‎1 ‏הַדָּבָ֗ר אֲשֶׁ֨ר דִּבֶּ֧ר יְהוָ֛ה אֶל־בָּבֶ֖ל אֶל־אֶ֣רֶץ כַּשְׂדִּ֑ים בְּיַ֖ד יִרְמְיָ֥הוּ הַנָּבִֽיא׃

‎2 ‏הַגִּ֨ידוּ בַגּוֹיִ֤ם וְהַשְׁמִ֙יעוּ֙ וּֽשְׂאוּ־נֵ֔ס הַשְׁמִ֖יעוּ אַל־תְּכַחֵ֑דוּ אִמְרוּ֩ נִלְכְּדָ֨ה בָבֶ֜ל הֹבִ֥ישׁ בֵּל֙ חַ֣ת מְרֹדָ֔ךְ הֹבִ֣ישׁוּ עֲצַבֶּ֔יהָ חַ֖תּוּ גִּלּוּלֶֽיהָ׃

‎3 ‏כִּ֣י עָלָה֩ עָלֶ֨יהָ גּ֜וֹי מִצָּפ֗וֹן הֽוּא־יָשִׁ֤ית אֶת־אַרְצָהּ֙ לְשַׁמָּ֔ה וְלֹֽא־יִהְיֶ֥ה יוֹשֵׁ֖ב בָּ֑הּ מֵאָדָ֥ם וְעַד־בְּהֵמָ֖ה נָ֥דוּ הָלָֽכוּ׃

‎4 ‏בַּיָּמִ֨ים הָהֵ֜מָּה וּבָעֵ֤ת הַהִיא֙ נְאֻם־יְהוָ֔ה יָבֹ֧אוּ בְנֵֽי־יִשְׂרָאֵ֛ל הֵ֥מָּה וּבְנֵֽי־יְהוּדָ֖ה יַחְדָּ֑ו הָל֤וֹךְ וּבָכוֹ֙ יֵלֵ֔כוּ וְאֶת־יְהוָ֥ה אֱלֹהֵיהֶ֖ם יְבַקֵּֽשׁוּ׃

‎5 ‏צִיּ֣וֹן יִשְׁאָ֔לוּ דֶּ֖רֶךְ הֵ֣נָּה פְנֵיהֶ֑ם בֹּ֚אוּ וְנִלְו֣וּ אֶל־יְהוָ֔ה בְּרִ֥ית עוֹלָ֖ם לֹ֥א תִשָּׁכֵֽחַ׃ ס

‎6 ‏צֹ֤אן אֹֽבְדוֹת֙ היה הָי֣וּ עַמִּ֔י רֹעֵיהֶ֣ם הִתְע֔וּם הָרִ֖ים שובבים שֽׁוֹבְב֑וּם מֵהַ֤ר אֶל־גִּבְעָה֙ הָלָ֔כוּ שָׁכְח֖וּ רִבְצָֽם׃

‎7 ‏כָּל־מוֹצְאֵיהֶ֣ם אֲכָל֔וּם וְצָרֵיהֶ֥ם אָמְר֖וּ לֹ֣א נֶאְשָׁ֑ם תַּ֗חַת אֲשֶׁ֨ר חָטְא֤וּ לַֽיהוָה֙ נְוֵה־צֶ֔דֶק וּמִקְוֵ֥ה אֲבֽוֹתֵיהֶ֖ם יְהוָֽה׃ ס

‎8 ‏נֻ֚דוּ מִתּ֣וֹךְ בָּבֶ֔ל וּמֵאֶ֥רֶץ כַּשְׂדִּ֖ים יצאו צֵ֑אוּ וִהְי֕וּ כְּעַתּוּדִ֖ים לִפְנֵי־צֹֽאן׃

‎9 ‏כִּ֣י הִנֵּ֣ה אָנֹכִ֡י מֵעִיר֩ וּמַעֲלֶ֨ה עַל־בָּבֶ֜ל קְהַל־גּוֹיִ֤ם גְּדֹלִים֙ מֵאֶ֣רֶץ צָפ֔וֹן וְעָ֣רְכוּ לָ֔הּ מִשָּׁ֖ם תִּלָּכֵ֑ד חִצָּיו֙ כְּגִבּ֣וֹר מַשְׁכִּ֔יל לֹ֥א יָשׁ֖וּב רֵיקָֽם׃

‎10 ‏וְהָיְתָ֥ה כַשְׂדִּ֖ים לְשָׁלָ֑ל כָּל־שֹׁלְלֶ֥יהָ יִשְׂבָּ֖עוּ נְאֻם־יְהוָֽה׃

‎11 ‏כִּ֤י תשמחי תִשְׂמְחוּ֙ כִּ֣י תעלזי תַֽעַלְז֔וּ^m שֹׁסֵ֖י נַחֲלָתִ֑י כִּ֚י תפושי תָפ֙וּשׁוּ֙ כְּעֶגְלָ֣ה דָשָׁ֔ה ותצהלי וְתִצְהֲל֖וּ כָּאֲבִּרִֽים׃

‎12 ‏בּ֤וֹשָׁה אִמְּכֶם֙ מְאֹ֔ד חָפְרָ֖ה יֽוֹלַדְתְּכֶ֑ם הִנֵּה֙ אַחֲרִ֣ית גּוֹיִ֔ם מִדְבָּ֖ר צִיָּ֥ה וַעֲרָבָֽה׃

‎13 ‏מִקֶּ֤צֶף יְהוָה֙ לֹ֣א תֵשֵׁ֔ב וְהָיְתָ֥ה שְׁמָמָ֖ה כֻּלָּ֑הּ כֹּ֚ל עֹבֵ֣ר עַל־בָּבֶ֔ל יִשֹּׁ֥ם וְיִשְׁרֹ֖ק עַל־כָּל־מַכּוֹתֶֽיהָ׃

‎14 ‏עִרְכ֨וּ עַל־בָּבֶ֤ל׀ סָבִיב֙ כָּל־דֹּ֣רְכֵי קֶ֔שֶׁת יְד֣וּ אֵלֶ֔יהָ אַֽל־תַּחְמְל֖וּ אֶל־חֵ֑ץ כִּ֥י לַֽיהוָ֖ה חָטָֽאָה׃

‎15 ‏הָרִ֨יעוּ עָלֶ֤יהָ סָבִיב֙ נָתְנָ֣ה יָדָ֔הּ נָֽפְלוּ֙ אשויתיה אָשְׁיוֹתֶ֔יהָ נֶהֶרְס֖וּ חֽוֹמוֹתֶ֑יהָ כִּי֩ נִקְמַ֨ת יְהוָ֥ה הִיא֙ הִנָּ֣קְמוּ בָ֔הּ כַּאֲשֶׁ֥ר עָשְׂתָ֖ה עֲשׂוּ־לָֽהּ׃

‎16 ‏כִּרְת֤וּ זוֹרֵ֙עַ֙ מִבָּבֶ֔ל וְתֹפֵ֥שׂ מַגָּ֖ל בְּעֵ֣ת קָצִ֑יר מִפְּנֵי֙ חֶ֣רֶב הַיּוֹנָ֔ה אִ֤ישׁ אֶל־עַמּוֹ֙ יִפְנ֔וּ וְאִ֥ישׁ לְאַרְצ֖וֹ יָנֻֽסוּ׃ ס

‎17 ‏שֶׂ֧ה פְזוּרָ֛ה יִשְׂרָאֵ֖ל אֲרָי֣וֹת הִדִּ֑יחוּ הָרִאשׁ֤וֹן אֲכָלוֹ֙ מֶ֣לֶךְ אַשּׁ֔וּר וְזֶ֤ה הָאַחֲרוֹן֙ עִצְּמ֔וֹ נְבוּכַדְרֶאצַּ֖ר מֶ֥לֶךְ בָּבֶֽל׃ ס

‎18 ‏לָכֵ֗ן כֹּֽה־אָמַ֞ר יְהוָ֤ה צְבָאוֹת֙ אֱלֹהֵ֣י יִשְׂרָאֵ֔ל הִנְנִ֥י פֹקֵ֛ד אֶל־מֶ֥לֶךְ בָּבֶ֖ל וְאֶל־אַרְצ֑וֹ כַּאֲשֶׁ֥ר פָּקַ֖דְתִּי אֶל־מֶ֥לֶךְ אַשּֽׁוּר׃

