣ה מְאֹ֔ד וַיַּךְ֙ אֶת־אַנְשֵׁ֣י הָעִ֔יר מִקָּטֹ֖ן וְעַד־גָּד֑וֹל וַיִּשָּׂתְר֥וּ לָהֶ֖ם עפלים טְחֹרִֽים׃

10 ‏וַֽיְשַׁלְּח֛וּ אֶת־אֲר֥וֹן הָאֱלֹהִ֖ים עֶקְר֑וֹן וַיְהִ֗י כְּב֨וֹא אֲר֤וֹן הָאֱלֹהִים֙ עֶקְר֔וֹן וַיִּזְעֲק֨וּ הָֽעֶקְרֹנִ֜ים לֵאמֹ֗ר הֵסַ֤בּוּ אֵלַי֙ אֶת־אֲרוֹן֙ אֱלֹהֵ֣י יִשְׂרָאֵ֔ל לַהֲמִיתֵ֖נִי וְאֶת־עַמִּֽי׃

11 ‏וַיִּשְׁלְח֨וּ וַיַּאַסְפ֜וּ אֶת־כָּל־סַרְנֵ֣י פְלִשְׁתִּ֗ים וַיֹּֽאמְרוּ֙ שַׁלְּח֞וּ אֶת־אֲר֨וֹן אֱלֹהֵ֤י יִשְׂרָאֵל֙ וְיָשֹׁ֣ב לִמְקֹמ֔וֹ וְלֹֽא־יָמִ֥ית אֹתִ֖י וְאֶת־עַמִּ֑י כִּֽי־הָיְתָ֤ה מְהֽוּמַת־מָ֙וֶת֙ בְּכָל־הָעִ֔יר כָּבְדָ֥ה מְאֹ֛ד יַ֥ד הָאֱלֹהִ֖ים שָֽׁם׃

12 ‏וְהָֽאֲנָשִׁים֙ אֲשֶׁ֣ר לֹא־מֵ֔תוּ הֻכּ֖וּ בעפלים בַּטְּחֹרִ֑יםa וַתַּ֛עַל שַֽׁוְעַ֥ת הָעִ֖יר הַשָּׁמָֽיִם׃

1 ûfəlišətîm lāqəḥû ’ēṯ ’ărwōn hā’ĕlōhîm wayəḇi’uhû mē’eḇen hā‘ēzer ’ašədwōḏâ:

2 wayyiqəḥû fəlišətîm ’eṯ-’ărwōn hā’ĕlōhîm wayyāḇî’û ’ōṯwō bêṯ dāḡwōn wayyaṣṣîḡû ’ōṯwō ’ēṣel dāḡwōn:

3 wayyašəkimû ’ašədwōḏîm mimmāḥŏrāṯ wəhinnēh ḏāḡwōn nōfēl ləfānāyw ’arəṣâ lifənê ’ărwōn yəhwâ wayyiqəḥû ’eṯ-dāḡwōn wayyāšiḇû ’ōṯwō liməqwōmwō:

4 wayyašəkimû ḇabōqer mimmāḥŏrāṯ wəhinnēh ḏāḡwōn nōfēl ləfānāyw ’arəṣâ lifənê ’ărwōn yəhwâ wərō’š dāḡwōn ûšətê| kapwōṯ yāḏāyw kəruṯwōṯ ’el-hammifətān raq dāḡwōn nišə’ar ‘ālāyw:

5 ‘al-kēn lō’-yiḏərəḵû ḵōhănê ḏāḡwōn wəḵāl-habā’îm bêṯ-dāḡwōn ‘al-mifətan dāḡwōn bə’ašədwōḏ ‘aḏ hayywōm hazzeh: s

6 watiḵəbaḏ yaḏ-yəhwâ ’el-hā’ašədwōḏîm wayəšimmēm wayyaḵə ’ōṯām bā‘ŏfālîm baṭṭəḥōrîma ’eṯ-’ašədwōḏ wə’eṯ-gəḇûleyhā:

7 wayyirə’û ’anəšê-’ašədwōḏ kî-ḵēn wə’āmərû lō’-yēšēḇ ’ărwōn ’ĕlōhê yiśərā’ēl ‘immānû kî-qāšəṯâ yāḏwō ‘ālênû wə‘al dāḡwōn ’ĕlōhênû:

8 wayyišələḥû wayya’asəfû ’eṯ-kāl-sarənê fəlišətîm ’ălêhem wayyō’mərû mah-nna‘ăśeh la’ărwōn ’ĕlōhê yiśərā’ēl wayyō’mərû gaṯ yissōḇ ’ărwōn ’ĕlōhê yiśərā’ēl wayyassēbû ’eṯ-’ărwōn ’ĕlōhê yiśərā’ēl: s

9 wayəhî ’aḥărê| hēsabû ’ōṯwō watəhî yaḏ-yəhwâ| bā‘îr məhûmâ gəḏwōlâ mə’ōḏ wayyaḵə ’eṯ-’anəšê hā‘îr miqqāṭōn wə‘aḏ-gāḏwōl wayyiśśāṯərû lâem ‘ŏfālîm ṭəḥōrîm:

10 wayəšalləḥû ’eṯ-’ărwōn hā’ĕlōhîm ‘eqərwōn wayəhî kəḇwō’ ’ărwōn hā’ĕlōhîm ‘eqərwōn wayyizə‘ăqû hā‘eqərōnîm lē’mōr hēsabû ’ēlay ’eṯ-’ărwōn ’ĕlōhê yiśərā’ēl lahămîṯēnî wə’eṯ-‘ammî:

11 wayyišələḥû wayya’asəfû ’eṯ-kāl-sarənê fəlišətîm wayyō’mərû šalləḥû ’eṯ-’ărwōn ’ĕlōhê yiśərā’ēl wəyāšōḇ liməqōmwō wəlō’-yāmîṯ ’ōṯî wə’eṯ-‘ammî kî-hāyəṯâ məhûmaṯ-māweṯ bəḵāl-hā‘îr kāḇəḏâ mə’ōḏ yaḏ hā’ĕlōhîm šām:

12 wəhā’ănāšîm ’ăšer lō’-mēṯû hukû bā‘ŏfālîm baṭṭəḥōrîma wata‘al šawə‘aṯ hā‘îr haššāmāyim:


Next: 1 Samuel (1 Shmuel) Chapter 6