Sacred Texts  Bible  Index 
Polyglot  KJV  Sep  Vul 

Jeremiah (Yermiyah) Index
  Previous  Next 

Tanach (Hebrew): Jeremiah (Yermiyah) Chapter 42

1 ‏וַֽיִּגְּשׁוּ֙ כָּל־שָׂרֵ֣י הַחֲיָלִ֔ים וְיֽוֹחָנָן֙ בֶּן־קָרֵ֔חַ וִֽיזַנְיָ֖ה בֶּן־הוֹשַֽׁעְיָ֑ה וְכָל־הָעָ֖ם מִקָּטֹ֥ן וְעַד־גָּדֽוֹל׃

2 ‏וַיֹּאמְר֞וּ אֶֽל־יִרְמְיָ֣הוּ הַנָּבִ֗יא תִּפָּל־נָ֤א תְחִנָּתֵ֙נוּ֙ לְפָנֶ֔יךָ וְהִתְפַּלֵּ֤ל בַּעֲדֵ֙נוּ֙ אֶל־יְהוָ֣ה אֱלֹהֶ֔יךָ בְּעַ֖ד כָּל־הַשְּׁאֵרִ֣ית הַזֹּ֑את כִּֽי־נִשְׁאַ֤רְנוּ מְעַט֙ מֵֽהַרְבֵּ֔ה כַּאֲשֶׁ֥ר עֵינֶ֖יךָ רֹא֥וֹת אֹתָֽנוּ׃

3 ‏וְיַגֶּד־לָ֙נוּ֙ יְהוָ֣ה אֱלֹהֶ֔יךָ אֶת־הַדֶּ֖רֶךְ אֲשֶׁ֣ר נֵֽלֶךְ־בָּ֑הּ וְאֶת־הַדָּבָ֖ר אֲשֶׁ֥ר נַעֲשֶֽׂה׃

4 ‏וַיֹּ֨אמֶר אֲלֵיהֶ֜ם יִרְמְיָ֤הוּ הַנָּבִיא֙ שָׁמַ֔עְתִּי הִנְנִ֧י מִתְפַּלֵּ֛ל אֶל־יְהוָ֥ה אֱלֹהֵיכֶ֖ם כְּדִבְרֵיכֶ֑ם וְֽהָיָ֡ה כָּֽל־הַדָּבָר֩ אֲשֶׁר־יַעֲנֶ֨ה יְהוָ֤ה אֶתְכֶם֙ אַגִּ֣יד לָכֶ֔ם לֹֽא־אֶמְנַ֥ע מִכֶּ֖ם דָּבָֽר׃

5 ‏וְהֵ֙מָּה֙ אָמְר֣וּ אֶֽל־יִרְמְיָ֔הוּ יְהִ֤י יְהוָה֙ בָּ֔נוּ לְעֵ֖ד אֱמֶ֣ת וְנֶאֱמָ֑ן אִם־לֹ֡א כְּֽכָל־הַ֠דָּבָר אֲשֶׁ֨ר יִֽשְׁלָחֲךָ֜ יְהוָ֧ה אֱלֹהֶ֛יךָ אֵלֵ֖ינוּ כֵּ֥ן נַעֲשֶֽׂה׃

6 ‏אִם־ט֣וֹב וְאִם־רָ֔ע בְּק֣וֹל׀ יְהוָ֣ה אֱלֹהֵ֗ינוּ אֲשֶׁ֨ר אנו אֲנַ֜חְנוּ שֹׁלְחִ֥ים אֹתְךָ֛ אֵלָ֖יו נִשְׁמָ֑ע לְמַ֙עַן֙ אֲשֶׁ֣ר יִֽיטַב־לָ֔נוּ כִּ֣י נִשְׁמַ֔ע בְּק֖וֹל יְהוָ֥ה אֱלֹהֵֽינוּ׃ ס

7 ‏וַיְהִ֕י מִקֵּ֖ץ עֲשֶׂ֣רֶת יָמִ֑ים וַיְהִ֥י דְבַר־יְהוָ֖ה אֶֽל־יִרְמְיָֽהוּ׃

8 ‏וַיִּקְרָ֗א אֶל־יֽוֹחָנָן֙ בֶּן־קָרֵ֔חַ וְאֶ֛ל כָּל־שָׂרֵ֥י הַחֲיָלִ֖ים אֲשֶׁ֣ר אִתּ֑וֹ וּלְכָ֨ל־הָעָ֔ם לְמִקָּטֹ֥ן וְעַד־גָּדֽוֹל׃

9 ‏וַיֹּ֣אמֶר אֲלֵיהֶ֔ם כֹּֽה־אָמַ֥ר יְהוָ֖ה אֱלֹהֵ֣י יִשְׂרָאֵ֑ל אֲשֶׁ֨ר שְׁלַחְתֶּ֤ם אֹתִי֙ אֵלָ֔יו לְהַפִּ֥יל תְּחִנַּתְכֶ֖ם לְפָנָֽיו׃

10 ‏אִם־שׁ֤וֹב תֵּֽשְׁבוּ֙ בָּאָ֣רֶץ הַזֹּ֔את וּבָנִ֤יתִי אֶתְכֶם֙ וְלֹ֣א אֶהֱרֹ֔ס וְנָטַעְתִּ֥י אֶתְכֶ֖ם וְלֹ֣א אֶתּ֑וֹשׁ כִּ֤י נִחַ֙מְתִּי֙ אֶל־הָ֣רָעָ֔ה אֲשֶׁ֥ר עָשִׂ֖יתִי לָכֶֽם׃

11 ‏אַל־תִּֽירְא֗וּ מִפְּנֵי֙ מֶ֣לֶךְ בָּבֶ֔ל אֲשֶׁר־אַתֶּ֥ם יְרֵאִ֖ים מִפָּנָ֑יו אַל־תִּֽירְא֤וּ מִמֶּ֙נּוּ֙ נְאֻם־יְהוָ֔ה כִּֽי־אִתְּכֶ֣ם אָ֔נִי לְהוֹשִׁ֧יעַ אֶתְכֶ֛ם וּלְהַצִּ֥יל אֶתְכֶ֖ם מִיָּדֽוֹ׃

12 ‏וְאֶתֵּ֥ן לָכֶ֛ם רַחֲמִ֖ים וְרִחַ֣ם אֶתְכֶ֑ם וְהֵשִׁ֥יב אֶתְכֶ֖ם אֶל־אַדְמַתְכֶֽם׃

13 ‏וְאִם־אֹמְרִ֣ים אַתֶּ֔ם לֹ֥א נֵשֵׁ֖ב בָּאָ֣רֶץ הַזֹּ֑את לְבִלְתִּ֣י שְׁמֹ֔עַ בְּק֖וֹל יְהוָ֥ה אֱלֹהֵיכֶֽם׃

14 ‏לֵאמֹ֗ר לֹ֚א כִּ֣י אֶ֤רֶץ מִצְרַ֙יִם֙ נָב֔וֹא אֲשֶׁ֤ר לֹֽא־נִרְאֶה֙ מִלְחָמָ֔ה וְק֥וֹל שׁוֹפָ֖ר לֹ֣א נִשְׁמָ֑ע וְלַלֶּ֥חֶם לֹֽא־נִרְעָ֖ב וְשָׁ֥ם נֵשֵֽׁב׃

15 ‏וְעַתָּ֕ה לָכֵ֛ן שִׁמְע֥וּ דְבַר־יְהוָ֖ה שְׁאֵרִ֣ית יְהוּדָ֑ה כֹּֽה־אָמַר֩ יְהוָ֨ה צְבָא֜וֹת אֱלֹהֵ֣י יִשְׂרָאֵ֗ל אִם־אַ֠תֶּם שׂ֣וֹם תְּשִׂמ֤וּן פְּנֵיכֶם֙ לָבֹ֣א מִצְרַ֔יִם וּבָאתֶ֖ם לָג֥וּר שָֽׁם׃

16 ‏וְהָיְתָ֣ה הַחֶ֗רֶב אֲשֶׁ֤ר אַתֶּם֙ יְרֵאִ֣ים מִמֶּ֔נָּה שָׁ֛ם תַּשִּׂ֥יג אֶתְכֶ֖ם בְּאֶ֣רֶץ מִצְרָ֑יִם וְהָרָעָ֞ב אֲשֶׁר־אַתֶּ֣ם׀ דֹּאֲגִ֣ים מִמֶּ֗נּוּ שָׁ֣ם יִדְבַּ֧ק אַחֲרֵיכֶ֛ם מִצְרַ֖יִם וְשָׁ֥ם תָּמֻֽתוּ׃

17 ‏וְיִֽהְי֣וּ כָל־הָאֲנָשִׁ֗ים אֲשֶׁר־שָׂ֨מוּ אֶת־פְּנֵיהֶ֜ם לָב֤וֹא מִצְרַ֙יִם֙ לָג֣וּר שָׁ֔ם יָמ֕וּתוּ בַּחֶ֖רֶב בָּרָעָ֣ב וּבַדָּ֑בֶר וְלֹֽא־יִהְיֶ֤ה לָהֶם֙ שָׂרִ֣יד וּפָלִ֔יט מִפְּנֵי֙ הָֽרָעָ֔ה אֲשֶׁ֥ר אֲנִ֖י מֵבִ֥יא עֲלֵיהֶֽם׃ ס

18 ‏כִּי֩ כֹ֨ה אָמַ֜ר יְהוָ֣ה צְבָאוֹת֮ אֱלֹהֵ֣י יִשְׂרָאֵל֒ כַּאֲשֶׁר֩ נִתַּ֨ךְ אַפִּ֜י וַחֲמָתִ֗י עַל־יֹֽשְׁבֵי֙ יְר֣וּשָׁלִַ֔ם כֵּ֣ן תִּתַּ֤ךְ חֲמָתִי֙ עֲלֵיכֶ֔ם בְּבֹאֲכֶ֖ם מִצְרָ֑יִם וִהְיִיתֶ֞ם לְאָלָ֤ה וּלְשַׁמָּה֙ וְלִקְלָלָ֣ה וּלְחֶרְפָּ֔ה וְלֹֽא־תִרְא֣וּ ע֔וֹד אֶת־הַמָּק֖וֹם הַזֶּֽה׃

19 ‏דִּבֶּ֨ר יְהוָ֤ה עֲלֵיכֶם֙ שְׁאֵרִ֣ית יְהוּדָ֔ה אַל־תָּבֹ֖אוּ מִצְרָ֑יִם יָדֹ֙עַ֙ תֵּֽדְע֔וּ כִּי־הַעִידֹ֥תִי בָכֶ֖ם הַיּֽוֹם׃

20 ‏כִּ֣י התעתים הִתְעֵיתֶם֮3 בְּנַפְשֽׁוֹתֵיכֶם֒ כִּֽי־אַתֶּ֞ם שְׁלַחְתֶּ֣ם אֹתִ֗י אֶל־יְהוָ֤ה אֱלֹֽהֵיכֶם֙ לֵאמֹ֔ר הִתְפַּלֵּ֣ל בַּעֲדֵ֔נוּ אֶל־יְהוָ֖ה אֱלֹהֵ֑ינוּ וּכְכֹל֩ אֲשֶׁ֨ר יֹאמַ֜ר יְהוָ֧ה אֱלֹהֵ֛ינוּ כֵּ֥ן הַגֶּד־לָ֖נוּ וְעָשִֽׂינוּ׃

21 ‏וָאַגִּ֥ד לָכֶ֖ם הַיּ֑וֹם וְלֹ֣א שְׁמַעְתֶּ֗ם בְּקוֹל֙ יְהוָ֣ה אֱלֹֽהֵיכֶ֔ם וּלְכֹ֖ל אֲשֶׁר־שְׁלָחַ֥נִי אֲלֵיכֶֽם׃

22 ‏וְעַתָּה֙ יָדֹ֣עַ תֵּֽדְע֔וּ כִּ֗י בַּחֶ֛רֶב בָּרָעָ֥ב וּבַדֶּ֖בֶר תָּמ֑וּתוּ בַּמָּקוֹם֙ אֲשֶׁ֣ר חֲפַצְתֶּ֔ם לָב֖וֹא לָג֥וּר שָֽׁם׃ ס

1 wayyigəšû kāl-śārê haḥăyālîm wəywōḥānān ben-qārēḥa wîzanəyâ ben-hwōša‘əyâ wəḵāl-hā‘ām miqqāṭōn wə‘aḏ-gāḏwōl:

2 wayyō’mərû ’el-yirəməyâû hannāḇî’ tipāl-nā’ ṯəḥinnāṯēnû ləfāneyḵā wəhiṯəpallēl ba‘ăḏēnû ’el-yəhwâ ’ĕlōheyḵā bə‘aḏ kāl-haššə’ērîṯ hazzō’ṯ kî-nišə’arənû mə‘aṭ mēharəbēh ka’ăšer ‘êneyḵā rō’wōṯ ’ōṯānû:

3 wəyageḏ-lānû yəhwâ ’ĕlōheyḵā ’eṯ-hadereḵə ’ăšer nēleḵə-bāh wə’eṯ-hadāḇār ’ăšer na‘ăśeh:

4 wayyō’mer ’ălêhem yirəməyâû hannāḇî’ šāma‘ətî hinənî miṯəpallēl ’el-yəhwâ ’ĕlōhêḵem kəḏiḇərêḵem wəhāyâ kāl-hadāḇār ’ăšer-ya‘ăneh yəhwâ ’eṯəḵem ’agîḏ lāḵem lō’-’eməna‘ mikem dāḇār:

5 wəhēmmâ ’āmərû ’el-yirəməyâû yəhî yəhwâ bānû lə‘ēḏ ’ĕmeṯ wəne’ĕmān ’im-lō’ kəḵāl-hadāḇār ’ăšer yišəlāḥăḵā yəhwâ ’ĕlōheyḵā ’ēlênû kēn na‘ăśeh:

6 ’im-ṭwōḇ wə’im-rā‘ bəqwōl| yəhwâ ’ĕlōhênû ’ăšer ’ănû ’ănaḥənû šōləḥîm ’ōṯəḵā ’ēlāyw nišəmā‘ ləma‘an ’ăšer yîṭaḇ-lānû kî nišəma‘ bəqwōl yəhwâ ’ĕlōhênû: s

7 wayəhî miqqēṣ ‘ăśereṯ yāmîm wayəhî ḏəḇar-yəhwâ ’el-yirəməyâû:

8 wayyiqərā’ ’el-ywōḥānān ben-qārēḥa wə’el kāl-śārê haḥăyālîm ’ăšer ’itwō ûləḵāl-hā‘ām ləmiqqāṭōn wə‘aḏ-gāḏwōl:

9 wayyō’mer ’ălêhem kōh-’āmar yəhwâ ’ĕlōhê yiśərā’ēl ’ăšer šəlaḥətem ’ōṯî ’ēlāyw ləhapîl təḥinnaṯəḵem ləfānāyw:

10 ’im-šwōḇ tēšəḇû bā’āreṣ hazzō’ṯ ûḇānîṯî ’eṯəḵem wəlō’ ’ehĕrōs wənāṭa‘ətî ’eṯəḵem wəlō’ ’etwōš kî niḥamətî ’el-hārā‘â ’ăšer ‘āśîṯî lāḵem:

11 ’al-tîrə’û mipənê meleḵə bāḇel ’ăšer-’atem yərē’îm mipānāyw ’al-tîrə’û mimmennû nə’um-yəhwâ kî-’itəḵem ’ānî ləhwōšî‘a ’eṯəḵem ûləhaṣṣîl ’eṯəḵem mîyāḏwō:

12 wə’etēn lāḵem raḥămîm wəriḥam ’eṯəḵem wəhēšîḇ ’eṯəḵem ’el-’aḏəmaṯəḵem:

13 wə’im-’ōmərîm ’atem lō’ nēšēḇ bā’āreṣ hazzō’ṯ ləḇilətî šəmō‘a bəqwōl yəhwâ ’ĕlōhêḵem:

14 lē’mōr lō’ kî ’ereṣ miṣərayim nāḇwō’ ’ăšer lō’-nirə’eh miləḥāmâ wəqwōl šwōfār lō’ nišəmā‘ wəlalleḥem lō’-nirə‘āḇ wəšām nēšēḇ:

15 wə‘atâ lāḵēn šimə‘û ḏəḇar-yəhwâ šə’ērîṯ yəhûḏâ kōh-’āmar yəhwâ ṣəḇā’wōṯ ’ĕlōhê yiśərā’ēl ’im-’atem śwōm təśimûn pənêḵem lāḇō’ miṣərayim ûḇā’ṯem lāḡûr šām:

16 wəhāyəṯâ haḥereḇ ’ăšer ’atem yərē’îm mimmennâ šām taśśîḡ ’eṯəḵem bə’ereṣ miṣərāyim wəhārā‘āḇ ’ăšer-’atem| dō’ăḡîm mimmennû šām yiḏəbaq ’aḥărêḵem miṣərayim wəšām tāmuṯû:

17 wəyihəyû ḵāl-hā’ănāšîm ’ăšer-śāmû ’eṯ-pənêhem lāḇwō’ miṣərayim lāḡûr šām yāmûṯû baḥereḇ bārā‘āḇ ûḇadāḇer wəlō’-yihəyeh lâem śārîḏ ûfālîṭ mipənê hārā‘â ’ăšer ’ănî mēḇî’ ‘ălêhem: s

18 kî ḵōh ’āmar yəhwâ ṣəḇā’wōṯ ’ĕlōhê yiśərā’ēl ka’ăšer nitaḵə ’apî waḥămāṯî ‘al-yōšəḇê yərûšālaim kēn titaḵə ḥămāṯî ‘ălêḵem bəḇō’ăḵem miṣərāyim wihəyîṯem lə’ālâ ûləšammâ wəliqəlālâ ûləḥerəpâ wəlō’-ṯirə’û ‘wōḏ ’eṯ-hammāqwōm hazzeh:

19 diber yəhwâ ‘ălêḵem šə’ērîṯ yəhûḏâ ’al-tāḇō’û miṣərāyim yāḏō‘a tēḏə‘û kî-ha‘îḏōṯî ḇāḵem hayywōm:

20 kî hiṯə‘ēṯeym hiṯə‘êṯem3 bənafəšwōṯêḵem kî-’atem šəlaḥətem ’ōṯî ’el-yəhwâ ’ĕlōhêḵem lē’mōr hiṯəpallēl ba‘ăḏēnû ’el-yəhwâ ’ĕlōhênû ûḵəḵōl ’ăšer yō’mar yəhwâ ’ĕlōhênû kēn hageḏ-lānû wə‘āśînû:

21 wā’agiḏ lāḵem hayywōm wəlō’ šəma‘ətem bəqwōl yəhwâ ’ĕlōhêḵem ûləḵōl ’ăšer-šəlāḥanî ’ălêḵem:

22 wə‘atâ yāḏō‘a tēḏə‘û kî baḥereḇ bārā‘āḇ ûḇadeḇer tāmûṯû bammāqwōm ’ăšer ḥăfaṣətem lāḇwō’ lāḡûr šām: s


Next: Jeremiah (Yermiyah) Chapter 43