Sacred Texts  Bible  Index 
Polyglot  KJV  Sep:JsB  Vul 

Joshua (Yehoshua) Index
  Previous  Next 

Tanach (Hebrew): Joshua (Yehoshua) Chapter 17

1 ‏וַיְהִ֤י הַגּוֹרָל֙ לְמַטֵּ֣ה מְנַשֶּׁ֔ה כִּי־ה֖וּא בְּכ֣וֹר יוֹסֵ֑ף לְמָכִיר֩ בְּכ֨וֹר מְנַשֶּׁ֜ה אֲבִ֣י הַגִּלְעָ֗ד כִּ֣י ה֤וּא הָיָה֙ אִ֣ישׁ מִלְחָמָ֔ה וַֽיְהִי־ל֖וֹ הַגִּלְעָ֥ד וְהַבָּשָֽׁן׃

2 ‏וַ֠יְהִי לִבְנֵ֨י מְנַשֶּׁ֥ה הַנּוֹתָרִים֮ לְמִשְׁפְּחֹתָם֒ לִבְנֵ֨י אֲבִיעֶ֜זֶר וְלִבְנֵי־חֵ֗לֶק וְלִבְנֵ֤י אַשְׂרִיאֵל֙ וְלִבְנֵי־שֶׁ֔כֶם וְלִבְנֵי־חֵ֖פֶר וְלִבְנֵ֣י שְׁמִידָ֑ע אֵ֠לֶּה בְּנֵ֨י מְנַשֶּׁ֧ה בֶּן־יוֹסֵ֛ף הַזְּכָרִ֖ים לְמִשְׁפְּחֹתָֽם׃

3 ‏וְלִצְלָפְחָד֩ בֶּן־חֵ֨פֶר בֶּן־גִּלְעָ֜ד בֶּן־מָכִ֣יר בֶּן־מְנַשֶּׁ֗ה לֹא־הָ֥יוּ ל֛וֹ בָּנִ֖ים כִּ֣י אִם־בָּנ֑וֹת וְאֵ֙לֶּה֙ שְׁמ֣וֹת בְּנֹתָ֔יו מַחְלָ֣ה וְנֹעָ֔ה חָגְלָ֥ה מִלְכָּ֖ה וְתִרְצָֽה׃

4 ‏וַתִּקְרַ֡בְנָה לִפְנֵי֩ אֶלְעָזָ֨ר הַכֹּהֵ֜ן וְלִפְנֵ֣י׀ יְהוֹשֻׁ֣עַ בִּן־נ֗וּן וְלִפְנֵ֤י הַנְּשִׂיאִים֙ לֵאמֹ֔ר יְהוָה֙ צִוָּ֣ה אֶת־מֹשֶׁ֔ה לָֽתֶת־לָ֥נוּ נַחֲלָ֖ה בְּת֣וֹךְ אַחֵ֑ינוּ וַיִּתֵּ֨ן לָהֶ֜ם אֶל־פִּ֤י יְהוָה֙ נַֽחֲלָ֔ה בְּת֖וֹךְ אֲחֵ֥י אֲבִיהֶֽן׃

5 ‏וַיִּפְּל֥וּ חַבְלֵֽי־מְנַשֶּׁ֖ה עֲשָׂרָ֑ה לְבַ֞ד מֵאֶ֤רֶץ הַגִּלְעָד֙ וְהַבָּשָׁ֔ן אֲשֶׁ֖ר מֵעֵ֥בֶר לַיַּרְדֵּֽן׃

6 ‏כִּ֚י בְּנ֣וֹת מְנַשֶּׁ֔ה נָחֲל֥וּ נַחֲלָ֖ה בְּת֣וֹךְ בָּנָ֑יו וְאֶ֙רֶץ֙ הַגִּלְעָ֔ד הָיְתָ֥ה לִבְנֵֽי־מְנַשֶּׁ֖ה הַנּֽוֹתָרִֽים׃

7 ‏וַיְהִ֤י גְבוּל־מְנַשֶּׁה֙ מֵֽאָשֵׁ֔ר הַֽמִּכְמְתָ֔ת אֲשֶׁ֖ר עַל־פְּנֵ֣י שְׁכֶ֑ם וְהָלַ֤ךְ הַגְּבוּל֙ אֶל־הַיָּמִ֔ין אֶל־יֹשְׁבֵ֖י עֵ֥ין תַּפּֽוּחַ׃

8 ‏לִמְנַשֶּׁ֕ה הָיְתָ֖ה אֶ֣רֶץ תַּפּ֑וּחַ וְתַפּ֛וּחַ אֶל־גְּב֥וּל מְנַשֶּׁ֖ה לִבְנֵ֥י אֶפְרָֽיִם׃

9 ‏וְיָרַ֣ד הַגְּבוּל֩ נַ֨חַל קָנָ֜ה נֶ֣גְבָּה לַנַּ֗חַל עָרִ֤ים הָאֵ֙לֶּה֙ לְאֶפְרַ֔יִם בְּת֖וֹךְ עָרֵ֣י מְנַשֶּׁ֑ה וּגְב֤וּל מְנַשֶּׁה֙ מִצְּפ֣וֹן לַנַּ֔חַל וַיְהִ֥י תֹצְאֹתָ֖יו הַיָּֽמָּה׃

10 ‏נֶ֣גְבָּה לְאֶפְרַ֗יִם וְצָפ֙וֹנָה֙ לִמְנַשֶּׁ֔ה וַיְהִ֥י הַיָּ֖ם גְּבוּל֑וֹ וּבְאָשֵׁר֙ יִפְגְּע֣וּן מִצָּפ֔וֹן וּבְיִשָּׂשכָ֖ר מִמִּזְרָֽח׃

11 ‏וַיְהִ֨י לִמְנַשֶּׁ֜ה בְּיִשָּׂשכָ֣ר וּבְאָשֵׁ֗ר בֵּית־שְׁאָ֣ן וּ֠בְנוֹתֶיהָ וְיִבְלְעָ֨ם וּבְנוֹתֶ֜יהָ וְֽאֶת־יֹשְׁבֵ֧י דֹ֣אר וּבְנוֹתֶ֗יהָ וְיֹשְׁבֵ֤י עֵֽין־דֹּר֙ וּבְנֹתֶ֔יהָ וְיֹשְׁבֵ֤י תַעְנַךְ֙ וּבְנֹתֶ֔יהָ וְיֹשְׁבֵ֥י מְגִדּ֖וֹ וּבְנוֹתֶ֑יהָ שְׁלֹ֖שֶׁת הַנָּֽפֶת׃

12 ‏וְלֹ֤א יָכְלוּ֙ בְּנֵ֣י מְנַשֶּׁ֔ה לְהוֹרִ֖ישׁ אֶת־הֶֽעָרִ֣ים הָאֵ֑לֶּה וַיּ֙וֹאֶל֙ הַֽכְּנַעֲנִ֔י לָשֶׁ֖בֶת בָּאָ֥רֶץ הַזֹּֽאת׃

13 ‏וַֽיְהִ֗י כִּ֤י חָֽזְקוּ֙ בְּנֵ֣י יִשְׂרָאֵ֔ל וַיִּתְּנ֥וּ אֶת־הַֽכְּנַעֲנִ֖י לָמַ֑ס וְהוֹרֵ֖שׁ לֹ֥א הוֹרִישֽׁוֹ׃ ס

14 ‏וַֽיְדַבְּרוּ֙ בְּנֵ֣י יוֹסֵ֔ף אֶת־יְהוֹשֻׁ֖עַ לֵאמֹ֑ר מַדּוּעַ֩ נָתַ֨תָּה לִּ֜י נַחֲלָ֗ה גּוֹרָ֤ל אֶחָד֙ וְחֶ֣בֶל אֶחָ֔ד וַֽאֲנִ֣י עַם־רָ֔ב עַ֥ד אֲשֶׁר־עַד־כֹּ֖ה בֵּֽרְכַ֥נִי יְהוָֽה׃

15 ‏וַיֹּ֨אמֶר אֲלֵיהֶ֜ם יְהוֹשֻׁ֗עַ אִם־עַם־רַ֤ב אַתָּה֙ עֲלֵ֣ה לְךָ֣ הַיַּ֔עְרָה וּבֵרֵאתָ֤ לְךָ֙ שָׁ֔ם בְּאֶ֥רֶץ הַפְּרִזִּ֖י וְהָֽרְפָאִ֑ים כִּֽי־אָ֥ץ לְךָ֖ הַר־אֶפְרָֽיִם׃

16 ‏וַיֹּֽאמְרוּ֙ בְּנֵ֣י יוֹסֵ֔ף לֹֽא־יִמָּ֥צֵא לָ֖נוּ הָהָ֑ר וְרֶ֣כֶב בַּרְזֶ֗ל בְּכָל־הַֽכְּנַעֲנִי֙ הַיֹּשֵׁ֣ב בְּאֶֽרֶץ־הָעֵ֔מֶק לַֽאֲשֶׁ֤ר בְּבֵית־שְׁאָן֙ וּבְנוֹתֶ֔יהָ וְלַֽאֲשֶׁ֖ר בְּעֵ֥מֶק יִזְרְעֶֽאל׃

17 ‏וַיֹּ֤אמֶר יְהוֹשֻׁ֙עַ֙ אֶל־בֵּ֣ית יוֹסֵ֔ף לְאֶפְרַ֥יִם וְלִמְנַשֶּׁ֖ה לֵאמֹ֑ר עַם־רַ֣ב אַתָּ֗ה וְכֹ֤חַ גָּדוֹל֙ לָ֔ךְ לֹֽא־יִהְיֶ֥ה לְךָ֖ גּוֹרָ֥ל אֶחָֽד׃

18 ‏כִּ֣י הַ֤ר יִֽהְיֶה־לָּךְ֙ כִּֽי־יַ֣עַר ה֔וּא וּבֵ֣רֵאת֔וֹ וְהָיָ֥ה לְךָ֖ תֹּֽצְאֹתָ֑יו כִּֽי־תוֹרִ֣ישׁ אֶת־הַֽכְּנַעֲנִ֗י כִּ֣י רֶ֤כֶב בַּרְזֶל֙ ל֔וֹ כִּ֥י חָזָ֖ק הֽוּא׃ פ

1 wayəhî hagwōrāl ləmaṭṭēh mənaššeh kî-hû’ bəḵwōr ywōsēf ləmāḵîr bəḵwōr mənaššeh ’ăḇî hagilə‘āḏ kî hû’ hāyâ ’îš miləḥāmâ wayəhî-lwō hagilə‘āḏ wəhabāšān:

2 wayəhî liḇənê mənaššeh hannwōṯārîm ləmišəpəḥōṯām liḇənê ’ăḇî‘ezer wəliḇənê-ḥēleq wəliḇənê ’aśərî’ēl wəliḇənê-šeḵem wəliḇənê-ḥēfer wəliḇənê šəmîḏā‘ ’ēlleh bənê mənaššeh ben-ywōsēf hazzəḵārîm ləmišəpəḥōṯām:

3 wəliṣəlāfəḥāḏ ben-ḥēfer ben-gilə‘āḏ ben-māḵîr ben-mənaššeh lō’-hāyû lwō bānîm kî ’im-bānwōṯ wə’ēlleh šəmwōṯ bənōṯāyw maḥəlâ wənō‘â ḥāḡəlâ miləkâ wəṯirəṣâ:

4 watiqəraḇənâ lifənê ’elə‘āzār hakōhēn wəlifənê| yəhwōšu‘a bin-nûn wəlifənê hannəśî’îm lē’mōr yəhwâ ṣiûâ ’eṯ-mōšeh lāṯeṯ-lānû naḥălâ bəṯwōḵə ’aḥênû wayyitēn lâem ’el-pî yəhwâ naḥălâ bəṯwōḵə ’ăḥê ’ăḇîhen:

5 wayyipəlû ḥaḇəlê-mənaššeh ‘ăśārâ ləḇaḏ mē’ereṣ hagilə‘āḏ wəhabāšān ’ăšer mē‘ēḇer layyarədēn:

6 kî bənwōṯ mənaššeh nāḥălû naḥălâ bəṯwōḵə bānāyw wə’ereṣ hagilə‘āḏ hāyəṯâ liḇənê-mənaššeh hannwōṯārîm:

7 wayəhî ḡəḇûl-mənaššeh mē’āšēr hammiḵəməṯāṯ ’ăšer ‘al-pənê šəḵem wəhālaḵə hagəḇûl ’el-hayyāmîn ’el-yōšəḇê ‘ên tapûḥa:

8 limənaššeh hāyəṯâ ’ereṣ tapûḥa wəṯapûḥa ’el-gəḇûl mənaššeh liḇənê ’efərāyim:

9 wəyāraḏ hagəḇûl naḥal qānâ neḡəbâ lannaḥal ‘ārîm hā’ēlleh lə’efərayim bəṯwōḵə ‘ārê mənaššeh ûḡəḇûl mənaššeh miṣṣəfwōn lannaḥal wayəhî ṯōṣə’ōṯāyw hayyāmmâ:

10 neḡəbâ lə’efərayim wəṣāfwōnâ limənaššeh wayəhî hayyām gəḇûlwō ûḇə’āšēr yifəgə‘ûn miṣṣāfwōn ûḇəyiśśāsḵār mimmizərāḥ:

11 wayəhî limənaššeh bəyiśśāsḵār ûḇə’āšēr bêṯ-šə’ān ûḇənwōṯeyhā wəyiḇələ‘ām ûḇənwōṯeyhā wə’eṯ-yōšəḇê ḏō’r ûḇənwōṯeyhā wəyōšəḇê ‘ên-dōr ûḇənōṯeyhā wəyōšəḇê ṯa‘ənaḵə ûḇənōṯeyhā wəyōšəḇê məḡidwō ûḇənwōṯeyhā šəlōšeṯ hannāfeṯ:

12 wəlō’ yāḵəlû bənê mənaššeh ləhwōrîš ’eṯ-he‘ārîm hā’ēlleh wayywō’el hakəna‘ănî lāšeḇeṯ bā’āreṣ hazzō’ṯ:

13 wayəhî kî ḥāzəqû bənê yiśərā’ēl wayyitənû ’eṯ-hakəna‘ănî lāmas wəhwōrēš lō’ hwōrîšwō: s

14 wayəḏabərû bənê ywōsēf ’eṯ-yəhwōšu‘a lē’mōr madû‘a nāṯatâ llî naḥălâ gwōrāl ’eḥāḏ wəḥeḇel ’eḥāḏ wa’ănî ‘am-rāḇ ‘aḏ ’ăšer-‘aḏ-kōh bērəḵanî yəhwâ:

15 wayyō’mer ’ălêhem yəhwōšu‘a ’im-‘am-raḇ ’atâ ‘ălēh ləḵā hayya‘ərâ ûḇērē’ṯā ləḵā šām bə’ereṣ hapərizzî wəhārəfā’îm kî-’āṣ ləḵā har-’efərāyim:

16 wayyō’mərû bənê ywōsēf lō’-yimmāṣē’ lānû hâār wəreḵeḇ barəzel bəḵāl-hakəna‘ănî hayyōšēḇ bə’ereṣ-hā‘ēmeq la’ăšer bəḇêṯ-šə’ān ûḇənwōṯeyhā wəla’ăšer bə‘ēmeq yizərə‘e’l:

17 wayyō’mer yəhwōšu‘a ’el-bêṯ ywōsēf lə’efərayim wəlimənaššeh lē’mōr ‘am-raḇ ’atâ wəḵōḥa gāḏwōl lāḵə lō’-yihəyeh ləḵā gwōrāl ’eḥāḏ:

18 kî har yihəyeh-llāḵə kî-ya‘ar hû’ ûḇērē’ṯwō wəhāyâ ləḵā tōṣə’ōṯāyw kî-ṯwōrîš ’eṯ-hakəna‘ănî kî reḵeḇ barəzel lwō kî ḥāzāq hû’: f


Next: Joshua (Yehoshua) Chapter 18