‎1 ‏ה֣וֹי רֹעִ֗ים מְאַבְּדִ֧ים וּמְפִצִ֛ים אֶת־צֹ֥אן מַרְעִיתִ֖י נְאֻם־יְהוָֽה׃

‎2 ‏לָ֠כֵן כֹּֽה־אָמַ֨ר יְהוָ֜ה אֱלֹהֵ֣י יִשְׂרָאֵ֗ל עַֽל־הָרֹעִים֮ הָרֹעִ֣ים אֶת־עַמִּי֒ אַתֶּ֞ם הֲפִצֹתֶ֤ם אֶת־צֹאנִי֙ וַתַּדִּח֔וּם וְלֹ֥א פְקַדְתֶּ֖ם אֹתָ֑ם הִנְנִ֨י פֹקֵ֧ד עֲלֵיכֶ֛ם אֶת־רֹ֥עַ מַעַלְלֵיכֶ֖ם נְאֻם־יְהוָֽה׃

‎3 ‏וַאֲנִ֗י אֲקַבֵּץ֙ אֶת־שְׁאֵרִ֣ית צֹאנִ֔י מִכֹּל֙ הָאֲרָצ֔וֹת אֲשֶׁר־הִדַּ֥חְתִּי אֹתָ֖ם שָׁ֑ם וַהֲשִׁבֹתִ֥י אֶתְהֶ֛ן עַל־נְוֵהֶ֖ן וּפָר֥וּ וְרָבֽוּ׃

‎4 ‏וַהֲקִמֹתִ֧י עֲלֵיהֶ֛ם רֹעִ֖ים וְרָע֑וּם וְלֹא־יִֽירְא֨וּ ע֧וֹד וְלֹא־יֵחַ֛תּוּ וְלֹ֥א יִפָּקֵ֖דוּ נְאֻם־יְהוָֽה׃ ס

‎5 ‏הִנֵּ֨ה יָמִ֤ים בָּאִים֙ נְאֻם־יְהוָ֔ה וַהֲקִמֹתִ֥י לְדָוִ֖ד צֶ֣מַח צַדִּ֑יק וּמָ֤לַךְ מֶ֙לֶךְ֙ וְהִשְׂכִּ֔יל וְעָשָׂ֛ה מִשְׁפָּ֥ט וּצְדָקָ֖ה בָּאָֽרֶץ׃

‎6 ‏בְּיָמָיו֙ תִּוָּשַׁ֣ע יְהוּדָ֔ה וְיִשְׂרָאֵ֖ל יִשְׁכֹּ֣ן לָבֶ֑טַח וְזֶה־שְּׁמ֥וֹ אֲ‍ֽשֶׁר־יִקְרְא֖וֹ יְהוָ֥ה׀ צִדְקֵֽנוּ׃ ס

‎7 ‏לָכֵ֛ן הִנֵּֽה־יָמִ֥ים בָּאִ֖ים נְאֻם־יְהוָ֑ה וְלֹא־יֹ֤אמְרוּ עוֹד֙ חַי־יְהוָ֔ה אֲשֶׁ֧ר הֶעֱלָ֛ה אֶת־בְּנֵ֥י יִשְׂרָאֵ֖ל מֵאֶ֥רֶץ מִצְרָֽיִם׃

‎8 ‏כִּ֣י אִם־חַי־יְהוָ֗ה אֲשֶׁ֣ר הֶעֱלָה֩ וַאֲשֶׁ֨ר הֵבִ֜יא אֶת־זֶ֨רַע בֵּ֤ית יִשְׂרָאֵל֙ מֵאֶ֣רֶץ צָפ֔וֹנָה וּמִכֹּל֙ הָֽאֲרָצ֔וֹת אֲשֶׁ֥ר הִדַּחְתִּ֖ים שָׁ֑ם וְיָשְׁב֖וּ עַל־אַדְמָתָֽם׃ ס

‎9 ‏לַנְּבִאִ֞ים נִשְׁבַּ֧ר לִבִּ֣י בְקִרְבִּ֗י רָֽחֲפוּ֙ כָּל־עַצְמוֹתַ֔י הָיִ֙יתִי֙ כְּאִ֣ישׁ שִׁכּ֗וֹר וּכְגֶ֖בֶר עֲבָ֣רוֹ יָ֑יִן מִפְּנֵ֣י יְהוָ֔ה וּמִפְּנֵ֖י דִּבְרֵ֥י קָדְשֽׁוֹ׃

‎10 ‏כִּ֤י מְנָֽאֲפִים֙ מָלְאָ֣ה הָאָ֔רֶץ כִּֽי־מִפְּנֵ֤י אָלָה֙ אָבְלָ֣ה הָאָ֔רֶץ יָבְשׁ֖וּ נְא֣וֹת מִדְבָּ֑ר וַתְּהִ֤י מְרֽוּצָתָם֙ רָעָ֔ה וּגְבוּרָתָ֖ם לֹא־כֵֽן׃

‎11 ‏כִּֽי־גַם־נָבִ֥יא גַם־כֹּהֵ֖ן חָנֵ֑פוּ גַּם־בְּבֵיתִ֛י מָצָ֥אתִי רָעָתָ֖ם נְאֻם־יְהוָֽה׃

‎12 ‏לָכֵן֩ יִֽהְיֶ֨ה דַרְכָּ֜ם לָהֶ֗ם כַּחֲלַקְלַקּוֹת֙ בָּֽאֲפֵלָ֔ה יִדַּ֖חוּ וְנָ֣פְלוּ בָ֑הּ כִּֽי־אָבִ֨יא עֲלֵיהֶ֥ם רָעָ֛ה שְׁנַ֥ת פְּקֻדָּתָ֖ם נְאֻם־יְהוָֽה׃

‎13 ‏וּבִנְבִיאֵ֥י שֹׁמְר֖וֹן רָאִ֣יתִי תִפְלָ֑ה הִנַּבְּא֣וּ בַבַּ֔עַל וַיַּתְע֥וּ אֶת־עַמִּ֖י אֶת־יִשְׂרָאֵֽל׃ ס

‎14 ‏וּבִנְבִאֵ֨י יְרוּשָׁלִַ֜ם רָאִ֣יתִי שַׁעֲרוּרָ֗ה נָא֞וֹף וְהָלֹ֤ךְ בַּשֶּׁ֙קֶר֙ וְחִזְּקוּ֙ יְדֵ֣י מְרֵעִ֔ים לְבִ֨לְתִּי־שָׁ֔בוּ אִ֖ישׁ מֵרָֽעָת֑וֹ הָֽיוּ־לִ֤י כֻלָּם֙ כִּסְדֹ֔ם וְיֹשְׁבֶ֖יהָ כַּעֲמֹרָֽה׃ ס

‎15 ‏לָכֵ֞ן כֹּֽה־אָמַ֨ר יְהוָ֤ה צְבָאוֹת֙ עַל־הַנְּבִאִ֔ים הִנְנִ֨י מַאֲכִ֤יל אוֹתָם֙ לַֽעֲנָ֔ה וְהִשְׁקִתִ֖ים מֵי־רֹ֑אשׁ כִּ֗י מֵאֵת֙ נְבִיאֵ֣י יְרוּשָׁלִַ֔ם יָצְאָ֥ה חֲנֻפָּ֖ה לְכָל־הָאָֽרֶץ׃ פ

‎16 ‏כֹּֽה־אָמַ֞ר יְהוָ֣ה צְבָא֗וֹת אַֽל־תִּשְׁמְע֞וּ עַל־דִּבְרֵ֤י הַנְּבִאִים֙ הַנִּבְּאִ֣ים לָכֶ֔ם מַהְבִּלִ֥ים הֵ֖מָּה אֶתְכֶ֑ם חֲז֤וֹן לִבָּם֙ יְדַבֵּ֔רוּ לֹ֖א מִפִּ֥י יְהוָֽה׃

‎17 ‏אֹמְרִ֤ים אָמוֹר֙ לִֽמְנַאֲצַ֔י דִּבֶּ֣ר יְהוָ֔ה שָׁל֖וֹם יִֽהְיֶ֣ה לָכֶ֑ם וְ֠כֹל הֹלֵ֞ךְ בִּשְׁרִר֤וּת לִבּוֹ֙ אָֽמְר֔וּ לֹֽא־תָב֥וֹא עֲלֵיכֶ֖ם רָעָֽה׃

‎18 ‏כִּ֣י מִ֤י עָמַד֙ בְּס֣וֹד יְהוָ֔ה וְיֵ֖רֶא וְיִשְׁמַ֣ע אֶת־דְּבָר֑וֹ מִֽי־הִקְשִׁ֥יב דברי דְּבָר֖וֹ וַיִּשְׁמָֽע׃ ס

‎19 ‏הִנֵּ֣ה׀ סַעֲרַ֣ת יְהוָ֗ה חֵמָה֙ יָֽצְאָ֔ה וְסַ֖עַר מִתְחוֹלֵ֑ל עַ֛ל רֹ֥אשׁ רְשָׁעִ֖ים יָחֽוּל׃

‎20 ‏לֹ֤א יָשׁוּב֙ אַף־יְהוָ֔ה עַד־עֲשֹׂת֥וֹ וְעַד־הֲקִימ֖וֹ מְזִמּ֣וֹת לִבּ֑וֹ בְּאַֽחֲרִית֙ הַיָּמִ֔ים תִּתְבּ֥וֹנְנוּ בָ֖הּ בִּינָֽה׃

‎21 ‏לֹא־שָׁלַ֥חְתִּי אֶת־הַנְּבִאִ֖ים וְהֵ֣ם רָ֑צוּ לֹא־דִבַּ֥רְתִּי אֲלֵיהֶ֖ם וְהֵ֥ם נִבָּֽאוּ׃

‎22 ‏וְאִֽם־עָמְד֖וּ בְּסוֹדִ֑י וְיַשְׁמִ֤עוּ דְבָרַי֙ אֶת־עַמִּ֔י וִֽישִׁבוּם֙ מִדַּרְכָּ֣ם הָרָ֔ע וּמֵרֹ֖עַ מַֽעַלְלֵיהֶֽם׃ ס

‎23 ‏הַאֱלֹהֵ֧י מִקָּרֹ֛ב אָ֖נִי נְאֻם־יְהוָ֑ה וְלֹ֥א אֱלֹהֵ֖י מֵרָחֹֽק׃

‎24 ‏אִם־יִסָּתֵ֨ר אִ֧ישׁ בַּמִּסְתָּרִ֛ים וַאֲנִ֥י לֹֽא־אֶרְאֶ֖נּוּ נְאֻם־יְהוָ֑ה הֲל֨וֹא אֶת־הַשָּׁמַ֧יִם וְאֶת־הָאָ֛רֶץ אֲנִ֥י מָלֵ֖א נְאֻם־יְהוָֽה׃

‎25 ‏שָׁמַ֗עְתִּי אֵ֤ת אֲשֶׁר־אָֽמְרוּ֙ הַנְּבִאִ֔ים הַֽנִּבְּאִ֥ים בִּשְׁמִ֛י שֶׁ֖קֶר לֵאמֹ֑ר חָלַ֖מְתִּי חָלָֽמְתִּי׃

‎26 ‏עַד־מָתַ֗י הֲיֵ֛שׁ בְּלֵ֥ב הַנְּבִאִ֖ים נִבְּאֵ֣י הַשָּׁ֑קֶר וּנְבִיאֵ֖י תַּרְמִ֥ת לִבָּֽם׃

‎27 ‏הַחֹשְׁבִ֗ים לְהַשְׁכִּ֤יחַ אֶת־עַמִּי֙ שְׁמִ֔י בַּחֲל֣וֹמֹתָ֔ם אֲשֶׁ֥ר יְסַפְּר֖וּ אִ֣ישׁ לְרֵעֵ֑הוּ כַּאֲשֶׁ֨ר שָׁכְח֧וּ אֲבוֹתָ֛ם אֶת־שְׁמִ֖י בַּבָּֽעַל׃

‎28 ‏הַנָּבִ֞יא אֲשֶׁר־אִתּ֤וֹ חֲלוֹם֙ יְסַפֵּ֣ר חֲל֔וֹם וַאֲשֶׁ֤ר דְּבָרִי֙ אִתּ֔וֹ יְדַבֵּ֥ר דְּבָרִ֖י אֱמֶ֑ת מַה־לַתֶּ֥בֶן אֶת־הַבָּ֖ר נְאֻם־יְהוָֽה׃

‎29 ‏הֲל֨וֹא כֹ֧ה דְבָרִ֛י כָּאֵ֖שׁ נְאֻם־יְהוָ֑ה וּכְפַטִּ֖ישׁ יְפֹ֥צֵֽץ סָֽלַע׃ ס

‎30 ‏לָכֵ֛ן הִנְנִ֥י עַל־הַנְּבִאִ֖ים נְאֻם־יְהוָ֑ה מְגַנְּבֵ֣י דְבָרַ֔י אִ֖ישׁ מֵאֵ֥ת רֵעֵֽהוּ׃

‎31 ‏הִנְנִ֥י עַל־הַנְּבִיאִ֖ם נְאֻם־יְהוָ֑ה הַלֹּקְחִ֣ים לְשׁוֹנָ֔ם וַֽיִּנְאֲמ֖וּ נְאֻֽם׃

‎32 ‏הִ֠נְנִי עַֽל־נִבְּאֵ֞י חֲלֹמ֥וֹת שֶׁ֙קֶר֙ נְאֻם־יְהוָ֔ה וַֽיְסַפְּרוּם֙ וַיַּתְע֣וּ אֶת־עַמִּ֔י בְּשִׁקְרֵיהֶ֖ם וּבְפַחֲזוּתָ֑ם וְאָנֹכִ֨י לֹֽא־שְׁלַחְתִּ֜ים וְלֹ֣א צִוִּיתִ֗ים וְהוֹעֵ֛יל לֹֽא־יוֹעִ֥ילוּ לָֽעָם־הַזֶּ֖ה נְאֻם־יְהוָֽה׃

‎33 ‏וְכִי־יִשְׁאָלְךָ֩ הָעָ֨ם הַזֶּ֜ה אֽוֹ־הַנָּבִ֤יא אֽוֹ־כֹהֵן֙ לֵאמֹ֔ר מַה־מַשָּׂ֖א יְהוָ֑ה וְאָמַרְתָּ֤ אֲלֵיהֶם֙ אֶת־מַה־מַשָּׂ֔א וְנָטַשְׁתִּ֥י אֶתְכֶ֖ם נְאֻם־יְהוָֽה׃

‎34 ‏וְהַנָּבִ֤יא וְהַכֹּהֵן֙ וְהָעָ֔ם אֲשֶׁ֥ר יֹאמַ֖ר מַשָּׂ֣א יְהוָ֑ה וּפָקַדְתִּ֛י עַל־הָאִ֥ישׁ הַה֖וּא וְעַל־בֵּיתֽוֹ׃

‎35 ‏כֹּ֥ה תֹאמְר֛וּ אִ֥ישׁ עַל־רֵעֵ֖הוּ וְאִ֣ישׁ אֶל־אָחִ֑יו מֶה־עָנָ֣ה יְהוָ֔ה וּמַה־דִּבֶּ֖ר יְהוָֽה׃

‎36 ‏וּמַשָּׂ֥א יְהוָ֖ה לֹ֣א תִזְכְּרוּ־ע֑וֹד כִּ֣י הַמַּשָּׂ֗א יִֽהְיֶה֙ לְאִ֣ישׁ דְּבָר֔וֹ וַהֲפַכְתֶּ֗ם אֶת־דִּבְרֵי֙ אֱלֹהִ֣ים חַיִּ֔ים יְהוָ֥ה צְבָא֖וֹת אֱלֹהֵֽינוּ׃

‎37 ‏כֹּ֥ה תֹאמַ֖ר אֶל־הַנָּבִ֑יא מֶה־עָנָ֣ךְ יְהוָ֔ה וּמַה־דִּבֶּ֖ר יְהוָֽה׃

‎38 ‏וְאִם־מַשָּׂ֣א יְהוָה֮ תֹּאמֵרוּ֒ לָכֵ֗ן כֹּ֚ה אָמַ֣ר יְהוָ֔ה יַ֧עַן אֲמָרְכֶ֛ם אֶת־הַדָּבָ֥ר הַזֶּ֖ה מַשָּׂ֣א יְהוָ֑ה וָאֶשְׁלַ֤ח אֲלֵיכֶם֙ לֵאמֹ֔ר לֹ֥א תֹאמְר֖וּ מַשָּׂ֥א יְהוָֽה׃

‎39 ‏לָכֵ֣ן הִנְנִ֔י וְנָשִׁ֥יתִי אֶתְכֶ֖ם נָשֹׁ֑א וְנָטַשְׁתִּ֣י אֶתְכֶ֗ם וְאֶת־הָעִיר֙ אֲשֶׁ֨ר נָתַ֧תִּי לָכֶ֛ם וְלַאֲבוֹתֵיכֶ֖ם מֵעַ֥ל פָּנָֽי׃

‎40 ‏וְנָתַתִּ֥י עֲלֵיכֶ֖ם חֶרְפַּ֣ת עוֹלָ֑ם וּכְלִמּ֣וּת עוֹלָ֔ם אֲשֶׁ֖ר לֹ֥א תִשָּׁכֵֽחַ׃ ס

1 hwōy rō‘îm mə’abəḏîm ûməfiṣîm ’eṯ-ṣō’n marə‘îṯî nə’um-yəhwâ:

2 lāḵēn kōh-’āmar yəhwâ ’ĕlōhê yiśərā’ēl ‘al-hārō‘îm hārō‘îm ’eṯ-‘ammî ’atem hăfiṣōṯem ’eṯ-ṣō’nî watadiḥûm wəlō’ fəqaḏətem ’ōṯām hinənî fōqēḏ ‘ălêḵem ’eṯ-rō‘a m^a‘aləlêḵem nə’um-yəhwâ:

3 wa’ănî ’ăqabēṣ ’eṯ-šə’ērîṯ ṣō’nî mikōl hā’ărāṣwōṯ ’ăšer-hid^aḥətî ’ōṯām šām wahăšiḇōṯî ’eṯəhen ‘al-nəwēhen ûfārû wərāḇû:

4 wahăqimōṯî ‘ălêhem rō‘îm wərā‘ûm wəlō’-yîrə’û ‘wōḏ wəlō’-yēḥatû wəlō’ yipāqēḏû nə’um-yəhwâ: s

5 hinnēh yāmîm bā’îm nə’um-yəhwâ wahăqimōṯî ləḏāwiḏ ṣem^aḥ ṣadîq ûmālaḵə meleḵə wəhiśəkîl wə‘āśâ mišəpāṭ ûṣəḏāqâ bā’āreṣ:

6 bəyāmāyw tiûāš^a‘ yəhûḏâ wəyiśərā’ēl yišəkōn lāḇeṭ^aḥ wəzeh-ššəmwō ’ă‍šer-yiqərə’wō yəhwâ| ṣiḏəqēnû: s

7 lāḵēn hinnēh-yāmîm bā’îm nə’um-yəhwâ wəlō’-yō’mərû ‘wōḏ ḥay-yəhwâ ’ăšer he‘ĕlâ ’eṯ-bənê yiśərā’ēl mē’ereṣ miṣərāyim:

8 kî ’im-ḥay-yəhwâ ’ăšer he‘ĕlâ wa’ăšer hēḇî’ ’eṯ-zer^a‘ bêṯ yiśərā’ēl mē’ereṣ ṣāfwōnâ ûmikōl hā’ărāṣwōṯ ’ăšer hid^aḥətîm šām wəyāšəḇû ‘al-’aḏəmāṯām: s

9 lannəḇi’îm nišəbar libî ḇəqirəbî rāḥăfû kāl-‘aṣəmwōṯay hāyîṯî kə’îš šikwōr ûḵəḡeḇer ‘ăḇārwō yāyin mipənê yəhwâ ûmipənê diḇərê qāḏəšwō:

10 kî mənā’ăfîm mālə’â hā’āreṣ kî-mipənê ’ālâ ’āḇəlâ hā’āreṣ yāḇəšû nə’wōṯ miḏəbār watəhî mərûṣāṯām rā‘â ûḡəḇûrāṯām lō’-ḵēn:

11 kî-ḡam-nāḇî’ ḡam-kōhēn ḥānēfû gam-bəḇêṯî māṣā’ṯî rā‘āṯām nə’um-yəhwâ:

12 lāḵēn yihəyeh ḏarəkām lâem k^aḥălaqəlaqqwōṯ bā’ăfēlâ yid^aḥû wənāfəlû ḇāh kî-’āḇî’ ‘ălêhem rā‘â šənaṯ pəqudāṯām nə’um-yəhwâ:

13 ûḇinəḇî’ê šōmərwōn rā’îṯî ṯifəlâ hinnabə’û ḇab^a‘al wayyaṯə‘û ’eṯ-‘ammî ’eṯ-yiśərā’ēl: s

14 ûḇinəḇi’ê yərûšālaim rā’îṯî š^a‘ărûrâ nā’wōf wəhālōḵə baššeqer wəḥizzəqû yəḏê mərē‘îm ləḇilətî-šāḇû ’îš mērā‘āṯwō hāyû-lî ḵullām kisəḏōm wəyōšəḇeyhā k^a‘ămōrâ: s

15 lāḵēn kōh-’āmar yəhwâ ṣəḇā’wōṯ ‘al-hannəḇi’îm hinənî ma’ăḵîl ’wōṯām l^a‘ănâ wəhišəqiṯîm mê-rō’š kî mē’ēṯ nəḇî’ê yərûšālaim yāṣə’â ḥănupâ ləḵāl-hā’āreṣ: f

16 kōh-’āmar yəhwâ ṣəḇā’wōṯ ’al-tišəmə‘û ‘al-diḇərê hannəḇi’îm hannibə’îm lāḵem mahəbilîm hēmmâ ’eṯəḵem ḥăzwōn libām yəḏabērû lō’ mipî yəhwâ:

17 ’ōmərîm ’āmwōr liməna’ăṣay diber yəhwâ šālwōm yihəyeh lāḵem wəḵōl hōlēḵə bišərirûṯ libwō ’āmərû lō’-ṯāḇwō’ ‘ălêḵem rā‘â:

18 kî mî ‘āmaḏ bəswōḏ yəhwâ wəyēre’ wəyišəm^a‘ ’eṯ-dəḇārwō mî-hiqəšîḇ dəḇārî dəḇārwō wayyišəmā‘: s

19 hinnēh| s^a‘ăraṯ yəhwâ ḥēmâ yāṣə’â wəs^a‘ar miṯəḥwōlēl ‘al rō’š rəšā‘îm yāḥûl:

20 lō’ yāšûḇ ’af-yəhwâ ‘aḏ-‘ăśōṯwō wə‘aḏ-hăqîmwō məzimmwōṯ libwō bə’^aḥărîṯ hayyāmîm tiṯəbwōnənû ḇāh bînâ:

21 lō’-šāl^aḥətî ’eṯ-hannəḇi’îm wəhēm rāṣû lō’-ḏibarətî ’ălêhem wəhēm nibā’û:

22 wə’im-‘āməḏû bəswōḏî wəyašəmi‘û ḏəḇāray ’eṯ-‘ammî wîšiḇûm midarəkām hārā‘ ûmērō‘a m^a‘aləlêhem: s

23 ha’ĕlōhê miqqārōḇ ’ānî nə’um-yəhwâ wəlō’ ’ĕlōhê mērāḥōq:

24 ’im-yissāṯēr ’îš bammisətārîm wa’ănî lō’-’erə’ennû nə’um-yəhwâ hălwō’ ’eṯ-haššāmayim wə’eṯ-hā’āreṣ ’ănî mālē’ nə’um-yəhwâ:

25 šām^a‘ətî ’ēṯ ’ăšer-’āmərû hannəḇi’îm hannibə’îm bišəmî šeqer lē’mōr ḥālamətî ḥālāmətî:

26 ‘aḏ-māṯay hăyēš bəlēḇ hannəḇi’îm nibə’ê haššāqer ûnəḇî’ê tarəmiṯ libām:

27 h^aḥōšəḇîm ləhašəkîḥa ’eṯ-‘ammî šəmî b^aḥălwōmōṯām ’ăšer yəsapərû ’îš lərē‘ēhû ka’ăšer šāḵəḥû ’ăḇwōṯām ’eṯ-šəmî babā‘al:

28 hannāḇî’ ’ăšer-’itwō ḥălwōm yəsapēr ḥălwōm wa’ăšer dəḇārî ’itwō yəḏabēr dəḇārî ’ĕmeṯ mah-lateḇen ’eṯ-habār nə’um-yəhwâ:

29 hălwō’ ḵōh ḏəḇārî kā’ēš nə’um-yəhwâ ûḵəfaṭṭîš yəfōṣēṣ sāl^a‘: s

30 lāḵēn hinənî ‘al-hannəḇi’îm nə’um-yəhwâ məḡannəḇê ḏəḇāray ’îš mē’ēṯ rē‘ēhû:

31 hinənî ‘al-hannəḇî’im nə’um-yəhwâ hallōqəḥîm ləšwōnām wayyinə’ămû nə’um:

32 hinənî ‘al-nibə’ê ḥălōmwōṯ šeqer nə’um-yəhwâ wayəsapərûm wayyaṯə‘û ’eṯ-‘ammî bəšiqərêhem ûḇəf^aḥăzûṯām wə’ānōḵî lō’-šəl^aḥətîm wəlō’ ṣiûîṯîm wəhwō‘êl lō’-ywō‘îlû lā‘ām-hazzeh nə’um-yəhwâ:

33 wəḵî-yišə’āləḵā hā‘ām hazzeh ’wō-hannāḇî’ ’wō-ḵōhēn lē’mōr mah-maśśā’ yəhwâ wə’āmarətā ’ălêhem ’eṯ-mah-maśśā’ wənāṭašətî ’eṯəḵem nə’um-yəhwâ:

34 wəhannāḇî’ wəhakōhēn wəhā‘ām ’ăšer yō’mar maśśā’ yəhwâ ûfāqaḏətî ‘al-hā’îš hahû’ wə‘al-bêṯwō:

35 kōh ṯō’mərû ’îš ‘al-rē‘ēhû wə’îš ’el-’āḥîw meh-‘ānâ yəhwâ ûmah-diber yəhwâ:

36 ûmaśśā’ yəhwâ lō’ ṯizəkərû-‘wōḏ kî hammaśśā’ yihəyeh lə’îš dəḇārwō wahăfaḵətem ’eṯ-diḇərê ’ĕlōhîm ḥayyîm yəhwâ ṣəḇā’wōṯ ’ĕlōhênû:

37 kōh ṯō’mar ’el-hannāḇî’ meh-‘ānāḵə yəhwâ ûmah-diber yəhwâ:

38 wə’im-maśśā’ yəhwâ tō’mērû lāḵēn kōh ’āmar yəhwâ y^a‘an ’ămārəḵem ’eṯ-hadāḇār hazzeh maśśā’ yəhwâ wā’ešəl^aḥ ’ălêḵem lē’mōr lō’ ṯō’mərû maśśā’ yəhwâ:

39 lāḵēn hinənî wənāšîṯî ’eṯəḵem nāšō’ wənāṭašətî ’eṯəḵem wə’eṯ-hā‘îr ’ăšer nāṯatî lāḵem wəla’ăḇwōṯêḵem mē‘al pānāy:

40 wənāṯatî ‘ălêḵem ḥerəpaṯ ‘wōlām ûḵəlimmûṯ ‘wōlām ’ăšer lō’ ṯiššāḵēḥa: s