Sacred Texts  Bible  Index 
Polyglot  KJV  Sep  Vul 

Jeremiah (Yermiyah) Index
  Previous  Next 

Tanach (Hebrew): Jeremiah (Yermiyah) Chapter 51

1 ‏כֹּ֚ה אָמַ֣ר יְהוָ֔ה הִנְנִי֙ מֵעִ֣יר עַל־בָּבֶ֔ל וְאֶל־יֹשְׁבֵ֖י לֵ֣ב קָמָ֑י ר֖וּחַ מַשְׁחִֽית׃

2 ‏וְשִׁלַּחְתִּ֨י לְבָבֶ֤ל׀ זָרִים֙ וְזֵר֔וּהָ וִיבֹקְק֖וּ אֶת־אַרְצָ֑הּ כִּֽי־הָי֥וּ עָלֶ֛יהָ מִסָּבִ֖יב בְּי֥וֹם רָעָֽה׃

3 ‏אֶֽל־יִדְרֹ֤ךְ ידרך הַדֹּרֵךְ֙ קַשְׁתּ֔וֹ וְאֶל־יִתְעַ֖ל בְּסִרְיֹנ֑וֹ וְאַֽל־תַּחְמְלוּ֙ אֶל־בַּ֣חֻרֶ֔יהָ הַחֲרִ֖ימוּ כָּל־צְבָאָֽהּ׃

4 ‏וְנָפְל֥וּ חֲלָלִ֖ים בְּאֶ֣רֶץ כַּשְׂדִּ֑ים וּמְדֻקָּרִ֖ים בְּחוּצוֹתֶֽיהָ׃

5 ‏כִּ֠י לֹֽא־אַלְמָ֨ן יִשְׂרָאֵ֤ל וִֽיהוּדָה֙ מֵֽאֱלֹהָ֔יו מֵֽיְהוָ֖ה צְבָא֑וֹת כִּ֤י אַרְצָם֙ מָלְאָ֣ה אָשָׁ֔ם מִקְּד֖וֹשׁ יִשְׂרָאֵֽל׃

6 ‏נֻ֣סוּ׀ מִתּ֣וֹךְ בָּבֶ֗ל וּמַלְּטוּ֙ אִ֣ישׁ נַפְשׁ֔וֹ אַל־תִּדַּ֖מּוּ בַּעֲוֹנָ֑הּ כִּי֩ עֵ֨ת נְקָמָ֥ה הִיא֙ לַֽיהוָ֔ה גְּמ֕וּל ה֥וּא מְשַׁלֵּ֖ם לָֽהּ׃

7 ‏כּוֹס־זָהָ֤ב בָּבֶל֙ בְּיַד־יְהוָ֔ה מְשַׁכֶּ֖רֶת כָּל־הָאָ֑רֶץ מִיֵּינָהּ֙ שָׁת֣וּ גוֹיִ֔ם עַל־כֵּ֖ן יִתְהֹלְל֥וּ גוֹיִֽם׃

8 ‏פִּתְאֹ֛ם נָפְלָ֥ה בָבֶ֖ל וַתִּשָּׁבֵ֑ר הֵילִ֣ילוּ עָלֶ֗יהָ קְח֤וּ צֳרִי֙ לְמַכְאוֹבָ֔הּ אוּלַ֖י תֵּרָפֵֽא׃

9 ‏רפאנו רִפִּ֣ינוּ אֶת־בָּבֶל֙ וְלֹ֣א נִרְפָּ֔תָה עִזְב֕וּהָ וְנֵלֵ֖ךְ אִ֣ישׁ לְאַרְצ֑וֹ כִּֽי־נָגַ֤ע אֶל־הַשָּׁמַ֙יִם֙ מִשְׁפָּטָ֔הּ וְנִשָּׂ֖א עַד־שְׁחָקִֽים׃

10 ‏הוֹצִ֥יא יְהוָ֖ה אֶת־צִדְקֹתֵ֑ינוּ בֹּ֚אוּ וּנְסַפְּרָ֣ה בְצִיּ֔וֹן אֶֽת־מַעֲשֵׂ֖ה יְהוָ֥ה אֱלֹהֵֽינוּ׃

11 ‏הָבֵ֣רוּ הַחִצִּים֮ מִלְא֣וּ הַשְּׁלָטִים֒ הֵעִ֣יר יְהוָ֗ה אֶת־ר֙וּחַ֙ מַלְכֵ֣י מָדַ֔י כִּֽי־עַל־בָּבֶ֥ל מְזִמָּת֖וֹ לְהַשְׁחִיתָ֑הּ כִּֽי־נִקְמַ֤ת יְהוָה֙ הִ֔יא נִקְמַ֖ת הֵיכָלֽוֹ׃

12 ‏אֶל־חוֹמֹ֨ת בָּבֶ֜ל שְׂאוּ־נֵ֗ס הַחֲזִ֙יקוּ֙ הַמִּשְׁמָ֔ר הָקִ֙ימוּ֙ שֹֽׁמְרִ֔ים הָכִ֖ינוּ הָאֹֽרְבִ֑ים כִּ֚י גַּם־זָמַ֣ם יְהוָ֔ה גַּם־עָשָׂ֕ה אֵ֥ת אֲשֶׁר־דִּבֶּ֖ר אֶל־יֹשְׁבֵ֥י בָבֶֽל׃

13 ‏שכנתי שֹׁכַנְתְּ֙ עַל־מַ֣יִם רַבִּ֔ים רַבַּ֖ת אֽוֹצָרֹ֑ת בָּ֥א קִצֵּ֖ךְ אַמַּ֥ת בִּצְעֵֽךְ׃

14 ‏נִשְׁבַּ֛ע יְהוָ֥ה צְבָא֖וֹת בְּנַפְשׁ֑וֹ כִּ֣י אִם־מִלֵּאתִ֤יךְ אָדָם֙ כַּיֶּ֔לֶק וְעָנ֥וּ עָלַ֖יִךְ הֵידָֽד׃ ס

15 ‏עֹשֵׂ֥ה אֶ֙רֶץ֙ בְּכֹח֔וֹ מֵכִ֥ין תֵּבֵ֖ל בְּחָכְמָת֑וֹ וּבִתְבוּנָת֖וֹ נָטָ֥ה שָׁמָֽיִם׃

16 ‏לְק֨וֹל תִּתּ֜וֹ הֲמ֥וֹן מַ֙יִם֙ בַּשָּׁמַ֔יִם וַיַּ֥עַל נְשִׂאִ֖ים מִקְצֵה־אָ֑רֶץ בְּרָקִ֤ים לַמָּטָר֙ עָשָׂ֔ה וַיֹּ֥צֵא ר֖וּחַ מֵאֹצְרֹתָֽיו׃

17 ‏נִבְעַ֤ר כָּל־אָדָם֙ מִדַּ֔עַת הֹבִ֥ישׁ כָּל־צֹרֵ֖ף מִפָּ֑סֶל כִּ֛י שֶׁ֥קֶר נִסְכּ֖וֹ וְלֹא־ר֥וּחַ בָּֽם׃

18 ‏הֶ֣בֶל הֵ֔מָּה מַעֲשֵׂ֖ה תַּעְתֻּעִ֑ים בְּעֵ֥ת פְּקֻדָּתָ֖ם יֹאבֵֽדוּ׃

19 ‏לֹֽא־כְאֵ֜לֶּה חֵ֣לֶק יַעֲק֗וֹב כִּֽי־יוֹצֵ֤ר הַכֹּל֙ ה֔וּא וְשֵׁ֖בֶט נַחֲלָת֑וֹ יְהוָ֥ה צְבָא֖וֹת שְׁמֽוֹ׃ ס

20 ‏מַפֵּץ־אַתָּ֣ה לִ֔י כְּלֵ֖י מִלְחָמָ֑ה וְנִפַּצְתִּ֤י בְךָ֙ גּוֹיִ֔ם וְהִשְׁחַתִּ֥י בְךָ֖ מַמְלָכֽוֹת׃

21 ‏וְנִפַּצְתִּ֣י בְךָ֔ ס֖וּס וְרֹֽכְב֑וֹ וְנִפַּצְתִּ֣י בְךָ֔ רֶ֖כֶב וְרֹכְבֽוֹ׃

22 ‏וְנִפַּצְתִּ֤י בְךָ֙ אִ֣ישׁ וְאִשָּׁ֔ה וְנִפַּצְתִּ֥י בְךָ֖ זָקֵ֣ן וָנָ֑עַר וְנִפַּצְתִּ֣י בְךָ֔ בָּח֖וּר וּבְתוּלָֽה׃

23 ‏וְנִפַּצְתִּ֤י בְךָ֙ רֹעֶ֣ה וְעֶדְר֔וֹ וְנִפַּצְתִּ֥י בְךָ֖ אִכָּ֣ר וְצִמְדּ֑וֹ וְנִפַּצְתִּ֣י בְךָ֔ פַּח֖וֹת וּסְגָנִֽים׃

24 ‏וְשִׁלַּמְתִּ֨י לְבָבֶ֜ל וּלְכֹ֣ל׀ יוֹשְׁבֵ֣י כַשְׂדִּ֗ים אֵ֧ת כָּל־רָעָתָ֛ם אֲשֶׁר־עָשׂ֥וּ בְצִיּ֖וֹן לְעֵֽינֵיכֶ֑ם נְאֻ֖ם יְהוָֽה׃ ס

25 ‏הִנְנִ֨י אֵלֶ֜יךָ הַ֤ר הַמַּשְׁחִית֙ נְאֻם־יְהוָ֔ה הַמַּשְׁחִ֖ית אֶת־כָּל־הָאָ֑רֶץ וְנָטִ֨יתִי אֶת־יָדִ֜י עָלֶ֗יךָ וְגִלְגַּלְתִּ֙יךָ֙ מִן־הַסְּלָעִ֔ים וּנְתַתִּ֖יךָ לְהַ֥ר שְׂרֵפָֽה׃

26 ‏וְלֹֽא־יִקְח֤וּ מִמְּךָ֙ אֶ֣בֶן לְפִנָּ֔ה וְאֶ֖בֶן לְמֽוֹסָד֑וֹת כִּֽי־שִׁמְמ֥וֹת עוֹלָ֛ם תִּֽהְיֶ֖ה נְאֻם־יְהוָֽה׃

27 ‏שְׂאוּ־נֵ֣ס בָּאָ֗רֶץ תִּקְע֨וּ שׁוֹפָ֤ר בַּגּוֹיִם֙ קַדְּשׁ֤וּ עָלֶ֙יהָ֙ גּוֹיִ֔ם הַשְׁמִ֧יעוּ עָלֶ֛יהָ מַמְלְכ֥וֹת אֲרָרַ֖ט מִנִּ֣י וְאַשְׁכְּנָ֑ז פִּקְד֤וּ עָלֶ֙יהָ֙ טִפְסָ֔ר הַֽעֲלוּ־ס֖וּס כְּיֶ֥לֶק סָמָֽר׃

28 ‏קַדְּשׁ֨וּ עָלֶ֤יהָ גוֹיִם֙ אֶת־מַלְכֵ֣י מָדַ֔י אֶת־פַּחוֹתֶ֖יהָ וְאֶת־כָּל־סְגָנֶ֑יהָ וְאֵ֖ת כָּל־אֶ֥רֶץ מֶמְשַׁלְתּֽוֹ׃

29 ‏וַתִּרְעַ֥שׁ הָאָ֖רֶץ וַתָּחֹ֑ל כִּ֣י קָ֤מָה עַל־בָּבֶל֙ מַחְשְׁב֣וֹת יְהוָ֔ה לָשׂ֞וּם אֶת־אֶ֧רֶץ בָּבֶ֛ל לְשַׁמָּ֖ה מֵאֵ֥ין יוֹשֵֽׁב׃

30 ‏חָדְלוּ֩ גִבּוֹרֵ֨י בָבֶ֜ל לְהִלָּחֵ֗ם יָֽשְׁבוּ֙ בַּמְּצָד֔וֹת נָשְׁתָ֥ה גְבוּרָתָ֖ם הָי֣וּ לְנָשִׁ֑ים הִצִּ֥יתוּ מִשְׁכְּנֹתֶ֖יהָ נִשְׁבְּר֥וּ בְרִיחֶֽיהָ׃

31 ‏רָ֤ץ לִקְרַאת־רָץ֙ יָר֔וּץ וּמַגִּ֖יד לִקְרַ֣את מַגִּ֑יד לְהַגִּיד֙ לְמֶ֣לֶךְ בָּבֶ֔ל כִּֽי־נִלְכְּדָ֥ה עִיר֖וֹ מִקָּצֶֽה׃

32 ‏וְהַמַּעְבָּר֣וֹת נִתְפָּ֔שׂוּ וְאֶת־הָאֲגַמִּ֖ים שָׂרְפ֣וּ בָאֵ֑שׁ וְאַנְשֵׁ֥י הַמִּלְחָמָ֖ה נִבְהָֽלוּ׃ ס

33 ‏כִּי֩ כֹ֨ה אָמַ֜ר יְהוָ֤ה צְבָאוֹת֙ אֱלֹהֵ֣י יִשְׂרָאֵ֔ל בַּת־בָּבֶ֕ל כְּגֹ֖רֶן עֵ֣ת הִדְרִיכָ֑הּ ע֣וֹד מְעַ֔ט וּבָ֥אָה עֵֽת־הַקָּצִ֖יר לָֽהּ׃

34 ‏אכלנו אֲכָלַ֣נִי הממנו הֲמָמַ֗נִי נְבוּכַדְרֶאצַּר֮ מֶ֣לֶךְ בָּבֶל֒ הציגנו הִצִּיגַ֙נִי֙ כְּלִ֣י רִ֔יק בלענו בְּלָעַ֙נִי֙ כַּתַּנִּ֔ין מִלָּ֥א כְרֵשׂ֖וֹ מֵֽעֲדָנָ֑י הדיחנו הֱדִיחָֽנִי׃

35 ‏חֲמָסִ֤י וּשְׁאֵרִי֙ עַל־בָּבֶ֔ל תֹּאמַ֖ר יֹשֶׁ֣בֶת צִיּ֑וֹן וְדָמִי֙ אֶל־יֹשְׁבֵ֣י כַשְׂדִּ֔ים תֹּאמַ֖ר יְרוּשָׁלִָֽם׃ ס

36 ‏לָכֵ֗ן כֹּ֚ה אָמַ֣ר יְהוָ֔ה הִנְנִי־רָב֙ אֶת־רִיבֵ֔ךְ וְנִקַּמְתִּ֖י אֶת־נִקְמָתֵ֑ךְ וְהַחֲרַבְתִּי֙ אֶת־יַמָּ֔הּ וְהֹבַשְׁתִּ֖י אֶת־מְקוֹרָֽהּ׃

37 ‏וְהָיְתָה֩ בָבֶ֨ל׀ לְגַלִּ֧ים׀ מְעוֹן־תַּנִּ֛ים שַׁמָּ֥ה וּשְׁרֵקָ֖ה מֵאֵ֥ין יוֹשֵֽׁב׃

38 ‏יַחְדָּ֖ו כַּכְּפִרִ֣ים יִשְׁאָ֑גוּ נָעֲר֖וּ כְּגוֹרֵ֥י אֲרָיֽוֹת׃

39 ‏בְּחֻמָּ֞ם אָשִׁ֣ית אֶת־מִשְׁתֵּיהֶ֗ם וְהִשְׁכַּרְתִּים֙ לְמַ֣עַן יַעֲלֹ֔זוּ וְיָשְׁנ֥וּ שְׁנַת־עוֹלָ֖ם וְלֹ֣א יָקִ֑יצוּ נְאֻ֖ם יְהוָֽה׃

