Sacred Texts  Bible  Index 
Polyglot  KJV  Sep:JsB  Vul 

Joshua (Yehoshua) Index
  Previous  Next 

Tanach (Hebrew): Joshua (Yehoshua) Chapter 11

1 ‏וַיְהִ֕י כִּשְׁמֹ֖עַ יָבִ֣ין מֶֽלֶךְ־חָצ֑וֹר וַיִּשְׁלַ֗ח אֶל־יוֹבָב֙ מֶ֣לֶךְ מָד֔וֹן וְאֶל־מֶ֥לֶךְ שִׁמְר֖וֹן וְאֶל־מֶ֥לֶךְ אַכְשָֽׁף׃

2 ‏וְֽאֶל־הַמְּלָכִ֞ים אֲשֶׁ֣ר מִצְּפ֗וֹן בָּהָ֧ר וּבָעֲרָבָ֛ה נֶ֥גֶב כִּֽנֲר֖וֹת וּבַשְּׁפֵלָ֑ה וּבְנָפ֥וֹת דּ֖וֹר מִיָּֽם׃

3 ‏הַֽכְּנַעֲנִי֙ מִמִּזְרָ֣ח וּמִיָּ֔ם וְהָאֱמֹרִ֧י וְהַחִתִּ֛י וְהַפְּרִזִּ֥י וְהַיְבוּסִ֖י בָּהָ֑ר וְהַֽחִוִּי֙ תַּ֣חַת חֶרְמ֔וֹן בְּאֶ֖רֶץ הַמִּצְפָּֽה׃

4 ‏וַיֵּצְא֣וּ הֵ֗ם וְכָל־מַֽחֲנֵיהֶם֙ עִמָּ֔ם עַם־רָ֕ב כַּח֛וֹל אֲשֶׁ֥ר עַל־שְׂפַת־הַיָּ֖ם לָרֹ֑ב וְס֥וּס וָרֶ֖כֶב רַב־מְאֹֽד׃

5 ‏וַיִּוָּ֣עֲד֔וּ כֹּ֖ל הַמְּלָכִ֣ים הָאֵ֑לֶּה וַיָּבֹ֜אוּ וַיַּחֲנ֤וּ יַחְדָּו֙ אֶל־מֵ֣י מֵר֔וֹם לְהִלָּחֵ֖ם עִם־יִשְׂרָאֵֽל׃ פ

6 ‏וַיֹּ֨אמֶר יְהוָ֣ה אֶל־יְהוֹשֻׁעַ֮ אַל־תִּירָ֣א מִפְּנֵיהֶם֒ כִּֽי־מָחָ֞ר כָּעֵ֣ת הַזֹּ֗את אָנֹכִ֞י נֹתֵ֧ן אֶת־כֻּלָּ֛ם חֲלָלִ֖ים לִפְנֵ֣י יִשְׂרָאֵ֑ל אֶת־סוּסֵיהֶ֣ם תְּעַקֵּ֔ר וְאֶת־מַרְכְּבֹתֵיהֶ֖ם תִּשְׂרֹ֥ף בָּאֵֽשׁ׃

7 ‏וַיָּבֹ֣א יְהוֹשֻׁ֡עַ וְכָל־עַם֩ הַמִּלְחָמָ֨ה עִמּ֧וֹ עֲלֵיהֶ֛ם עַל־מֵ֥י מֵר֖וֹם פִּתְאֹ֑ם וַֽיִּפְּל֖וּ בָּהֶֽם׃

8 ‏וַיִּתְּנֵ֨ם יְהוָ֥ה בְּיַֽד־יִשְׂרָאֵל֮ וַיַּכּוּם֒ וַֽיִּרְדְּפ֞וּם עַד־צִיד֣וֹן רַבָּ֗ה וְעַד֙ מִשְׂרְפ֣וֹת מַ֔יִם וְעַד־בִּקְעַ֥ת מִצְפֶּ֖ה מִזְרָ֑חָה וַיַּכֻּ֕ם עַד־בִּלְתִּ֥י הִשְׁאִֽיר־לָהֶ֖ם שָׂרִֽיד׃

9 ‏וַיַּ֤עַשׂ לָהֶם֙ יְהוֹשֻׁ֔עַ כַּאֲשֶׁ֥ר אָֽמַר־ל֖וֹ יְהוָ֑ה אֶת־סוּסֵיהֶ֣ם עִקֵּ֔ר וְאֶת־מַרְכְּבֹתֵיהֶ֖ם שָׂרַ֥ף בָּאֵֽשׁ׃ ס

10 ‏וַיָּ֨שָׁב יְהוֹשֻׁ֜עַ בָּעֵ֤ת הַהִיא֙ וַיִּלְכֹּ֣ד אֶת־חָצ֔וֹר וְאֶת־מַלְכָּ֖הּ הִכָּ֣ה בֶחָ֑רֶב כִּֽי־חָצ֣וֹר לְפָנִ֔ים הִ֕יא רֹ֖אשׁ כָּל־הַמַּמְלָכ֥וֹת הָאֵֽלֶּה׃

11 ‏וַ֠יַּכּוּ אֶת־כָּל־הַנֶּ֨פֶשׁ אֲשֶׁר־בָּ֤הּ לְפִי־חֶ֙רֶב֙ הַֽחֲרֵ֔ם לֹ֥א נוֹתַ֖ר כָּל־נְשָׁמָ֑ה וְאֶת־חָצ֖וֹר שָׂרַ֥ף בָּאֵֽשׁ׃

12 ‏וְֽאֶת־כָּל־עָרֵ֣י הַמְּלָכִֽים־הָ֠אֵלֶּה וְֽאֶת־כָּל־מַלְכֵיהֶ֞ם לָכַ֧ד יְהוֹשֻׁ֛עַ וַיַּכֵּ֥ם לְפִי־חֶ֖רֶב הֶחֱרִ֣ים אוֹתָ֑ם כַּאֲשֶׁ֣ר צִוָּ֔ה מֹשֶׁ֖ה עֶ֥בֶד יְהוָֽה׃

13 ‏רַ֣ק כָּל־הֶעָרִ֗ים הָעֹֽמְדוֹת֙ עַל־תִּלָּ֔ם לֹ֥א שְׂרָפָ֖ם יִשְׂרָאֵ֑ל זוּלָתִ֛י אֶת־חָצ֥וֹר לְבַדָּ֖הּ שָׂרַ֥ף יְהוֹשֻֽׁעַ׃

14 ‏וְ֠כֹל שְׁלַ֞ל הֶעָרִ֤ים הָאֵ֙לֶּה֙ וְהַבְּהֵמָ֔ה בָּזְז֥וּ לָהֶ֖ם בְּנֵ֣י יִשְׂרָאֵ֑ל רַ֣ק אֶֽת־כָּל־הָאָדָ֞ם הִכּ֣וּ לְפִי־חֶ֗רֶב עַד־הִשְׁמִדָם֙ אוֹתָ֔ם לֹ֥א הִשְׁאִ֖ירוּ כָּל־נְשָׁמָֽה׃

15 ‏כַּאֲשֶׁ֨ר צִוָּ֤ה יְהוָה֙ אֶת־מֹשֶׁ֣ה עַבְדּ֔וֹ כֵּן־צִוָּ֥ה מֹשֶׁ֖ה אֶת־יְהוֹשֻׁ֑עַ וְכֵן֙ עָשָׂ֣ה יְהוֹשֻׁ֔עַ לֹֽא־הֵסִ֣יר דָּבָ֔ר מִכֹּ֛ל אֲשֶׁר־צִוָּ֥ה יְהוָ֖ה אֶת־מֹשֶֽׁה׃

16 ‏וַיִּקַּ֨ח יְהוֹשֻׁ֜עַ אֶת־כָּל־הָאָ֣רֶץ הַזֹּ֗את הָהָ֤ר וְאֶת־כָּל־הַנֶּ֙גֶב֙ וְאֵת֙ כָּל־אֶ֣רֶץ הַגֹּ֔שֶׁן וְאֶת־הַשְּׁפֵלָ֖ה וְאֶת־הָעֲרָבָ֑ה וְאֶת־הַ֥ר יִשְׂרָאֵ֖ל וּשְׁפֵלָתֹֽה׃

17 ‏מִן־הָהָ֤ר הֶֽחָלָק֙ הָעוֹלֶ֣ה שֵׂעִ֔יר וְעַד־בַּ֤עַל3 גָּד֙ בְּבִקְעַ֣ת הַלְּבָנ֔וֹן תַּ֖חַת הַר־חֶרְמ֑וֹן וְאֵ֤ת כָּל־מַלְכֵיהֶם֙ לָכַ֔ד וַיַּכֵּ֖ם וַיְמִיתֵֽם׃

18 ‏יָמִ֣ים רַבִּ֗ים עָשָׂ֧ה יְהוֹשֻׁ֛עַ אֶת־כָּל־הַמְּלָכִ֥ים הָאֵ֖לֶּה מִלְחָמָֽה׃

19 ‏לֹֽא־הָיְתָ֣ה עִ֗יר אֲשֶׁ֤ר הִשְׁלִ֙ימָה֙ אֶל־בְּנֵ֣י יִשְׂרָאֵ֔ל בִּלְתִּ֥י הַחִוִּ֖י יֹשְׁבֵ֣י גִבְע֑וֹן אֶת־הַכֹּ֖ל לָקְח֥וּ בַמִּלְחָמָֽה׃

20 ‏כִּ֣י מֵאֵ֣ת יְהוָ֣ה׀ הָיְתָ֡ה לְחַזֵּ֣ק אֶת־לִבָּם֩ לִקְרַ֨את הַמִּלְחָמָ֤ה אֶת־יִשְׂרָאֵל֙ לְמַ֣עַן הַֽחֲרִימָ֔ם לְבִלְתִּ֥י הֱיוֹת־לָהֶ֖ם תְּחִנָּ֑ה כִּ֚י לְמַ֣עַן הַשְׁמִידָ֔ם כַּאֲשֶׁ֛ר צִוָּ֥ה יְהוָ֖ה אֶת־מֹשֶֽׁה׃ ס

21 ‏וַיָּבֹ֨א יְהוֹשֻׁ֜עַ בָּעֵ֣ת הַהִ֗יא וַיַּכְרֵ֤ת אֶת־הָֽעֲנָקִים֙ מִן־הָהָ֤ר מִן־חֶבְרוֹן֙ מִן־דְּבִ֣ר מִן־עֲנָ֔ב וּמִכֹּל֙ הַ֣ר יְהוּדָ֔ה וּמִכֹּ֖ל הַ֣ר יִשְׂרָאֵ֑ל עִם־עָרֵיהֶ֖ם הֶחֱרִימָ֥ם יְהוֹשֻֽׁעַ׃

22 ‏לֹֽא־נוֹתַ֣ר עֲנָקִ֔ים בְּאֶ֖רֶץ בְּנֵ֣י יִשְׂרָאֵ֑ל רַ֗ק בְּעַזָּ֛ה בְּגַ֥ת וּבְאַשְׁדּ֖וֹד נִשְׁאָֽרוּ׃

23 ‏וַיִּקַּ֨ח יְהוֹשֻׁ֜עַ אֶת־כָּל־הָאָ֗רֶץ כְּ֠כֹל אֲשֶׁ֨ר דִּבֶּ֣ר יְהוָה֮ אֶל־מֹשֶׁה֒ וַיִּתְּנָהּ֩ יְהוֹשֻׁ֨עַ לְנַחֲלָ֧ה לְיִשְׂרָאֵ֛ל כְּמַחְלְקֹתָ֖ם לְשִׁבְטֵיהֶ֑ם וְהָאָ֥רֶץ שָׁקְטָ֖ה מִמִּלְחָמָֽה׃ פ

1 wayəhî kišəmō‘a yāḇîn meleḵə-ḥāṣwōr wayyišəlaḥ ’el-ywōḇāḇ meleḵə māḏwōn wə’el-meleḵə šimərwōn wə’el-meleḵə ’aḵəšāf:

2 wə’el-hamməlāḵîm ’ăšer miṣṣəfwōn bâār ûḇā‘ărāḇâ neḡeḇ kinărwōṯ ûḇaššəfēlâ ûḇənāfwōṯ dwōr mîyām:

3 hakəna‘ănî mimmizərāḥ ûmîyām wəhā’ĕmōrî wəhaḥitî wəhapərizzî wəhayəḇûsî bâār wəhaḥiûî taḥaṯ ḥerəmwōn bə’ereṣ hammiṣəpâ:

4 wayyēṣə’û hēm wəḵāl-maḥănêhem ‘immām ‘am-rāḇ kaḥwōl ’ăšer ‘al-śəfaṯ-hayyām lārōḇ wəsûs wāreḵeḇ raḇ-mə’ōḏ:

5 wayyiûā‘ăḏû kōl hamməlāḵîm hā’ēlleh wayyāḇō’û wayyaḥănû yaḥədāw ’el-mê mērwōm ləhillāḥēm ‘im-yiśərā’ēl: f

6 wayyō’mer yəhwâ ’el-yəhwōšu‘a ’al-tîrā’ mipənêhem kî-māḥār kā‘ēṯ hazzō’ṯ ’ānōḵî nōṯēn ’eṯ-kullām ḥălālîm lifənê yiśərā’ēl ’eṯ-sûsêhem tə‘aqqēr wə’eṯ-marəkəḇōṯêhem tiśərōf bā’ēš:

7 wayyāḇō’ yəhwōšu‘a wəḵāl-‘am hammiləḥāmâ ‘immwō ‘ălêhem ‘al-mê mērwōm piṯə’ōm wayyipəlû bâem:

8 wayyitənēm yəhwâ bəyaḏ-yiśərā’ēl wayyakûm wayyirədəfûm ‘aḏ-ṣîḏwōn rabâ wə‘aḏ miśərəfwōṯ mayim wə‘aḏ-biqə‘aṯ miṣəpeh mizərāḥâ wayyakum ‘aḏ-bilətî hišə’îr-lâem śārîḏ:

9 wayya‘aś lâem yəhwōšu‘a ka’ăšer ’āmar-lwō yəhwâ ’eṯ-sûsêhem ‘iqqēr wə’eṯ-marəkəḇōṯêhem śāraf bā’ēš: s

10 wayyāšāḇ yəhwōšu‘a bā‘ēṯ hahî’ wayyiləkōḏ ’eṯ-ḥāṣwōr wə’eṯ-maləkāh hikâ ḇeḥāreḇ kî-ḥāṣwōr ləfānîm hî’ rō’š kāl-hammaməlāḵwōṯ hā’ēlleh:

11 wayyakû ’eṯ-kāl-hannefeš ’ăšer-bāh ləfî-ḥereḇ haḥărēm lō’ nwōṯar kāl-nəšāmâ wə’eṯ-ḥāṣwōr śāraf bā’ēš:

12 wə’eṯ-kāl-‘ārê hamməlāḵîm-hā’ēlleh wə’eṯ-kāl-maləḵêhem lāḵaḏ yəhwōšu‘a wayyakēm ləfî-ḥereḇ heḥĕrîm ’wōṯām ka’ăšer ṣiûâ mōšeh ‘eḇeḏ yəhwâ:

13 raq kāl-he‘ārîm hā‘ōməḏwōṯ ‘al-tillām lō’ śərāfām yiśərā’ēl zûlāṯî ’eṯ-ḥāṣwōr ləḇadāh śāraf yəhwōšu‘a:

14 wəḵōl šəlal he‘ārîm hā’ēlleh wəhabəhēmâ bāzəzû lâem bənê yiśərā’ēl raq ’eṯ-kāl-hā’āḏām hikû ləfî-ḥereḇ ‘aḏ-hišəmiḏām ’wōṯām lō’ hišə’îrû kāl-nəšāmâ:

15 ka’ăšer ṣiûâ yəhwâ ’eṯ-mōšeh ‘aḇədwō kēn-ṣiûâ mōšeh ’eṯ-yəhwōšu‘a wəḵēn ‘āśâ yəhwōšu‘a lō’-hēsîr dāḇār mikōl ’ăšer-ṣiûâ yəhwâ ’eṯ-mōšeh:

16 wayyiqqaḥ yəhwōšu‘a ’eṯ-kāl-hā’āreṣ hazzō’ṯ hâār wə’eṯ-kāl-hanneḡeḇ wə’ēṯ kāl-’ereṣ hagōšen wə’eṯ-haššəfēlâ wə’eṯ-hā‘ărāḇâ wə’eṯ-har yiśərā’ēl ûšəfēlāṯōh:

17 min-hâār heḥālāq hā‘wōleh śē‘îr wə‘aḏ-ba‘al3 gāḏ bəḇiqə‘aṯ halləḇānwōn taḥaṯ har-ḥerəmwōn wə’ēṯ kāl-maləḵêhem lāḵaḏ wayyakēm wayəmîṯēm:

18 yāmîm rabîm ‘āśâ yəhwōšu‘a ’eṯ-kāl-hamməlāḵîm hā’ēlleh miləḥāmâ:

19 lō’-hāyəṯâ ‘îr ’ăšer hišəlîmâ ’el-bənê yiśərā’ēl bilətî haḥiûî yōšəḇê ḡiḇə‘wōn ’eṯ-hakōl lāqəḥû ḇammiləḥāmâ:

20 kî mē’ēṯ yəhwâ| hāyəṯâ ləḥazzēq ’eṯ-libām liqəra’ṯ hammiləḥāmâ ’eṯ-yiśərā’ēl ləma‘an haḥărîmām ləḇilətî hĕywōṯ-lâem təḥinnâ kî ləma‘an hašəmîḏām ka’ăšer ṣiûâ yəhwâ ’eṯ-mōšeh: s

21 wayyāḇō’ yəhwōšu‘a bā‘ēṯ hahî’ wayyaḵərēṯ ’eṯ-hā‘ănāqîm min-hâār min-ḥeḇərwōn min-dəḇir min-‘ănāḇ ûmikōl har yəhûḏâ ûmikōl har yiśərā’ēl ‘im-‘ārêhem heḥĕrîmām yəhwōšu‘a:

22 lō’-nwōṯar ‘ănāqîm bə’ereṣ bənê yiśərā’ēl raq bə‘azzâ bəḡaṯ ûḇə’ašədwōḏ nišə’ārû:

23 wayyiqqaḥ yəhwōšu‘a ’eṯ-kāl-hā’āreṣ kəḵōl ’ăšer diber yəhwâ ’el-mōšeh wayyitənāh yəhwōšu‘a lənaḥălâ ləyiśərā’ēl kəmaḥələqōṯām ləšiḇəṭêhem wəhā’āreṣ šāqəṭâ mimmiləḥāmâ: f


Next: Joshua (Yehoshua) Chapter 12