Sacred Texts  Bible  Index 
Polyglot  KJV  Sep  Vul 

Numbers (Bemidbar) Index
  Previous  Next 

Tanach (Hebrew): Numbers (Bemidbar) Chapter 9

1 ‏וַיְדַבֵּ֣ר יְהוָ֣ה אֶל־מֹשֶׁ֣ה בְמִדְבַּר־סִ֠ינַי בַּשָּׁנָ֨ה הַשֵּׁנִ֜ית לְצֵאתָ֨ם מֵאֶ֧רֶץ מִצְרַ֛יִם בַּחֹ֥דֶשׁ הָרִאשׁ֖וֹן לֵאמֹֽר׃

2 ‏וְיַעֲשׂ֧וּ בְנֵי־יִשְׂרָאֵ֛ל אֶת־הַפָּ֖סַח בְּמוֹעֲדֽוֹ׃

3 ‏בְּאַרְבָּעָ֣ה עָשָֽׂר־י֠וֹם בַּחֹ֨דֶשׁ הַזֶּ֜ה בֵּ֧ין הָֽעֲרְבַּ֛יִם1 תַּעֲשׂ֥וּ אֹת֖וֹ בְּמוֹעֲד֑וֹ כְּכָל־חֻקֹּתָ֥יו וּכְכָל־מִשְׁפָּטָ֖יו תַּעֲשׂ֥וּ אֹתֽוֹ׃

4 ‏וַיְדַבֵּ֥ר מֹשֶׁ֛ה אֶל־בְּנֵ֥י יִשְׂרָאֵ֖ל לַעֲשֹׂ֥ת הַפָּֽסַח׃

5 ‏וַיַּעֲשׂ֣וּ אֶת־הַפֶּ֡סַח בָּרִאשׁ֡וֹן בְּאַרְבָּעָה֩ עָשָׂ֨ר י֥וֹם לַחֹ֛דֶשׁ בֵּ֥ין הָעַרְבַּ֖יִם בְּמִדְבַּ֣ר סִינָ֑י כְּ֠כֹל אֲשֶׁ֨ר צִוָּ֤ה יְהוָה֙ אֶת־מֹשֶׁ֔ה כֵּ֥ן עָשׂ֖וּ בְּנֵ֥י יִשְׂרָאֵֽל׃

6 ‏וַיְהִ֣י אֲנָשִׁ֗ים אֲשֶׁ֨ר הָי֤וּ טְמֵאִים֙ לְנֶ֣פֶשׁ אָדָ֔ם וְלֹא־יָכְל֥וּ לַעֲשֹׂת־הַפֶּ֖סַח בַּיּ֣וֹם הַה֑וּא וַֽיִּקְרְב֞וּ לִפְנֵ֥י מֹשֶׁ֛ה וְלִפְנֵ֥י אַהֲרֹ֖ן בַּיּ֥וֹם הַהֽוּא׃

7 ‏וַ֠יֹּאמְרוּ הָאֲנָשִׁ֤ים הָהֵ֙מָּה֙ אֵלָ֔יו אֲנַ֥חְנוּ טְמֵאִ֖ים לְנֶ֣פֶשׁ אָדָ֑ם לָ֣מָּה נִגָּרַ֗ע לְבִלְתִּ֨י הַקְרִ֜ב אֶת־קָרְבַּ֤ן יְהוָה֙ בְּמֹ֣עֲד֔וֹ בְּת֖וֹךְ בְּנֵ֥י יִשְׂרָאֵֽל׃

8 ‏וַיֹּ֥אמֶר אֲלֵהֶ֖ם מֹשֶׁ֑ה עִמְד֣וּ וְאֶשְׁמְעָ֔ה מַה־יְצַוֶּ֥ה יְהוָ֖ה לָכֶֽם׃ פ

9 ‏וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר׃

10 ‏דַּבֵּ֛ר אֶל־בְּנֵ֥י יִשְׂרָאֵ֖ל לֵאמֹ֑ר אִ֣ישׁ אִ֣ישׁ כִּי־יִהְיֶֽה־טָמֵ֣א׀ לָנֶ֡פֶשׁ אוֹ֩ בְדֶ֨רֶךְ רְחֹקָ֜הׅ4 לָכֶ֗ם א֚וֹ לְדֹרֹ֣תֵיכֶ֔ם וְעָ֥שָׂה פֶ֖סַח לַיהוָֽה׃

