Sacred Texts  Bible  Index 
Polyglot  KJV  Sep  Vul 

Leviticus (Vayikra) Index
  Previous  Next 

Tanach (Hebrew): Leviticus (Vayikra) Chapter 23

1 ‏וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר׃

2 ‏דַּבֵּ֞ר אֶל־בְּנֵ֤י יִשְׂרָאֵל֙ וְאָמַרְתָּ֣ אֲלֵהֶ֔ם מוֹעֲדֵ֣י יְהוָ֔ה אֲשֶׁר־תִּקְרְא֥וּ אֹתָ֖ם מִקְרָאֵ֣י קֹ֑דֶשׁ אֵ֥לֶּה הֵ֖ם מוֹעֲדָֽי׃

3 ‏שֵׁ֣שֶׁת יָמִים֮ תֵּעָשֶׂ֣ה מְלָאכָה֒ וּבַיּ֣וֹם הַשְּׁבִיעִ֗י שַׁבַּ֤ת שַׁבָּתוֹן֙ מִקְרָא־קֹ֔דֶשׁ כָּל־מְלָאכָ֖ה לֹ֣א תַעֲשׂ֑וּ שַׁבָּ֥ת הִוא֙ לַֽיהוָ֔ה בְּכֹ֖ל מֽוֹשְׁבֹתֵיכֶֽם׃ פ

4 ‏אֵ֚לֶּה מוֹעֲדֵ֣י יְהוָ֔ה מִקְרָאֵ֖י קֹ֑דֶשׁ אֲשֶׁר־תִּקְרְא֥וּ אֹתָ֖ם בְּמוֹעֲדָֽם׃

5 ‏בַּחֹ֣דֶשׁ הָרִאשׁ֗וֹן בְּאַרְבָּעָ֥ה עָשָׂ֛ר לַחֹ֖דֶשׁ בֵּ֣ין הָעַרְבָּ֑יִם פֶּ֖סַח לַיהוָֽה׃

6 ‏וּבַחֲמִשָּׁ֨ה עָשָׂ֥ר יוֹם֙ לַחֹ֣דֶשׁ הַזֶּ֔ה חַ֥ג הַמַּצּ֖וֹת לַיהוָ֑ה שִׁבְעַ֥ת יָמִ֖ים מַצּ֥וֹת תֹּאכֵֽלוּ׃

7 ‏בַּיּוֹם֙ הָֽרִאשׁ֔וֹן מִקְרָא־קֹ֖דֶשׁ יִהְיֶ֣ה לָכֶ֑ם כָּל־מְלֶ֥אכֶת עֲבֹדָ֖ה לֹ֥א תַעֲשֽׂוּ׃

8 ‏וְהִקְרַבְתֶּ֥ם אִשֶּׁ֛ה לַיהוָ֖ה שִׁבְעַ֣ת יָמִ֑ים בַּיּ֤וֹם הַשְּׁבִיעִי֙ מִקְרָא־קֹ֔דֶשׁ כָּל־מְלֶ֥אכֶת עֲבֹדָ֖ה לֹ֥א תַעֲשֽׂוּ׃ פ

9 ‏וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר׃

10 ‏דַּבֵּ֞ר אֶל־בְּנֵ֤י יִשְׂרָאֵל֙ וְאָמַרְתָּ֣ אֲלֵהֶ֔ם כִּֽי־תָבֹ֣אוּ אֶל־הָאָ֗רֶץ אֲשֶׁ֤ר אֲנִי֙ נֹתֵ֣ן לָכֶ֔ם וּקְצַרְתֶּ֖ם אֶת־קְצִירָ֑הּ וַהֲבֵאתֶ֥ם אֶת־עֹ֛מֶר רֵאשִׁ֥ית קְצִירְכֶ֖ם אֶל־הַכֹּהֵֽן׃

11 ‏וְהֵנִ֧יף אֶת־הָעֹ֛מֶר לִפְנֵ֥י יְהוָ֖ה לִֽרְצֹנְכֶ֑ם מִֽמָּחֳרַת֙ הַשַּׁבָּ֔ת יְנִיפֶ֖נּוּ הַכֹּהֵֽן׃

