‎1 ‏דִּבְרֵ֥י נְחֶמְיָ֖ה בֶּן־חֲכַלְיָ֑ה וַיְהִ֤י בְחֹֽדֶשׁ־כסלו כִּסְלֵיו֙ שְׁנַ֣ת עֶשְׂרִ֔ים וַאֲנִ֥י הָיִ֖יתִי בְּשׁוּשַׁ֥ן הַבִּירָֽה׃

‎2 ‏וַיָּבֹ֨א חֲנָ֜נִי אֶחָ֧ד מֵאַחַ֛י ה֥וּא וַאֲנָשִׁ֖ים מִֽיהוּדָ֑ה וָאֶשְׁאָלֵ֞ם עַל־הַיְּהוּדִ֧ים הַפְּלֵיטָ֛ה אֲשֶֽׁר־נִשְׁאֲר֥וּ מִן־הַשֶּׁ֖בִי וְעַל־יְרוּשָׁלִָֽם׃

‎3 ‏וַיֹּאמְרוּ֮ לִי֒ הַֽנִּשְׁאָרִ֞ים אֲשֶֽׁר־נִשְׁאֲר֤וּ מִן־הַשְּׁבִי֙ שָׁ֣ם בַּמְּדִינָ֔ה בְּרָעָ֥ה גְדֹלָ֖ה וּבְחֶרְפָּ֑ה וְחוֹמַ֤ת יְרוּשָׁלִַ֙ם֙ מְפֹרָ֔צֶת וּשְׁעָרֶ֖יהָ נִצְּת֥וּ בָאֵֽשׁ׃

‎4 ‏וַיְהִ֞י כְּשָׁמְעִ֣י׀ אֶת־הַדְּבָרִ֣ים הָאֵ֗לֶּה יָשַׁ֙בְתִּי֙ וָֽאֶבְכֶּ֔ה וָאֶתְאַבְּלָ֖ה יָמִ֑ים וָֽאֱהִ֥י צָם֙ וּמִתְפַּלֵּ֔ל לִפְנֵ֖י אֱלֹהֵ֥י הַשָּׁמָֽיִם׃

‎5 ‏וָאֹמַ֗ר אָֽנָּ֤א יְהוָה֙ אֱלֹהֵ֣י הַשָּׁמַ֔יִם הָאֵ֥ל הַגָּד֖וֹל וְהַנּוֹרָ֑א שֹׁמֵ֤ר הַבְּרִית֙ וָחֶ֔סֶד לְאֹהֲבָ֖יו וּלְשֹׁמְרֵ֥י מִצְוֹתָֽיו׃

‎6 ‏תְּהִ֣י נָ֣א אָזְנְךָֽ־קַשֶּׁ֣בֶת וְֽעֵינֶ֪יךָ פְתֻוּח֟וֹת¹ לִשְׁמֹ֣עַ אֶל־תְּפִלַּ֣ת עַבְדְּךָ֡ אֲשֶׁ֣ר אָנֹכִי֩ מִתְפַּלֵּ֨ל לְפָנֶ֤יךָ הַיּוֹם֙ יוֹמָ֣ם וָלַ֔יְלָה עַל־בְּנֵ֥י יִשְׂרָאֵ֖ל עֲבָדֶ֑יךָ וּמִתְוַדֶּ֗ה עַל־חַטֹּ֤אות בְּנֵֽי־יִשְׂרָאֵל֙ אֲשֶׁ֣ר חָטָ֣אנוּ לָ֔ךְ וַאֲנִ֥י וּבֵית־אָבִ֖י חָטָֽאנוּ׃

‎7 ‏חֲבֹ֖ל חָבַ֣לְנוּ לָ֑ךְ וְלֹא־שָׁמַ֣רְנוּ אֶת־הַמִּצְוֹ֗ת וְאֶת־הַֽחֻקִּים֙ וְאֶת־הַמִּשְׁפָּטִ֔ים אֲשֶׁ֥ר צִוִּ֖יתָ אֶת־מֹשֶׁ֥ה עַבְדֶּֽךָ׃

‎8 ‏זְכָר־נָא֙ אֶת־הַדָּבָ֔ר אֲשֶׁ֥ר צִוִּ֛יתָ אֶת־מֹשֶׁ֥ה עַבְדְּךָ֖ לֵאמֹ֑ר אַתֶּ֣ם תִּמְעָ֔לוּ אֲנִ֕י אָפִ֥יץ אֶתְכֶ֖ם בָּעַמִּֽים׃

‎9 ‏וְשַׁבְתֶּ֣ם אֵלַ֔י וּשְׁמַרְתֶּם֙ מִצְוֹתַ֔י וַעֲשִׂיתֶ֖ם אֹתָ֑ם אִם־יִהְיֶ֨ה נִֽדַּחֲכֶ֜ם בִּקְצֵ֤ה הַשָּׁמַ֙יִם֙ מִשָּׁ֣ם אֲקַבְּצֵ֔ם והבואתים וַהֲבִֽיאוֹתִים֙ אֶל־הַמָּק֔וֹם אֲשֶׁ֣ר בָּחַ֔רְתִּי לְשַׁכֵּ֥ן אֶת־שְׁמִ֖י שָֽׁם׃