40 ‏אֽוֹרִידֵ֖ם כְּכָרִ֣ים לִטְב֑וֹחַ כְּאֵילִ֖ים עִם־עַתּוּדִֽים׃

41 ‏אֵ֚יךְ נִלְכְּדָ֣ה שֵׁשַׁ֔ךְ וַתִּתָּפֵ֖שׂ תְּהִלַּ֣ת כָּל־הָאָ֑רֶץ אֵ֣יךְ הָיְתָ֧ה לְשַׁמָּ֛ה בָּבֶ֖ל בַּגּוֹיִֽם׃

42 ‏עָלָ֥ה עַל־בָּבֶ֖ל הַיָּ֑ם בַּהֲמ֥וֹן גַּלָּ֖יו נִכְסָֽתָה׃

43 ‏הָי֤וּ עָרֶ֙יהָ֙ לְשַׁמָּ֔ה אֶ֖רֶץ צִיָּ֣ה וַעֲרָבָ֑ה אֶ֗רֶץ לֹֽא־יֵשֵׁ֤ב בָּהֵן֙ כָּל־אִ֔ישׁ וְלֹֽא־יַעֲבֹ֥ר בָּהֵ֖ן בֶּן־אָדָֽם׃

44 ‏וּפָקַדְתִּ֨י עַל־בֵּ֜ל בְּבָבֶ֗ל וְהֹצֵאתִ֤י אֶת־בִּלְעוֹ֙ מִפִּ֔יו וְלֹֽא־יִנְהֲר֥וּ אֵלָ֛יו ע֖וֹד גּוֹיִ֑ם גַּם־חוֹמַ֥ת בָּבֶ֖ל נָפָֽלָה׃

45 ‏צְא֤וּ מִתּוֹכָהּ֙ עַמִּ֔י וּמַלְּט֖וּ אִ֣ישׁ אֶת־נַפְשׁ֑וֹ מֵחֲר֖וֹן אַף־יְהוָֽה׃

46 ‏וּפֶן־יֵרַ֤ךְ לְבַבְכֶם֙ וְתִֽירְא֔וּ בַּשְּׁמוּעָ֖ה הַנִּשְׁמַ֣עַת בָּאָ֑רֶץ וּבָ֧א בַשָּׁנָ֣ה הַשְּׁמוּעָ֗ה וְאַחֲרָ֤יו בַּשָּׁנָה֙ הַשְּׁמוּעָ֔ה וְחָמָ֣ס בָּאָ֔רֶץ וּמֹשֵׁ֖ל עַל־מֹשֵֽׁל׃

47 ‏לָכֵן֙ הִנֵּ֣ה יָמִ֣ים בָּאִ֔ים וּפָקַדְתִּי֙ עַל־פְּסִילֵ֣י בָבֶ֔ל וְכָל־אַרְצָ֖הּ תֵּב֑וֹשׁ וְכָל־חֲלָלֶ֖יהָ יִפְּל֥וּ בְתוֹכָֽהּ׃

48 ‏וְרִנְּנ֤וּ עַל־בָּבֶל֙ שָׁמַ֣יִם וָאָ֔רֶץ וְכֹ֖ל אֲשֶׁ֣ר בָּהֶ֑ם כִּ֧י מִצָּפ֛וֹן יָבוֹא־לָ֥הּ הַשּׁוֹדְדִ֖ים נְאֻם־יְהוָֽה׃

49 ‏גַּם־בָּבֶ֕ל לִנְפֹּ֖ל חַֽלְלֵ֣י יִשְׂרָאֵ֑ל גַּם־לְבָבֶ֥ל נָפְל֖וּ חַֽלְלֵ֥י כָל־הָאָֽרֶץ׃

50 ‏פְּלֵטִ֣ים מֵחֶ֔רֶב הִלְכ֖וּ אַֽל־תַּעֲמֹ֑דוּ זִכְר֤וּ מֵֽרָחוֹק֙ אֶת־יְהוָ֔ה וִירֽוּשָׁלִַ֖ם תַּעֲלֶ֥ה עַל־לְבַבְכֶֽם׃

51 ‏בֹּ֚שְׁנוּ כִּֽי־שָׁמַ֣עְנוּ חֶרְפָּ֔ה כִּסְּתָ֥ה כְלִמָּ֖ה פָּנֵ֑ינוּ כִּ֚י בָּ֣אוּ זָרִ֔ים עַֽל־מִקְדְּשֵׁ֖י בֵּ֥ית יְהוָֽה׃ ס

52 ‏לָכֵ֞ן הִנֵּֽה־יָמִ֤ים בָּאִים֙ נְאֻם־יְהוָ֔ה וּפָקַדְתִּ֖י עַל־פְּסִילֶ֑יהָ וּבְכָל־אַרְצָ֖הּ יֶאֱנֹ֥ק חָלָֽל׃

53 ‏כִּֽי־תַעֲלֶ֤ה בָבֶל֙ הַשָּׁמַ֔יִם וְכִ֥י תְבַצֵּ֖ר מְר֣וֹם עֻזָּ֑הּ מֵאִתִּ֗י יָבֹ֧אוּ שֹׁדְדִ֛ים לָ֖הּ נְאֻם־יְהוָֽה׃ ס

