‎1 ‏וֶאֱלִישָׁ֡ע דִּבֶּ֣ר אֶל־הָאִשָּׁה֩ אֲשֶׁר־הֶחֱיָ֨ה אֶת־בְּנָ֜הּ לֵאמֹ֗ר ק֤וּמִי וּלְכִי֙ אתי אַ֣תְּ וּבֵיתֵ֔ךְ וְג֖וּרִי בַּאֲשֶׁ֣ר תָּג֑וּרִי כִּֽי־קָרָ֤א יְהוָה֙ לָֽרָעָ֔ב וְגַם־בָּ֥א אֶל־הָאָ֖רֶץ שֶׁ֥בַע שָׁנִֽים׃

‎2 ‏וַתָּ֙קָם֙ הָֽאִשָּׁ֔ה וַתַּ֕עַשׂ כִּדְבַ֖ר אִ֣ישׁ הָאֱלֹהִ֑ים וַתֵּ֤לֶךְ הִיא֙ וּבֵיתָ֔הּ וַתָּ֥גָר בְּאֶֽרֶץ־פְּלִשְׁתִּ֖ים שֶׁ֥בַע שָׁנִֽים׃

‎3 ‏וַיְהִ֗י מִקְצֵה֙ שֶׁ֣בַע שָׁנִ֔ים וַתָּ֥שָׁב הָאִשָּׁ֖ה מֵאֶ֣רֶץ פְּלִשְׁתִּ֑ים וַתֵּצֵא֙ לִצְעֹ֣ק אֶל־הַמֶּ֔לֶךְ אֶל־בֵּיתָ֖הּ וְאֶל־שָׂדָֽהּ׃

‎4 ‏וְהַמֶּ֗לֶךְ מְדַבֵּר֙ אֶל־גֵּ֣חֲזִ֔י נַ֥עַר אִישׁ־הָאֱלֹהִ֖ים לֵאמֹ֑ר סַפְּרָה־נָּ֣א לִ֔י אֵ֥ת כָּל־הַגְּדֹל֖וֹת אֲשֶׁר־עָשָׂ֥ה אֱלִישָֽׁע׃

‎5 ‏וַ֠יְהִי ה֥וּא מְסַפֵּ֣ר לַמֶּלֶךְ֮ אֵ֣ת אֲשֶׁר־הֶחֱיָ֣ה אֶת־הַמֵּת֒ וְהִנֵּ֨ה הָאִשָּׁ֜ה אֲשֶׁר־הֶחֱיָ֤ה אֶת־בְּנָהּ֙ צֹעֶ֣קֶת אֶל־הַמֶּ֔לֶךְ עַל־בֵּיתָ֖הּ וְעַל־שָׂדָ֑הּ וַיֹּ֤אמֶר גֵּֽחֲזִי֙ אֲדֹנִ֣י הַמֶּ֔לֶךְ זֹ֚את³ הָֽאִשָּׁ֔ה וְזֶה־בְּנָ֖הּ אֲשֶׁר־הֶחֱיָ֥ה אֱלִישָֽׁע׃

‎6 ‏וַיִּשְׁאַ֥ל הַמֶּ֛לֶךְ לָאִשָּׁ֖ה וַתְּסַפֶּר־ל֑וֹ וַיִּתֶּן־לָ֣הּ הַמֶּלֶךְ֩ סָרִ֨יס אֶחָ֜ד לֵאמֹ֗ר הָשֵׁ֤יב אֶת־כָּל־אֲשֶׁר־לָהּ֙ וְאֵת֙ כָּל־תְּבוּאֹ֣ת הַשָּׂדֶ֔ה מִיּ֛וֹם עָזְבָ֥ה אֶת־הָאָ֖רֶץ וְעַד־עָֽתָּה׃ פ

‎7 ‏וַיָּבֹ֤א אֱלִישָׁע֙ דַּמֶּ֔שֶׂק וּבֶן־הֲדַ֥ד מֶֽלֶךְ־אֲרָ֖ם חֹלֶ֑ה וַיֻּגַּד־ל֣וֹ לֵאמֹ֔ר בָּ֛א אִ֥ישׁ הָאֱלֹהִ֖ים עַד־הֵֽנָּה׃

‎8 ‏וַיֹּ֨אמֶר הַמֶּ֜לֶךְ אֶל־חֲזָהאֵ֗ל קַ֤ח בְּיָֽדְךָ֙ מִנְחָ֔ה וְלֵ֕ךְ לִקְרַ֖את אִ֣ישׁ הָאֱלֹהִ֑ים וְדָרַשְׁתָּ֙ אֶת־יְהוָ֤ה מֵֽאוֹתוֹ֙ לֵאמֹ֔ר הַאֶחְיֶ֖ה מֵחֳלִ֥י זֶֽה׃

‎9 ‏וַיֵּ֣לֶךְ חֲזָאֵל֮ לִקְרָאתוֹ֒ וַיִּקַּ֨ח מִנְחָ֤ה בְיָדוֹ֙ וְכָל־ט֣וּב דַּמֶּ֔שֶׂק מַשָּׂ֖א אַרְבָּעִ֣ים גָּמָ֑ל וַיָּבֹא֙ וַיַּעֲמֹ֣ד לְפָנָ֔יו וַיֹּ֗אמֶר בִּנְךָ֙ בֶן־הֲדַ֤ד מֶֽלֶךְ־אֲרָם֙ שְׁלָחַ֤נִי אֵלֶ֙יךָ֙ לֵאמֹ֔ר הַאֶחְיֶ֖ה מֵחֳלִ֥י זֶֽה׃

‎10 ‏וַיֹּ֤אמֶר אֵלָיו֙ אֱלִישָׁ֔ע לֵ֥ךְ אֱמָר־לא ל֖וֹ חָיֹ֣ה תִחְיֶ֑ה וְהִרְאַ֥נִי יְהוָ֖ה כִּֽי־מ֥וֹת יָמֽוּת׃

‎11 ‏וַיַּעֲמֵ֥ד אֶת־פָּנָ֖יו וַיָּ֣שֶׂם עַד־בֹּ֑שׁ וַיֵּ֖בְךְּ אִ֥ישׁ הָאֱלֹהִֽים׃

‎12 ‏וַיֹּ֣אמֶר חֲזָאֵ֔ל מַדּ֖וּעַ אֲדֹנִ֣י בֹכֶ֑ה וַיֹּ֡אמֶר כִּֽי־יָדַ֡עְתִּי אֵ֣ת אֲשֶׁר־תַּעֲשֶׂה֩ לִבְנֵ֨י יִשְׂרָאֵ֜ל רָעָ֗ה מִבְצְרֵיהֶ֞ם תְּשַׁלַּ֤ח בָּאֵשׁ֙ וּבַחֻֽרֵיהֶם֙ בַּחֶ֣רֶב תַּהֲרֹ֔ג וְעֹלְלֵיהֶ֣ם תְּרַטֵּ֔שׁ וְהָרֹתֵיהֶ֖ם תְּבַקֵּֽעַ׃

‎13 ‏וַיֹּ֣אמֶר חֲזָהאֵ֔ל כִּ֣י מָ֤ה עַבְדְּךָ֙ הַכֶּ֔לֶב כִּ֣י יַעֲשֶׂ֔ה הַדָּבָ֥ר הַגָּד֖וֹל הַזֶּ֑ה וַיֹּ֣אמֶר אֱלִישָׁ֔ע הִרְאַ֧נִי יְהוָ֛ה אֹתְךָ֖ מֶ֥לֶךְ עַל־אֲרָֽם׃

‎14 ‏וַיֵּ֣לֶךְ׀ מֵאֵ֣ת אֱלִישָׁ֗ע וַיָּבֹא֙ אֶל־אֲדֹנָ֔יו וַיֹּ֣אמֶר ל֔וֹ מָֽה־אָמַ֥ר לְךָ֖ אֱלִישָׁ֑ע וַיֹּ֕אמֶר אָ֥מַר לִ֖י חָיֹ֥ה תִחְיֶֽה׃

‎15 ‏וַיְהִ֣י מִֽמָּחֳרָ֗ת וַיִּקַּ֤ח הַמַּכְבֵּר֙ וַיִּטְבֹּ֣ל בַּמַּ֔יִם וַיִּפְרֹ֥שׂ עַל־פָּנָ֖יו וַיָּמֹ֑ת וַיִּמְלֹ֥ךְ חֲזָהאֵ֖ל תַּחְתָּֽיו׃ פ

‎16 ‏וּבִשְׁנַ֣ת חָמֵ֗שׁ לְיוֹרָ֤ם בֶּן־אַחְאָב֙ מֶ֣לֶךְ יִשְׂרָאֵ֔ל וִיהוֹשָׁפָ֖ט מֶ֣לֶךְ יְהוּדָ֑ה מָלַ֛ךְ יְהוֹרָ֥ם בֶּן־יְהוֹשָׁפָ֖ט מֶ֥לֶךְ יְהוּדָֽה׃

‎17 ‏בֶּן־שְׁלֹשִׁ֥ים וּשְׁתַּ֛יִם שָׁנָ֖ה הָיָ֣ה בְמָלְכ֑וֹ וּשְׁמֹנֶ֣ה שנה שָׁנִ֔ים מָלַ֖ךְ בִּירוּשָׁלִָֽם׃

‎18 ‏וַיֵּ֨לֶךְ בְּדֶ֣רֶךְ׀ מַלְכֵ֣י יִשְׂרָאֵ֗ל כַּאֲשֶׁ֤ר עָשׂוּ֙ בֵּ֣ית אַחְאָ֔ב כִּ֚י בַּת־אַחְאָ֔ב הָֽיְתָה־לּ֖וֹ לְאִשָּׁ֑ה וַיַּ֥עַשׂ הָרַ֖ע בְּעֵינֵ֥י יְהוָֽה׃

‎19 ‏וְלֹֽא־אָבָ֤ה יְהוָה֙ לְהַשְׁחִ֣ית אֶת־יְהוּדָ֔ה לְמַ֖עַן דָּוִ֣ד עַבְדּ֑וֹ כַּאֲשֶׁ֣ר אָֽמַר־ל֗וֹ לָתֵ֨ת ל֥וֹ נִ֛יר לְבָנָ֖יו כָּל־הַיָּמִֽים׃

‎20 ‏בְּיָמָיו֙ פָּשַׁ֣ע אֱד֔וֹם מִתַּ֖חַת יַד־יְהוּדָ֑ה וַיַּמְלִ֥כוּ עֲלֵיהֶ֖ם מֶֽלֶךְ׃

‎21 ‏וַיַּעֲבֹ֤ר יוֹרָם֙ צָעִ֔ירָה וְכָל־הָרֶ֖כֶב עִמּ֑וֹ וַֽיְהִי־ה֞וּא קָ֣ם לַ֗יְלָה וַיַּכֶּ֨ה אֶת־אֱד֜וֹם הַסֹּבֵ֤יב אֵלָיו֙ וְאֵת֙ שָׂרֵ֣י הָרֶ֔כֶב וַיָּ֥נָס הָעָ֖ם לְאֹהָלָֽיו׃

‎22 ‏וַיִּפְשַׁ֣ע אֱד֗וֹם מִתַּ֙חַת֙ יַד־יְהוּדָ֔ה עַ֖ד הַיּ֣וֹם הַזֶּ֑ה אָ֛ז תִּפְשַׁ֥ע לִבְנָ֖ה בָּעֵ֥ת הַהִֽיא׃

‎23 ‏וְיֶ֛תֶר דִּבְרֵ֥י יוֹרָ֖ם וְכָל־אֲשֶׁ֣ר עָשָׂ֑ה הֲלֽוֹא־הֵ֣ם כְּתוּבִ֗ים עַל־סֵ֛פֶר דִּבְרֵ֥י הַיָּמִ֖ים לְמַלְכֵ֥י יְהוּדָֽה׃

‎24 ‏וַיִּשְׁכַּ֤ב יוֹרָם֙ עִם־אֲבֹתָ֔יו וַיִּקָּבֵ֥ר עִם־אֲבֹתָ֖יו בְּעִ֣יר דָּוִ֑ד וַיִּמְלֹ֛ךְ אֲחַזְיָ֥הוּ בְנ֖וֹ תַּחְתָּֽיו׃ פ

‎25 ‏בִּשְׁנַת֙ שְׁתֵּים־עֶשְׂרֵ֣ה שָׁנָ֔ה לְיוֹרָ֥ם בֶּן־אַחְאָ֖ב מֶ֣לֶךְ יִשְׂרָאֵ֑ל מָלַ֛ךְ אֲחַזְיָ֥הוּ בֶן־יְהוֹרָ֖ם מֶ֥לֶךְ יְהוּדָֽה׃

‎26 ‏בֶּן־עֶשְׂרִ֨ים וּשְׁתַּ֤יִם שָׁנָה֙ אֲחַזְיָ֣הוּ בְמָלְכ֔וֹ וְשָׁנָ֣ה אַחַ֔ת מָלַ֖ךְ בִּירוּשָׁלִָ֑ם וְשֵׁ֤ם אִמּוֹ֙ עֲתַלְיָ֔הוּ בַּת־עָמְרִ֖י מֶ֥לֶךְ יִשְׂרָאֵֽל׃

‎27 ‏וַיֵּ֗לֶךְ בְּדֶ֙רֶךְ֙ בֵּ֣ית אַחְאָ֔ב וַיַּ֧עַשׂ הָרַ֛ע בְּעֵינֵ֥י יְהוָ֖ה כְּבֵ֣ית אַחְאָ֑ב כִּ֛י חֲתַ֥ן בֵּית־אַחְאָ֖ב הֽוּא׃

‎28 ‏וַיֵּ֜לֶךְ אֶת־יוֹרָ֣ם בֶּן־אַחְאָ֗ב לַמִּלְחָמָ֛ה עִם־חֲזָהאֵ֥ל מֶֽלֶךְ־אֲרָ֖ם בְּרָמֹ֣ת גִּלְעָ֑ד וַיַּכּ֥וּ אֲרַמִּ֖ים אֶת־יוֹרָֽם׃

‎29 ‏וַיָּשָׁב֩ יוֹרָ֨ם הַמֶּ֜לֶךְ לְהִתְרַפֵּ֣א בְיִזְרְעֶ֗אל מִן־הַמַּכִּים֙ אֲשֶׁ֨ר יַכֻּ֤הוּ אֲרַמִּים֙ בָּֽרָמָ֔ה בְּהִלָּ֣חֲמ֔וֹ אֶת־חֲזָהאֵ֖ל מֶ֣לֶךְ אֲרָ֑ם וַאֲחַזְיָ֨הוּ בֶן־יְהוֹרָ֜ם מֶ֣לֶךְ יְהוּדָ֗ה יָרַ֡ד לִרְא֞וֹת אֶת־יוֹרָ֧ם בֶּן־אַחְאָ֛ב בְּיִזְרְעֶ֖אל כִּֽי־חֹלֶ֥ה הֽוּא׃ פ

1 we’ĕlîšā‘ diber ’el-hā’iššâ ’ăšer-heḥĕyâ ’eṯ-bənāh lē’mōr qûmî ûləḵî ’atî ’atə ûḇêṯēḵə wəḡûrî ba’ăšer tāḡûrî kî-qārā’ yəhwâ lārā‘āḇ wəḡam-bā’ ’el-hā’āreṣ šeḇ^a‘ šānîm:

2 watāqām hā’iššâ wat^a‘aś kiḏəḇar ’îš hā’ĕlōhîm watēleḵə hî’ ûḇêṯāh watāḡār bə’ereṣ-pəlišətîm šeḇ^a‘ šānîm:

3 wayəhî miqəṣēh šeḇ^a‘ šānîm watāšāḇ hā’iššâ mē’ereṣ pəlišətîm watēṣē’ liṣə‘ōq ’el-hammeleḵə ’el-bêṯāh wə’el-śāḏāh:

4 wəhammeleḵə məḏabēr ’el-gēḥăzî n^a‘ar ’îš-hā’ĕlōhîm lē’mōr sapərâ-nnā’ lî ’ēṯ kāl-hagəḏōlwōṯ ’ăšer-‘āśâ ’ĕlîšā‘:

5 wayəhî hû’ məsapēr lammeleḵə ’ēṯ ’ăšer-heḥĕyâ ’eṯ-hammēṯ wəhinnēh hā’iššâ ’ăšer-heḥĕyâ ’eṯ-bənāh ṣō‘eqeṯ ’el-hammeleḵə ‘al-bêṯāh wə‘al-śāḏāh wayyō’mer gēḥăzî ’ăḏōnî hammeleḵə zō’ṯ³ hā’iššâ wəzeh-bənāh ’ăšer-heḥĕyâ ’ĕlîšā‘:

6 wayyišə’al hammeleḵə lā’iššâ watəsaper-lwō wayyiten-lāh hammeleḵə sārîs ’eḥāḏ lē’mōr hāšêḇ ’eṯ-kāl-’ăšer-lāh wə’ēṯ kāl-təḇû’ōṯ haśśāḏeh mîywōm ‘āzəḇâ ’eṯ-hā’āreṣ wə‘aḏ-‘ātâ: f

7 wayyāḇō’ ’ĕlîšā‘ dammeśeq ûḇen-hăḏaḏ meleḵə-’ărām ḥōleh wayyugaḏ-lwō lē’mōr bā’ ’îš hā’ĕlōhîm ‘aḏ-hēnnâ:

8 wayyō’mer hammeleḵə ’el-ḥăzâ’ēl q^aḥ bəyāḏəḵā minəḥâ wəlēḵə liqəra’ṯ ’îš hā’ĕlōhîm wəḏārašətā ’eṯ-yəhwâ mē’wōṯwō lē’mōr ha’eḥəyeh mēḥŏlî zeh:

9 wayyēleḵə ḥăzā’ēl liqərā’ṯwō wayyiqq^aḥ minəḥâ ḇəyāḏwō wəḵāl-ṭûḇ dammeśeq maśśā’ ’arəbā‘îm gāmāl wayyāḇō’ wayy^a‘ămōḏ ləfānāyw wayyō’mer binəḵā ḇen-hăḏaḏ meleḵə-’ărām šəlāḥanî ’ēleyḵā lē’mōr ha’eḥəyeh mēḥŏlî zeh:

10 wayyō’mer ’ēlāyw ’ĕlîšā‘ lēḵə ’ĕmār-lō’ lwō ḥāyōh ṯiḥəyeh wəhirə’anî yəhwâ kî-mwōṯ yāmûṯ:

11 wayy^a‘ămēḏ ’eṯ-pānāyw wayyāśem ‘aḏ-bōš wayyēḇəḵḵə ’îš hā’ĕlōhîm:

12 wayyō’mer ḥăzā’ēl madû‘a ’ăḏōnî ḇōḵeh wayyō’mer kî-yāḏ^a‘ətî ’ēṯ ’ăšer-t^a‘ăśeh liḇənê yiśərā’ēl rā‘â miḇəṣərêhem təšall^aḥ bā’ēš ûḇ^aḥurêhem b^aḥereḇ tahărōḡ wə‘ōləlêhem təraṭṭēš wəhārōṯêhem təḇaqqē‘a:

13 wayyō’mer ḥăzâ’ēl kî mâ ‘aḇədəḵā hakeleḇ kî y^a‘ăśeh hadāḇār hagāḏwōl hazzeh wayyō’mer ’ĕlîšā‘ hirə’anî yəhwâ ’ōṯəḵā meleḵə ‘al-’ărām:

14 wayyēleḵə| mē’ēṯ ’ĕlîšā‘ wayyāḇō’ ’el-’ăḏōnāyw wayyō’mer lwō mâ-’āmar ləḵā ’ĕlîšā‘ wayyō’mer ’āmar lî ḥāyōh ṯiḥəyeh:

15 wayəhî mimmāḥŏrāṯ wayyiqq^aḥ hammaḵəbēr wayyiṭəbōl bammayim wayyifərōś ‘al-pānāyw wayyāmōṯ wayyiməlōḵə ḥăzâ’ēl t^aḥətāyw: f

16 ûḇišənaṯ ḥāmēš ləywōrām ben-’^aḥə’āḇ meleḵə yiśərā’ēl wîhwōšāfāṭ meleḵə yəhûḏâ mālaḵə yəhwōrām ben-yəhwōšāfāṭ meleḵə yəhûḏâ:

17 ben-šəlōšîm ûšətayim šānâ hāyâ ḇəmāləḵwō ûšəmōneh šānâ šānîm mālaḵə bîrûšālāim:

18 wayyēleḵə bəḏereḵə| maləḵê yiśərā’ēl ka’ăšer ‘āśû bêṯ ’^aḥə’āḇ kî baṯ-’^aḥə’āḇ hāyəṯâ-llwō lə’iššâ wayy^a‘aś hār^a‘ bə‘ênê yəhwâ:

19 wəlō’-’āḇâ yəhwâ ləhašəḥîṯ ’eṯ-yəhûḏâ ləm^a‘an dāwiḏ ‘aḇədwō ka’ăšer ’āmar-lwō lāṯēṯ lwō nîr ləḇānāyw kāl-hayyāmîm:

20 bəyāmāyw pāš^a‘ ’ĕḏwōm mit^aḥaṯ yaḏ-yəhûḏâ wayyaməliḵû ‘ălêhem meleḵə:

21 wayy^a‘ăḇōr ywōrām ṣā‘îrâ wəḵāl-hāreḵeḇ ‘immwō wayəhî-hû’ qām layəlâ wayyakeh ’eṯ-’ĕḏwōm hassōḇêḇ ’ēlāyw wə’ēṯ śārê hāreḵeḇ wayyānās hā‘ām lə’ōhālāyw:

22 wayyifəš^a‘ ’ĕḏwōm mit^aḥaṯ yaḏ-yəhûḏâ ‘aḏ hayywōm hazzeh ’āz tifəš^a‘ liḇənâ bā‘ēṯ hahî’:

23 wəyeṯer diḇərê ywōrām wəḵāl-’ăšer ‘āśâ hălwō’-hēm kəṯûḇîm ‘al-sēfer diḇərê hayyāmîm ləmaləḵê yəhûḏâ:

24 wayyišəkaḇ ywōrām ‘im-’ăḇōṯāyw wayyiqqāḇēr ‘im-’ăḇōṯāyw bə‘îr dāwiḏ wayyiməlōḵə ’ăḥazəyâû ḇənwō t^aḥətāyw: f

25 bišənaṯ šətêm-‘eśərēh šānâ ləywōrām ben-’^aḥə’āḇ meleḵə yiśərā’ēl mālaḵə ’ăḥazəyâû ḇen-yəhwōrām meleḵə yəhûḏâ:

26 ben-‘eśərîm ûšətayim šānâ ’ăḥazəyâû ḇəmāləḵwō wəšānâ ’^aḥaṯ mālaḵə bîrûšālāim wəšēm ’immwō ‘ăṯaləyâû baṯ-‘āmərî meleḵə yiśərā’ēl:

27 wayyēleḵə bəḏereḵə bêṯ ’^aḥə’āḇ wayy^a‘aś hār^a‘ bə‘ênê yəhwâ kəḇêṯ ’^aḥə’āḇ kî ḥăṯan bêṯ-’^aḥə’āḇ hû’:

28 wayyēleḵə ’eṯ-ywōrām ben-’^aḥə’āḇ lammiləḥāmâ ‘im-ḥăzâ’ēl meleḵə-’ărām bərāmōṯ gilə‘āḏ wayyakû ’ărammîm ’eṯ-ywōrām:

29 wayyāšāḇ ywōrām hammeleḵə ləhiṯərapē’ ḇəyizərə‘e’l min-hammakîm ’ăšer yakuhû ’ărammîm bārāmâ bəhillāḥămwō ’eṯ-ḥăzâ’ēl meleḵə ’ărām wa’ăḥazəyâû ḇen-yəhwōrām meleḵə yəhûḏâ yāraḏ lirə’wōṯ ’eṯ-ywōrām ben-’^aḥə’āḇ bəyizərə‘e’l kî-ḥōleh hû’: f