12 ‏וַעֲשִׂיתֶ֕ם בְּי֥וֹם הֲנִֽיפְכֶ֖ם אֶת־הָעֹ֑מֶר כֶּ֣בֶשׂ תָּמִ֧ים בֶּן־שְׁנָת֛וֹ לְעֹלָ֖ה לַיהוָֽה׃

13 ‏וּמִנְחָתוֹ֩ שְׁנֵ֨י עֶשְׂרֹנִ֜ים סֹ֣לֶת בְּלוּלָ֥ה בַשֶּׁ֛מֶן אִשֶּׁ֥ה לַיהוָ֖ה רֵ֣יחַ נִיחֹ֑חַ וְנִסְכֹּ֥הq יַ֖יִן רְבִיעִ֥ת הַהִֽין׃

14 ‏וְלֶחֶם֩ וְקָלִ֨י וְכַרְמֶ֜ל לֹ֣א תֹֽאכְל֗וּ עַד־עֶ֙צֶם֙ הַיּ֣וֹם הַזֶּ֔ה עַ֚ד הֲבִ֣יאֲכֶ֔ם אֶת־קָרְבַּ֖ן אֱלֹהֵיכֶ֑ם חֻקַּ֤ת עוֹלָם֙ לְדֹרֹ֣תֵיכֶ֔ם בְּכֹ֖ל מֹשְׁבֹֽתֵיכֶֽם׃ ס

15 ‏וּסְפַרְתֶּ֤ם לָכֶם֙ מִמָּחֳרַ֣ת הַשַּׁבָּ֔ת מִיּוֹם֙ הֲבִ֣יאֲכֶ֔ם אֶת־עֹ֖מֶר הַתְּנוּפָ֑ה שֶׁ֥בַע שַׁבָּת֖וֹת תְּמִימֹ֥ת תִּהְיֶֽינָה׃

16 ‏עַ֣ד מִֽמָּחֳרַ֤ת הַשַּׁבָּת֙ הַשְּׁבִיעִ֔ת תִּסְפְּר֖וּ חֲמִשִּׁ֣ים י֑וֹם וְהִקְרַבְתֶּ֛ם מִנְחָ֥ה חֲדָשָׁ֖ה לַיהוָֽה׃

17 ‏מִמּוֹשְׁבֹ֨תֵיכֶ֜ם תָּבִ֣יאּוּ׀ לֶ֣חֶם תְּנוּפָ֗ה שְׁ֚תַּיִם שְׁנֵ֣י עֶשְׂרֹנִ֔ים סֹ֣לֶת תִּהְיֶ֔ינָה חָמֵ֖ץ תֵּאָפֶ֑ינָה בִּכּוּרִ֖ים לַֽיהוָֽה׃

18 ‏וְהִקְרַבְתֶּ֣ם עַל־הַלֶּ֗חֶם שִׁבְעַ֨ת כְּבָשִׂ֤ים תְּמִימִם֙ בְּנֵ֣י שָׁנָ֔ה וּפַ֧ר בֶּן־בָּקָ֛ר אֶחָ֖ד וְאֵילִ֣ם שְׁנָ֑יִם יִהְי֤וּ עֹלָה֙ לַֽיהוָ֔ה וּמִנְחָתָם֙ וְנִסְכֵּיהֶ֔ם אִשֵּׁ֥ה רֵֽיחַ־נִיחֹ֖חַ לַיהוָֽה׃

19 ‏וַעֲשִׂיתֶ֛ם שְׂעִיר־עִזִּ֥ים אֶחָ֖ד לְחַטָּ֑את וּשְׁנֵ֧י כְבָשִׂ֛ים בְּנֵ֥י שָׁנָ֖ה לְזֶ֥בַח שְׁלָמִֽים׃

20 ‏וְהֵנִ֣יף הַכֹּהֵ֣ן׀ אֹתָ֡ם עַל֩ לֶ֨חֶם הַבִּכּוּרִ֤ים תְּנוּפָה֙ לִפְנֵ֣י יְהוָ֔ה עַל־שְׁנֵ֖י כְּבָשִׂ֑ים קֹ֛דֶשׁ יִהְי֥וּ לַיהוָ֖ה לַכֹּהֵֽן׃

21 ‏וּקְרָאתֶ֞ם בְּעֶ֣צֶם׀ הַיּ֣וֹם הַזֶּ֗ה מִֽקְרָא־קֹ֙דֶשׁ֙ יִהְיֶ֣ה לָכֶ֔ם כָּל־מְלֶ֥אכֶת עֲבֹדָ֖ה לֹ֣א תַעֲשׂ֑וּ חֻקַּ֥ת עוֹלָ֛ם בְּכָל־מוֹשְׁבֹ֥תֵיכֶ֖ם לְדֹרֹֽתֵיכֶֽם׃

22 ‏וּֽבְקֻצְרְכֶ֞ם אֶת־קְצִ֣יר אַרְצְכֶ֗ם לֹֽא־תְכַלֶּ֞ה פְּאַ֤ת שָֽׂדְךָ֙ בְּקֻצְרֶ֔ךָ וְלֶ֥קֶט קְצִירְךָ֖ לֹ֣א תְלַקֵּ֑ט לֶֽעָנִ֤י וְלַגֵּר֙ תַּעֲזֹ֣ב אֹתָ֔ם אֲנִ֖י יְהוָ֥ה אֱלֹהֵיכֶֽם׃ ס

23 ‏וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר׃

24 ‏דַּבֵּ֛ר אֶל־בְּנֵ֥י יִשְׂרָאֵ֖ל לֵאמֹ֑ר בַּחֹ֨דֶשׁ הַשְּׁבִיעִ֜י בְּאֶחָ֣ד לַחֹ֗דֶשׁ יִהְיֶ֤ה לָכֶם֙ שַׁבָּת֔וֹן זִכְר֥וֹן תְּרוּעָ֖ה מִקְרָא־קֹֽדֶשׁ׃

25 ‏כָּל־מְלֶ֥אכֶת עֲבֹדָ֖ה לֹ֣א תַעֲשׂ֑וּ וְהִקְרַבְתֶּ֥ם אִשֶּׁ֖ה לַיהוָֽה׃ ס

26 ‏וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר׃

27 ‏אַ֡ךְ בֶּעָשׂ֣וֹר לַחֹדֶשׁ֩ הַשְּׁבִיעִ֨י הַזֶּ֜ה י֧וֹם הַכִּפֻּרִ֣ים ה֗וּא מִֽקְרָא־קֹ֙דֶשׁ֙ יִהְיֶ֣ה לָכֶ֔ם וְעִנִּיתֶ֖ם אֶת־נַפְשֹׁתֵיכֶ֑ם וְהִקְרַבְתֶּ֥ם אִשֶּׁ֖ה לַיהוָֽה׃

28 ‏וְכָל־מְלָאכָה֙ לֹ֣א תַעֲשׂ֔וּ בְּעֶ֖צֶם הַיּ֣וֹם הַזֶּ֑ה כִּ֣י י֤וֹם כִּפֻּרִים֙ ה֔וּא לְכַפֵּ֣ר עֲלֵיכֶ֔ם לִפְנֵ֖י יְהוָ֥ה אֱלֹהֵיכֶֽם׃3

29 ‏כִּ֤י כָל־הַנֶּ֙פֶשׁ֙ אֲשֶׁ֣ר לֹֽא־תְעֻנֶּ֔ה בְּעֶ֖צֶם הַיּ֣וֹם הַזֶּ֑ה וְנִכְרְתָ֖ה מֵֽעַמֶּֽיהָ׃

30 ‏וְכָל־הַנֶּ֗פֶשׁ אֲשֶׁ֤ר תַּעֲשֶׂה֙ כָּל־מְלָאכָ֔ה בְּעֶ֖צֶם הַיּ֣וֹם הַזֶּ֑ה וְהַֽאֲבַדְתִּ֛י אֶת־הַנֶּ֥פֶשׁ הַהִ֖וא מִקֶּ֥רֶב עַמָּֽהּ׃

31 ‏כָּל־מְלָאכָ֖ה לֹ֣א תַעֲשׂ֑וּ חֻקַּ֤ת עוֹלָם֙ לְדֹרֹ֣תֵיכֶ֔ם בְּכֹ֖ל מֹֽשְׁבֹֽתֵיכֶֽם׃

