Sacred Texts  Bible  Index 
Polyglot  KJV  Sep  Vul 

Jeremiah (Yermiyah) Index
  Previous  Next 

Tanach (Hebrew): Jeremiah (Yermiyah) Chapter 10

1 ‏שִׁמְע֣וּ אֶת־הַדָּבָ֗ר אֲשֶׁ֨ר דִּבֶּ֧ר יְהוָ֛ה עֲלֵיכֶ֖ם בֵּ֥ית יִשְׂרָאֵֽל׃

2 ‏כֹּ֣ה׀ אָמַ֣ר יְהוָ֗ה אֶל־דֶּ֤רֶךְ הַגּוֹיִם֙ אַל־תִּלְמָ֔דוּ וּמֵאֹת֥וֹת הַשָּׁמַ֖יִם אַל־תֵּחָ֑תּוּ כִּֽי־יֵחַ֥תּוּ הַגּוֹיִ֖ם מֵהֵֽמָּה׃

3 ‏כִּֽי־חֻקּ֥וֹת הָֽעַמִּ֖ים הֶ֣בֶל ה֑וּא כִּֽי־עֵץ֙ מִיַּ֣עַר כְּרָת֔וֹ מַעֲשֵׂ֥ה יְדֵ֥י־חָרָ֖שׁ בַּֽמַּעֲצָֽד׃

4 ‏בְּכֶ֥סֶף וּבְזָהָ֖ב יְיַפֵּ֑הוּ בְּמַסְמְר֧וֹת וּבְמַקָּב֛וֹת יְחַזְּק֖וּם וְל֥וֹא יָפִֽיק׃

5 ‏כְּתֹ֨מֶר מִקְשָׁ֥ה הֵ֙מָּה֙ וְלֹ֣א יְדַבֵּ֔רוּ נָשׂ֥וֹא יִנָּשׂ֖וּא כִּ֣י לֹ֣א יִצְעָ֑דוּ אַל־תִּֽירְא֤וּ מֵהֶם֙ כִּי־לֹ֣א יָרֵ֔עוּ וְגַם־הֵיטֵ֖יב אֵ֥ין אוֹתָֽם׃ ס

6 ‏מֵאֵ֥ין כָּמ֖וֹךָ יְהוָ֑ה גָּד֥וֹל אַתָּ֛ה וְגָד֥וֹל שִׁמְךָ֖ בִּגְבוּרָֽה׃

7 ‏מִ֣י לֹ֤א יִֽרָאֲךָ֙ מֶ֣לֶךְ הַגּוֹיִ֔ם כִּ֥י לְךָ֖ יָאָ֑תָה כִּ֣י בְכָל־חַכְמֵ֧י הַגּוֹיִ֛ם וּבְכָל־מַלְכוּתָ֖ם מֵאֵ֥ין כָּמֽוֹךָ׃

8 ‏וּבְאַחַ֖ת יִבְעֲר֣וּ וְיִכְסָ֑לוּ מוּסַ֥ר הֲבָלִ֖ים עֵ֥ץ הֽוּא׃

9 ‏כֶּ֣סֶף מְרֻקָּ֞ע מִתַּרְשִׁ֣ישׁ יוּבָ֗א וְזָהָב֙ מֵֽאוּפָ֔ז מַעֲשֵׂ֥ה חָרָ֖שׁ וִידֵ֣י צוֹרֵ֑ף תְּכֵ֤לֶת וְאַרְגָּמָן֙ לְבוּשָׁ֔ם מַעֲשֵׂ֥ה חֲכָמִ֖ים כֻּלָּֽם׃

10 ‏וַֽיהוָ֤ה אֱלֹהִים֙ אֱמֶ֔ת הֽוּא־אֱלֹהִ֥ים חַיִּ֖ים וּמֶ֣לֶךְ עוֹלָ֑ם מִקִּצְפּוֹ֙ תִּרְעַ֣שׁ הָאָ֔רֶץ וְלֹֽא־יָכִ֥לוּ גוֹיִ֖ם זַעְמֽוֹ׃ ס

11 ‏כִּדְנָה֙ תֵּאמְר֣וּן לְה֔וֹם אֱלָ֣הַיָּ֔א דִּֽי־שְׁמַיָּ֥א וְאַרְקָ֖א לָ֣א עֲבַ֑דוּ יֵאבַ֧דוּ מֵֽאַרְעָ֛א וּמִן־תְּח֥וֹת שְׁמַיָּ֖א אֵֽלֶּה׃ ס

12 ‏עֹשֵׂ֥ה אֶ֙רֶץ֙ בְּכֹח֔וֹ מֵכִ֥ין תֵּבֵ֖ל בְּחָכְמָת֑וֹ וּבִתְבוּנָת֖וֹ נָטָ֥ה שָׁמָֽיִם׃

13 ‏לְק֨וֹל תִּתּ֜וֹ הֲמ֥וֹן מַ֙יִם֙ בַּשָּׁמַ֔יִם וַיַּעֲלֶ֥ה נְשִׂאִ֖ים מִקְצֵ֣ה ארץ הָאָ֑רֶץ בְּרָקִ֤ים לַמָּטָר֙ עָשָׂ֔ה וַיּ֥וֹצֵא ר֖וּחַ מֵאֹצְרֹתָֽיו׃

14 ‏נִבְעַ֤ר כָּל־אָדָם֙ מִדַּ֔עַת הֹבִ֥ישׁ כָּל־צוֹרֵ֖ף מִפָּ֑סֶל כִּ֛י שֶׁ֥קֶר נִסְכּ֖וֹ וְלֹא־ר֥וּחַ בָּֽם׃

15 ‏הֶ֣בֶל הֵ֔מָּה מַעֲשֵׂ֖ה תַּעְתֻּעִ֑ים בְּעֵ֥ת פְּקֻדָּתָ֖ם יֹאבֵֽדוּ׃

16 ‏לֹֽא־כְאֵ֜לֶּה חֵ֣לֶק יַעֲקֹ֗ב כִּֽי־יוֹצֵ֤ר הַכֹּל֙ ה֔וּא וְיִ֨שְׂרָאֵ֔ל שֵׁ֖בֶט נַֽחֲלָת֑וֹ יְהוָ֥ה צְבָא֖וֹת שְׁמֽוֹ׃ ס

17 ‏אִסְפִּ֥י מֵאֶ֖רֶץ כִּנְעָתֵ֑ךְ ישבתי יֹשֶׁ֖בֶת בַּמָּצֽוֹר׃ ס

18 ‏כִּֽי־כֹה֙ אָמַ֣ר יְהוָ֔ה הִנְנִ֥י קוֹלֵ֛עַ אֶת־יוֹשְׁבֵ֥י הָאָ֖רֶץ בַּפַּ֣עַם הַזֹּ֑את וַהֲצֵר֥וֹתִי לָהֶ֖ם לְמַ֥עַן יִמְצָֽאוּ׃ ס

19 ‏א֥וֹי לִי֙ עַל־שִׁבְרִ֔י נַחְלָ֖ה מַכָּתִ֑י וַאֲנִ֣י אָמַ֔רְתִּי אַ֛ךְ זֶ֥ה חֳלִ֖י וְאֶשָּׂאֶֽנּוּ׃

20 ‏אָהֳלִ֣י שֻׁדָּ֔ד וְכָל־מֵיתָרַ֖י נִתָּ֑קוּ בָּנַ֤י יְצָאֻ֙נִי֙ וְאֵינָ֔ם אֵין־נֹטֶ֥ה עוֹד֙ אָהֳלִ֔י וּמֵקִ֖ים יְרִיעוֹתָֽי׃

21 ‏כִּ֤י נִבְעֲרוּ֙ הָֽרֹעִ֔ים וְאֶת־יְהוָ֖ה לֹ֣א דָרָ֑שׁוּ עַל־כֵּן֙ לֹ֣א הִשְׂכִּ֔ילוּ וְכָל־מַרְעִיתָ֖ם נָפֽוֹצָה׃ ס

22 ‏ק֤וֹל שְׁמוּעָה֙ הִנֵּ֣ה בָאָ֔ה וְרַ֥עַשׁ גָּד֖וֹל מֵאֶ֣רֶץ צָפ֑וֹן לָשׂ֞וּם אֶת־עָרֵ֧י יְהוּדָ֛ה שְׁמָמָ֖ה מְע֥וֹן תַּנִּֽים׃ ס

23 ‏יָדַ֣עְתִּי יְהוָ֔ה כִּ֛י לֹ֥א לָאָדָ֖ם דַּרְכּ֑וֹ לֹֽא־לְאִ֣ישׁ הֹלֵ֔ךְ וְהָכִ֖ין אֶֽת־צַעֲדֽוֹ׃

24 ‏יַסְּרֵ֥נִי יְהוָ֖ה אַךְ־בְּמִשְׁפָּ֑ט אַל־בְּאַפְּךָ֖ פֶּן־תַּמְעִטֵֽנִי׃

25 ‏שְׁפֹ֣ךְ חֲמָתְךָ֗ עַל־הַגּוֹיִם֙ אֲשֶׁ֣ר לֹֽא־יְדָע֔וּךָ וְעַל֙ מִשְׁפָּח֔וֹת אֲשֶׁ֥ר בְּשִׁמְךָ֖ לֹ֣א קָרָ֑אוּ כִּֽי־אָכְל֣וּ אֶֽת־יַעֲקֹ֗ב וַאֲכָלֻ֙הוּ֙ וַיְכַלֻּ֔הוּ וְאֶת־נָוֵ֖הוּ הֵשַֽׁמּוּ׃ פ

1 šimə‘û ’eṯ-hadāḇār ’ăšer diber yəhwâ ‘ălêḵem bêṯ yiśərā’ēl:

2 kōh| ’āmar yəhwâ ’el-dereḵə hagwōyim ’al-tiləmāḏû ûmē’ōṯwōṯ haššāmayim ’al-tēḥātû kî-yēḥatû hagwōyim mēhēmmâ:

3 kî-ḥuqqwōṯ hā‘ammîm heḇel hû’ kî-‘ēṣ mîya‘ar kərāṯwō ma‘ăśēh yəḏê-ḥārāš bamma‘ăṣāḏ:

4 bəḵesef ûḇəzâāḇ yəyapēhû bəmasəmərwōṯ ûḇəmaqqāḇwōṯ yəḥazzəqûm wəlwō’ yāfîq:

5 kəṯōmer miqəšâ hēmmâ wəlō’ yəḏabērû nāśwō’ yinnāśû’ kî lō’ yiṣə‘āḏû ’al-tîrə’û mēhem kî-lō’ yārē‘û wəḡam-hêṭêḇ ’ên ’wōṯām: s

6 mē’ên kāmwōḵā yəhwâ gāḏwōl ’atâ wəḡāḏwōl šiməḵā biḡəḇûrâ:

7 mî lō’ yirā’ăḵā meleḵə hagwōyim kî ləḵā yā’āṯâ kî ḇəḵāl-ḥaḵəmê hagwōyim ûḇəḵāl-maləḵûṯām mē’ên kāmwōḵā:

8 ûḇə’aḥaṯ yiḇə‘ărû wəyiḵəsālû mûsar hăḇālîm ‘ēṣ hû’:

9 kesef məruqqā‘ mitarəšîš yûḇā’ wəzâāḇ mē’ûfāz ma‘ăśēh ḥārāš wîḏê ṣwōrēf təḵēleṯ wə’arəgāmān ləḇûšām ma‘ăśēh ḥăḵāmîm kullām:

10 wayhwâ ’ĕlōhîm ’ĕmeṯ hû’-’ĕlōhîm ḥayyîm ûmeleḵə ‘wōlām miqqiṣəpwō tirə‘aš hā’āreṣ wəlō’-yāḵilû ḡwōyim za‘əmwō: s

11 kiḏənâ tē’mərûn ləhwōm ’ĕlâayyā’ dî-šəmayyā’ wə’arəqā’ lā’ ‘ăḇaḏû yē’ḇaḏû mē’arə‘ā’ ûmin-təḥwōṯ šəmayyā’ ’ēlleh: s

12 ‘ōśēh ’ereṣ bəḵōḥwō mēḵîn tēḇēl bəḥāḵəmāṯwō ûḇiṯəḇûnāṯwō nāṭâ šāmāyim:

13 ləqwōl titwō hămwōn mayim baššāmayim wayya‘ăleh nəśi’îm miqəṣēh ’ereṣ hā’āreṣ bərāqîm lammāṭār ‘āśâ wayywōṣē’ rûḥa mē’ōṣərōṯāyw:

14 niḇə‘ar kāl-’āḏām mida‘aṯ hōḇîš kāl-ṣwōrēf mipāsel kî šeqer nisəkwō wəlō’-rûḥa bām:

15 heḇel hēmmâ ma‘ăśēh ta‘ətu‘îm bə‘ēṯ pəqudāṯām yō’ḇēḏû:

16 lō’-ḵə’ēlleh ḥēleq ya‘ăqōḇ kî-ywōṣēr hakōl hû’ wəyiśərā’ēl šēḇeṭ naḥălāṯwō yəhwâ ṣəḇā’wōṯ šəmwō: s

17 ’isəpî mē’ereṣ kinə‘āṯēḵə yōšaḇətî yōšeḇeṯ bammāṣwōr: s

18 kî-ḵōh ’āmar yəhwâ hinənî qwōlē‘a ’eṯ-ywōšəḇê hā’āreṣ bapa‘am hazzō’ṯ wahăṣērwōṯî lâem ləma‘an yiməṣā’û: s

19 ’wōy lî ‘al-šiḇərî naḥəlâ makāṯî wa’ănî ’āmarətî ’aḵə zeh ḥŏlî wə’eśśā’ennû:

20 ’âŏlî šudāḏ wəḵāl-mêṯāray nitāqû bānay yəṣā’unî wə’ênām ’ên-nōṭeh ‘wōḏ ’âŏlî ûmēqîm yərî‘wōṯāy:

21 kî niḇə‘ărû hārō‘îm wə’eṯ-yəhwâ lō’ ḏārāšû ‘al-kēn lō’ hiśəkîlû wəḵāl-marə‘îṯām nāfwōṣâ: s

22 qwōl šəmû‘â hinnēh ḇā’â wəra‘aš gāḏwōl mē’ereṣ ṣāfwōn lāśûm ’eṯ-‘ārê yəhûḏâ šəmāmâ mə‘wōn tannîm: s

23 yāḏa‘ətî yəhwâ kî lō’ lā’āḏām darəkwō lō’-lə’îš hōlēḵə wəhāḵîn ’eṯ-ṣa‘ăḏwō:

24 yassərēnî yəhwâ ’aḵə-bəmišəpāṭ ’al-bə’apəḵā pen-tamə‘iṭēnî:

25 šəfōḵə ḥămāṯəḵā ‘al-hagwōyim ’ăšer lō’-yəḏā‘ûḵā wə‘al mišəpāḥwōṯ ’ăšer bəšiməḵā lō’ qārā’û kî-’āḵəlû ’eṯ-ya‘ăqōḇ wa’ăḵāluhû wayəḵalluhû wə’eṯ-nāwēhû hēšammû: f


Next: Jeremiah (Yermiyah) Chapter 11