‎1 ‏וַיַּ֗עַל נָחָשׁ֙ הָֽעַמּוֹנִ֔י וַיִּ֖חַן עַל־יָבֵ֣שׁ גִּלְעָ֑ד וַיֹּ֨אמְר֜וּ כָּל־אַנְשֵׁ֤י יָבֵישׁ֙ אֶל־נָחָ֔שׁ כְּרָת־לָ֥נוּ בְרִ֖ית וְנַעַבְדֶֽךָּ׃

‎2 ‏וַיֹּ֣אמֶר אֲלֵיהֶ֗ם נָחָשׁ֙ הָעַמּוֹנִ֔י בְּזֹאת֙ אֶכְרֹ֣ת לָכֶ֔ם בִּנְק֥וֹר לָכֶ֖ם כָּל־עֵ֣ין יָמִ֑ין וְשַׂמְתִּ֥יהָ חֶרְפָּ֖ה עַל־כָּל־יִשְׂרָאֵֽל׃

‎3 ‏וַיֹּאמְר֨וּ אֵלָ֜יו זִקְנֵ֣י יָבֵ֗ישׁ הֶ֤רֶף לָ֙נוּ֙ שִׁבְעַ֣ת יָמִ֔ים וְנִשְׁלְחָה֙ מַלְאָכִ֔ים בְּכֹ֖ל גְּב֣וּל יִשְׂרָאֵ֑ל וְאִם־אֵ֥ין מוֹשִׁ֛יעַ אֹתָ֖נוּ וְיָצָ֥אנוּ אֵלֶֽיךָ׃

‎4 ‏וַיָּבֹ֤אוּ הַמַּלְאָכִים֙ גִּבְעַ֣ת שָׁא֔וּל וַיְדַבְּר֥וּ הַדְּבָרִ֖ים בְּאָזְנֵ֣י הָעָ֑ם וַיִּשְׂא֧וּ כָל־הָעָ֛ם אֶת־קוֹלָ֖ם וַיִּבְכּֽוּ׃

‎5 ‏וְהִנֵּ֣ה שָׁא֗וּל בָּ֣א אַחֲרֵ֤י הַבָּקָר֙ מִן־הַשָּׂדֶ֔ה וַיֹּ֣אמֶר שָׁא֔וּל מַה־לָּעָ֖ם כִּ֣י יִבְכּ֑וּ וַיְסַ֨פְּרוּ־ל֔וֹ אֶת־דִּבְרֵ֖י אַנְשֵׁ֥י יָבֵֽישׁ׃

‎6 ‏וַתִּצְלַ֤ח רֽוּחַ־אֱלֹהִים֙ עַל־שָׁא֔וּל בשמעו כְּשָׁמְע֖וֹ אֶת־הַדְּבָרִ֣ים הָאֵ֑לֶּה וַיִּ֥חַר אַפּ֖וֹ מְאֹֽד׃

‎7 ‏וַיִּקַּח֩ צֶ֨מֶד בָּקָ֜ר וַֽיְנַתְּחֵ֗הוּ וַיְשַׁלַּ֞ח בְּכָל־גְּב֣וּל יִשְׂרָאֵל֮ בְּיַ֣ד הַמַּלְאָכִ֣ים׀ לֵאמֹר֒ אֲשֶׁר֩ אֵינֶ֨נּוּ יֹצֵ֜א אַחֲרֵ֤י שָׁאוּל֙ וְאַחַ֣ר שְׁמוּאֵ֔ל כֹּ֥ה יֵעָשֶׂ֖ה לִבְקָר֑וֹ וַיִּפֹּ֤ל פַּֽחַד־יְהוָה֙ עַל־הָעָ֔ם וַיֵּצְא֖וּ כְּאִ֥ישׁ אֶחָֽד׃

‎8 ‏וַֽיִּפְקְדֵ֖ם בְּבָ֑זֶק וַיִּהְי֤וּ בְנֵֽי־יִשְׂרָאֵל֙ שְׁלֹ֣שׁ מֵא֣וֹת אֶ֔לֶף וְאִ֥ישׁ יְהוּדָ֖ה שְׁלֹשִׁ֥ים אָֽלֶף׃

‎9 ‏וַיֹּאמְר֞וּ לַמַּלְאָכִ֣ים הַבָּאִ֗ים כֹּ֤ה תֹֽאמְרוּן֙ לְאִישׁ֙ יָבֵ֣ישׁ גִּלְעָ֔ד מָחָ֛ר תִּהְיֶֽה־לָכֶ֥ם תְּשׁוּעָ֖ה בחם כְּחֹ֣ם הַשָּׁ֑מֶשׁ וַיָּבֹ֣אוּ הַמַּלְאָכִ֗ים וַיַּגִּ֛ידוּ לְאַנְשֵׁ֥י יָבֵ֖ישׁ וַיִּשְׂמָֽחוּ׃

‎10 ‏וַֽיֹּאמְרוּ֙ אַנְשֵׁ֣י יָבֵ֔ישׁ מָחָ֖ר נֵצֵ֣א אֲלֵיכֶ֑ם וַעֲשִׂיתֶ֣ם לָּ֔נוּ כְּכָל־הַטּ֖וֹב בְּעֵינֵיכֶֽם׃ ס

‎11 ‏וַיְהִ֣י מִֽמָּחֳרָ֗ת וַיָּ֨שֶׂם שָׁא֣וּל אֶת־הָעָם֮ שְׁלֹשָׁ֣ה רָאשִׁים֒ וַיָּבֹ֤אוּ בְתוֹךְ־הַֽמַּחֲנֶה֙ בְּאַשְׁמֹ֣רֶת הַבֹּ֔קֶר וַיַּכּ֥וּ אֶת־עַמּ֖וֹן עַד־חֹ֣ם הַיּ֑וֹם וַיְהִ֤י הַנִּשְׁאָרִים֙ וַיָּפֻ֔צוּ וְלֹ֥א נִשְׁאֲרוּ־בָ֖ם שְׁנַ֥יִם יָֽחַד׃

‎12 ‏וַיֹּ֤אמֶר הָעָם֙ אֶל־שְׁמוּאֵ֔ל מִ֣י הָאֹמֵ֔ר שָׁא֖וּל יִמְלֹ֣ךְ עָלֵ֑ינוּ תְּנ֥וּ הָאֲנָשִׁ֖ים וּנְמִיתֵֽם׃

‎13 ‏וַיֹּ֣אמֶר שָׁא֔וּל לֹֽא־יוּמַ֥ת אִ֖ישׁ בַּיּ֣וֹם הַזֶּ֑ה כִּ֥י הַיּ֛וֹם עָשָֽׂה־יְהוָ֥ה תְּשׁוּעָ֖ה בְּיִשְׂרָאֵֽל׃ ס

‎14 ‏וַיֹּ֤אמֶר שְׁמוּאֵל֙ אֶל־הָעָ֔ם לְכ֖וּ וְנֵלְכָ֣ה הַגִּלְגָּ֑ל וּנְחַדֵּ֥שׁ שָׁ֖ם הַמְּלוּכָֽה׃

‎15 ‏וַיֵּלְכ֨וּ כָל־הָעָ֜ם הַגִּלְגָּ֗ל וַיַּמְלִכוּ֩ שָׁ֨ם אֶת־שָׁא֜וּל לִפְנֵ֤י יְהוָה֙ בַּגִּלְגָּ֔ל וַיִּזְבְּחוּ־שָׁ֛ם זְבָחִ֥ים שְׁלָמִ֖ים לִפְנֵ֣י יְהוָ֑ה וַיִּשְׂמַ֨ח שָׁ֥ם שָׁא֛וּל וְכָל־אַנְשֵׁ֥י יִשְׂרָאֵ֖ל עַד־מְאֹֽד׃ פ

1 wayy^a‘al nāḥāš hā‘ammwōnî wayyiḥan ‘al-yāḇēš gilə‘āḏ wayyō’mərû kāl-’anəšê yāḇêš ’el-nāḥāš kərāṯ-lānû ḇərîṯ wən^a‘aḇəḏeḵḵā:

2 wayyō’mer ’ălêhem nāḥāš hā‘ammwōnî bəzō’ṯ ’eḵərōṯ lāḵem binəqwōr lāḵem kāl-‘ên yāmîn wəśamətîhā ḥerəpâ ‘al-kāl-yiśərā’ēl:

3 wayyō’mərû ’ēlāyw ziqənê yāḇêš heref lānû šiḇə‘aṯ yāmîm wənišələḥâ malə’āḵîm bəḵōl gəḇûl yiśərā’ēl wə’im-’ên mwōšî‘a ’ōṯānû wəyāṣā’nû ’ēleyḵā:

4 wayyāḇō’û hammalə’āḵîm giḇə‘aṯ šā’ûl wayəḏabərû hadəḇārîm bə’āzənê hā‘ām wayyiśə’û ḵāl-hā‘ām ’eṯ-qwōlām wayyiḇəkû:

5 wəhinnēh šā’ûl bā’ ’^aḥărê habāqār min-haśśāḏeh wayyō’mer šā’ûl mah-llā‘ām kî yiḇəkû wayəsapərû-lwō ’eṯ-diḇərê ’anəšê yāḇêš:

6 watiṣəl^aḥ rûḥa-’ĕlōhîm ‘al-šā’ûl bəšāmə‘wō kəšāmə‘wō ’eṯ-hadəḇārîm hā’ēlleh wayyiḥar ’apwō mə’ōḏ:

7 wayyiqq^aḥ ṣemeḏ bāqār wayənatəḥēhû wayəšall^aḥ bəḵāl-gəḇûl yiśərā’ēl bəyaḏ hammalə’āḵîm| lē’mōr ’ăšer ’ênennû yōṣē’ ’^aḥărê šā’ûl wə’^aḥar šəmû’ēl kōh yē‘āśeh liḇəqārwō wayyipōl p^aḥaḏ-yəhwâ ‘al-hā‘ām wayyēṣə’û kə’îš ’eḥāḏ:

8 wayyifəqəḏēm bəḇāzeq wayyihəyû ḇənê-yiśərā’ēl šəlōš mē’wōṯ ’elef wə’îš yəhûḏâ šəlōšîm ’ālef:

9 wayyō’mərû lammalə’āḵîm habā’îm kōh ṯō’mərûn lə’îš yāḇêš gilə‘āḏ māḥār tihəyeh-lāḵem təšû‘â bəḥōm kəḥōm haššāmeš wayyāḇō’û hammalə’āḵîm wayyagîḏû lə’anəšê yāḇêš wayyiśəmāḥû:

10 wayyō’mərû ’anəšê yāḇêš māḥār nēṣē’ ’ălêḵem w^a‘ăśîṯem llānû kəḵāl-haṭṭwōḇ bə‘ênêḵem: s

11 wayəhî mimmāḥŏrāṯ wayyāśem šā’ûl ’eṯ-hā‘ām šəlōšâ rā’šîm wayyāḇō’û ḇəṯwōḵə-hamm^aḥăneh bə’ašəmōreṯ habōqer wayyakû ’eṯ-‘ammwōn ‘aḏ-ḥōm hayywōm wayəhî hannišə’ārîm wayyāfuṣû wəlō’ nišə’ărû-ḇām šənayim yāḥaḏ:

12 wayyō’mer hā‘ām ’el-šəmû’ēl mî hā’ōmēr šā’ûl yiməlōḵə ‘ālênû tənû hā’ănāšîm ûnəmîṯēm:

13 wayyō’mer šā’ûl lō’-yûmaṯ ’îš bayywōm hazzeh kî hayywōm ‘āśâ-yəhwâ təšû‘â bəyiśərā’ēl: s

14 wayyō’mer šəmû’ēl ’el-hā‘ām ləḵû wənēləḵâ hagiləgāl ûnəḥadēš šām hamməlûḵâ:

15 wayyēləḵû ḵāl-hā‘ām hagiləgāl wayyaməliḵû šām ’eṯ-šā’ûl lifənê yəhwâ bagiləgāl wayyizəbəḥû-šām zəḇāḥîm šəlāmîm lifənê yəhwâ wayyiśəm^aḥ šām šā’ûl wəḵāl-’anəšê yiśərā’ēl ‘aḏ-mə’ōḏ: f