Sacred Texts  Bible  Index 
Polyglot  KJV  Sep  Vul 

1 Kings (1 Melakhim) Index
  Previous  Next 

Tanach (Hebrew): 1 Kings (1 Melakhim) Chapter 6

1 ‏וַיְהִ֣י בִשְׁמוֹנִ֣ים שָׁנָ֣ה וְאַרְבַּ֣ע מֵא֣וֹת שָׁנָ֡ה לְצֵ֣את בְּנֵֽי־יִשְׂרָאֵ֣ל מֵאֶֽרֶץ־מִצְרַיִם֩ בַּשָּׁנָ֨ה הָרְבִיעִ֜ית בְּחֹ֣דֶשׁ זִ֗ו ה֚וּא הַחֹ֣דֶשׁ הַשֵּׁנִ֔י לִמְלֹ֥ךְ שְׁלֹמֹ֖ה עַל־יִשְׂרָאֵ֑ל וַיִּ֥בֶן הַבַּ֖יִת לַיהוָֽה׃

2 ‏וְהַבַּ֗יִת אֲשֶׁ֨ר בָּנָ֜ה הַמֶּ֤לֶךְ שְׁלֹמֹה֙ לַֽיהוָ֔ה שִׁשִּֽׁים־אַמָּ֥ה אָרְכּ֖וֹ וְעֶשְׂרִ֤ים רָחְבּ֑וֹ וּשְׁלֹשִׁ֥ים אַמָּ֖ה קוֹמָתֽוֹ׃

3 ‏וְהָאוּלָ֗ם עַל־פְּנֵי֙ הֵיכַ֣ל הַבַּ֔יִת עֶשְׂרִ֣ים אַמָּה֙ אָרְכּ֔וֹ עַל־פְּנֵ֖י רֹ֣חַב הַבָּ֑יִת עֶ֧שֶׂר בָּאַמָּ֛ה רָחְבּ֖וֹ עַל־פְּנֵ֥י הַבָּֽיִת׃

4 ‏וַיַּ֣עַשׂ לַבָּ֔יִת חַלּוֹנֵ֖י שְׁקֻפִ֥ים אֲטֻמִֽים׃

5 ‏וַיִּבֶן֩ עַל־קִ֨יר הַבַּ֤יִת יצוע יָצִ֙יעַ֙ סָבִ֔יב אֶת־קִיר֤וֹת הַבַּ֙יִת֙ סָבִ֔יב לַֽהֵיכָ֖ל וְלַדְּבִ֑יר וַיַּ֥עַשׂ צְלָע֖וֹת סָבִֽיב׃

6 ‏היצוע הַיָּצִ֨יעַ הַתַּחְתֹּנָ֜ה חָמֵ֧שׁ בָּאַמָּ֣ה רָחְבָּ֗הּ וְהַתִּֽיכֹנָה֙ שֵׁ֤שׁ בָּֽאַמָּה֙ רָחְבָּ֔הּ וְהַ֨שְּׁלִישִׁ֔ית שֶׁ֥בַע בָּאַמָּ֖ה רָחְבָּ֑הּ כִּ֡י מִגְרָעוֹת֩ נָתַ֨ן לַבַּ֤יִת סָבִיב֙ ח֔וּצָה לְבִלְתִּ֖י אֲחֹ֥ז בְּקִֽירוֹת־הַבָּֽיִת׃

7 ‏וְהַבַּ֙יִת֙ בְּהִבָּ֣נֹת֔וֹ אֶֽבֶן־שְׁלֵמָ֥ה מַסָּ֖ע נִבְנָ֑ה וּמַקָּב֤וֹת וְהַגַּרְזֶן֙ כָּל־כְּלִ֣י בַרְזֶ֔ל לֹֽא־נִשְׁמַ֥ע בַּבַּ֖יִת בְּהִבָּנֹתֽוֹ׃

8 ‏פֶּ֗תַח הַצֵּלָע֙ הַתִּ֣יכֹנָ֔ה אֶל־כֶּ֥תֶף הַבַּ֖יִת הַיְמָנִ֑ית וּבְלוּלִּ֗ים יַֽעֲלוּ֙ עַל־הַתִּ֣יכֹנָ֔ה וּמִן־הַתִּֽיכֹנָ֖ה אֶל־הַשְּׁלִשִֽׁים׃

9 ‏וַיִּ֥בֶן אֶת־הַבַּ֖יִת וַיְכַלֵּ֑הוּ וַיִּסְפֹּ֤ן אֶת־הַבַּ֙יִת֙ גֵּבִ֔ים וּשְׂדֵרֹ֖ת בָּאֲרָזִֽים׃

10 ‏וַיִּ֤בֶן אֶת־היצוע הַיָּצִ֙יעַ֙ עַל־כָּל־הַבַּ֔יִת חָמֵ֥שׁ אַמּ֖וֹת קֽוֹמָת֑וֹ וַיֶּאֱחֹ֥ז אֶת־הַבַּ֖יִת בַּעֲצֵ֥י אֲרָזִֽים׃ פ

11 ‏וַֽיְהִי֙ דְּבַר־יְהוָ֔ה אֶל־שְׁלֹמֹ֖ה לֵאמֹֽר׃

12 ‏הַבַּ֨יִת הַזֶּ֜ה אֲשֶׁר־אַתָּ֣ה בֹנֶ֗ה אִם־תֵּלֵ֤ךְ בְּחֻקֹּתַי֙ וְאֶת־מִשְׁפָּטַ֣י תַּֽעֲשֶׂ֔ה וְשָׁמַרְתָּ֥ אֶת־כָּל־מִצְוֹתַ֖י לָלֶ֣כֶת בָּהֶ֑ם וַהֲקִמֹתִ֤י אֶת־דְּבָרִי֙ אִתָּ֔ךְ אֲשֶׁ֥ר דִּבַּ֖רְתִּי אֶל־דָּוִ֥ד אָבִֽיךָ׃

13 ‏וְשָׁ֣כַנְתִּ֔י בְּת֖וֹךְ בְּנֵ֣י יִשְׂרָאֵ֑ל וְלֹ֥א אֶעֱזֹ֖ב אֶת־עַמִּ֥י יִשְׂרָאֵֽל׃ ס

14 ‏וַיִּ֧בֶן שְׁלֹמֹ֛ה אֶת־הַבַּ֖יִת וַיְכַלֵּֽהוּ׃

15 ‏וַיִּבֶן֩ אֶת־קִיר֨וֹת הַבַּ֤יִת מִבַּ֙יְתָה֙ בְּצַלְע֣וֹת אֲרָזִ֔ים מִקַּרְקַ֤ע הַבַּ֙יִת֙ עַד־קִיר֣וֹת הַסִּפֻּ֔ן צִפָּ֥ה עֵ֖ץ מִבָּ֑יִת וַיְצַ֛ף אֶת־קַרְקַ֥ע הַבַּ֖יִת בְּצַלְע֥וֹת בְּרוֹשִֽׁים׃

16 ‏וַיִּבֶן֩ אֶת־עֶשְׂרִ֨ים אַמָּ֜ה מירכותי מִֽיַּרְכְּתֵ֤י הַבַּ֙יִת֙ בְּצַלְע֣וֹת אֲרָזִ֔ים מִן־הַקַּרְקַ֖ע עַד־הַקִּיר֑וֹת וַיִּ֤בֶן לוֹ֙ מִבַּ֣יִת לִדְבִ֔יר לְקֹ֖דֶשׁ הַקֳּדָשִֽׁים׃

17 ‏וְאַרְבָּעִ֥ים בָּאַמָּ֖ה הָיָ֣ה הַבָּ֑יִת ה֖וּא הַהֵיכָ֥ל לִפְנָֽי׃

18 ‏וְאֶ֤רֶז אֶל־הַבַּ֙יִת֙ פְּנִ֔ימָה מִקְלַ֣עַת פְּקָעִ֔ים וּפְטוּרֵ֖י צִצִּ֑ים הַכֹּ֣ל אֶ֔רֶז אֵ֥ין אֶ֖בֶן נִרְאָֽה׃

19 ‏וּדְבִ֧יר בְּתוֹךְ־הַבַּ֛יִת מִפְּנִ֖ימָה הֵכִ֑ין לְתִתֵּ֣ן שָׁ֔ם אֶת־אֲר֖וֹן בְּרִ֥ית יְהוָֽה׃

20 ‏וְלִפְנֵ֣י הַדְּבִ֡יר עֶשְׂרִים֩ אַמָּ֨ה אֹ֜רֶךְ וְעֶשְׂרִ֧ים אַמָּ֣ה רֹ֗חַב וְעֶשְׂרִ֤ים אַמָּה֙ קֽוֹמָת֔וֹ וַיְצַפֵּ֖הוּ זָהָ֣ב סָג֑וּר וַיְצַ֥ף מִזְבֵּ֖חַ אָֽרֶז׃

21 ‏וַיְצַ֨ף שְׁלֹמֹ֧ה אֶת־הַבַּ֛יִת מִפְּנִ֖ימָה זָהָ֣ב סָג֑וּר וַיְעַבֵּ֞ר ברתיקות בְּרַתּוּק֤וֹת זָהָב֙ לִפְנֵ֣י הַדְּבִ֔יר וַיְצַפֵּ֖הוּ זָהָֽב׃

22 ‏וְאֶת־כָּל־הַבַּ֛יִת צִפָּ֥ה זָהָ֖ב עַד־תֹּ֣ם כָּל־הַבָּ֑יִת וְכָל־הַמִּזְבֵּ֥חַ אֲ‍ֽשֶׁר־לַדְּבִ֖יר צִפָּ֥ה זָהָֽב׃

23 ‏וַיַּ֣עַשׂ בַּדְּבִ֔יר שְׁנֵ֥י כְרוּבִ֖ים עֲצֵי־שָׁ֑מֶן עֶ֥שֶׂר אַמּ֖וֹת קוֹמָתֽוֹ׃

24 ‏וְחָמֵ֣שׁ אַמּ֗וֹת כְּנַ֤ף הַכְּרוּב֙ הָֽאֶחָ֔ת וְחָמֵ֣שׁ אַמּ֔וֹת כְּנַ֥ף הַכְּר֖וּב הַשֵּׁנִ֑ית עֶ֣שֶׂר אַמּ֔וֹת מִקְצ֥וֹת כְּנָפָ֖יו וְעַד־קְצ֥וֹת כְּנָפָֽיו׃

25 ‏וְעֶ֙שֶׂר֙ בָּֽאַמָּ֔ה הַכְּר֖וּב הַשֵּׁנִ֑י מִדָּ֥ה אַחַ֛ת וְקֶ֥צֶב אֶחָ֖ד לִשְׁנֵ֥י הַכְּרֻבִֽים׃

26 ‏קוֹמַת֙ הַכְּר֣וּב הָֽאֶחָ֔ד עֶ֖שֶׂר בָּֽאַמָּ֑ה וְכֵ֖ן הַכְּר֥וּב הַשֵּׁנִֽי׃

27 ‏וַיִּתֵּ֨ן אֶת־הַכְּרוּבִ֜ים בְּת֣וֹךְ׀ הַבַּ֣יִת הַפְּנִימִ֗י וַֽיִּפְרְשׂוּ֮ אֶת־כַּנְפֵ֣י הַכְּרֻבִים֒ וַתִּגַּ֤ע כְּנַף־הָֽאֶחָד֙ בַּקִּ֔יר וּכְנַף֙ הַכְּר֣וּב הַשֵּׁנִ֔י נֹגַ֖עַת בַּקִּ֣יר הַשֵּׁנִ֑י3 וְכַנְפֵיהֶם֙ אֶל־תּ֣וֹךְ הַבַּ֔יִת נֹגְעֹ֖ת כָּנָ֥ף אֶל־כָּנָֽף׃

28 ‏וַיְצַ֥ף אֶת־הַכְּרוּבִ֖ים זָהָֽב׃

29 ‏וְאֵת֩ כָּל־קִיר֨וֹת הַבַּ֜יִת מֵסַ֣ב׀ קָלַ֗ע פִּתּוּחֵי֙ מִקְלְעוֹת֙ כְּרוּבִ֣ים וְתִֽמֹרֹ֔ת וּפְטוּרֵ֖י צִצִּ֑ים מִלִּפְנִ֖ים וְלַחִיצֽוֹן׃

30 ‏וְאֶת־קַרְקַ֥ע הַבַּ֖יִת צִפָּ֣ה זָהָ֑ב לִפְנִ֖ימָה וְלַחִיצֽוֹן׃

31 ‏וְאֵת֙ פֶּ֣תַח הַדְּבִ֔יר עָשָׂ֖ה דַּלְת֣וֹת עֲצֵי־שָׁ֑מֶן הָאַ֥יִל מְזוּז֖וֹת חֲמִשִֽׁית׃

32 ‏וּשְׁתֵּי֮ דַּלְת֣וֹת עֲצֵי־שֶׁמֶן֒ וְקָלַ֣ע עֲ֠לֵיהֶם מִקְלְע֨וֹת כְּרוּבִ֧ים וְתִמֹר֛וֹת וּפְטוּרֵ֥י צִצִּ֖ים וְצִפָּ֣ה זָהָ֑ב וַיָּ֛רֶד עַל־הַכְּרוּבִ֥ים וְעַל־הַתִּֽמֹר֖וֹת אֶת־הַזָּהָֽב׃

33 ‏וְכֵ֥ן עָשָׂ֛ה לְפֶ֥תַח הַֽהֵיכָ֖ל מְזוּז֣וֹת עֲצֵי־שָׁ֑מֶן מֵאֵ֖ת רְבִעִֽית׃

34 ‏וּשְׁתֵּ֥י דַלְת֖וֹת עֲצֵ֣י בְרוֹשִׁ֑ים שְׁנֵ֨י צְלָעִ֜ים הַדֶּ֤לֶת הָֽאַחַת֙ גְּלִילִ֔ים וּשְׁנֵ֧י קְלָעִ֛ים הַדֶּ֥לֶת הַשֵּׁנִ֖ית גְּלִילִֽים׃

35 ‏וְקָלַ֤ע כְּרוּבִים֙ וְתִ֣מֹר֔וֹת וּפְטֻרֵ֖י צִצִּ֑ים וְצִפָּ֣ה זָהָ֔ב מְיֻשָּׁ֖ר עַל־הַמְּחֻקֶּֽה׃

36 ‏וַיִּ֙בֶן֙ אֶת־הֶחָצֵ֣ר הַפְּנִימִ֔ית שְׁלֹשָׁ֖ה טוּרֵ֣י גָזִ֑ית וְט֖וּר כְּרֻתֹ֥ת אֲרָזִֽים׃

37 ‏בַּשָּׁנָה֙ הָֽרְבִיעִ֔ית יֻסַּ֖ד בֵּ֣ית יְהוָ֑ה בְּיֶ֖רַח זִֽו׃

38 ‏וּבַשָּׁנָה֩ הָאַחַ֨ת עֶשְׂרֵ֜ה בְּיֶ֣רַח בּ֗וּל ה֚וּא הַחֹ֣דֶשׁ הַשְּׁמִינִ֔י כָּלָ֣ה הַבַּ֔יִת לְכָל־דְּבָרָ֖יו וּלְכָל־משפטו מִשְׁפָּטָ֑יו וַיִּבְנֵ֖הוּ שֶׁ֥בַע שָׁנִֽים׃

1 wayəhî ḇišəmwōnîm šānâ wə’arəba‘ mē’wōṯ šānâ ləṣē’ṯ bənê-yiśərā’ēl mē’ereṣ-miṣərayim baššānâ hārəḇî‘îṯ bəḥōḏeš ziw hû’ haḥōḏeš haššēnî liməlōḵə šəlōmōh ‘al-yiśərā’ēl wayyiḇen habayiṯ layhwâ:

2 wəhabayiṯ ’ăšer bānâ hammeleḵə šəlōmōh layhwâ šiššîm-’ammâ ’ārəkwō wə‘eśərîm rāḥəbwō ûšəlōšîm ’ammâ qwōmāṯwō:

3 wəhā’ûlām ‘al-pənê hêḵal habayiṯ ‘eśərîm ’ammâ ’ārəkwō ‘al-pənê rōḥaḇ habāyiṯ ‘eśer bā’ammâ rāḥəbwō ‘al-pənê habāyiṯ:

4 wayya‘aś labāyiṯ ḥallwōnê šəqufîm ’ăṭumîm:

5 wayyiḇen ‘al-qîr habayiṯ yāṣû‘a yāṣî‘a sāḇîḇ ’eṯ-qîrwōṯ habayiṯ sāḇîḇ lahêḵāl wəladəḇîr wayya‘aś ṣəlā‘wōṯ sāḇîḇ:

hayyāṣwō‘a hayyāṣî‘a hataḥətōnâ ḥāmēš bā’ammâ rāḥəbāh wəhatîḵōnâ šēš bā’ammâ rāḥəbāh wəhaššəlîšîṯ šeḇa‘ bā’ammâ rāḥəbāh kî miḡərā‘wōṯ nāṯan labayiṯ sāḇîḇ ḥûṣâ ləḇilətî ’ăḥōz bəqîrwōṯ-habāyiṯ:

7 wəhabayiṯ bəhibānōṯwō ’eḇen-šəlēmâ massā‘ niḇənâ ûmaqqāḇwōṯ wəhagarəzen kāl-kəlî ḇarəzel lō’-nišəma‘ babayiṯ bəhibānōṯwō:

8 peṯaḥ haṣṣēlā‘ hatîḵōnâ ’el-keṯef habayiṯ hayəmānîṯ ûḇəlûllîm ya‘ălû ‘al-hatîḵōnâ ûmin-hatîḵōnâ ’el-haššəlišîm:

9 wayyiḇen ’eṯ-habayiṯ wayəḵallēhû wayyisəpōn ’eṯ-habayiṯ gēḇîm ûśəḏērōṯ bā’ărāzîm:

10 wayyiḇen ’eṯ-hayyāṣû‘a hayyāṣî‘a ‘al-kāl-habayiṯ ḥāmēš ’ammwōṯ qwōmāṯwō wayye’ĕḥōz ’eṯ-habayiṯ ba‘ăṣê ’ărāzîm: f

11 wayəhî dəḇar-yəhwâ ’el-šəlōmōh lē’mōr:

12 habayiṯ hazzeh ’ăšer-’atâ ḇōneh ’im-tēlēḵə bəḥuqqōṯay wə’eṯ-mišəpāṭay ta‘ăśeh wəšāmarətā ’eṯ-kāl-miṣəwōṯay lāleḵeṯ bâem wahăqimōṯî ’eṯ-dəḇārî ’itāḵə ’ăšer dibarətî ’el-dāwiḏ ’āḇîḵā:

13 wəšāḵanətî bəṯwōḵə bənê yiśərā’ēl wəlō’ ’e‘ĕzōḇ ’eṯ-‘ammî yiśərā’ēl: s

14 wayyiḇen šəlōmōh ’eṯ-habayiṯ wayəḵallēhû:

15 wayyiḇen ’eṯ-qîrwōṯ habayiṯ mibayəṯâ bəṣalə‘wōṯ ’ărāzîm miqqarəqa‘ habayiṯ ‘aḏ-qîrwōṯ hassipun ṣipâ ‘ēṣ mibāyiṯ wayəṣaf ’eṯ-qarəqa‘ habayiṯ bəṣalə‘wōṯ bərwōšîm:

16 wayyiḇen ’eṯ-‘eśərîm ’ammâ mîyarəkwōṯê mîyarəkəṯê habayiṯ bəṣalə‘wōṯ ’ărāzîm min-haqqarəqa‘ ‘aḏ-haqqîrwōṯ wayyiḇen lwō mibayiṯ liḏəḇîr ləqōḏeš haqqŏḏāšîm:

17 wə’arəbā‘îm bā’ammâ hāyâ habāyiṯ hû’ hahêḵāl lifənāy:

18 wə’erez ’el-habayiṯ pənîmâ miqəla‘aṯ pəqā‘îm ûfəṭûrê ṣiṣṣîm hakōl ’erez ’ên ’eḇen nirə’â:

19 ûḏəḇîr bəṯwōḵə-habayiṯ mipənîmâ hēḵîn ləṯitēn šām ’eṯ-’ărwōn bərîṯ yəhwâ:

20 wəlifənê hadəḇîr ‘eśərîm ’ammâ ’ōreḵə wə‘eśərîm ’ammâ rōḥaḇ wə‘eśərîm ’ammâ qwōmāṯwō wayəṣapēhû zâāḇ sāḡûr wayəṣaf mizəbēḥa ’ārez:

21 wayəṣaf šəlōmōh ’eṯ-habayiṯ mipənîmâ zâāḇ sāḡûr wayə‘abēr bəratîqwōṯ bəratûqwōṯ zâāḇ lifənê hadəḇîr wayəṣapēhû zâāḇ:

22 wə’eṯ-kāl-habayiṯ ṣipâ zâāḇ ‘aḏ-tōm kāl-habāyiṯ wəḵāl-hammizəbēḥa ’ă‍šer-ladəḇîr ṣipâ zâāḇ:

23 wayya‘aś badəḇîr šənê ḵərûḇîm ‘ăṣê-šāmen ‘eśer ’ammwōṯ qwōmāṯwō:

24 wəḥāmēš ’ammwōṯ kənaf hakərûḇ hā’eḥāṯ wəḥāmēš ’ammwōṯ kənaf hakərûḇ haššēnîṯ ‘eśer ’ammwōṯ miqəṣwōṯ kənāfāyw wə‘aḏ-qəṣwōṯ kənāfāyw:

25 wə‘eśer bā’ammâ hakərûḇ haššēnî midâ ’aḥaṯ wəqeṣeḇ ’eḥāḏ lišənê hakəruḇîm:

26 qwōmaṯ hakərûḇ hā’eḥāḏ ‘eśer bā’ammâ wəḵēn hakərûḇ haššēnî:

27 wayyitēn ’eṯ-hakərûḇîm bəṯwōḵə| habayiṯ hapənîmî wayyifərəśû ’eṯ-kanəfê hakəruḇîm watiga‘ kənaf-hā’eḥāḏ baqqîr ûḵənaf hakərûḇ haššēnî nōḡa‘aṯ baqqîr haššēnî3 wəḵanəfêhem ’el-twōḵə habayiṯ nōḡə‘ōṯ kānāf ’el-kānāf:

28 wayəṣaf ’eṯ-hakərûḇîm zâāḇ:

29 wə’ēṯ kāl-qîrwōṯ habayiṯ mēsaḇ| qāla‘ pitûḥê miqələ‘wōṯ kərûḇîm wəṯimōrōṯ ûfəṭûrê ṣiṣṣîm millifənîm wəlaḥîṣwōn:

30 wə’eṯ-qarəqa‘ habayiṯ ṣipâ zâāḇ lifənîmâ wəlaḥîṣwōn:

31 wə’ēṯ peṯaḥ hadəḇîr ‘āśâ daləṯwōṯ ‘ăṣê-šāmen hā’ayil məzûzwōṯ ḥămišîṯ:

32 ûšətê daləṯwōṯ ‘ăṣê-šemen wəqāla‘ ‘ălêhem miqələ‘wōṯ kərûḇîm wəṯimōrwōṯ ûfəṭûrê ṣiṣṣîm wəṣipâ zâāḇ wayyāreḏ ‘al-hakərûḇîm wə‘al-hatimōrwōṯ ’eṯ-hazzâāḇ:

33 wəḵēn ‘āśâ ləfeṯaḥ hahêḵāl məzûzwōṯ ‘ăṣê-šāmen mē’ēṯ rəḇi‘îṯ:

34 ûšətê ḏaləṯwōṯ ‘ăṣê ḇərwōšîm šənê ṣəlā‘îm hadeleṯ hā’aḥaṯ gəlîlîm ûšənê qəlā‘îm hadeleṯ haššēnîṯ gəlîlîm:

35 wəqāla‘ kərûḇîm wəṯimōrwōṯ ûfəṭurê ṣiṣṣîm wəṣipâ zâāḇ məyuššār ‘al-hamməḥuqqeh:

36 wayyiḇen ’eṯ-heḥāṣēr hapənîmîṯ šəlōšâ ṭûrê ḡāzîṯ wəṭûr kəruṯōṯ ’ărāzîm:

37 baššānâ hārəḇî‘îṯ yussaḏ bêṯ yəhwâ bəyeraḥ ziw:

38 ûḇaššānâ hā’aḥaṯ ‘eśərēh bəyeraḥ bûl hû’ haḥōḏeš haššəmînî kālâ habayiṯ ləḵāl-dəḇārāyw ûləḵāl-mišəpāṭāw mišəpāṭāyw wayyiḇənēhû šeḇa‘ šānîm:


Next: 1 Kings (1 Melakhim) Chapter 7