11 ‏בַּחֹ֨דֶשׁ הַשֵּׁנִ֜י בְּאַרְבָּעָ֨ה עָשָׂ֥ר י֛וֹם בֵּ֥ין הָעַרְבַּ֖יִם יַעֲשׂ֣וּ אֹת֑וֹ עַל־מַצּ֥וֹת וּמְרֹרִ֖ים יֹאכְלֻֽהוּ׃

12 ‏לֹֽא־יַשְׁאִ֤ירוּ מִמֶּ֙נּוּ֙ עַד־בֹּ֔קֶר וְעֶ֖צֶם לֹ֣א יִשְׁבְּרוּ־ב֑וֹ כְּכָל־חֻקַּ֥ת הַפֶּ֖סַח יַעֲשׂ֥וּ אֹתֽוֹ׃

13 ‏וְהָאִישׁ֩ אֲשֶׁר־ה֨וּא טָה֜וֹר וּבְדֶ֣רֶךְ לֹא־הָיָ֗ה וְחָדַל֙ לַעֲשׂ֣וֹת הַפֶּ֔סַח וְנִכְרְתָ֛ה הַנֶּ֥פֶשׁ הַהִ֖וא מֵֽעַמֶּ֑יהָ כִּ֣י׀ קָרְבַּ֣ן יְהוָ֗ה לֹ֤א הִקְרִיב֙ בְּמֹ֣עֲד֔וֹ חֶטְא֥וֹ יִשָּׂ֖א הָאִ֥ישׁ הַהֽוּא׃

14 ‏וְכִֽי־יָג֨וּר אִתְּכֶ֜ם גֵּ֗ר וְעָ֤שָֽׂה פֶ֙סַח֙ לַֽיהוָ֔ה כְּחֻקַּ֥ת הַפֶּ֛סַח וּכְמִשְׁפָּט֖וֹ כֵּ֣ן יַעֲשֶׂ֑ה חֻקָּ֤ה אַחַת֙ יִהְיֶ֣ה לָכֶ֔ם וְלַגֵּ֖ר וּלְאֶזְרַ֥ח הָאָֽרֶץ׃ פ

15 ‏וּבְיוֹם֙ הָקִ֣ים אֶת־הַמִּשְׁכָּ֔ן כִּסָּ֤ה הֶֽעָנָן֙ אֶת־הַמִּשְׁכָּ֔ן לְאֹ֖הֶל הָעֵדֻ֑ת וּבָעֶ֜רֶב יִהְיֶ֧ה עַֽל־הַמִּשְׁכָּ֛ן כְּמַרְאֵה־אֵ֖שׁ עַד־בֹּֽקֶר׃

16 ‏כֵּ֚ן יִהְיֶ֣ה תָמִ֔יד הֶעָנָ֖ן יְכַסֶּ֑נּוּ וּמַרְאֵה־אֵ֖שׁ לָֽיְלָה׃

17 ‏וּלְפִ֞י הֵעָלֹ֤ת הֶֽעָנָן֙ מֵעַ֣ל הָאֹ֔הֶל וְאַ֣חֲרֵי־כֵ֔ן יִסְע֖וּ בְּנֵ֣י יִשְׂרָאֵ֑ל וּבִמְק֗וֹם אֲשֶׁ֤ר יִשְׁכָּן־שָׁם֙ הֶֽעָנָ֔ן שָׁ֥ם יַחֲנ֖וּ בְּנֵ֥י יִשְׂרָאֵֽל׃

18 ‏עַל־פִּ֣י יְהוָ֗ה יִסְעוּ֙ בְּנֵ֣י יִשְׂרָאֵ֔ל וְעַל־פִּ֥י יְהוָ֖ה יַחֲנ֑וּ כָּל־יְמֵ֗י אֲשֶׁ֨ר יִשְׁכֹּ֧ן הֶעָנָ֛ן עַל־הַמִּשְׁכָּ֖ן יַחֲנֽוּ׃

19 ‏וּבְהַאֲרִ֧יךְ הֶֽעָנָ֛ן עַל־הַמִּשְׁכָּ֖ן יָמִ֣ים רַבִּ֑ים וְשָׁמְר֧וּ בְנֵי־יִשְׂרָאֵ֛ל אֶת־מִשְׁמֶ֥רֶת יְהוָ֖ה וְלֹ֥א יִסָּֽעוּ׃

20 ‏וְיֵ֞שׁ אֲשֶׁ֨ר יִהְיֶ֧ה הֶֽעָנָ֛ן יָמִ֥ים מִסְפָּ֖ר עַל־הַמִּשְׁכָּ֑ן עַל־פִּ֤י יְהוָה֙ יַחֲנ֔וּ וְעַל־פִּ֥י יְהוָ֖ה יִסָּֽעוּ׃

21 ‏וְיֵ֞שׁ אֲשֶׁר־יִהְיֶ֤ה3 הֶֽעָנָן֙ מֵעֶ֣רֶב עַד־בֹּ֔קֶר וְנַעֲלָ֧ה הֶֽעָנָ֛ן בַּבֹּ֖קֶר וְנָסָ֑עוּ א֚וֹ יוֹמָ֣ם וָלַ֔יְלָה וְנַעֲלָ֥ה הֶעָנָ֖ן וְנָסָֽעוּ׃

22 ‏אֽוֹ־יֹמַ֜יִם אוֹ־חֹ֣דֶשׁ אוֹ־יָמִ֗ים בְּהַאֲרִ֨יךְ הֶעָנָ֤ן עַל־הַמִּשְׁכָּן֙ לִשְׁכֹּ֣ן עָלָ֔יו יַחֲנ֥וּ בְנֵֽי־יִשְׂרָאֵ֖ל וְלֹ֣א יִסָּ֑עוּ וּבְהֵעָלֹת֖וֹ יִסָּֽעוּ׃

23 ‏עַל־פִּ֤י יְהוָה֙ יַחֲנ֔וּ וְעַל־פִּ֥י יְהוָ֖ה יִסָּ֑עוּ אֶת־מִשְׁמֶ֤רֶת יְהוָה֙ שָׁמָ֔רוּ עַל־פִּ֥י יְהוָ֖ה בְּיַד־מֹשֶֽׁה׃ פ

1 wayəḏabēr yəhwâ ’el-mōšeh ḇəmiḏəbar-sînay baššānâ haššēnîṯ ləṣē’ṯām mē’ereṣ miṣərayim baḥōḏeš hāri’šwōn lē’mōr:

2 wəya‘ăśû ḇənê-yiśərā’ēl ’eṯ-hapāsaḥ bəmwō‘ăḏwō:

3 bə’arəbā‘â ‘āśār-ywōm baḥōḏeš hazzeh bên hā‘ărəbayim1 ta‘ăśû ’ōṯwō bəmwō‘ăḏwō kəḵāl-ḥuqqōṯāyw ûḵəḵāl-mišəpāṭāyw ta‘ăśû ’ōṯwō:

4 wayəḏabēr mōšeh ’el-bənê yiśərā’ēl la‘ăśōṯ hapāsaḥ:

5 wayya‘ăśû ’eṯ-hapesaḥ bāri’šwōn bə’arəbā‘â ‘āśār ywōm laḥōḏeš bên hā‘arəbayim bəmiḏəbar sînāy kəḵōl ’ăšer ṣiûâ yəhwâ ’eṯ-mōšeh kēn ‘āśû bənê yiśərā’ēl:

6 wayəhî ’ănāšîm ’ăšer hāyû ṭəmē’îm lənefeš ’āḏām wəlō’-yāḵəlû la‘ăśōṯ-hapesaḥ bayywōm hahû’ wayyiqərəḇû lifənê mōšeh wəlifənê ’ahărōn bayywōm hahû’:

7 wayyō’mərû hā’ănāšîm hâēmmâ ’ēlāyw ’ănaḥənû ṭəmē’îm lənefeš ’āḏām lāmmâ nigāra‘ ləḇilətî haqəriḇ ’eṯ-qārəban yəhwâ bəmō‘ăḏwō bəṯwōḵə bənê yiśərā’ēl:

8 wayyō’mer ’ălēhem mōšeh ‘iməḏû wə’ešəmə‘â mah-yəṣaûeh yəhwâ lāḵem: f

9 wayəḏabēr yəhwâ ’el-mōšeh llē’mōr:

10 dabēr ’el-bənê yiśərā’ēl lē’mōr ’îš ’îš kî-yihəyeh-ṭāmē’| lānefeš ’wō ḇəḏereḵə rəḥōqâׅ4 lāḵem ’wō ləḏōrōṯêḵem wə‘āśâ fesaḥ layhwâ:

11 baḥōḏeš haššēnî bə’arəbā‘â ‘āśār ywōm bên hā‘arəbayim ya‘ăśû ’ōṯwō ‘al-maṣṣwōṯ ûmərōrîm yō’ḵəluhû:

12 lō’-yašə’îrû mimmennû ‘aḏ-bōqer wə‘eṣem lō’ yišəbərû-ḇwō kəḵāl-ḥuqqaṯ hapesaḥ ya‘ăśû ’ōṯwō:

13 wəhā’îš ’ăšer-hû’ ṭâwōr ûḇəḏereḵə lō’-hāyâ wəḥāḏal la‘ăśwōṯ hapesaḥ wəniḵərəṯâ hannefeš hahiw’ mē‘ammeyhā kî| qārəban yəhwâ lō’ hiqərîḇ bəmō‘ăḏwō ḥeṭə’wō yiśśā’ hā’îš hahû’:

14 wəḵî-yāḡûr ’itəḵem gēr wə‘āśâ fesaḥ layhwâ kəḥuqqaṯ hapesaḥ ûḵəmišəpāṭwō kēn ya‘ăśeh ḥuqqâ ’aḥaṯ yihəyeh lāḵem wəlagēr ûlə’ezəraḥ hā’āreṣ: f

15 ûḇəywōm hāqîm ’eṯ-hammišəkān kissâ he‘ānān ’eṯ-hammišəkān lə’ōhel hā‘ēḏuṯ ûḇā‘ereḇ yihəyeh ‘al-hammišəkān kəmarə’ēh-’ēš ‘aḏ-bōqer:

16 kēn yihəyeh ṯāmîḏ he‘ānān yəḵassennû ûmarə’ēh-’ēš lāyəlâ:

17 ûləfî hē‘ālōṯ he‘ānān mē‘al hā’ōhel wə’aḥărê-ḵēn yisə‘û bənê yiśərā’ēl ûḇiməqwōm ’ăšer yišəkān-šām he‘ānān šām yaḥănû bənê yiśərā’ēl:

18 ‘al-pî yəhwâ yisə‘û bənê yiśərā’ēl wə‘al-pî yəhwâ yaḥănû kāl-yəmê ’ăšer yišəkōn he‘ānān ‘al-hammišəkān yaḥănû:

19 ûḇəha’ărîḵə he‘ānān ‘al-hammišəkān yāmîm rabîm wəšāmərû ḇənê-yiśərā’ēl ’eṯ-mišəmereṯ yəhwâ wəlō’ yissā‘û:

20 wəyēš ’ăšer yihəyeh he‘ānān yāmîm misəpār ‘al-hammišəkān ‘al-pî yəhwâ yaḥănû wə‘al-pî yəhwâ yissā‘û:

21 wəyēš ’ăšer-yihəyeh3 he‘ānān mē‘ereḇ ‘aḏ-bōqer wəna‘ălâ he‘ānān babōqer wənāsā‘û ’wō ywōmām wālayəlâ wəna‘ălâ he‘ānān wənāsā‘û:

22 ’wō-yōmayim ’wō-ḥōḏeš ’wō-yāmîm bəha’ărîḵə he‘ānān ‘al-hammišəkān lišəkōn ‘ālāyw yaḥănû ḇənê-yiśərā’ēl wəlō’ yissā‘û ûḇəhē‘ālōṯwō yissā‘û:

23 ‘al-pî yəhwâ yaḥănû wə‘al-pî yəhwâ yissā‘û ’eṯ-mišəmereṯ yəhwâ šāmārû ‘al-pî yəhwâ bəyaḏ-mōšeh: f


Next: Numbers (Bemidbar) Chapter 10