‎19 ‏וְשֹׁבַבְתִּ֤י אֶת־יִשְׂרָאֵל֙ אֶל־נָוֵ֔הוּ וְרָעָ֥ה הַכַּרְמֶ֖ל וְהַבָּשָׁ֑ן וּבְהַ֥ר אֶפְרַ֛יִם וְהַגִּלְעָ֖ד תִּשְׂבַּ֥ע נַפְשֽׁוֹ׃

‎20 ‏בַּיָּמִ֣ים הָהֵם֩ וּבָעֵ֨ת הַהִ֜יא נְאֻם־יְהוָ֗ה יְבֻקַּ֞שׁ אֶת־עֲוֹ֤ן יִשְׂרָאֵל֙ וְאֵינֶ֔נּוּ וְאֶת־חַטֹּ֥את יְהוּדָ֖ה וְלֹ֣א תִמָּצֶ֑אינָה כִּ֥י אֶסְלַ֖ח לַאֲשֶׁ֥ר אַשְׁאִֽיר׃

‎21 ‏עַל־הָאָ֤רֶץ מְרָתַ֙יִם֙ עֲלֵ֣ה עָלֶ֔יהָ וְאֶל־יוֹשְׁבֵ֖י פְּק֑וֹד חֲרֹ֨ב וְהַחֲרֵ֤ם אַֽחֲרֵיהֶם֙ נְאֻם־יְהוָ֔ה וַעֲשֵׂ֕ה כְּכֹ֖ל אֲשֶׁ֥ר צִוִּיתִֽיךָ׃ ס

‎22 ‏ק֥וֹל מִלְחָמָ֖ה בָּאָ֑רֶץ וְשֶׁ֖בֶר גָּדֽוֹל׃

‎23 ‏אֵ֤יךְ נִגְדַּע֙ וַיִּשָּׁבֵ֔ר פַּטִּ֖ישׁ כָּל־הָאָ֑רֶץ אֵ֣יךְ הָיְתָ֧ה לְשַׁמָּ֛ה בָּבֶ֖ל בַּגּוֹיִֽם׃

‎24 ‏יָקֹ֨שְׁתִּי לָ֤ךְ וְגַם־נִלְכַּדְתְּ֙ בָּבֶ֔ל וְאַ֖תְּ לֹ֣א יָדָ֑עַתְּ נִמְצֵאת֙ וְגַם־נִתְפַּ֔שְׂתְּ כִּ֥י בַֽיהוָ֖ה הִתְגָּרִֽית׃

‎25 ‏פָּתַ֤ח יְהוָה֙ אֶת־א֣וֹצָר֔וֹ וַיּוֹצֵ֖א אֶת־כְּלֵ֣י זַעְמ֑וֹ כִּי־מְלָאכָ֣ה הִ֗יא לַֽאדֹנָ֧י יְהוִ֛ה צְבָא֖וֹת בְּאֶ֥רֶץ כַּשְׂדִּֽים׃

‎26 ‏בֹּֽאוּ־לָ֤הּ מִקֵּץ֙ פִּתְח֣וּ מַאֲבֻסֶ֔יהָ סָלּ֥וּהָ כְמוֹ־עֲרֵמִ֖ים וְהַחֲרִימ֑וּהָ אַל־תְּהִי־לָ֖הּ שְׁאֵרִֽית׃

‎27 ‏חִרְבוּ֙ כָּל־פָּרֶ֔יהָ יֵרְד֖וּ לַטָּ֑בַח ה֣וֹי עֲלֵיהֶ֔ם כִּֽי־בָ֥א יוֹמָ֖ם עֵ֥ת פְּקֻדָּתָֽם׃ ס

‎28 ‏ק֥וֹל נָסִ֛ים וּפְלֵטִ֖ים מֵאֶ֣רֶץ בָּבֶ֑ל לְהַגִּ֣יד בְּצִיּ֗וֹן אֶת־נִקְמַת֙ יְהוָ֣ה אֱלֹהֵ֔ינוּ נִקְמַ֖ת הֵיכָלֽוֹ׃

