Sacred Texts  Bible  Index 
Polyglot  KJV  Sep  Vul 

Numbers (Bemidbar) Index
  Previous  Next 

Tanach (Hebrew): Numbers (Bemidbar) Chapter 22

1 ‏וַיִּסְע֖וּ בְּנֵ֣י יִשְׂרָאֵ֑ל וַֽיַּחֲנוּ֙ בְּעַֽרְב֣וֹת מוֹאָ֔ב מֵעֵ֖בֶר לְיַרְדֵּ֥ן יְרֵחֽוֹ׃ ס

2 ‏וַיַּ֥רְא בָּלָ֖ק בֶּן־צִפּ֑וֹר אֵ֛ת כָּל־אֲשֶׁר־עָשָׂ֥ה יִשְׂרָאֵ֖ל לָֽאֱמֹרִֽי׃

3 ‏וַיָּ֨גָר מוֹאָ֜ב מִפְּנֵ֥י הָעָ֛ם מְאֹ֖ד כִּ֣י רַב־ה֑וּא וַיָּ֣קָץ מוֹאָ֔ב מִפְּנֵ֖י בְּנֵ֥י יִשְׂרָאֵֽל׃

4 ‏וַיֹּ֨אמֶר מוֹאָ֜ב אֶל־זִקְנֵ֣י מִדְיָ֗ן עַתָּ֞ה יְלַחֲכ֤וּ הַקָּהָל֙ אֶת־כָּל־סְבִ֣יבֹתֵ֔ינוּ כִּלְחֹ֣ךְ הַשּׁ֔וֹר אֵ֖ת יֶ֣רֶק הַשָּׂדֶ֑ה וּבָלָ֧ק בֶּן־צִפּ֛וֹר מֶ֥לֶךְ לְמוֹאָ֖ב בָּעֵ֥ת הַהִֽוא׃

5 ‏וַיִּשְׁלַ֨ח מַלְאָכִ֜ים אֶל־בִּלְעָ֣ם בֶּן־בְּע֗וֹר פְּ֠תוֹרָה אֲשֶׁ֧ר עַל־הַנָּהָ֛ר אֶ֥רֶץ בְּנֵי־עַמּ֖וֹ לִקְרֹא־ל֑וֹ לֵאמֹ֗ר הִ֠נֵּה עַ֣ם יָצָ֤א מִמִּצְרַ֙יִם֙ הִנֵּ֤ה כִסָּה֙ אֶת־עֵ֣ין הָאָ֔רֶץ וְה֥וּא יֹשֵׁ֖ב מִמֻּלִֽי׃

6 ‏וְעַתָּה֩ לְכָה־נָּ֨א אָֽרָה־לִּ֜י אֶת־הָעָ֣ם הַזֶּ֗ה כִּֽי־עָצ֥וּם הוּא֙ מִמֶּ֔נִּי אוּלַ֤י אוּכַל֙ נַכֶּה־בּ֔וֹ וַאֲגָרְשֶׁ֖נּוּ מִן־הָאָ֑רֶץ כִּ֣י יָדַ֗עְתִּי אֵ֤ת אֲשֶׁר־תְּבָרֵךְ֙ מְבֹרָ֔ךְ וַאֲשֶׁ֥ר תָּאֹ֖ר יוּאָֽר׃

7 ‏וַיֵּ֨לְכ֜וּ זִקְנֵ֤י מוֹאָב֙ וְזִקְנֵ֣י מִדְיָ֔ן וּקְסָמִ֖ים בְּיָדָ֑ם וַיָּבֹ֙אוּ֙ אֶל־בִּלְעָ֔ם וַיְדַבְּר֥וּ אֵלָ֖יו דִּבְרֵ֥י בָלָֽק׃

8 ‏וַיֹּ֣אמֶר אֲלֵיהֶ֗ם לִ֤ינוּ פֹה֙ הַלַּ֔יְלָה וַהֲשִׁבֹתִ֤י אֶתְכֶם֙ דָּבָ֔ר כַּאֲשֶׁ֛ר יְדַבֵּ֥ר יְהוָ֖ה אֵלָ֑י וַיֵּשְׁב֥וּ שָׂרֵֽי־מוֹאָ֖ב עִם־בִּלְעָֽם׃

