Sacred Texts  Bible  Index 
Polyglot  KJV  Sep  Vul 

Jeremiah (Yermiyah) Index
  Previous  Next 

Tanach (Hebrew): Jeremiah (Yermiyah) Chapter 35

1 ‏הַדָּבָ֛ר אֲשֶׁר־הָיָ֥ה אֶֽל־יִרְמְיָ֖הוּ מֵאֵ֣ת יְהוָ֑ה בִּימֵ֨י יְהוֹיָקִ֧ים בֶּן־יֹאשִׁיָּ֛הוּ מֶ֥לֶךְ יְהוּדָ֖ה לֵאמֹֽר׃

2 ‏הָלוֹךְ֮ אֶל־בֵּ֣ית הָרֵכָבִים֒ וְדִבַּרְתָּ֣ אוֹתָ֔ם וַהֲבִֽאוֹתָם֙ בֵּ֣ית יְהוָ֔ה אֶל־אַחַ֖ת הַלְּשָׁכ֑וֹת וְהִשְׁקִיתָ֥ אוֹתָ֖ם יָֽיִן׃

3 ‏וָאֶקַּ֞ח אֶת־יַאֲזַנְיָ֤ה בֶֽן־יִרְמְיָ֙הוּ֙ בֶּן־חֲבַצִּנְיָ֔ה וְאֶת־אֶחָ֖יו וְאֶת־כָּל־בָּנָ֑יו וְאֵ֖ת כָּל־בֵּ֥ית הָרֵכָבִֽים׃

4 ‏וָאָבִ֤א אֹתָם֙ בֵּ֣ית יְהוָ֔ה אֶל־לִשְׁכַּ֗ת בְּנֵ֛י חָנָ֥ן בֶּן־יִגְדַּלְיָ֖הוּ אִ֣ישׁ הָאֱלֹהִ֑ים אֲשֶׁר־אֵ֙צֶל֙ לִשְׁכַּ֣ת הַשָּׂרִ֔ים אֲשֶׁ֣ר מִמַּ֗עַל לְלִשְׁכַּ֛ת מַעֲשֵׂיָ֥הוּ בֶן־שַׁלֻּ֖ם שֹׁמֵ֥ר הַסַּֽף׃

5 ‏וָאֶתֵּ֞ן לִפְנֵ֣י׀ בְּנֵ֣י בֵית־הָרֵכָבִ֗ים גְּבִעִ֛ים מְלֵאִ֥ים יַ֖יִן וְכֹס֑וֹת וָאֹמַ֥ר אֲלֵיהֶ֖ם שְׁתוּ־יָֽיִן׃

6 ‏וַיֹּאמְר֖וּ לֹ֣א נִשְׁתֶּה־יָּ֑יִן כִּי֩ יוֹנָדָ֨ב בֶּן־רֵכָ֜ב אָבִ֗ינוּ צִוָּ֤ה עָלֵ֙ינוּ֙ לֵאמֹ֔ר לֹ֧א תִשְׁתּוּ־יַ֛יִן אַתֶּ֥ם וּבְנֵיכֶ֖ם עַד־עוֹלָֽם׃

7 ‏וּבַ֣יִת לֹֽא־תִבְנ֗וּ וְזֶ֤רַע לֹֽא־תִזְרָ֙עוּ֙ וְכֶ֣רֶם לֹֽא־תִטָּ֔עוּ וְלֹ֥א יִֽהְיֶ֖ה לָכֶ֑ם כִּ֠י בָּאֳהָלִ֤ים תֵּֽשְׁבוּ֙ כָּל־יְמֵיכֶ֔ם לְמַ֨עַן תִּֽחְי֜וּ יָמִ֤ים רַבִּים֙ עַל־פְּנֵ֣י הָאֲדָמָ֔ה אֲשֶׁ֥ר אַתֶּ֖ם גָּרִ֥ים שָֽׁם׃

8 ‏וַנִּשְׁמַ֗ע בְּק֨וֹל יְהוֹנָדָ֤ב בֶּן־רֵכָב֙ אָבִ֔ינוּ לְכֹ֖ל אֲשֶׁ֣ר צִוָּ֑נוּ לְבִלְתִּ֤י שְׁתֽוֹת־יַ֙יִן֙ כָּל־יָמֵ֔ינוּ אֲנַ֣חְנוּ נָשֵׁ֔ינוּ בָּנֵ֖ינוּ וּבְנֹתֵֽינוּ׃

9 ‏וּלְבִלְתִּ֛י בְּנ֥וֹת בָּתִּ֖ים לְשִׁבְתֵּ֑נוּ וְכֶ֧רֶם וְשָׂדֶ֛ה וָזֶ֖רַע לֹ֥א יִֽהְיֶה־לָּֽנוּ׃

10 ‏וַנֵּ֖שֶׁב בָּֽאֳהָלִ֑ים וַנִּשְׁמַ֣ע וַנַּ֔עַשׂ כְּכֹ֥ל אֲשֶׁר־צִוָּ֖נוּ יוֹנָדָ֥ב אָבִֽינוּ׃

11 ‏וַיְהִ֗י בַּעֲל֨וֹת נְבוּכַדְרֶאצַּ֥ר מֶֽלֶךְ־בָּבֶל֮ אֶל־הָאָרֶץ֒ וַנֹּ֗אמֶר בֹּ֚אוּ וְנָב֣וֹא יְרוּשָׁלִַ֔ם מִפְּנֵי֙ חֵ֣יל הַכַּשְׂדִּ֔ים וּמִפְּנֵ֖י חֵ֣יל אֲרָ֑ם וַנֵּ֖שֶׁב בִּירוּשָׁלִָֽם׃ פ

12 ‏וַֽיְהִי֙ דְּבַר־יְהוָ֔ה אֶֽל־יִרְמְיָ֖הוּ לֵאמֹֽר׃

13 ‏כֹּֽה־אָמַ֞ר יְהוָ֤ה צְבָאוֹת֙ אֱלֹהֵ֣י יִשְׂרָאֵ֔ל הָלֹ֤ךְ וְאָֽמַרְתָּ֙ לְאִ֣ישׁ יְהוּדָ֔ה וּלְיֽוֹשְׁבֵ֖י יְרֽוּשָׁלִָ֑ם הֲל֨וֹא תִקְח֥וּ מוּסָ֛ר לִשְׁמֹ֥עַ אֶל־דְּבָרַ֖י נְאֻם־יְהוָֽה׃

14 ‏הוּקַ֡ם אֶת־דִּבְרֵ֣י יְהוֹנָדָ֣ב בֶּן־רֵ֠כָב אֲשֶׁר־צִוָּ֨ה אֶת־בָּנָ֜יו לְבִלְתִּ֣י שְׁתֽוֹת־יַ֗יִן וְלֹ֤א שָׁתוּ֙ עַד־הַיּ֣וֹם הַזֶּ֔ה כִּ֣י שָֽׁמְע֔וּ אֵ֖ת מִצְוַ֣ת אֲבִיהֶ֑ם וְאָ֨נֹכִ֜י דִּבַּ֤רְתִּי אֲלֵיכֶם֙ הַשְׁכֵּ֣ם וְדַבֵּ֔ר וְלֹ֥א שְׁמַעְתֶּ֖ם אֵלָֽי׃

15 ‏וָאֶשְׁלַ֣ח אֲלֵיכֶ֣ם אֶת־כָּל־עֲבָדַ֣י הַנְּבִאִ֣ים׀ הַשְׁכֵּ֣ים וְשָׁלֹ֣חַ׀ לֵאמֹ֡ר שֻׁבוּ־נָ֡א אִישׁ֩ מִדַּרְכּ֨וֹ הָרָעָ֜ה וְהֵיטִ֣יבוּ מַֽעַלְלֵיכֶ֗ם וְאַל־תֵּ֨לְכ֜וּ אַחֲרֵ֨י אֱלֹהִ֤ים אֲחֵרִים֙ לְעָבְדָ֔ם וּשְׁבוּ֙ אֶל־הָ֣אֲדָמָ֔ה אֲשֶׁר־נָתַ֥תִּי לָכֶ֖ם וְלַאֲבֹֽתֵיכֶ֑ם וְלֹ֤א הִטִּיתֶם֙ אֶֽת־אָזְנְכֶ֔ם וְלֹ֥א שְׁמַעְתֶּ֖ם אֵלָֽי׃

16 ‏כִּ֣י הֵקִ֗ימוּ בְּנֵי֙ יְהוֹנָדָ֣ב בֶּן־רֵכָ֔ב אֶת־מִצְוַ֥ת אֲבִיהֶ֖ם אֲשֶׁ֣ר צִוָּ֑ם וְהָעָ֣ם הַזֶּ֔ה לֹ֥א שָׁמְע֖וּ אֵלָֽי׃ ס

