‎1 ‏וַיִּרְגַּ֣ז הַמֶּ֗לֶךְ וַיַּ֛עַל עַל־עֲלִיַּ֥ת הַשַּׁ֖עַר וַיֵּ֑בְךְּ וְכֹ֣ה׀ אָמַ֣ר בְּלֶכְתּ֗וֹ בְּנִ֤י אַבְשָׁלוֹם֙ בְּנִ֣י בְנִ֣י אַבְשָׁל֔וֹם מִֽי־יִתֵּ֤ן מוּתִי֙ אֲנִ֣י תַחְתֶּ֔יךָ אַבְשָׁל֖וֹם בְּנִ֥י בְנִֽי׃

‎2 ‏וַיֻּגַּ֖ד לְיוֹאָ֑ב הִנֵּ֨ה הַמֶּ֧לֶךְ בֹּכֶ֛ה וַיִּתְאַבֵּ֖ל עַל־אַבְשָׁלֹֽם׃

‎3 ‏וַתְּהִ֨י הַתְּשֻׁעָ֜ה בַּיּ֥וֹם הַה֛וּא לְאֵ֖בֶל לְכָל־הָעָ֑ם כִּֽי־שָׁמַ֣ע הָעָ֗ם בַּיּ֤וֹם הַהוּא֙ לֵאמֹ֔ר נֶעֱצַ֥ב הַמֶּ֖לֶךְ עַל־בְּנֽוֹ׃

‎4 ‏וַיִּתְגַּנֵּ֥ב הָעָ֛ם בַּיּ֥וֹם הַה֖וּא לָב֣וֹא הָעִ֑יר כַּאֲשֶׁ֣ר יִתְגַּנֵּ֗ב הָעָם֙ הַנִּכְלָמִ֔ים בְּנוּסָ֖ם בַּמִּלְחָמָֽה׃

‎5 ‏וְהַמֶּ֙לֶךְ֙ לָאַ֣ט אֶת־פָּנָ֔יו וַיִּזְעַ֥ק הַמֶּ֖לֶךְ ק֣וֹל גָּד֑וֹל בְּנִי֙ אַבְשָׁל֔וֹם אַבְשָׁל֖וֹם בְּנִ֥י בְנִֽי׃ ס

‎6 ‏וַיָּבֹ֥א יוֹאָ֛ב אֶל־הַמֶּ֖לֶךְ הַבָּ֑יִת וַיֹּאמֶר֩ הֹבַ֨שְׁתָּ הַיּ֜וֹם אֶת־פְּנֵ֣י כָל־עֲבָדֶ֗יךָ הַֽמְמַלְּטִ֤ים אֶֽת־נַפְשְׁךָ֙ הַיּ֔וֹם וְאֵ֨ת נֶ֤פֶשׁ בָּנֶ֙יךָ֙ וּבְנֹתֶ֔יךָ וְנֶ֣פֶשׁ נָשֶׁ֔יךָ וְנֶ֖פֶשׁ פִּלַגְשֶֽׁיךָ׃

‎7 ‏לְאַֽהֲבָה֙ אֶת־שֹׂ֣נְאֶ֔יךָ וְלִשְׂנֹ֖א אֶת־אֹהֲבֶ֑יךָ כִּ֣י׀ הִגַּ֣דְתָּ הַיּ֗וֹם כִּ֣י אֵ֤ין לְךָ֙ שָׂרִ֣ים וַעֲבָדִ֔ים כִּ֣י׀ יָדַ֣עְתִּי הַיּ֗וֹם כִּ֠י לא ל֣וּ אַבְשָׁל֥וֹם חַי֙ וְכֻלָּ֤נוּ הַיּוֹם֙ מֵתִ֔ים כִּי־אָ֖ז יָשָׁ֥ר בְּעֵינֶֽיךָ׃

‎8 ‏וְעַתָּה֙ ק֣וּם צֵ֔א וְדַבֵּ֖ר עַל־לֵ֣ב עֲבָדֶ֑יךָ כִּי֩ בַיהוָ֨ה נִשְׁבַּ֜עְתִּי כִּי־אֵינְךָ֣ יוֹצֵ֗א אִם־יָלִ֨ין אִ֤ישׁ אִתְּךָ֙ הַלַּ֔יְלָה וְרָעָ֧ה לְךָ֣ זֹ֗את מִכָּל־הָרָעָה֙ אֲשֶׁר־בָּ֣אָה עָלֶ֔יךָ מִנְּעֻרֶ֖יךָ עַד־עָֽתָּה׃ ס

‎9 ‏וַיָּ֥קָם הַמֶּ֖לֶךְ וַיֵּ֣שֶׁב בַּשָּׁ֑עַר וּֽלְכָל־הָעָ֞ם הִגִּ֣ידוּ לֵאמֹ֗ר הִנֵּ֤ה הַמֶּ֙לֶךְ֙ יוֹשֵׁ֣ב בַּשַּׁ֔עַר וַיָּבֹ֤א כָל־הָעָם֙ לִפְנֵ֣י הַמֶּ֔לֶךְ וְיִשְׂרָאֵ֔ל נָ֖ס אִ֥ישׁ לְאֹהָלָֽיו׃ ס

‎10 ‏וַיְהִ֤י כָל־הָעָם֙ נָד֔וֹן בְּכָל־שִׁבְטֵ֥י יִשְׂרָאֵ֖ל לֵאמֹ֑ר הַמֶּ֜לֶךְ הִצִּילָ֣נוּ׀ מִכַּ֣ף אֹיְבֵ֗ינוּ וְה֤וּא מִלְּטָ֙נוּ֙ מִכַּ֣ף פְּלִשְׁתִּ֔ים וְעַתָּ֛ה בָּרַ֥ח מִן־הָאָ֖רֶץ מֵעַ֥ל אַבְשָׁלֽוֹם׃

‎11 ‏וְאַבְשָׁלוֹם֙ אֲשֶׁ֣ר מָשַׁ֣חְנוּ עָלֵ֔ינוּ מֵ֖ת בַּמִּלְחָמָ֑ה וְעַתָּ֗ה לָמָ֥ה אַתֶּ֛ם מַחֲרִשִׁ֖ים לְהָשִׁ֥יב אֶת־הַמֶּֽלֶךְ׃ ס

‎12 ‏וְהַמֶּ֣לֶךְ דָּוִ֗ד שָׁ֠לַח אֶל־צָד֨וֹק וְאֶל־אֶבְיָתָ֥ר הַכֹּהֲנִים֮ לֵאמֹר֒ דַּבְּר֞וּ אֶל־זִקְנֵ֤י יְהוּדָה֙ לֵאמֹ֔ר לָ֤מָּה תִֽהְיוּ֙ אַֽחֲרֹנִ֔ים לְהָשִׁ֥יב אֶת־הַמֶּ֖לֶךְ אֶל־בֵּית֑וֹ וּדְבַר֙ כָּל־יִשְׂרָאֵ֔ל בָּ֥א אֶל־הַמֶּ֖לֶךְ אֶל־בֵּיתֽוֹ׃

‎13 ‏אַחַ֣י אַתֶּ֔ם עַצְמִ֥י וּבְשָׂרִ֖י אַתֶּ֑ם וְלָ֧מָּה תִהְי֛וּ אַחֲרֹנִ֖ים לְהָשִׁ֥יב אֶת־הַמֶּֽלֶךְ׃

‎14 ‏וְלַֽעֲמָשָׂא֙ תֹּֽמְר֔וּ הֲל֛וֹא עַצְמִ֥י וּבְשָׂרִ֖י אָ֑תָּה כֹּ֣ה יַֽעֲשֶׂה־לִּ֤י אֱלֹהִים֙ וְכֹ֣ה יוֹסִ֔יף אִם־לֹ֠א שַׂר־צָבָ֞א תִּהְיֶ֧ה לְפָנַ֛י כָּל־הַיָּמִ֖ים תַּ֥חַת יוֹאָֽב׃

‎15 ‏וַיַּ֛ט אֶת־לְבַ֥ב כָּל־אִישׁ־יְהוּדָ֖ה כְּאִ֣ישׁ אֶחָ֑ד וַֽיִּשְׁלְחוּ֙ אֶל־הַמֶּ֔לֶךְ שׁ֥וּב אַתָּ֖ה וְכָל־עֲבָדֶֽיךָ׃

‎16 ‏וַיָּ֣שָׁב הַמֶּ֔לֶךְ וַיָּבֹ֖א עַד־הַיַּרְדֵּ֑ן וִיהוּדָ֞ה בָּ֣א הַגִּלְגָּ֗לָה לָלֶ֙כֶת֙ לִקְרַ֣את הַמֶּ֔לֶךְ לְהַעֲבִ֥יר אֶת־הַמֶּ֖לֶךְ אֶת־הַיַּרְדֵּֽן׃

‎17 ‏וַיְמַהֵ֗ר שִׁמְעִ֤י בֶן־גֵּרָא֙ בֶּן־הַיְמִינִ֔י אֲשֶׁ֖ר מִבַּֽחוּרִ֑ים וַיֵּ֙רֶד֙ עִם־אִ֣ישׁ יְהוּדָ֔ה לִקְרַ֖את הַמֶּ֥לֶךְ דָּוִֽד׃

‎18 ‏וְאֶ֨לֶף אִ֣ישׁ עִמּוֹ֮ מִבִּנְיָמִן֒ וְצִיבָ֗א נַ֚עַר בֵּ֣ית שָׁא֔וּל וַחֲמֵ֨שֶׁת עָשָׂ֥ר בָּנָ֛יו וְעֶשְׂרִ֥ים עֲבָדָ֖יו אִתּ֑וֹ וְצָלְח֥וּ הַיַּרְדֵּ֖ן לִפְנֵ֥י הַמֶּֽלֶךְ׃

‎19 ‏וְעָבְרָ֣ה הָעֲבָרָ֗ה לַֽעֲבִיר֙ אֶת־בֵּ֣ית הַמֶּ֔לֶךְ וְלַעֲשׂ֥וֹת הַטּ֖וֹב בעינו בְּעֵינָ֑יו וְשִׁמְעִ֣י בֶן־גֵּרָ֗א נָפַל֙ לִפְנֵ֣י הַמֶּ֔לֶךְ בְּעָבְר֖וֹ בַּיַּרְדֵּֽן׃

‎20 ‏וַיֹּ֣אמֶר אֶל־הַמֶּ֗לֶךְ אַל־יַחֲשָׁב־לִ֣י אֲדֹנִי֮ עָוֹן֒ וְאַל־תִּזְכֹּ֗ר אֵ֚ת אֲשֶׁ֣ר הֶעֱוָ֣ה עַבְדְּךָ֔ בַּיּ֕וֹם אֲשֶׁר־יָׅצָ֥ׅאׅ⁴ אֲדֹנִֽי־הַמֶּ֖לֶךְ מִירֽוּשָׁלִָ֑ם לָשׂ֥וּם הַמֶּ֖לֶךְ אֶל־לִבּֽוֹ׃

‎21 ‏כִּ֚י יָדַ֣ע עַבְדְּךָ֔ כִּ֖י אֲנִ֣י חָטָ֑אתִי וְהִנֵּֽה־בָ֣אתִי הַיּ֗וֹם רִאשׁוֹן֙ לְכָל־בֵּ֣ית יוֹסֵ֔ף לָרֶ֕דֶת לִקְרַ֖את אֲדֹנִ֥י הַמֶּֽלֶךְ׃ ס

‎22 ‏וַיַּ֨עַן אֲבִישַׁ֤י בֶּן־צְרוּיָה֙ וַיֹּ֔אמֶר הֲתַ֣חַת זֹ֔את לֹ֥א יוּמַ֖ת שִׁמְעִ֑י כִּ֥י קִלֵּ֖ל אֶת־מְשִׁ֥יחַ יְהוָֽה׃ ס

‎23 ‏וַיֹּ֣אמֶר דָּוִ֗ד מַה־לִּ֤י וְלָכֶם֙ בְּנֵ֣י צְרוּיָ֔ה כִּי־תִֽהְיוּ־לִ֥י הַיּ֖וֹם לְשָׂטָ֑ן הַיּ֗וֹם י֤וּמַת אִישׁ֙ בְּיִשְׂרָאֵ֔ל כִּ֚י הֲל֣וֹא יָדַ֔עְתִּי כִּ֥י הַיּ֖וֹם אֲנִי־מֶ֥לֶךְ עַל־יִשְׂרָאֵֽל׃

‎24 ‏וַיֹּ֧אמֶר הַמֶּ֛לֶךְ אֶל־שִׁמְעִ֖י לֹ֣א תָמ֑וּת וַיִּשָּׁ֥בַֽע ל֖וֹ הַמֶּֽלֶךְ׃ ס

‎25 ‏וּמְפִבֹ֙שֶׁת֙ בֶּן־שָׁא֔וּל יָרַ֖ד לִקְרַ֣את הַמֶּ֑לֶךְ וְלֹא־עָשָׂ֨ה רַגְלָ֜יו וְלֹא־עָשָׂ֣ה שְׂפָמ֗וֹ וְאֶת־בְּגָדָיו֙ לֹ֣א כִבֵּ֔ס לְמִן־הַיּוֹם֙ לֶ֣כֶת הַמֶּ֔לֶךְ עַד־הַיּ֖וֹם אֲשֶׁר־בָּ֥א בְשָׁלֽוֹם׃

‎26 ‏וַיְהִ֛י כִּי־בָ֥א יְרוּשָׁלִַ֖ם לִקְרַ֣את הַמֶּ֑לֶךְ וַיֹּ֤אמֶר לוֹ֙ הַמֶּ֔לֶךְ לָ֛מָּה לֹא־הָלַ֥כְתָּ עִמִּ֖י מְפִיבֹֽשֶׁת׃

‎27 ‏וַיֹּאמַ֕ר אֲדֹנִ֥י הַמֶּ֖לֶךְ עַבְדִּ֣י רִמָּ֑נִי כִּֽי־אָמַ֨ר עַבְדְּךָ֜ אֶחְבְּשָׁה־לִּי֩ הַחֲמ֨וֹר וְאֶרְכַּ֤ב עָלֶ֙יהָ֙ וְאֵלֵ֣ךְ אֶת־הַמֶּ֔לֶךְ כִּ֥י פִסֵּ֖חַ עַבְדֶּֽךָ׃

‎28 ‏וַיְרַגֵּ֣ל בְּעַבְדְּךָ֔ אֶל־אֲדֹנִ֖י הַמֶּ֑לֶךְ וַאדֹנִ֤י הַמֶּ֙לֶךְ֙ כְּמַלְאַ֣ךְ הָאֱלֹהִ֔ים וַעֲשֵׂ֥ה הַטּ֖וֹב בְּעֵינֶֽיךָ׃

‎29 ‏כִּי֩ לֹ֨א הָיָ֜ה כָּל־בֵּ֣ית אָבִ֗י כִּ֤י אִם־אַנְשֵׁי־מָ֙וֶת֙ לַאדֹנִ֣י הַמֶּ֔לֶךְ וַתָּ֙שֶׁת֙ אֶֽת־עַבְדְּךָ֔ בְּאֹכְלֵ֖י שֻׁלְחָנֶ֑ךָ וּמַה־יֶּשׁ־לִ֥י עוֹד֙ צְדָקָ֔ה וְלִזְעֹ֥ק ע֖וֹד אֶל־הַמֶּֽלֶךְ׃ פ

‎30 ‏וַיֹּ֤אמֶר לוֹ֙ הַמֶּ֔לֶךְ לָ֛מָּה תְּדַבֵּ֥ר ע֖וֹד דְּבָרֶ֑יךָ אָמַ֕רְתִּי אַתָּ֣ה וְצִיבָ֔א תַּחְלְק֖וּ אֶת־הַשָּׂדֶֽה׃

‎31 ‏וַיֹּ֤אמֶר מְפִיבֹ֙שֶׁת֙ אֶל־הַמֶּ֔לֶךְ גַּ֥ם אֶת־הַכֹּ֖ל יִקָּ֑ח אַ֠חֲרֵי אֲשֶׁר־בָּ֞א אֲדֹנִ֥י הַמֶּ֛לֶך¹ בְּשָׁל֖וֹם אֶל־בֵּיתֽוֹ׃ ס

‎32 ‏וּבַרְזִלַּי֙ הַגִּלְעָדִ֔י יָרַ֖ד מֵרֹגְלִ֑ים וַיַּעֲבֹ֤ר אֶת־הַמֶּ֙לֶךְ֙ הַיַּרְדֵּ֔ן לְשַׁלְּח֖וֹ אֶת־בירדן הַיַּרְדֵּֽן׃

‎33 ‏וּבַרְזִלַּי֙ זָקֵ֣ן מְאֹ֔ד בֶּן־שְׁמֹנִ֖ים שָׁנָ֑ה וְהֽוּא־כִלְכַּ֤ל אֶת־הַמֶּ֙לֶךְ֙ בְּשִׁיבָת֣וֹ בְמַחֲנַ֔יִם כִּֽי־אִ֛ישׁ גָּד֥וֹל ה֖וּא מְאֹֽד׃

‎34 ‏וַיֹּ֥אמֶר הַמֶּ֖לֶךְ אֶל־בַּרְזִלָּ֑י אַתָּה֙ עֲבֹ֣ר אִתִּ֔י וְכִלְכַּלְתִּ֥י אֹתְךָ֛ עִמָּדִ֖י בִּירוּשָׁלִָֽם׃

‎35 ‏וַיֹּ֥אמֶר בַּרְזִלַּ֖י אֶל־הַמֶּ֑לֶךְ כַּמָּ֗ה יְמֵי֙ שְׁנֵ֣י חַיַּ֔י כִּי־אֶעֱלֶ֥ה אֶת־הַמֶּ֖לֶךְ יְרוּשָׁלִָֽם׃

‎36 ‏בֶּן־שְׁמֹנִ֣ים שָׁנָה֩ אָנֹכִ֨י הַיּ֜וֹם הַאֵדַ֣ע׀ בֵּין־ט֣וֹב לְרָ֗ע אִם־יִטְעַ֤ם עַבְדְּךָ֙ אֶת־אֲשֶׁ֤ר אֹכַל֙ וְאֶת־אֲשֶׁ֣ר אֶשְׁתֶּ֔ה אִם־אֶשְׁמַ֣ע ע֔וֹד בְּק֖וֹל שָׁרִ֣ים וְשָׁר֑וֹת וְלָמָּה֩ יִֽהְיֶ֨ה עַבְדְּךָ֥ עוֹד֙ לְמַשָּׂ֔א אֶל־אֲדֹנִ֖י הַמֶּֽלֶךְ׃

‎37 ‏כִּמְעַ֞ט יַעֲבֹ֧ר עַבְדְּךָ֛ אֶת־הַיַּרְדֵּ֖ן אֶת־הַמֶּ֑לֶךְ וְלָ֙מָּה֙ יִגְמְלֵ֣נִי הַמֶּ֔לֶךְ הַגְּמוּלָ֖ה הַזֹּֽאת׃

‎38 ‏יָֽשָׁב־נָ֤א עַבְדְּךָ֙ וְאָמֻ֣ת בְּעִירִ֔י עִ֛ם קֶ֥בֶר אָבִ֖י וְאִמִּ֑י וְהִנֵּ֣ה׀ עַבְדְּךָ֣ כִמְהָ֗ם יַֽעֲבֹר֙ עִם־אֲדֹנִ֣י הַמֶּ֔לֶךְ וַעֲשֵׂה־ל֕וֹ אֵ֥ת אֲשֶׁר־ט֖וֹב בְּעֵינֶֽיךָ׃ ס

‎39 ‏וַיֹּ֣אמֶר הַמֶּ֗לֶךְ אִתִּי֙ יַעֲבֹ֣ר כִּמְהָ֔ם וַאֲנִי֙ אֶעֱשֶׂה־לּ֔וֹ אֶת־הַטּ֖וֹב בְּעֵינֶ֑יךָ וְכֹ֛ל אֲשֶׁר־תִּבְחַ֥ר עָלַ֖י אֶֽעֱשֶׂה־לָּֽךְ׃

‎40 ‏וַיַּעֲבֹ֧ר כָּל־הָעָ֛ם אֶת־הַיַּרְדֵּ֖ן וְהַמֶּ֣לֶךְ עָבָ֑ר וַיִּשַּׁ֨ק הַמֶּ֤לֶךְ לְבַרְזִלַּי֙ וַיְבָ֣רֲכֵ֔הוּ וַיָּ֖שָׁב לִמְקֹמֽוֹ׃ ס

‎41 ‏וַיַּעֲבֹ֤ר הַמֶּ֙לֶךְ֙ הַגִּלְגָּ֔לָה וְכִמְהָ֖ן עָבַ֣ר עִמּ֑וֹ וְכָל־עַ֤ם יְהוּדָה֙ ויעברו הֶעֱבִ֣ירוּ אֶת־הַמֶּ֔לֶךְ וְגַ֕ם חֲצִ֖י עַ֥ם יִשְׂרָאֵֽל׃

‎42 ‏וְהִנֵּ֛ה כָּל־אִ֥ישׁ יִשְׂרָאֵ֖ל בָּאִ֣ים אֶל־הַמֶּ֑לֶךְ וַיֹּאמְר֣וּ אֶל־הַמֶּ֡לֶךְ מַדּוּעַ֩ גְּנָב֨וּךָ אַחֵ֜ינוּ אִ֣ישׁ יְהוּדָ֗ה וַיַּעֲבִ֨רוּ אֶת־הַמֶּ֤לֶךְ וְאֶת־בֵּיתוֹ֙ אֶת־הַיַּרְדֵּ֔ן וְכָל־אַנְשֵׁ֥י דָוִ֖ד עִמּֽוֹ׃ ס

‎43 ‏וַיַּעַן֩ כָּל־אִ֨ישׁ יְהוּדָ֜ה עַל־אִ֣ישׁ יִשְׂרָאֵ֗ל כִּֽי־קָר֤וֹב הַמֶּ֙לֶךְ֙ אֵלַ֔י וְלָ֤מָּה זֶּה֙ חָרָ֣ה לְךָ֔ עַל־הַדָּבָ֖ר הַזֶּ֑ה הֶאָכ֤וֹל אָכַ֙לְנוּ֙ מִן־הַמֶּ֔לֶךְ אִם־נִשֵּׂ֥את נִשָּׂ֖א לָֽנוּ׃ ס

‎44 ‏וַיַּ֣עַן אִֽישׁ־יִשְׂרָאֵל֩ אֶת־אִ֨ישׁ יְהוּדָ֜ה וַיֹּ֗אמֶר עֶֽשֶׂר־יָד֨וֹת לִ֣י בַמֶּלֶךְ֮ וְגַם־בְּדָוִד֮ אֲנִ֣י מִמְּךָ֒ וּמַדּ֙וּעַ֙ הֱקִלֹּתַ֔נִי וְלֹא־הָיָ֨ה דְבָרִ֥י רִאשׁ֛וֹן לִ֖י לְהָשִׁ֣יב אֶת־מַלְכִּ֑י וַיִּ֙קֶשׁ֙ דְּבַר־אִ֣ישׁ יְהוּדָ֔ה מִדְּבַ֖ר אִ֥ישׁ יִשְׂרָאֵֽל׃ ס

1 wayyirəgaz hammeleḵə wayy^a‘al ‘al-‘ălîyaṯ hašš^a‘ar wayyēḇəḵḵə wəḵōh| ’āmar bəleḵətwō bənî ’aḇəšālwōm bənî ḇənî ’aḇəšālwōm mî-yitēn mûṯî ’ănî ṯ^aḥəteyḵā ’aḇəšālwōm bənî ḇənî:

2 wayyugaḏ ləywō’āḇ hinnēh hammeleḵə bōḵeh wayyiṯə’abēl ‘al-’aḇəšālōm:

3 watəhî hatəšu‘â bayywōm hahû’ lə’ēḇel ləḵāl-hā‘ām kî-šām^a‘ hā‘ām bayywōm hahû’ lē’mōr ne‘ĕṣaḇ hammeleḵə ‘al-bənwō:

4 wayyiṯəgannēḇ hā‘ām bayywōm hahû’ lāḇwō’ hā‘îr ka’ăšer yiṯəgannēḇ hā‘ām hanniḵəlāmîm bənûsām bammiləḥāmâ:

5 wəhammeleḵə lā’aṭ ’eṯ-pānāyw wayyizə‘aq hammeleḵə qwōl gāḏwōl bənî ’aḇəšālwōm ’aḇəšālwōm bənî ḇənî: s

6 wayyāḇō’ ywō’āḇ ’el-hammeleḵə habāyiṯ wayyō’mer hōḇašətā hayywōm ’eṯ-pənê ḵāl-‘ăḇāḏeyḵā haməmalləṭîm ’eṯ-nafəšəḵā hayywōm wə’ēṯ nefeš bāneyḵā ûḇənōṯeyḵā wənefeš nāšeyḵā wənefeš pilaḡəšeyḵā:

7 lə’ahăḇâ ’eṯ-śōnə’eyḵā wəliśənō’ ’eṯ-’ōhăḇeyḵā kî| higaḏətā hayywōm kî ’ên ləḵā śārîm w^a‘ăḇāḏîm kî| yāḏ^a‘ətî hayywōm kî lu’ lû ’aḇəšālwōm ḥay wəḵullānû hayywōm mēṯîm kî-’āz yāšār bə‘êneyḵā:

8 wə‘atâ qûm ṣē’ wəḏabēr ‘al-lēḇ ‘ăḇāḏeyḵā kî ḇayhwâ nišəb^a‘ətî kî-’ênəḵā ywōṣē’ ’im-yālîn ’îš ’itəḵā hallayəlâ wərā‘â ləḵā zō’ṯ mikāl-hārā‘â ’ăšer-bā’â ‘āleyḵā minnə‘ureyḵā ‘aḏ-‘ātâ: s

9 wayyāqām hammeleḵə wayyēšeḇ baššā‘ar ûləḵāl-hā‘ām higîḏû lē’mōr hinnēh hammeleḵə ywōšēḇ bašš^a‘ar wayyāḇō’ ḵāl-hā‘ām lifənê hammeleḵə wəyiśərā’ēl nās ’îš lə’ōhālāyw: s

10 wayəhî ḵāl-hā‘ām nāḏwōn bəḵāl-šiḇəṭê yiśərā’ēl lē’mōr hammeleḵə hiṣṣîlānû| mikaf ’ōyəḇênû wəhû’ milləṭānû mikaf pəlišətîm wə‘atâ bār^aḥ min-hā’āreṣ mē‘al ’aḇəšālwōm:

11 wə’aḇəšālwōm ’ăšer māš^aḥənû ‘ālênû mēṯ bammiləḥāmâ wə‘atâ lāmâ ’atem m^aḥărišîm ləhāšîḇ ’eṯ-hammeleḵə: s

12 wəhammeleḵə dāwiḏ šāl^aḥ ’el-ṣāḏwōq wə’el-’eḇəyāṯār hakōhănîm lē’mōr dabərû ’el-ziqənê yəhûḏâ lē’mōr lāmmâ ṯihəyû ’^aḥărōnîm ləhāšîḇ ’eṯ-hammeleḵə ’el-bêṯwō ûḏəḇar kāl-yiśərā’ēl bā’ ’el-hammeleḵə ’el-bêṯwō:

13 ’^aḥay ’atem ‘aṣəmî ûḇəśārî ’atem wəlāmmâ ṯihəyû ’^aḥărōnîm ləhāšîḇ ’eṯ-hammeleḵə:

14 wəl^a‘ămāśā’ tōmərû hălwō’ ‘aṣəmî ûḇəśārî ’ātâ kōh y^a‘ăśeh-llî ’ĕlōhîm wəḵōh ywōsîf ’im-lō’ śar-ṣāḇā’ tihəyeh ləfānay kāl-hayyāmîm t^aḥaṯ ywō’āḇ:

15 wayyaṭ ’eṯ-ləḇaḇ kāl-’îš-yəhûḏâ kə’îš ’eḥāḏ wayyišələḥû ’el-hammeleḵə šûḇ ’atâ wəḵāl-‘ăḇāḏeyḵā:

16 wayyāšāḇ hammeleḵə wayyāḇō’ ‘aḏ-hayyarədēn wîhûḏâ bā’ hagiləgālâ lāleḵeṯ liqəra’ṯ hammeleḵə ləh^a‘ăḇîr ’eṯ-hammeleḵə ’eṯ-hayyarədēn:

17 wayəmahēr šimə‘î ḇen-gērā’ ben-hayəmînî ’ăšer mib^aḥûrîm wayyēreḏ ‘im-’îš yəhûḏâ liqəra’ṯ hammeleḵə dāwiḏ:

18 wə’elef ’îš ‘immwō mibinəyāmin wəṣîḇā’ n^a‘ar bêṯ šā’ûl w^aḥămēšeṯ ‘āśār bānāyw wə‘eśərîm ‘ăḇāḏāyw ’itwō wəṣāləḥû hayyarədēn lifənê hammeleḵə:

19 wə‘āḇərâ hā‘ăḇārâ l^a‘ăḇîr ’eṯ-bêṯ hammeleḵə wəl^a‘ăśwōṯ haṭṭwōḇ bə‘ênāw bə‘ênāyw wəšimə‘î ḇen-gērā’ nāfal lifənê hammeleḵə bə‘āḇərwō bayyarədēn:

20 wayyō’mer ’el-hammeleḵə ’al-y^aḥăšāḇ-lî ’ăḏōnî ‘āwōn wə’al-tizəkōr ’ēṯ ’ăšer he‘ĕwâ ‘aḇədəḵā bayywōm ’ăšer-yāׅṣāׅ’ׅ⁴ ’ăḏōnî-hammeleḵə mîrûšālāim lāśûm hammeleḵə ’el-libwō:

21 kî yāḏ^a‘ ‘aḇədəḵā kî ’ănî ḥāṭā’ṯî wəhinnēh-ḇā’ṯî hayywōm ri’šwōn ləḵāl-bêṯ ywōsēf lāreḏeṯ liqəra’ṯ ’ăḏōnî hammeleḵə: s

22 wayy^a‘an ’ăḇîšay ben-ṣərûyâ wayyō’mer hăṯ^aḥaṯ zō’ṯ lō’ yûmaṯ šimə‘î kî qillēl ’eṯ-məšîḥa yəhwâ: s

23 wayyō’mer dāwiḏ mah-llî wəlāḵem bənê ṣərûyâ kî-ṯihəyû-lî hayywōm ləśāṭān hayywōm yûmaṯ ’îš bəyiśərā’ēl kî hălwō’ yāḏ^a‘ətî kî hayywōm ’ănî-meleḵə ‘al-yiśərā’ēl:

24 wayyō’mer hammeleḵə ’el-šimə‘î lō’ ṯāmûṯ wayyiššāḇ^a‘ lwō hammeleḵə: s

25 ûməfiḇōšeṯ ben-šā’ûl yāraḏ liqəra’ṯ hammeleḵə wəlō’-‘āśâ raḡəlāyw wəlō’-‘āśâ śəfāmwō wə’eṯ-bəḡāḏāyw lō’ ḵibēs ləmin-hayywōm leḵeṯ hammeleḵə ‘aḏ-hayywōm ’ăšer-bā’ ḇəšālwōm:

26 wayəhî kî-ḇā’ yərûšālaim liqəra’ṯ hammeleḵə wayyō’mer lwō hammeleḵə lāmmâ lō’-hālaḵətā ‘immî məfîḇōšeṯ:

27 wayyō’mar ’ăḏōnî hammeleḵə ‘aḇədî rimmānî kî-’āmar ‘aḇədəḵā ’eḥəbəšâ-llî h^aḥămwōr wə’erəkaḇ ‘āleyhā wə’ēlēḵə ’eṯ-hammeleḵə kî fissēḥa ‘aḇədeḵā:

28 wayəragēl bə‘aḇədəḵā ’el-’ăḏōnî hammeleḵə wa’ḏōnî hammeleḵə kəmalə’aḵə hā’ĕlōhîm w^a‘ăśēh haṭṭwōḇ bə‘êneyḵā:

29 kî lō’ hāyâ kāl-bêṯ ’āḇî kî ’im-’anəšê-māweṯ la’ḏōnî hammeleḵə watāšeṯ ’eṯ-‘aḇədəḵā bə’ōḵəlê šuləḥāneḵā ûmah-yyeš-lî ‘wōḏ ṣəḏāqâ wəlizə‘ōq ‘wōḏ ’el-hammeleḵə: f

30 wayyō’mer lwō hammeleḵə lāmmâ təḏabēr ‘wōḏ dəḇāreyḵā ’āmarətî ’atâ wəṣîḇā’ t^aḥələqû ’eṯ-haśśāḏeh:

31 wayyō’mer məfîḇōšeṯ ’el-hammeleḵə gam ’eṯ-hakōl yiqqāḥ ’^aḥărê ’ăšer-bā’ ’ăḏōnî hammeleḵ¹ bəšālwōm ’el-bêṯwō: s

32 ûḇarəzillay hagilə‘āḏî yāraḏ mērōḡəlîm wayy^a‘ăḇōr ’eṯ-hammeleḵə hayyarədēn ləšalləḥwō ’eṯ-bayyarədēn hayyarədēn:

33 ûḇarəzillay zāqēn mə’ōḏ ben-šəmōnîm šānâ wəhû’-ḵiləkal ’eṯ-hammeleḵə bəšîḇāṯwō ḇəm^aḥănayim kî-’îš gāḏwōl hû’ mə’ōḏ:

34 wayyō’mer hammeleḵə ’el-barəzillāy ’atâ ‘ăḇōr ’itî wəḵiləkalətî ’ōṯəḵā ‘immāḏî bîrûšālāim:

35 wayyō’mer barəzillay ’el-hammeleḵə kammâ yəmê šənê ḥayyay kî-’e‘ĕleh ’eṯ-hammeleḵə yərûšālāim:

36 ben-šəmōnîm šānâ ’ānōḵî hayywōm ha’ēḏ^a‘| bên-ṭwōḇ lərā‘ ’im-yiṭə‘am ‘aḇədəḵā ’eṯ-’ăšer ’ōḵal wə’eṯ-’ăšer ’ešəteh ’im-’ešəm^a‘ ‘wōḏ bəqwōl šārîm wəšārwōṯ wəlāmmâ yihəyeh ‘aḇədəḵā ‘wōḏ ləmaśśā’ ’el-’ăḏōnî hammeleḵə:

37 kimə‘aṭ y^a‘ăḇōr ‘aḇədəḵā ’eṯ-hayyarədēn ’eṯ-hammeleḵə wəlāmmâ yiḡəməlēnî hammeleḵə hagəmûlâ hazzō’ṯ:

38 yāšāḇ-nā’ ‘aḇədəḵā wə’āmuṯ bə‘îrî ‘im qeḇer ’āḇî wə’immî wəhinnēh| ‘aḇədəḵā ḵiməhām y^a‘ăḇōr ‘im-’ăḏōnî hammeleḵə w^a‘ăśēh-lwō ’ēṯ ’ăšer-ṭwōḇ bə‘êneyḵā: s

39 wayyō’mer hammeleḵə ’itî y^a‘ăḇōr kiməhām wa’ănî ’e‘ĕśeh-llwō ’eṯ-haṭṭwōḇ bə‘êneyḵā wəḵōl ’ăšer-tiḇəḥar ‘ālay ’e‘ĕśeh-llāḵə:

40 wayy^a‘ăḇōr kāl-hā‘ām ’eṯ-hayyarədēn wəhammeleḵə ‘āḇār wayyiššaq hammeleḵə ləḇarəzillay wayəḇārăḵēhû wayyāšāḇ liməqōmwō: s

41 wayy^a‘ăḇōr hammeleḵə hagiləgālâ wəḵiməhān ‘āḇar ‘immwō wəḵāl-‘am yəhûḏâ wayy^a‘ăḇirû he‘ĕḇîrû ’eṯ-hammeleḵə wəḡam ḥăṣî ‘am yiśərā’ēl:

42 wəhinnēh kāl-’îš yiśərā’ēl bā’îm ’el-hammeleḵə wayyō’mərû ’el-hammeleḵə madû‘a gənāḇûḵā ’^aḥênû ’îš yəhûḏâ wayy^a‘ăḇirû ’eṯ-hammeleḵə wə’eṯ-bêṯwō ’eṯ-hayyarədēn wəḵāl-’anəšê ḏāwiḏ ‘immwō: s

43 wayy^a‘an kāl-’îš yəhûḏâ ‘al-’îš yiśərā’ēl kî-qārwōḇ hammeleḵə ’ēlay wəlāmmâ zzeh ḥārâ ləḵā ‘al-hadāḇār hazzeh he’āḵwōl ’āḵalənû min-hammeleḵə ’im-niśśē’ṯ niśśā’ lānû: s

44 wayy^a‘an ’îš-yiśərā’ēl ’eṯ-’îš yəhûḏâ wayyō’mer ‘eśer-yāḏwōṯ lî ḇammeleḵə wəḡam-bəḏāwiḏ ’ănî mimməḵā ûmadû‘a hĕqillōṯanî wəlō’-hāyâ ḏəḇārî ri’šwōn lî ləhāšîḇ ’eṯ-maləkî wayyiqeš dəḇar-’îš yəhûḏâ midəḇar ’îš yiśərā’ēl: s