9 ‏וַיָּבֹ֥א אֱלֹהִ֖ים אֶל־בִּלְעָ֑ם וַיֹּ֕אמֶר מִ֛י הָאֲנָשִׁ֥ים הָאֵ֖לֶּה עִמָּֽךְ׃

10 ‏וַיֹּ֥אמֶר בִּלְעָ֖ם אֶל־הָאֱלֹהִ֑ים בָּלָ֧ק בֶּן־צִפֹּ֛ר מֶ֥לֶךְ מוֹאָ֖ב שָׁלַ֥ח אֵלָֽי׃

11 ‏הִנֵּ֤ה הָעָם֙ הַיֹּצֵ֣א מִמִּצְרַ֔יִם וַיְכַ֖ס אֶת־עֵ֣ין הָאָ֑רֶץ עַתָּ֗ה לְכָ֤ה קָֽבָה־לִּי֙ אֹת֔וֹ אוּלַ֥י אוּכַ֛ל לְהִלָּ֥חֶם בּ֖וֹ וְגֵרַשְׁתִּֽיו׃

12 ‏וַיֹּ֤אמֶר אֱלֹהִים֙ אֶל־בִּלְעָ֔ם לֹ֥א תֵלֵ֖ךְ עִמָּהֶ֑ם לֹ֤א תָאֹר֙ אֶת־הָעָ֔ם כִּ֥י בָר֖וּךְ הֽוּא׃

13 ‏וַיָּ֤קָם בִּלְעָם֙ בַּבֹּ֔קֶר וַיֹּ֙אמֶר֙ אֶל־שָׂרֵ֣י בָלָ֔ק לְכ֖וּ אֶֽל־אַרְצְכֶ֑ם כִּ֚י מֵאֵ֣ן יְהוָ֔ה לְתִתִּ֖י לַהֲלֹ֥ךְ עִמָּכֶֽם׃

14 ‏וַיָּק֙וּמוּ֙ שָׂרֵ֣י מוֹאָ֔ב וַיָּבֹ֖אוּ אֶל־בָּלָ֑ק וַיֹּ֣אמְר֔וּ מֵאֵ֥ן בִּלְעָ֖ם הֲלֹ֥ךְ עִמָּֽנוּ׃

15 ‏וַיֹּ֥סֶף ע֖וֹד בָּלָ֑ק שְׁלֹ֣חַ שָׂרִ֔ים רַבִּ֥ים וְנִכְבָּדִ֖ים מֵאֵֽלֶּה׃

16 ‏וַיָּבֹ֖אוּ אֶל־בִּלְעָ֑ם וַיֹּ֣אמְרוּ ל֗וֹ כֹּ֤ה אָמַר֙ בָּלָ֣ק בֶּן־צִפּ֔וֹר אַל־נָ֥א תִמָּנַ֖ע מֵהֲלֹ֥ךְ אֵלָֽי׃

17 ‏כִּֽי־כַבֵּ֤ד אֲכַבֶּדְךָ֙ מְאֹ֔ד וְכֹ֛ל אֲשֶׁר־תֹּאמַ֥ר אֵלַ֖י אֶֽעֱשֶׂ֑ה וּלְכָה־נָּא֙ קָֽבָה־לִּ֔י אֵ֖ת הָעָ֥ם הַזֶּֽה׃

18 ‏וַיַּ֣עַן בִּלְעָ֗ם וַיֹּ֙אמֶר֙ אֶל־עַבְדֵ֣י בָלָ֔ק אִם־יִתֶּן־לִ֥י בָלָ֛ק מְלֹ֥א בֵית֖וֹ כֶּ֣סֶף וְזָהָ֑ב לֹ֣א אוּכַ֗ל לַעֲבֹר֙ אֶת־פִּי֙ יְהוָ֣ה אֱלֹהָ֔י לַעֲשׂ֥וֹת קְטַנָּ֖ה א֥וֹ גְדוֹלָֽה׃

19 ‏וְעַתָּ֗ה שְׁב֨וּ נָ֥א בָזֶ֛ה גַּם־אַתֶּ֖ם הַלָּ֑יְלָה וְאֵ֣דְעָ֔ה מַה־יֹּסֵ֥ף יְהוָ֖ה דַּבֵּ֥ר עִמִּֽי׃

