Sacred Texts  Bible  Index 
Polyglot  KJV  Sep  Vul 

2 Samuel (2 Shmuel) Index
  Previous  Next 

Tanach (Hebrew): 2 Samuel (2 Shmuel) Chapter 7

1 ‏וַיְהִ֕י כִּי־יָשַׁ֥ב הַמֶּ֖לֶךְ בְּבֵית֑וֹ וַיהוָ֛ה הֵנִֽיחַ־ל֥וֹ מִסָּבִ֖יב מִכָּל־אֹיְבָֽיו׃

2 ‏וַיֹּ֤אמֶר הַמֶּ֙לֶךְ֙ אֶל־נָתָ֣ן הַנָּבִ֔יא רְאֵ֣ה נָ֔א אָנֹכִ֥י יוֹשֵׁ֖ב בְּבֵ֣ית אֲרָזִ֑ים וַֽאֲרוֹן֙ הָֽאֱלֹהִ֔ים יֹשֵׁ֖ב בְּת֥וֹךְ הַיְרִיעָֽה׃

3 ‏וַיֹּ֤אמֶר נָתָן֙ אֶל־הַמֶּ֔לֶךְ כֹּ֛ל אֲשֶׁ֥ר בִּֽלְבָבְךָ֖ לֵ֣ךְ עֲשֵׂ֑ה כִּ֥י יְהוָ֖ה עִמָּֽךְ׃ ס

4 ‏וַיְהִ֖י בַּלַּ֣יְלָה הַה֑וּא וַֽיְהִי֙ דְּבַר־יְהוָ֔ה אֶל־נָתָ֖ן לֵאמֹֽר׃

5 ‏לֵ֤ךְ וְאָֽמַרְתָּ֙ אֶל־עַבְדִּ֣י אֶל־דָּוִ֔ד כֹּ֖ה אָמַ֣ר יְהוָ֑ה הַאַתָּ֛ה תִּבְנֶה־לִּ֥י בַ֖יִת לְשִׁבְתִּֽי׃

6 ‏כִּ֣י לֹ֤א יָשַׁ֙בְתִּי֙ בְּבַ֔יִת לְ֠מִיּוֹם הַעֲלֹתִ֞י אֶת־בְּנֵ֤י יִשְׂרָאֵל֙ מִמִּצְרַ֔יִם וְעַ֖ד הַיּ֣וֹם הַזֶּ֑ה וָאֶֽהְיֶה֙ מִתְהַלֵּ֔ךְ בְּאֹ֖הֶל וּבְמִשְׁכָּֽן׃

7 ‏בְּכֹ֥ל אֲשֶֽׁר־הִתְהַלַּכְתִּי֮ בְּכָל־בְּנֵ֣י יִשְׂרָאֵל֒ הֲדָבָ֣ר דִּבַּ֗רְתִּי אֶת־אַחַד֙ שִׁבְטֵ֣י יִשְׂרָאֵ֔ל אֲשֶׁ֣ר צִוִּ֗יתִי לִרְע֛וֹת אֶת־עַמִּ֥י אֶת־יִשְׂרָאֵ֖ל לֵאמֹ֑ר לָ֛מָּה לֹֽא־בְנִיתֶ֥ם לִ֖י בֵּ֥ית אֲרָזִֽים׃

8 ‏וְ֠עַתָּה כֹּֽה־תֹאמַ֞ר לְעַבְדִּ֣י לְדָוִ֗ד כֹּ֤ה אָמַר֙ יְהוָ֣ה צְבָא֔וֹת אֲנִ֤י לְקַחְתִּ֙יךָ֙ מִן־הַנָּוֶ֔ה מֵאַחַ֖ר הַצֹּ֑אן לִֽהְי֣וֹת נָגִ֔יד עַל־עַמִּ֖י עַל־יִשְׂרָאֵֽל׃

9 ‏וָאֶהְיֶ֣ה עִמְּךָ֗ בְּכֹל֙ אֲשֶׁ֣ר הָלַ֔כְתָּ וָאַכְרִ֥תָה אֶת־כָּל־אֹיְבֶ֖יךָ מִפָּנֶ֑יךָ וְעָשִׂ֤תִֽי לְךָ֙ שֵׁ֣ם גָּד֔וֹל כְּשֵׁ֥ם הַגְּדֹלִ֖ים אֲשֶׁ֥ר בָּאָֽרֶץ׃

