‎1 ‏וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר׃

‎2 ‏דַּבֵּ֞ר אֶל־בְּנֵ֤י יִשְׂרָאֵל֙ וְאָמַרְתָּ֣ אֲלֵהֶ֔ם אִ֕ישׁ כִּ֥י יַפְלִ֖א נֶ֑דֶר בְּעֶרְכְּךָ֥ נְפָשֹׁ֖ת לַֽיהוָֽה׃

‎3 ‏וְהָיָ֤ה עֶרְכְּךָ֙ הַזָּכָ֔ר מִבֶּן֙ עֶשְׂרִ֣ים שָׁנָ֔ה וְעַ֖ד בֶּן־שִׁשִּׁ֣ים שָׁנָ֑ה וְהָיָ֣ה עֶרְכְּךָ֗ חֲמִשִּׁ֛ים שֶׁ֥קֶל כֶּ֖סֶף בְּשֶׁ֥קֶל הַקֹּֽדֶשׁ׃

‎4 ‏וְאִם־נְקֵבָ֖ה הִ֑וא וְהָיָ֥ה עֶרְכְּךָ֖ שְׁלֹשִׁ֥ים שָֽׁקֶל׃

‎5 ‏וְאִ֨ם מִבֶּן־חָמֵ֜שׁ שָׁנִ֗ים וְעַד֙ בֶּן־עֶשְׂרִ֣ים שָׁנָ֔ה וְהָיָ֧ה עֶרְכְּךָ֛ הַזָּכָ֖ר עֶשְׂרִ֣ים שְׁקָלִ֑ים וְלַנְּקֵבָ֖ה עֲשֶׂ֥רֶת שְׁקָלִֽים׃

‎6 ‏וְאִ֣ם מִבֶּן־חֹ֗דֶשׁ וְעַד֙ בֶּן־חָמֵ֣שׁ שָׁנִ֔ים וְהָיָ֤ה עֶרְכְּךָ֙ הַזָּכָ֔ר חֲמִשָּׁ֥ה שְׁקָלִ֖ים כָּ֑סֶף וְלַנְּקֵבָ֣ה עֶרְכְּךָ֔ שְׁלֹ֥שֶׁת שְׁקָלִ֖ים כָּֽסֶף׃

‎7 ‏וְ֠אִם מִבֶּן־שִׁשִּׁ֨ים שָׁנָ֤ה וָמַ֙עְלָה֙ אִם־זָכָ֔ר וְהָיָ֣ה עֶרְכְּךָ֔ חֲמִשָּׁ֥ה עָשָׂ֖ר שָׁ֑קֶל וְלַנְּקֵבָ֖ה עֲשָׂרָ֥ה שְׁקָלִֽים׃

‎8 ‏וְאִם־מָ֥ךְ הוּא֙ מֵֽעֶרְכֶּ֔ךָ וְהֶֽעֱמִידוֹ֙ לִפְנֵ֣י הַכֹּהֵ֔ן וְהֶעֱרִ֥יךְ אֹת֖וֹ הַכֹּהֵ֑ן עַל־פִּ֗י אֲשֶׁ֤ר תַּשִּׂיג֙ יַ֣ד הַנֹּדֵ֔ר יַעֲרִיכֶ֖נּוּ הַכֹּהֵֽן׃ ס

‎9 ‏וְאִם־בְּהֵמָ֔ה אֲשֶׁ֨ר יַקְרִ֧יבוּ מִמֶּ֛נָּה קָרְבָּ֖ן לַֽיהוָ֑ה כֹּל֩ אֲשֶׁ֨ר יִתֵּ֥ן מִמֶּ֛נּוּ לַיהוָ֖ה יִֽהְיֶה־קֹּֽדֶשׁ׃

‎10 ‏לֹ֣א יַחֲלִיפֶ֗נּוּ וְלֹֽא־יָמִ֥יר אֹת֛וֹ ט֥וֹב בְּרָ֖ע אוֹ־רַ֣ע בְּט֑וֹב וְאִם־הָמֵ֨ר יָמִ֤יר בְּהֵמָה֙ בִּבְהֵמָ֔ה וְהָֽיָה־ה֥וּא וּתְמוּרָת֖וֹ יִֽהְיֶה־קֹּֽדֶשׁ׃

