Sacred Texts  Bible  Index 
Polyglot  KJV  Sep  Vul 

Ecclesiastes (Qohelet) Index
  Previous  Next 

Tanach (Hebrew): Ecclesiastes (Qohelet) Chapter 11

1 ‏שַׁלַּ֥ח לַחְמְךָ֖ עַל־פְּנֵ֣י הַמָּ֑יִם כִּֽי־בְרֹ֥ב הַיָּמִ֖ים תִּמְצָאֶֽנּוּ׃

2 ‏תֶּן־חֵ֥לֶק לְשִׁבְעָ֖ה וְגַ֣ם לִשְׁמוֹנָ֑ה כִּ֚י לֹ֣א תֵדַ֔ע מַה־יִּהְיֶ֥ה רָעָ֖ה עַל־הָאָֽרֶץ׃

3 ‏אִם־יִמָּלְא֨וּ הֶעָבִ֥ים גֶּ֙שֶׁם֙ עַל־הָאָ֣רֶץ יָרִ֔יקוּ וְאִם־יִפּ֥וֹל עֵ֛ץ בַּדָּר֖וֹם וְאִ֣ם בַּצָּפ֑וֹן מְק֛וֹם שֶׁיִּפּ֥וֹל הָעֵ֖ץ שָׁ֥ם יְהֽוּא׃

4 ‏שֹׁמֵ֥ר ר֖וּחַ לֹ֣א יִזְרָ֑ע וְרֹאֶ֥ה בֶעָבִ֖ים לֹ֥א יִקְצֽוֹר׃

5 ‏כַּאֲשֶׁ֨ר אֵֽינְךָ֤ יוֹדֵ֙עַ֙ מַה־דֶּ֣רֶךְ הָר֔וּחַ כַּעֲצָמִ֖ים בְּבֶ֣טֶן הַמְּלֵאָ֑ה כָּ֗כָה לֹ֤א תֵדַע֙ אֶת־מַעֲשֵׂ֣ה הָֽאֱלֹהִ֔ים אֲשֶׁ֥ר יַעֲשֶׂ֖ה אֶת־הַכֹּֽל׃

6 ‏בַּבֹּ֙קֶר֙ זְרַ֣ע אֶת־זַרְעֶ֔ךָ וְלָעֶ֖רֶב אַל־תַּנַּ֣ח יָדֶ֑ךָ כִּי֩ אֵֽינְךָ֨ יוֹדֵ֜ע אֵ֣י זֶ֤ה יִכְשָׁר֙ הֲזֶ֣ה אוֹ־זֶ֔ה וְאִם־שְׁנֵיהֶ֥ם כְּאֶחָ֖ד טוֹבִֽים׃

7 ‏וּמָת֖וֹק הָא֑וֹר וְט֥וֹב לַֽעֵינַ֖יִם לִרְא֥וֹת אֶת־הַשָּֽׁמֶשׁ׃

8 ‏כִּ֣י אִם־שָׁנִ֥ים הַרְבֵּ֛ה יִחְיֶ֥ה הָאָדָ֖ם בְּכֻלָּ֣ם יִשְׂמָ֑ח וְיִזְכֹּר֙ אֶת־יְמֵ֣י הַחֹ֔שֶׁךְ כִּֽי־הַרְבֵּ֥ה יִהְי֖וּ כָּל־שֶׁבָּ֥א הָֽבֶל׃

9 ‏שְׂמַ֧ח בָּח֣וּר בְּיַלְדוּתֶ֗יךָ וִֽיטִֽיבְךָ֤ לִבְּךָ֙ בִּימֵ֣י בְחוּרוֹתֶ֔ךָ וְהַלֵּךְ֙ בְּדַרְכֵ֣י לִבְּךָ֔ וּבְמַרְאֵ֖י עֵינֶ֑יךָ וְדָ֕ע כִּ֧י עַל־כָּל־אֵ֛לֶּה יְבִֽיאֲךָ֥ הָאֱלֹהִ֖ים בַּמִּשְׁפָּֽט׃

10 ‏וְהָסֵ֥ר כַּ֙עַס֙ מִלִּבֶּ֔ךָ וְהַעֲבֵ֥ר רָעָ֖ה מִבְּשָׂרֶ֑ךָ כִּֽי־הַיַּלְד֥וּת וְהַֽשַּׁחֲר֖וּת הָֽבֶל׃

1 šallaḥ laḥəməḵā ‘al-pənê hammāyim kî-ḇərōḇ hayyāmîm timəṣā’ennû:

2 ten-ḥēleq ləšiḇə‘â wəḡam lišəmwōnâ kî lō’ ṯēḏa‘ mah-yyihəyeh rā‘â ‘al-hā’āreṣ:

3 ’im-yimmālə’û he‘āḇîm gešem ‘al-hā’āreṣ yārîqû wə’im-yipwōl ‘ēṣ badārwōm wə’im baṣṣāfwōn məqwōm šeyyipwōl hā‘ēṣ šām yəhû’:

4 šōmēr rûḥa lō’ yizərā‘ wərō’eh ḇe‘āḇîm lō’ yiqəṣwōr:

5 ka’ăšer ’ênəḵā ywōḏē‘a mah-dereḵə hārûḥa ka‘ăṣāmîm bəḇeṭen hamməlē’â kāḵâ lō’ ṯēḏa‘ ’eṯ-ma‘ăśēh hā’ĕlōhîm ’ăšer ya‘ăśeh ’eṯ-hakōl:

6 babōqer zəra‘ ’eṯ-zarə‘eḵā wəlā‘ereḇ ’al-tannaḥ yāḏeḵā kî ’ênəḵā ywōḏē‘ ’ê zeh yiḵəšār hăzeh ’wō-zeh wə’im-šənêhem kə’eḥāḏ ṭwōḇîm:

7 ûmāṯwōq hā’wōr wəṭwōḇ la‘ênayim lirə’wōṯ ’eṯ-haššāmeš:

8 kî ’im-šānîm harəbēh yiḥəyeh hā’āḏām bəḵullām yiśəmāḥ wəyizəkōr ’eṯ-yəmê haḥōšeḵə kî-harəbēh yihəyû kāl-šebā’ hāḇel:

9 śəmaḥ bāḥûr bəyaləḏûṯeyḵā wîṭîḇəḵā libəḵā bîmê ḇəḥûrwōṯeḵā wəhallēḵə bəḏarəḵê libəḵā ûḇəmarə’ê ‘êneyḵā wəḏā‘ kî ‘al-kāl-’ēlleh yəḇî’ăḵā hā’ĕlōhîm bammišəpāṭ:

10 wəhāsēr ka‘as millibeḵā wəha‘ăḇēr rā‘â mibəśāreḵā kî-hayyaləḏûṯ wəhaššaḥărûṯ hāḇel:


Next: Ecclesiastes (Qohelet) Chapter 12