Sacred Texts  Bible  Index 
Polyglot  KJV  Sep  Vul 

Jeremiah (Yermiyah) Index
  Previous  Next 

Tanach (Hebrew): Jeremiah (Yermiyah) Chapter 30

1 ‏הַדָּבָר֙ אֲשֶׁ֣ר הָיָ֣ה אֶֽל־יִרְמְיָ֔הוּ מֵאֵ֥ת יְהוָ֖ה לֵאמֹֽר׃

2 ‏כֹּֽה־אָמַ֧ר יְהוָ֛ה אֱלֹהֵ֥י יִשְׂרָאֵ֖ל לֵאמֹ֑ר כְּתָב־לְךָ֗ אֵ֧ת כָּל־הַדְּבָרִ֛ים אֲשֶׁר־דִּבַּ֥רְתִּי אֵלֶ֖יךָ אֶל־סֵֽפֶר׃

3 ‏כִּ֠י הִנֵּ֨ה יָמִ֤ים בָּאִים֙ נְאֻם־יְהוָ֔ה וְ֠שַׁבְתִּי אֶת־שְׁב֨וּת עַמִּ֧י יִשְׂרָאֵ֛ל וִֽיהוּדָ֖ה אָמַ֣ר יְהוָ֑ה וַהֲשִׁבֹתִ֗ים אֶל־הָאָ֛רֶץ אֲשֶׁר־נָתַ֥תִּי לַאֲבוֹתָ֖ם וִֽירֵשֽׁוּהָ׃ פ

4 ‏וְאֵ֣לֶּה הַדְּבָרִ֗ים אֲשֶׁ֨ר דִּבֶּ֧ר יְהוָ֛ה אֶל־יִשְׂרָאֵ֖ל וְאֶל־יְהוּדָֽה׃

5 ‏כִּי־כֹה֙ אָמַ֣ר יְהוָ֔ה ק֥וֹל חֲרָדָ֖ה שָׁמָ֑עְנוּ פַּ֖חַד וְאֵ֥ין שָׁלֽוֹם׃

6 ‏שַׁאֲלוּ־נָ֣א וּרְא֔וּ אִם־יֹלֵ֖ד זָכָ֑ר מַדּוּעַ֩ רָאִ֨יתִי כָל־גֶּ֜בֶר יָדָ֤יו עַל־חֲלָצָיו֙ כַּיּ֣וֹלֵדָ֔ה וְנֶהֶפְכ֥וּ כָל־פָּנִ֖ים לְיֵרָקֽוֹן׃

7 ‏ה֗וֹי כִּ֥י גָד֛וֹל הַיּ֥וֹם הַה֖וּא מֵאַ֣יִן כָּמֹ֑הוּ וְעֵֽת־צָרָ֥ה הִיא֙ לְיַֽעֲקֹ֔ב וּמִמֶּ֖נָּה יִוָּשֵֽׁעַ׃

8 ‏וְהָיָה֩ בַיּ֨וֹם הַה֜וּא נְאֻ֣ם׀ יְהוָ֣ה צְבָא֗וֹת אֶשְׁבֹּ֤ר עֻלּוֹ֙ מֵעַ֣ל צַוָּארֶ֔ךָ וּמוֹסְרוֹתֶ֖יךָ אֲנַתֵּ֑ק וְלֹא־יַעַבְדוּ־ב֥וֹ ע֖וֹד זָרִֽים׃

9 ‏וְעָ֣בְד֔וּ אֵ֖ת יְהוָ֣ה אֱלֹֽהֵיהֶ֑ם וְאֵת֙ דָּוִ֣ד מַלְכָּ֔ם אֲשֶׁ֥ר אָקִ֖ים לָהֶֽם׃ ס

10 ‏וְאַתָּ֡ה אַל־תִּירָא֩ עַבְדִּ֨י יַעֲקֹ֤ב נְאֻם־יְהוָֹה֙ וְאַל־תֵּחַ֣ת יִשְׂרָאֵ֔ל כִּ֠י הִנְנִ֤י מוֹשִֽׁיעֲךָ֙ מֵֽרָח֔וֹק וְאֶֽת־זַרְעֲךָ֖ מֵאֶ֣רֶץ שִׁבְיָ֑ם וְשָׁ֧ב יַעֲקֹ֛ב וְשָׁקַ֥ט וְשַׁאֲנַ֖ן וְאֵ֥ין מַחֲרִֽיד׃