20 ‏וַיָּבֹ֨א אֱלֹהִ֥ים׀ אֶל־בִּלְעָם֮ לַיְלָה֒ וַיֹּ֣אמֶר ל֗וֹ אִם־לִקְרֹ֤א לְךָ֙ בָּ֣אוּ הָאֲנָשִׁ֔ים ק֖וּם לֵ֣ךְ אִתָּ֑ם וְאַ֗ךְ אֶת־הַדָּבָ֛ר אֲשֶׁר־אֲדַבֵּ֥ר אֵלֶ֖יךָ אֹת֥וֹ תַעֲשֶֽׂה׃

21 ‏וַיָּ֤קָם בִּלְעָם֙ בַּבֹּ֔קֶר וַֽיַּחֲבֹ֖שׁ אֶת־אֲתֹנ֑וֹ וַיֵּ֖לֶךְ עִם־שָׂרֵ֥י מוֹאָֽב׃

22 ‏וַיִּֽחַר־אַ֣ף אֱלֹהִים֮ כִּֽי־הוֹלֵ֣ךְ הוּא֒ וַיִּתְיַצֵּ֞ב מַלְאַ֧ךְ יְהוָ֛ה בַּדֶּ֖רֶךְ לְשָׂטָ֣ן ל֑וֹ וְהוּא֙ רֹכֵ֣ב עַל־אֲתֹנ֔וֹ וּשְׁנֵ֥י נְעָרָ֖יו עִמּֽוֹ׃

23 ‏וַתֵּ֣רֶא הָאָתוֹן֩ אֶת־מַלְאַ֨ךְ יְהוָ֜ה נִצָּ֣ב בַּדֶּ֗רֶךְ וְחַרְבּ֤וֹ שְׁלוּפָה֙ בְּיָד֔וֹ וַתֵּ֤ט הָֽאָתוֹן֙ מִן־הַדֶּ֔רֶךְ וַתֵּ֖לֶךְ בַּשָּׂדֶ֑ה וַיַּ֤ךְ בִּלְעָם֙ אֶת־הָ֣אָת֔וֹן לְהַטֹּתָ֖הּ הַדָּֽרֶךְ׃

24 ‏וַֽיַּעֲמֹד֙ מַלְאַ֣ךְ יְהוָ֔ה בְּמִשְׁע֖וֹל הַכְּרָמִ֑ים גָּדֵ֥ר מִזֶּ֖ה וְגָדֵ֥ר מִזֶּֽה׃

25 ‏וַתֵּ֨רֶא הָאָת֜וֹן אֶת־מַלְאַ֣ךְ יְהוָ֗ה וַתִּלָּחֵץ֙ אֶל־הַקִּ֔יר וַתִּלְחַ֛ץ אֶת־רֶ֥גֶל בִּלְעָ֖ם אֶל־הַקִּ֑יר וַיֹּ֖סֶף לְהַכֹּתָֽהּ׃

26 ‏וַיּ֥וֹסֶף מַלְאַךְ־יְהוָ֖ה עֲב֑וֹר וַֽיַּעֲמֹד֙ בְּמָק֣וֹם צָ֔ר אֲשֶׁ֛ר אֵֽין־דֶּ֥רֶךְ לִנְט֖וֹת יָמִ֥ין וּשְׂמֹֽאול׃

27 ‏וַתֵּ֤רֶא הָֽאָתוֹן֙ אֶת־מַלְאַ֣ךְ יְהוָ֔ה וַתִּרְבַּ֖ץ תַּ֣חַת בִּלְעָ֑ם וַיִּֽחַר־אַ֣ף בִּלְעָ֔ם וַיַּ֥ךְ אֶת־הָאָת֖וֹן בַּמַּקֵּֽל׃

28 ‏וַיִּפְתַּ֥ח יְהוָ֖ה אֶת־פִּ֣י הָאָת֑וֹן וַתֹּ֤אמֶר לְבִלְעָם֙ מֶה־עָשִׂ֣יתִֽי לְךָ֔ כִּ֣י הִכִּיתַ֔נִי זֶ֖ה שָׁלֹ֥שׁ רְגָלִֽים׃

29 ‏וַיֹּ֤אמֶר בִּלְעָם֙ לָֽאָת֔וֹן כִּ֥י הִתְעַלַּ֖לְתְּ בִּ֑י ל֤וּ יֶשׁ־חֶ֙רֶב֙ בְּיָדִ֔י כִּ֥י עַתָּ֖ה הֲרַגְתִּֽיךְ׃

30 ‏וַתֹּ֨אמֶר הָאָת֜וֹן אֶל־בִּלְעָ֗ם הֲלוֹא֩ אָנֹכִ֨י אֲתֹֽנְךָ֜ אֲשֶׁר־רָכַ֣בְתָּ עָלַ֗י מֵעֽוֹדְךָ֙ עַד־הַיּ֣וֹם הַזֶּ֔ה הַֽהַסְכֵּ֣ן הִסְכַּ֔נְתִּי לַעֲשׂ֥וֹת לְךָ֖ כֹּ֑ה וַיֹּ֖אמֶר לֹֽא׃

31 ‏וַיְגַ֣ל יְהוָה֮ אֶת־עֵינֵ֣י בִלְעָם֒ וַיַּ֞רְא אֶת־מַלְאַ֤ךְ יְהוָה֙ נִצָּ֣ב בַּדֶּ֔רֶךְ וְחַרְבּ֥וֹ שְׁלֻפָ֖ה בְּיָד֑וֹ וַיִּקֹּ֥ד וַיִּשְׁתַּ֖חוּ לְאַפָּֽיו׃

32 ‏וַיֹּ֤אמֶר אֵלָיו֙ מַלְאַ֣ךְ יְהוָ֔ה עַל־מָ֗ה הִכִּ֙יתָ֙ אֶת־אֲתֹ֣נְךָ֔ זֶ֖ה שָׁל֣וֹשׁ רְגָלִ֑ים הִנֵּ֤ה אָנֹכִי֙ יָצָ֣אתִי לְשָׂטָ֔ן כִּֽי־יָרַ֥ט הַדֶּ֖רֶךְ לְנֶגְדִּֽי׃

33 ‏וַתִּרְאַ֙נִי֙ הָֽאָת֔וֹן וַתֵּ֣ט לְפָנַ֔י זֶ֖ה שָׁלֹ֣שׁ רְגָלִ֑ים אוּלַי֙ נָטְתָ֣ה מִפָּנַ֔י כִּ֥י עַתָּ֛ה גַּם־אֹתְכָ֥ה הָרַ֖גְתִּי וְאוֹתָ֥הּ הֶחֱיֵֽיתִי׃

34 ‏וַיֹּ֨אמֶר בִּלְעָ֜ם אֶל־מַלְאַ֤ךְ יְהוָה֙ חָטָ֔אתִי כִּ֚י לֹ֣א יָדַ֔עְתִּי כִּ֥י אַתָּ֛ה נִצָּ֥ב לִקְרָאתִ֖י בַּדָּ֑רֶךְ וְעַתָּ֛ה אִם־רַ֥ע בְּעֵינֶ֖יךָ אָשׁ֥וּבָה לִּֽי׃

35 ‏וַיֹּאמֶר֩ מַלְאַ֨ךְ יְהוָ֜ה אֶל־בִּלְעָ֗ם לֵ֚ךְ עִם־הָ֣אֲנָשִׁ֔ים וְאֶ֗פֶס אֶת־הַדָּבָ֛ר אֲשֶׁר־אֲדַבֵּ֥ר אֵלֶ֖יךָ אֹת֣וֹ תְדַבֵּ֑ר וַיֵּ֥לֶךְ בִּלְעָ֖ם עִם־שָׂרֵ֥י בָלָֽק׃

36 ‏וַיִּשְׁמַ֥ע בָּלָ֖ק כִּ֣י בָ֣א בִלְעָ֑ם וַיֵּצֵ֨א לִקְרָאת֜וֹ אֶל־עִ֣יר מוֹאָ֗ב אֲשֶׁר֙ עַל־גְּב֣וּל אַרְנֹ֔ן אֲשֶׁ֖ר בִּקְצֵ֥ה הַגְּבֽוּל׃

