‎1 ‏לְדָוִ֡ד אֵ֘לֶ֤יךָ יְהוָ֨ה׀ אֶקְרָ֗א צוּרִי֮ אַֽל־תֶּחֱרַ֪שׁ מִ֫מֶּ֥נִּי פֶּן־תֶּֽחֱשֶׁ֥ה מִמֶּ֑נִּי וְ֝נִמְשַׁ֗לְתִּי עִם־י֥וֹרְדֵי בֽוֹר׃

‎2 ‏שְׁמַ֤ע ק֣וֹל תַּ֭חֲנוּנַי בְּשַׁוְּעִ֣י אֵלֶ֑יךָ בְּנָשְׂאִ֥י יָ֝דַ֗י אֶל־דְּבִ֥יר קָדְשֶֽׁךָ׃

‎3 ‏אַל־תִּמְשְׁכֵ֣נִי עִם־רְשָׁעִים֮ וְעִם־פֹּ֪עֲלֵ֫י אָ֥וֶן דֹּבְרֵ֣י שָׁ֭לוֹם עִם־רֵֽעֵיהֶ֑ם וְ֝רָעָ֗ה בִּלְבָבָֽם׃

‎4 ‏תֶּן־לָהֶ֣ם כְּפָעֳלָם֮ וּכְרֹ֪עַ מַֽעַלְלֵ֫יהֶ֥ם כְּמַעֲשֵׂ֣ה יְ֭דֵיהֶם תֵּ֣ן לָהֶ֑ם הָשֵׁ֖ב גְּמוּלָ֣ם לָהֶֽם׃

‎5 ‏כִּ֤י לֹ֤א יָבִ֡ינוּ אֶל־פְּעֻלֹּ֣ת יְ֭הוָה וְאֶל־מַעֲשֵׂ֣ה יָדָ֑יו יֶ֝הֶרְסֵ֗ם וְלֹ֣א יִבְנֵֽם׃

‎6 ‏בָּר֥וּךְ יְהוָ֑ה כִּי־שָׁ֝מַע ק֣וֹל תַּחֲנוּנָֽי׃

‎7 ‏יְהוָ֤ה׀ עֻזִּ֥י וּמָגִנִּי֮ בּ֤וֹ בָטַ֥ח לִבִּ֗י וְֽנֶ֫עֱזָ֥רְתִּי וַיַּעֲלֹ֥ז לִבִּ֑י וּֽמִשִּׁירִ֥י אֲהוֹדֶֽנּוּ׃

‎8 ‏יְהוָ֥ה עֹֽז־לָ֑מוֹ וּמָ֘ע֤וֹז יְשׁוּע֖וֹת מְשִׁיח֣וֹ הֽוּא׃

‎9 ‏הוֹשִׁ֤יעָה׀ אֶת־עַמֶּ֗ךָ וּבָרֵ֥ךְ אֶת־נַחֲלָתֶ֑ךָ וּֽרְעֵ֥ם וְ֝נַשְּׂאֵ֗ם עַד־הָעוֹלָֽם׃

1 ləḏāwiḏ ’ēleyḵā yəhwâ| ’eqərā’ ṣûrî ’al-teḥĕraš mimmennî pen-teḥĕšeh mimmennî wəniməšalətî ‘im-ywōrəḏê ḇwōr:

2 šəm^a‘ qwōl t^aḥănûnay bəšaûə‘î ’ēleyḵā bənāśə’î yāḏay ’el-dəḇîr qāḏəšeḵā:

3 ’al-timəšəḵēnî ‘im-rəšā‘îm wə‘im-pō‘ălê ’āwen dōḇərê šālwōm ‘im-rē‘êhem wərā‘â biləḇāḇām:

4 ten-lâem kəfā‘ŏlām ûḵərō‘a m^a‘aləlêhem kəm^a‘ăśēh yəḏêhem tēn lâem hāšēḇ gəmûlām lâem:

5 kî lō’ yāḇînû ’el-pə‘ullōṯ yəhwâ wə’el-m^a‘ăśēh yāḏāyw yeherəsēm wəlō’ yiḇənēm:

6 bārûḵə yəhwâ kî-šām^a‘ qwōl t^aḥănûnāy:

7 yəhwâ| ‘uzzî ûmāḡinnî bwō ḇāṭ^aḥ libî wəne‘ĕzārətî wayy^a‘ălōz libî ûmiššîrî ’ăhwōḏennû:

8 yəhwâ ‘ōz-lāmwō ûmā‘wōz yəšû‘wōṯ məšîḥwō hû’:

9 hwōšî‘â| ’eṯ-‘ammeḵā ûḇārēḵə ’eṯ-n^aḥălāṯeḵā ûrə‘ēm wənaśśə’ēm ‘aḏ-hā‘wōlām: