Sacred Texts  Bible  Index 
Polyglot  KJV  Sep  Vul 

Jeremiah (Yermiyah) Index
  Previous  Next 

Tanach (Hebrew): Jeremiah (Yermiyah) Chapter 29

1 ‏וְאֵ֙לֶּה֙ דִּבְרֵ֣י הַסֵּ֔פֶר אֲשֶׁ֥ר שָׁלַ֛ח יִרְמְיָ֥ה הַנָּבִ֖יא מִירוּשָׁלִָ֑ם אֶל־יֶ֜תֶר זִקְנֵ֣י הַגּוֹלָ֗ה וְאֶל־הַכֹּהֲנִ֤ים וְאֶל־הַנְּבִיאִים֙ וְאֶל־כָּל־הָעָ֔ם אֲשֶׁ֨ר הֶגְלָ֧ה נְבֽוּכַדְנֶאצַּ֛ר מִירוּשָׁלִַ֖ם בָּבֶֽלָה׃

2 ‏אַחֲרֵ֣י צֵ֣את יְכָנְיָֽה־הַ֠מֶּלֶךְ וְהַגְּבִירָ֨ה וְהַסָּרִיסִ֜ים שָׂרֵ֨י יְהוּדָ֧ה וִירוּשָׁלִַ֛ם וְהֶחָרָ֥שׁ וְהַמַּסְגֵּ֖ר מִירוּשָׁלִָֽם׃

3 ‏בְּיַד֙ אֶלְעָשָׂ֣ה בֶן־שָׁפָ֔ן וּגְמַרְיָ֖ה בֶּן־חִלְקִיָּ֑ה אֲשֶׁ֨ר שָׁלַ֜ח צִדְקִיָּ֣ה מֶֽלֶךְ־יְהוּדָ֗ה אֶל־נְבוּכַדְנֶאצַּ֛ר מֶ֥לֶךְ בָּבֶ֖ל בָּבֶ֥לָה לֵאמֹֽר׃ ס

4 ‏כֹּ֥ה אָמַ֛ר יְהוָ֥ה צְבָא֖וֹת אֱלֹהֵ֣י יִשְׂרָאֵ֑ל לְכָל־הַ֨גּוֹלָ֔ה אֲשֶׁר־הִגְלֵ֥יתִי מִירוּשָׁלִַ֖ם בָּבֶֽלָה׃

5 ‏בְּנ֥וּ בָתִּ֖ים וְשֵׁ֑בוּ וְנִטְע֣וּ גַנּ֔וֹת וְאִכְל֖וּ אֶת־פִּרְיָֽן׃

6 ‏קְח֣וּ נָשִׁ֗ים וְהוֹלִידוּ֮ בָּנִ֣ים וּבָנוֹת֒ וּקְח֨וּ לִבְנֵיכֶ֜ם נָשִׁ֗ים וְאֶת־בְּנֽוֹתֵיכֶם֙ תְּנ֣וּ לַֽאֲנָשִׁ֔ים וְתֵלַ֖דְנָה בָּנִ֣ים וּבָנ֑וֹת וּרְבוּ־שָׁ֖ם וְאַל־תִּמְעָֽטוּ׃

7 ‏וְדִרְשׁ֞וּ אֶת־שְׁל֣וֹם הָעִ֗יר אֲשֶׁ֨ר הִגְלֵ֤יתִי אֶתְכֶם֙ שָׁ֔מָּה וְהִתְפַּֽלְל֥וּ בַעֲדָ֖הּ אֶל־יְהוָ֑ה כִּ֣י בִשְׁלוֹמָ֔הּ יִהְיֶ֥ה לָכֶ֖ם שָׁלֽוֹם׃ פ

8 ‏כִּי֩ כֹ֨ה אָמַ֜ר יְהוָ֤ה צְבָאוֹת֙ אֱלֹהֵ֣י יִשְׂרָאֵ֔ל אַל־יַשִּׁ֧יאוּ לָכֶ֛ם נְבִֽיאֵיכֶ֥ם אֲשֶׁר־בְּקִרְבְּכֶ֖ם וְקֹֽסְמֵיכֶ֑ם וְאַֽל־תִּשְׁמְעוּ֙ אֶל־חֲלֹמֹ֣תֵיכֶ֔ם אֲשֶׁ֥ר אַתֶּ֖ם מַחְלְמִֽים׃

9 ‏כִּ֣י בְשֶׁ֔קֶר הֵ֛ם נִבְּאִ֥ים לָכֶ֖ם בִּשְׁמִ֑י לֹ֥א שְׁלַחְתִּ֖ים נְאֻם־יְהוָֽה׃ ס

10 ‏כִּֽי־כֹה֙ אָמַ֣ר יְהוָ֔ה כִּ֠י לְפִ֞י מְלֹ֧את לְבָבֶ֛ל שִׁבְעִ֥ים שָׁנָ֖ה אֶפְקֹ֣ד אֶתְכֶ֑ם וַהֲקִמֹתִ֤י עֲלֵיכֶם֙ אֶת־דְּבָרִ֣י הַטּ֔וֹב לְהָשִׁ֣יב אֶתְכֶ֔ם אֶל־הַמָּק֖וֹם הַזֶּֽה׃

11 ‏כִּי֩ אָנֹכִ֨י יָדַ֜עְתִּי אֶת־הַמַּחֲשָׁבֹ֗ת אֲשֶׁ֧ר אָנֹכִ֛י חֹשֵׁ֥ב עֲלֵיכֶ֖ם נְאֻם־יְהוָ֑ה מַחְשְׁב֤וֹת שָׁלוֹם֙ וְלֹ֣א לְרָעָ֔ה לָתֵ֥ת לָכֶ֖ם אַחֲרִ֥ית וְתִקְוָֽה׃

12 ‏וּקְרָאתֶ֤ם אֹתִי֙ וַֽהֲלַכְתֶּ֔ם וְהִתְפַּלַּלְתֶּ֖ם אֵלָ֑י וְשָׁמַעְתִּ֖י אֲלֵיכֶֽם׃

13 ‏וּבִקַּשְׁתֶּ֥ם אֹתִ֖י וּמְצָאתֶ֑ם כִּ֥י תִדְרְשֻׁ֖נִי בְּכָל־לְבַבְכֶֽם׃

14 ‏וְנִמְצֵ֣אתִי לָכֶם֮ נְאֻם־יְהוָה֒ וְשַׁבְתִּ֣י אֶת־שביתכם שְׁבוּתְכֶ֗ם וְקִבַּצְתִּ֣י אֶ֠תְכֶם מִֽכָּל־הַגּוֹיִ֞ם וּמִכָּל־הַמְּקוֹמ֗וֹת אֲשֶׁ֨ר הִדַּ֧חְתִּי אֶתְכֶ֛ם שָׁ֖ם נְאֻם־יְהוָ֑ה וַהֲשִׁבֹתִ֣י אֶתְכֶ֔ם אֶל־הַ֨מָּק֔וֹם אֲשֶׁר־הִגְלֵ֥יתִי אֶתְכֶ֖ם מִשָּֽׁם׃

15 ‏כִּ֖י אֲמַרְתֶּ֑ם הֵקִ֨ים לָ֧נוּ יְהוָ֛ה נְבִאִ֖ים בָּבֶֽלָה׃ ס

16 ‏כִּי־כֹ֣ה׀ אָמַ֣ר יְהוָ֗ה אֶל־הַמֶּ֙לֶךְ֙ הַיּוֹשֵׁב֙ אֶל־כִּסֵּ֣א דָוִ֔ד וְאֶל־כָּל־הָעָ֔ם הַיּוֹשֵׁ֖ב בָּעִ֣יר הַזֹּ֑את אֲחֵיכֶ֕ם אֲשֶׁ֛ר לֹֽא־יָצְא֥וּ אִתְּכֶ֖ם בַּגּוֹלָֽה׃

17 ‏כֹּ֤ה אָמַר֙ יְהוָ֣ה צְבָא֔וֹת הִנְנִי֙ מְשַׁלֵּ֣חַ בָּ֔ם אֶת־הַחֶ֖רֶב אֶת־הָרָעָ֣ב וְאֶת־הַדָּ֑בֶר וְנָתַתִּ֣י אוֹתָ֗ם כַּתְּאֵנִים֙ הַשֹּׁ֣עָרִ֔ים אֲשֶׁ֥ר לֹא־תֵאָכַ֖לְנָה מֵרֹֽעַ׃

18 ‏וְרָֽדַפְתִּי֙ אַֽחֲרֵיהֶ֔ם בַּחֶ֖רֶב בָּרָעָ֣ב וּבַדָּ֑בֶר וּנְתַתִּ֨ים לזועה לְזַעֲוָ֜ה לְכֹ֣ל׀ מַמְלְכ֣וֹת הָאָ֗רֶץ לְאָלָ֤ה וּלְשַׁמָּה֙ וְלִשְׁרֵקָ֣ה וּלְחֶרְפָּ֔ה בְּכָל־הַגּוֹיִ֖ם אֲשֶׁר־הִדַּחְתִּ֥ים שָֽׁם׃

19 ‏תַּ֛חַת אֲשֶֽׁר־לֹא־שָׁמְע֥וּ אֶל־דְּבָרַ֖י נְאֻם־יְהוָ֑ה אֲשֶׁר֩ שָׁלַ֨חְתִּי אֲלֵיהֶ֜ם אֶת־עֲבָדַ֤י הַנְּבִאִים֙ הַשְׁכֵּ֣ם וְשָׁלֹ֔חַ וְלֹ֥א שְׁמַעְתֶּ֖ם נְאֻם־יְהוָֽה׃

20 ‏וְאַתֶּ֖ם שִׁמְע֣וּ דְבַר־יְהוָ֑ה כָּל־הַ֨גּוֹלָ֔ה אֲשֶׁר־שִׁלַּ֥חְתִּי מִירוּשָׁלִַ֖ם בָּבֶֽלָה׃ ס

21 ‏כֹּֽה־אָמַר֩ יְהוָ֨ה צְבָא֜וֹת אֱלֹהֵ֣י יִשְׂרָאֵ֗ל אֶל־אַחְאָ֤ב בֶּן־קֽוֹלָיָה֙ וְאֶל־צִדְקִיָּ֣הוּ בֶן־מַֽעֲשֵׂיָ֔ה הַֽנִּבְּאִ֥ים לָכֶ֛ם בִּשְׁמִ֖י שָׁ֑קֶר הִנְנִ֣י׀ נֹתֵ֣ן אֹתָ֗ם בְּיַד֙ נְבֽוּכַדְרֶאצַּ֣ר מֶֽלֶךְ־בָּבֶ֔ל וְהִכָּ֖ם לְעֵינֵיכֶֽם׃

22 ‏וְלֻקַּ֤ח מֵהֶם֙ קְלָלָ֔ה לְכֹל֙ גָּל֣וּת יְהוּדָ֔ה אֲשֶׁ֥ר בְּבָבֶ֖ל לֵאמֹ֑ר יְשִֽׂמְךָ֤ יְהוָה֙ כְּצִדְקִיָּ֣הוּ וּכְאֶחָ֔ב אֲשֶׁר־קָלָ֥ם מֶֽלֶךְ־בָּבֶ֖ל בָּאֵֽשׁ׃

23 ‏יַ֡עַן אֲשֶׁר֩ עָשׂ֨וּ נְבָלָ֜ה בְּיִשְׂרָאֵ֗ל וַיְנַֽאֲפוּ֙ אֶת־נְשֵׁ֣י רֵֽעֵיהֶ֔ם וַיְדַבְּר֨וּ דָבָ֤ר בִּשְׁמִי֙ שֶׁ֔קֶר אֲשֶׁ֖ר ל֣וֹא צִוִּיתִ֑ם וְאָנֹכִ֛י הוידע הַיּוֹדֵ֥עַ וָעֵ֖ד נְאֻם־יְהוָֽה׃ ס

24 ‏וְאֶל־שְׁמַעְיָ֥הוּ הַנֶּחֱלָמִ֖י תֹּאמַ֥ר לֵאמֹֽר׃

25 ‏כֹּֽה־אָמַ֞ר יְהוָ֧ה צְבָא֛וֹת אֱלֹהֵ֥י יִשְׂרָאֵ֖ל לֵאמֹ֑ר יַ֡עַן אֲשֶׁ֣ר אַתָּה֩ שָׁלַ֨חְתָּ בְשִׁמְכָ֜ה סְפָרִ֗ים אֶל־כָּל־הָעָם֙ אֲשֶׁ֣ר בִּירוּשָׁלִַ֔ם וְאֶל־צְפַנְיָ֤ה בֶן־מַֽעֲשֵׂיָה֙ הַכֹּהֵ֔ן וְאֶ֥ל כָּל־הַכֹּהֲנִ֖ים לֵאמֹֽר׃

26 ‏יְהוָ֞ה נְתָנְךָ֣ כֹהֵ֗ן תַּ֚חַת יְהוֹיָדָ֣ע הַכֹּהֵ֔ן לִֽהְי֤וֹת פְּקִדִים֙ בֵּ֣ית יְהוָ֔ה לְכָל־אִ֥ישׁ מְשֻׁגָּ֖ע וּמִתְנַבֵּ֑א וְנָתַתָּ֥ה אֹת֛וֹ אֶל־הַמַּהְפֶּ֖כֶת וְאֶל־הַצִּינֹֽק׃

27 ‏וְעַתָּ֗ה לָ֚מָּה לֹ֣א גָעַ֔רְתָּ בְּיִרְמְיָ֖הוּ הָֽעֲנְּתֹתִ֑י הַמִּתְנַבֵּ֖א לָכֶֽם׃

28 ‏כִּ֣י עַל־כֵּ֞ן שָׁלַ֥ח אֵלֵ֛ינוּ בָּבֶ֥ל לֵאמֹ֖ר אֲרֻכָּ֣ה הִ֑יא בְּנ֤וּ בָתִּים֙ וְשֵׁ֔בוּ וְנִטְע֣וּ גַנּ֔וֹת וְאִכְל֖וּ אֶת־פְּרִיהֶֽן׃

29 ‏וַיִּקְרָ֛א צְפַנְיָ֥ה הַכֹּהֵ֖ן אֶת־הַסֵּ֣פֶר הַזֶּ֑ה בְּאָזְנֵ֖י יִרְמְיָ֥הוּ הַנָּבִֽיא׃ פ

30 ‏וַֽיְהִי֙ דְּבַר־יְהוָ֔ה אֶֽל־יִרְמְיָ֖הוּ לֵאמֹֽר׃

31 ‏שְׁלַ֤ח עַל־כָּל־הַגּוֹלָה֙ לֵאמֹ֔ר כֹּ֚ה אָמַ֣ר יְהוָ֔ה אֶל־שְׁמַעְיָ֖ה הַנֶּחֱלָמִ֑י יַ֡עַן אֲשֶׁר֩ נִבָּ֨א לָכֶ֜ם שְׁמַעְיָ֗ה וַֽאֲנִי֙ לֹ֣א שְׁלַחְתִּ֔יו וַיַּבְטַ֥ח אֶתְכֶ֖ם עַל־שָֽׁקֶר׃

32 ‏לָכֵ֞ן כֹּֽה־אָמַ֣ר יְהוָ֗ה הִנְנִ֨י פֹקֵ֜ד עַל־שְׁמַעְיָ֣ה הַנֶּחֱלָמִי֮ וְעַל־זַרְעוֹ֒ לֹא־יִהְיֶ֨ה ל֜וֹ אִ֣ישׁ׀ יוֹשֵׁ֣ב׀ בְּתוֹךְ־הָעָ֣ם הַזֶּ֗ה וְלֹֽא־יִרְאֶ֥ה בַטּ֛וֹב אֲשֶׁר־אֲנִ֥י עֹשֶֽׂה־לְעַמִּ֖י נְאֻם־יְהוָ֑ה כִּֽי־סָרָ֥ה דִבֶּ֖ר עַל־יְהוָֽה׃ ס

1 wə’ēlleh diḇərê hassēfer ’ăšer šālaḥ yirəməyâ hannāḇî’ mîrûšālāim ’el-yeṯer ziqənê hagwōlâ wə’el-hakōhănîm wə’el-hannəḇî’îm wə’el-kāl-hā‘ām ’ăšer heḡəlâ nəḇûḵaḏəne’ṣṣar mîrûšālaim bāḇelâ:

2 ’aḥărê ṣē’ṯ yəḵānəyâ-hammeleḵə wəhagəḇîrâ wəhassārîsîm śārê yəhûḏâ wîrûšālaim wəheḥārāš wəhammasəgēr mîrûšālāim:

3 bəyaḏ ’elə‘āśâ ḇen-šāfān ûḡəmarəyâ ben-ḥiləqîyâ ’ăšer šālaḥ ṣiḏəqîyâ meleḵə-yəhûḏâ ’el-nəḇûḵaḏəne’ṣṣar meleḵə bāḇel bāḇelâ lē’mōr: s

4 kōh ’āmar yəhwâ ṣəḇā’wōṯ ’ĕlōhê yiśərā’ēl ləḵāl-hagwōlâ ’ăšer-hiḡəlêṯî mîrûšālaim bāḇelâ:

5 bənû ḇātîm wəšēḇû wəniṭə‘û ḡannwōṯ wə’iḵəlû ’eṯ-pirəyān:

6 qəḥû nāšîm wəhwōlîḏû bānîm ûḇānwōṯ ûqəḥû liḇənêḵem nāšîm wə’eṯ-bənwōṯêḵem tənû la’ănāšîm wəṯēlaḏənâ bānîm ûḇānwōṯ ûrəḇû-šām wə’al-timə‘āṭû:

7 wəḏirəšû ’eṯ-šəlwōm hā‘îr ’ăšer hiḡəlêṯî ’eṯəḵem šāmmâ wəhiṯəpaləlû ḇa‘ăḏāh ’el-yəhwâ kî ḇišəlwōmāh yihəyeh lāḵem šālwōm: f

8 kî ḵōh ’āmar yəhwâ ṣəḇā’wōṯ ’ĕlōhê yiśərā’ēl ’al-yaššî’û lāḵem nəḇî’êḵem ’ăšer-bəqirəbəḵem wəqōsəmêḵem wə’al-tišəmə‘û ’el-ḥălōmōṯêḵem ’ăšer ’atem maḥələmîm:

9 kî ḇəšeqer hēm nibə’îm lāḵem bišəmî lō’ šəlaḥətîm nə’um-yəhwâ: s

10 kî-ḵōh ’āmar yəhwâ kî ləfî məlō’ṯ ləḇāḇel šiḇə‘îm šānâ ’efəqōḏ ’eṯəḵem wahăqimōṯî ‘ălêḵem ’eṯ-dəḇārî haṭṭwōḇ ləhāšîḇ ’eṯəḵem ’el-hammāqwōm hazzeh:

11 kî ’ānōḵî yāḏa‘ətî ’eṯ-hammaḥăšāḇōṯ ’ăšer ’ānōḵî ḥōšēḇ ‘ălêḵem nə’um-yəhwâ maḥəšəḇwōṯ šālwōm wəlō’ lərā‘â lāṯēṯ lāḵem ’aḥărîṯ wəṯiqəwâ:

12 ûqərā’ṯem ’ōṯî wahălaḵətem wəhiṯəpallalətem ’ēlāy wəšāma‘ətî ’ălêḵem:

13 ûḇiqqašətem ’ōṯî ûməṣā’ṯem kî ṯiḏərəšunî bəḵāl-ləḇaḇəḵem:

14 wəniməṣē’ṯî lāḵem nə’um-yəhwâ wəšaḇətî ’eṯ-šəḇîṯəḵem šəḇûṯəḵem wəqibaṣətî ’eṯəḵem mikāl-hagwōyim ûmikāl-hamməqwōmwōṯ ’ăšer hidaḥətî ’eṯəḵem šām nə’um-yəhwâ wahăšiḇōṯî ’eṯəḵem ’el-hammāqwōm ’ăšer-hiḡəlêṯî ’eṯəḵem miššām:

15 kî ’ămarətem hēqîm lānû yəhwâ nəḇi’îm bāḇelâ: s

16 kî-ḵōh| ’āmar yəhwâ ’el-hammeleḵə hayywōšēḇ ’el-kissē’ ḏāwiḏ wə’el-kāl-hā‘ām hayywōšēḇ bā‘îr hazzō’ṯ ’ăḥêḵem ’ăšer lō’-yāṣə’û ’itəḵem bagwōlâ:

17 kōh ’āmar yəhwâ ṣəḇā’wōṯ hinənî məšallēḥa bām ’eṯ-haḥereḇ ’eṯ-hārā‘āḇ wə’eṯ-hadāḇer wənāṯatî ’wōṯām katə’ēnîm haššō‘ārîm ’ăšer lō’-ṯē’āḵalənâ mērō‘a:

18 wərāḏafətî ’aḥărêhem baḥereḇ bārā‘āḇ ûḇadāḇer ûnəṯatîm lizəwā‘â ləza‘ăwâ ləḵōl| mamələḵwōṯ hā’āreṣ lə’ālâ ûləšammâ wəlišərēqâ ûləḥerəpâ bəḵāl-hagwōyim ’ăšer-hidaḥətîm šām:

19 taḥaṯ ’ăšer-lō’-šāmə‘û ’el-dəḇāray nə’um-yəhwâ ’ăšer šālaḥətî ’ălêhem ’eṯ-‘ăḇāḏay hannəḇi’îm hašəkēm wəšālōḥa wəlō’ šəma‘ətem nə’um-yəhwâ:

20 wə’atem šimə‘û ḏəḇar-yəhwâ kāl-hagwōlâ ’ăšer-šillaḥətî mîrûšālaim bāḇelâ: s

21 kōh-’āmar yəhwâ ṣəḇā’wōṯ ’ĕlōhê yiśərā’ēl ’el-’aḥə’āḇ ben-qwōlāyâ wə’el-ṣiḏəqîyâû ḇen-ma‘ăśêâ hannibə’îm lāḵem bišəmî šāqer hinənî| nōṯēn ’ōṯām bəyaḏ nəḇûḵaḏəre’ṣṣar meleḵə-bāḇel wəhikām lə‘ênêḵem:

22 wəluqqaḥ mēhem qəlālâ ləḵōl gālûṯ yəhûḏâ ’ăšer bəḇāḇel lē’mōr yəśiməḵā yəhwâ kəṣiḏəqîyâû ûḵə’eḥāḇ ’ăšer-qālām meleḵə-bāḇel bā’ēš:

23 ya‘an ’ăšer ‘āśû nəḇālâ bəyiśərā’ēl wayəna’ăfû ’eṯ-nəšê rē‘êhem wayəḏabərû ḏāḇār bišəmî šeqer ’ăšer lwō’ ṣiûîṯim wə’ānōḵî hûyōḏē‘a hayywōḏē‘a wā‘ēḏ nə’um-yəhwâ: s

24 wə’el-šəma‘əyâû hanneḥĕlāmî tō’mar lē’mōr:

25 kōh-’āmar yəhwâ ṣəḇā’wōṯ ’ĕlōhê yiśərā’ēl lē’mōr ya‘an ’ăšer ’atâ šālaḥətā ḇəšiməḵâ səfārîm ’el-kāl-hā‘ām ’ăšer bîrûšālaim wə’el-ṣəfanəyâ ḇen-ma‘ăśêâ hakōhēn wə’el kāl-hakōhănîm lē’mōr:

26 yəhwâ nəṯānəḵā ḵōhēn taḥaṯ yəhwōyāḏā‘ hakōhēn lihəywōṯ pəqiḏîm bêṯ yəhwâ ləḵāl-’îš məšugā‘ ûmiṯənabē’ wənāṯatâ ’ōṯwō ’el-hammahəpeḵeṯ wə’el-haṣṣînōq:

27 wə‘atâ lāmmâ lō’ ḡā‘arətā bəyirəməyâû hā‘ănnəṯōṯî hammiṯənabē’ lāḵem:

28 kî ‘al-kēn šālaḥ ’ēlênû bāḇel lē’mōr ’ărukâ hî’ bənû ḇātîm wəšēḇû wəniṭə‘û ḡannwōṯ wə’iḵəlû ’eṯ-pərîhen:

29 wayyiqərā’ ṣəfanəyâ hakōhēn ’eṯ-hassēfer hazzeh bə’āzənê yirəməyâû hannāḇî’: f

30 wayəhî dəḇar-yəhwâ ’el-yirəməyâû lē’mōr:

31 šəlaḥ ‘al-kāl-hagwōlâ lē’mōr kōh ’āmar yəhwâ ’el-šəma‘əyâ hanneḥĕlāmî ya‘an ’ăšer nibā’ lāḵem šəma‘əyâ wa’ănî lō’ šəlaḥətîw wayyaḇəṭaḥ ’eṯəḵem ‘al-šāqer:

32 lāḵēn kōh-’āmar yəhwâ hinənî fōqēḏ ‘al-šəma‘əyâ hanneḥĕlāmî wə‘al-zarə‘wō lō’-yihəyeh lwō ’îš| ywōšēḇ| bəṯwōḵə-hā‘ām hazzeh wəlō’-yirə’eh ḇaṭṭwōḇ ’ăšer-’ănî ‘ōśeh-lə‘ammî nə’um-yəhwâ kî-sārâ ḏiber ‘al-yəhwâ: s


Next: Jeremiah (Yermiyah) Chapter 30