37 ‏וַיֹּ֨אמֶר בָּלָ֜ק אֶל־בִּלְעָ֗ם הֲלֹא֩ שָׁלֹ֨חַ שָׁלַ֤חְתִּי אֵלֶ֙יךָ֙ לִקְרֹא־לָ֔ךְ לָ֥מָּה לֹא־הָלַ֖כְתָּ אֵלָ֑י הַֽאֻמְנָ֔ם לֹ֥א אוּכַ֖ל כַּבְּדֶֽךָ׃

38 ‏וַיֹּ֨אמֶר בִּלְעָ֜ם אֶל־בָּלָ֗ק הִֽנֵּה־בָ֙אתִי֙ אֵלֶ֔יךָ עַתָּ֕ה הֲיָכ֥וֹל אוּכַ֖ל דַּבֵּ֣ר מְא֑וּמָה הַדָּבָ֗ר אֲשֶׁ֨ר יָשִׂ֧ים אֱלֹהִ֛ים בְּפִ֖י אֹת֥וֹ אֲדַבֵּֽר׃

39 ‏וַיֵּ֥לֶךְ בִּלְעָ֖ם עִם־בָּלָ֑ק וַיָּבֹ֖אוּ קִרְיַ֥ת חֻצֽוֹת׃

40 ‏וַיִּזְבַּ֥ח בָּלָ֖ק בָּקָ֣ר וָצֹ֑אן וַיְשַׁלַּ֣ח לְבִלְעָ֔ם וְלַשָּׂרִ֖ים אֲשֶׁ֥ר אִתּֽוֹ׃

41 ‏וַיְהִ֣י בַבֹּ֔קֶר וַיִּקַּ֤ח בָּלָק֙ אֶת־בִּלְעָ֔ם וַֽיַּעֲלֵ֖הוּ בָּמ֣וֹת בָּ֑עַל וַיַּ֥רְא מִשָּׁ֖ם קְצֵ֥ה הָעָֽם׃

1 wayyisə‘û bənê yiśərā’ēl wayyaḥănû bə‘arəḇwōṯ mwō’āḇ mē‘ēḇer ləyarədēn yərēḥwō: s

2 wayyarə’ bālāq ben-ṣipwōr ’ēṯ kāl-’ăšer-‘āśâ yiśərā’ēl lā’ĕmōrî:

3 wayyāḡār mwō’āḇ mipənê hā‘ām mə’ōḏ kî raḇ-hû’ wayyāqāṣ mwō’āḇ mipənê bənê yiśərā’ēl:

4 wayyō’mer mwō’āḇ ’el-ziqənê miḏəyān ‘atâ yəlaḥăḵû haqqâāl ’eṯ-kāl-səḇîḇōṯênû kiləḥōḵə haššwōr ’ēṯ yereq haśśāḏeh ûḇālāq ben-ṣipwōr meleḵə ləmwō’āḇ bā‘ēṯ hahiw’:

5 wayyišəlaḥ malə’āḵîm ’el-bilə‘ām ben-bə‘wōr pəṯwōrâ ’ăšer ‘al-hannâār ’ereṣ bənê-‘ammwō liqərō’-lwō lē’mōr hinnēh ‘am yāṣā’ mimmiṣərayim hinnēh ḵissâ ’eṯ-‘ên hā’āreṣ wəhû’ yōšēḇ mimmulî:

6 wə‘atâ ləḵâ-nnā’ ’ārâ-llî ’eṯ-hā‘ām hazzeh kî-‘āṣûm hû’ mimmennî ’ûlay ’ûḵal nakeh-bwō wa’ăḡārəšennû min-hā’āreṣ kî yāḏa‘ətî ’ēṯ ’ăšer-təḇārēḵə məḇōrāḵə wa’ăšer tā’ōr yû’ār:

7 wayyēləḵû ziqənê mwō’āḇ wəziqənê miḏəyān ûqəsāmîm bəyāḏām wayyāḇō’û ’el-bilə‘ām wayəḏabərû ’ēlāyw diḇərê ḇālāq:

8 wayyō’mer ’ălêhem lînû fōh hallayəlâ wahăšiḇōṯî ’eṯəḵem dāḇār ka’ăšer yəḏabēr yəhwâ ’ēlāy wayyēšəḇû śārê-mwō’āḇ ‘im-bilə‘ām:

9 wayyāḇō’ ’ĕlōhîm ’el-bilə‘ām wayyō’mer mî hā’ănāšîm hā’ēlleh ‘immāḵə:

10 wayyō’mer bilə‘ām ’el-hā’ĕlōhîm bālāq ben-ṣipōr meleḵə mwō’āḇ šālaḥ ’ēlāy:

11 hinnēh hā‘ām hayyōṣē’ mimmiṣərayim wayəḵas ’eṯ-‘ên hā’āreṣ ‘atâ ləḵâ qāḇâ-llî ’ōṯwō ’ûlay ’ûḵal ləhillāḥem bwō wəḡērašətîw:

12 wayyō’mer ’ĕlōhîm ’el-bilə‘ām lō’ ṯēlēḵə ‘immâem lō’ ṯā’ōr ’eṯ-hā‘ām kî ḇārûḵə hû’:

13 wayyāqām bilə‘ām babōqer wayyō’mer ’el-śārê ḇālāq ləḵû ’el-’arəṣəḵem kî mē’ēn yəhwâ ləṯitî lahălōḵə ‘immāḵem:

14 wayyāqûmû śārê mwō’āḇ wayyāḇō’û ’el-bālāq wayyō’mərû mē’ēn bilə‘ām hălōḵə ‘immānû:

15 wayyōsef ‘wōḏ bālāq šəlōḥa śārîm rabîm wəniḵəbāḏîm mē’ēlleh:

16 wayyāḇō’û ’el-bilə‘ām wayyō’mərû lwō kōh ’āmar bālāq ben-ṣipwōr ’al-nā’ ṯimmāna‘ mēhălōḵə ’ēlāy:

17 kî-ḵabēḏ ’ăḵabeḏəḵā mə’ōḏ wəḵōl ’ăšer-tō’mar ’ēlay ’e‘ĕśeh ûləḵâ-nnā’ qāḇâ-llî ’ēṯ hā‘ām hazzeh:

18 wayya‘an bilə‘ām wayyō’mer ’el-‘aḇəḏê ḇālāq ’im-yiten-lî ḇālāq məlō’ ḇêṯwō kesef wəzâāḇ lō’ ’ûḵal la‘ăḇōr ’eṯ-pî yəhwâ ’ĕlōhāy la‘ăśwōṯ qəṭannâ ’wō ḡəḏwōlâ:

19 wə‘atâ šəḇû nā’ ḇāzeh gam-’atem hallāyəlâ wə’ēḏə‘â mah-yyōsēf yəhwâ dabēr ‘immî:

20 wayyāḇō’ ’ĕlōhîm| ’el-bilə‘ām layəlâ wayyō’mer lwō ’im-liqərō’ ləḵā bā’û hā’ănāšîm qûm lēḵə ’itām wə’aḵə ’eṯ-hadāḇār ’ăšer-’ăḏabēr ’ēleyḵā ’ōṯwō ṯa‘ăśeh:

21 wayyāqām bilə‘ām babōqer wayyaḥăḇōš ’eṯ-’ăṯōnwō wayyēleḵə ‘im-śārê mwō’āḇ:

22 wayyiḥar-’af ’ĕlōhîm kî-hwōlēḵə hû’ wayyiṯəyaṣṣēḇ malə’aḵə yəhwâ badereḵə ləśāṭān lwō wəhû’ rōḵēḇ ‘al-’ăṯōnwō ûšənê nə‘ārāyw ‘immwō:

23 watēre’ hā’āṯwōn ’eṯ-malə’aḵə yəhwâ niṣṣāḇ badereḵə wəḥarəbwō šəlûfâ bəyāḏwō watēṭ hā’āṯwōn min-hadereḵə watēleḵə baśśāḏeh wayyaḵə bilə‘ām ’eṯ-hā’āṯwōn ləhaṭṭōṯāh hadāreḵə:

24 wayya‘ămōḏ malə’aḵə yəhwâ bəmišə‘wōl hakərāmîm gāḏēr mizzeh wəḡāḏēr mizzeh:

25 watēre’ hā’āṯwōn ’eṯ-malə’aḵə yəhwâ watillāḥēṣ ’el-haqqîr watiləḥaṣ ’eṯ-reḡel bilə‘ām ’el-haqqîr wayyōsef ləhakōṯāh:

26 wayywōsef malə’aḵə-yəhwâ ‘ăḇwōr wayya‘ămōḏ bəmāqwōm ṣār ’ăšer ’ên-dereḵə linəṭwōṯ yāmîn ûśəmō’wl:

27 watēre’ hā’āṯwōn ’eṯ-malə’aḵə yəhwâ watirəbaṣ taḥaṯ bilə‘ām wayyiḥar-’af bilə‘ām wayyaḵə ’eṯ-hā’āṯwōn bammaqqēl:

28 wayyifətaḥ yəhwâ ’eṯ-pî hā’āṯwōn watō’mer ləḇilə‘ām meh-‘āśîṯî ləḵā kî hikîṯanî zeh šālōš rəḡālîm:

29 wayyō’mer bilə‘ām lā’āṯwōn kî hiṯə‘allalətə bî lû yeš-ḥereḇ bəyāḏî kî ‘atâ hăraḡətîḵə:

30 watō’mer hā’āṯwōn ’el-bilə‘ām hălwō’ ’ānōḵî ’ăṯōnəḵā ’ăšer-rāḵaḇətā ‘ālay mē‘wōḏəḵā ‘aḏ-hayywōm hazzeh hahasəkēn hisəkanətî la‘ăśwōṯ ləḵā kōh wayyō’mer lō’:

31 wayəḡal yəhwâ ’eṯ-‘ênê ḇilə‘ām wayyarə’ ’eṯ-malə’aḵə yəhwâ niṣṣāḇ badereḵə wəḥarəbwō šəlufâ bəyāḏwō wayyiqqōḏ wayyišətaḥû lə’apāyw:

32 wayyō’mer ’ēlāyw malə’aḵə yəhwâ ‘al-mâ hikîṯā ’eṯ-’ăṯōnəḵā zeh šālwōš rəḡālîm hinnēh ’ānōḵî yāṣā’ṯî ləśāṭān kî-yāraṭ hadereḵə ləneḡədî:

33 watirə’anî hā’āṯwōn watēṭ ləfānay zeh šālōš rəḡālîm ’ûlay nāṭəṯâ mipānay kî ‘atâ gam-’ōṯəḵâ hāraḡətî wə’wōṯāh heḥĕyêṯî:

34 wayyō’mer bilə‘ām ’el-malə’aḵə yəhwâ ḥāṭā’ṯî kî lō’ yāḏa‘ətî kî ’atâ niṣṣāḇ liqərā’ṯî badāreḵə wə‘atâ ’im-ra‘ bə‘êneyḵā ’āšûḇâ llî:

35 wayyō’mer malə’aḵə yəhwâ ’el-bilə‘ām lēḵə ‘im-hā’ănāšîm wə’efes ’eṯ-hadāḇār ’ăšer-’ăḏabēr ’ēleyḵā ’ōṯwō ṯəḏabēr wayyēleḵə bilə‘ām ‘im-śārê ḇālāq:

36 wayyišəma‘ bālāq kî ḇā’ ḇilə‘ām wayyēṣē’ liqərā’ṯwō ’el-‘îr mwō’āḇ ’ăšer ‘al-gəḇûl ’arənōn ’ăšer biqəṣēh hagəḇûl:

37 wayyō’mer bālāq ’el-bilə‘ām hălō’ šālōḥa šālaḥətî ’ēleyḵā liqərō’-lāḵə lāmmâ lō’-hālaḵətā ’ēlāy ha’umənām lō’ ’ûḵal kabəḏeḵā:

38 wayyō’mer bilə‘ām ’el-bālāq hinnēh-ḇā’ṯî ’ēleyḵā ‘atâ hăyāḵwōl ’ûḵal dabēr mə’ûmâ hadāḇār ’ăšer yāśîm ’ĕlōhîm bəfî ’ōṯwō ’ăḏabēr:

39 wayyēleḵə bilə‘ām ‘im-bālāq wayyāḇō’û qirəyaṯ ḥuṣwōṯ:

40 wayyizəbaḥ bālāq bāqār wāṣō’n wayəšallaḥ ləḇilə‘ām wəlaśśārîm ’ăšer ’itwō:

41 wayəhî ḇabōqer wayyiqqaḥ bālāq ’eṯ-bilə‘ām wayya‘ălēhû bāmwōṯ bā‘al wayyarə’ miššām qəṣēh hā‘ām:


Next: Numbers (Bemidbar) Chapter 23