10 ‏וְשַׂמְתִּ֣י מָ֠קוֹם לְעַמִּ֨י לְיִשְׂרָאֵ֤ל וּנְטַעְתִּיו֙ וְשָׁכַ֣ן תַּחְתָּ֔יו וְלֹ֥א יִרְגַּ֖ז ע֑וֹד וְלֹֽא־יֹסִ֤יפוּ בְנֵֽי־עַוְלָה֙ לְעַנּוֹת֔וֹ כַּאֲשֶׁ֖ר בָּרִאשׁוֹנָֽה׃

11 ‏וּלְמִן־הַיּ֗וֹם אֲשֶׁ֨ר צִוִּ֤יתִי שֹֽׁפְטִים֙ עַל־עַמִּ֣י יִשְׂרָאֵ֔ל וַהֲנִיחֹ֥תִי לְךָ֖ מִכָּל־אֹיְבֶ֑יךָ וְהִגִּ֤יד לְךָ֙ יְהוָ֔ה כִּי־בַ֖יִת יַעֲשֶׂה־לְּךָ֥ יְהוָֽה׃

12 ‏כִּ֣י׀ יִמְלְא֣וּ יָמֶ֗יךָ וְשָֽׁכַבְתָּ֙ אֶת־אֲבֹתֶ֔יךָ וַהֲקִימֹתִ֤י אֶֽת־זַרְעֲךָ֙ אַחֲרֶ֔יךָ אֲשֶׁ֥ר יֵצֵ֖א מִמֵּעֶ֑יךָ וַהֲכִינֹתִ֖י אֶת־מַמְלַכְתּֽוֹ׃

13 ‏ה֥וּא יִבְנֶה־בַּ֖יִת לִשְׁמִ֑י וְכֹנַנְתִּ֛י אֶת־כִּסֵּ֥א מַמְלַכְתּ֖וֹ עַד־עוֹלָֽם׃

14 ‏אֲנִי֙ אֶהְיֶה־לּ֣וֹ לְאָ֔ב וְה֖וּא יִהְיֶה־לִּ֣י לְבֵ֑ן אֲשֶׁר֙ בְּהַ֣עֲוֹת֔וֹ וְהֹֽכַחְתִּיו֙ בְּשֵׁ֣בֶט אֲנָשִׁ֔ים וּבְנִגְעֵ֖י בְּנֵ֥י אָדָֽם׃

15 ‏וְחַסְדִּ֖י לֹא־יָס֣וּר מִמֶּ֑נּוּ כַּאֲשֶׁ֤ר הֲסִרֹ֙תִי֙ מֵעִ֣ם שָׁא֔וּל אֲשֶׁ֥ר הֲסִרֹ֖תִי מִלְּפָנֶֽיךָ׃

16 ‏וְנֶאְמַ֨ן בֵּיתְךָ֧ וּמַֽמְלַכְתְּךָ֛ עַד־עוֹלָ֖ם לְפָנֶ֑יךָ כִּֽסְאֲךָ֔ יִהְיֶ֥ה נָכ֖וֹן עַד־עוֹלָֽם׃

17 ‏כְּכֹל֙ הַדְּבָרִ֣ים הָאֵ֔לֶּה וּכְכֹ֖ל הַחִזָּי֣וֹן הַזֶּ֑ה כֵּ֛ן דִּבֶּ֥ר נָתָ֖ן אֶל־דָּוִֽד׃ ס

18 ‏וַיָּבֹא֙ הַמֶּ֣לֶךְ דָּוִ֔ד וַיֵּ֖שֶׁב לִפְנֵ֣י יְהוָ֑ה וַיֹּ֗אמֶר מִ֣י אָנֹכִ֞י אֲדֹנָ֤י יְהוִה֙ וּמִ֣י בֵיתִ֔י כִּ֥י הֲבִיאֹתַ֖נִי עַד־הֲלֹֽם׃

19 ‏וַתִּקְטַן֩ ע֨וֹד זֹ֤את בְּעֵינֶ֙יךָ֙ אֲדֹנָ֣י יְהוִ֔ה וַתְּדַבֵּ֛ר גַּ֥ם אֶל־בֵּֽית־עַבְדְּךָ֖ לְמֵֽרָח֑וֹק וְזֹ֛את תּוֹרַ֥ת הָאָדָ֖ם אֲדֹנָ֥י יְהוִֽה׃

20 ‏וּמַה־יּוֹסִ֥יף דָּוִ֛ד ע֖וֹד לְדַבֵּ֣ר אֵלֶ֑יךָ וְאַתָּ֛ה יָדַ֥עְתָּ אֶֽת־עַבְדְּךָ֖ אֲדֹנָ֥י יְהוִֽה׃

21 ‏בַּעֲב֤וּר דְּבָֽרְךָ֙ וּֽכְלִבְּךָ֔ עָשִׂ֕יתָ אֵ֥ת כָּל־הַגְּדוּלָּ֖ה הַזֹּ֑את לְהוֹדִ֖יעַ אֶת־עַבְדֶּֽךָ׃

22 ‏עַל־כֵּ֥ן גָּדַ֖לְתָּ אֲדֹנָ֣י יְהוִ֑ה כִּֽי־אֵ֣ין כָּמ֗וֹךָ וְאֵ֤ין אֱלֹהִים֙ זֽוּלָתֶ֔ךָ בְּכֹ֥ל אֲשֶׁר־שָׁמַ֖עְנוּ בְּאָזְנֵֽינוּ׃

23 ‏וּמִ֤י כְעַמְּךָ֙ כְּיִשְׂרָאֵ֔ל גּ֥וֹי אֶחָ֖ד בָּאָ֑רֶץ אֲשֶׁ֣ר הָלְכֽוּ־אֱ֠לֹהִים לִפְדּֽוֹת־ל֨וֹ לְעָ֜ם וְלָשׂ֧וּם ל֣וֹ שֵׁ֗ם וְלַעֲשׂ֨וֹת לָכֶ֜ם הַגְּדוּלָּ֤ה וְנֹֽרָאוֹת֙ לְאַרְצֶ֔ךָ מִפְּנֵ֣י עַמְּךָ֗ אֲשֶׁ֨ר פָּדִ֤יתָ לְּךָ֙ מִמִּצְרַ֔יִם גּוֹיִ֖ם וֵאלֹהָֽיו׃

24 ‏וַתְּכ֣וֹנֵֽן לְ֠ךָ אֶת־עַמְּךָ֙ יִשְׂרָאֵ֧ל׀ לְךָ֛ לְעָ֖ם עַד־עוֹלָ֑ם וְאַתָּ֣ה יְהוָ֔ה הָיִ֥יתָ לָהֶ֖ם לֵאלֹהִֽים׃ ס

25 ‏וְעַתָּה֙ יְהוָ֣ה אֱלֹהִ֔ים הַדָּבָ֗ר אֲשֶׁ֨ר דִּבַּ֤רְתָּ עַֽל־עַבְדְּךָ֙ וְעַל־בֵּית֔וֹ הָקֵ֖ם עַד־עוֹלָ֑ם וַעֲשֵׂ֖ה כַּאֲשֶׁ֥ר דִּבַּֽרְתָּ׃

26 ‏וְיִגְדַּ֨ל שִׁמְךָ֤ עַד־עוֹלָם֙ לֵאמֹ֔ר יְהוָ֣ה צְבָא֔וֹת אֱלֹהִ֖ים עַל־יִשְׂרָאֵ֑ל וּבֵית֙ עַבְדְּךָ֣ דָוִ֔ד יִהְיֶ֥ה נָכ֖וֹן לְפָנֶֽיךָ׃

27 ‏כִּֽי־אַתָּה֩ יְהוָ֨ה צְבָא֜וֹת אֱלֹהֵ֣י יִשְׂרָאֵ֗ל גָּלִ֜יתָה אֶת־אֹ֤זֶן עַבְדְּךָ֙ לֵאמֹ֔ר בַּ֖יִת אֶבְנֶה־לָּ֑ךְ עַל־כֵּ֗ן מָצָ֤א עַבְדְּךָ֙ אֶת־לִבּ֔וֹ לְהִתְפַּלֵּ֣ל אֵלֶ֔יךָ אֶת־הַתְּפִלָּ֖ה הַזֹּֽאת׃

28 ‏וְעַתָּ֣ה׀ אֲדֹנָ֣י יְהוִ֗ה אַתָּה־הוּא֙ הָֽאֱלֹהִ֔ים וּדְבָרֶ֖יךָ יִהְי֣וּ אֱמֶ֑ת וַתְּדַבֵּר֙ אֶֽל־עַבְדְּךָ֔ אֶת־הַטּוֹבָ֖ה הַזֹּֽאת׃