11 ‏כִּֽי־אִתְּךָ֥ אֲנִ֛י נְאֻם־יְהוָ֖ה לְהֽוֹשִׁיעֶ֑ךָ כִּי֩ אֶעֱשֶׂ֨ה כָלָ֜ה בְּכָֽל־הַגּוֹיִ֣ם׀ אֲשֶׁ֧ר הֲפִצוֹתִ֣יךָ שָּׁ֗ם אַ֤ךְ אֹֽתְךָ֙ לֹֽא־אֶעֱשֶׂ֣ה כָלָ֔ה וְיִסַּרְתִּ֙יךָ֙ לַמִּשְׁפָּ֔ט וְנַקֵּ֖ה לֹ֥א אֲנַקֶּֽךָּ׃ פ

12 ‏כִּ֣י כֹ֥ה אָמַ֛ר יְהוָ֖ה אָנ֣וּשׁ לְשִׁבְרֵ֑ךְ נַחְלָ֖ה מַכָּתֵֽךְ׃

13 ‏אֵֽין־דָּ֥ן דִּינֵ֖ךְ לְמָז֑וֹר רְפֻא֥וֹת תְּעָלָ֖ה אֵ֥ין לָֽךְ׃

14 ‏כָּל־מְאַהֲבַ֣יִךְ שְׁכֵח֔וּךְ אוֹתָ֖ךְ לֹ֣א יִדְרֹ֑שׁוּ כִּי֩ מַכַּ֨ת אוֹיֵ֤ב הִכִּיתִיךְ֙ מוּסַ֣ר אַכְזָרִ֔י עַ֚ל רֹ֣ב עֲוֹנֵ֔ךְ עָצְמ֖וּ חַטֹּאתָֽיִךְ׃

15 ‏מַה־תִּזְעַק֙ עַל־שִׁבְרֵ֔ךְ אָנ֖וּשׁ מַכְאֹבֵ֑ךְ עַ֣ל׀ רֹ֣ב עֲוֹנֵ֗ךְ עָֽצְמוּ֙ חַטֹּאתַ֔יִךְ עָשִׂ֥יתִי אֵ֖לֶּה לָֽךְ׃

16 ‏לָכֵ֞ן כָּל־אֹכְלַ֙יִךְ֙ יֵאָכֵ֔לוּ וְכָל־צָרַ֥יִךְ כֻּלָּ֖ם בַּשְּׁבִ֣י יֵלֵ֑כוּ וְהָי֤וּ שֹׁאסַ֙יִךְ֙ לִמְשִׁסָּ֔ה וְכָל־בֹּזְזַ֖יִךְ אֶתֵּ֥ן לָבַֽז׃

17 ‏כִּי֩ אַעֲלֶ֨ה אֲרֻכָ֥ה לָ֛ךְ וּמִמַּכּוֹתַ֥יִךְ אֶרְפָּאֵ֖ךְ נְאֻם־יְהוָ֑ה כִּ֤י נִדָּחָה֙ קָ֣רְאוּ לָ֔ךְ צִיּ֣וֹן הִ֔יא דֹּרֵ֖שׁ אֵ֥ין לָֽהּ׃ ס

18 ‏כֹּ֣ה׀ אָמַ֣ר יְהוָ֗ה הִנְנִי־שָׁב֙ שְׁבוּת֙ אָהֳלֵ֣י יַֽעֲק֔וֹב וּמִשְׁכְּנֹתָ֖יו אֲרַחֵ֑ם וְנִבְנְתָ֥ה עִיר֙ עַל־תִּלָּ֔הּ וְאַרְמ֖וֹן עַל־מִשְׁפָּט֥וֹ יֵשֵֽׁב׃

19 ‏וְיָצָ֥א מֵהֶ֛ם תּוֹדָ֖ה וְק֣וֹל מְשַׂחֲקִ֑ים וְהִרְבִּתִים֙ וְלֹ֣א יִמְעָ֔טוּ וְהִכְבַּדְתִּ֖ים וְלֹ֥א יִצְעָֽרוּ׃

20 ‏וְהָי֤וּ בָנָיו֙ כְּקֶ֔דֶם וַעֲדָת֖וֹ לְפָנַ֣י תִּכּ֑וֹן וּפָ֣קַדְתִּ֔י עַ֖ל כָּל־לֹחֲצָֽיו׃

21 ‏וְהָיָ֨ה אַדִּיר֜וֹ מִמֶּ֗נּוּ וּמֹֽשְׁלוֹ֙ מִקִּרְבּ֣וֹ יֵצֵ֔א וְהִקְרַבְתִּ֖יו וְנִגַּ֣שׁ אֵלָ֑י כִּי֩ מִ֨י הוּא־זֶ֜ה עָרַ֧ב אֶת־לִבּ֛וֹ לָגֶ֥שֶׁת אֵלַ֖י נְאֻם־יְהוָֽה׃

22 ‏וִהְיִ֥יתֶם לִ֖י לְעָ֑ם וְאָ֣נֹכִ֔י אֶהְיֶ֥ה לָכֶ֖ם לֵאלֹהִֽים׃ ס

23 ‏הִנֵּ֣ה׀ סַעֲרַ֣ת יְהוָ֗ה חֵמָה֙ יָֽצְאָ֔ה סַ֖עַר מִתְגּוֹרֵ֑ר עַ֛ל רֹ֥אשׁ רְשָׁעִ֖ים יָחֽוּל׃

24 ‏לֹ֣א יָשׁ֗וּב חֲרוֹן֙ אַף־יְהוָ֔ה עַד־עֲשֹׂת֥וֹ וְעַד־הֲקִימ֖וֹ מְזִמּ֣וֹת לִבּ֑וֹ בְּאַחֲרִ֥ית הַיָּמִ֖ים תִּתְבּ֥וֹנְנוּ בָֽהּ׃

1 hadāḇār ’ăšer hāyâ ’el-yirəməyâû mē’ēṯ yəhwâ lē’mōr:

2 kōh-’āmar yəhwâ ’ĕlōhê yiśərā’ēl lē’mōr kəṯāḇ-ləḵā ’ēṯ kāl-hadəḇārîm ’ăšer-dibarətî ’ēleyḵā ’el-sēfer:

3 kî hinnēh yāmîm bā’îm nə’um-yəhwâ wəšaḇətî ’eṯ-šəḇûṯ ‘ammî yiśərā’ēl wîhûḏâ ’āmar yəhwâ wahăšiḇōṯîm ’el-hā’āreṣ ’ăšer-nāṯatî la’ăḇwōṯām wîrēšûhā: f

4 wə’ēlleh hadəḇārîm ’ăšer diber yəhwâ ’el-yiśərā’ēl wə’el-yəhûḏâ:

5 kî-ḵōh ’āmar yəhwâ qwōl ḥărāḏâ šāmā‘ənû paḥaḏ wə’ên šālwōm:

6 ša’ălû-nā’ ûrə’û ’im-yōlēḏ zāḵār madû‘a rā’îṯî ḵāl-geḇer yāḏāyw ‘al-ḥălāṣāyw kayywōlēḏâ wənehefəḵû ḵāl-pānîm ləyērāqwōn:

7 hwōy kî ḡāḏwōl hayywōm hahû’ mē’ayin kāmōhû wə‘ēṯ-ṣārâ hî’ ləya‘ăqōḇ ûmimmennâ yiûāšē‘a:

8 wəhāyâ ḇayywōm hahû’ nə’um| yəhwâ ṣəḇā’wōṯ ’ešəbōr ‘ullwō mē‘al ṣaûā’reḵā ûmwōsərwōṯeyḵā ’ănatēq wəlō’-ya‘aḇəḏû-ḇwō ‘wōḏ zārîm:

9 wə‘āḇəḏû ’ēṯ yəhwâ ’ĕlōhêhem wə’ēṯ dāwiḏ maləkām ’ăšer ’āqîm lâem: s

10 wə’atâ ’al-tîrā’ ‘aḇədî ya‘ăqōḇ nə’um-yəhwōâ wə’al-tēḥaṯ yiśərā’ēl kî hinənî mwōšî‘ăḵā mērāḥwōq wə’eṯ-zarə‘ăḵā mē’ereṣ šiḇəyām wəšāḇ ya‘ăqōḇ wəšāqaṭ wəša’ănan wə’ên maḥărîḏ:

11 kî-’itəḵā ’ănî nə’um-yəhwâ ləhwōšî‘eḵā kî ’e‘ĕśeh ḵālâ bəḵāl-hagwōyim| ’ăšer hăfiṣwōṯîḵā ššām ’aḵə ’ōṯəḵā lō’-’e‘ĕśeh ḵālâ wəyissarətîḵā lammišəpāṭ wənaqqēh lō’ ’ănaqqeḵḵā: f

12 kî ḵōh ’āmar yəhwâ ’ānûš ləšiḇərēḵə naḥəlâ makāṯēḵə:

13 ’ên-dān dînēḵə ləmāzwōr rəfu’wōṯ tə‘ālâ ’ên lāḵə:

14 kāl-mə’ahăḇayiḵə šəḵēḥûḵə ’wōṯāḵə lō’ yiḏərōšû kî makaṯ ’wōyēḇ hikîṯîḵə mûsar ’aḵəzārî ‘al rōḇ ‘ăwōnēḵə ‘āṣəmû ḥaṭṭō’ṯāyiḵə:

15 mah-tizə‘aq ‘al-šiḇərēḵə ’ānûš maḵə’ōḇēḵə ‘al| rōḇ ‘ăwōnēḵə ‘āṣəmû ḥaṭṭō’ṯayiḵə ‘āśîṯî ’ēlleh lāḵə:

16 lāḵēn kāl-’ōḵəlayiḵə yē’āḵēlû wəḵāl-ṣārayiḵə kullām baššəḇî yēlēḵû wəhāyû šō’sayiḵə liməšissâ wəḵāl-bōzəzayiḵə ’etēn lāḇaz:

17 kî ’a‘ăleh ’ăruḵâ lāḵə ûmimmakwōṯayiḵə ’erəpā’ēḵə nə’um-yəhwâ kî nidāḥâ qārə’û lāḵə ṣîywōn hî’ dōrēš ’ên lāh: s

18 kōh| ’āmar yəhwâ hinənî-šāḇ šəḇûṯ ’âŏlê ya‘ăqwōḇ ûmišəkənōṯāyw ’ăraḥēm wəniḇənəṯâ ‘îr ‘al-tillāh wə’arəmwōn ‘al-mišəpāṭwō yēšēḇ:

19 wəyāṣā’ mēhem twōḏâ wəqwōl məśaḥăqîm wəhirəbiṯîm wəlō’ yimə‘āṭû wəhiḵəbaḏətîm wəlō’ yiṣə‘ārû:

20 wəhāyû ḇānāyw kəqeḏem wa‘ăḏāṯwō ləfānay tikwōn ûfāqaḏətî ‘al kāl-lōḥăṣāyw:

21 wəhāyâ ’adîrwō mimmennû ûmōšəlwō miqqirəbwō yēṣē’ wəhiqəraḇətîw wənigaš ’ēlāy kî mî hû’-zeh ‘āraḇ ’eṯ-libwō lāḡešeṯ ’ēlay nə’um-yəhwâ:

22 wihəyîṯem lî lə‘ām wə’ānōḵî ’ehəyeh lāḵem lē’lōhîm: s

23 hinnēh| sa‘ăraṯ yəhwâ ḥēmâ yāṣə’â sa‘ar miṯəgwōrēr ‘al rō’š rəšā‘îm yāḥûl:

24 lō’ yāšûḇ ḥărwōn ’af-yəhwâ ‘aḏ-‘ăśōṯwō wə‘aḏ-hăqîmwō məzimmwōṯ libwō bə’aḥărîṯ hayyāmîm tiṯəbwōnənû ḇāh:


Next: Jeremiah (Yermiyah) Chapter 31