17 ‏לָ֠כֵן כֹּֽה־אָמַ֨ר יְהוָ֜ה אֱלֹהֵ֤י צְבָאוֹת֙ אֱלֹהֵ֣י יִשְׂרָאֵ֔ל הִנְנִ֧י מֵבִ֣יא אֶל־יְהוּדָ֗ה וְאֶ֤ל כָּל־יֽוֹשְׁבֵי֙ יְר֣וּשָׁלִַ֔ם אֵ֚ת כָּל־הָ֣רָעָ֔ה אֲשֶׁ֥ר דִּבַּ֖רְתִּי עֲלֵיהֶ֑ם יַ֣עַן דִּבַּ֤רְתִּי אֲלֵיהֶם֙ וְלֹ֣א שָׁמֵ֔עוּ וָאֶקְרָ֥א לָהֶ֖ם וְלֹ֥א עָנֽוּ׃

18 ‏וּלְבֵ֨ית הָרֵכָבִ֜ים אָמַ֣ר יִרְמְיָ֗הוּ כֹּֽה־אָמַ֞ר יְהוָ֤ה צְבָאוֹת֙ אֱלֹהֵ֣י יִשְׂרָאֵ֔ל יַ֚עַן אֲשֶׁ֣ר שְׁמַעְתֶּ֔ם עַל־מִצְוַ֖ת יְהוֹנָדָ֣ב אֲבִיכֶ֑ם וַֽתִּשְׁמְרוּ֙ אֶת־כָּל־מִצְוֹתָ֔יו וַֽתַּעֲשׂ֔וּ כְּכֹ֥ל אֲשֶׁר־צִוָּ֖ה אֶתְכֶֽם׃ ס

19 ‏לָכֵ֗ן כֹּ֥ה אָמַ֛ר יְהוָ֥ה צְבָא֖וֹת אֱלֹהֵ֣י יִשְׂרָאֵ֑ל לֹֽא־יִכָּרֵ֨ת אִ֜ישׁ לְיוֹנָדָ֧ב בֶּן־רֵכָ֛ב עֹמֵ֥ד לְפָנַ֖י כָּל־הַיָּמִֽים׃ פ

1 hadāḇār ’ăšer-hāyâ ’el-yirəməyâû mē’ēṯ yəhwâ bîmê yəhwōyāqîm ben-yō’šîyâû meleḵə yəhûḏâ lē’mōr:

2 hālwōḵə ’el-bêṯ hārēḵāḇîm wəḏibarətā ’wōṯām wahăḇi’wōṯām bêṯ yəhwâ ’el-’aḥaṯ halləšāḵwōṯ wəhišəqîṯā ’wōṯām yāyin:

3 wā’eqqaḥ ’eṯ-ya’ăzanəyâ ḇen-yirəməyâû ben-ḥăḇaṣṣinəyâ wə’eṯ-’eḥāyw wə’eṯ-kāl-bānāyw wə’ēṯ kāl-bêṯ hārēḵāḇîm:

4 wā’āḇi’ ’ōṯām bêṯ yəhwâ ’el-lišəkaṯ bənê ḥānān ben-yiḡədaləyâû ’îš hā’ĕlōhîm ’ăšer-’ēṣel lišəkaṯ haśśārîm ’ăšer mimma‘al ləlišəkaṯ ma‘ăśêâû ḇen-šallum šōmēr hassaf:

5 wā’etēn lifənê| bənê ḇêṯ-hārēḵāḇîm gəḇi‘îm məlē’îm yayin wəḵōswōṯ wā’ōmar ’ălêhem šəṯû-yāyin:

6 wayyō’mərû lō’ nišəteh-yyāyin kî ywōnāḏāḇ ben-rēḵāḇ ’āḇînû ṣiûâ ‘ālênû lē’mōr lō’ ṯišətû-yayin ’atem ûḇənêḵem ‘aḏ-‘wōlām:

7 ûḇayiṯ lō’-ṯiḇənû wəzera‘ lō’-ṯizərā‘û wəḵerem lō’-ṯiṭṭā‘û wəlō’ yihəyeh lāḵem kî bā’ŏhālîm tēšəḇû kāl-yəmêḵem ləma‘an tiḥəyû yāmîm rabîm ‘al-pənê hā’ăḏāmâ ’ăšer ’atem gārîm šām:

8 wannišəma‘ bəqwōl yəhwōnāḏāḇ ben-rēḵāḇ ’āḇînû ləḵōl ’ăšer ṣiûānû ləḇilətî šəṯwōṯ-yayin kāl-yāmênû ’ănaḥənû nāšênû bānênû ûḇənōṯênû:

9 ûləḇilətî bənwōṯ bātîm ləšiḇətēnû wəḵerem wəśāḏeh wāzera‘ lō’ yihəyeh-llānû:

10 wannēšeḇ bā’ŏhālîm wannišəma‘ wanna‘aś kəḵōl ’ăšer-ṣiûānû ywōnāḏāḇ ’āḇînû:

11 wayəhî ba‘ălwōṯ nəḇûḵaḏəre’ṣṣar meleḵə-bāḇel ’el-hā’āreṣ wannō’mer bō’û wənāḇwō’ yərûšālaim mipənê ḥêl hakaśədîm ûmipənê ḥêl ’ărām wannēšeḇ bîrûšālāim: f

12 wayəhî dəḇar-yəhwâ ’el-yirəməyâû lē’mōr:

13 kōh-’āmar yəhwâ ṣəḇā’wōṯ ’ĕlōhê yiśərā’ēl hālōḵə wə’āmarətā lə’îš yəhûḏâ ûləywōšəḇê yərûšālāim hălwō’ ṯiqəḥû mûsār lišəmō‘a ’el-dəḇāray nə’um-yəhwâ:

14 hûqam ’eṯ-diḇərê yəhwōnāḏāḇ ben-rēḵāḇ ’ăšer-ṣiûâ ’eṯ-bānāyw ləḇilətî šəṯwōṯ-yayin wəlō’ šāṯû ‘aḏ-hayywōm hazzeh kî šāmə‘û ’ēṯ miṣəwaṯ ’ăḇîhem wə’ānōḵî dibarətî ’ălêḵem hašəkēm wəḏabēr wəlō’ šəma‘ətem ’ēlāy:

15 wā’ešəlaḥ ’ălêḵem ’eṯ-kāl-‘ăḇāḏay hannəḇi’îm| hašəkêm wəšālōḥa| lē’mōr šuḇû-nā’ ’îš midarəkwō hārā‘â wəhêṭîḇû ma‘aləlêḵem wə’al-tēləḵû ’aḥărê ’ĕlōhîm ’ăḥērîm lə‘āḇəḏām ûšəḇû ’el-hā’ăḏāmâ ’ăšer-nāṯatî lāḵem wəla’ăḇōṯêḵem wəlō’ hiṭṭîṯem ’eṯ-’āzənəḵem wəlō’ šəma‘ətem ’ēlāy:

16 kî hēqîmû bənê yəhwōnāḏāḇ ben-rēḵāḇ ’eṯ-miṣəwaṯ ’ăḇîhem ’ăšer ṣiûām wəhā‘ām hazzeh lō’ šāmə‘û ’ēlāy: s

17 lāḵēn kōh-’āmar yəhwâ ’ĕlōhê ṣəḇā’wōṯ ’ĕlōhê yiśərā’ēl hinənî mēḇî’ ’el-yəhûḏâ wə’el kāl-ywōšəḇê yərûšālaim ’ēṯ kāl-hārā‘â ’ăšer dibarətî ‘ălêhem ya‘an dibarətî ’ălêhem wəlō’ šāmē‘û wā’eqərā’ lâem wəlō’ ‘ānû:

18 ûləḇêṯ hārēḵāḇîm ’āmar yirəməyâû kōh-’āmar yəhwâ ṣəḇā’wōṯ ’ĕlōhê yiśərā’ēl ya‘an ’ăšer šəma‘ətem ‘al-miṣəwaṯ yəhwōnāḏāḇ ’ăḇîḵem watišəmərû ’eṯ-kāl-miṣəwōṯāyw wata‘ăśû kəḵōl ’ăšer-ṣiûâ ’eṯəḵem: s

19 lāḵēn kōh ’āmar yəhwâ ṣəḇā’wōṯ ’ĕlōhê yiśərā’ēl lō’-yikārēṯ ’îš ləywōnāḏāḇ ben-rēḵāḇ ‘ōmēḏ ləfānay kāl-hayyāmîm: f


Next: Jeremiah (Yermiyah) Chapter 36