29 ‏וְעַתָּ֗ה הוֹאֵל֙ וּבָרֵךְ֙ אֶת־בֵּ֣ית עַבְדְּךָ֔ לִהְי֥וֹת לְעוֹלָ֖ם לְפָנֶ֑יךָ כִּֽי־אַתָּ֞ה אֲדֹנָ֤י יְהוִה֙ דִּבַּ֔רְתָּ וּמִבִּרְכָ֣תְךָ֔ יְבֹרַ֥ךְ בֵּֽית־עַבְדְּךָ֖ לְעוֹלָֽם׃ פ

1 wayəhî kî-yāšaḇ hammeleḵə bəḇêṯwō wayhwâ hēnîḥa-lwō missāḇîḇ mikāl-’ōyəḇāyw:

2 wayyō’mer hammeleḵə ’el-nāṯān hannāḇî’ rə’ēh nā’ ’ānōḵî ywōšēḇ bəḇêṯ ’ărāzîm wa’ărwōn hā’ĕlōhîm yōšēḇ bəṯwōḵə hayərî‘â:

3 wayyō’mer nāṯān ’el-hammeleḵə kōl ’ăšer biləḇāḇəḵā lēḵə ‘ăśēh kî yəhwâ ‘immāḵə: s

4 wayəhî ballayəlâ hahû’ wayəhî dəḇar-yəhwâ ’el-nāṯān lē’mōr:

5 lēḵə wə’āmarətā ’el-‘aḇədî ’el-dāwiḏ kōh ’āmar yəhwâ ha’atâ tiḇəneh-llî ḇayiṯ ləšiḇətî:

6 kî lō’ yāšaḇətî bəḇayiṯ ləmîywōm ha‘ălōṯî ’eṯ-bənê yiśərā’ēl mimmiṣərayim wə‘aḏ hayywōm hazzeh wā’ehəyeh miṯəhallēḵə bə’ōhel ûḇəmišəkān:

7 bəḵōl ’ăšer-hiṯəhallaḵətî bəḵāl-bənê yiśərā’ēl hăḏāḇār dibarətî ’eṯ-’aḥaḏ šiḇəṭê yiśərā’ēl ’ăšer ṣiûîṯî lirə‘wōṯ ’eṯ-‘ammî ’eṯ-yiśərā’ēl lē’mōr lāmmâ lō’-ḇənîṯem lî bêṯ ’ărāzîm:

8 wə‘atâ kōh-ṯō’mar lə‘aḇədî ləḏāwiḏ kōh ’āmar yəhwâ ṣəḇā’wōṯ ’ănî ləqaḥətîḵā min-hannāweh mē’aḥar haṣṣō’n lihəywōṯ nāḡîḏ ‘al-‘ammî ‘al-yiśərā’ēl:

9 wā’ehəyeh ‘imməḵā bəḵōl ’ăšer hālaḵətā wā’aḵəriṯâ ’eṯ-kāl-’ōyəḇeyḵā mipāneyḵā wə‘āśiṯî ləḵā šēm gāḏwōl kəšēm hagəḏōlîm ’ăšer bā’āreṣ:

10 wəśamətî māqwōm lə‘ammî ləyiśərā’ēl ûnəṭa‘ətîw wəšāḵan taḥətāyw wəlō’ yirəgaz ‘wōḏ wəlō’-yōsîfû ḇənê-‘awəlâ lə‘annwōṯwō ka’ăšer bāri’šwōnâ:

11 ûləmin-hayywōm ’ăšer ṣiûîṯî šōfəṭîm ‘al-‘ammî yiśərā’ēl wahănîḥōṯî ləḵā mikāl-’ōyəḇeyḵā wəhigîḏ ləḵā yəhwâ kî-ḇayiṯ ya‘ăśeh-lləḵā yəhwâ:

12 kî| yimələ’û yāmeyḵā wəšāḵaḇətā ’eṯ-’ăḇōṯeyḵā wahăqîmōṯî ’eṯ-zarə‘ăḵā ’aḥăreyḵā ’ăšer yēṣē’ mimmē‘eyḵā wahăḵînōṯî ’eṯ-maməlaḵətwō:

13 hû’ yiḇəneh-bayiṯ lišəmî wəḵōnanətî ’eṯ-kissē’ maməlaḵətwō ‘aḏ-‘wōlām:

14 ’ănî ’ehəyeh-llwō lə’āḇ wəhû’ yihəyeh-llî ləḇēn ’ăšer bəha‘ăwōṯwō wəhōḵaḥətîw bəšēḇeṭ ’ănāšîm ûḇəniḡə‘ê bənê ’āḏām:

15 wəḥasədî lō’-yāsûr mimmennû ka’ăšer hăsirōṯî mē‘im šā’ûl ’ăšer hăsirōṯî milləfāneyḵā:

16 wəne’əman bêṯəḵā ûmaməlaḵətəḵā ‘aḏ-‘wōlām ləfāneyḵā kisə’ăḵā yihəyeh nāḵwōn ‘aḏ-‘wōlām:

17 kəḵōl hadəḇārîm hā’ēlleh ûḵəḵōl haḥizzāywōn hazzeh kēn diber nāṯān ’el-dāwiḏ: s

18 wayyāḇō’ hammeleḵə dāwiḏ wayyēšeḇ lifənê yəhwâ wayyō’mer mî ’ānōḵî ’ăḏōnāy yəhwih ûmî ḇêṯî kî hăḇî’ōṯanî ‘aḏ-hălōm:

19 watiqəṭan ‘wōḏ zō’ṯ bə‘êneyḵā ’ăḏōnāy yəhwih watəḏabēr gam ’el-bêṯ-‘aḇədəḵā ləmērāḥwōq wəzō’ṯ twōraṯ hā’āḏām ’ăḏōnāy yəhwih:

20 ûmah-yywōsîf dāwiḏ ‘wōḏ ləḏabēr ’ēleyḵā wə’atâ yāḏa‘ətā ’eṯ-‘aḇədəḵā ’ăḏōnāy yəhwih:

21 ba‘ăḇûr dəḇārəḵā ûḵəlibəḵā ‘āśîṯā ’ēṯ kāl-hagəḏûllâ hazzō’ṯ ləhwōḏî‘a ’eṯ-‘aḇədeḵā:

22 ‘al-kēn gāḏalətā ’ăḏōnāy yəhwih kî-’ên kāmwōḵā wə’ên ’ĕlōhîm zûlāṯeḵā bəḵōl ’ăšer-šāma‘ənû bə’āzənênû:

23 ûmî ḵə‘amməḵā kəyiśərā’ēl gwōy ’eḥāḏ bā’āreṣ ’ăšer hāləḵû-’ĕlōhîm lifədwōṯ-lwō lə‘ām wəlāśûm lwō šēm wəla‘ăśwōṯ lāḵem hagəḏûllâ wənōrā’wōṯ lə’arəṣeḵā mipənê ‘amməḵā ’ăšer pāḏîṯā lləḵā mimmiṣərayim gwōyim wē’lōhāyw:

24 watəḵwōnēn ləḵā ’eṯ-‘amməḵā yiśərā’ēl| ləḵā lə‘ām ‘aḏ-‘wōlām wə’atâ yəhwâ hāyîṯā lâem lē’lōhîm: s

25 wə‘atâ yəhwâ ’ĕlōhîm hadāḇār ’ăšer dibarətā ‘al-‘aḇədəḵā wə‘al-bêṯwō hāqēm ‘aḏ-‘wōlām wa‘ăśēh ka’ăšer dibarətā:

26 wəyiḡədal šiməḵā ‘aḏ-‘wōlām lē’mōr yəhwâ ṣəḇā’wōṯ ’ĕlōhîm ‘al-yiśərā’ēl ûḇêṯ ‘aḇədəḵā ḏāwiḏ yihəyeh nāḵwōn ləfāneyḵā:

27 kî-’atâ yəhwâ ṣəḇā’wōṯ ’ĕlōhê yiśərā’ēl gālîṯâ ’eṯ-’ōzen ‘aḇədəḵā lē’mōr bayiṯ ’eḇəneh-llāḵə ‘al-kēn māṣā’ ‘aḇədəḵā ’eṯ-libwō ləhiṯəpallēl ’ēleyḵā ’eṯ-hatəfillâ hazzō’ṯ:

28 wə‘atâ| ’ăḏōnāy yəhwih ’atâ-hû’ hā’ĕlōhîm ûḏəḇāreyḵā yihəyû ’ĕmeṯ watəḏabēr ’el-‘aḇədəḵā ’eṯ-haṭṭwōḇâ hazzō’ṯ:

29 wə‘atâ hwō’ēl ûḇārēḵə ’eṯ-bêṯ ‘aḇədəḵā lihəywōṯ lə‘wōlām ləfāneyḵā kî-’atâ ’ăḏōnāy yəhwih dibarətā ûmibirəḵāṯəḵā yəḇōraḵə bêṯ-‘aḇədəḵā lə‘wōlām: f


Next: 2 Samuel (2 Shmuel) Chapter 8