Sacred Texts  Bible  Index 
Polyglot  KJV  Sep:JsB  Vul 

Joshua (Yehoshua) Index
  Previous  Next 

Tanach (Hebrew): Joshua (Yehoshua) Chapter 14

1 ‏וְאֵ֛לֶּה אֲשֶׁר־נָחֲל֥וּ בְנֵֽי־יִשְׂרָאֵ֖ל בְּאֶ֣רֶץ כְּנָ֑עַן אֲשֶׁ֨ר נִֽחֲל֜וּ אוֹתָ֗ם אֶלְעָזָ֤ר הַכֹּהֵן֙ וִיהוֹשֻׁ֣עַ בִּן־נ֔וּן וְרָאשֵׁ֛י אֲב֥וֹת הַמַּטּ֖וֹת לִבְנֵ֥י יִשְׂרָאֵֽל׃

2 ‏בְּגוֹרַ֖ל נַחֲלָתָ֑ם כַּאֲשֶׁ֨ר צִוָּ֤ה יְהוָה֙ בְּיַד־מֹשֶׁ֔ה לְתִשְׁעַ֥ת הַמַּטּ֖וֹת וַחֲצִ֥י הַמַּטֶּֽה׃

3 ‏כִּֽי־נָתַ֨ן מֹשֶׁ֜ה נַחֲלַ֨ת שְׁנֵ֤י הַמַּטּוֹת֙ וַחֲצִ֣י הַמַּטֶּ֔ה מֵעֵ֖בֶר לַיַּרְדֵּ֑ן וְלַ֨לְוִיִּ֔ם לֹֽא־נָתַ֥ן נַחֲלָ֖ה בְּתוֹכָֽם׃

4 ‏כִּֽי־הָי֧וּ בְנֵֽי־יוֹסֵ֛ף שְׁנֵ֥י מַטּ֖וֹת מְנַשֶּׁ֣ה וְאֶפְרָ֑יִם וְלֹֽא־נָתְנוּ֩ חֵ֨לֶק לַלְוִיִּ֜ם בָּאָ֗רֶץ כִּ֤י אִם־עָרִים֙ לָשֶׁ֔בֶת וּמִ֨גְרְשֵׁיהֶ֔ם לְמִקְנֵיהֶ֖ם וּלְקִנְיָנָֽם׃

5 ‏כַּאֲשֶׁ֨ר צִוָּ֤ה יְהוָה֙ אֶת־מֹשֶׁ֔ה כֵּ֥ן עָשׂ֖וּ בְּנֵ֣י יִשְׂרָאֵ֑ל וַֽיַּחְלְק֖וּ אֶת־הָאָֽרֶץ׃ פ

6 ‏וַיִּגְּשׁ֨וּ בְנֵֽי־יְהוּדָ֤ה אֶל־יְהוֹשֻׁ֙עַ֙ בַּגִּלְגָּ֔ל וַיֹּ֣אמֶר אֵלָ֔יו כָּלֵ֥ב בֶּן־יְפֻנֶּ֖ה הַקְּנִזִּ֑י אַתָּ֣ה יָדַ֡עְתָּ אֶֽת־הַדָּבָר֩ אֲשֶׁר־דִּבֶּ֨ר יְהוָ֜ה אֶל־מֹשֶׁ֣ה אִישׁ־הָאֱלֹהִ֗ים עַ֧ל אֹדוֹתַ֛י וְעַ֥ל אֹדוֹתֶ֖יךָ בְּקָדֵ֥שׁ בַּרְנֵֽעַ׃

7 ‏בֶּן־אַרְבָּעִ֨ים שָׁנָ֜ה אָנֹכִ֗י בִּ֠שְׁלֹחַ מֹשֶׁ֨ה עֶֽבֶד־יְהוָ֥ה אֹתִ֛י מִקָּדֵ֥שׁ בַּרְנֵ֖עַ לְרַגֵּ֣ל אֶת־הָאָ֑רֶץ וָאָשֵׁ֤ב אֹתוֹ֙ דָּבָ֔ר כַּאֲשֶׁ֖ר עִם־לְבָבִֽי׃

8 ‏וְאַחַי֙ אֲשֶׁ֣ר עָל֣וּ עִמִּ֔י הִמְסִ֖יו אֶת־לֵ֣ב הָעָ֑ם וְאָנֹכִ֣י מִלֵּ֔אתִי אַחֲרֵ֖י יְהוָ֥ה אֱלֹהָֽי׃