‎10 ‏וְהֵ֥ם עֲבָדֶ֖יךָ וְעַמֶּ֑ךָ אֲשֶׁ֤ר פָּדִ֙יתָ֙ בְּכֹחֲךָ֣ הַגָּד֔וֹל וּבְיָדְךָ֖ הַחֲזָקָֽה׃

‎11 ‏אָנָּ֣א אֲדֹנָ֗י תְּהִ֣י נָ֣א אָזְנְךָֽ־קַ֠שֶּׁבֶת אֶל־תְּפִלַּ֨ת עַבְדְּךָ֜ וְאֶל־תְּפִלַּ֣ת עֲבָדֶ֗יךָ הַֽחֲפֵצִים֙ לְיִרְאָ֣ה אֶת־שְׁמֶ֔ךָ וְהַצְלִֽיחָה־נָּ֤א לְעַבְדְּךָ֙ הַיּ֔וֹם וּתְנֵ֣הוּ לְרַחֲמִ֔ים לִפְנֵ֖י הָאִ֣ישׁ הַזֶּ֑ה וַאֲנִ֛י הָיִ֥יתִי מַשְׁקֶ֖ה לַמֶּֽלֶךְ׃ פ

1 diḇərê nəḥeməyâ ben-ḥăḵaləyâ wayəhî ḇəḥōḏeš-kisəlēw kisəlêw šənaṯ ‘eśərîm wa’ănî hāyîṯî bəšûšan habîrâ:

2 wayyāḇō’ ḥănānî ’eḥāḏ mē’^aḥay hû’ wa’ănāšîm mîhûḏâ wā’ešə’ālēm ‘al-hayyəhûḏîm hapəlêṭâ ’ăšer-nišə’ărû min-haššeḇî wə‘al-yərûšālāim:

3 wayyō’mərû lî hannišə’ārîm ’ăšer-nišə’ărû min-haššəḇî šām bamməḏînâ bərā‘â ḡəḏōlâ ûḇəḥerəpâ wəḥwōmaṯ yərûšālaim məfōrāṣeṯ ûšə‘āreyhā niṣṣəṯû ḇā’ēš:

4 wayəhî kəšāmə‘î| ’eṯ-hadəḇārîm hā’ēlleh yāšaḇətî wā’eḇəkeh wā’eṯə’abəlâ yāmîm wā’ĕhî ṣām ûmiṯəpallēl lifənê ’ĕlōhê haššāmāyim:

5 wā’ōmar ’ānnā’ yəhwâ ’ĕlōhê haššāmayim hā’ēl hagāḏwōl wəhannwōrā’ šōmēr habərîṯ wāḥeseḏ lə’ōhăḇāyw ûləšōmərê miṣəwōṯāyw:

6 təhî nā’ ’āzənəḵā-qaššeḇeṯ wə‘êneyḵā fəṯuûḥwōṯ¹ lišəmō‘a ’el-təfillaṯ ‘aḇədəḵā ’ăšer ’ānōḵî miṯəpallēl ləfāneyḵā hayywōm ywōmām wālayəlâ ‘al-bənê yiśərā’ēl ‘ăḇāḏeyḵā ûmiṯəwadeh ‘al-ḥaṭṭō’wṯ bənê-yiśərā’ēl ’ăšer ḥāṭā’nû lāḵə wa’ănî ûḇêṯ-’āḇî ḥāṭā’nû:

7 ḥăḇōl ḥāḇalənû lāḵə wəlō’-šāmarənû ’eṯ-hammiṣəwōṯ wə’eṯ-h^aḥuqqîm wə’eṯ-hammišəpāṭîm ’ăšer ṣiûîṯā ’eṯ-mōšeh ‘aḇədeḵā:

8 zəḵār-nā’ ’eṯ-hadāḇār ’ăšer ṣiûîṯā ’eṯ-mōšeh ‘aḇədəḵā lē’mōr ’atem timə‘ālû ’ănî ’āfîṣ ’eṯəḵem bā‘ammîm:

9 wəšaḇətem ’ēlay ûšəmarətem miṣəwōṯay w^a‘ăśîṯem ’ōṯām ’im-yihəyeh nid^aḥăḵem biqəṣēh haššāmayim miššām ’ăqabəṣēm wahăḇwō’ōṯîm wahăḇî’wōṯîm ’el-hammāqwōm ’ăšer bāḥarətî ləšakēn ’eṯ-šəmî šām:

10 wəhēm ‘ăḇāḏeyḵā wə‘ammeḵā ’ăšer pāḏîṯā bəḵōḥăḵā hagāḏwōl ûḇəyāḏəḵā h^aḥăzāqâ:

11 ’ānnā’ ’ăḏōnāy təhî nā’ ’āzənəḵā-qaššeḇeṯ ’el-təfillaṯ ‘aḇədəḵā wə’el-təfillaṯ ‘ăḇāḏeyḵā h^aḥăfēṣîm ləyirə’â ’eṯ-šəmeḵā wəhaṣəlîḥâ-nnā’ lə‘aḇədəḵā hayywōm ûṯənēhû lər^aḥămîm lifənê hā’îš hazzeh wa’ănî hāyîṯî mašəqeh lammeleḵə: f