‎11 ‏וְאִם֙ כָּל־בְּהֵמָ֣ה טְמֵאָ֔ה אֲ֠שֶׁר לֹא־יַקְרִ֧יבוּ מִמֶּ֛נָּה קָרְבָּ֖ן לַֽיהוָ֑ה וְהֶֽעֱמִ֥יד אֶת־הַבְּהֵמָ֖ה לִפְנֵ֥י הַכֹּהֵֽן׃

‎12 ‏וְהֶעֱרִ֤יךְ הַכֹּהֵן֙ אֹתָ֔הּ בֵּ֥ין ט֖וֹב וּבֵ֣ין רָ֑ע כְּעֶרְכְּךָ֥ הַכֹּהֵ֖ן כֵּ֥ן יִהְיֶֽה׃

‎13 ‏וְאִם־גָּאֹ֖ל יִגְאָלֶ֑נָּה וְיָסַ֥ף חֲמִישִׁת֖וֹ עַל־עֶרְכֶּֽךָ׃

‎14 ‏וְאִ֗ישׁ כִּֽי־יַקְדִּ֨שׁ אֶת־בֵּית֥וֹ קֹ֙דֶשׁ֙ לַֽיהוָ֔ה וְהֶעֱרִיכוֹ֙ הַכֹּהֵ֔ן בֵּ֥ין ט֖וֹב וּבֵ֣ין רָ֑ע כַּאֲשֶׁ֨ר יַעֲרִ֥יךְ אֹת֛וֹ הַכֹּהֵ֖ן כֵּ֥ן יָקֽוּם׃

‎15 ‏וְאִ֨ם־הַמַּקְדִּ֔ישׁ יִגְאַ֖ל אֶת־בֵּית֑וֹ וְ֠יָסַף חֲמִישִׁ֧ית כֶּֽסֶף־עֶרְכְּךָ֛ עָלָ֖יו וְהָ֥יָה לֽוֹ׃

‎16 ‏וְאִ֣ם׀ מִשְּׂדֵ֣ה אֲחֻזָּת֗וֹ יַקְדִּ֥ישׁ אִישׁ֙ לַֽיהוָ֔ה וְהָיָ֥ה עֶרְכְּךָ֖ לְפִ֣י זַרְע֑וֹ זֶ֚רַע חֹ֣מֶר שְׂעֹרִ֔ים בַּחֲמִשִּׁ֖ים שֶׁ֥קֶל כָּֽסֶף׃

‎17 ‏אִם־מִשְּׁנַ֥ת הַיֹּבֵ֖ל יַקְדִּ֣ישׁ שָׂדֵ֑הוּ כְּעֶרְכְּךָ֖ יָקֽוּם׃

‎18 ‏וְאִם־אַחַ֣ר הַיֹּבֵל֮ יַקְדִּ֣ישׁ שָׂדֵהוּ֒ וְחִשַּׁב־ל֨וֹ הַכֹּהֵ֜ן אֶת־הַכֶּ֗סֶף עַל־פִּ֤י הַשָּׁנִים֙ הַנּ֣וֹתָרֹ֔ת עַ֖ד שְׁנַ֣ת הַיֹּבֵ֑ל וְנִגְרַ֖ע מֵֽעֶרְכֶּֽךָ׃

‎19 ‏וְאִם־גָּאֹ֤ל יִגְאַל֙ אֶת־הַשָּׂדֶ֔ה הַמַּקְדִּ֖ישׁ אֹת֑וֹ וְ֠יָסַף חֲמִשִׁ֧ית כֶּֽסֶף־עֶרְכְּךָ֛ עָלָ֖יו וְקָ֥ם לֽוֹ׃

‎20 ‏וְאִם־לֹ֤א יִגְאַל֙ אֶת־הַשָּׂדֶ֔ה וְאִם־מָכַ֥ר אֶת־הַשָּׂדֶ֖ה לְאִ֣ישׁ אַחֵ֑ר לֹ֥א יִגָּאֵ֖ל עֽוֹד׃

‎21 ‏וְהָיָ֨ה הַשָּׂדֶ֜ה בְּצֵאת֣וֹ בַיֹּבֵ֗ל קֹ֛דֶשׁ לַֽיהוָ֖ה כִּשְׂדֵ֣ה הַחֵ֑רֶם לַכֹּהֵ֖ן תִּהְיֶ֥ה אֲחֻזָּתֽוֹ׃

‎22 ‏וְאִם֙ אֶת־שְׂדֵ֣ה מִקְנָת֔וֹ אֲשֶׁ֕ר לֹ֖א מִשְּׂדֵ֣ה אֲחֻזָּת֑וֹ יַקְדִּ֖ישׁ לַֽיהוָֽה׃

‎23 ‏וְחִשַּׁב־ל֣וֹ הַכֹּהֵ֗ן אֵ֚ת מִכְסַ֣ת הָֽעֶרְכְּךָ֔ עַ֖ד שְׁנַ֣ת הַיֹּבֵ֑ל וְנָתַ֤ן אֶת־הָעֶרְכְּךָ֙ בַּיּ֣וֹם הַה֔וּא קֹ֖דֶשׁ לַיהוָֽה׃

‎24 ‏בִּשְׁנַ֤ת הַיּוֹבֵל֙ יָשׁ֣וּב הַשָּׂדֶ֔ה לַאֲשֶׁ֥ר קָנָ֖הוּ מֵאִתּ֑וֹ לַאֲשֶׁר־ל֖וֹ אֲחֻזַּ֥ת הָאָֽרֶץ׃

‎25 ‏וְכָל־עֶרְכְּךָ֔ יִהְיֶ֖ה בְּשֶׁ֣קֶל הַקֹּ֑דֶשׁ עֶשְׂרִ֥ים גֵּרָ֖ה יִהְיֶ֥ה הַשָּֽׁקֶל׃ ס

‎26 ‏אַךְ־בְּכ֞וֹר אֲשֶׁר־יְבֻכַּ֤ר לַֽיהוָה֙ בִּבְהֵמָ֔ה לֹֽא־יַקְדִּ֥ישׁ אִ֖ישׁ אֹת֑וֹ אִם־שׁ֣וֹר אִם־שֶׂ֔ה לַֽיהוָ֖ה הֽוּא׃

‎27 ‏וְאִ֨ם בַּבְּהֵמָ֤ה הַטְּמֵאָה֙ וּפָדָ֣ה בְעֶרְכֶּ֔ךָ וְיָסַ֥ף חֲמִשִׁת֖וֹ עָלָ֑יו וְאִם־לֹ֥א יִגָּאֵ֖ל וְנִמְכַּ֥ר בְּעֶרְכֶּֽךָ׃

‎28 ‏אַךְ־כָּל־חֵ֡רֶם אֲשֶׁ֣ר יַחֲרִם֩ אִ֨ישׁ לַֽיהוָ֜ה מִכָּל־אֲשֶׁר־ל֗וֹ מֵאָדָ֤ם וּבְהֵמָה֙ וּמִשְּׂדֵ֣ה אֲחֻזָּת֔וֹ לֹ֥א יִמָּכֵ֖ר וְלֹ֣א יִגָּאֵ֑ל כָּל־חֵ֕רֶם קֹֽדֶשׁ־קָֽדָשִׁ֥ים ה֖וּא לַיהוָֽה׃

‎29 ‏כָּל־חֵ֗רֶם אֲשֶׁ֧ר יָחֳרַ֛ם מִן־הָאָדָ֖ם לֹ֣א יִפָּדֶ֑ה מ֖וֹת יוּמָֽת׃

‎30 ‏וְכָל־מַעְשַׂ֨ר הָאָ֜רֶץ מִזֶּ֤רַע הָאָ֙רֶץ֙ מִפְּרִ֣י הָעֵ֔ץ לַיהוָ֖ה ה֑וּא קֹ֖דֶשׁ לַֽיהוָֽה׃

‎31 ‏וְאִם־גָּאֹ֥ל יִגְאַ֛ל אִ֖ישׁ מִמַּֽעַשְׂר֑וֹ חֲמִשִׁית֖וֹ יֹסֵ֥ף עָלָֽיו׃

‎32 ‏וְכָל־מַעְשַׂ֤ר בָּקָר֙ וָצֹ֔אן כֹּ֥ל אֲשֶׁר־יַעֲבֹ֖ר תַּ֣חַת הַשָּׁ֑בֶט הָֽעֲשִׂירִ֕י יִֽהְיֶה־קֹּ֖דֶשׁ לַֽיהוָֽה׃

