Sacred Texts  Bible  Index 
Polyglot  KJV  Sep  Vul 

Leviticus (Vayikra) Index
  Previous  Next 

Tanach (Hebrew): Leviticus (Vayikra) Chapter 24

1 ‏וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר׃

2 ‏צַ֞ו אֶת־בְּנֵ֣י יִשְׂרָאֵ֗ל וְיִקְח֨וּ אֵלֶ֜יךָ שֶׁ֣מֶן זַ֥יִת זָ֛ךְ כָּתִ֖ית לַמָּא֑וֹר לְהַעֲלֹ֥ת נֵ֖ר תָּמִֽיד׃

3 ‏מִחוּץ֩ לְפָרֹ֨כֶת הָעֵדֻ֜ת בְּאֹ֣הֶל מוֹעֵ֗ד יַעֲרֹךְ֩ אֹת֨וֹ אַהֲרֹ֜ן מֵעֶ֧רֶב עַד־בֹּ֛קֶר לִפְנֵ֥י יְהוָ֖ה תָּמִ֑יד חֻקַּ֥ת עוֹלָ֖ם לְדֹרֹֽתֵיכֶֽם׃

4 ‏עַ֚ל הַמְּנֹרָ֣ה הַטְּהֹרָ֔ה יַעֲרֹ֖ךְ אֶת־הַנֵּר֑וֹת לִפְנֵ֥י יְהוָ֖ה תָּמִֽיד׃ פ

5 ‏וְלָקַחְתָּ֣ סֹ֔לֶת וְאָפִיתָ֣ אֹתָ֔הּ שְׁתֵּ֥ים עֶשְׂרֵ֖ה חַלּ֑וֹת שְׁנֵי֙ עֶשְׂרֹנִ֔ים יִהְיֶ֖ה הַֽחַלָּ֥ה הָאֶחָֽת׃

6 ‏וְשַׂמְתָּ֥ אוֹתָ֛ם שְׁתַּ֥יִם מַֽעֲרָכ֖וֹת שֵׁ֣שׁ הַֽמַּעֲרָ֑כֶת עַ֛ל הַשֻּׁלְחָ֥ן הַטָּהֹ֖ר לִפְנֵ֥י יְהוָֽה׃

7 ‏וְנָתַתָּ֥ עַל־הַֽמַּעֲרֶ֖כֶת לְבֹנָ֣ה זַכָּ֑ה וְהָיְתָ֤ה לַלֶּ֙חֶם֙ לְאַזְכָּרָ֔ה אִשֶּׁ֖ה לַֽיהוָֽה׃

8 ‏בְּי֨וֹם הַשַּׁבָּ֜ת בְּי֣וֹם הַשַּׁבָּ֗ת יַֽעַרְכֶ֛נּוּ לִפְנֵ֥י יְהוָ֖ה תָּמִ֑יד מֵאֵ֥ת בְּנֵֽי־יִשְׂרָאֵ֖ל בְּרִ֥ית עוֹלָֽם׃

9 ‏וְהָֽיְתָה֙ לְאַהֲרֹ֣ן וּלְבָנָ֔יו וַאֲכָלֻ֖הוּ בְּמָק֣וֹם קָדֹ֑שׁ כִּ֡י קֹדֶשׁ֩ קָֽדָשִׁ֨ים ה֥וּא ל֛וֹ מֵאִשֵּׁ֥י יְהוָ֖ה חָק־עוֹלָֽם׃ ס

10 ‏וַיֵּצֵא֙ בֶּן־אִשָּׁ֣ה יִשְׂרְאֵלִ֔ית וְהוּא֙ בֶּן־אִ֣ישׁ מִצְרִ֔י בְּת֖וֹךְ בְּנֵ֣י יִשְׂרָאֵ֑ל וַיִּנָּצוּ֙ בַּֽמַּחֲנֶ֔ה בֶּ֚ן הַיִּשְׂרְאֵלִ֔ית וְאִ֖ישׁ הַיִּשְׂרְאֵלִֽי׃

11 ‏וַ֠יִּקֹּב בֶּן־הָֽאִשָּׁ֨ה הַיִּשְׂרְאֵלִ֤ית אֶת־הַשֵּׁם֙ וַיְקַלֵּ֔ל וַיָּבִ֥יאוּ אֹת֖וֹ אֶל־מֹשֶׁ֑ה וְשֵׁ֥ם אִמּ֛וֹ שְׁלֹמִ֥ית בַּת־דִּבְרִ֖י לְמַטֵּה־דָֽן׃

12 ‏וַיַּנִּיחֻ֖הוּ בַּמִּשְׁמָ֑ר לִפְרֹ֥שׁ לָהֶ֖ם עַל־פִּ֥י יְהוָֽה׃ פ

13 ‏וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר׃

14 ‏הוֹצֵ֣א אֶת־הַֽמְקַלֵּ֗ל אֶל־מִחוּץ֙ לַֽמַּחֲנֶ֔ה וְסָמְכ֧וּ כָֽל־הַשֹּׁמְעִ֛ים אֶת־יְדֵיהֶ֖ם עַל־רֹאשׁ֑וֹ וְרָגְמ֥וּ אֹת֖וֹ כָּל־הָעֵדָֽה׃

15 ‏וְאֶל־בְּנֵ֥י יִשְׂרָאֵ֖ל תְּדַבֵּ֣ר לֵאמֹ֑ר אִ֥ישׁ אִ֛ישׁ כִּֽי־יְקַלֵּ֥ל אֱלֹהָ֖יו וְנָשָׂ֥א חֶטְאֽוֹ׃

16 ‏וְנֹקֵ֤ב שֵׁם־יְהוָה֙ מ֣וֹת יוּמָ֔ת רָג֥וֹם יִרְגְּמוּ־ב֖וֹ כָּל־הָעֵדָ֑ה כַּגֵּר֙ כָּֽאֶזְרָ֔ח בְּנָקְבוֹ־שֵׁ֖ם יוּמָֽת׃

17 ‏וְאִ֕ישׁ כִּ֥י יַכֶּ֖ה כָּל־נֶ֣פֶשׁ אָדָ֑ם מ֖וֹת יוּמָֽת׃

18 ‏וּמַכֵּ֥ה נֶֽפֶשׁ־בְּהֵמָ֖ה יְשַׁלְּמֶ֑נָּה נֶ֖פֶשׁ תַּ֥חַת נָֽפֶשׁ׃

19 ‏וְאִ֕ישׁ כִּֽי־יִתֵּ֥ן מ֖וּם בַּעֲמִית֑וֹ כַּאֲשֶׁ֣ר עָשָׂ֔ה כֵּ֖ן יֵעָ֥שֶׂה לּֽוֹ׃

20 ‏שֶׁ֚בֶר תַּ֣חַת שֶׁ֔בֶר עַ֚יִן תַּ֣חַת עַ֔יִן שֵׁ֖ן תַּ֣חַת שֵׁ֑ן כַּאֲשֶׁ֨ר יִתֵּ֥ן מוּם֙ בָּֽאָדָ֔ם כֵּ֖ן יִנָּ֥תֶן בּֽוֹ׃

21 ‏וּמַכֵּ֥ה בְהֵמָ֖ה יְשַׁלְּמֶ֑נָּה וּמַכֵּ֥ה אָדָ֖ם יוּמָֽת׃

22 ‏מִשְׁפַּ֤ט אֶחָד֙ יִהְיֶ֣ה לָכֶ֔ם כַּגֵּ֥ר כָּאֶזְרָ֖ח יִהְיֶ֑ה כִּ֛י אֲנִ֥י יְהוָ֖ה אֱלֹהֵיכֶֽם׃

23 ‏וַיְדַבֵּ֣ר מֹשֶׁה֮ אֶל־בְּנֵ֣י יִשְׂרָאֵל֒ וַיּוֹצִ֣יאוּ אֶת־הַֽמְקַלֵּ֗ל אֶל־מִחוּץ֙ לַֽמַּחֲנֶ֔ה וַיִּרְגְּמ֥וּ אֹת֖וֹ אָ֑בֶן וּבְנֵֽי־יִשְׂרָאֵ֣ל עָשׂ֔וּ כַּֽאֲשֶׁ֛ר צִוָּ֥ה יְהוָ֖ה אֶת־מֹשֶֽׁה׃ פ

1 wayəḏabēr yəhwâ ’el-mōšeh llē’mōr:

2 ṣaw ’eṯ-bənê yiśərā’ēl wəyiqəḥû ’ēleyḵā šemen zayiṯ zāḵə kāṯîṯ lammā’wōr ləha‘ălōṯ nēr tāmîḏ:

3 miḥûṣ ləfārōḵeṯ hā‘ēḏuṯ bə’ōhel mwō‘ēḏ ya‘ărōḵə ’ōṯwō ’ahărōn mē‘ereḇ ‘aḏ-bōqer lifənê yəhwâ tāmîḏ ḥuqqaṯ ‘wōlām ləḏōrōṯêḵem:

4 ‘al hammənōrâ haṭṭəhōrâ ya‘ărōḵə ’eṯ-hannērwōṯ lifənê yəhwâ tāmîḏ: f

5 wəlāqaḥətā sōleṯ wə’āfîṯā ’ōṯāh šətêm ‘eśərēh ḥallwōṯ šənê ‘eśərōnîm yihəyeh haḥallâ hā’eḥāṯ:

6 wəśamətā ’wōṯām šətayim ma‘ărāḵwōṯ šēš hamma‘ărāḵeṯ ‘al haššuləḥān haṭṭâōr lifənê yəhwâ:

7 wənāṯatā ‘al-hamma‘ăreḵeṯ ləḇōnâ zakâ wəhāyəṯâ lalleḥem lə’azəkārâ ’iššeh layhwâ:

8 bəywōm haššabāṯ bəywōm haššabāṯ ya‘arəḵennû lifənê yəhwâ tāmîḏ mē’ēṯ bənê-yiśərā’ēl bərîṯ ‘wōlām:

9 wəhāyəṯâ lə’ahărōn ûləḇānāyw wa’ăḵāluhû bəmāqwōm qāḏōš kî qōḏeš qāḏāšîm hû’ lwō mē’iššê yəhwâ ḥāq-‘wōlām: s

10 wayyēṣē’ ben-’iššâ yiśərə’ēlîṯ wəhû’ ben-’îš miṣərî bəṯwōḵə bənê yiśərā’ēl wayyinnāṣû bammaḥăneh ben hayyiśərə’ēlîṯ wə’îš hayyiśərə’ēlî:

11 wayyiqqōḇ ben-hā’iššâ hayyiśərə’ēlîṯ ’eṯ-haššēm wayəqallēl wayyāḇî’û ’ōṯwō ’el-mōšeh wəšēm ’immwō šəlōmîṯ baṯ-diḇərî ləmaṭṭēh-ḏān:

12 wayyannîḥuhû bammišəmār lifərōš lâem ‘al-pî yəhwâ: f

13 wayəḏabēr yəhwâ ’el-mōšeh llē’mōr:

14 hwōṣē’ ’eṯ-haməqallēl ’el-miḥûṣ lammaḥăneh wəsāməḵû ḵāl-haššōmə‘îm ’eṯ-yəḏêhem ‘al-rō’šwō wərāḡəmû ’ōṯwō kāl-hā‘ēḏâ:

15 wə’el-bənê yiśərā’ēl təḏabēr lē’mōr ’îš ’îš kî-yəqallēl ’ĕlōhāyw wənāśā’ ḥeṭə’wō:

16 wənōqēḇ šēm-yəhwâ mwōṯ yûmāṯ rāḡwōm yirəgəmû-ḇwō kāl-hā‘ēḏâ kagēr kā’ezərāḥ bənāqəḇwō-šēm yûmāṯ:

17 wə’îš kî yakeh kāl-nefeš ’āḏām mwōṯ yûmāṯ:

18 ûmakēh nefeš-bəhēmâ yəšalləmennâ nefeš taḥaṯ nāfeš:

19 wə’îš kî-yitēn mûm ba‘ămîṯwō ka’ăšer ‘āśâ kēn yē‘āśeh llwō:

20 šeḇer taḥaṯ šeḇer ‘ayin taḥaṯ ‘ayin šēn taḥaṯ šēn ka’ăšer yitēn mûm bā’āḏām kēn yinnāṯen bwō:

21 ûmakēh ḇəhēmâ yəšalləmennâ ûmakēh ’āḏām yûmāṯ:

22 mišəpaṭ ’eḥāḏ yihəyeh lāḵem kagēr kā’ezərāḥ yihəyeh kî ’ănî yəhwâ ’ĕlōhêḵem:

23 wayəḏabēr mōšeh ’el-bənê yiśərā’ēl wayywōṣî’û ’eṯ-haməqallēl ’el-miḥûṣ lammaḥăneh wayyirəgəmû ’ōṯwō ’āḇen ûḇənê-yiśərā’ēl ‘āśû ka’ăšer ṣiûâ yəhwâ ’eṯ-mōšeh: f


Next: Leviticus (Vayikra) Chapter 25