‎1 ‏וַֽיְהִי֙ בַּיָּמִ֣ים הָהֵ֔ם וַיִּקְבְּצ֨וּ פְלִשְׁתִּ֤ים אֶת־מַֽחֲנֵיהֶם֙ לַצָּבָ֔א לְהִלָּחֵ֖ם בְּיִשְׂרָאֵ֑ל וַיֹּ֤אמֶר אָכִישׁ֙ אֶל־דָּוִ֔ד יָדֹ֣עַ תֵּדַ֗ע כִּ֤י אִתִּי֙ תֵּצֵ֣א בַֽמַּחֲנֶ֔ה אַתָּ֖ה וַאֲנָשֶֽׁיךָ׃

‎2 ‏וַיֹּ֤אמֶר דָּוִד֙ אֶל־אָכִ֔ישׁ לָכֵן֙ אַתָּ֣ה תֵדַ֔ע אֵ֥ת אֲשֶׁר־יַעֲשֶׂ֖ה עַבְדֶּ֑ךָ וַיֹּ֤אמֶר אָכִישׁ֙ אֶל־דָּוִ֔ד לָכֵ֗ן שֹׁמֵ֧ר לְרֹאשִׁ֛י אֲשִֽׂימְךָ֖ כָּל־הַיָּמִֽים׃ פ

‎3 ‏וּשְׁמוּאֵ֣ל מֵ֔ת וַיִּסְפְּדוּ־לוֹ֙ כָּל־יִשְׂרָאֵ֔ל וַיִּקְבְּרֻ֥הוּ בָרָמָ֖ה וּבְעִיר֑וֹ וְשָׁא֗וּל הֵסִ֛יר הָאֹב֥וֹת וְאֶת־הַיִּדְּעֹנִ֖ים מֵהָאָֽרֶץ׃

‎4 ‏וַיִּקָּבְצ֣וּ פְלִשְׁתִּ֔ים וַיָּבֹ֖אוּ וַיַּחֲנ֣וּ בְשׁוּנֵ֑ם וַיִּקְבֹּ֤ץ שָׁאוּל֙ אֶת־כָּל־יִשְׂרָאֵ֔ל וַֽיַּחֲנ֖וּ בַּגִּלְבֹּֽעַ׃

‎5 ‏וַיַּ֥רְא שָׁא֖וּל אֶת־מַחֲנֵ֣ה פְלִשְׁתִּ֑ים וַיִּרָ֕א וַיֶּחֱרַ֥ד לִבּ֖וֹ מְאֹֽד׃

‎6 ‏וַיִּשְׁאַ֤ל שָׁאוּל֙ בַּֽיהוָ֔ה וְלֹ֥א עָנָ֖הוּ יְהוָ֑ה גַּ֧ם בַּחֲלֹמ֛וֹת גַּ֥ם בָּאוּרִ֖ים גַּ֥ם בַּנְּבִיאִֽם׃

‎7 ‏וַיֹּ֨אמֶר שָׁא֜וּל לַעֲבָדָ֗יו בַּקְּשׁוּ־לִי֙ אֵ֣שֶׁת בַּעֲלַת־א֔וֹב וְאֵלְכָ֥ה³ אֵלֶ֖יהָ וְאֶדְרְשָׁה־בָּ֑הּ וַיֹּאמְר֤וּ עֲבָדָיו֙ אֵלָ֔יו הִנֵּ֛ה אֵ֥שֶׁת בַּֽעֲלַת־א֖וֹב בְּעֵ֥ין דּֽוֹר׃

‎8 ‏וַיִּתְחַפֵּ֣שׂ שָׁא֗וּל וַיִּלְבַּשׁ֙ בְּגָדִ֣ים אֲחֵרִ֔ים וַיֵּ֣לֶךְ ה֗וּא וּשְׁנֵ֤י אֲנָשִׁים֙ עִמּ֔וֹ וַיָּבֹ֥אוּ אֶל־הָאִשָּׁ֖ה לָ֑יְלָה וַיֹּ֗אמֶר קסומי־ קָֽסֳמִי־ נָ֥א^y לִי֙ בָּא֔וֹב וְהַ֣עֲלִי לִ֔י אֵ֥ת אֲשֶׁר־אֹמַ֖ר אֵלָֽיִךְ׃

‎9 ‏וַתֹּ֨אמֶר הָֽאִשָּׁ֜ה אֵלָ֗יו הִנֵּ֨ה אַתָּ֤ה יָדַ֙עְתָּ֙ אֵ֣ת אֲשֶׁר־עָשָׂ֣ה שָׁא֔וּל אֲשֶׁ֥ר הִכְרִ֛ית אֶת־הָאֹב֥וֹת וְאֶת־הַיִּדְּעֹנִ֖י מִן־הָאָ֑רֶץ וְלָמָ֥ה אַתָּ֛ה מִתְנַקֵּ֥שׁ בְּנַפְשִׁ֖י לַהֲמִיתֵֽנִי׃

‎10 ‏וַיִּשָּׁ֤בַֽע לָהּ֙ שָׁא֔וּל בַּֽיהוָ֖ה לֵאמֹ֑ר חַי־יְהוָ֕ה אִֽם־יִקְּרֵ֥ךְ עָוֹ֖ן בַּדָּבָ֥ר הַזֶּֽה׃

‎11 ‏וַתֹּ֙אמֶר֙ הָֽאִשָּׁ֔ה אֶת־מִ֖י אַֽעֲלֶה־לָּ֑ךְ וַיֹּ֕אמֶר אֶת־שְׁמוּאֵ֖ל הַֽעֲלִי־לִֽי׃

‎12 ‏וַתֵּ֤רֶא הָֽאִשָּׁה֙ אֶת־שְׁמוּאֵ֔ל וַתִּזְעַ֖ק בְּק֣וֹל גָּד֑וֹל וַתֹּאמֶר֩ הָאִשָּׁ֨ה אֶל־שָׁא֧וּל לֵאמֹ֛ר לָ֥מָּה רִמִּיתָ֖נִי וְאַתָּ֥ה שָׁאֽוּל׃

‎13 ‏וַיֹּ֨אמֶר לָ֥הּ הַמֶּ֛לֶךְ אַל־תִּֽירְאִ֖י כִּ֣י מָ֣ה רָאִ֑ית וַתֹּ֤אמֶר הָֽאִשָּׁה֙ אֶל־שָׁא֔וּל אֱלֹהִ֥ים רָאִ֖יתִי עֹלִ֥ים מִן־הָאָֽרֶץ׃

‎14 ‏וַיֹּ֤אמֶר לָהּ֙ מַֽה־תָּאֳר֔וֹ וַתֹּ֗אמֶר אִ֤ישׁ זָקֵן֙ עֹלֶ֔ה וְה֥וּא עֹטֶ֖ה מְעִ֑יל וַיֵּ֤דַע שָׁאוּל֙ כִּֽי־שְׁמוּאֵ֣ל ה֔וּא וַיִּקֹּ֥ד אַפַּ֛יִם אַ֖רְצָה וַיִּשְׁתָּֽחוּ׃ ס

‎15 ‏וַיֹּ֤אמֶר שְׁמוּאֵל֙ אֶל־שָׁא֔וּל לָ֥מָּה הִרְגַּזְתַּ֖נִי לְהַעֲל֣וֹת אֹתִ֑י וַיֹּ֣אמֶר שָׁ֠אוּל צַר־לִ֨י מְאֹ֜ד וּפְלִשְׁתִּ֣ים׀ נִלְחָמִ֣ים בִּ֗י וֵֽאלֹהִ֞ים סָ֤ר מֵֽעָלַי֙ וְלֹֽא־עָנָ֣נִי ע֗וֹד גַּ֤ם בְּיַֽד־הַנְּבִיאִם֙ גַּם־בַּ֣חֲלֹמ֔וֹת וָאֶקְרָאֶ֣ה לְךָ֔ לְהוֹדִיעֵ֖נִי מָ֥ה אֶעֱשֶֽׂה׃ ס

‎16 ‏וַיֹּ֣אמֶר שְׁמוּאֵ֔ל וְלָ֖מָּה תִּשְׁאָלֵ֑נִי וַיהוָ֛ה סָ֥ר מֵעָלֶ֖יךָ וַיְהִ֥י עָרֶֽךָ׃

‎17 ‏וַיַּ֤עַשׂ יְהוָה֙ ל֔וֹ כַּאֲשֶׁ֖ר דִּבֶּ֣ר בְּיָדִ֑י וַיִּקְרַ֨ע יְהוָ֤ה אֶת־הַמַּמְלָכָה֙ מִיָּדֶ֔ךָ וַֽיִּתְּנָ֖הּ לְרֵעֲךָ֥ לְדָוִֽד׃

‎18 ‏כַּאֲשֶׁ֤ר לֹֽא־שָׁמַ֙עְתָּ֙ בְּק֣וֹל יְהוָ֔ה וְלֹֽא־עָשִׂ֥יתָ חֲרוֹן־אַפּ֖וֹ בַּעֲמָלֵ֑ק עַל־כֵּן֙ הַדָּבָ֣ר הַזֶּ֔ה עָשָֽׂה־לְךָ֥ יְהוָ֖ה הַיּ֥וֹם הַזֶּֽה׃

‎19 ‏וְיִתֵּ֣ן יְ֠הוָה גַּ֣ם אֶת־יִשְׂרָאֵ֤ל עִמְּךָ֙ בְּיַד־פְּלִשְׁתִּ֔ים וּמָחָ֕ר אַתָּ֥ה וּבָנֶ֖יךָ עִמִּ֑י גַּ֚ם אֶת־מַחֲנֵ֣ה יִשְׂרָאֵ֔ל יִתֵּ֥ן יְהוָ֖ה בְּיַד־פְּלִשְׁתִּֽים׃

‎20 ‏וַיְמַהֵ֣ר שָׁא֗וּל וַיִּפֹּ֤ל מְלֹא־קֽוֹמָתוֹ֙ אַ֔רְצָה וַיִּרָ֥א מְאֹ֖ד מִדִּבְרֵ֣י שְׁמוּאֵ֑ל גַּם־כֹּ֙חַ֙ לֹא־הָ֣יָה ב֔וֹ כִּ֣י לֹ֤א אָכַל֙ לֶ֔חֶם כָּל־הַיּ֖וֹם וְכָל־הַלָּֽיְלָה׃

‎21 ‏וַתָּב֤וֹא הָֽאִשָּׁה֙ אֶל־שָׁא֔וּל וַתֵּ֖רֶא כִּי־נִבְהַ֣ל מְאֹ֑ד וַתֹּ֣אמֶר אֵלָ֗יו הִנֵּ֨ה שָׁמְעָ֤ה שִׁפְחָֽתְךָ֙ בְּקוֹלֶ֔ךָ וָאָשִׂ֤ים נַפְשִׁי֙ בְּכַפִּ֔י וָֽאֶשְׁמַע֙ אֶת־דְּבָרֶ֔יךָ אֲשֶׁ֥ר דִּבַּ֖רְתָּ אֵלָֽי׃

‎22 ‏וְעַתָּ֗ה שְׁמַֽע־נָ֤א גַם־אַתָּה֙ בְּק֣וֹל שִׁפְחָתֶ֔ךָ וְאָשִׂ֧מָה לְפָנֶ֛יךָ פַּת־לֶ֖חֶם וֶאֱכ֑וֹל וִיהִ֤י בְךָ֙ כֹּ֔חַ כִּ֥י תֵלֵ֖ךְ בַּדָּֽרֶךְ׃

‎23 ‏וַיְמָאֵ֗ן וַיֹּ֙אמֶר֙ לֹ֣א אֹכַ֔ל וַיִּפְרְצוּ־ב֤וֹ עֲבָדָיו֙ וְגַם־הָ֣אִשָּׁ֔ה וַיִּשְׁמַ֖ע לְקֹלָ֑ם וַיָּ֙קָם֙ מֵֽהָאָ֔רֶץ וַיֵּ֖שֶׁב אֶל־הַמִּטָּֽה׃

‎24 ‏וְלָאִשָּׁ֤ה עֵֽגֶל־מַרְבֵּק֙ בַּבַּ֔יִת וַתְּמַהֵ֖ר וַתִּזְבָּחֵ֑הוּ וַתִּקַּח־קֶ֣מַח וַתָּ֔לָשׁ וַתֹּפֵ֖הוּ מַצּֽוֹת׃

‎25 ‏וַתַּגֵּ֧שׁ לִפְנֵֽי־שָׁא֛וּל וְלִפְנֵ֥י עֲבָדָ֖יו וַיֹּאכֵ֑לוּ וַיָּקֻ֥מוּ וַיֵּלְכ֖וּ בַּלַּ֥יְלָה הַהֽוּא׃ פ

1 wayəhî bayyāmîm hâēm wayyiqəbəṣû fəlišətîm ’eṯ-m^aḥănêhem laṣṣāḇā’ ləhillāḥēm bəyiśərā’ēl wayyō’mer ’āḵîš ’el-dāwiḏ yāḏō‘a tēḏ^a‘ kî ’itî tēṣē’ ḇamm^aḥăneh ’atâ wa’ănāšeyḵā:

2 wayyō’mer dāwiḏ ’el-’āḵîš lāḵēn ’atâ ṯēḏ^a‘ ’ēṯ ’ăšer-y^a‘ăśeh ‘aḇədeḵā wayyō’mer ’āḵîš ’el-dāwiḏ lāḵēn šōmēr lərō’šî ’ăśîməḵā kāl-hayyāmîm: f

3 ûšəmû’ēl mēṯ wayyisəpəḏû-lwō kāl-yiśərā’ēl wayyiqəbəruhû ḇārāmâ ûḇə‘îrwō wəšā’ûl hēsîr hā’ōḇwōṯ wə’eṯ-hayyidə‘ōnîm mēhā’āreṣ:

4 wayyiqqāḇəṣû fəlišətîm wayyāḇō’û wayy^aḥănû ḇəšûnēm wayyiqəbōṣ šā’ûl ’eṯ-kāl-yiśərā’ēl wayy^aḥănû bagiləbō‘a:

5 wayyarə’ šā’ûl ’eṯ-m^aḥănēh fəlišətîm wayyirā’ wayyeḥĕraḏ libwō mə’ōḏ:

6 wayyišə’al šā’ûl bayhwâ wəlō’ ‘ānâû yəhwâ gam b^aḥălōmwōṯ gam bā’ûrîm gam bannəḇî’im:

7 wayyō’mer šā’ûl l^a‘ăḇāḏāyw baqqəšû-lî ’ēšeṯ b^a‘ălaṯ-’wōḇ wə’ēləḵâ³ ’ēleyhā wə’eḏərəšâ-bāh wayyō’mərû ‘ăḇāḏāyw ’ēlāyw hinnēh ’ēšeṯ b^a‘ălaṯ-’wōḇ bə‘ên dwōr:

8 wayyiṯəḥapēś šā’ûl wayyiləbaš bəḡāḏîm ’ăḥērîm wayyēleḵə hû’ ûšənê ’ănāšîm ‘immwō wayyāḇō’û ’el-hā’iššâ lāyəlâ wayyō’mer qəswōmî- qāsŏmî- nā’^y lî bā’wōḇ wəh^a‘ălî lî ’ēṯ ’ăšer-’ōmar ’ēlāyiḵə:

9 watō’mer hā’iššâ ’ēlāyw hinnēh ’atâ yāḏ^a‘ətā ’ēṯ ’ăšer-‘āśâ šā’ûl ’ăšer hiḵərîṯ ’eṯ-hā’ōḇwōṯ wə’eṯ-hayyidə‘ōnî min-hā’āreṣ wəlāmâ ’atâ miṯənaqqēš bənafəšî lahămîṯēnî:

10 wayyiššāḇ^a‘ lāh šā’ûl bayhwâ lē’mōr ḥay-yəhwâ ’im-yiqqərēḵə ‘āwōn badāḇār hazzeh:

11 watō’mer hā’iššâ ’eṯ-mî ’^a‘ăleh-llāḵə wayyō’mer ’eṯ-šəmû’ēl h^a‘ălî-lî:

12 watēre’ hā’iššâ ’eṯ-šəmû’ēl watizə‘aq bəqwōl gāḏwōl watō’mer hā’iššâ ’el-šā’ûl lē’mōr lāmmâ rimmîṯānî wə’atâ šā’ûl:

13 wayyō’mer lāh hammeleḵə ’al-tîrə’î kî mâ rā’îṯ watō’mer hā’iššâ ’el-šā’ûl ’ĕlōhîm rā’îṯî ‘ōlîm min-hā’āreṣ:

14 wayyō’mer lāh mah-tā’ŏrwō watō’mer ’îš zāqēn ‘ōleh wəhû’ ‘ōṭeh mə‘îl wayyēḏ^a‘ šā’ûl kî-šəmû’ēl hû’ wayyiqqōḏ ’apayim ’arəṣâ wayyišətāḥû: s

15 wayyō’mer šəmû’ēl ’el-šā’ûl lāmmâ hirəgazətanî ləh^a‘ălwōṯ ’ōṯî wayyō’mer šā’ûl ṣar-lî mə’ōḏ ûfəlišətîm| niləḥāmîm bî wē’lōhîm sār mē‘ālay wəlō’-‘ānānî ‘wōḏ gam bəyaḏ-hannəḇî’im gam-b^aḥălōmwōṯ wā’eqərā’eh ləḵā ləhwōḏî‘ēnî mâ ’e‘ĕśeh: s

16 wayyō’mer šəmû’ēl wəlāmmâ tišə’ālēnî wayhwâ sār mē‘āleyḵā wayəhî ‘āreḵā:

17 wayy^a‘aś yəhwâ lwō ka’ăšer diber bəyāḏî wayyiqər^a‘ yəhwâ ’eṯ-hammaməlāḵâ mîyāḏeḵā wayyitənāh lərē‘ăḵā ləḏāwiḏ:

18 ka’ăšer lō’-šām^a‘ətā bəqwōl yəhwâ wəlō’-‘āśîṯā ḥărwōn-’apwō b^a‘ămālēq ‘al-kēn hadāḇār hazzeh ‘āśâ-ləḵā yəhwâ hayywōm hazzeh:

19 wəyitēn yəhwâ gam ’eṯ-yiśərā’ēl ‘imməḵā bəyaḏ-pəlišətîm ûmāḥār ’atâ ûḇāneyḵā ‘immî gam ’eṯ-m^aḥănēh yiśərā’ēl yitēn yəhwâ bəyaḏ-pəlišətîm:

20 wayəmahēr šā’ûl wayyipōl məlō’-qwōmāṯwō ’arəṣâ wayyirā’ mə’ōḏ midiḇərê šəmû’ēl gam-kōḥa lō’-hāyâ ḇwō kî lō’ ’āḵal leḥem kāl-hayywōm wəḵāl-hallāyəlâ:

21 watāḇwō’ hā’iššâ ’el-šā’ûl watēre’ kî-niḇəhal mə’ōḏ watō’mer ’ēlāyw hinnēh šāmə‘â šifəḥāṯəḵā bəqwōleḵā wā’āśîm nafəšî bəḵapî wā’ešəm^a‘ ’eṯ-dəḇāreyḵā ’ăšer dibarətā ’ēlāy:

22 wə‘atâ šəm^a‘-nā’ ḡam-’atâ bəqwōl šifəḥāṯeḵā wə’āśimâ ləfāneyḵā paṯ-leḥem we’ĕḵwōl wîhî ḇəḵā kōḥa kî ṯēlēḵə badāreḵə:

23 wayəmā’ēn wayyō’mer lō’ ’ōḵal wayyifərəṣû-ḇwō ‘ăḇāḏāyw wəḡam-hā’iššâ wayyišəm^a‘ ləqōlām wayyāqām mēhā’āreṣ wayyēšeḇ ’el-hammiṭṭâ:

24 wəlā’iššâ ‘ēḡel-marəbēq babayiṯ watəmahēr watizəbāḥēhû watiqq^aḥ-qem^aḥ watālāš watōfēhû maṣṣwōṯ:

25 watagēš lifənê-šā’ûl wəlifənê ‘ăḇāḏāyw wayyō’ḵēlû wayyāqumû wayyēləḵû ballayəlâ hahû’: f