‎1 ‏שִׁמְע֞וּ אֶת־הַדָּבָ֣ר הַזֶּ֗ה אֲשֶׁ֨ר אָנֹכִ֜י נֹשֵׂ֧א עֲלֵיכֶ֛ם קִינָ֖ה בֵּ֥ית יִשְׂרָאֵֽל׃

‎2 ‏נָֽפְלָה֙ לֹֽא־תוֹסִ֣יף ק֔וּם בְּתוּלַ֖ת יִשְׂרָאֵ֑ל נִטְּשָׁ֥ה עַל־אַדְמָתָ֖הּ אֵ֥ין מְקִימָֽהּ׃

‎3 ‏כִּ֣י כֹ֤ה אָמַר֙ אֲדֹנָ֣י יְהוִ֔ה הָעִ֛יר הַיֹּצֵ֥את אֶ֖לֶף תַּשְׁאִ֣יר מֵאָ֑ה וְהַיּוֹצֵ֥את מֵאָ֛ה תַּשְׁאִ֥יר עֲשָׂרָ֖ה לְבֵ֥ית יִשְׂרָאֵֽל׃ ס

‎4 ‏כִּ֣י כֹ֥ה אָמַ֛ר יְהוָ֖ה לְבֵ֣ית יִשְׂרָאֵ֑ל דִּרְשׁ֖וּנִי וִֽחְיֽוּ׃

‎5 ‏וְאַֽל־תִּדְרְשׁוּ֙ בֵּֽית־אֵ֔ל וְהַגִּלְגָּל֙ לֹ֣א תָבֹ֔אוּ וּבְאֵ֥ר שֶׁ֖בַע לֹ֣א תַעֲבֹ֑רוּ כִּ֤י הַגִּלְגָּל֙ גָּלֹ֣ה יִגְלֶ֔ה וּבֵֽית־אֵ֖ל יִהְיֶ֥ה לְאָֽוֶן׃

‎6 ‏דִּרְשׁ֥וּ אֶת־יְהוָ֖ה וִֽחְי֑וּ פֶּן־יִצְלַ֤ח כָּאֵשׁ֙ בֵּ֣ית יוֹסֵ֔ף וְאָכְלָ֥ה וְאֵין־מְכַבֶּ֖ה לְבֵֽית־אֵֽל׃

‎7 ‏הַהֹפְכִ֥ים לְלַעֲנָ֖ה מִשְׁפָּ֑ט וּצְדָקָ֖ה לָאָ֥רֶץ הִנִּֽיחוּ׃

‎8 ‏עֹשֵׂ֨ה כִימָ֜ה וּכְסִ֗יל וְהֹפֵ֤ךְ לַבֹּ֙קֶר֙ צַלְמָ֔וֶת וְי֖וֹם לַ֣יְלָה הֶחְשִׁ֑יךְ הַקּוֹרֵ֣א לְמֵֽי־הַיָּ֗ם וַֽיִּשְׁפְּכֵ֛ם עַל־פְּנֵ֥י הָאָ֖רֶץ יְהוָ֥ה שְׁמֽוֹ׃ ס

‎9 ‏הַמַּבְלִ֥יג שֹׁ֖ד עַל־עָ֑ז וְשֹׁ֖ד עַל־מִבְצָ֥ר יָבֽוֹא׃

‎10 ‏שָׂנְא֥וּ בַשַּׁ֖עַר מוֹכִ֑יחַ וְדֹבֵ֥ר תָּמִ֖ים יְתָעֵֽבוּ׃

‎11 ‏לָ֠כֵן יַ֣עַן בּוֹשַׁסְכֶ֞ם עַל־דָּ֗ל וּמַשְׂאַת־בַּר֙ תִּקְח֣וּ מִמֶּ֔נּוּ בָּתֵּ֥י גָזִ֛ית בְּנִיתֶ֖ם וְלֹא־תֵ֣שְׁבוּ בָ֑ם כַּרְמֵי־חֶ֣מֶד נְטַעְתֶּ֔ם וְלֹ֥א תִשְׁתּ֖וּ אֶת־יֵינָֽם׃

‎12 ‏כִּ֤י יָדַ֙עְתִּי֙ רַבִּ֣ים פִּשְׁעֵיכֶ֔ם וַעֲצֻמִ֖ים חַטֹּֽאתֵיכֶ֑ם צֹרְרֵ֤י צַדִּיק֙ לֹ֣קְחֵי כֹ֔פֶר וְאֶבְיוֹנִ֖ים בַּשַּׁ֥עַר הִטּֽוּ׃

‎13 ‏לָכֵ֗ן הַמַּשְׂכִּ֛יל בָּעֵ֥ת הַהִ֖יא יִדֹּ֑ם כִּ֛י עֵ֥ת רָעָ֖ה הִֽיא׃

‎14 ‏דִּרְשׁוּ־ט֥וֹב וְאַל־רָ֖ע לְמַ֣עַן תִּֽחְי֑וּ וִיהִי־כֵ֞ן יְהוָ֧ה אֱלֹהֵֽי־צְבָא֛וֹת אִתְּכֶ֖ם כַּאֲשֶׁ֥ר אֲמַרְתֶּֽם׃

‎15 ‏שִׂנְאוּ־רָע֙ וְאֶ֣הֱבוּ ט֔וֹב וְהַצִּ֥יגוּ בַשַּׁ֖עַר מִשְׁפָּ֑ט אוּלַ֗י יֶֽחֱנַ֛ן יְהוָ֥ה אֱלֹהֵֽי־צְבָא֖וֹת שְׁאֵרִ֥ית יוֹסֵֽף׃ ס

‎16 ‏לָ֠כֵן כֹּֽה־אָמַ֨ר יְהוָ֜ה אֱלֹהֵ֤י צְבָאוֹת֙ אֲדֹנָ֔י בְּכָל־רְחֹב֣וֹת מִסְפֵּ֔ד וּבְכָל־חוּצ֖וֹת יֹאמְר֣וּ הוֹ־ה֑וֹ וְקָרְא֤וּ אִכָּר֙ אֶל־אֵ֔בֶל וּמִסְפֵּ֖ד אֶל־י֥וֹדְעֵי נֶֽהִי׃

‎17 ‏וּבְכָל־כְּרָמִ֖ים מִסְפֵּ֑ד כִּֽי־אֶעֱבֹ֥ר בְּקִרְבְּךָ֖ אָמַ֥ר יְהוָֽה׃ ס

‎18 ‏ה֥וֹי הַמִּתְאַוִּ֖ים אֶת־י֣וֹם יְהוָ֑ה לָמָּה־זֶּ֥ה לָכֶ֛ם י֥וֹם יְהוָ֖ה הוּא־חֹ֥שֶׁךְ וְלֹא־אֽוֹר׃

‎19 ‏כַּאֲשֶׁ֨ר יָנ֥וּס אִישׁ֙ מִפְּנֵ֣י הָאֲרִ֔י וּפְגָע֖וֹ הַדֹּ֑ב וּבָ֣א הַבַּ֔יִת וְסָמַ֤ךְ יָדוֹ֙ עַל־הַקִּ֔יר וּנְשָׁכ֖וֹ הַנָּחָֽשׁ׃

‎20 ‏הֲלֹא־חֹ֛שֶׁךְ י֥וֹם יְהוָ֖ה וְלֹא־א֑וֹר וְאָפֵ֖ל וְלֹא־נֹ֥גַֽהּ לֽוֹ׃

‎21 ‏שָׂנֵ֥אתִי מָאַ֖סְתִּי חַגֵּיכֶ֑ם וְלֹ֥א אָרִ֖יחַ בְּעַצְּרֹֽתֵיכֶֽם׃

‎22 ‏כִּ֣י אִם־תַּעֲלוּ־לִ֥י עֹל֛וֹת וּמִנְחֹתֵיכֶ֖ם לֹ֣א אֶרְצֶ֑ה וְשֶׁ֥לֶם מְרִיאֵיכֶ֖ם לֹ֥א אַבִּֽיט׃

‎23 ‏הָסֵ֥ר מֵעָלַ֖י הֲמ֣וֹן שִׁרֶ֑יךָ וְזִמְרַ֥ת נְבָלֶ֖יךָ לֹ֥א אֶשְׁמָֽע׃

‎24 ‏וְיִגַּ֥ל כַּמַּ֖יִם מִשְׁפָּ֑ט וּצְדָקָ֖ה כְּנַ֥חַל אֵיתָֽן׃

‎25 ‏הַזְּבָחִ֨ים וּמִנְחָ֜ה הִֽגַּשְׁתֶּם־לִ֧י בַמִּדְבָּ֛ר אַרְבָּעִ֥ים שָׁנָ֖ה בֵּ֥ית יִשְׂרָאֵֽל׃

‎26 ‏וּנְשָׂאתֶ֗ם אֵ֚ת סִכּ֣וּת מַלְכְּכֶ֔ם וְאֵ֖ת כִּיּ֣וּן צַלְמֵיכֶ֑ם כּוֹכַב֙ אֱלֹ֣הֵיכֶ֔ם אֲשֶׁ֥ר עֲשִׂיתֶ֖ם לָכֶֽם׃

‎27 ‏וְהִגְלֵיתִ֥י אֶתְכֶ֖ם מֵהָ֣לְאָה לְדַמָּ֑שֶׂק אָמַ֛ר יְהוָ֥ה אֱלֹהֵֽי־צְבָא֖וֹת שְׁמֽוֹ׃ פ

1 šimə‘û ’eṯ-hadāḇār hazzeh ’ăšer ’ānōḵî nōśē’ ‘ălêḵem qînâ bêṯ yiśərā’ēl:

2 nāfəlâ lō’-ṯwōsîf qûm bəṯûlaṯ yiśərā’ēl niṭṭəšâ ‘al-’aḏəmāṯāh ’ên məqîmāh:

3 kî ḵōh ’āmar ’ăḏōnāy yəhwih hā‘îr hayyōṣē’ṯ ’elef tašə’îr mē’â wəhayywōṣē’ṯ mē’â tašə’îr ‘ăśārâ ləḇêṯ yiśərā’ēl: s

4 kî ḵōh ’āmar yəhwâ ləḇêṯ yiśərā’ēl dirəšûnî wiḥəyû:

5 wə’al-tiḏərəšû bêṯ-’ēl wəhagiləgāl lō’ ṯāḇō’û ûḇə’ēr šeḇ^a‘ lō’ ṯ^a‘ăḇōrû kî hagiləgāl gālōh yiḡəleh ûḇêṯ-’ēl yihəyeh lə’āwen:

6 dirəšû ’eṯ-yəhwâ wiḥəyû pen-yiṣəl^aḥ kā’ēš bêṯ ywōsēf wə’āḵəlâ wə’ên-məḵabeh ləḇêṯ-’ēl:

7 hahōfəḵîm ləl^a‘ănâ mišəpāṭ ûṣəḏāqâ lā’āreṣ hinnîḥû:

8 ‘ōśēh ḵîmâ ûḵəsîl wəhōfēḵə labōqer ṣaləmāweṯ wəywōm layəlâ heḥəšîḵə haqqwōrē’ ləmê-hayyām wayyišəpəḵēm ‘al-pənê hā’āreṣ yəhwâ šəmwō: s

9 hammaḇəlîḡ šōḏ ‘al-‘āz wəšōḏ ‘al-miḇəṣār yāḇwō’:

10 śānə’û ḇašš^a‘ar mwōḵîḥa wəḏōḇēr tāmîm yəṯā‘ēḇû:

11 lāḵēn y^a‘an bwōšasəḵem ‘al-dāl ûmaśə’aṯ-bar tiqəḥû mimmennû bātê ḡāzîṯ bənîṯem wəlō’-ṯēšəḇû ḇām karəmê-ḥemeḏ nəṭ^a‘ətem wəlō’ ṯišətû ’eṯ-yênām:

12 kî yāḏ^a‘ətî rabîm pišə‘êḵem w^a‘ăṣumîm ḥaṭṭō’ṯêḵem ṣōrərê ṣadîq lōqəḥê ḵōfer wə’eḇəywōnîm bašš^a‘ar hiṭṭû:

13 lāḵēn hammaśəkîl bā‘ēṯ hahî’ yidōm kî ‘ēṯ rā‘â hî’:

14 dirəšû-ṭwōḇ wə’al-rā‘ ləm^a‘an tiḥəyû wîhî-ḵēn yəhwâ ’ĕlōhê-ṣəḇā’wōṯ ’itəḵem ka’ăšer ’ămarətem:

15 śinə’û-rā‘ wə’ehĕḇû ṭwōḇ wəhaṣṣîḡû ḇašš^a‘ar mišəpāṭ ’ûlay yeḥĕnan yəhwâ ’ĕlōhê-ṣəḇā’wōṯ šə’ērîṯ ywōsēf: s

16 lāḵēn kōh-’āmar yəhwâ ’ĕlōhê ṣəḇā’wōṯ ’ăḏōnāy bəḵāl-rəḥōḇwōṯ misəpēḏ ûḇəḵāl-ḥûṣwōṯ yō’mərû hwō-hwō wəqārə’û ’ikār ’el-’ēḇel ûmisəpēḏ ’el-ywōḏə‘ê nehî:

17 ûḇəḵāl-kərāmîm misəpēḏ kî-’e‘ĕḇōr bəqirəbəḵā ’āmar yəhwâ: s

18 hwōy hammiṯə’aûîm ’eṯ-ywōm yəhwâ lāmmâ-zzeh lāḵem ywōm yəhwâ hû’-ḥōšeḵə wəlō’-’wōr:

19 ka’ăšer yānûs ’îš mipənê hā’ărî ûfəḡā‘wō hadōḇ ûḇā’ habayiṯ wəsāmaḵə yāḏwō ‘al-haqqîr ûnəšāḵwō hannāḥāš:

20 hălō’-ḥōšeḵə ywōm yəhwâ wəlō’-’wōr wə’āfēl wəlō’-nōḡ^ah lwō:

21 śānē’ṯî mā’asətî ḥagêḵem wəlō’ ’ārîḥa bə‘aṣṣərōṯêḵem:

22 kî ’im-t^a‘ălû-lî ‘ōlwōṯ ûminəḥōṯêḵem lō’ ’erəṣeh wəšelem mərî’êḵem lō’ ’abîṭ:

23 hāsēr mē‘ālay hămwōn šireyḵā wəziməraṯ nəḇāleyḵā lō’ ’ešəmā‘:

24 wəyigal kammayim mišəpāṭ ûṣəḏāqâ kən^aḥal ’êṯān:

25 hazzəḇāḥîm ûminəḥâ higašətem-lî ḇammiḏəbār ’arəbā‘îm šānâ bêṯ yiśərā’ēl:

26 ûnəśā’ṯem ’ēṯ sikûṯ maləkəḵem wə’ēṯ kîyûn ṣaləmêḵem kwōḵaḇ ’ĕlōhêḵem ’ăšer ‘ăśîṯem lāḵem:

27 wəhiḡəlêṯî ’eṯəḵem mēhālə’â ləḏammāśeq ’āmar yəhwâ ’ĕlōhê-ṣəḇā’wōṯ šəmwō: f