Sacred Texts  Bible  Index 
Polyglot  KJV  Sep  Vul 

Ruth Index
  Previous  Next 

Tanach (Hebrew): Ruth Chapter 3

1 ‏וַתֹּ֥אמֶר לָ֖הּ נָעֳמִ֣י חֲמוֹתָ֑הּ בִּתִּ֞י הֲלֹ֧א אֲבַקֶּשׁ־לָ֛ךְ מָנ֖וֹחַ אֲשֶׁ֥ר יִֽיטַב־לָֽךְ׃

2 ‏וְעַתָּ֗ה הֲלֹ֥א בֹ֙עַז֙ מֹֽדַעְתָּ֔נוּ אֲשֶׁ֥ר הָיִ֖ית אֶת־נַעֲרוֹתָ֑יו הִנֵּה־ה֗וּא זֹרֶ֛ה אֶת־גֹּ֥רֶן הַשְּׂעֹרִ֖ים הַלָּֽיְלָה׃

3 ‏וְרָחַ֣צְתְּ׀ וָסַ֗כְתְּ וְשַׂ֧מְתְּ שמלתך שִׂמְלֹתַ֛יִךְ עָלַ֖יִךְ וירדתי וְיָרַ֣דְתְּ הַגֹּ֑רֶן אַל־תִּוָּדְעִ֣י לָאִ֔ישׁ עַ֥ד כַּלֹּת֖וֹ לֶאֱכֹ֥ל וְלִשְׁתּֽוֹת׃

4 ‏וִיהִ֣י בְשָׁכְב֗וֹ וְיָדַ֙עַתְּ֙ אֶת־הַמָּקוֹם֙ אֲשֶׁ֣ר יִשְׁכַּב־שָׁ֔ם וּבָ֛את וְגִלִּ֥ית מַרְגְּלֹתָ֖יו ושכבתי וְשָׁכָ֑בְתְּ וְהוּא֙ יַגִּ֣יד לָ֔ךְ אֵ֖ת אֲשֶׁ֥ר תַּעֲשִֽׂין׃

5 ‏וַתֹּ֖אמֶר אֵלֶ֑יהָ כֹּ֛ל אֲשֶׁר־תֹּאמְרִ֥י אֵלַ֖י אֶֽעֱשֶֽׂה׃

6 ‏וַתֵּ֖רֶד הַגֹּ֑רֶן וַתַּ֕עַשׂ כְּכֹ֥ל אֲשֶׁר־צִוַּ֖תָּה חֲמוֹתָֽהּ׃

7 ‏וַיֹּ֨אכַל בֹּ֤עַז וַיֵּשְׁתְּ֙ וַיִּיטַ֣ב לִבּ֔וֹ וַיָּבֹ֕א לִשְׁכַּ֖ב בִּקְצֵ֣ה הָעֲרֵמָ֑ה וַתָּבֹ֣א בַלָּ֔ט וַתְּגַ֥ל מַרְגְּלֹתָ֖יו וַתִּשְׁכָּֽב׃

8 ‏וַיְהִי֙ בַּחֲצִ֣י הַלַּ֔יְלָה וַיֶּחֱרַ֥ד הָאִ֖ישׁ וַיִּלָּפֵ֑ת וְהִנֵּ֣ה אִשָּׁ֔ה שֹׁכֶ֖בֶת מַרְגְּלֹתָֽיו׃

9 ‏וַיֹּ֖אמֶר מִי־אָ֑תּ1 וַתֹּ֗אמֶר אָנֹכִי֙ ר֣וּת אֲמָתֶ֔ךָ וּפָרַשְׂתָּ֤ כְנָפֶ֙ךָ֙ עַל־אֲמָ֣תְךָ֔ כִּ֥י גֹאֵ֖ל אָֽתָּה׃

10 ‏וַיֹּ֗אמֶר בְּרוּכָ֨ה אַ֤תְּ לַֽיהוָה֙ בִּתִּ֔י הֵיטַ֛בְתְּ חַסְדֵּ֥ךְ הָאַחֲר֖וֹן מִן־הָרִאשׁ֑וֹן לְבִלְתִּי־לֶ֗כֶת אַחֲרֵי֙ הַבַּ֣חוּרִ֔ים אִם־דַּ֖ל וְאִם־עָשִֽׁיר׃

11 ‏וְעַתָּ֗ה בִּתִּי֙ אַל־תִּ֣ירְאִ֔י כֹּ֥ל אֲשֶׁר־תֹּאמְרִ֖י אֶֽעֱשֶׂה־לָּ֑ךְ כִּ֤י יוֹדֵ֙עַ֙ כָּל־שַׁ֣עַר עַמִּ֔י כִּ֛י אֵ֥שֶׁת חַ֖יִל אָֽתְּ׃

12 ‏וְעַתָּה֙ כִּ֣י אָמְנָ֔ם כִּ֥י אם גֹאֵ֖ל אָנֹ֑כִי וְגַ֛ם יֵ֥שׁ גֹּאֵ֖ל קָר֥וֹב מִמֶּֽנִּי׃

13 ‏לִ֣ינִי׀ הַלַּ֗יְלָה וְהָיָ֤ה בַבֹּ֙קֶר֙ אִם־יִגְאָלֵ֥ךְ טוֹב֙ יִגְאָ֔ל וְאִם־לֹ֨א יַחְפֹּ֧ץ לְגָֽאֳלֵ֛ךְ וּגְאַלְתִּ֥יךְ אָנֹ֖כִי חַי־יְהוָ֑ה שִׁכְבִ֖י עַד־הַבֹּֽקֶר׃

14 ‏וַתִּשְׁכַּ֤ב מרגלתו מַרְגְּלוֹתָיו֙3 עַד־הַבֹּ֔קֶר וַתָּ֕קָם בטרום בְּטֶ֛רֶם יַכִּ֥יר אִ֖ישׁ אֶת־רֵעֵ֑הוּ וַיֹּ֙אמֶר֙ אַל־יִוָּדַ֔ע כִּי־בָ֥אָה הָאִשָּׁ֖ה הַגֹּֽרֶן׃

15 ‏וַיֹּ֗אמֶר הָ֠בִי הַמִּטְפַּ֧חַת אֲשֶׁר־עָלַ֛יִךְ וְאֶֽחֳזִי־בָ֖הּ וַתֹּ֣אחֶז בָּ֑הּ וַיָּ֤מָד שֵׁשׁ־שְׂעֹרִים֙ וַיָּ֣שֶׁת עָלֶ֔יהָ וַיָּבֹ֖א הָעִֽיר׃

16 ‏וַתָּבוֹא֙ אֶל־חֲמוֹתָ֔הּ וַתֹּ֖אמֶר מִי־אַ֣תְּ בִּתִּ֑י וַתַּ֨גֶּד־לָ֔הּ אֵ֛ת כָּל־אֲשֶׁ֥ר עָֽשָׂה־לָ֖הּ הָאִֽישׁ׃

17 ‏וַתֹּ֕אמֶר שֵׁשׁ־הַשְּׂעֹרִ֥ים הָאֵ֖לֶּה נָ֣תַן לִ֑י כִּ֚י אָמַ֣ר אֵלַ֔י אַל־תָּב֥וֹאִי רֵיקָ֖ם אֶל־חֲמוֹתֵֽךְ׃

18 ‏וַתֹּ֙אמֶר֙ שְׁבִ֣י בִתִּ֔י עַ֚ד אֲשֶׁ֣ר תֵּֽדְעִ֔ין אֵ֖יךְ יִפֹּ֣ל דָּבָ֑ר כִּ֣י לֹ֤א יִשְׁקֹט֙ הָאִ֔ישׁ כִּֽי־אִם־כִּלָּ֥ה הַדָּבָ֖ר הַיּֽוֹם׃

1 watō’mer lāh nā‘ŏmî ḥămwōṯāh bitî hălō’ ’ăḇaqqeš-lāḵə mānwōḥa ’ăšer yîṭaḇ-lāḵə:

2 wə‘atâ hălō’ ḇō‘az mōḏa‘ətānû ’ăšer hāyîṯ ’eṯ-na‘ărwōṯāyw hinnēh-hû’ zōreh ’eṯ-gōren haśśə‘ōrîm hallāyəlâ:

3 wərāḥaṣətə| wāsaḵətə wəśamətə śiməlōṯēḵə śiməlōṯayiḵə ‘ālayiḵə wəyāraḏətî wəyāraḏətə hagōren ’al-tiûāḏə‘î lā’îš ‘aḏ kallōṯwō le’ĕḵōl wəlišətwōṯ:

4 wîhî ḇəšāḵəḇwō wəyāḏa‘atə ’eṯ-hammāqwōm ’ăšer yišəkaḇ-šām ûḇā’ṯ wəḡillîṯ marəgəlōṯāyw wəšāḵāḇətî wəšāḵāḇətə wəhû’ yagîḏ lāḵə ’ēṯ ’ăšer ta‘ăśîn:

5 watō’mer ’ēleyhā kōl ’ăšer-tō’mərî ’ēlay ’e‘ĕśeh:

6 watēreḏ hagōren wata‘aś kəḵōl ’ăšer-ṣiûatâ ḥămwōṯāh:

7 wayyō’ḵal bō‘az wayyēšətə wayyîṭaḇ libwō wayyāḇō’ lišəkaḇ biqəṣēh hā‘ărēmâ watāḇō’ ḇallāṭ watəḡal marəgəlōṯāyw watišəkāḇ:

8 wayəhî baḥăṣî hallayəlâ wayyeḥĕraḏ hā’îš wayyillāfēṯ wəhinnēh ’iššâ šōḵeḇeṯ marəgəlōṯāyw:

9 wayyō’mer mî-’āt1 watō’mer ’ānōḵî rûṯ ’ămāṯeḵā ûfāraśətā ḵənāfeḵā ‘al-’ămāṯəḵā kî ḡō’ēl ’ātâ:

10 wayyō’mer bərûḵâ ’atə layhwâ bitî hêṭaḇətə ḥasədēḵə hā’aḥărwōn min-hāri’šwōn ləḇilətî-leḵeṯ ’aḥărê habaḥûrîm ’im-dal wə’im-‘āšîr:

11 wə‘atâ bitî ’al-tîrə’î kōl ’ăšer-tō’mərî ’e‘ĕśeh-llāḵə kî ywōḏē‘a kāl-ša‘ar ‘ammî kî ’ēšeṯ ḥayil ’ātə:

12 wə‘atâ kî ’āmənām kî ’im ḡō’ēl ’ānōḵî wəḡam yēš gō’ēl qārwōḇ mimmennî:

13 lînî| hallayəlâ wəhāyâ ḇabōqer ’im-yiḡə’ālēḵə ṭwōḇ yiḡə’āl wə’im-lō’ yaḥəpōṣ ləḡā’ŏlēḵə ûḡə’alətîḵə ’ānōḵî ḥay-yəhwâ šiḵəḇî ‘aḏ-habōqer:

14 watišəkaḇ marəgəlōṯāw marəgəlwōṯāyw3 ‘aḏ-habōqer watāqām biṭərwōm bəṭerem yakîr ’îš ’eṯ-rē‘ēhû wayyō’mer ’al-yiûāḏa‘ kî-ḇā’â hā’iššâ hagōren:

15 wayyō’mer hāḇî hammiṭəpaḥaṯ ’ăšer-‘ālayiḵə wə’eḥŏzî-ḇāh watō’ḥez bāh wayyāmāḏ šēš-śə‘ōrîm wayyāšeṯ ‘āleyhā wayyāḇō’ hā‘îr:

16 watāḇwō’ ’el-ḥămwōṯāh watō’mer mî-’atə bitî watageḏ-lāh ’ēṯ kāl-’ăšer ‘āśâ-lāh hā’îš:

17 watō’mer šēš-haśśə‘ōrîm hā’ēlleh nāṯan lî kî ’āmar ’ēlay ’al-tāḇwō’î rêqām ’el-ḥămwōṯēḵə:

18 watō’mer šəḇî ḇitî ‘aḏ ’ăšer tēḏə‘în ’êḵə yipōl dāḇār kî lō’ yišəqōṭ hā’îš kî-’im-killâ hadāḇār hayywōm:


Next: Ruth Chapter 4