‎1 ‏מַשָּׂ֖א מִצְרָ֑יִם הִנֵּ֨ה יְהוָ֜ה רֹכֵ֨ב עַל־עָ֥ב קַל֙ וּבָ֣א מִצְרַ֔יִם וְנָע֞וּ אֱלִילֵ֤י מִצְרַ֙יִם֙ מִפָּנָ֔יו וּלְבַ֥ב מִצְרַ֖יִם יִמַּ֥ס בְּקִרְבּֽוֹ׃

‎2 ‏וְסִכְסַכְתִּ֤י מִצְרַ֙יִם֙ בְּמִצְרַ֔יִם וְנִלְחֲמ֥וּ אִישׁ־בְּאָחִ֖יו וְאִ֣ישׁ בְּרֵעֵ֑הוּ עִ֣יר בְּעִ֔יר מַמְלָכָ֖ה בְּמַמְלָכָֽה׃

‎3 ‏וְנָבְקָ֤ה רֽוּחַ־מִצְרַ֙יִם֙ בְּקִרְבּ֔וֹ וַעֲצָת֖וֹ אֲבַלֵּ֑עַ וְדָרְשׁ֤וּ אֶל־הָֽאֱלִילִים֙ וְאֶל־הָ֣אִטִּ֔ים וְאֶל־הָאֹב֖וֹת וְאֶל־הַיִּדְּעֹנִֽים׃

‎4 ‏וְסִכַּרְתִּי֙ אֶת־מִצְרַ֔יִם בְּיַ֖ד אֲדֹנִ֣ים קָשֶׁ֑ה וּמֶ֤לֶךְ עַז֙ יִמְשָׁל־בָּ֔ם נְאֻ֥ם הָאָד֖וֹן יְהוָ֥ה צְבָאֽוֹת׃

‎5 ‏וְנִשְּׁתוּ־מַ֖יִם מֵֽהַיָּ֑ם וְנָהָ֖ר יֶחֱרַ֥ב וְיָבֵֽשׁ׃

‎6 ‏וְהֶאֶזְנִ֣יחוּ נְהָר֔וֹת דָּלֲל֥וּ וְחָרְב֖וּ יְאֹרֵ֣י מָצ֑וֹר קָנֶ֥ה וָס֖וּף קָמֵֽלוּ׃

‎7 ‏עָר֥וֹת עַל־יְא֖וֹר עַל־פִּ֣י יְא֑וֹר וְכֹל֙ מִזְרַ֣ע יְא֔וֹר יִיבַ֥שׁ נִדַּ֖ף וְאֵינֶֽנּוּ׃

‎8 ‏וְאָנוּ֙ הַדַּיָּגִ֔ים וְאָ֣בְל֔וּ כָּל־מַשְׁלִיכֵ֥י בַיְא֖וֹר חַכָּ֑ה וּפֹרְשֵׂ֥י מִכְמֹ֛רֶת עַל־פְּנֵי־מַ֖יִם אֻמְלָֽלוּ׃

‎9 ‏וּבֹ֛שׁוּ עֹבְדֵ֥י פִשְׁתִּ֖ים שְׂרִיק֑וֹת וְאֹרְגִ֖ים חוֹרָֽי׃

‎10 ‏וְהָי֥וּ שָׁתֹתֶ֖יהָ מְדֻכָּאִ֑ים כָּל־עֹ֥שֵׂי שֶׂ֖כֶר אַגְמֵי־נָֽפֶשׁ׃

‎11 ‏אַךְ־אֱוִלִים֙ שָׂ֣רֵי צֹ֔עַן חַכְמֵי֙ יֹעֲצֵ֣י פַרְעֹ֔ה עֵצָ֖ה נִבְעָרָ֑ה אֵ֚יךְ תֹּאמְר֣וּ אֶל־פַּרְעֹ֔ה בֶּן־חֲכָמִ֥ים אֲנִ֖י בֶּן־מַלְכֵי־קֶֽדֶם׃

‎12 ‏אַיָּם֙ אֵפ֣וֹא חֲכָמֶ֔יךָ וְיַגִּ֥ידוּ נָ֖א לָ֑ךְ וְיֵ֣דְע֔וּ מַה־יָּעַ֛ץ יְהוָ֥ה צְבָא֖וֹת עַל־מִצְרָֽיִם׃

‎13 ‏נֽוֹאֲלוּ֙ שָׂ֣רֵי צֹ֔עַן נִשְּׁא֖וּ שָׂ֣רֵי נֹ֑ף הִתְע֥וּ אֶת־מִצְרַ֖יִם פִּנַּ֥ת שְׁבָטֶֽיהָ׃

‎14 ‏יְהוָ֛ה מָסַ֥ךְ בְּקִרְבָּ֖הּ ר֣וּחַ עִוְעִ֑ים וְהִתְע֤וּ אֶת־מִצְרַ֙יִם֙ בְּכָֽל־מַעֲשֵׂ֔הוּ כְּהִתָּע֥וֹת שִׁכּ֖וֹר בְּקִיאֽוֹ׃

‎15 ‏וְלֹֽא־יִהְיֶ֥ה לְמִצְרַ֖יִם מַֽעֲשֶׂ֑ה אֲשֶׁ֧ר יַעֲשֶׂ֛ה רֹ֥אשׁ וְזָנָ֖ב כִּפָּ֥ה וְאַגְמֽוֹן׃ ס

‎16 ‏בַּיּ֣וֹם הַה֔וּא יִֽהְיֶ֥ה מִצְרַ֖יִם כַּנָּשִׁ֑ים וְחָרַ֣ד׀ וּפָחַ֗ד מִפְּנֵי֙ תְּנוּפַת֙ יַד־יְהוָ֣ה צְבָא֔וֹת אֲשֶׁר־ה֖וּא מֵנִ֥יף עָלָֽיו׃

‎17 ‏וְ֠הָיְתָה אַדְמַ֨ת יְהוּדָ֤ה לְמִצְרַ֙יִם֙ לְחָגָּ֔א כֹּל֩ אֲשֶׁ֨ר יַזְכִּ֥יר אֹתָ֛הּ אֵלָ֖יו יִפְחָ֑ד מִפְּנֵ֗י עֲצַת֙ יְהוָ֣ה צְבָא֔וֹת אֲשֶׁר־ה֖וּא יוֹעֵ֥ץ עָלָֽיו׃ ס

‎18 ‏בַּיּ֣וֹם הַה֡וּא יִהְיוּ֩ חָמֵ֨שׁ עָרִ֜ים בְּאֶ֣רֶץ מִצְרַ֗יִם מְדַבְּרוֹת֙ שְׂפַ֣ת כְּנַ֔עַן וְנִשְׁבָּע֖וֹת לַיהוָ֣ה צְבָא֑וֹת עִ֣יר הַהֶ֔רֶס יֵאָמֵ֖ר לְאֶחָֽת׃ ס

‎19 ‏בַּיּ֣וֹם הַה֗וּא יִֽהְיֶ֤ה מִזְבֵּ֙חַ֙ לַֽיהוָ֔ה בְּת֖וֹךְ אֶ֣רֶץ מִצְרָ֑יִם וּמַצֵּבָ֥ה אֵֽצֶל־גְּבוּלָ֖הּ לַֽיהוָֽה׃

‎20 ‏וְהָיָ֨ה לְא֥וֹת וּלְעֵ֛ד לַֽיהוָ֥ה צְבָא֖וֹת בְּאֶ֣רֶץ מִצְרָ֑יִם כִּֽי־יִצְעֲק֤וּ אֶל־יְהוָה֙ מִפְּנֵ֣י לֹֽחֲצִ֔ים וְיִשְׁלַ֥ח לָהֶ֛ם מוֹשִׁ֥יעַ וָרָ֖ב וְהִצִּילָֽם׃

‎21 ‏וְנוֹדַ֤ע יְהוָה֙ לְמִצְרַ֔יִם וְיָדְע֥וּ מִצְרַ֛יִם אֶת־יְהוָ֖ה בַּיּ֣וֹם הַה֑וּא וְעָֽבְדוּ֙ זֶ֣בַח וּמִנְחָ֔ה וְנָדְרוּ־נֵ֥דֶר לַֽיהוָ֖ה וְשִׁלֵּֽמוּ׃

‎22 ‏וְנָגַ֧ף יְהוָ֛ה אֶת־מִצְרַ֖יִם נָגֹ֣ף וְרָפ֑וֹא וְשָׁ֙בוּ֙ עַד־יְהוָ֔ה וְנֶעְתַּ֥ר לָהֶ֖ם וּרְפָאָֽם׃

‎23 ‏בַּיּ֣וֹם הַה֗וּא תִּהְיֶ֨ה מְסִלָּ֤ה מִמִּצְרַ֙יִם֙ אַשּׁ֔וּרָה וּבָֽא־אַשּׁ֥וּר בְּמִצְרַ֖יִם וּמִצְרַ֣יִם בְּאַשּׁ֑וּר וְעָבְד֥וּ מִצְרַ֖יִם אֶת־אַשּֽׁוּר׃ ס

‎24 ‏בַּיּ֣וֹם הַה֗וּא יִהְיֶ֤ה יִשְׂרָאֵל֙ שְׁלִ֣ישִׁיָּ֔ה לְמִצְרַ֖יִם וּלְאַשּׁ֑וּר בְּרָכָ֖ה בְּקֶ֥רֶב הָאָֽרֶץ׃

‎25 ‏אֲשֶׁ֧ר בֵּרֲכ֛וֹ יְהוָ֥ה צְבָא֖וֹת לֵאמֹ֑ר בָּר֨וּךְ עַמִּ֜י מִצְרַ֗יִם וּמַעֲשֵׂ֤ה יָדַי֙ אַשּׁ֔וּר וְנַחֲלָתִ֖י יִשְׂרָאֵֽל׃ ס

1 maśśā’ miṣərāyim hinnēh yəhwâ rōḵēḇ ‘al-‘āḇ qal ûḇā’ miṣərayim wənā‘û ’ĕlîlê miṣərayim mipānāyw ûləḇaḇ miṣərayim yimmas bəqirəbwō:

2 wəsiḵəsaḵətî miṣərayim bəmiṣərayim wəniləḥămû ’îš-bə’āḥîw wə’îš bərē‘ēhû ‘îr bə‘îr maməlāḵâ bəmaməlāḵâ:

3 wənāḇəqâ rûḥa-miṣərayim bəqirəbwō w^a‘ăṣāṯwō ’ăḇallē‘a wəḏārəšû ’el-hā’ĕlîlîm wə’el-hā’iṭṭîm wə’el-hā’ōḇwōṯ wə’el-hayyidə‘ōnîm:

4 wəsikarətî ’eṯ-miṣərayim bəyaḏ ’ăḏōnîm qāšeh ûmeleḵə ‘az yiməšāl-bām nə’um hā’āḏwōn yəhwâ ṣəḇā’wōṯ:

5 wəniššəṯû-mayim mēhayyām wənâār yeḥĕraḇ wəyāḇēš:

6 wəhe’ezənîḥû nəhārwōṯ dālălû wəḥārəḇû yə’ōrê māṣwōr qāneh wāsûf qāmēlû:

7 ‘ārwōṯ ‘al-yə’wōr ‘al-pî yə’wōr wəḵōl mizər^a‘ yə’wōr yîḇaš nidaf wə’ênennû:

8 wə’ānû hadayyāḡîm wə’āḇəlû kāl-mašəlîḵê ḇayə’wōr ḥakâ ûfōrəśê miḵəmōreṯ ‘al-pənê-mayim ’uməlālû:

9 ûḇōšû ‘ōḇəḏê fišətîm śərîqwōṯ wə’ōrəḡîm ḥwōrāy:

10 wəhāyû šāṯōṯeyhā məḏukā’îm kāl-‘ōśê śeḵer ’aḡəmê-nāfeš:

11 ’aḵə-’ĕwilîm śārê ṣō‘an ḥaḵəmê yō‘ăṣê farə‘ōh ‘ēṣâ niḇə‘ārâ ’êḵə tō’mərû ’el-parə‘ōh ben-ḥăḵāmîm ’ănî ben-maləḵê-qeḏem:

12 ’ayyām ’ēfwō’ ḥăḵāmeyḵā wəyagîḏû nā’ lāḵə wəyēḏə‘û mah-yyā‘aṣ yəhwâ ṣəḇā’wōṯ ‘al-miṣərāyim:

13 nwō’ălû śārê ṣō‘an niššə’û śārê nōf hiṯə‘û ’eṯ-miṣərayim pinnaṯ šəḇāṭeyhā:

14 yəhwâ māsaḵə bəqirəbāh rûḥa ‘iwə‘îm wəhiṯə‘û ’eṯ-miṣərayim bəḵāl-m^a‘ăśēhû kəhitā‘wōṯ šikwōr bəqî’wō:

15 wəlō’-yihəyeh ləmiṣərayim m^a‘ăśeh ’ăšer y^a‘ăśeh rō’š wəzānāḇ kipâ wə’aḡəmwōn: s

16 bayywōm hahû’ yihəyeh miṣərayim kannāšîm wəḥāraḏ| ûfāḥaḏ mipənê tənûfaṯ yaḏ-yəhwâ ṣəḇā’wōṯ ’ăšer-hû’ mēnîf ‘ālāyw:

17 wəhāyəṯâ ’aḏəmaṯ yəhûḏâ ləmiṣərayim ləḥāgā’ kōl ’ăšer yazəkîr ’ōṯāh ’ēlāyw yifəḥāḏ mipənê ‘ăṣaṯ yəhwâ ṣəḇā’wōṯ ’ăšer-hû’ ywō‘ēṣ ‘ālāyw: s

18 bayywōm hahû’ yihəyû ḥāmēš ‘ārîm bə’ereṣ miṣərayim məḏabərwōṯ śəfaṯ kən^a‘an wənišəbā‘wōṯ layhwâ ṣəḇā’wōṯ ‘îr haheres yē’āmēr lə’eḥāṯ: s

19 bayywōm hahû’ yihəyeh mizəbēḥa layhwâ bəṯwōḵə ’ereṣ miṣərāyim ûmaṣṣēḇâ ’ēṣel-gəḇûlāh layhwâ:

20 wəhāyâ lə’wōṯ ûlə‘ēḏ layhwâ ṣəḇā’wōṯ bə’ereṣ miṣərāyim kî-yiṣə‘ăqû ’el-yəhwâ mipənê lōḥăṣîm wəyišəl^aḥ lâem mwōšî‘a wārāḇ wəhiṣṣîlām:

21 wənwōḏ^a‘ yəhwâ ləmiṣərayim wəyāḏə‘û miṣərayim ’eṯ-yəhwâ bayywōm hahû’ wə‘āḇəḏû zeḇ^aḥ ûminəḥâ wənāḏərû-nēḏer layhwâ wəšillēmû:

22 wənāḡaf yəhwâ ’eṯ-miṣərayim nāḡōf wərāfwō’ wəšāḇû ‘aḏ-yəhwâ wəne‘ətar lâem ûrəfā’ām:

23 bayywōm hahû’ tihəyeh məsillâ mimmiṣərayim ’aššûrâ ûḇā’-’aššûr bəmiṣərayim ûmiṣərayim bə’aššûr wə‘āḇəḏû miṣərayim ’eṯ-’aššûr: s

24 bayywōm hahû’ yihəyeh yiśərā’ēl šəlîšîyâ ləmiṣərayim ûlə’aššûr bərāḵâ bəqereḇ hā’āreṣ:

25 ’ăšer bērăḵwō yəhwâ ṣəḇā’wōṯ lē’mōr bārûḵə ‘ammî miṣərayim ûm^a‘ăśēh yāḏay ’aššûr wən^aḥălāṯî yiśərā’ēl: s