‎1 ‏בִּשְׁנַ֣ת שָׁל֗וֹשׁ לְכ֙וֹרֶשׁ֙ מֶ֣לֶךְ פָּרַ֔ס דָּבָר֙ נִגְלָ֣ה לְדָֽנִיֵּ֔אל אֲשֶׁר־נִקְרָ֥א שְׁמ֖וֹ בֵּלְטְשַׁאצַּ֑ר וֶאֱמֶ֤ת הַדָּבָר֙ וְצָבָ֣א גָד֔וֹל וּבִין֙ אֶת־הַדָּבָ֔ר וּבִ֥ינָה ל֖וֹ בַּמַּרְאֶֽה׃

‎2 ‏בַּיָּמִ֖ים הָהֵ֑ם אֲנִ֤י דָֽנִיֵּאל֙ הָיִ֣יתִי מִתְאַבֵּ֔ל שְׁלֹשָׁ֥ה שָׁבֻעִ֖ים יָמִֽים׃

‎3 ‏לֶ֣חֶם חֲמֻד֞וֹת לֹ֣א אָכַ֗לְתִּי וּבָשָׂ֥ר וָיַ֛יִן לֹא־בָ֥א אֶל־פִּ֖י וְס֣וֹךְ לֹא־סָ֑כְתִּי עַד־מְלֹ֕את שְׁלֹ֥שֶׁת שָׁבֻעִ֖ים יָמִֽים׃ פ

‎4 ‏וּבְי֛וֹם עֶשְׂרִ֥ים וְאַרְבָּעָ֖ה לַחֹ֣דֶשׁ הָרִאשׁ֑וֹן וַאֲנִ֗י הָיִ֛יתִי עַ֣ל יַ֧ד הַנָּהָ֛ר הַגָּד֖וֹל ה֥וּא חִדָּֽקֶל׃

‎5 ‏וָאֶשָּׂ֤א אֶת־עֵינַי֙ וָאֵ֔רֶא וְהִנֵּ֥ה אִישׁ־אֶחָ֖ד לָב֣וּשׁ בַּדִּ֑ים וּמָתְנָ֥יו חֲגֻרִ֖ים בְּכֶ֥תֶם אוּפָֽז׃

‎6 ‏וּגְוִיָּת֣וֹ כְתַרְשִׁ֗ישׁ וּפָנָ֞יו כְּמַרְאֵ֤ה בָרָק֙ וְעֵינָיו֙ כְּלַפִּ֣ידֵי אֵ֔שׁ וּזְרֹֽעֹתָיו֙ וּמַרְגְּלֹתָ֔יו כְּעֵ֖ין נְחֹ֣שֶׁת קָלָ֑ל וְק֥וֹל דְּבָרָ֖יו כְּק֥וֹל הָמֽוֹן׃

‎7 ‏וְרָאִיתִי֩ אֲנִ֨י דָנִיֵּ֤אל לְבַדִּי֙ אֶת־הַמַּרְאָ֔ה וְהָאֲנָשִׁים֙ אֲשֶׁ֣ר הָי֣וּ עִמִּ֔י לֹ֥א רָא֖וּ אֶת־הַמַּרְאָ֑ה אֲבָ֗ל חֲרָדָ֤ה גְדֹלָה֙ נָפְלָ֣ה עֲלֵיהֶ֔ם וַֽיִּבְרְח֖וּ בְּהֵחָבֵֽא׃

‎8 ‏וַאֲנִי֙ נִשְׁאַ֣רְתִּי לְבַדִּ֔י וָֽאֶרְאֶ֗ה אֶת־הַמַּרְאָ֤ה הַגְּדֹלָה֙ הַזֹּ֔את וְלֹ֥א נִשְׁאַר־בִּ֖י כֹּ֑ח וְהוֹדִ֗י נֶהְפַּ֤ךְ עָלַי֙ לְמַשְׁחִ֔ית וְלֹ֥א עָצַ֖רְתִּי כֹּֽחַ׃

‎9 ‏וָאֶשְׁמַ֖ע אֶת־ק֣וֹל דְּבָרָ֑יו וּכְשָׁמְעִי֙ אֶת־ק֣וֹל דְּבָרָ֔יו וַאֲנִ֗י הָיִ֛יתִי נִרְדָּ֥ם עַל־פָּנַ֖י וּפָנַ֥י אָֽרְצָה׃

‎10 ‏וְהִנֵּה־יָ֖ד נָ֣גְעָה בִּ֑י וַתְּנִיעֵ֥נִי עַל־בִּרְכַּ֖י וְכַפּ֥וֹת יָדָֽי׃

‎11 ‏וַיֹּ֣אמֶר אֵלַ֡י דָּנִיֵּ֣אל אִישׁ־חֲ֠מֻדוֹת הָבֵ֨ן בַּדְּבָרִ֜ים אֲשֶׁר֩ אָנֹכִ֨י דֹבֵ֤ר אֵלֶ֙יךָ֙ וַעֲמֹ֣ד עַל־עָמְדֶ֔ךָ כִּ֥י עַתָּ֖ה שֻׁלַּ֣חְתִּי אֵלֶ֑יךָ וּבְדַבְּר֥וֹ עִמִּ֛י אֶת־הַדָּבָ֥ר הַזֶּ֖ה עָמַ֥דְתִּי מַרְעִֽיד׃

‎12 ‏וַיֹּ֣אמֶר אֵלַי֮ אַל־תִּירָ֣א דָנִיֵּאל֒ כִּ֣י׀ מִן־הַיּ֣וֹם הָרִאשׁ֗וֹן אֲשֶׁ֨ר נָתַ֧תָּ אֶֽת־לִבְּךָ֛ לְהָבִ֧ין וּלְהִתְעַנּ֛וֹת לִפְנֵ֥י אֱלֹהֶ֖יךָ נִשְׁמְע֣וּ דְבָרֶ֑יךָ וַאֲנִי־בָ֖אתִי בִּדְבָרֶֽיךָ׃

‎13 ‏וְשַׂ֣ר׀ מַלְכ֣וּת פָּרַ֗ס עֹמֵ֤ד לְנֶגְדִּי֙ עֶשְׂרִ֣ים וְאֶחָ֣ד י֔וֹם וְהִנֵּ֣ה מִֽיכָאֵ֗ל אַחַ֛ד הַשָּׂרִ֥ים הָרִאשֹׁנִ֖ים בָּ֣א לְעָזְרֵ֑נִי וַאֲנִי֙ נוֹתַ֣רְתִּי שָׁ֔ם אֵ֖צֶל מַלְכֵ֥י פָרָֽס׃

‎14 ‏וּבָ֙אתִי֙ לַהֲבִ֣ינְךָ֔ אֵ֛ת אֲשֶׁר־יִקְרָ֥ה לְעַמְּךָ֖ בְּאַחֲרִ֣ית הַיָּמִ֑ים כִּי־ע֥וֹד חָז֖וֹן לַיָּמִֽים׃

‎15 ‏וּבְדַבְּר֣וֹ עִמִּ֔י כַּדְּבָרִ֖ים הָאֵ֑לֶּה נָתַ֧תִּי פָנַ֛י אַ֖רְצָה וְנֶאֱלָֽמְתִּי׃

‎16 ‏וְהִנֵּ֗ה כִּדְמוּת֙ בְּנֵ֣י אָדָ֔ם נֹגֵ֖עַ עַל־שְׂפָתָ֑י וָאֶפְתַּח־פִּ֗י וָאֲדַבְּרָה֙ וָאֹֽמְרָה֙ אֶל־הָעֹמֵ֣ד לְנֶגְדִּ֔י אֲדֹנִ֗י בַּמַּרְאָה֙ נֶהֶפְכ֤וּ צִירַי֙ עָלַ֔י וְלֹ֥א עָצַ֖רְתִּי כֹּֽחַ׃

‎17 ‏וְהֵ֣יךְ יוּכַ֗ל עֶ֤בֶד אֲדֹנִי֙ זֶ֔ה לְדַבֵּ֖ר עִם־אֲדֹ֣נִי זֶ֑ה וַאֲנִ֤י מֵעַ֙תָּה֙ לֹֽא־יַעֲמָד־בִּ֣י כֹ֔חַ וּנְשָׁמָ֖ה לֹ֥א נִשְׁאֲרָה־בִֽי׃

‎18 ‏וַיֹּ֧סֶף וַיִּגַּע־בִּ֛י כְּמַרְאֵ֥ה אָדָ֖ם וַֽיְחַזְּקֵֽנִי׃

‎19 ‏וַיֹּ֜אמֶר אַל־תִּירָ֧א אִישׁ־חֲמֻד֛וֹת שָׁל֥וֹם לָ֖ךְ חֲזַ֣ק וַחֲזָ֑ק וּֽבְדַבְּר֤וֹ³ עִמִּי֙ הִתְחַזַּ֔קְתִּי וָאֹ֥מְרָ֛ה³ יְדַבֵּ֥ר אֲדֹנִ֖י כִּ֥י חִזַּקְתָּֽנִי׃

‎20 ‏וַיֹּ֗אמֶר הֲיָדַ֙עְתָּ֙ לָמָּה־בָּ֣אתִי אֵלֶ֔יךָ וְעַתָּ֣ה אָשׁ֔וּב לְהִלָּחֵ֖ם עִם־שַׂ֣ר פָּרָ֑ס וַאֲנִ֣י יוֹצֵ֔א וְהִנֵּ֥ה שַׂר־יָוָ֖ן בָּֽא׃

‎21 ‏אֲבָל֙ אַגִּ֣יד לְךָ֔ אֶת־הָרָשׁ֥וּם בִּכְתָ֖ב אֱמֶ֑ת וְאֵ֨ין אֶחָ֜ד מִתְחַזֵּ֤ק עִמִּי֙ עַל־אֵ֔לֶּה כִּ֥י אִם־מִיכָאֵ֖ל שַׂרְכֶֽם׃ פ

1 bišənaṯ šālwōš ləḵwōreš meleḵə pāras dāḇār niḡəlâ ləḏānîyē’l ’ăšer-niqərā’ šəmwō bēləṭəša’ṣṣar we’ĕmeṯ hadāḇār wəṣāḇā’ ḡāḏwōl ûḇîn ’eṯ-hadāḇār ûḇînâ lwō bammarə’eh:

2 bayyāmîm hâēm ’ănî ḏānîyē’l hāyîṯî miṯə’abēl šəlōšâ šāḇu‘îm yāmîm:

3 leḥem ḥămuḏwōṯ lō’ ’āḵalətî ûḇāśār wāyayin lō’-ḇā’ ’el-pî wəswōḵə lō’-sāḵətî ‘aḏ-məlō’ṯ šəlōšeṯ šāḇu‘îm yāmîm: f

4 ûḇəywōm ‘eśərîm wə’arəbā‘â l^aḥōḏeš hāri’šwōn wa’ănî hāyîṯî ‘al yaḏ hannâār hagāḏwōl hû’ ḥidāqel:

5 wā’eśśā’ ’eṯ-‘ênay wā’ēre’ wəhinnēh ’îš-’eḥāḏ lāḇûš badîm ûmāṯənāyw ḥăḡurîm bəḵeṯem ’ûfāz:

6 ûḡəwîyāṯwō ḵəṯarəšîš ûfānāyw kəmarə’ēh ḇārāq wə‘ênāyw kəlapîḏê ’ēš ûzərō‘ōṯāyw ûmarəgəlōṯāyw kə‘ên nəḥōšeṯ qālāl wəqwōl dəḇārāyw kəqwōl hāmwōn:

7 wərā’îṯî ’ănî ḏānîyē’l ləḇadî ’eṯ-hammarə’â wəhā’ănāšîm ’ăšer hāyû ‘immî lō’ rā’û ’eṯ-hammarə’â ’ăḇāl ḥărāḏâ ḡəḏōlâ nāfəlâ ‘ălêhem wayyiḇərəḥû bəhēḥāḇē’:

8 wa’ănî nišə’arətî ləḇadî wā’erə’eh ’eṯ-hammarə’â hagəḏōlâ hazzō’ṯ wəlō’ nišə’ar-bî kōḥ wəhwōḏî nehəpaḵə ‘ālay ləmašəḥîṯ wəlō’ ‘āṣarətî kōḥa:

9 wā’ešəm^a‘ ’eṯ-qwōl dəḇārāyw ûḵəšāmə‘î ’eṯ-qwōl dəḇārāyw wa’ănî hāyîṯî nirədām ‘al-pānay ûfānay ’ārəṣâ:

10 wəhinnēh-yāḏ nāḡə‘â bî watənî‘ēnî ‘al-birəkay wəḵapwōṯ yāḏāy:

11 wayyō’mer ’ēlay dānîyē’l ’îš-ḥămuḏwōṯ hāḇēn badəḇārîm ’ăšer ’ānōḵî ḏōḇēr ’ēleyḵā w^a‘ămōḏ ‘al-‘āməḏeḵā kî ‘atâ šull^aḥətî ’ēleyḵā ûḇəḏabərwō ‘immî ’eṯ-hadāḇār hazzeh ‘āmaḏətî marə‘îḏ:

12 wayyō’mer ’ēlay ’al-tîrā’ ḏānîyē’l kî| min-hayywōm hāri’šwōn ’ăšer nāṯatā ’eṯ-libəḵā ləhāḇîn ûləhiṯə‘annwōṯ lifənê ’ĕlōheyḵā nišəmə‘û ḏəḇāreyḵā wa’ănî-ḇā’ṯî biḏəḇāreyḵā:

13 wəśar| maləḵûṯ pāras ‘ōmēḏ ləneḡədî ‘eśərîm wə’eḥāḏ ywōm wəhinnēh mîḵā’ēl ’^aḥaḏ haśśārîm hāri’šōnîm bā’ lə‘āzərēnî wa’ănî nwōṯarətî šām ’ēṣel maləḵê fārās:

14 ûḇā’ṯî lahăḇînəḵā ’ēṯ ’ăšer-yiqərâ lə‘amməḵā bə’^aḥărîṯ hayyāmîm kî-‘wōḏ ḥāzwōn layyāmîm:

15 ûḇəḏabərwō ‘immî kadəḇārîm hā’ēlleh nāṯatî fānay ’arəṣâ wəne’ĕlāmətî:

16 wəhinnēh kiḏəmûṯ bənê ’āḏām nōḡē‘a ‘al-śəfāṯāy wā’efət^aḥ-pî wā’ăḏabərâ wā’ōmərâ ’el-hā‘ōmēḏ ləneḡədî ’ăḏōnî bammarə’â nehefəḵû ṣîray ‘ālay wəlō’ ‘āṣarətî kōḥa:

17 wəhêḵə yûḵal ‘eḇeḏ ’ăḏōnî zeh ləḏabēr ‘im-’ăḏōnî zeh wa’ănî mē‘atâ lō’-y^a‘ămāḏ-bî ḵōḥa ûnəšāmâ lō’ nišə’ărâ-ḇî:

18 wayyōsef wayyig^a‘-bî kəmarə’ēh ’āḏām wayəḥazzəqēnî:

19 wayyō’mer ’al-tîrā’ ’îš-ḥămuḏwōṯ šālwōm lāḵə ḥăzaq w^aḥăzāq ûḇəḏabərwō³ ‘immî hiṯəḥazzaqətî wā’ōmərâ³ yəḏabēr ’ăḏōnî kî ḥizzaqətānî:

20 wayyō’mer hăyāḏ^a‘ətā lāmmâ-bā’ṯî ’ēleyḵā wə‘atâ ’āšûḇ ləhillāḥēm ‘im-śar pārās wa’ănî ywōṣē’ wəhinnēh śar-yāwān bā’:

21 ’ăḇāl ’agîḏ ləḵā ’eṯ-hārāšûm biḵəṯāḇ ’ĕmeṯ wə’ên ’eḥāḏ miṯəḥazzēq ‘immî ‘al-’ēlleh kî ’im-mîḵā’ēl śarəḵem: f