9 ‏וַיִּשָּׁבַ֣ע מֹשֶׁ֗ה בַּיּ֣וֹם הַהוּא֮ לֵאמֹר֒ אִם־לֹ֗א הָאָ֙רֶץ֙ אֲשֶׁ֨ר דָּרְכָ֤ה רַגְלְךָ֙ בָּ֔הּ לְךָ֨3 תִֽהְיֶ֧ה לְנַחֲלָ֛ה וּלְבָנֶ֖יךָ עַד־עוֹלָ֑ם כִּ֣י מִלֵּ֔אתָ אַחֲרֵ֖י יְהוָ֥ה אֱלֹהָֽי׃

10 ‏וְעַתָּ֗ה הִנֵּה֩ הֶחֱיָ֨ה יְהוָ֣ה׀ אוֹתִי֮ כַּאֲשֶׁ֣ר דִּבֵּר֒ זֶה֩ אַרְבָּעִ֨ים וְחָמֵ֜שׁ שָׁנָ֗ה מֵ֠אָז דִּבֶּ֨ר יְהוָ֜ה אֶת־הַדָּבָ֤ר הַזֶּה֙ אֶל־מֹשֶׁ֔ה אֲשֶׁר־הָלַ֥ךְ יִשְׂרָאֵ֖ל בַּמִּדְבָּ֑ר וְעַתָּה֙ הִנֵּ֣ה אָנֹכִ֣י הַיּ֔וֹם בֶּן־חָמֵ֥שׁ וּשְׁמוֹנִ֖ים שָׁנָֽה׃

11 ‏עוֹדֶ֨נִּי הַיּ֜וֹם חָזָ֗ק כַּֽאֲשֶׁר֙ בְּי֨וֹם שְׁלֹ֤חַ אוֹתִי֙ מֹשֶׁ֔ה כְּכֹ֥חִי אָ֖ז וּכְכֹ֣חִי עָ֑תָּה לַמִּלְחָמָ֖ה וְלָצֵ֥את וְלָבֽוֹא׃

12 ‏וְעַתָּ֗ה תְּנָה־לִּי֙ אֶת־הָהָ֣ר הַזֶּ֔ה אֲשֶׁר־דִּבֶּ֥ר יְהוָ֖ה בַּיּ֣וֹם הַה֑וּא כִּ֣י אַתָּֽה־שָׁמַעְתָּ֩ בַיּ֨וֹם הַה֜וּא כִּֽי־עֲנָקִ֣ים שָׁ֗ם וְעָרִים֙ גְּדֹל֣וֹת בְּצֻר֔וֹת אוּלַ֨י יְהוָ֤ה אוֹתִי֙ וְה֣וֹרַשְׁתִּ֔ים כַּאֲשֶׁ֖ר דִּבֶּ֥ר יְהוָֽה׃

13 ‏וַֽיְבָרְכֵ֖הוּ יְהוֹשֻׁ֑עַ וַיִּתֵּ֧ן אֶת־חֶבְר֛וֹן לְכָלֵ֥ב בֶּן־יְפֻנֶּ֖ה לְנַחֲלָֽה׃

14 ‏עַל־כֵּ֣ן הָיְתָֽה־חֶ֠בְרוֹן לְכָלֵ֨ב בֶּן־יְפֻנֶּ֤ה הַקְּנִזִּי֙ לְֽנַחֲלָ֔ה עַ֖ד הַיּ֣וֹם הַזֶּ֑ה יַ֚עַן אֲשֶׁ֣ר מִלֵּ֔א אַחֲרֵ֕י יְהוָ֖ה אֱלֹהֵ֥י יִשְׂרָאֵֽל׃

15 ‏וְשֵׁ֨ם חֶבְר֤וֹן לְפָנִים֙ קִרְיַ֣ת אַרְבַּ֔ע הָאָדָ֧ם הַגָּד֛וֹל בָּעֲנָקִ֖ים ה֑וּא וְהָאָ֥רֶץ שָׁקְטָ֖ה מִמִּלְחָמָֽה׃ פ

1 wə’ēlleh ’ăšer-nāḥălû ḇənê-yiśərā’ēl bə’ereṣ kənā‘an ’ăšer niḥălû ’wōṯām ’elə‘āzār hakōhēn wîhwōšu‘a bin-nûn wərā’šê ’ăḇwōṯ hammaṭṭwōṯ liḇənê yiśərā’ēl:

2 bəḡwōral naḥălāṯām ka’ăšer ṣiûâ yəhwâ bəyaḏ-mōšeh ləṯišə‘aṯ hammaṭṭwōṯ waḥăṣî hammaṭṭeh:

3 kî-nāṯan mōšeh naḥălaṯ šənê hammaṭṭwōṯ waḥăṣî hammaṭṭeh mē‘ēḇer layyarədēn wəlaləwîyim lō’-nāṯan naḥălâ bəṯwōḵām:

4 kî-hāyû ḇənê-ywōsēf šənê maṭṭwōṯ mənaššeh wə’efərāyim wəlō’-nāṯənû ḥēleq laləwîyim bā’āreṣ kî ’im-‘ārîm lāšeḇeṯ ûmiḡərəšêhem ləmiqənêhem ûləqinəyānām:

5 ka’ăšer ṣiûâ yəhwâ ’eṯ-mōšeh kēn ‘āśû bənê yiśərā’ēl wayyaḥələqû ’eṯ-hā’āreṣ: f

6 wayyigəšû ḇənê-yəhûḏâ ’el-yəhwōšu‘a bagiləgāl wayyō’mer ’ēlāyw kālēḇ ben-yəfunneh haqqənizzî ’atâ yāḏa‘ətā ’eṯ-hadāḇār ’ăšer-diber yəhwâ ’el-mōšeh ’îš-hā’ĕlōhîm ‘al ’ōḏwōṯay wə‘al ’ōḏwōṯeyḵā bəqāḏēš barənē‘a:

7 ben-’arəbā‘îm šānâ ’ānōḵî bišəlōḥa mōšeh ‘eḇeḏ-yəhwâ ’ōṯî miqqāḏēš barənē‘a ləragēl ’eṯ-hā’āreṣ wā’āšēḇ ’ōṯwō dāḇār ka’ăšer ‘im-ləḇāḇî:

8 wə’aḥay ’ăšer ‘ālû ‘immî himəsîw ’eṯ-lēḇ hā‘ām wə’ānōḵî millē’ṯî ’aḥărê yəhwâ ’ĕlōhāy:

9 wayyiššāḇa‘ mōšeh bayywōm hahû’ lē’mōr ’im-lō’ hā’āreṣ ’ăšer dārəḵâ raḡələḵā bāh ləḵā3 ṯihəyeh lənaḥălâ ûləḇāneyḵā ‘aḏ-‘wōlām kî millē’ṯā ’aḥărê yəhwâ ’ĕlōhāy:

10 wə‘atâ hinnēh heḥĕyâ yəhwâ| ’wōṯî ka’ăšer dibēr zeh ’arəbā‘îm wəḥāmēš šānâ mē’āz diber yəhwâ ’eṯ-hadāḇār hazzeh ’el-mōšeh ’ăšer-hālaḵə yiśərā’ēl bammiḏəbār wə‘atâ hinnēh ’ānōḵî hayywōm ben-ḥāmēš ûšəmwōnîm šānâ:

11 ‘wōḏennî hayywōm ḥāzāq ka’ăšer bəywōm šəlōḥa ’wōṯî mōšeh kəḵōḥî ’āz ûḵəḵōḥî ‘ātâ lammiləḥāmâ wəlāṣē’ṯ wəlāḇwō’:

12 wə‘atâ tənâ-llî ’eṯ-hâār hazzeh ’ăšer-diber yəhwâ bayywōm hahû’ kî ’atâ-šāma‘ətā ḇayywōm hahû’ kî-‘ănāqîm šām wə‘ārîm gəḏōlwōṯ bəṣurwōṯ ’ûlay yəhwâ ’wōṯî wəhwōrašətîm ka’ăšer diber yəhwâ:

13 wayəḇārəḵēhû yəhwōšu‘a wayyitēn ’eṯ-ḥeḇərwōn ləḵālēḇ ben-yəfunneh lənaḥălâ:

14 ‘al-kēn hāyəṯâ-ḥeḇərwōn ləḵālēḇ ben-yəfunneh haqqənizzî lənaḥălâ ‘aḏ hayywōm hazzeh ya‘an ’ăšer millē’ ’aḥărê yəhwâ ’ĕlōhê yiśərā’ēl:

15 wəšēm ḥeḇərwōn ləfānîm qirəyaṯ ’arəba‘ hā’āḏām hagāḏwōl bā‘ănāqîm hû’ wəhā’āreṣ šāqəṭâ mimmiləḥāmâ: f


Next: Joshua (Yehoshua) Chapter 15