‎29 ‏הַשְׁמִ֣יעוּ אֶל־בָּבֶ֣ל׀ רַ֠בִּים כָּל־דֹּ֨רְכֵי קֶ֜שֶׁת חֲנ֧וּ עָלֶ֣יהָ סָבִ֗יב אַל־יְהִי־לָהּ֙^a פְּלֵטָ֔ה שַׁלְּמוּ־לָ֣הּ כְּפָעֳלָ֔הּ כְּכֹ֛ל אֲשֶׁ֥ר עָשְׂתָ֖ה עֲשׂוּ־לָ֑הּ כִּ֧י אֶל־יְהוָ֛ה זָ֖דָה אֶל־קְד֥וֹשׁ יִשְׂרָאֵֽל׃

‎30 ‏לָכֵ֛ן יִפְּל֥וּ בַחוּרֶ֖יהָ בִּרְחֹבֹתֶ֑יהָ וְכָל־אַנְשֵׁ֨י מִלְחַמְתָּ֥הּ יִדַּ֛מּוּ בַּיּ֥וֹם הַה֖וּא נְאֻם־יְהוָֽה׃ ס

‎31 ‏הִנְנִ֤י אֵלֶ֙יךָ֙ זָד֔וֹן נְאֻם־אֲדֹנָ֥י יְהוִ֖ה צְבָא֑וֹת כִּ֛י בָּ֥א יוֹמְךָ֖ עֵ֥ת פְּקַדְתִּֽיךָ׃

‎32 ‏וְכָשַׁ֤ל זָדוֹן֙ וְנָפַ֔ל וְאֵ֥ין ל֖וֹ מֵקִ֑ים וְהִצַּ֤תִּי אֵשׁ֙ בְּעָרָ֔יו וְאָכְלָ֖ה כָּל־סְבִיבֹתָֽיו׃ ס

‎33 ‏כֹּ֤ה אָמַר֙ יְהוָ֣ה צְבָא֔וֹת עֲשׁוּקִ֛ים בְּנֵי־יִשְׂרָאֵ֥ל וּבְנֵי־יְהוּדָ֖ה יַחְדָּ֑ו וְכָל־שֹֽׁבֵיהֶם֙ הֶחֱזִ֣יקוּ בָ֔ם מֵאֲנ֖וּ שַׁלְּחָֽם׃

‎34 ‏גֹּאֲלָ֣ם׀ חָזָ֗ק יְהוָ֤ה צְבָאוֹת֙ שְׁמ֔וֹ רִ֥יב יָרִ֖יב אֶת־רִיבָ֑ם לְמַ֙עַן֙ הִרְגִּ֣יעַ אֶת־הָאָ֔רֶץ וְהִרְגִּ֖יז לְיֹשְׁבֵ֥י בָבֶֽל׃

‎35 ‏חֶ֥רֶב עַל־כַּשְׂדִּ֖ים נְאֻם־יְהוָ֑ה וְאֶל־יֹשְׁבֵ֣י בָבֶ֔ל וְאֶל־שָׂרֶ֖יהָ וְאֶל־חֲכָמֶֽיהָ׃

‎36 ‏חֶ֥רֶב אֶל־הַבַּדִּ֖ים וְנֹאָ֑לוּ חֶ֥רֶב אֶל־גִּבּוֹרֶ֖יהָ וָחָֽתּוּ׃

‎37 ‏חֶ֜רֶב אֶל־סוּסָ֣יו וְאֶל־רִכְבּ֗וֹ וְאֶל־כָּל־הָעֶ֛רֶב אֲשֶׁ֥ר בְּתוֹכָ֖הּ וְהָי֣וּ לְנָשִׁ֑ים חֶ֥רֶב אֶל־אוֹצְרֹתֶ֖יהָ וּבֻזָּֽזוּ׃

‎38 ‏חֹ֥רֶב אֶל־מֵימֶ֖יהָ וְיָבֵ֑שׁוּ כִּ֣י אֶ֤רֶץ פְּסִלִים֙ הִ֔יא וּבָאֵימִ֖ים יִתְהֹלָֽלוּ׃

‎39 ‏לָכֵ֗ן יֵשְׁב֤וּ צִיִּים֙ אֶת־אִיִּ֔ים וְיָ֥שְׁבוּ בָ֖הּ בְּנ֣וֹת יַֽעֲנָ֑ה וְלֹֽא־תֵשֵׁ֥ב עוֹד֙ לָנֶ֔צַח וְלֹ֥א תִשְׁכּ֖וֹן עַד־דּ֥וֹר וָדֽוֹר׃

‎40 ‏כְּמַהְפֵּכַ֨ת אֱלֹהִ֜ים אֶת־סְדֹ֧ם וְאֶת־עֲמֹרָ֛ה וְאֶת־שְׁכֵנֶ֖יהָ נְאֻם־יְהוָ֑ה לֹֽא־יֵשֵׁ֥ב שָׁם֙ אִ֔ישׁ וְלֹֽא־יָג֥וּר בָּ֖הּ בֶּן־אָדָֽם׃

‎41 ‏הִנֵּ֛ה עַ֥ם בָּ֖א מִצָּפ֑וֹן וְג֤וֹי גָּדוֹל֙ וּמְלָכִ֣ים רַבִּ֔ים יֵעֹ֖רוּ מִיַּרְכְּתֵי־אָֽרֶץ׃

‎42 ‏קֶ֣שֶׁת וְכִידֹ֞ן יַחֲזִ֗יקוּ אַכְזָרִ֥י הֵ֙מָּה֙ וְלֹ֣א יְרַחֵ֔מוּ קוֹלָם֙ כַּיָּ֣ם יֶהֱמֶ֔ה וְעַל־סוּסִ֖ים יִרְכָּ֑בוּ עָר֗וּךְ כְּאִישׁ֙ לַמִּלְחָמָ֔ה עָלַ֖יִךְ בַּת־בָּבֶֽל׃

‎43 ‏שָׁמַ֧ע מֶֽלֶךְ־בָּבֶ֛ל אֶת־שִׁמְעָ֖ם וְרָפ֣וּ יָדָ֑יו צָרָה֙ הֶחֱזִיקַ֔תְהוּ חִ֖יל כַּיּוֹלֵדָֽה׃

‎44 ‏הִ֠נֵּה כְּאַרְיֵ֞ה יַעֲלֶ֨ה מִגְּא֣וֹן הַיַּרְדֵּן֮ אֶל־נְוֵ֣ה אֵיתָן֒ כִּֽי־אַרְגִּ֤עָה ארוצם אֲרִיצֵם֙ מֵֽעָלֶ֔יהָ וּמִ֥י בָח֖וּר אֵלֶ֣יהָ אֶפְקֹ֑ד כִּ֣י מִ֤י כָמ֙וֹנִי֙ וּמִ֣י יוֹעִדֶ֔נִּי וּמִֽי־זֶ֣ה רֹעֶ֔ה אֲשֶׁ֥ר יַעֲמֹ֖ד לְפָנָֽי׃

‎45 ‏לָכֵ֞ן שִׁמְע֣וּ עֲצַת־יְהוָ֗ה אֲשֶׁ֤ר יָעַץ֙ אֶל־בָּבֶ֔ל וּמַ֨חְשְׁבוֹתָ֔יו אֲשֶׁ֥ר חָשַׁ֖ב אֶל־אֶ֣רֶץ כַּשְׂדִּ֑ים אִם־לֹ֤א יִסְחָבוּם֙ צְעִירֵ֣י הַצֹּ֔אן אִם־לֹ֥א יַשִּׁ֛ים עֲלֵיהֶ֖ם נָוֶֽה׃

‎46 ‏מִקּוֹל֙ נִתְפְּשָׂ֣ה בָבֶ֔ל נִרְעֲשָׁ֖ה הָאָ֑רֶץ וּזְעָקָ֖ה בַּגּוֹיִ֥ם נִשְׁמָֽע׃ ס

1 hadāḇār ’ăšer diber yəhwâ ’el-bāḇel ’el-’ereṣ kaśədîm bəyaḏ yirəməyâû hannāḇî’:

2 hagîḏû ḇagwōyim wəhašəmî‘û ûśə’û-nēs hašəmî‘û ’al-təḵ^aḥēḏû ’imərû niləkəḏâ ḇāḇel hōḇîš bēl ḥaṯ mərōḏāḵə hōḇîšû ‘ăṣabeyhā ḥatû gillûleyhā:

3 kî ‘ālâ ‘āleyhā gwōy miṣṣāfwōn hû’-yāšîṯ ’eṯ-’arəṣāh ləšammâ wəlō’-yihəyeh ywōšēḇ bāh mē’āḏām wə‘aḏ-bəhēmâ nāḏû hālāḵû:

4 bayyāmîm hâēmmâ ûḇā‘ēṯ hahî’ nə’um-yəhwâ yāḇō’û ḇənê-yiśərā’ēl hēmmâ ûḇənê-yəhûḏâ y^aḥədāw hālwōḵə ûḇāḵwō yēlēḵû wə’eṯ-yəhwâ ’ĕlōhêhem yəḇaqqēšû:

5 ṣîywōn yišə’ālû dereḵə hēnnâ fənêhem bō’û wəniləwû ’el-yəhwâ bərîṯ ‘wōlām lō’ ṯiššāḵēḥa: s

6 ṣō’n ’ōḇəḏwōṯ hāyâ hāyû ‘ammî rō‘êhem hiṯə‘ûm hārîm šwōḇēḇîm šwōḇəḇûm mēhar ’el-giḇə‘â hālāḵû šāḵəḥû riḇəṣām:

7 kāl-mwōṣə’êhem ’ăḵālûm wəṣārêhem ’āmərû lō’ ne’əšām t^aḥaṯ ’ăšer ḥāṭə’û layhwâ nəwēh-ṣeḏeq ûmiqəwēh ’ăḇwōṯêhem yəhwâ: s

8 nuḏû mitwōḵə bāḇel ûmē’ereṣ kaśədîm yāṣə’û ṣē’û wihəyû kə‘atûḏîm lifənê-ṣō’n:

9 kî hinnēh ’ānōḵî mē‘îr ûm^a‘ăleh ‘al-bāḇel qəhal-gwōyim gəḏōlîm mē’ereṣ ṣāfwōn wə‘ārəḵû lāh miššām tillāḵēḏ ḥiṣṣāyw kəḡibwōr mašəkîl lō’ yāšûḇ rêqām:

10 wəhāyəṯâ ḵaśədîm ləšālāl kāl-šōləleyhā yiśəbā‘û nə’um-yəhwâ:

11 kî ṯiśəməḥî ṯiśəməḥû kî ṯ^a‘ăləzî ṯ^a‘aləzû^m šōsê n^aḥălāṯî kî ṯāfûšî ṯāfûšû kə‘eḡəlâ ḏāšâ wəṯiṣəhălî wəṯiṣəhălû kā’ăbirîm:

12 bwōšâ ’imməḵem mə’ōḏ ḥāfərâ ywōlaḏətəḵem hinnēh ’^aḥărîṯ gwōyim miḏəbār ṣîyâ w^a‘ărāḇâ:

13 miqqeṣef yəhwâ lō’ ṯēšēḇ wəhāyəṯâ šəmāmâ kullāh kōl ‘ōḇēr ‘al-bāḇel yiššōm wəyišərōq ‘al-kāl-makwōṯeyhā:

14 ‘irəḵû ‘al-bāḇel| sāḇîḇ kāl-dōrəḵê qešeṯ yəḏû ’ēleyhā ’al-t^aḥəməlû ’el-ḥēṣ kî layhwâ ḥāṭā’â:

15 hārî‘û ‘āleyhā sāḇîḇ nāṯənâ yāḏāh nāfəlû ’ašəwîyōṯeyhā ’āšəywōṯeyhā neherəsû ḥwōmwōṯeyhā kî niqəmaṯ yəhwâ hî’ hinnāqəmû ḇāh ka’ăšer ‘āśəṯâ ‘ăśû-lāh:

16 kirəṯû zwōrē‘a mibāḇel wəṯōfēś magāl bə‘ēṯ qāṣîr mipənê ḥereḇ hayywōnâ ’îš ’el-‘ammwō yifənû wə’îš lə’arəṣwō yānusû: s

17 śeh fəzûrâ yiśərā’ēl ’ărāywōṯ hidîḥû hāri’šwōn ’ăḵālwō meleḵə ’aššûr wəzeh hā’^aḥărwōn ‘iṣṣəmwō nəḇûḵaḏəre’ṣṣar meleḵə bāḇel: s

18 lāḵēn kōh-’āmar yəhwâ ṣəḇā’wōṯ ’ĕlōhê yiśərā’ēl hinənî fōqēḏ ’el-meleḵə bāḇel wə’el-’arəṣwō ka’ăšer pāqaḏətî ’el-meleḵə ’aššûr:

19 wəšōḇaḇətî ’eṯ-yiśərā’ēl ’el-nāwēhû wərā‘â hakarəmel wəhabāšān ûḇəhar ’efərayim wəhagilə‘āḏ tiśəb^a‘ nafəšwō:

20 bayyāmîm hâēm ûḇā‘ēṯ hahî’ nə’um-yəhwâ yəḇuqqaš ’eṯ-‘ăwōn yiśərā’ēl wə’ênennû wə’eṯ-ḥaṭṭō’ṯ yəhûḏâ wəlō’ ṯimmāṣe’ynâ kî ’esəl^aḥ la’ăšer ’ašə’îr:

21 ‘al-hā’āreṣ mərāṯayim ‘ălēh ‘āleyhā wə’el-ywōšəḇê pəqwōḏ ḥărōḇ wəh^aḥărēm ’^aḥărêhem nə’um-yəhwâ w^a‘ăśēh kəḵōl ’ăšer ṣiûîṯîḵā: s

22 qwōl miləḥāmâ bā’āreṣ wəšeḇer gāḏwōl:

23 ’êḵə niḡəd^a‘ wayyiššāḇēr paṭṭîš kāl-hā’āreṣ ’êḵə hāyəṯâ ləšammâ bāḇel bagwōyim:

24 yāqōšətî lāḵə wəḡam-niləkaḏətə bāḇel wə’atə lō’ yāḏā‘atə niməṣē’ṯ wəḡam-niṯəpaśətə kî ḇayhwâ hiṯəgārîṯ:

25 pāṯ^aḥ yəhwâ ’eṯ-’wōṣārwō wayywōṣē’ ’eṯ-kəlê z^a‘əmwō kî-məlā’ḵâ hî’ la’ḏōnāy yəhwih ṣəḇā’wōṯ bə’ereṣ kaśədîm:

26 bō’û-lāh miqqēṣ piṯəḥû ma’ăḇuseyhā sāllûhā ḵəmwō-‘ărēmîm wəh^aḥărîmûhā ’al-təhî-lāh šə’ērîṯ:

27 ḥirəḇû kāl-pāreyhā yērəḏû laṭṭāḇ^aḥ hwōy ‘ălêhem kî-ḇā’ ywōmām ‘ēṯ pəqudāṯām: s

28 qwōl nāsîm ûfəlēṭîm mē’ereṣ bāḇel ləhagîḏ bəṣîywōn ’eṯ-niqəmaṯ yəhwâ ’ĕlōhênû niqəmaṯ hêḵālwō:

29 hašəmî‘û ’el-bāḇel| rabîm kāl-dōrəḵê qešeṯ ḥănû ‘āleyhā sāḇîḇ ’al-yəhî-lāh^a pəlēṭâ šalləmû-lāh kəfā‘ŏlāh kəḵōl ’ăšer ‘āśəṯâ ‘ăśû-lāh kî ’el-yəhwâ zāḏâ ’el-qəḏwōš yiśərā’ēl:

30 lāḵēn yipəlû ḇ^aḥûreyhā birəḥōḇōṯeyhā wəḵāl-’anəšê miləḥamətāh yidammû bayywōm hahû’ nə’um-yəhwâ: s

31 hinənî ’ēleyḵā zāḏwōn nə’um-’ăḏōnāy yəhwih ṣəḇā’wōṯ kî bā’ ywōməḵā ‘ēṯ pəqaḏətîḵā:

32 wəḵāšal zāḏwōn wənāfal wə’ên lwō mēqîm wəhiṣṣatî ’ēš bə‘ārāyw wə’āḵəlâ kāl-səḇîḇōṯāyw: s

33 kōh ’āmar yəhwâ ṣəḇā’wōṯ ‘ăšûqîm bənê-yiśərā’ēl ûḇənê-yəhûḏâ y^aḥədāw wəḵāl-šōḇêhem heḥĕzîqû ḇām mē’ănû šalləḥām:

34 gō’ălām| ḥāzāq yəhwâ ṣəḇā’wōṯ šəmwō rîḇ yārîḇ ’eṯ-rîḇām ləm^a‘an hirəgî‘a ’eṯ-hā’āreṣ wəhirəgîz ləyōšəḇê ḇāḇel:

35 ḥereḇ ‘al-kaśədîm nə’um-yəhwâ wə’el-yōšəḇê ḇāḇel wə’el-śāreyhā wə’el-ḥăḵāmeyhā:

36 ḥereḇ ’el-habadîm wənō’ālû ḥereḇ ’el-gibwōreyhā wāḥātû:

37 ḥereḇ ’el-sûsāyw wə’el-riḵəbwō wə’el-kāl-hā‘ereḇ ’ăšer bəṯwōḵāh wəhāyû lənāšîm ḥereḇ ’el-’wōṣərōṯeyhā ûḇuzzāzû:

38 ḥōreḇ ’el-mêmeyhā wəyāḇēšû kî ’ereṣ pəsilîm hî’ ûḇā’êmîm yiṯəhōlālû:

39 lāḵēn yēšəḇû ṣîyîm ’eṯ-’îyîm wəyāšəḇû ḇāh bənwōṯ y^a‘ănâ wəlō’-ṯēšēḇ ‘wōḏ lāneṣ^aḥ wəlō’ ṯišəkwōn ‘aḏ-dwōr wāḏwōr:

40 kəmahəpēḵaṯ ’ĕlōhîm ’eṯ-səḏōm wə’eṯ-‘ămōrâ wə’eṯ-šəḵēneyhā nə’um-yəhwâ lō’-yēšēḇ šām ’îš wəlō’-yāḡûr bāh ben-’āḏām:

41 hinnēh ‘am bā’ miṣṣāfwōn wəḡwōy gāḏwōl ûməlāḵîm rabîm yē‘ōrû mîyarəkəṯê-’āreṣ:

42 qešeṯ wəḵîḏōn y^aḥăzîqû ’aḵəzārî hēmmâ wəlō’ yər^aḥēmû qwōlām kayyām yehĕmeh wə‘al-sûsîm yirəkāḇû ‘ārûḵə kə’îš lammiləḥāmâ ‘ālayiḵə baṯ-bāḇel:

43 šām^a‘ meleḵə-bāḇel ’eṯ-šimə‘ām wərāfû yāḏāyw ṣārâ heḥĕzîqaṯəhû ḥîl kayywōlēḏâ:

44 hinnēh kə’arəyēh y^a‘ăleh migə’wōn hayyarədēn ’el-nəwēh ’êṯān kî-’arəgi‘â ’ărûṣēm ’ărîṣēm mē‘āleyhā ûmî ḇāḥûr ’ēleyhā ’efəqōḏ kî mî ḵāmwōnî ûmî ywō‘iḏennî ûmî-zeh rō‘eh ’ăšer y^a‘ămōḏ ləfānāy:

45 lāḵēn šimə‘û ‘ăṣaṯ-yəhwâ ’ăšer yā‘aṣ ’el-bāḇel ûm^aḥəšəḇwōṯāyw ’ăšer ḥāšaḇ ’el-’ereṣ kaśədîm ’im-lō’ yisəḥāḇûm ṣə‘îrê haṣṣō’n ’im-lō’ yaššîm ‘ălêhem nāweh:

46 miqqwōl niṯəpəśâ ḇāḇel nirə‘ăšâ hā’āreṣ ûzə‘āqâ bagwōyim nišəmā‘: s