Sacred Texts  Bible  Index 
Polyglot  KJV  Sep  Vul 

Leviticus (Vayikra) Index
  Previous  Next 

Tanach (Hebrew): Leviticus (Vayikra) Chapter 9

1 ‏וַיְהִי֙ בַּיּ֣וֹם הַשְּׁמִינִ֔י קָרָ֣א מֹשֶׁ֔ה לְאַהֲרֹ֖ן וּלְבָנָ֑יו וּלְזִקְנֵ֖י יִשְׂרָאֵֽל׃

2 ‏וַיֹּ֣אמֶר אֶֽל־אַהֲרֹ֗ן קַח־לְ֠ךָ עֵ֣גֶל בֶּן־בָּקָ֧ר לְחַטָּ֛את וְאַ֥יִל לְעֹלָ֖ה תְּמִימִ֑ם וְהַקְרֵ֖ב לִפְנֵ֥י יְהוָֽה׃

3 ‏וְאֶל־בְּנֵ֥י יִשְׂרָאֵ֖ל תְּדַבֵּ֣ר לֵאמֹ֑ר קְח֤וּ שְׂעִיר־עִזִּים֙ לְחַטָּ֔את וְעֵ֨גֶל וָכֶ֧בֶשׂ בְּנֵי־שָׁנָ֛ה תְּמִימִ֖ם לְעֹלָֽה׃

4 ‏וְשׁ֨וֹר וָאַ֜יִל לִשְׁלָמִ֗ים לִזְבֹּ֙חַ֙ לִפְנֵ֣י יְהוָ֔ה וּמִנְחָ֖ה בְּלוּלָ֣ה בַשָּׁ֑מֶן כִּ֣י הַיּ֔וֹם יְהוָ֖ה נִרְאָ֥ה אֲלֵיכֶֽם׃

5 ‏וַיִּקְח֗וּ אֵ֚ת אֲשֶׁ֣ר צִוָּ֣ה מֹשֶׁ֔ה אֶל־פְּנֵ֖י אֹ֣הֶל מוֹעֵ֑ד וַֽיִּקְרְבוּ֙ כָּל־הָ֣עֵדָ֔ה וַיַּֽעַמְד֖וּ לִפְנֵ֥י יְהוָֽה׃

6 ‏וַיֹּ֣אמֶר מֹשֶׁ֔ה זֶ֧ה הַדָּבָ֛ר אֲשֶׁר־צִוָּ֥ה יְהוָ֖ה תַּעֲשׂ֑וּ וְיֵרָ֥א אֲלֵיכֶ֖ם כְּב֥וֹד יְהוָֽה׃

7 ‏וַיֹּ֨אמֶר מֹשֶׁ֜ה אֶֽל־אַהֲרֹ֗ן קְרַ֤ב אֶל־הַמִּזְבֵּ֙חַ֙ וַעֲשֵׂ֞ה אֶת־חַטָּֽאתְךָ֙ וְאֶת־עֹ֣לָתֶ֔ךָ וְכַפֵּ֥ר בַּֽעַדְךָ֖ וּבְעַ֣ד הָעָ֑ם וַעֲשֵׂ֞ה אֶת־קָרְבַּ֤ן הָעָם֙ וְכַפֵּ֣ר בַּֽעֲדָ֔ם כַּאֲשֶׁ֖ר צִוָּ֥ה יְהוָֽה׃

8 ‏וַיִּקְרַ֥ב אַהֲרֹ֖ן אֶל־הַמִּזְבֵּ֑חַ וַיִּשְׁחַ֛ט אֶת־עֵ֥גֶל הַחַטָּ֖את אֲשֶׁר־לֽוֹ׃

9 ‏וַ֠יַּקְרִבוּ בְּנֵ֨י אַהֲרֹ֣ן אֶת־הַדָּם֮ אֵלָיו֒ וַיִּטְבֹּ֤ל אֶצְבָּעוֹ֙ בַּדָּ֔ם וַיִּתֵּ֖ן עַל־קַרְנ֣וֹת הַמִּזְבֵּ֑חַ וְאֶת־הַדָּ֣ם יָצַ֔ק אֶל־יְס֖וֹד הַמִּזְבֵּֽחַ׃

10 ‏וְאֶת־הַחֵ֨לֶב וְאֶת־הַכְּלָיֹ֜ת וְאֶת־הַיֹּתֶ֤רֶת מִן־הַכָּבֵד֙ מִן־הַ֣חַטָּ֔את הִקְטִ֖יר הַמִּזְבֵּ֑חָה כַּאֲשֶׁ֛ר צִוָּ֥ה יְהוָ֖ה אֶת־מֹשֶֽׁה׃

11 ‏וְאֶת־הַבָּשָׂ֖ר וְאֶת־הָע֑וֹר שָׂרַ֣ף בָּאֵ֔שׁ מִח֖וּץ לַֽמַּחֲנֶֽה׃

12 ‏וַיִּשְׁחַ֖ט אֶת־הָעֹלָ֑ה וַ֠יַּמְצִאוּ בְּנֵ֨י אַהֲרֹ֤ן אֵלָיו֙ אֶת־הַדָּ֔ם וַיִּזְרְקֵ֥הוּ עַל־הַמִּזְבֵּ֖חַ סָבִֽיב׃

13 ‏וְאֶת־הָעֹלָ֗ה הִמְצִ֧יאוּ אֵלָ֛יו לִנְתָחֶ֖יהָ וְאֶת־הָרֹ֑אשׁ וַיַּקְטֵ֖ר עַל־הַמִּזְבֵּֽחַ׃

14 ‏וַיִּרְחַ֥ץ אֶת־הַקֶּ֖רֶב וְאֶת־הַכְּרָעָ֑יִם וַיַּקְטֵ֥ר עַל־הָעֹלָ֖ה הַמִּזְבֵּֽחָה׃

15 ‏וַיַּקְרֵ֕ב אֵ֖ת קָרְבַּ֣ן הָעָ֑ם וַיִּקַּ֞ח אֶת־שְׂעִ֤יר הַֽחַטָּאת֙ אֲשֶׁ֣ר לָעָ֔ם וַיִּשְׁחָטֵ֥הוּ וַֽיְחַטְּאֵ֖הוּ כָּרִאשֽׁוֹן׃

16 ‏וַיַּקְרֵ֖ב אֶת־הָעֹלָ֑ה וַֽיַּעֲשֶׂ֖הָ כַּמִּשְׁפָּֽט׃

17 ‏וַיַּקְרֵב֮ אֶת־הַמִּנְחָה֒ וַיְמַלֵּ֤א כַפּוֹ֙ מִמֶּ֔נָּה וַיַּקְטֵ֖ר עַל־הַמִּזְבֵּ֑חַ מִלְּבַ֖ד עֹלַ֥ת הַבֹּֽקֶר׃

18 ‏וַיִּשְׁחַ֤ט אֶת־הַשּׁוֹר֙ וְאֶת־הָאַ֔יִל זֶ֥בַח הַשְּׁלָמִ֖ים אֲשֶׁ֣ר לָעָ֑ם וַ֠יַּמְצִאוּ בְּנֵ֨י אַהֲרֹ֤ן אֶת־הַדָּם֙ אֵלָ֔יו וַיִּזְרְקֵ֥הוּ עַל־הַמִּזְבֵּ֖חַ סָבִֽיב׃

19 ‏וְאֶת־הַחֲלָבִ֖ים מִן־הַשּׁ֑וֹר וּמִן־הָאַ֔יִל הָֽאַלְיָ֤ה וְהַֽמְכַסֶּה֙ וְהַכְּלָיֹ֔ת וְיֹתֶ֖רֶת הַכָּבֵֽד׃

20 ‏וַיָּשִׂ֥ימוּ אֶת־הַחֲלָבִ֖ים עַל־הֶחָז֑וֹת וַיַּקְטֵ֥ר הַחֲלָבִ֖ים הַמִּזְבֵּֽחָה׃

21 ‏וְאֵ֣ת הֶחָז֗וֹת וְאֵת֙ שׁ֣וֹק הַיָּמִ֔ין הֵנִ֧יף אַהֲרֹ֛ן תְּנוּפָ֖ה לִפְנֵ֣י יְהוָ֑ה כַּאֲשֶׁ֖ר צִוָּ֥ה מֹשֶֽׁה׃

22 ‏וַיִּשָּׂ֨א אַהֲרֹ֧ן אֶת־ידו יָדָ֛יו אֶל־הָעָ֖ם וַֽיְבָרְכֵ֑ם וַיֵּ֗רֶד מֵעֲשֹׂ֧ת הַֽחַטָּ֛את וְהָעֹלָ֖ה וְהַשְּׁלָמִֽים׃

23 ‏וַיָּבֹ֨א מֹשֶׁ֤ה וְאַהֲרֹן֙ אֶל־אֹ֣הֶל מוֹעֵ֔ד וַיֵּ֣צְא֔וּ וַֽיְבָרֲכ֖וּ אֶת־הָעָ֑ם וַיֵּרָ֥א כְבוֹד־יְהוָ֖ה אֶל־כָּל־הָעָֽם׃

24 ‏וַתֵּ֤צֵא אֵשׁ֙ מִלִּפְנֵ֣י יְהוָ֔ה וַתֹּ֙אכַל֙ עַל־הַמִּזְבֵּ֔חַ אֶת־הָעֹלָ֖ה וְאֶת־הַחֲלָבִ֑ים וַיַּ֤רְא כָּל־הָעָם֙ וַיָּרֹ֔נּוּ וַֽיִּפְּל֖וּ עַל־פְּנֵיהֶֽם׃

1 wayəhî bayywōm haššəmînî qārā’ mōšeh lə’ahărōn ûləḇānāyw ûləziqənê yiśərā’ēl:

2 wayyō’mer ’el-’ahărōn qaḥ-ləḵā ‘ēḡel ben-bāqār ləḥaṭṭā’ṯ wə’ayil lə‘ōlâ təmîmim wəhaqərēḇ lifənê yəhwâ:

3 wə’el-bənê yiśərā’ēl təḏabēr lē’mōr qəḥû śə‘îr-‘izzîm ləḥaṭṭā’ṯ wə‘ēḡel wāḵeḇeś bənê-šānâ təmîmim lə‘ōlâ:

4 wəšwōr wā’ayil lišəlāmîm lizəbōḥa lifənê yəhwâ ûminəḥâ bəlûlâ ḇaššāmen kî hayywōm yəhwâ nirə’â ’ălêḵem:

5 wayyiqəḥû ’ēṯ ’ăšer ṣiûâ mōšeh ’el-pənê ’ōhel mwō‘ēḏ wayyiqərəḇû kāl-hā‘ēḏâ wayya‘aməḏû lifənê yəhwâ:

6 wayyō’mer mōšeh zeh hadāḇār ’ăšer-ṣiûâ yəhwâ ta‘ăśû wəyērā’ ’ălêḵem kəḇwōḏ yəhwâ:

7 wayyō’mer mōšeh ’el-’ahărōn qəraḇ ’el-hammizəbēḥa wa‘ăśēh ’eṯ-ḥaṭṭā’ṯəḵā wə’eṯ-‘ōlāṯeḵā wəḵapēr ba‘aḏəḵā ûḇə‘aḏ hā‘ām wa‘ăśēh ’eṯ-qārəban hā‘ām wəḵapēr ba‘ăḏām ka’ăšer ṣiûâ yəhwâ:

8 wayyiqəraḇ ’ahărōn ’el-hammizəbēḥa wayyišəḥaṭ ’eṯ-‘ēḡel haḥaṭṭā’ṯ ’ăšer-lwō:

9 wayyaqəriḇû bənê ’ahărōn ’eṯ-hadām ’ēlāyw wayyiṭəbōl ’eṣəbā‘wō badām wayyitēn ‘al-qarənwōṯ hammizəbēḥa wə’eṯ-hadām yāṣaq ’el-yəswōḏ hammizəbēḥa:

10 wə’eṯ-haḥēleḇ wə’eṯ-hakəlāyōṯ wə’eṯ-hayyōṯereṯ min-hakāḇēḏ min-haḥaṭṭā’ṯ hiqəṭîr hammizəbēḥâ ka’ăšer ṣiûâ yəhwâ ’eṯ-mōšeh:

11 wə’eṯ-habāśār wə’eṯ-hā‘wōr śāraf bā’ēš miḥûṣ lammaḥăneh:

12 wayyišəḥaṭ ’eṯ-hā‘ōlâ wayyaməṣi’û bənê ’ahărōn ’ēlāyw ’eṯ-hadām wayyizərəqēhû ‘al-hammizəbēḥa sāḇîḇ:

13 wə’eṯ-hā‘ōlâ himəṣî’û ’ēlāyw linəṯāḥeyhā wə’eṯ-hārō’š wayyaqəṭēr ‘al-hammizəbēḥa:

14 wayyirəḥaṣ ’eṯ-haqqereḇ wə’eṯ-hakərā‘āyim wayyaqəṭēr ‘al-hā‘ōlâ hammizəbēḥâ:

15 wayyaqərēḇ ’ēṯ qārəban hā‘ām wayyiqqaḥ ’eṯ-śə‘îr haḥaṭṭā’ṯ ’ăšer lā‘ām wayyišəḥāṭēhû wayəḥaṭṭə’ēhû kāri’šwōn:

16 wayyaqərēḇ ’eṯ-hā‘ōlâ wayya‘ăśehā kammišəpāṭ:

17 wayyaqərēḇ ’eṯ-hamminəḥâ wayəmallē’ ḵapwō mimmennâ wayyaqəṭēr ‘al-hammizəbēḥa milləḇaḏ ‘ōlaṯ habōqer:

18 wayyišəḥaṭ ’eṯ-haššwōr wə’eṯ-hā’ayil zeḇaḥ haššəlāmîm ’ăšer lā‘ām wayyaməṣi’û bənê ’ahărōn ’eṯ-hadām ’ēlāyw wayyizərəqēhû ‘al-hammizəbēḥa sāḇîḇ:

19 wə’eṯ-haḥălāḇîm min-haššwōr ûmin-hā’ayil hā’aləyâ wəhaməḵasseh wəhakəlāyōṯ wəyōṯereṯ hakāḇēḏ:

20 wayyāśîmû ’eṯ-haḥălāḇîm ‘al-heḥāzwōṯ wayyaqəṭēr haḥălāḇîm hammizəbēḥâ:

21 wə’ēṯ heḥāzwōṯ wə’ēṯ šwōq hayyāmîn hēnîf ’ahărōn tənûfâ lifənê yəhwâ ka’ăšer ṣiûâ mōšeh:

22 wayyiśśā’ ’ahărōn ’eṯ-yāḏwō yāḏāyw ’el-hā‘ām wayəḇārəḵēm wayyēreḏ mē‘ăśōṯ haḥaṭṭā’ṯ wəhā‘ōlâ wəhaššəlāmîm:

23 wayyāḇō’ mōšeh wə’ahărōn ’el-’ōhel mwō‘ēḏ wayyēṣə’û wayəḇārăḵû ’eṯ-hā‘ām wayyērā’ ḵəḇwōḏ-yəhwâ ’el-kāl-hā‘ām:

24 watēṣē’ ’ēš millifənê yəhwâ watō’ḵal ‘al-hammizəbēḥa ’eṯ-hā‘ōlâ wə’eṯ-haḥălāḇîm wayyarə’ kāl-hā‘ām wayyārōnnû wayyipəlû ‘al-pənêhem:


Next: Leviticus (Vayikra) Chapter 10