‎1 ‏וַיְהִ֥י דְבַר־יְהוָ֖ה אֵלַ֥י לֵאמֹֽר׃

‎2 ‏בֶּן־אָדָ֕ם שִׂ֥ים פָּנֶ֖יךָ עַל־הַ֣ר שֵׂעִ֑יר וְהִנָּבֵ֖א עָלָֽיו׃

‎3 ‏וְאָמַ֣רְתָּ לּ֗וֹ כֹּ֤ה אָמַר֙ אֲדֹנָ֣י יְהוִ֔ה הִנְנִ֥י אֵלֶ֖יךָ הַר־שֵׂעִ֑יר וְנָטִ֤יתִי יָדִי֙ עָלֶ֔יךָ וּנְתַתִּ֖יךָ שְׁמָמָ֥ה וּמְשַׁמָּֽה׃

‎4 ‏עָרֶ֙יךָ֙ חָרְבָּ֣ה אָשִׂ֔ים וְאַתָּ֖ה שְׁמָמָ֣ה תִֽהְיֶ֑ה וְיָדַעְתָּ֖ כִּֽי־אֲנִ֥י יְהוָֽה׃

‎5 ‏יַ֗עַן הֱי֤וֹת לְךָ֙ אֵיבַ֣ת עוֹלָ֔ם וַתַּגֵּ֥ר אֶת־בְּנֵֽי־יִשְׂרָאֵ֖ל עַל־יְדֵי־חָ֑רֶב בְּעֵ֣ת אֵידָ֔ם בְּעֵ֖ת עֲוֹ֥ן קֵֽץ׃

‎6 ‏לָכֵ֣ן חַי־אָ֗נִי נְאֻם֙ אֲדֹנָ֣י יְהוִ֔ה כִּֽי־לְדָ֥ם אֶעֶשְׂךָ֖ וְדָ֣ם יִרְדֲּפֶ֑ךָ אִם־לֹ֥א דָ֛ם שָׂנֵ֖אתָ וְדָ֥ם יִרְדֲּפֶֽךָ׃

‎7 ‏וְנָֽתַתִּי֙ אֶת־הַ֣ר שֵׂעִ֔יר לְשִֽׁמְמָ֖ה וּשְׁמָמָ֑ה וְהִכְרַתִּ֥י מִמֶּ֖נּוּ עֹבֵ֥ר וָשָֽׁב׃

‎8 ‏וּמִלֵּאתִ֥י אֶת־הָרָ֖יו חֲלָלָ֑יו גִּבְעוֹתֶ֤יךָ וְגֵאוֹתֶ֙יךָ֙ וְכָל־אֲפִיקֶ֔יךָ חַלְלֵי־חֶ֖רֶב יִפְּל֥וּ בָהֶֽם׃

‎9 ‏שִֽׁמְמ֤וֹת עוֹלָם֙ אֶתֶּנְךָ֔ וְעָרֶ֖יךָ לֹ֣א תישבנה תָשֹׁ֑בְנָה וִֽידַעְתֶּ֖ם כִּֽי־אֲנִ֥י יְהוָֽה׃

‎10 ‏יַ֣עַן אֲ֠מָרְךָ אֶת־שְׁנֵ֨י הַגּוֹיִ֜ם וְאֶת־שְׁתֵּ֧י הָאֲרָצ֛וֹת לִ֥י תִהְיֶ֖ינָה וִֽירַשְׁנ֑וּהָ וַֽיהוָ֖ה שָׁ֥ם הָיָֽה׃

‎11 ‏לָכֵ֣ן חַי־אָ֗נִי נְאֻם֮ אֲדֹנָ֣י יְהוִה֒ וְעָשִׂ֗יתִי כְּאַפְּךָ֙ וּכְקִנְאָ֣תְךָ֔ אֲשֶׁ֣ר עָשִׂ֔יתָה מִשִּׂנְאָתֶ֖יךָ בָּ֑ם וְנוֹדַ֥עְתִּי בָ֖ם כַּאֲשֶׁ֥ר אֶשְׁפְּטֶֽךָ׃

‎12 ‏וְֽיָדַעְתָּ֮ כִּֽי־אֲנִ֣י יְהוָה֒ שָׁמַ֣עְתִּי׀ אֶת־כָּל־נָאָֽצוֹתֶ֗יךָ אֲשֶׁ֥ר אָמַ֛רְתָּ עַל־הָרֵ֥י יִשְׂרָאֵ֖ל לֵאמֹ֣ר׀ שממה שָׁמֵ֑מוּ לָ֥נוּ נִתְּנ֖וּ לְאָכְלָֽה׃

‎13 ‏וַתַּגְדִּ֤ילוּ עָלַי֙ בְּפִיכֶ֔ם וְהַעְתַּרְתֶּ֥ם עָלַ֖י דִּבְרֵיכֶ֑ם אֲנִ֖י שָׁמָֽעְתִּי׃ ס

‎14 ‏כֹּ֥ה אָמַ֖ר אֲדֹנָ֣י יְהוִ֑ה כִּשְׂמֹ֙חַ֙ כָּל־הָאָ֔רֶץ שְׁמָמָ֖ה אֶעֱשֶׂה־לָּֽךְ׃

‎15 ‏כְּשִׂמְחָ֨תְךָ֜ לְנַחְלַ֧ת בֵּֽית־יִשְׂרָאֵ֛ל עַ֥ל אֲשֶׁר־שָׁמֵ֖מָה כֵּ֣ן אֶעֱשֶׂה־לָּ֑ךְ שְׁמָמָ֨ה תִֽהְיֶ֤ה הַר־שֵׂעִיר֙ וְכָל־אֱד֣וֹם כֻּלָּ֔הּ וְיָדְע֖וּ כִּֽי־אֲנִ֥י יְהוָֽה׃ פ

1 wayəhî ḏəḇar-yəhwâ ’ēlay lē’mōr:

2 ben-’āḏām śîm pāneyḵā ‘al-har śē‘îr wəhinnāḇē’ ‘ālāyw:

3 wə’āmarətā llwō kōh ’āmar ’ăḏōnāy yəhwih hinənî ’ēleyḵā har-śē‘îr wənāṭîṯî yāḏî ‘āleyḵā ûnəṯatîḵā šəmāmâ ûməšammâ:

4 ‘āreyḵā ḥārəbâ ’āśîm wə’atâ šəmāmâ ṯihəyeh wəyāḏ^a‘ətā kî-’ănî yəhwâ:

5 y^a‘an hĕywōṯ ləḵā ’êḇaṯ ‘wōlām watagēr ’eṯ-bənê-yiśərā’ēl ‘al-yəḏê-ḥāreḇ bə‘ēṯ ’êḏām bə‘ēṯ ‘ăwōn qēṣ:

6 lāḵēn ḥay-’ānî nə’um ’ăḏōnāy yəhwih kî-ləḏām ’e‘eśəḵā wəḏām yirədăfeḵā ’im-lō’ ḏām śānē’ṯā wəḏām yirədăfeḵā:

7 wənāṯatî ’eṯ-har śē‘îr ləšiməmâ ûšəmāmâ wəhiḵəratî mimmennû ‘ōḇēr wāšāḇ:

8 ûmillē’ṯî ’eṯ-hārāyw ḥălālāyw giḇə‘wōṯeyḵā wəḡē’wōṯeyḵā wəḵāl-’ăfîqeyḵā ḥaləlê-ḥereḇ yipəlû ḇâem:

9 šiməmwōṯ ‘wōlām ’etenəḵā wə‘āreyḵā lō’ ṯêšaḇənâ ṯāšōḇənâ wîḏ^a‘ətem kî-’ănî yəhwâ:

10 y^a‘an ’ămārəḵā ’eṯ-šənê hagwōyim wə’eṯ-šətê hā’ărāṣwōṯ lî ṯihəyeynâ wîrašənûhā wayhwâ šām hāyâ:

11 lāḵēn ḥay-’ānî nə’um ’ăḏōnāy yəhwih wə‘āśîṯî kə’apəḵā ûḵəqinə’āṯəḵā ’ăšer ‘āśîṯâ miśśinə’āṯeyḵā bām wənwōḏ^a‘ətî ḇām ka’ăšer ’ešəpəṭeḵā:

12 wəyāḏ^a‘ətā kî-’ănî yəhwâ šām^a‘ətî| ’eṯ-kāl-nā’āṣwōṯeyḵā ’ăšer ’āmarətā ‘al-hārê yiśərā’ēl lē’mōr| šāmēmâ šāmēmû lānû nitənû lə’āḵəlâ:

13 wataḡədîlû ‘ālay bəfîḵem wəh^a‘ətarətem ‘ālay diḇərêḵem ’ănî šāmā‘ətî: s

14 kōh ’āmar ’ăḏōnāy yəhwih kiśəmōḥa kāl-hā’āreṣ šəmāmâ ’e‘ĕśeh-llāḵə:

15 kəśiməḥāṯəḵā lən^aḥəlaṯ bêṯ-yiśərā’ēl ‘al ’ăšer-šāmēmâ kēn ’e‘ĕśeh-llāḵə šəmāmâ ṯihəyeh har-śē‘îr wəḵāl-’ĕḏwōm kullāh wəyāḏə‘û kî-’ănî yəhwâ: f