‎1 ‏וּלְאַחְאָ֛ב שִׁבְעִ֥ים בָּנִ֖ים בְּשֹׁמְר֑וֹן וַיִּכְתֹּב֩ יֵה֨וּא סְפָרִ֜ים וַיִּשְׁלַ֣ח שֹׁמְר֗וֹן אֶל־שָׂרֵ֤י יִזְרְעֶאל֙ הַזְּקֵנִ֔ים וְאֶל־הָאֹמְנִ֥ים אַחְאָ֖ב לֵאמֹֽר׃

‎2 ‏וְעַתָּ֗ה כְּבֹ֨א³ הַסֵּ֤פֶר הַזֶּה֙ אֲלֵיכֶ֔ם וְאִתְּכֶ֖ם בְּנֵ֣י אֲדֹנֵיכֶ֑ם וְאִתְּכֶם֙ הָרֶ֣כֶב וְהַסּוּסִ֔ים וְעִ֥יר מִבְצָ֖ר וְהַנָּֽשֶׁק׃

‎3 ‏וּרְאִיתֶ֞ם הַטּ֤וֹב וְהַיָּשָׁר֙ מִבְּנֵ֣י אֲדֹנֵיכֶ֔ם וְשַׂמְתֶּ֖ם עַל־כִּסֵּ֣א אָבִ֑יו וְהִֽלָּחֲמ֖וּ עַל־בֵּ֥ית אֲדֹנֵיכֶֽם׃

‎4 ‏וַיִּֽרְאוּ֙ מְאֹ֣ד מְאֹ֔ד וַיֹּ֣אמְר֔וּ הִנֵּה֙ שְׁנֵ֣י הַמְּלָכִ֔ים לֹ֥א עָמְד֖וּ לְפָנָ֑יו וְאֵ֖יךְ נַעֲמֹ֥ד אֲנָֽחְנוּ׃

‎5 ‏וַיִּשְׁלַ֣ח אֲשֶׁר־עַל־הַבַּ֣יִת וַאֲשֶׁ֪ר עַל־הָעִ֟יר וְהַזְּקֵנִים֩ וְהָאֹמְנִ֨ים אֶל־יֵה֤וּא׀ לֵאמֹר֙ עֲבָדֶ֣יךָ אֲנַ֔חְנוּ וְכֹ֛ל אֲשֶׁר־תֹּאמַ֥ר אֵלֵ֖ינוּ נַעֲשֶׂ֑ה לֹֽא־נַמְלִ֣יךְ אִ֔ישׁ הַטּ֥וֹב בְּעֵינֶ֖יךָ עֲשֵֽׂה׃

‎6 ‏וַיִּכְתֹּ֣ב אֲלֵיהֶם֩ סֵ֨פֶר׀ שֵׁנִ֜ית לֵאמֹ֗ר אִם־לִ֨י אַתֶּ֜ם וּלְקֹלִ֣י׀ אַתֶּ֣ם שֹׁמְעִ֗ים קְחוּ֙ אֶת־רָאשֵׁי֙ אַנְשֵׁ֣י בְנֵֽי־אֲדֹנֵיכֶ֔ם וּבֹ֧אוּ אֵלַ֛י כָּעֵ֥ת מָחָ֖ר יִזְרְעֶ֑אלָה וּבְנֵ֤י הַמֶּ֙לֶךְ֙ שִׁבְעִ֣ים אִ֔ישׁ אֶת־גְּדֹלֵ֥י הָעִ֖יר מְגַדְּלִ֥ים אוֹתָֽם׃

‎7 ‏וַיְהִ֗י כְּבֹ֤א הַסֵּ֙פֶר֙ אֲלֵיהֶ֔ם וַיִּקְחוּ֙ אֶת־בְּנֵ֣י הַמֶּ֔לֶךְ וַֽיִּשְׁחֲט֖וּ שִׁבְעִ֣ים אִ֑ישׁ וַיָּשִׂ֤ימוּ אֶת־רָֽאשֵׁיהֶם֙ בַּדּוּדִ֔ים וַיִּשְׁלְח֥וּ אֵלָ֖יו יִזְרְעֶֽאלָה׃

‎8 ‏וַיָּבֹ֤א הַמַּלְאָךְ֙ וַיַּגֶּד־ל֣וֹ לֵאמֹ֔ר הֵבִ֖יאוּ רָאשֵׁ֣י בְנֵֽי־הַמֶּ֑לֶךְ וַיֹּ֗אמֶר שִׂ֣ימוּ אֹתָ֞ם שְׁנֵ֧י צִבֻּרִ֛ים פֶּ֥תַח הַשַּׁ֖עַר עַד־הַבֹּֽקֶר׃

‎9 ‏וַיְהִ֤י בַבֹּ֙קֶר֙ וַיֵּצֵ֣א וַֽיַּעֲמֹ֔ד וַיֹּ֙אמֶר֙ אֶל־כָּל־הָעָ֔ם צַדִּקִ֖ים אַתֶּ֑ם הִנֵּ֨ה אֲנִ֜י קָשַׁ֤רְתִּי עַל־אֲדֹנִי֙ וָאֶהְרְגֵ֔הוּ וּמִ֥י הִכָּ֖ה אֶת־כָּל־אֵֽלֶּה׃

‎10 ‏דְּע֣וּ אֵפ֗וֹא כִּי֩ לֹ֨א יִפֹּ֜ל מִדְּבַ֤ר יְהוָה֙ אַ֔רְצָה אֲשֶׁר־דִּבֶּ֥ר יְהוָ֖ה עַל־בֵּ֣ית אַחְאָ֑ב וַיהוָ֣ה עָשָׂ֔ה אֵ֚ת אֲשֶׁ֣ר דִּבֶּ֔ר בְּיַ֖ד עַבְדּ֥וֹ אֵלִיָּֽהוּ׃

‎11 ‏וַיַּ֣ךְ יֵה֗וּא אֵ֣ת כָּל־הַנִּשְׁאָרִ֤ים לְבֵית־אַחְאָב֙ בְּיִזְרְעֶ֔אל וְכָל־גְּדֹלָ֖יו וּמְיֻדָּעָ֣יו וְכֹהֲנָ֑יו עַד־בִּלְתִּ֥י הִשְׁאִֽיר־ל֖וֹ שָׂרִֽיד׃

‎12 ‏וַיָּ֙קָם֙ וַיָּבֹ֔א וַיֵּ֖לֶךְ שֹׁמְר֑וֹן ה֛וּא בֵּֽית־עֵ֥קֶד הָרֹעִ֖ים בַּדָּֽרֶךְ׃

‎13 ‏וְיֵה֗וּא מָצָא֙ אֶת־אֲחֵי֙ אֲחַזְיָ֣הוּ מֶֽלֶךְ־יְהוּדָ֔ה וַיֹּ֖אמֶר מִ֣י אַתֶּ֑ם וַיֹּאמְר֗וּ אֲחֵ֤י אֲחַזְיָ֙הוּ֙ אֲנַ֔חְנוּ וַנֵּ֛רֶד לִשְׁל֥וֹם בְּנֵֽי־הַמֶּ֖לֶךְ וּבְנֵ֥י הַגְּבִירָֽה׃

‎14 ‏וַיֹּ֙אמֶר֙ תִּפְשׂ֣וּם חַיִּ֔ים וַֽיִּתְפְּשׂ֖וּם חַיִּ֑ים וַֽיִּשְׁחָט֞וּם אֶל־בּ֣וֹר בֵּֽית־עֵ֗קֶד אַרְבָּעִ֤ים וּשְׁנַ֙יִם֙ אִ֔ישׁ וְלֹֽא־הִשְׁאִ֥יר אִ֖ישׁ מֵהֶֽם׃ ס

‎15 ‏וַיֵּ֣לֶךְ מִשָּׁ֡ם וַיִּמְצָ֣א אֶת־יְהוֹנָדָב֩ בֶּן־רֵכָ֨ב לִקְרָאת֜וֹ וַֽיְבָרְכֵ֗הוּ וַיֹּ֨אמֶר אֵלָ֜יו הֲיֵ֧שׁ אֶת־לְבָבְךָ֣ יָשָׁ֗ר כַּאֲשֶׁ֤ר לְבָבִי֙ עִם־לְבָבֶ֔ךָ וַיֹּ֨אמֶר יְהוֹנָדָ֥ב יֵ֛שׁ וָיֵ֖שׁ תְּנָ֣ה אֶת־יָדֶ֑ךָ וַיִּתֵּ֣ן יָד֔וֹ וַיַּעֲלֵ֥הוּ אֵלָ֖יו אֶל־הַמֶּרְכָּבָֽה׃

‎16 ‏וַיֹּ֙אמֶר֙ לְכָ֣ה אִתִּ֔י וּרְאֵ֖ה בְּקִנְאָתִ֣י לַיהוָ֑ה וַיַּרְכִּ֥בוּ אֹת֖וֹ בְּרִכְבּֽוֹ׃

‎17 ‏וַיָּבֹא֙ שֹֽׁמְר֔וֹן וַ֠יַּךְ אֶת־כָּל־הַנִּשְׁאָרִ֧ים לְאַחְאָ֛ב בְּשֹׁמְר֖וֹן עַד־הִשְׁמִיד֑וֹ כִּדְבַ֣ר יְהוָ֔ה אֲשֶׁ֥ר דִּבֶּ֖ר אֶל־אֵלִיָּֽהוּ׃ פ

‎18 ‏וַיִּקְבֹּ֤ץ יֵהוּא֙ אֶת־כָּל־הָעָ֔ם וַיֹּ֣אמֶר אֲלֵהֶ֔ם אַחְאָ֕ב עָבַ֥ד אֶת־הַבַּ֖עַל מְעָ֑ט יֵה֖וּא יַעַבְדֶ֥נּוּ הַרְבֵּֽה׃

‎19 ‏וְעַתָּ֣ה כָל־נְבִיאֵ֣י הַבַּ֡עַל כָּל־עֹבְדָ֣יו וְכָל־כֹּהֲנָיו֩ קִרְא֨וּ אֵלַ֜י אִ֣ישׁ אַל־יִפָּקֵ֗ד כִּי֩ זֶ֨בַח גָּד֥וֹל לִי֙ לַבַּ֔עַל כֹּ֥ל אֲשֶׁר־יִפָּקֵ֖ד לֹ֣א יִֽחְיֶ֑ה וְיֵהוּא֙ עָשָׂ֣ה בְעָקְבָּ֔ה לְמַ֥עַן הַאֲבִ֖יד אֶת־עֹבְדֵ֥י הַבָּֽעַל׃

‎20 ‏וַיֹּ֣אמֶר יֵה֗וּא קַדְּשׁ֧וּ עֲצָרָ֛ה לַבַּ֖עַל וַיִּקְרָֽאוּ׃

‎21 ‏וַיִּשְׁלַ֤ח יֵהוּא֙ בְּכָל־יִשְׂרָאֵ֔ל וַיָּבֹ֙אוּ֙ כָּל־עֹבְדֵ֣י הַבַּ֔עַל וְלֹֽא־נִשְׁאַ֥ר אִ֖ישׁ אֲשֶׁ֣ר לֹֽא־בָ֑א וַיָּבֹ֙אוּ֙ בֵּ֣ית הַבַּ֔עַל וַיִּמָּלֵ֥א בֵית־הַבַּ֖עַל פֶּ֥ה לָפֶֽה׃

‎22 ‏וַיֹּ֗אמֶר לַֽאֲשֶׁר֙ עַל־הַמֶּלְתָּחָ֔ה הוֹצֵ֣א לְב֔וּשׁ לְכֹ֖ל עֹבְדֵ֣י הַבָּ֑עַל וַיֹּצֵ֥א לָהֶ֖ם הַמַּלְבּֽוּשׁ׃

‎23 ‏וַיָּבֹ֥א יֵה֛וּא וִיהוֹנָדָ֥ב בֶּן־רֵכָ֖ב בֵּ֣ית הַבָּ֑עַל וַיֹּ֜אמֶר לְעֹבְדֵ֣י הַבַּ֗עַל חַפְּשׂ֤וּ וּרְאוּ֙ פֶּן־יֶשׁ־פֹּ֤ה עִמָּכֶם֙ מֵעַבְדֵ֣י יְהוָ֔ה כִּ֛י אִם־עֹבְדֵ֥י הַבַּ֖עַל לְבַדָּֽם׃

‎24 ‏וַיָּבֹ֕אוּ לַעֲשׂ֖וֹת זְבָחִ֣ים וְעֹל֑וֹת וְיֵה֞וּא שָׂם־ל֤וֹ בַחוּץ֙ שְׁמֹנִ֣ים אִ֔ישׁ וַיֹּ֗אמֶר הָאִ֤ישׁ אֲשֶׁר־יִמָּלֵט֙ מִן־הָאֲנָשִׁ֗ים אֲשֶׁ֤ר אֲנִי֙ מֵבִ֣יא עַל־יְדֵיכֶ֔ם נַפְשׁ֖וֹ תַּ֥חַת נַפְשֽׁוֹ׃

‎25 ‏וַיְהִ֞י כְּכַלֹּת֣וֹ׀ לַעֲשׂ֣וֹת הָעֹלָ֗ה וַיֹּ֣אמֶר יֵ֠הוּא לָרָצִ֨ים וְלַשָּׁלִשִׁ֜ים בֹּ֤אוּ הַכּוּם֙ אִ֣ישׁ אַל־יֵצֵ֔א וַיַּכּ֖וּם לְפִי־חָ֑רֶב וַיַּשְׁלִ֗כוּ הָֽרָצִים֙ וְהַשָּׁ֣לִשִׁ֔ים וַיֵּלְכ֖וּ עַד־עִ֥יר בֵּית־הַבָּֽעַל׃

‎26 ‏וַיֹּצִ֛אוּ אֶת־מַצְּב֥וֹת בֵּית־הַבַּ֖עַל וַֽיִּשְׂרְפֽוּהָ׃

‎27 ‏וַֽיִּתְּצ֔וּ אֵ֖ת מַצְּבַ֣ת הַבָּ֑עַל וַֽיִּתְּצוּ֙ אֶת־בֵּ֣ית הַבַּ֔עַל וַיְשִׂמֻ֥הוּ למחראות לְמֽוֹצָא֖וֹת עַד־הַיּֽוֹם׃

‎28 ‏וַיַּשְׁמֵ֥ד יֵה֛וּא אֶת־הַבַּ֖עַל מִיִּשְׂרָאֵֽל׃

‎29 ‏רַ֠ק חֲטָאֵ֞י יָרָבְעָ֤ם בֶּן־נְבָט֙ אֲשֶׁ֣ר הֶחֱטִ֣יא אֶת־יִשְׂרָאֵ֔ל לֹֽא־סָ֥ר יֵה֖וּא מֵאַֽחֲרֵיהֶ֑ם עֶגְלֵי֙ הַזָּהָ֔ב אֲשֶׁ֥ר בֵּֽית־אֵ֖ל וַאֲשֶׁ֥ר בְּדָֽן׃ ס

‎30 ‏וַיֹּ֨אמֶר יְהוָ֜ה אֶל־יֵה֗וּא יַ֤עַן אֲשֶׁר־הֱטִיבֹ֙תָ֙ לַעֲשׂ֤וֹת הַיָּשָׁר֙ בְּעֵינַ֔י כְּכֹל֙ אֲשֶׁ֣ר בִּלְבָבִ֔י עָשִׂ֖יתָ לְבֵ֣ית אַחְאָ֑ב בְּנֵ֣י רְבִעִ֔ים יֵשְׁב֥וּ לְךָ֖ עַל־כִּסֵּ֥א יִשְׂרָאֵֽל׃

‎31 ‏וְיֵה֗וּא לֹ֥א שָׁמַ֛ר לָלֶ֛כֶת בְּתֽוֹרַת־יְהוָ֥ה אֱלֹהֵֽי־יִשְׂרָאֵ֖ל בְּכָל־לְבָב֑וֹ לֹ֣א סָ֗ר מֵעַל֙ חַטֹּ֣אות יָֽרָבְעָ֔ם אֲשֶׁ֥ר הֶחֱטִ֖יא אֶת־יִשְׂרָאֵֽל׃

‎32 ‏בַּיָּמִ֣ים הָהֵ֔ם הֵחֵ֣ל יְהוָ֔ה לְקַצּ֖וֹת בְּיִשְׂרָאֵ֑ל וַיַּכֵּ֥ם חֲזָאֵ֖ל בְּכָל־גְּב֥וּל יִשְׂרָאֵֽל׃

‎33 ‏מִן־הַיַּרְדֵּן֙ מִזְרַ֣ח הַשֶּׁ֔מֶשׁ אֵ֚ת כָּל־אֶ֣רֶץ הַגִּלְעָ֔ד הַגָּדִ֥י וְהָרֻאובֵנִ֖י וְהַֽמְנַשִּׁ֑י מֵעֲרֹעֵר֙ אֲשֶׁ֣ר עַל־נַ֣חַל אַרְנֹ֔ן וְהַגִּלְעָ֖ד וְהַבָּשָֽׁן׃

‎34 ‏וְיֶ֨תֶר דִּבְרֵ֥י יֵה֛וּא וְכָל־אֲשֶׁ֥ר עָשָׂ֖ה וְכָל־גְּבוּרָת֑וֹ הֲלֽוֹא־הֵ֣ם כְּתוּבִ֗ים עַל־סֵ֛פֶר דִּבְרֵ֥י הַיָּמִ֖ים לְמַלְכֵ֥י יִשְׂרָאֵֽל׃

‎35 ‏וַיִּשְׁכַּ֤ב יֵהוּא֙ עִם־אֲבֹתָ֔יו וַיִּקְבְּר֥וּ אֹת֖וֹ בְּשֹׁמְר֑וֹן וַיִּמְלֹ֛ךְ יְהוֹאָחָ֥ז בְּנ֖וֹ תַּחְתָּֽיו׃

‎36 ‏וְהַיָּמִ֗ים אֲשֶׁ֨ר מָלַ֤ךְ יֵהוּא֙ עַל־יִשְׂרָאֵ֔ל עֶשְׂרִ֥ים וּשְׁמֹנֶֽה־שָׁנָ֖ה בְּשֹׁמְרֽוֹן׃ פ

1 ûlə’^aḥə’āḇ šiḇə‘îm bānîm bəšōmərwōn wayyiḵətōḇ yēhû’ səfārîm wayyišəl^aḥ šōmərwōn ’el-śārê yizərə‘e’l hazzəqēnîm wə’el-hā’ōmənîm ’^aḥə’āḇ lē’mōr:

2 wə‘atâ kəḇō’³ hassēfer hazzeh ’ălêḵem wə’itəḵem bənê ’ăḏōnêḵem wə’itəḵem hāreḵeḇ wəhassûsîm wə‘îr miḇəṣār wəhannāšeq:

3 ûrə’îṯem haṭṭwōḇ wəhayyāšār mibənê ’ăḏōnêḵem wəśamətem ‘al-kissē’ ’āḇîw wəhillāḥămû ‘al-bêṯ ’ăḏōnêḵem:

4 wayyirə’û mə’ōḏ mə’ōḏ wayyō’mərû hinnēh šənê hamməlāḵîm lō’ ‘āməḏû ləfānāyw wə’êḵə n^a‘ămōḏ ’ănāḥənû:

5 wayyišəl^aḥ ’ăšer-‘al-habayiṯ wa’ăšer ‘al-hā‘îr wəhazzəqēnîm wəhā’ōmənîm ’el-yēhû’| lē’mōr ‘ăḇāḏeyḵā ’ăn^aḥənû wəḵōl ’ăšer-tō’mar ’ēlênû n^a‘ăśeh lō’-naməlîḵə ’îš haṭṭwōḇ bə‘êneyḵā ‘ăśēh:

6 wayyiḵətōḇ ’ălêhem sēfer| šēnîṯ lē’mōr ’im-lî ’atem ûləqōlî| ’atem šōmə‘îm qəḥû ’eṯ-rā’šê ’anəšê ḇənê-’ăḏōnêḵem ûḇō’û ’ēlay kā‘ēṯ māḥār yizərə‘e’lâ ûḇənê hammeleḵə šiḇə‘îm ’îš ’eṯ-gəḏōlê hā‘îr məḡadəlîm ’wōṯām:

7 wayəhî kəḇō’ hassēfer ’ălêhem wayyiqəḥû ’eṯ-bənê hammeleḵə wayyišəḥăṭû šiḇə‘îm ’îš wayyāśîmû ’eṯ-rā’šêhem badûḏîm wayyišələḥû ’ēlāyw yizərə‘e’lâ:

8 wayyāḇō’ hammalə’āḵə wayyageḏ-lwō lē’mōr hēḇî’û rā’šê ḇənê-hammeleḵə wayyō’mer śîmû ’ōṯām šənê ṣiburîm peṯ^aḥ hašš^a‘ar ‘aḏ-habōqer:

9 wayəhî ḇabōqer wayyēṣē’ wayy^a‘ămōḏ wayyō’mer ’el-kāl-hā‘ām ṣadiqîm ’atem hinnēh ’ănî qāšarətî ‘al-’ăḏōnî wā’ehərəḡēhû ûmî hikâ ’eṯ-kāl-’ēlleh:

10 də‘û ’ēfwō’ kî lō’ yipōl midəḇar yəhwâ ’arəṣâ ’ăšer-diber yəhwâ ‘al-bêṯ ’^aḥə’āḇ wayhwâ ‘āśâ ’ēṯ ’ăšer diber bəyaḏ ‘aḇədwō ’ēlîyâû:

11 wayyaḵə yēhû’ ’ēṯ kāl-hannišə’ārîm ləḇêṯ-’^aḥə’āḇ bəyizərə‘e’l wəḵāl-gəḏōlāyw ûməyudā‘āyw wəḵōhănāyw ‘aḏ-bilətî hišə’îr-lwō śārîḏ:

12 wayyāqām wayyāḇō’ wayyēleḵə šōmərwōn hû’ bêṯ-‘ēqeḏ hārō‘îm badāreḵə:

13 wəyēhû’ māṣā’ ’eṯ-’ăḥê ’ăḥazəyâû meleḵə-yəhûḏâ wayyō’mer mî ’atem wayyō’mərû ’ăḥê ’ăḥazəyâû ’ăn^aḥənû wannēreḏ lišəlwōm bənê-hammeleḵə ûḇənê hagəḇîrâ:

14 wayyō’mer tifəśûm ḥayyîm wayyiṯəpəśûm ḥayyîm wayyišəḥāṭûm ’el-bwōr bêṯ-‘ēqeḏ ’arəbā‘îm ûšənayim ’îš wəlō’-hišə’îr ’îš mēhem: s

15 wayyēleḵə miššām wayyiməṣā’ ’eṯ-yəhwōnāḏāḇ ben-rēḵāḇ liqərā’ṯwō wayəḇārəḵēhû wayyō’mer ’ēlāyw hăyēš ’eṯ-ləḇāḇəḵā yāšār ka’ăšer ləḇāḇî ‘im-ləḇāḇeḵā wayyō’mer yəhwōnāḏāḇ yēš wāyēš tənâ ’eṯ-yāḏeḵā wayyitēn yāḏwō wayy^a‘ălēhû ’ēlāyw ’el-hammerəkāḇâ:

16 wayyō’mer ləḵâ ’itî ûrə’ēh bəqinə’āṯî layhwâ wayyarəkiḇû ’ōṯwō bəriḵəbwō:

17 wayyāḇō’ šōmərwōn wayyaḵə ’eṯ-kāl-hannišə’ārîm lə’^aḥə’āḇ bəšōmərwōn ‘aḏ-hišəmîḏwō kiḏəḇar yəhwâ ’ăšer diber ’el-’ēlîyâû: f

18 wayyiqəbōṣ yēhû’ ’eṯ-kāl-hā‘ām wayyō’mer ’ălēhem ’^aḥə’āḇ ‘āḇaḏ ’eṯ-hab^a‘al mə‘āṭ yēhû’ y^a‘aḇəḏennû harəbēh:

19 wə‘atâ ḵāl-nəḇî’ê hab^a‘al kāl-‘ōḇəḏāyw wəḵāl-kōhănāyw qirə’û ’ēlay ’îš ’al-yipāqēḏ kî zeḇ^aḥ gāḏwōl lî lab^a‘al kōl ’ăšer-yipāqēḏ lō’ yiḥəyeh wəyēhû’ ‘āśâ ḇə‘āqəbâ ləm^a‘an ha’ăḇîḏ ’eṯ-‘ōḇəḏê habā‘al:

20 wayyō’mer yēhû’ qadəšû ‘ăṣārâ lab^a‘al wayyiqərā’û:

21 wayyišəl^aḥ yēhû’ bəḵāl-yiśərā’ēl wayyāḇō’û kāl-‘ōḇəḏê hab^a‘al wəlō’-nišə’ar ’îš ’ăšer lō’-ḇā’ wayyāḇō’û bêṯ hab^a‘al wayyimmālē’ ḇêṯ-hab^a‘al peh lāfeh:

22 wayyō’mer la’ăšer ‘al-hammelətāḥâ hwōṣē’ ləḇûš ləḵōl ‘ōḇəḏê habā‘al wayyōṣē’ lâem hammaləbûš:

23 wayyāḇō’ yēhû’ wîhwōnāḏāḇ ben-rēḵāḇ bêṯ habā‘al wayyō’mer lə‘ōḇəḏê hab^a‘al ḥapəśû ûrə’û pen-yeš-pōh ‘immāḵem mē‘aḇəḏê yəhwâ kî ’im-‘ōḇəḏê hab^a‘al ləḇadām:

24 wayyāḇō’û l^a‘ăśwōṯ zəḇāḥîm wə‘ōlwōṯ wəyēhû’ śām-lwō ḇ^aḥûṣ šəmōnîm ’îš wayyō’mer hā’îš ’ăšer-yimmālēṭ min-hā’ănāšîm ’ăšer ’ănî mēḇî’ ‘al-yəḏêḵem nafəšwō t^aḥaṯ nafəšwō:

25 wayəhî kəḵallōṯwō| l^a‘ăśwōṯ hā‘ōlâ wayyō’mer yēhû’ lārāṣîm wəlaššālišîm bō’û hakûm ’îš ’al-yēṣē’ wayyakûm ləfî-ḥāreḇ wayyašəliḵû hārāṣîm wəhaššālišîm wayyēləḵû ‘aḏ-‘îr bêṯ-habā‘al:

26 wayyōṣi’û ’eṯ-maṣṣəḇwōṯ bêṯ-hab^a‘al wayyiśərəfûhā:

27 wayyitəṣû ’ēṯ maṣṣəḇaṯ habā‘al wayyitəṣû ’eṯ-bêṯ hab^a‘al wayəśimuhû ləm^aḥărā’wōṯ ləmwōṣā’wōṯ ‘aḏ-hayywōm:

28 wayyašəmēḏ yēhû’ ’eṯ-hab^a‘al mîyiśərā’ēl:

29 raq ḥăṭā’ê yārāḇə‘ām ben-nəḇāṭ ’ăšer heḥĕṭî’ ’eṯ-yiśərā’ēl lō’-sār yēhû’ mē’^aḥărêhem ‘eḡəlê hazzâāḇ ’ăšer bêṯ-’ēl wa’ăšer bəḏān: s

30 wayyō’mer yəhwâ ’el-yēhû’ y^a‘an ’ăšer-hĕṭîḇōṯā l^a‘ăśwōṯ hayyāšār bə‘ênay kəḵōl ’ăšer biləḇāḇî ‘āśîṯā ləḇêṯ ’^aḥə’āḇ bənê rəḇi‘îm yēšəḇû ləḵā ‘al-kissē’ yiśərā’ēl:

31 wəyēhû’ lō’ šāmar lāleḵeṯ bəṯwōraṯ-yəhwâ ’ĕlōhê-yiśərā’ēl bəḵāl-ləḇāḇwō lō’ sār mē‘al ḥaṭṭō’wṯ yārāḇə‘ām ’ăšer heḥĕṭî’ ’eṯ-yiśərā’ēl:

32 bayyāmîm hâēm hēḥēl yəhwâ ləqaṣṣwōṯ bəyiśərā’ēl wayyakēm ḥăzā’ēl bəḵāl-gəḇûl yiśərā’ēl:

33 min-hayyarədēn mizər^aḥ haššemeš ’ēṯ kāl-’ereṣ hagilə‘āḏ hagāḏî wəhāru’wḇēnî wəhamənaššî mē‘ărō‘ēr ’ăšer ‘al-n^aḥal ’arənōn wəhagilə‘āḏ wəhabāšān:

34 wəyeṯer diḇərê yēhû’ wəḵāl-’ăšer ‘āśâ wəḵāl-gəḇûrāṯwō hălwō’-hēm kəṯûḇîm ‘al-sēfer diḇərê hayyāmîm ləmaləḵê yiśərā’ēl:

35 wayyišəkaḇ yēhû’ ‘im-’ăḇōṯāyw wayyiqəbərû ’ōṯwō bəšōmərwōn wayyiməlōḵə yəhwō’āḥāz bənwō t^aḥətāyw:

36 wəhayyāmîm ’ăšer mālaḵə yēhû’ ‘al-yiśərā’ēl ‘eśərîm ûšəmōneh-šānâ bəšōmərwōn: f