54 ‏ק֥וֹל זְעָקָ֖ה מִבָּבֶ֑ל וְשֶׁ֥בֶר גָּד֖וֹל מֵאֶ֥רֶץ כַּשְׂדִּֽים׃

55 ‏כִּֽי־שֹׁדֵ֤ד יְהוָה֙ אֶת־בָּבֶ֔ל וְאִבַּ֥ד מִמֶּ֖נָּה ק֣וֹל גָּד֑וֹל וְהָמ֤וּ גַלֵּיהֶם֙ כְּמַ֣יִם רַבִּ֔ים נִתַּ֥ן שְׁא֖וֹן קוֹלָֽם׃

56 ‏כִּי֩ בָ֨א עָלֶ֤יהָ עַל־בָּבֶל֙ שׁוֹדֵ֔ד וְנִלְכְּדוּ֙ גִּבּוֹרֶ֔יהָ חִתְּתָ֖ה קַשְּׁתוֹתָ֑ם כִּ֣י אֵ֧ל גְּמֻל֛וֹת יְהוָ֖ה שַׁלֵּ֥ם יְשַׁלֵּֽם׃

57 ‏וְ֠הִשְׁכַּרְתִּי שָׂרֶ֨יהָ וַחֲכָמֶ֜יהָ פַּחוֹתֶ֤יהָ וּסְגָנֶ֙יהָ֙ וְגִבּוֹרֶ֔יהָ וְיָשְׁנ֥וּ שְׁנַת־עוֹלָ֖ם וְלֹ֣א יָקִ֑יצוּ נְאֻ֨ם־הַמֶּ֔לֶךְ יְהוָ֥ה צְבָא֖וֹת שְׁמֽוֹ׃ ס

58 ‏כֹּֽה־אָמַ֞ר יְהוָ֣ה צְבָא֗וֹת חֹ֠מוֹת בָּבֶ֤ל הָֽרְחָבָה֙ עַרְעֵ֣ר תִּתְעַרְעָ֔ר וּשְׁעָרֶ֥יהָ הַגְּבֹהִ֖ים בָּאֵ֣שׁ יִצַּ֑תּוּ וְיִֽגְע֨וּ עַמִּ֧ים בְּדֵי־רִ֛יק וּלְאֻמִּ֥ים בְּדֵי־אֵ֖שׁ וְיָעֵֽפוּ׃ ס

59 ‏הַדָּבָ֞ר אֲשֶׁר־צִוָּ֣ה׀ יִרְמְיָ֣הוּ הַנָּבִ֗יא אֶת־שְׂרָיָ֣ה בֶן־נֵרִיָּה֮ בֶּן־מַחְסֵיָה֒ בְּלֶכְתּ֞וֹ אֶת־צִדְקִיָּ֤הוּ מֶֽלֶךְ־יְהוּדָה֙ בָּבֶ֔ל בִּשְׁנַ֥ת הָרְבִעִ֖ית לְמָלְכ֑וֹ וּשְׂרָיָ֖ה שַׂ֥ר מְנוּחָֽה׃

60 ‏וַיִּכְתֹּ֣ב יִרְמְיָ֗הוּ אֵ֧ת כָּל־הָרָעָ֛ה אֲשֶׁר־תָּב֥וֹא אֶל־בָּבֶ֖ל אֶל־סֵ֣פֶר אֶחָ֑ד אֵ֚ת כָּל־הַדְּבָרִ֣ים הָאֵ֔לֶּה הַכְּתֻבִ֖ים אֶל־בָּבֶֽל׃

61 ‏וַיֹּ֥אמֶר יִרְמְיָ֖הוּ אֶל־שְׂרָיָ֑ה כְּבֹאֲךָ֣ בָבֶ֔ל וְֽרָאִ֔יתָ וְֽקָרָ֔אתָ אֵ֥ת כָּל־הַדְּבָרִ֖ים הָאֵֽלֶּה׃

62 ‏וְאָמַרְתָּ֗ יְהוָה֙ אַתָּ֨ה דִבַּ֜רְתָּ אֶל־הַמָּק֤וֹם הַזֶּה֙ לְהַכְרִית֔וֹ לְבִלְתִּ֤י הֱיֽוֹת־בּוֹ֙ יוֹשֵׁ֔ב לְמֵאָדָ֖ם וְעַד־בְּהֵמָ֑ה כִּֽי־שִׁמְמ֥וֹת עוֹלָ֖ם תִּֽהְיֶֽה׃

63 ‏וְהָיָה֙ כְּכַלֹּ֣תְךָ֔ לִקְרֹ֖א אֶת־הַסֵּ֣פֶר הַזֶּ֑ה תִּקְשֹׁ֤ר עָלָיו֙ אֶ֔בֶן וְהִשְׁלַכְתּ֖וֹ אֶל־תּ֥וֹךְ פְּרָֽת׃

64 ‏וְאָמַרְתָּ֗ כָּ֠כָה תִּשְׁקַ֨ע בָּבֶ֤ל וְלֹֽא־תָקוּם֙ מִפְּנֵ֣י הָרָעָ֗ה אֲשֶׁ֧ר אָנֹכִ֛י מֵבִ֥יא עָלֶ֖יהָ וְיָעֵ֑פוּ עַד־הֵ֖נָּה דִּבְרֵ֥י יִרְמְיָֽהוּ׃ ס

1 kōh ’āmar yəhwâ hinənî mē‘îr ‘al-bāḇel wə’el-yōšəḇê lēḇ qāmāy rûḥa mašəḥîṯ:

2 wəšillaḥətî ləḇāḇel| zārîm wəzērûhā wîḇōqəqû ’eṯ-’arəṣāh kî-hāyû ‘āleyhā missāḇîḇ bəywōm rā‘â:

3 ’el-yiḏərōḵə yiḏərōḵə hadōrēḵə qašətwō wə’el-yiṯə‘al bəsirəyōnwō wə’al-taḥəməlû ’el-baḥureyhā haḥărîmû kāl-ṣəḇā’āh:

4 wənāfəlû ḥălālîm bə’ereṣ kaśədîm ûməḏuqqārîm bəḥûṣwōṯeyhā:

5 kî lō’-’aləmān yiśərā’ēl wîhûḏâ mē’ĕlōhāyw mêəhwâ ṣəḇā’wōṯ kî ’arəṣām mālə’â ’āšām miqqəḏwōš yiśərā’ēl:

6 nusû| mitwōḵə bāḇel ûmalləṭû ’îš nafəšwō ’al-tidammû ba‘ăwōnāh kî ‘ēṯ nəqāmâ hî’ layhwâ gəmûl hû’ məšallēm lāh:

7 kwōs-zâāḇ bāḇel bəyaḏ-yəhwâ məšakereṯ kāl-hā’āreṣ mîyênāh šāṯû ḡwōyim ‘al-kēn yiṯəhōləlû ḡwōyim:

8 piṯə’ōm nāfəlâ ḇāḇel watiššāḇēr hêlîlû ‘āleyhā qəḥû ṣŏrî ləmaḵə’wōḇāh ’ûlay tērāfē’:

ripi’nû ripînû ’eṯ-bāḇel wəlō’ nirəpāṯâ ‘izəḇûhā wənēlēḵə ’îš lə’arəṣwō kî-nāḡa‘ ’el-haššāmayim mišəpāṭāh wəniśśā’ ‘aḏ-šəḥāqîm:

10 hwōṣî’ yəhwâ ’eṯ-ṣiḏəqōṯênû bō’û ûnəsapərâ ḇəṣîywōn ’eṯ-ma‘ăśēh yəhwâ ’ĕlōhênû:

11 hāḇērû haḥiṣṣîm milə’û haššəlāṭîm hē‘îr yəhwâ ’eṯ-rûḥa maləḵê māḏay kî-‘al-bāḇel məzimmāṯwō ləhašəḥîṯāh kî-niqəmaṯ yəhwâ hî’ niqəmaṯ hêḵālwō:

12 ’el-ḥwōmōṯ bāḇel śə’û-nēs haḥăzîqû hammišəmār hāqîmû šōmərîm hāḵînû hā’ōrəḇîm kî gam-zāmam yəhwâ gam-‘āśâ ’ēṯ ’ăšer-diber ’el-yōšəḇê ḇāḇel:

13 šōḵanətî šōḵanətə ‘al-mayim rabîm rabaṯ ’wōṣārōṯ bā’ qiṣṣēḵə ’ammaṯ biṣə‘ēḵə:

14 nišəba‘ yəhwâ ṣəḇā’wōṯ bənafəšwō kî ’im-millē’ṯîḵə ’āḏām kayyeleq wə‘ānû ‘ālayiḵə hêḏāḏ: s

15 ‘ōśēh ’ereṣ bəḵōḥwō mēḵîn tēḇēl bəḥāḵəmāṯwō ûḇiṯəḇûnāṯwō nāṭâ šāmāyim:

16 ləqwōl titwō hămwōn mayim baššāmayim wayya‘al nəśi’îm miqəṣēh-’āreṣ bərāqîm lammāṭār ‘āśâ wayyōṣē’ rûḥa mē’ōṣərōṯāyw:

17 niḇə‘ar kāl-’āḏām mida‘aṯ hōḇîš kāl-ṣōrēf mipāsel kî šeqer nisəkwō wəlō’-rûḥa bām:

18 heḇel hēmmâ ma‘ăśēh ta‘ətu‘îm bə‘ēṯ pəqudāṯām yō’ḇēḏû:

19 lō’-ḵə’ēlleh ḥēleq ya‘ăqwōḇ kî-ywōṣēr hakōl hû’ wəšēḇeṭ naḥălāṯwō yəhwâ ṣəḇā’wōṯ šəmwō: s

20 mapēṣ-’atâ lî kəlê miləḥāmâ wənipaṣətî ḇəḵā gwōyim wəhišəḥatî ḇəḵā maməlāḵwōṯ:

21 wənipaṣətî ḇəḵā sûs wərōḵəḇwō wənipaṣətî ḇəḵā reḵeḇ wərōḵəḇwō:

22 wənipaṣətî ḇəḵā ’îš wə’iššâ wənipaṣətî ḇəḵā zāqēn wānā‘ar wənipaṣətî ḇəḵā bāḥûr ûḇəṯûlâ:

23 wənipaṣətî ḇəḵā rō‘eh wə‘eḏərwō wənipaṣətî ḇəḵā ’ikār wəṣimədwō wənipaṣətî ḇəḵā paḥwōṯ ûsəḡānîm:

24 wəšillamətî ləḇāḇel ûləḵōl| ywōšəḇê ḵaśədîm ’ēṯ kāl-rā‘āṯām ’ăšer-‘āśû ḇəṣîywōn lə‘ênêḵem nə’um yəhwâ: s

25 hinənî ’ēleyḵā har hammašəḥîṯ nə’um-yəhwâ hammašəḥîṯ ’eṯ-kāl-hā’āreṣ wənāṭîṯî ’eṯ-yāḏî ‘āleyḵā wəḡiləgalətîḵā min-hassəlā‘îm ûnəṯatîḵā ləhar śərēfâ:

26 wəlō’-yiqəḥû mimməḵā ’eḇen ləfinnâ wə’eḇen ləmwōsāḏwōṯ kî-šiməmwōṯ ‘wōlām tihəyeh nə’um-yəhwâ:

27 śə’û-nēs bā’āreṣ tiqə‘û šwōfār bagwōyim qadəšû ‘āleyhā gwōyim hašəmî‘û ‘āleyhā mamələḵwōṯ ’ărāraṭ minnî wə’ašəkənāz piqəḏû ‘āleyhā ṭifəsār ha‘ălû-sûs kəyeleq sāmār:

28 qadəšû ‘āleyhā ḡwōyim ’eṯ-maləḵê māḏay ’eṯ-paḥwōṯeyhā wə’eṯ-kāl-səḡāneyhā wə’ēṯ kāl-’ereṣ meməšalətwō:

29 watirə‘aš hā’āreṣ watāḥōl kî qāmâ ‘al-bāḇel maḥəšəḇwōṯ yəhwâ lāśûm ’eṯ-’ereṣ bāḇel ləšammâ mē’ên ywōšēḇ:

30 ḥāḏəlû ḡibwōrê ḇāḇel ləhillāḥēm yāšəḇû bamməṣāḏwōṯ nāšəṯâ ḡəḇûrāṯām hāyû lənāšîm hiṣṣîṯû mišəkənōṯeyhā nišəbərû ḇərîḥeyhā:

31 rāṣ liqəra’ṯ-rāṣ yārûṣ ûmagîḏ liqəra’ṯ magîḏ ləhagîḏ ləmeleḵə bāḇel kî-niləkəḏâ ‘îrwō miqqāṣeh:

32 wəhamma‘əbārwōṯ niṯəpāśû wə’eṯ-hā’ăḡammîm śārəfû ḇā’ēš wə’anəšê hammiləḥāmâ niḇəhālû: s

33 kî ḵōh ’āmar yəhwâ ṣəḇā’wōṯ ’ĕlōhê yiśərā’ēl baṯ-bāḇel kəḡōren ‘ēṯ hiḏərîḵāh ‘wōḏ mə‘aṭ ûḇā’â ‘ēṯ-haqqāṣîr lāh:

34 ’ăḵālānû ’ăḵālanî hămāmānû hămāmanî nəḇûḵaḏəre’ṣṣar meleḵə bāḇel hiṣṣîḡānû hiṣṣîḡanî kəlî rîq bəlā‘ānû bəlā‘anî katannîn millā’ ḵərēśwō mē‘ăḏānāy hĕḏîḥānû hĕḏîḥānî:

35 ḥămāsî ûšə’ērî ‘al-bāḇel tō’mar yōšeḇeṯ ṣîywōn wəḏāmî ’el-yōšəḇê ḵaśədîm tō’mar yərûšālāim: s

36 lāḵēn kōh ’āmar yəhwâ hinənî-rāḇ ’eṯ-rîḇēḵə wəniqqamətî ’eṯ-niqəmāṯēḵə wəhaḥăraḇətî ’eṯ-yammāh wəhōḇašətî ’eṯ-məqwōrāh:

37 wəhāyəṯâ ḇāḇel| ləḡallîm| mə‘wōn-tannîm šammâ ûšərēqâ mē’ên ywōšēḇ:

38 yaḥədāw kakəfirîm yišə’āḡû nā‘ărû kəḡwōrê ’ărāywōṯ:

39 bəḥummām ’āšîṯ ’eṯ-mišətêhem wəhišəkarətîm ləma‘an ya‘ălōzû wəyāšənû šənaṯ-‘wōlām wəlō’ yāqîṣû nə’um yəhwâ:

40 ’wōrîḏēm kəḵārîm liṭəḇwōḥa kə’êlîm ‘im-‘atûḏîm:

41 ’êḵə niləkəḏâ šēšaḵə watitāfēś təhillaṯ kāl-hā’āreṣ ’êḵə hāyəṯâ ləšammâ bāḇel bagwōyim:

42 ‘ālâ ‘al-bāḇel hayyām bahămwōn gallāyw niḵəsāṯâ:

43 hāyû ‘āreyhā ləšammâ ’ereṣ ṣîyâ wa‘ărāḇâ ’ereṣ lō’-yēšēḇ bâēn kāl-’îš wəlō’-ya‘ăḇōr bâēn ben-’āḏām:

44 ûfāqaḏətî ‘al-bēl bəḇāḇel wəhōṣē’ṯî ’eṯ-bilə‘wō mipîw wəlō’-yinəhărû ’ēlāyw ‘wōḏ gwōyim gam-ḥwōmaṯ bāḇel nāfālâ:

45 ṣə’û mitwōḵāh ‘ammî ûmalləṭû ’îš ’eṯ-nafəšwō mēḥărwōn ’af-yəhwâ:

46 ûfen-yēraḵə ləḇaḇəḵem wəṯîrə’û baššəmû‘â hannišəma‘aṯ bā’āreṣ ûḇā’ ḇaššānâ haššəmû‘â wə’aḥărāyw baššānâ haššəmû‘â wəḥāmās bā’āreṣ ûmōšēl ‘al-mōšēl:

47 lāḵēn hinnēh yāmîm bā’îm ûfāqaḏətî ‘al-pəsîlê ḇāḇel wəḵāl-’arəṣāh tēḇwōš wəḵāl-ḥălāleyhā yipəlû ḇəṯwōḵāh:

48 wərinnənû ‘al-bāḇel šāmayim wā’āreṣ wəḵōl ’ăšer bâem kî miṣṣāfwōn yāḇwō’-lāh haššwōḏəḏîm nə’um-yəhwâ:

49 gam-bāḇel linəpōl ḥaləlê yiśərā’ēl gam-ləḇāḇel nāfəlû ḥaləlê ḵāl-hā’āreṣ:

50 pəlēṭîm mēḥereḇ hiləḵû ’al-ta‘ămōḏû ziḵərû mērāḥwōq ’eṯ-yəhwâ wîrûšālaim ta‘ăleh ‘al-ləḇaḇəḵem:

51 bōšənû kî-šāma‘ənû ḥerəpâ kissəṯâ ḵəlimmâ pānênû kî bā’û zārîm ‘al-miqədəšê bêṯ yəhwâ: s

52 lāḵēn hinnēh-yāmîm bā’îm nə’um-yəhwâ ûfāqaḏətî ‘al-pəsîleyhā ûḇəḵāl-’arəṣāh ye’ĕnōq ḥālāl:

53 kî-ṯa‘ăleh ḇāḇel haššāmayim wəḵî ṯəḇaṣṣēr mərwōm ‘uzzāh mē’itî yāḇō’û šōḏəḏîm lāh nə’um-yəhwâ: s

54 qwōl zə‘āqâ mibāḇel wəšeḇer gāḏwōl mē’ereṣ kaśədîm:

55 kî-šōḏēḏ yəhwâ ’eṯ-bāḇel wə’ibaḏ mimmennâ qwōl gāḏwōl wəhāmû ḡallêhem kəmayim rabîm nitan šə’wōn qwōlām:

56 kî ḇā’ ‘āleyhā ‘al-bāḇel šwōḏēḏ wəniləkəḏû gibwōreyhā ḥitəṯâ qaššəṯwōṯām kî ’ēl gəmulwōṯ yəhwâ šallēm yəšallēm:

57 wəhišəkarətî śāreyhā waḥăḵāmeyhā paḥwōṯeyhā ûsəḡāneyhā wəḡibwōreyhā wəyāšənû šənaṯ-‘wōlām wəlō’ yāqîṣû nə’um-hammeleḵə yəhwâ ṣəḇā’wōṯ šəmwō: s

58 kōh-’āmar yəhwâ ṣəḇā’wōṯ ḥōmwōṯ bāḇel hārəḥāḇâ ‘arə‘ēr tiṯə‘arə‘ār ûšə‘āreyhā hagəḇōhîm bā’ēš yiṣṣatû wəyiḡə‘û ‘ammîm bəḏê-rîq ûlə’ummîm bəḏê-’ēš wəyā‘ēfû: s

59 hadāḇār ’ăšer-ṣiûâ| yirəməyâû hannāḇî’ ’eṯ-śərāyâ ḇen-nērîyâ ben-maḥəsêâ bəleḵətwō ’eṯ-ṣiḏəqîyâû meleḵə-yəhûḏâ bāḇel bišənaṯ hārəḇi‘îṯ ləmāləḵwō ûśərāyâ śar mənûḥâ:

60 wayyiḵətōḇ yirəməyâû ’ēṯ kāl-hārā‘â ’ăšer-tāḇwō’ ’el-bāḇel ’el-sēfer ’eḥāḏ ’ēṯ kāl-hadəḇārîm hā’ēlleh hakəṯuḇîm ’el-bāḇel:

61 wayyō’mer yirəməyâû ’el-śərāyâ kəḇō’ăḵā ḇāḇel wərā’îṯā wəqārā’ṯā ’ēṯ kāl-hadəḇārîm hā’ēlleh:

62 wə’āmarətā yəhwâ ’atâ ḏibarətā ’el-hammāqwōm hazzeh ləhaḵərîṯwō ləḇilətî hĕywōṯ-bwō ywōšēḇ ləmē’āḏām wə‘aḏ-bəhēmâ kî-šiməmwōṯ ‘wōlām tihəyeh:

63 wəhāyâ kəḵallōṯəḵā liqərō’ ’eṯ-hassēfer hazzeh tiqəšōr ‘ālāyw ’eḇen wəhišəlaḵətwō ’el-twōḵə pərāṯ:

64 wə’āmarətā kāḵâ tišəqa‘ bāḇel wəlō’-ṯāqûm mipənê hārā‘â ’ăšer ’ānōḵî mēḇî’ ‘āleyhā wəyā‘ēfû ‘aḏ-hēnnâ diḇərê yirəməyâû: s


Next: Jeremiah (Yermiyah) Chapter 52