‎33 ‏לֹ֧א יְבַקֵּ֛ר בֵּֽין־ט֥וֹב לָרַ֖ע וְלֹ֣א יְמִירֶ֑נּוּ וְאִם־הָמֵ֣ר יְמִירֶ֔נּוּ וְהָֽיָה־ה֧וּא וּתְמוּרָת֛וֹ יִֽהְיֶה־קֹ֖דֶשׁ לֹ֥א יִגָּאֵֽל׃

‎34 ‏אֵ֣לֶּה הַמִּצְוֹ֗ת אֲשֶׁ֨ר צִוָּ֧ה יְהוָ֛ה אֶת־מֹשֶׁ֖ה אֶל־בְּנֵ֣י יִשְׂרָאֵ֑ל בְּהַ֖ר סִינָֽי׃

1 wayəḏabēr yəhwâ ’el-mōšeh llē’mōr:

2 dabēr ’el-bənê yiśərā’ēl wə’āmarətā ’ălēhem ’îš kî yafəli’ neḏer bə‘erəkəḵā nəfāšōṯ layhwâ:

3 wəhāyâ ‘erəkəḵā hazzāḵār miben ‘eśərîm šānâ wə‘aḏ ben-šiššîm šānâ wəhāyâ ‘erəkəḵā ḥămiššîm šeqel kesef bəšeqel haqqōḏeš:

4 wə’im-nəqēḇâ hiw’ wəhāyâ ‘erəkəḵā šəlōšîm šāqel:

5 wə’im miben-ḥāmēš šānîm wə‘aḏ ben-‘eśərîm šānâ wəhāyâ ‘erəkəḵā hazzāḵār ‘eśərîm šəqālîm wəlannəqēḇâ ‘ăśereṯ šəqālîm:

6 wə’im miben-ḥōḏeš wə‘aḏ ben-ḥāmēš šānîm wəhāyâ ‘erəkəḵā hazzāḵār ḥămiššâ šəqālîm kāsef wəlannəqēḇâ ‘erəkəḵā šəlōšeṯ šəqālîm kāsef:

7 wə’im miben-šiššîm šānâ wām^a‘əlâ ’im-zāḵār wəhāyâ ‘erəkəḵā ḥămiššâ ‘āśār šāqel wəlannəqēḇâ ‘ăśārâ šəqālîm:

8 wə’im-māḵə hû’ mē‘erəkeḵā wəhe‘ĕmîḏwō lifənê hakōhēn wəhe‘ĕrîḵə ’ōṯwō hakōhēn ‘al-pî ’ăšer taśśîḡ yaḏ hannōḏēr y^a‘ărîḵennû hakōhēn: s

9 wə’im-bəhēmâ ’ăšer yaqərîḇû mimmennâ qārəbān layhwâ kōl ’ăšer yitēn mimmennû layhwâ yihəyeh-qqōḏeš:

10 lō’ y^aḥălîfennû wəlō’-yāmîr ’ōṯwō ṭwōḇ bərā‘ ’wō-r^a‘ bəṭwōḇ wə’im-hāmēr yāmîr bəhēmâ biḇəhēmâ wəhāyâ-hû’ ûṯəmûrāṯwō yihəyeh-qqōḏeš:

11 wə’im kāl-bəhēmâ ṭəmē’â ’ăšer lō’-yaqərîḇû mimmennâ qārəbān layhwâ wəhe‘ĕmîḏ ’eṯ-habəhēmâ lifənê hakōhēn:

12 wəhe‘ĕrîḵə hakōhēn ’ōṯāh bên ṭwōḇ ûḇên rā‘ kə‘erəkəḵā hakōhēn kēn yihəyeh:

13 wə’im-gā’ōl yiḡə’ālennâ wəyāsaf ḥămîšiṯwō ‘al-‘erəkeḵā:

14 wə’îš kî-yaqədiš ’eṯ-bêṯwō qōḏeš layhwâ wəhe‘ĕrîḵwō hakōhēn bên ṭwōḇ ûḇên rā‘ ka’ăšer y^a‘ărîḵə ’ōṯwō hakōhēn kēn yāqûm:

15 wə’im-hammaqədîš yiḡə’al ’eṯ-bêṯwō wəyāsaf ḥămîšîṯ kesef-‘erəkəḵā ‘ālāyw wəhāyâ lwō:

16 wə’im| miśśəḏēh ’ăḥuzzāṯwō yaqədîš ’îš layhwâ wəhāyâ ‘erəkəḵā ləfî zarə‘wō zer^a‘ ḥōmer śə‘ōrîm b^aḥămiššîm šeqel kāsef:

17 ’im-miššənaṯ hayyōḇēl yaqədîš śāḏēhû kə‘erəkəḵā yāqûm:

18 wə’im-’^aḥar hayyōḇēl yaqədîš śāḏēhû wəḥiššaḇ-lwō hakōhēn ’eṯ-hakesef ‘al-pî haššānîm hannwōṯārōṯ ‘aḏ šənaṯ hayyōḇēl wəniḡər^a‘ mē‘erəkeḵā:

19 wə’im-gā’ōl yiḡə’al ’eṯ-haśśāḏeh hammaqədîš ’ōṯwō wəyāsaf ḥămišîṯ kesef-‘erəkəḵā ‘ālāyw wəqām lwō:

20 wə’im-lō’ yiḡə’al ’eṯ-haśśāḏeh wə’im-māḵar ’eṯ-haśśāḏeh lə’îš ’^aḥēr lō’ yigā’ēl ‘wōḏ:

21 wəhāyâ haśśāḏeh bəṣē’ṯwō ḇayyōḇēl qōḏeš layhwâ kiśəḏēh h^aḥērem lakōhēn tihəyeh ’ăḥuzzāṯwō:

22 wə’im ’eṯ-śəḏēh miqənāṯwō ’ăšer lō’ miśśəḏēh ’ăḥuzzāṯwō yaqədîš layhwâ:

23 wəḥiššaḇ-lwō hakōhēn ’ēṯ miḵəsaṯ hā‘erəkəḵā ‘aḏ šənaṯ hayyōḇēl wənāṯan ’eṯ-hā‘erəkəḵā bayywōm hahû’ qōḏeš layhwâ:

24 bišənaṯ hayywōḇēl yāšûḇ haśśāḏeh la’ăšer qānâû mē’itwō la’ăšer-lwō ’ăḥuzzaṯ hā’āreṣ:

25 wəḵāl-‘erəkəḵā yihəyeh bəšeqel haqqōḏeš ‘eśərîm gērâ yihəyeh haššāqel: s

26 ’aḵə-bəḵwōr ’ăšer-yəḇukar layhwâ biḇəhēmâ lō’-yaqədîš ’îš ’ōṯwō ’im-šwōr ’im-śeh layhwâ hû’:

27 wə’im babəhēmâ haṭṭəmē’â ûfāḏâ ḇə‘erəkeḵā wəyāsaf ḥămišiṯwō ‘ālāyw wə’im-lō’ yigā’ēl wəniməkar bə‘erəkeḵā:

28 ’aḵə-kāl-ḥērem ’ăšer y^aḥărim ’îš layhwâ mikāl-’ăšer-lwō mē’āḏām ûḇəhēmâ ûmiśśəḏēh ’ăḥuzzāṯwō lō’ yimmāḵēr wəlō’ yigā’ēl kāl-ḥērem qōḏeš-qāḏāšîm hû’ layhwâ:

29 kāl-ḥērem ’ăšer yāḥŏram min-hā’āḏām lō’ yipāḏeh mwōṯ yûmāṯ:

30 wəḵāl-m^a‘əśar hā’āreṣ mizzer^a‘ hā’āreṣ mipərî hā‘ēṣ layhwâ hû’ qōḏeš layhwâ:

31 wə’im-gā’ōl yiḡə’al ’îš mimm^a‘aśərwō ḥămišîṯwō yōsēf ‘ālāyw:

32 wəḵāl-m^a‘əśar bāqār wāṣō’n kōl ’ăšer-y^a‘ăḇōr t^aḥaṯ haššāḇeṭ hā‘ăśîrî yihəyeh-qqōḏeš layhwâ:

33 lō’ yəḇaqqēr bên-ṭwōḇ lār^a‘ wəlō’ yəmîrennû wə’im-hāmēr yəmîrennû wəhāyâ-hû’ ûṯəmûrāṯwō yihəyeh-qōḏeš lō’ yigā’ēl:

34 ’ēlleh hammiṣəwōṯ ’ăšer ṣiûâ yəhwâ ’eṯ-mōšeh ’el-bənê yiśərā’ēl bəhar sînāy: