Sacred Texts  Bible  Index 
Polyglot  KJV  Sep  Vul 

Isaiah (Yisheyah) Index
  Previous  Next 

Tanach (Hebrew): Isaiah (Yisheyah) Chapter 10

1 ‏ה֥וֹי הַחֹֽקְקִ֖ים חִקְקֵי־אָ֑וֶן וּֽמְכַתְּבִ֥ים עָמָ֖ל כִּתֵּֽבוּ׃

2 ‏לְהַטּ֤וֹת מִדִּין֙ דַּלִּ֔ים וְלִגְזֹ֕ל מִשְׁפַּ֖ט עֲנִיֵּ֣י עַמִּ֑י לִהְי֤וֹת אַלְמָנוֹת֙ שְׁלָלָ֔ם וְאֶת־יְתוֹמִ֖ים יָבֹֽזּוּ׃

3 ‏וּמַֽה־תַּעֲשׂוּ֙ לְי֣וֹם פְּקֻדָּ֔ה וּלְשׁוֹאָ֖ה מִמֶּרְחָ֣ק תָּב֑וֹא עַל־מִי֙ תָּנ֣וּסוּ לְעֶזְרָ֔ה וְאָ֥נָה תַעַזְב֖וּ כְּבוֹדְכֶֽם׃

4 ‏בִּלְתִּ֤י כָרַע֙ תַּ֣חַת אַסִּ֔יר וְתַ֥חַת הֲרוּגִ֖ים יִפֹּ֑לוּ בְּכָל־זֹאת֙ לֹא־שָׁ֣ב אַפּ֔וֹ וְע֖וֹד יָד֥וֹ נְטוּיָֽה׃ ס

5 ‏ה֥וֹי אַשּׁ֖וּר שֵׁ֣בֶט אַפִּ֑י וּמַטֶּה־ה֥וּא בְיָדָ֖ם זַעְמִֽי׃

6 ‏בְּג֤וֹי חָנֵף֙ אֲשַׁלְּחֶ֔נּוּ וְעַל־עַ֥ם עֶבְרָתִ֖י אֲצַוֶּ֑נּוּ לִשְׁלֹ֤ל שָׁלָל֙ וְלָבֹ֣ז בַּ֔ז ולשימו וּלְשׂוּמ֥וֹ מִרְמָ֖ס כְּחֹ֥מֶר חוּצֽוֹת׃

7 ‏וְהוּא֙ לֹא־כֵ֣ן יְדַמֶּ֔ה וּלְבָב֖וֹ לֹא־כֵ֣ן יַחְשֹׁ֑ב כִּ֚י לְהַשְׁמִ֣יד בִּלְבָב֔וֹ וּלְהַכְרִ֥ית גּוֹיִ֖ם לֹ֥א מְעָֽט׃

8 ‏כִּ֖י יֹאמַ֑ר הֲלֹ֥א שָׂרַ֛י יַחְדָּ֖ו מְלָכִֽים׃

9 ‏הֲלֹ֥א כְּכַרְכְּמִ֖ישׁ כַּלְנ֑וֹ אִם־לֹ֤א כְאַרְפַּד֙ חֲמָ֔ת אִם־לֹ֥א כְדַמֶּ֖שֶׂק שֹׁמְרֽוֹן׃

10 ‏כַּאֲשֶׁר֙ מָצְאָ֣ה יָדִ֔י לְמַמְלְכֹ֖ת הָאֱלִ֑יל וּפְסִ֣ילֵיהֶ֔ם מִירֽוּשָׁלִַ֖ם וּמִשֹּׁמְרֽוֹן׃

11 ‏הֲלֹ֗א כַּאֲשֶׁ֥ר עָשִׂ֛יתִי לְשֹׁמְר֖וֹן וְלֶאֱלִילֶ֑יהָ כֵּ֛ן אֶעֱשֶׂ֥ה לִירוּשָׁלִַ֖ם וְלַעֲצַבֶּֽיהָ׃ ס

12 ‏וְהָיָ֗ה כִּֽי־יְבַצַּ֤ע אֲדֹנָי֙ אֶת־כָּל־מַֽעֲשֵׂ֔הוּ בְּהַ֥ר צִיּ֖וֹן וּבִירוּשָׁלִָ֑ם אֶפְקֹ֗ד עַל־פְּרִי־גֹ֙דֶל֙ לְבַ֣ב מֶֽלֶךְ־אַשּׁ֔וּר וְעַל־תִּפְאֶ֖רֶת ר֥וּם עֵינָֽיו׃

13 ‏כִּ֣י אָמַ֗ר בְּכֹ֤חַ יָדִי֙ עָשִׂ֔יתִי וּבְחָכְמָתִ֖י כִּ֣י נְבֻנ֑וֹתִי וְאָסִ֣יר׀ גְּבוּלֹ֣ת עַמִּ֗ים ועתידתיהם וַעֲתוּדֽוֹתֵיהֶם֙ שׁוֹשֵׂ֔תִי וְאוֹרִ֥יד כַּאבִּ֖יר יוֹשְׁבִֽים׃

14 ‏וַתִּמְצָ֨א כַקֵּ֤ן׀ יָדִי֙ לְחֵ֣יל הָֽעַמִּ֔ים וְכֶאֱסֹף֙ בֵּיצִ֣ים עֲזֻב֔וֹת כָּל־הָאָ֖רֶץ אֲנִ֣י אָסָ֑פְתִּי וְלֹ֤א הָיָה֙ נֹדֵ֣ד כָּנָ֔ף וּפֹצֶ֥ה פֶ֖ה וּמְצַפְצֵֽף׃

15 ‏הֲיִתְפָּאֵר֙ הַגַּרְזֶ֔ן עַ֖ל הַחֹצֵ֣ב בּ֑וֹ אִם־יִתְגַּדֵּ֤ל הַמַּשּׂוֹר֙ עַל־מְנִיפ֔וֹ כְּהָנִ֥יף שֵׁ֙בֶט֙ וְאֶת־מְרִימָ֔יו כְּהָרִ֥ים מַטֶּ֖ה לֹא־עֵֽץ׃

16 ‏לָ֠כֵן יְשַׁלַּ֨ח הָאָד֜וֹן יְהוָ֧ה צְבָא֛וֹת בְּמִשְׁמַנָּ֖יו רָז֑וֹן וְתַ֧חַת כְּבֹד֛וֹ יֵקַ֥ד יְקֹ֖ד כִּיק֥וֹד אֵֽשׁ׃

17 ‏וְהָיָ֤ה אֽוֹר־יִשְׂרָאֵל֙ לְאֵ֔שׁ וּקְדוֹשׁ֖וֹ לְלֶהָבָ֑ה וּבָעֲרָ֗ה וְאָֽכְלָ֛ה שִׁית֥וֹ וּשְׁמִיר֖וֹ בְּי֥וֹם אֶחָֽד׃

18 ‏וּכְב֤וֹד יַעְרוֹ֙ וְכַרְמִלּ֔וֹ מִנֶּ֥פֶשׁ וְעַד־בָּשָׂ֖ר יְכַלֶּ֑ה וְהָיָ֖ה כִּמְסֹ֥ס נֹסֵֽס׃

19 ‏וּשְׁאָ֥ר עֵ֛ץ יַעְר֖וֹ מִסְפָּ֣ר יִֽהְי֑וּ וְנַ֖עַר יִכְתְּבֵֽם׃ פ

20 ‏וְהָיָ֣ה׀ בַּיּ֣וֹם הַה֗וּא לֹֽא־יוֹסִ֨יף ע֜וֹד שְׁאָ֤ר יִשְׂרָאֵל֙ וּפְלֵיטַ֣ת בֵּֽית־יַעֲקֹ֔ב לְהִשָּׁעֵ֖ן עַל־מַכֵּ֑הוּ וְנִשְׁעַ֗ן עַל־יְהוָ֛ה קְד֥וֹשׁ יִשְׂרָאֵ֖ל בֶּאֱמֶֽת׃

21 ‏שְׁאָ֥ר יָשׁ֖וּב שְׁאָ֣ר יַעֲקֹ֑ב אֶל־אֵ֖ל גִּבּֽוֹר׃

22 ‏כִּ֣י אִם־יִהְיֶ֞ה עַמְּךָ֤ יִשְׂרָאֵל֙ כְּח֣וֹל הַיָּ֔ם שְׁאָ֖ר יָשׁ֣וּב בּ֑וֹ כִּלָּי֥וֹן חָר֖וּץ שׁוֹטֵ֥ף צְדָקָֽה׃

23 ‏כִּ֥י כָלָ֖ה וְנֶחֱרָצָ֑ה אֲדֹנָ֤י יְהוִה֙ צְבָא֔וֹת עֹשֶׂ֖ה בְּקֶ֥רֶב כָּל־הָאָֽרֶץ׃ ס

24 ‏לָכֵ֗ן כֹּֽה־אָמַ֞ר אֲדֹנָ֤י יְהוִה֙ צְבָא֔וֹת אַל־תִּירָ֥א עַמִּ֛י יֹשֵׁ֥ב צִיּ֖וֹן מֵֽאַשּׁ֑וּר בַּשֵּׁ֣בֶט יַכֶּ֔כָּה וּמַטֵּ֥הוּ יִשָּֽׂא־עָלֶ֖יךָ בְּדֶ֥רֶךְ מִצְרָֽיִם׃

25 ‏כִּי־ע֖וֹד מְעַ֣ט מִזְעָ֑ר וְכָ֣לָה זַ֔עַם וְאַפִּ֖י עַל־תַּבְלִיתָֽם׃

26 ‏וְעוֹרֵ֨ר עָלָ֜יו יְהוָ֤ה צְבָאוֹת֙ שׁ֔וֹט כְּמַכַּ֥ת מִדְיָ֖ן בְּצ֣וּר עוֹרֵ֑ב וּמַטֵּ֙הוּ֙ עַל־הַיָּ֔ם וּנְשָׂא֖וֹ בְּדֶ֥רֶךְ מִצְרָֽיִם׃

27 ‏וְהָיָ֣ה׀ בַּיּ֣וֹם הַה֗וּא יָס֤וּר סֻבֳּלוֹ֙ מֵעַ֣ל שִׁכְמֶ֔ךָ וְעֻלּ֖וֹ מֵעַ֣ל צַוָּארֶ֑ךָ וְחֻבַּ֥ל עֹ֖ל מִפְּנֵי־שָֽׁמֶן׃

28 ‏בָּ֥א עַל־עַיַּ֖ת עָבַ֣ר בְּמִגְר֑וֹן לְמִכְמָ֖שׂ יַפְקִ֥יד כֵּלָֽיו׃

29 ‏עָֽבְרוּ֙ מַעְבָּרָ֔ה גֶּ֖בַע מָל֣וֹן לָ֑נוּ חָֽרְדָה֙ הָֽרָמָ֔ה גִּבְעַ֥ת שָׁא֖וּל נָֽסָה׃

30 ‏צַהֲלִ֥י קוֹלֵ֖ךְ בַּת־גַּלִּ֑ים הַקְשִׁ֥יבִי לַ֖יְשָׁה עֲנִיָּ֥ה עֲנָתֽוֹת׃

31 ‏נָדְדָ֖ה מַדְמֵנָ֑ה יֹשְׁבֵ֥י הַגֵּבִ֖ים הֵעִֽיזוּ׃

32 ‏ע֥וֹד הַיּ֖וֹם בְּנֹ֣ב לַֽעֲמֹ֑ד יְנֹפֵ֤ף יָדוֹ֙ הַ֣ר בית־ בַּת־ צִיּ֔וֹן גִּבְעַ֖ת יְרוּשָׁלִָֽם׃ ס

33 ‏הִנֵּ֤ה הָאָדוֹן֙ יְהוָ֣ה צְבָא֔וֹת מְסָעֵ֥ף פֻּארָ֖ה בְּמַעֲרָצָ֑ה וְרָמֵ֤י הַקּוֹמָה֙ גְּדוּעִ֔ים וְהַגְּבֹהִ֖ים יִשְׁפָּֽלוּ׃

34 ‏וְנִקַּ֛ף סִֽבְכֵ֥י הַיַּ֖עַר בַּבַּרְזֶ֑ל וְהַלְּבָנ֖וֹן בְּאַדִּ֥יר יִפּֽוֹל׃ ס

1 hwōy haḥōqəqîm ḥiqəqê-’āwen ûməḵatəḇîm ‘āmāl kitēḇû:

2 ləhaṭṭwōṯ midîn dallîm wəliḡəzōl mišəpaṭ ‘ănîyê ‘ammî lihəywōṯ ’aləmānwōṯ šəlālām wə’eṯ-yəṯwōmîm yāḇōzzû:

3 ûmah-ta‘ăśû ləywōm pəqudâ ûləšwō’â mimmerəḥāq tāḇwō’ ‘al-mî tānûsû lə‘ezərâ wə’ānâ ṯa‘azəḇû kəḇwōḏəḵem:

4 bilətî ḵāra‘ taḥaṯ ’assîr wəṯaḥaṯ hărûḡîm yipōlû bəḵāl-zō’ṯ lō’-šāḇ ’apwō wə‘wōḏ yāḏwō nəṭûyâ: s

5 hwōy ’aššûr šēḇeṭ ’apî ûmaṭṭeh-hû’ ḇəyāḏām za‘əmî:

6 bəḡwōy ḥānēf ’ăšalləḥennû wə‘al-‘am ‘eḇərāṯî ’ăṣaûennû lišəlōl šālāl wəlāḇōz baz ûləśîmwō ûləśûmwō mirəmās kəḥōmer ḥûṣwōṯ:

7 wəhû’ lō’-ḵēn yəḏammeh ûləḇāḇwō lō’-ḵēn yaḥəšōḇ kî ləhašəmîḏ biləḇāḇwō ûləhaḵərîṯ gwōyim lō’ mə‘āṭ:

8 kî yō’mar hălō’ śāray yaḥədāw məlāḵîm:

9 hălō’ kəḵarəkəmîš kalənwō ’im-lō’ ḵə’arəpaḏ ḥămāṯ ’im-lō’ ḵəḏammeśeq šōmərwōn:

10 ka’ăšer māṣə’â yāḏî ləmamələḵōṯ hā’ĕlîl ûfəsîlêhem mîrûšālaim ûmiššōmərwōn:

11 hălō’ ka’ăšer ‘āśîṯî ləšōmərwōn wəle’ĕlîleyhā kēn ’e‘ĕśeh lîrûšālaim wəla‘ăṣabeyhā: s

12 wəhāyâ kî-yəḇaṣṣa‘ ’ăḏōnāy ’eṯ-kāl-ma‘ăśēhû bəhar ṣîywōn ûḇîrûšālāim ’efəqōḏ ‘al-pərî-ḡōḏel ləḇaḇ meleḵə-’aššûr wə‘al-tifə’ereṯ rûm ‘ênāyw:

13 kî ’āmar bəḵōḥa yāḏî ‘āśîṯî ûḇəḥāḵəmāṯî kî nəḇunwōṯî wə’āsîr| gəḇûlōṯ ‘ammîm wa‘ăṯîḏōṯêhem wa‘ăṯûḏwōṯêhem šwōśēṯî wə’wōrîḏ ka’bîr ywōšəḇîm:

14 watiməṣā’ ḵaqqēn| yāḏî ləḥêl hā‘ammîm wəḵe’ĕsōf bêṣîm ‘ăzuḇwōṯ kāl-hā’āreṣ ’ănî ’āsāfətî wəlō’ hāyâ nōḏēḏ kānāf ûfōṣeh feh ûməṣafəṣēf:

15 hăyiṯəpā’ēr hagarəzen ‘al haḥōṣēḇ bwō ’im-yiṯəgadēl hammaśśwōr ‘al-mənîfwō kəhānîf šēḇeṭ wə’eṯ-mərîmāyw kəhārîm maṭṭeh lō’-‘ēṣ:

16 lāḵēn yəšallaḥ hā’āḏwōn yəhwâ ṣəḇā’wōṯ bəmišəmannāyw rāzwōn wəṯaḥaṯ kəḇōḏwō yēqaḏ yəqōḏ kîqwōḏ ’ēš:

17 wəhāyâ ’wōr-yiśərā’ēl lə’ēš ûqəḏwōšwō ləlehāḇâ ûḇā‘ărâ wə’āḵəlâ šîṯwō ûšəmîrwō bəywōm ’eḥāḏ:

18 ûḵəḇwōḏ ya‘ərwō wəḵarəmillwō minnefeš wə‘aḏ-bāśār yəḵalleh wəhāyâ kiməsōs nōsēs:

19 ûšə’ār ‘ēṣ ya‘ərwō misəpār yihəyû wəna‘ar yiḵətəḇēm: f

20 wəhāyâ| bayywōm hahû’ lō’-ywōsîf ‘wōḏ šə’ār yiśərā’ēl ûfəlêṭaṯ bêṯ-ya‘ăqōḇ ləhiššā‘ēn ‘al-makēhû wənišə‘an ‘al-yəhwâ qəḏwōš yiśərā’ēl be’ĕmeṯ:

21 šə’ār yāšûḇ šə’ār ya‘ăqōḇ ’el-’ēl gibwōr:

22 kî ’im-yihəyeh ‘amməḵā yiśərā’ēl kəḥwōl hayyām šə’ār yāšûḇ bwō killāywōn ḥārûṣ šwōṭēf ṣəḏāqâ:

23 kî ḵālâ wəneḥĕrāṣâ ’ăḏōnāy yəhwih ṣəḇā’wōṯ ‘ōśeh bəqereḇ kāl-hā’āreṣ: s

24 lāḵēn kōh-’āmar ’ăḏōnāy yəhwih ṣəḇā’wōṯ ’al-tîrā’ ‘ammî yōšēḇ ṣîywōn mē’aššûr baššēḇeṭ yakekâ ûmaṭṭēhû yiśśā’-‘āleyḵā bəḏereḵə miṣərāyim:

25 kî-‘wōḏ mə‘aṭ mizə‘ār wəḵālâ za‘am wə’apî ‘al-taḇəlîṯām:

26 wə‘wōrēr ‘ālāyw yəhwâ ṣəḇā’wōṯ šwōṭ kəmakaṯ miḏəyān bəṣûr ‘wōrēḇ ûmaṭṭēhû ‘al-hayyām ûnəśā’wō bəḏereḵə miṣərāyim:

27 wəhāyâ| bayywōm hahû’ yāsûr subŏlwō mē‘al šiḵəmeḵā wə‘ullwō mē‘al ṣaûā’reḵā wəḥubal ‘ōl mipənê-šāmen:

28 bā’ ‘al-‘ayyaṯ ‘āḇar bəmiḡərwōn ləmiḵəmāś yafəqîḏ kēlāyw:

29 ‘āḇərû ma‘əbārâ geḇa‘ mālwōn lānû ḥārəḏâ hārāmâ giḇə‘aṯ šā’ûl nāsâ:

30 ṣahălî qwōlēḵə baṯ-gallîm haqəšîḇî layəšâ ‘ănîyâ ‘ănāṯwōṯ:

31 nāḏəḏâ maḏəmēnâ yōšəḇê hagēḇîm hē‘îzû:

32 ‘wōḏ hayywōm bənōḇ la‘ămōḏ yənōfēf yāḏwō har bêṯ- baṯ- ṣîywōn giḇə‘aṯ yərûšālāim: s

33 hinnēh hā’āḏwōn yəhwâ ṣəḇā’wōṯ məsā‘ēf pu’râ bəma‘ărāṣâ wərāmê haqqwōmâ gəḏû‘îm wəhagəḇōhîm yišəpālû:

34 wəniqqaf siḇəḵê hayya‘ar babarəzel wəhalləḇānwōn bə’adîr yipwōl: s


Next: Isaiah (Yisheyah) Chapter 11