32 ‏שַׁבַּ֨ת שַׁבָּת֥וֹן הוּא֙ לָכֶ֔ם וְעִנִּיתֶ֖ם אֶת־נַפְשֹׁתֵיכֶ֑ם בְּתִשְׁעָ֤ה לַחֹ֙דֶשׁ֙ בָּעֶ֔רֶב מֵעֶ֣רֶב עַד־עֶ֔רֶב תִּשְׁבְּת֖וּ שַׁבַּתְּכֶֽם׃ פ

33 ‏וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר׃

34 ‏דַּבֵּ֛ר אֶל־בְּנֵ֥י יִשְׂרָאֵ֖ל לֵאמֹ֑ר בַּחֲמִשָּׁ֨ה עָשָׂ֜ר י֗וֹם לַחֹ֤דֶשׁ הַשְּׁבִיעִי֙ הַזֶּ֔ה חַ֧ג הַסֻּכּ֛וֹת שִׁבְעַ֥ת יָמִ֖ים לַיהוָֹֽה׃

35 ‏בַּיּ֥וֹם הָרִאשׁ֖וֹן מִקְרָא־קֹ֑דֶשׁ כָּל־מְלֶ֥אכֶת עֲבֹדָ֖ה לֹ֥א תַעֲשֽׂוּ׃

36 ‏שִׁבְעַ֣ת יָמִ֔ים תַּקְרִ֥יבוּ אִשֶּׁ֖ה לַיהוָ֑ה בַּיּ֣וֹם הַשְּׁמִינִ֡י מִקְרָא־קֹדֶשׁ֩ יִהְיֶ֨ה לָכֶ֜ם וְהִקְרַבְתֶּ֨ם אִשֶּׁ֤ה לַֽיהוָה֙ עֲצֶ֣רֶת הִ֔וא כָּל־מְלֶ֥אכֶת עֲבֹדָ֖ה לֹ֥א תַעֲשֽׂוּ׃

37 ‏אֵ֚לֶּה מוֹעֲדֵ֣י יְהוָ֔ה אֲשֶׁר־תִּקְרְא֥וּ אֹתָ֖ם מִקְרָאֵ֣י קֹ֑דֶשׁ לְהַקְרִ֨יב אִשֶּׁ֜ה לַיהוָ֗ה עֹלָ֧ה וּמִנְחָ֛ה זֶ֥בַח וּנְסָכִ֖ים דְּבַר־י֥וֹם בְּיוֹמֽוֹ׃

38 ‏מִלְּבַ֖ד שַׁבְּתֹ֣ת יְּהוָ֑ה וּמִלְּבַ֣ד מַתְּנֽוֹתֵיכֶ֗ם3 וּמִלְּבַ֤ד כָּל־נִדְרֵיכֶם֙ וּמִלְּבַד֙ כָּל־נִדְב֣וֹתֵיכֶ֔ם אֲשֶׁ֥ר תִּתְּנ֖וּ לַיהוָֽה׃

39 ‏אַ֡ךְ בַּחֲמִשָּׁה֩ עָשָׂ֨ר י֜וֹם לַחֹ֣דֶשׁ הַשְּׁבִיעִ֗י בְּאָסְפְּכֶם֙ אֶת־תְּבוּאַ֣ת הָאָ֔רֶץ תָּחֹ֥גּוּ אֶת־חַג־יְהוָ֖ה שִׁבְעַ֣ת יָמִ֑ים בַּיּ֤וֹם הָֽרִאשׁוֹן֙ שַׁבָּת֔וֹן וּבַיּ֥וֹם הַשְּׁמִינִ֖י שַׁבָּתֽוֹן׃

40 ‏וּלְקַחְתֶּ֨ם לָכֶ֜ם בַּיּ֣וֹם הָרִאשׁ֗וֹן פְּרִ֨י עֵ֤ץ הָדָר֙ כַּפֹּ֣ת תְּמָרִ֔ים וַעֲנַ֥ף עֵץ־עָבֹ֖ת וְעַרְבֵי־נָ֑חַל וּשְׂמַחְתֶּ֗ם לִפְנֵ֛י יְהוָ֥ה אֱלֹהֵיכֶ֖ם שִׁבְעַ֥ת יָמִֽים׃

41 ‏וְחַגֹּתֶ֤ם אֹתוֹ֙ חַ֣ג לַֽיהוָ֔ה שִׁבְעַ֥ת יָמִ֖ים בַּשָּׁנָ֑ה חֻקַּ֤ת עוֹלָם֙ לְדֹרֹ֣תֵיכֶ֔ם בַּחֹ֥דֶשׁ הַשְּׁבִיעִ֖י תָּחֹ֥גּוּ אֹתֽוֹ׃

42 ‏בַּסֻּכֹּ֥ת תֵּשְׁב֖וּ שִׁבְעַ֣ת יָמִ֑ים כָּל־הָֽאֶזְרָח֙ בְּיִשְׂרָאֵ֔ל יֵשְׁב֖וּ בַּסֻּכֹּֽת׃

43 ‏לְמַעַן֮ יֵדְע֣וּ דֹרֹֽתֵיכֶם֒ כִּ֣י בַסֻּכּ֗וֹת הוֹשַׁ֙בְתִּי֙ אֶת־בְּנֵ֣י יִשְׂרָאֵ֔ל בְּהוֹצִיאִ֥י אוֹתָ֖ם מֵאֶ֣רֶץ מִצְרָ֑יִם אֲנִ֖י יְהוָ֥ה אֱלֹהֵיכֶֽם׃

44 ‏וַיְדַבֵּ֣ר מֹשֶׁ֔ה אֶת־מֹעֲדֵ֖י יְהוָ֑ה אֶל־בְּנֵ֖י יִשְׂרָאֵֽל׃ פ

1 wayəḏabēr yəhwâ ’el-mōšeh llē’mōr:

2 dabēr ’el-bənê yiśərā’ēl wə’āmarətā ’ălēhem mwō‘ăḏê yəhwâ ’ăšer-tiqərə’û ’ōṯām miqərā’ê qōḏeš ’ēlleh hēm mwō‘ăḏāy:

3 šēšeṯ yāmîm tē‘āśeh məlā’ḵâ ûḇayywōm haššəḇî‘î šabaṯ šabāṯwōn miqərā’-qōḏeš kāl-məlā’ḵâ lō’ ṯa‘ăśû šabāṯ hiw’ layhwâ bəḵōl mwōšəḇōṯêḵem: f

4 ’ēlleh mwō‘ăḏê yəhwâ miqərā’ê qōḏeš ’ăšer-tiqərə’û ’ōṯām bəmwō‘ăḏām:

5 baḥōḏeš hāri’šwōn bə’arəbā‘â ‘āśār laḥōḏeš bên hā‘arəbāyim pesaḥ layhwâ:

6 ûḇaḥămiššâ ‘āśār ywōm laḥōḏeš hazzeh ḥaḡ hammaṣṣwōṯ layhwâ šiḇə‘aṯ yāmîm maṣṣwōṯ tō’ḵēlû:

7 bayywōm hāri’šwōn miqərā’-qōḏeš yihəyeh lāḵem kāl-məle’ḵeṯ ‘ăḇōḏâ lō’ ṯa‘ăśû:

8 wəhiqəraḇətem ’iššeh layhwâ šiḇə‘aṯ yāmîm bayywōm haššəḇî‘î miqərā’-qōḏeš kāl-məle’ḵeṯ ‘ăḇōḏâ lō’ ṯa‘ăśû: f

9 wayəḏabēr yəhwâ ’el-mōšeh llē’mōr:

10 dabēr ’el-bənê yiśərā’ēl wə’āmarətā ’ălēhem kî-ṯāḇō’û ’el-hā’āreṣ ’ăšer ’ănî nōṯēn lāḵem ûqəṣarətem ’eṯ-qəṣîrāh wahăḇē’ṯem ’eṯ-‘ōmer rē’šîṯ qəṣîrəḵem ’el-hakōhēn:

11 wəhēnîf ’eṯ-hā‘ōmer lifənê yəhwâ lirəṣōnəḵem mimmāḥŏraṯ haššabāṯ yənîfennû hakōhēn:

12 wa‘ăśîṯem bəywōm hănîfəḵem ’eṯ-hā‘ōmer keḇeś tāmîm ben-šənāṯwō lə‘ōlâ layhwâ:

13 ûminəḥāṯwō šənê ‘eśərōnîm sōleṯ bəlûlâ ḇaššemen ’iššeh layhwâ rêḥa nîḥōḥa wənisəkōhq yayin rəḇî‘iṯ hahîn:

14 wəleḥem wəqālî wəḵarəmel lō’ ṯō’ḵəlû ‘aḏ-‘eṣem hayywōm hazzeh ‘aḏ hăḇî’ăḵem ’eṯ-qārəban ’ĕlōhêḵem ḥuqqaṯ ‘wōlām ləḏōrōṯêḵem bəḵōl mōšəḇōṯêḵem: s

15 ûsəfarətem lāḵem mimmāḥŏraṯ haššabāṯ mîywōm hăḇî’ăḵem ’eṯ-‘ōmer hatənûfâ šeḇa‘ šabāṯwōṯ təmîmōṯ tihəyeynâ:

16 ‘aḏ mimmāḥŏraṯ haššabāṯ haššəḇî‘iṯ tisəpərû ḥămiššîm ywōm wəhiqəraḇətem minəḥâ ḥăḏāšâ layhwâ:

17 mimmwōšəḇōṯêḵem tāḇî’’û| leḥem tənûfâ šətayim šənê ‘eśərōnîm sōleṯ tihəyeynâ ḥāmēṣ tē’āfeynâ bikûrîm layhwâ:

18 wəhiqəraḇətem ‘al-halleḥem šiḇə‘aṯ kəḇāśîm təmîmim bənê šānâ ûfar ben-bāqār ’eḥāḏ wə’êlim šənāyim yihəyû ‘ōlâ layhwâ ûminəḥāṯām wənisəkêhem ’iššēh rêḥa-nîḥōḥa layhwâ:

19 wa‘ăśîṯem śə‘îr-‘izzîm ’eḥāḏ ləḥaṭṭā’ṯ ûšənê ḵəḇāśîm bənê šānâ ləzeḇaḥ šəlāmîm:

20 wəhēnîf hakōhēn| ’ōṯām ‘al leḥem habikûrîm tənûfâ lifənê yəhwâ ‘al-šənê kəḇāśîm qōḏeš yihəyû layhwâ lakōhēn:

21 ûqərā’ṯem bə‘eṣem| hayywōm hazzeh miqərā’-qōḏeš yihəyeh lāḵem kāl-məle’ḵeṯ ‘ăḇōḏâ lō’ ṯa‘ăśû ḥuqqaṯ ‘wōlām bəḵāl-mwōšəḇōṯêḵem ləḏōrōṯêḵem:

22 ûḇəquṣərəḵem ’eṯ-qəṣîr ’arəṣəḵem lō’-ṯəḵalleh pə’aṯ śāḏəḵā bəquṣəreḵā wəleqeṭ qəṣîrəḵā lō’ ṯəlaqqēṭ le‘ānî wəlagēr ta‘ăzōḇ ’ōṯām ’ănî yəhwâ ’ĕlōhêḵem: s

23 wayəḏabēr yəhwâ ’el-mōšeh llē’mōr:

24 dabēr ’el-bənê yiśərā’ēl lē’mōr baḥōḏeš haššəḇî‘î bə’eḥāḏ laḥōḏeš yihəyeh lāḵem šabāṯwōn ziḵərwōn tərû‘â miqərā’-qōḏeš:

25 kāl-məle’ḵeṯ ‘ăḇōḏâ lō’ ṯa‘ăśû wəhiqəraḇətem ’iššeh layhwâ: s

26 wayəḏabēr yəhwâ ’el-mōšeh llē’mōr:

27 ’aḵə be‘āśwōr laḥōḏeš haššəḇî‘î hazzeh ywōm hakipurîm hû’ miqərā’-qōḏeš yihəyeh lāḵem wə‘innîṯem ’eṯ-nafəšōṯêḵem wəhiqəraḇətem ’iššeh layhwâ:

28 wəḵāl-məlā’ḵâ lō’ ṯa‘ăśû bə‘eṣem hayywōm hazzeh kî ywōm kipurîm hû’ ləḵapēr ‘ălêḵem lifənê yəhwâ ’ĕlōhêḵem:3

29 kî ḵāl-hannefeš ’ăšer lō’-ṯə‘unneh bə‘eṣem hayywōm hazzeh wəniḵərəṯâ mē‘ammeyhā:

30 wəḵāl-hannefeš ’ăšer ta‘ăśeh kāl-məlā’ḵâ bə‘eṣem hayywōm hazzeh wəha’ăḇaḏətî ’eṯ-hannefeš hahiw’ miqqereḇ ‘ammāh:

31 kāl-məlā’ḵâ lō’ ṯa‘ăśû ḥuqqaṯ ‘wōlām ləḏōrōṯêḵem bəḵōl mōšəḇōṯêḵem:

32 šabaṯ šabāṯwōn hû’ lāḵem wə‘innîṯem ’eṯ-nafəšōṯêḵem bəṯišə‘â laḥōḏeš bā‘ereḇ mē‘ereḇ ‘aḏ-‘ereḇ tišəbəṯû šabatəḵem: f

33 wayəḏabēr yəhwâ ’el-mōšeh llē’mōr:

34 dabēr ’el-bənê yiśərā’ēl lē’mōr baḥămiššâ ‘āśār ywōm laḥōḏeš haššəḇî‘î hazzeh ḥaḡ hassukwōṯ šiḇə‘aṯ yāmîm layhwōâ:

35 bayywōm hāri’šwōn miqərā’-qōḏeš kāl-məle’ḵeṯ ‘ăḇōḏâ lō’ ṯa‘ăśû:

36 šiḇə‘aṯ yāmîm taqərîḇû ’iššeh layhwâ bayywōm haššəmînî miqərā’-qōḏeš yihəyeh lāḵem wəhiqəraḇətem ’iššeh layhwâ ‘ăṣereṯ hiw’ kāl-məle’ḵeṯ ‘ăḇōḏâ lō’ ṯa‘ăśû:

37 ’ēlleh mwō‘ăḏê yəhwâ ’ăšer-tiqərə’û ’ōṯām miqərā’ê qōḏeš ləhaqərîḇ ’iššeh layhwâ ‘ōlâ ûminəḥâ zeḇaḥ ûnəsāḵîm dəḇar-ywōm bəywōmwō:

38 milləḇaḏ šabəṯōṯ yyəhwâ ûmilləḇaḏ matənwōṯêḵem3 ûmilləḇaḏ kāl-niḏərêḵem ûmilləḇaḏ kāl-niḏəḇwōṯêḵem ’ăšer titənû layhwâ:

39 ’aḵə baḥămiššâ ‘āśār ywōm laḥōḏeš haššəḇî‘î bə’āsəpəḵem ’eṯ-təḇû’aṯ hā’āreṣ tāḥōgû ’eṯ-ḥaḡ-yəhwâ šiḇə‘aṯ yāmîm bayywōm hāri’šwōn šabāṯwōn ûḇayywōm haššəmînî šabāṯwōn:

40 ûləqaḥətem lāḵem bayywōm hāri’šwōn pərî ‘ēṣ hāḏār kapōṯ təmārîm wa‘ănaf ‘ēṣ-‘āḇōṯ wə‘arəḇê-nāḥal ûśəmaḥətem lifənê yəhwâ ’ĕlōhêḵem šiḇə‘aṯ yāmîm:

41 wəḥagōṯem ’ōṯwō ḥaḡ layhwâ šiḇə‘aṯ yāmîm baššānâ ḥuqqaṯ ‘wōlām ləḏōrōṯêḵem baḥōḏeš haššəḇî‘î tāḥōgû ’ōṯwō:

42 bassukōṯ tēšəḇû šiḇə‘aṯ yāmîm kāl-hā’ezərāḥ bəyiśərā’ēl yēšəḇû bassukōṯ:

43 ləma‘an yēḏə‘û ḏōrōṯêḵem kî ḇassukwōṯ hwōšaḇətî ’eṯ-bənê yiśərā’ēl bəhwōṣî’î ’wōṯām mē’ereṣ miṣərāyim ’ănî yəhwâ ’ĕlōhêḵem:

44 wayəḏabēr mōšeh ’eṯ-mō‘ăḏê yəhwâ ’el-bənê yiśərā’ēl: f


Next: Leviticus (Vayikra) Chapter 24