‎1 ‏ט֥וֹב שֵׁ֖ם מִשֶּׁ֣מֶן ט֑וֹב וְי֣וֹם הַמָּ֔וֶת מִיּ֖וֹם הִוָּלְדֽוֹ׃

‎2 ‏ט֞וֹב לָלֶ֣כֶת אֶל־בֵּֽית־אֵ֗בֶל מִלֶּ֙כֶת֙ אֶל־בֵּ֣ית מִשְׁתֶּ֔ה בַּאֲשֶׁ֕ר ה֖וּא ס֣וֹף כָּל־הָאָדָ֑ם וְהַחַ֖י יִתֵּ֥ן אֶל־לִבּֽוֹ׃

‎3 ‏ט֥וֹב כַּ֖עַס מִשְּׂחֹ֑ק כִּֽי־בְרֹ֥עַ פָּנִ֖ים יִ֥יטַב לֵֽב׃

‎4 ‏לֵ֤ב חֲכָמִים֙ בְּבֵ֣ית אֵ֔בֶל וְלֵ֥ב כְּסִילִ֖ים בְּבֵ֥ית שִׂמְחָֽה׃

‎5 ‏ט֕וֹב לִשְׁמֹ֖עַ גַּעֲרַ֣ת חָכָ֑ם מֵאִ֕ישׁ שֹׁמֵ֖עַ שִׁ֥יר כְּסִילִֽים׃

‎6 ‏כִּ֣י כְק֤וֹל הַסִּירִים֙ תַּ֣חַת הַסִּ֔יר כֵּ֖ן שְׂחֹ֣ק הַכְּסִ֑יל וְגַם־זֶ֖ה הָֽבֶל׃

‎7 ‏כִּ֥י הָעֹ֖שֶׁק יְהוֹלֵ֣ל חָכָ֑ם וִֽיאַבֵּ֥ד אֶת־לֵ֖ב מַתָּנָֽה׃

‎8 ‏ט֛וֹב אַחֲרִ֥ית דָּבָ֖ר מֵֽרֵאשִׁית֑וֹ ט֥וֹב אֶֽרֶךְ־ר֖וּחַ מִגְּבַהּ־רֽוּחַ׃

‎9 ‏אַל־תְּבַהֵ֥ל בְּרֽוּחֲךָ֖ לִכְע֑וֹס כִּ֣י כַ֔עַס בְּחֵ֥יק כְּסִילִ֖ים יָנֽוּחַ׃

‎10 ‏אַל־תֹּאמַר֙ מֶ֣ה הָיָ֔ה שֶׁ֤הַיָּמִים֙ הָרִ֣אשֹׁנִ֔ים הָי֥וּ טוֹבִ֖ים מֵאֵ֑לֶּה כִּ֛י לֹ֥א מֵחָכְמָ֖ה שָׁאַ֥לְתָּ עַל־זֶֽה׃

‎11 ‏טוֹבָ֥ה חָכְמָ֖ה עִֽם־נַחֲלָ֑ה וְיֹתֵ֖ר לְרֹאֵ֥י הַשָּֽׁמֶשׁ׃

‎12 ‏כִּ֛י בְּצֵ֥ל הַֽחָכְמָ֖ה בְּצֵ֣ל הַכָּ֑סֶף וְיִתְר֣וֹן דַּ֔עַת הַֽחָכְמָ֖ה תְּחַיֶּ֥ה בְעָלֶֽיהָ׃

‎13 ‏רְאֵ֖ה אֶת־מַעֲשֵׂ֣ה הָאֱלֹהִ֑ים כִּ֣י מִ֤י יוּכַל֙ לְתַקֵּ֔ן אֵ֖ת אֲשֶׁ֥ר עִוְּתֽוֹ׃

‎14 ‏בְּי֤וֹם טוֹבָה֙ הֱיֵ֣ה בְט֔וֹב וּבְי֥וֹם רָעָ֖ה רְאֵ֑ה גַּ֣ם אֶת־זֶ֤ה לְעֻמַּת־זֶה֙ עָשָׂ֣ה הָֽאֱלֹהִ֔ים עַל־דִּבְרַ֗ת שֶׁלֹּ֨א יִמְצָ֧א הָֽאָדָ֛ם אַחֲרָ֖יו מְאֽוּמָה׃

‎15 ‏אֶת־הַכֹּ֥ל רָאִ֖יתִי בִּימֵ֣י הֶבְלִ֑י יֵ֤שׁ צַדִּיק֙ אֹבֵ֣ד בְּצִדְק֔וֹ וְיֵ֣שׁ רָשָׁ֔ע מַאֲרִ֖יךְ בְּרָעָתֽוֹ׃

‎16 ‏אַל־תְּהִ֤י צַדִּיק֙ הַרְבֵּ֔ה וְאַל־תִּתְחַכַּ֖ם יוֹתֵ֑ר לָ֖מָּה תִּשּׁוֹמֵֽם׃

‎17 ‏אַל־תִּרְשַׁ֥ע הַרְבֵּ֖ה וְאַל־תְּהִ֣י סָכָ֑ל לָ֥מָּה תָמ֖וּת בְּלֹ֥א עִתֶּֽךָ׃

‎18 ‏ט֚וֹב אֲשֶׁ֣ר תֶּאֱחֹ֣ז בָּזֶ֔ה וְגַם־מִזֶּ֖ה אַל־תַּנַּ֣ח אֶת־יָדֶ֑ךָ כִּֽי־יְרֵ֥א אֱלֹהִ֖ים יֵצֵ֥א אֶת־כֻּלָּֽם׃

‎19 ‏הַֽחָכְמָ֖ה תָּעֹ֣ז לֶחָכָ֑ם מֵֽעֲשָׂרָה֙ שַׁלִּיטִ֔ים אֲשֶׁ֥ר הָי֖וּ בָּעִֽיר׃

‎20 ‏כִּ֣י אָדָ֔ם אֵ֥ין צַדִּ֖יק בָּאָ֑רֶץ אֲשֶׁ֥ר יַעֲשֶׂה־טּ֖וֹב וְלֹ֥א יֶחֱטָֽא׃

‎21 ‏גַּ֤ם לְכָל־הַדְּבָרִים֙ אֲשֶׁ֣ר יְדַבֵּ֔רוּ אַל־תִּתֵּ֖ן לִבֶּ֑ךָ אֲשֶׁ֥ר לֹֽא־תִשְׁמַ֥ע אֶֽת־עַבְדְּךָ֖ מְקַלְלֶֽךָ׃

‎22 ‏כִּ֛י גַּם־פְּעָמִ֥ים רַבּ֖וֹת יָדַ֣ע לִבֶּ֑ךָ אֲשֶׁ֥ר גַּם־את אַתָּ֖ה קִלַּ֥לְתָּ אֲחֵרִֽים׃

‎23 ‏כָּל־זֹ֖ה נִסִּ֣יתִי בַֽחָכְמָ֑ה אָמַ֣רְתִּי אֶחְכָּ֔מָה וְהִ֖יא רְחוֹקָ֥ה מִמֶּֽנִּי׃

‎24 ‏רָח֖וֹק מַה־שֶּׁהָיָ֑ה וְעָמֹ֥ק׀ עָמֹ֖ק מִ֥י יִמְצָאֶֽנּוּ׃

‎25 ‏סַבּ֨וֹתִֽי אֲנִ֤י וְלִבִּי֙ לָדַ֣עַת וְלָת֔וּר וּבַקֵּ֥שׁ חָכְמָ֖ה וְחֶשְׁבּ֑וֹן וְלָדַ֙עַת֙ רֶ֣שַׁע כֶּ֔סֶל וְהַסִּכְל֖וּת הוֹלֵלֽוֹת׃

‎26 ‏וּמוֹצֶ֨א אֲנִ֜י מַ֣ר מִמָּ֗וֶת אֶת־הָֽאִשָּׁה֙ אֲשֶׁר־הִ֨יא מְצוֹדִ֧ים וַחֲרָמִ֛ים לִבָּ֖הּ אֲסוּרִ֣ים יָדֶ֑יהָ ט֞וֹב לִפְנֵ֤י הָאֱלֹהִים֙ יִמָּלֵ֣ט מִמֶּ֔נָּה וְחוֹטֵ֖א יִלָּ֥כֶד בָּֽהּ׃

‎27 ‏רְאֵה֙ זֶ֣ה מָצָ֔אתִי אָמְרָ֖ה קֹהֶ֑לֶת אַחַ֥ת לְאַחַ֖ת לִמְצֹ֥א חֶשְׁבּֽוֹן׃

‎28 ‏אֲשֶׁ֛ר עוֹד־בִּקְשָׁ֥ה נַפְשִׁ֖י וְלֹ֣א מָצָ֑אתִי אָדָ֞ם אֶחָ֤ד מֵאֶ֙לֶף֙ מָצָ֔אתִי וְאִשָּׁ֥ה בְכָל־אֵ֖לֶּה לֹ֥א מָצָֽאתִי׃

‎29 ‏לְבַד֙ רְאֵה־זֶ֣ה מָצָ֔אתִי אֲשֶׁ֨ר עָשָׂ֧ה הָאֱלֹהִ֛ים אֶת־הָאָדָ֖ם יָשָׁ֑ר וְהֵ֥מָּה בִקְשׁ֖וּ חִשְּׁבֹנ֥וֹת רַבִּֽים׃

1 ṭwōḇ šēm miššemen ṭwōḇ wəywōm hammāweṯ mîywōm hiûāləḏwō:

2 ṭwōḇ lāleḵeṯ ’el-bêṯ-’ēḇel milleḵeṯ ’el-bêṯ mišəteh ba’ăšer hû’ swōf kāl-hā’āḏām wəh^aḥay yitēn ’el-libwō:

3 ṭwōḇ k^a‘as miśśəḥōq kî-ḇərō‘a pānîm yîṭaḇ lēḇ:

4 lēḇ ḥăḵāmîm bəḇêṯ ’ēḇel wəlēḇ kəsîlîm bəḇêṯ śiməḥâ:

5 ṭwōḇ lišəmō‘a g^a‘ăraṯ ḥāḵām mē’îš šōmē‘a šîr kəsîlîm:

6 kî ḵəqwōl hassîrîm t^aḥaṯ hassîr kēn śəḥōq hakəsîl wəḡam-zeh hāḇel:

7 kî hā‘ōšeq yəhwōlēl ḥāḵām wî’abēḏ ’eṯ-lēḇ matānâ:

8 ṭwōḇ ’^aḥărîṯ dāḇār mērē’šîṯwō ṭwōḇ ’ereḵə-rûḥa migəḇ^ah-rûḥa:

9 ’al-təḇahēl bərûḥăḵā liḵə‘wōs kî ḵ^a‘as bəḥêq kəsîlîm yānûḥa:

10 ’al-tō’mar meh hāyâ šehayyāmîm hāri’šōnîm hāyû ṭwōḇîm mē’ēlleh kî lō’ mēḥāḵəmâ šā’alətā ‘al-zeh:

11 ṭwōḇâ ḥāḵəmâ ‘im-n^aḥălâ wəyōṯēr lərō’ê haššāmeš:

12 kî bəṣēl h^aḥāḵəmâ bəṣēl hakāsef wəyiṯərwōn d^a‘aṯ h^aḥāḵəmâ təḥayyeh ḇə‘āleyhā:

13 rə’ēh ’eṯ-m^a‘ăśēh hā’ĕlōhîm kî mî yûḵal ləṯaqqēn ’ēṯ ’ăšer ‘iûəṯwō:

14 bəywōm ṭwōḇâ hĕyēh ḇəṭwōḇ ûḇəywōm rā‘â rə’ēh gam ’eṯ-zeh lə‘ummaṯ-zeh ‘āśâ hā’ĕlōhîm ‘al-diḇəraṯ šellō’ yiməṣā’ hā’āḏām ’^aḥărāyw mə’ûmâ:

15 ’eṯ-hakōl rā’îṯî bîmê heḇəlî yēš ṣadîq ’ōḇēḏ bəṣiḏəqwō wəyēš rāšā‘ ma’ărîḵə bərā‘āṯwō:

16 ’al-təhî ṣadîq harəbēh wə’al-tiṯəḥakam ywōṯēr lāmmâ tiššwōmēm:

17 ’al-tirəš^a‘ harəbēh wə’al-təhî sāḵāl lāmmâ ṯāmûṯ bəlō’ ‘iteḵā:

18 ṭwōḇ ’ăšer te’ĕḥōz bāzeh wəḡam-mizzeh ’al-tann^aḥ ’eṯ-yāḏeḵā kî-yərē’ ’ĕlōhîm yēṣē’ ’eṯ-kullām:

19 h^aḥāḵəmâ tā‘ōz leḥāḵām mē‘ăśārâ šallîṭîm ’ăšer hāyû bā‘îr:

20 kî ’āḏām ’ên ṣadîq bā’āreṣ ’ăšer y^a‘ăśeh-ṭṭwōḇ wəlō’ yeḥĕṭā’:

21 gam ləḵāl-hadəḇārîm ’ăšer yəḏabērû ’al-titēn libeḵā ’ăšer lō’-ṯišəm^a‘ ’eṯ-‘aḇədəḵā məqaləleḵā:

22 kî gam-pə‘āmîm rabwōṯ yāḏ^a‘ libeḵā ’ăšer gam-’atə ’atâ qillalətā ’ăḥērîm:

23 kāl-zōh nissîṯî ḇ^aḥāḵəmâ ’āmarətî ’eḥəkāmâ wəhî’ rəḥwōqâ mimmennî:

24 rāḥwōq mah-ššehāyâ wə‘āmōq| ‘āmōq mî yiməṣā’ennû:

25 sabwōṯî ’ănî wəlibî lāḏ^a‘aṯ wəlāṯûr ûḇaqqēš ḥāḵəmâ wəḥešəbwōn wəlāḏ^a‘aṯ reš^a‘ kesel wəhassiḵəlûṯ hwōlēlwōṯ:

26 ûmwōṣe’ ’ănî mar mimmāweṯ ’eṯ-hā’iššâ ’ăšer-hî’ məṣwōḏîm w^aḥărāmîm libāh ’ăsûrîm yāḏeyhā ṭwōḇ lifənê hā’ĕlōhîm yimmālēṭ mimmennâ wəḥwōṭē’ yillāḵeḏ bāh:

27 rə’ēh zeh māṣā’ṯî ’āmərâ qōheleṯ ’^aḥaṯ lə’^aḥaṯ liməṣō’ ḥešəbwōn:

28 ’ăšer ‘wōḏ-biqəšâ nafəšî wəlō’ māṣā’ṯî ’āḏām ’eḥāḏ mē’elef māṣā’ṯî wə’iššâ ḇəḵāl-’ēlleh lō’ māṣā’ṯî:

29 ləḇaḏ rə’ēh-zeh māṣā’ṯî ’ăšer ‘āśâ hā’ĕlōhîm ’eṯ-hā’āḏām yāšār wəhēmmâ ḇiqəšû ḥiššəḇōnwōṯ rabîm: