Sacred Texts  Bible  Index 
Polyglot  KJV  Sep  Vul 

Jeremiah (Yermiyah) Index
  Previous  Next 

Tanach (Hebrew): Jeremiah (Yermiyah) Chapter 17

1 ‏חַטַּ֣את יְהוּדָ֗ה כְּתוּבָ֛ה בְּעֵ֥ט בַּרְזֶ֖ל בְּצִפֹּ֣רֶן שָׁמִ֑יר חֲרוּשָׁה֙ עַל־ל֣וּחַ לִבָּ֔ם וּלְקַרְנ֖וֹת מִזְבְּחוֹתֵיכֶֽם׃

2 ‏כִּזְכֹּ֤ר בְּנֵיהֶם֙ מִזְבְּחוֹתָ֔ם וַאֲשֵׁרֵיהֶ֖ם עַל־עֵ֣ץ רַֽעֲנָ֑ן עַ֖ל גְּבָע֥וֹת הַגְּבֹהֽוֹת׃

3 ‏הֲרָרִי֙ בַּשָּׂדֶ֔ה חֵילְךָ֥ כָל־אוֹצְרוֹתֶ֖יךָ לָבַ֣ז אֶתֵּ֑ן בָּמֹתֶ֕יךָ בְּחַטָּ֖את בְּכָל־גְּבוּלֶֽיךָ׃

4 ‏וְשָׁמַטְתָּ֗ה וּבְךָ֙ מִנַּחֲלָֽתְךָ֙ אֲשֶׁ֣ר נָתַ֣תִּי לָ֔ךְ וְהַעֲבַדְתִּ֙יךָ֙ אֶת־אֹ֣יְבֶ֔יךָ בָּאָ֖רֶץ אֲשֶׁ֣ר לֹֽא־יָדָ֑עְתָּ כִּֽי־אֵ֛שׁ קְדַחְתֶּ֥ם בְּאַפִּ֖י עַד־עוֹלָ֥ם תּוּקָֽד׃ ס

5 ‏כֹּ֣ה׀ אָמַ֣ר יְהוָ֗ה אָר֤וּר הַגֶּ֙בֶר֙ אֲשֶׁ֣ר יִבְטַ֣ח בָּֽאָדָ֔ם וְשָׂ֥ם בָּשָׂ֖ר זְרֹע֑וֹ וּמִן־יְהוָ֖ה יָס֥וּר לִבּֽוֹ׃

6 ‏וְהָיָה֙ כְּעַרְעָ֣ר בָּֽעֲרָבָ֔ה וְלֹ֥א יִרְאֶ֖ה כִּי־יָב֣וֹא ט֑וֹב וְשָׁכַ֤ן חֲרֵרִים֙ בַּמִּדְבָּ֔ר אֶ֥רֶץ מְלֵחָ֖ה וְלֹ֥א תֵשֵֽׁב׃ ס

7 ‏בָּר֣וּךְ הַגֶּ֔בֶר אֲשֶׁ֥ר יִבְטַ֖ח בַּֽיהוָ֑ה וְהָיָ֥ה יְהוָ֖ה מִבְטַחֽוֹ׃

8 ‏וְהָיָ֞ה כְּעֵ֣ץ׀ שָׁת֣וּל עַל־מַ֗יִם וְעַל־יוּבַל֙ יְשַׁלַּ֣ח שָֽׁרָשָׁ֔יו וְלֹ֤א ירא יִרְאֶה֙ כִּֽי־יָבֹ֣א חֹ֔ם וְהָיָ֥ה עָלֵ֖הוּ רַֽעֲנָ֑ן וּבִשְׁנַ֤ת בַּצֹּ֙רֶת֙ לֹ֣א יִדְאָ֔ג וְלֹ֥א יָמִ֖ישׁ מֵעֲשׂ֥וֹת פֶּֽרִי׃

9 ‏עָקֹ֥ב הַלֵּ֛ב מִכֹּ֖ל וְאָנֻ֣שׁ ה֑וּא מִ֖י יֵדָעֶֽנּוּ׃

10 ‏אֲנִ֧י יְהוָ֛ה חֹקֵ֥ר לֵ֖ב בֹּחֵ֣ן כְּלָי֑וֹת וְלָתֵ֤ת לְאִישׁ֙ כדרכו כִּדְרָכָ֔יו כִּפְרִ֖י מַעֲלָלָֽיו׃ ס

11 ‏קֹרֵ֤א דָגַר֙ וְלֹ֣א יָלָ֔ד עֹ֥שֶׂה עֹ֖שֶׁר וְלֹ֣א בְמִשְׁפָּ֑ט בַּחֲצִ֤י ימו יָמָיו֙ יַעַזְבֶ֔נּוּ וּבְאַחֲרִית֖וֹ יִהְיֶ֥ה נָבָֽל׃

12 ‏כִּסֵּ֣א כָב֔וֹד מָר֖וֹם מֵֽרִאשׁ֑וֹן מְק֖וֹם מִקְדָּשֵֽׁנוּ׃

13 ‏מִקְוֵ֤ה יִשְׂרָאֵל֙ יְהוָ֔ה כָּל־עֹזְבֶ֖יךָ יֵבֹ֑שׁוּ יסורי וְסוּרַי֙ בָּאָ֣רֶץ יִכָּתֵ֔בוּ כִּ֥י עָזְב֛וּ מְק֥וֹר מַֽיִם־חַיִּ֖ים אֶת־יְהוָֽה׃ ס

14 ‏רְפָאֵ֤נִי יְהוָה֙ וְאֵ֣רָפֵ֔א הוֹשִׁיעֵ֖נִי וְאִוָּשֵׁ֑עָה כִּ֥י תְהִלָּתִ֖י אָֽתָּה׃

15 ‏הִנֵּה־הֵ֕מָּה אֹמְרִ֖ים אֵלָ֑י אַיֵּ֥ה דְבַר־יְהוָ֖ה יָ֥בוֹא נָֽא׃

16 ‏וַאֲנִ֞י לֹא־אַ֣צְתִּי׀ מֵרֹעֶ֣ה אַחֲרֶ֗יךָ וְי֥וֹם אָנ֛וּשׁ לֹ֥א הִתְאַוֵּ֖יתִי אַתָּ֣ה יָדָ֑עְתָּ מוֹצָ֣א שְׂפָתַ֔י נֹ֥כַח פָּנֶ֖יךָ הָיָֽה׃

17 ‏אַל־תִּֽהְיֵה־לִ֖י לִמְחִתָּ֑ה מַֽחֲסִי־אַ֖תָּה בְּי֥וֹם רָעָֽה׃

18 ‏יֵבֹ֤שׁוּ רֹדְפַי֙ וְאַל־אֵבֹ֣שָׁה אָ֔נִי יֵחַ֣תּוּ הֵ֔מָּה וְאַל־אֵחַ֖תָּה אָ֑נִי הָבִ֤יא עֲלֵיהֶם֙ י֣וֹם רָעָ֔ה וּמִשְׁנֶ֥ה שִׁבָּר֖וֹן שָׁבְרֵֽם׃ ס

19 ‏כֹּה־אָמַ֨ר יְהוָ֜ה אֵלַ֗י הָלֹ֤ךְ וְעָֽמַדְתָּ֙ בְּשַׁ֣עַר בְּנֵֽי־עם הָעָ֔ם אֲשֶׁ֨ר יָבֹ֤אוּ בוֹ֙ מַלְכֵ֣י יְהוּדָ֔ה וַאֲשֶׁ֖ר יֵ֣צְאוּ ב֑וֹ וּבְכֹ֖ל שַׁעֲרֵ֥י יְרוּשָׁלִָֽם׃

20 ‏וְאָמַרְתָּ֣ אֲ֠לֵיהֶם שִׁמְע֨וּ דְבַר־יְהוָ֜ה מַלְכֵ֤י יְהוּדָה֙ וְכָל־יְהוּדָ֔ה וְכֹ֖ל יֹשְׁבֵ֣י יְרוּשָׁלִָ֑ם הַבָּאִ֖ים בַּשְּׁעָרִ֥ים הָאֵֽלֶּה׃ ס

21 ‏כֹּ֚ה אָמַ֣ר יְהוָ֔ה הִשָּׁמְר֖וּ בְּנַפְשֽׁוֹתֵיכֶ֑ם וְאַל־תִּשְׂא֤וּ מַשָּׂא֙ בְּי֣וֹם הַשַּׁבָּ֔ת וַהֲבֵאתֶ֖ם בְּשַׁעֲרֵ֥י יְרוּשָׁלִָֽם׃

22 ‏וְלֹא־תוֹצִ֨יאוּ מַשָּׂ֤א מִבָּֽתֵּיכֶם֙ בְּי֣וֹם הַשַּׁבָּ֔ת וְכָל־מְלָאכָ֖ה לֹ֣א תַֽעֲשׂ֑וּ וְקִדַּשְׁתֶּם֙ אֶת־י֣וֹם הַשַּׁבָּ֔ת כַּאֲשֶׁ֥ר צִוִּ֖יתִי אֶת־אֲבוֹתֵיכֶֽם׃

23 ‏וְלֹ֣א שָֽׁמְע֔וּ וְלֹ֥א הִטּ֖וּ אֶת־אָזְנָ֑ם וַיַּקְשׁוּ֙ אֶת־עָרְפָּ֔ם לְבִלְתִּ֣י שומע שְׁמ֔וֹעַ וּלְבִלְתִּ֖י קַ֥חַת מוּסָֽר׃

24 ‏וְ֠הָיָה אִם־שָׁמֹ֨עַ תִּשְׁמְע֤וּן אֵלַי֙ נְאֻם־יְהוָ֔ה לְבִלְתִּ֣י׀ הָבִ֣יא מַשָּׂ֗א בְּשַׁעֲרֵ֛י הָעִ֥יר הַזֹּ֖את בְּי֣וֹם הַשַּׁבָּ֑ת וּלְקַדֵּשׁ֙ אֶת־י֣וֹם הַשַּׁבָּ֔ת לְבִלְתִּ֥י עֲשֽׂוֹת־בה בּ֖וֹ כָּל־מְלָאכָֽה׃

25 ‏וּבָ֣אוּ בְשַׁעֲרֵ֣י הָעִ֣יר הַזֹּ֡את מְלָכִ֣ים׀ וְשָׂרִ֡ים יֹשְׁבִים֩ עַל־כִּסֵּ֨א דָוִ֜ד רֹכְבִ֣ים׀ בָּרֶ֣כֶב וּבַסּוּסִ֗ים הֵ֚מָּה וְשָׂ֣רֵיהֶ֔ם אִ֥ישׁ יְהוּדָ֖ה וְיֹשְׁבֵ֣י יְרוּשָׁלִָ֑ם וְיָשְׁבָ֥ה הָֽעִיר־הַזֹּ֖את לְעוֹלָֽם׃

26 ‏וּבָ֣אוּ מֵעָרֵֽי־יְ֠הוּדָה וּמִסְּבִיב֨וֹת יְרוּשָׁלִַ֜ם וּמֵאֶ֣רֶץ בִּנְיָמִ֗ן וּמִן־הַשְּׁפֵלָ֤ה וּמִן־הָהָר֙ וּמִן־הַנֶּ֔גֶב מְבִאִ֛ים עוֹלָ֥ה וְזֶ֖בַח וּמִנְחָ֣ה וּלְבוֹנָ֑ה וּמְבִאֵ֥י תוֹדָ֖ה בֵּ֥ית יְהוָֽה׃

27 ‏וְאִם־לֹ֨א תִשְׁמְע֜וּ אֵלַ֗י לְקַדֵּשׁ֙ אֶת־י֣וֹם הַשַּׁבָּ֔ת וּלְבִלְתִּ֣י׀ שְׂאֵ֣ת מַשָּׂ֗א וּבֹ֛א בְּשַׁעֲרֵ֥י יְרוּשָׁלִַ֖ם בְּי֣וֹם הַשַּׁבָּ֑ת וְהִצַּ֧תִּי אֵ֣שׁ בִּשְׁעָרֶ֗יהָ וְאָֽכְלָ֛ה אַרְמְנ֥וֹת יְרוּשָׁלִַ֖ם וְלֹ֥א תִכְבֶּֽה׃ פ

1 ḥaṭṭa’ṯ yəhûḏâ kəṯûḇâ bə‘ēṭ barəzel bəṣipōren šāmîr ḥărûšâ ‘al-lûḥa libām ûləqarənwōṯ mizəbəḥwōṯêḵem:

2 kizəkōr bənêhem mizəbəḥwōṯām wa’ăšērêhem ‘al-‘ēṣ ra‘ănān ‘al gəḇā‘wōṯ hagəḇōhwōṯ:

3 hărārî baśśāḏeh ḥêləḵā ḵāl-’wōṣərwōṯeyḵā lāḇaz ’etēn bāmōṯeyḵā bəḥaṭṭā’ṯ bəḵāl-gəḇûleyḵā:

4 wəšāmaṭətâ ûḇəḵā minnaḥălāṯəḵā ’ăšer nāṯatî lāḵə wəha‘ăḇaḏətîḵā ’eṯ-’ōyəḇeyḵā bā’āreṣ ’ăšer lō’-yāḏā‘ətā kî-’ēš qəḏaḥətem bə’apî ‘aḏ-‘wōlām tûqāḏ: s

5 kōh| ’āmar yəhwâ ’ārûr hageḇer ’ăšer yiḇəṭaḥ bā’āḏām wəśām bāśār zərō‘wō ûmin-yəhwâ yāsûr libwō:

6 wəhāyâ kə‘arə‘ār bā‘ărāḇâ wəlō’ yirə’eh kî-yāḇwō’ ṭwōḇ wəšāḵan ḥărērîm bammiḏəbār ’ereṣ məlēḥâ wəlō’ ṯēšēḇ: s

7 bārûḵə hageḇer ’ăšer yiḇəṭaḥ bayhwâ wəhāyâ yəhwâ miḇəṭaḥwō:

8 wəhāyâ kə‘ēṣ| šāṯûl ‘al-mayim wə‘al-yûḇal yəšallaḥ šārāšāyw wəlō’ yirā’ yirə’eh kî-yāḇō’ ḥōm wəhāyâ ‘ālēhû ra‘ănān ûḇišənaṯ baṣṣōreṯ lō’ yiḏə’āḡ wəlō’ yāmîš mē‘ăśwōṯ perî:

9 ‘āqōḇ hallēḇ mikōl wə’ānuš hû’ mî yēḏā‘ennû:

10 ’ănî yəhwâ ḥōqēr lēḇ bōḥēn kəlāywōṯ wəlāṯēṯ lə’îš kiḏərāḵāw kiḏərāḵāyw kifərî ma‘ălālāyw: s

11 qōrē’ ḏāḡar wəlō’ yālāḏ ‘ōśeh ‘ōšer wəlō’ ḇəmišəpāṭ baḥăṣî yāmāw yāmāyw ya‘azəḇennû ûḇə’aḥărîṯwō yihəyeh nāḇāl:

12 kissē’ ḵāḇwōḏ mārwōm mēri’šwōn məqwōm miqədāšēnû:

13 miqəwēh yiśərā’ēl yəhwâ kāl-‘ōzəḇeyḵā yēḇōšû yisswōray wəsûray bā’āreṣ yikāṯēḇû kî ‘āzəḇû məqwōr mayim-ḥayyîm ’eṯ-yəhwâ: s

14 rəfā’ēnî yəhwâ wə’ērāfē’ hwōšî‘ēnî wə’iûāšē‘â kî ṯəhillāṯî ’ātâ:

15 hinnēh-hēmmâ ’ōmərîm ’ēlāy ’ayyēh ḏəḇar-yəhwâ yāḇwō’ nā’:

16 wa’ănî lō’-’aṣətî| mērō‘eh ’aḥăreyḵā wəywōm ’ānûš lō’ hiṯə’aûêṯî ’atâ yāḏā‘ətā mwōṣā’ śəfāṯay nōḵaḥ pāneyḵā hāyâ:

17 ’al-tihəyēh-lî liməḥitâ maḥăsî-’atâ bəywōm rā‘â:

18 yēḇōšû rōḏəfay wə’al-’ēḇōšâ ’ānî yēḥatû hēmmâ wə’al-’ēḥatâ ’ānî hāḇî’ ‘ălêhem ywōm rā‘â ûmišəneh šibārwōn šāḇərēm: s

19 kōh-’āmar yəhwâ ’ēlay hālōḵə wə‘āmaḏətā bəša‘ar bənê-‘ām hā‘ām ’ăšer yāḇō’û ḇwō maləḵê yəhûḏâ wa’ăšer yēṣə’û ḇwō ûḇəḵōl ša‘ărê yərûšālāim:

20 wə’āmarətā ’ălêhem šimə‘û ḏəḇar-yəhwâ maləḵê yəhûḏâ wəḵāl-yəhûḏâ wəḵōl yōšəḇê yərûšālāim habā’îm baššə‘ārîm hā’ēlleh: s

21 kōh ’āmar yəhwâ hiššāmərû bənafəšwōṯêḵem wə’al-tiśə’û maśśā’ bəywōm haššabāṯ wahăḇē’ṯem bəša‘ărê yərûšālāim:

22 wəlō’-ṯwōṣî’û maśśā’ mibātêḵem bəywōm haššabāṯ wəḵāl-məlā’ḵâ lō’ ṯa‘ăśû wəqidašətem ’eṯ-ywōm haššabāṯ ka’ăšer ṣiûîṯî ’eṯ-’ăḇwōṯêḵem:

23 wəlō’ šāmə‘û wəlō’ hiṭṭû ’eṯ-’āzənām wayyaqəšû ’eṯ-‘ārəpām ləḇilətî šwōmē‘a šəmwō‘a ûləḇilətî qaḥaṯ mûsār:

24 wəhāyâ ’im-šāmō‘a tišəmə‘ûn ’ēlay nə’um-yəhwâ ləḇilətî| hāḇî’ maśśā’ bəša‘ărê hā‘îr hazzō’ṯ bəywōm haššabāṯ ûləqadēš ’eṯ-ywōm haššabāṯ ləḇilətî ‘ăśwōṯ-bōh bwō kāl-məlā’ḵâ:

25 ûḇā’û ḇəša‘ărê hā‘îr hazzō’ṯ məlāḵîm| wəśārîm yōšəḇîm ‘al-kissē’ ḏāwiḏ rōḵəḇîm| bāreḵeḇ ûḇassûsîm hēmmâ wəśārêhem ’îš yəhûḏâ wəyōšəḇê yərûšālāim wəyāšəḇâ hā‘îr-hazzō’ṯ lə‘wōlām:

26 ûḇā’û mē‘ārê-yəhûḏâ ûmissəḇîḇwōṯ yərûšālaim ûmē’ereṣ binəyāmin ûmin-haššəfēlâ ûmin-hâār ûmin-hanneḡeḇ məḇi’îm ‘wōlâ wəzeḇaḥ ûminəḥâ ûləḇwōnâ ûməḇi’ê ṯwōḏâ bêṯ yəhwâ:

27 wə’im-lō’ ṯišəmə‘û ’ēlay ləqadēš ’eṯ-ywōm haššabāṯ ûləḇilətî| śə’ēṯ maśśā’ ûḇō’ bəša‘ărê yərûšālaim bəywōm haššabāṯ wəhiṣṣatî ’ēš bišə‘āreyhā wə’āḵəlâ ’arəmənwōṯ yərûšālaim wəlō’ ṯiḵəbeh: f


Next: Jeremiah (Yermiyah) Chapter 18