Sacred Texts  Bible  Index 
Polyglot  KJV  Sep:JdB  Sep:JdA  Vul 

Judges (Shoftim) Index
  Previous  Next 

Tanach (Hebrew): Judges (Shoftim) Chapter 21

1 ‏וְאִ֣ישׁ יִשְׂרָאֵ֔ל נִשְׁבַּ֥ע בַּמִּצְפָּ֖ה לֵאמֹ֑ר אִ֣ישׁ מִמֶּ֔נּוּ לֹא־יִתֵּ֥ן בִּתּ֛וֹ לְבִנְיָמִ֖ן לְאִשָּֽׁה׃

2 ‏וַיָּבֹ֤א הָעָם֙ בֵּֽית־אֵ֔ל וַיֵּ֤שְׁבוּ שָׁם֙ עַד־הָעֶ֔רֶב לִפְנֵ֖י הָאֱלֹהִ֑ים וַיִּשְׂא֣וּ קוֹלָ֔ם וַיִּבְכּ֖וּ בְּכִ֥י גָדֽוֹל׃

3 ‏וַיֹּ֣אמְר֔וּ לָמָ֗ה יְהוָה֙ אֱלֹהֵ֣י יִשְׂרָאֵ֔ל הָ֥יְתָה זֹּ֖את בְּיִשְׂרָאֵ֑ל לְהִפָּקֵ֥ד הַיּ֛וֹם מִיִּשְׂרָאֵ֖ל שֵׁ֥בֶט אֶחָֽד׃

4 ‏וַֽיְהִי֙ מִֽמָּחֳרָ֔ת וַיַּשְׁכִּ֣ימוּ הָעָ֔ם וַיִּבְנוּ־שָׁ֖ם מִזְבֵּ֑חַ וַיַּעֲל֥וּ עֹל֖וֹת וּשְׁלָמִֽים׃ פ

5 ‏וַיֹּֽאמְרוּ֙ בְּנֵ֣י יִשְׂרָאֵ֔ל מִ֠י אֲשֶׁ֨ר לֹא־עָלָ֧ה בַקָּהָ֛ל מִכָּל־שִׁבְטֵ֥י יִשְׂרָאֵ֖ל אֶל־יְהוָ֑ה כִּי֩ הַשְּׁבוּעָ֨ה הַגְּדוֹלָ֜ה הָיְתָ֗ה לַ֠אֲשֶׁר לֹא־עָלָ֨ה אֶל־יְהוָ֧ה הַמִּצְפָּ֛ה לֵאמֹ֖ר מ֥וֹת יוּמָֽת׃

6 ‏וַיִּנָּֽחֲמוּ֙ בְּנֵ֣י יִשְׂרָאֵ֔ל אֶל־בִּנְיָמִ֖ן אָחִ֑יו וַיֹּ֣אמְר֔וּ נִגְדַּ֥ע הַיּ֛וֹם שֵׁ֥בֶט אֶחָ֖ד מִיִּשְׂרָאֵֽל׃

7 ‏מַה־נַּעֲשֶׂ֥ה לָהֶ֛ם לַנּוֹתָרִ֖ים לְנָשִׁ֑ים וַאֲנַ֙חְנוּ֙ נִשְׁבַּ֣עְנוּ בַֽיהוָ֔ה לְבִלְתִּ֛י תֵּת־לָהֶ֥ם מִבְּנוֹתֵ֖ינוּ לְנָשִֽׁים׃

8 ‏וַיֹּ֣אמְר֔וּ מִ֗י אֶחָד֙ מִשִּׁבְטֵ֣י יִשְׂרָאֵ֔ל אֲשֶׁ֛ר לֹֽא־עָלָ֥ה אֶל־יְהוָ֖ה הַמִּצְפָּ֑ה וְ֠הִנֵּה לֹ֣א בָא־אִ֧ישׁ אֶל־הַֽמַּחֲנֶ֛ה מִיָּבֵ֥ישׁ גִּלְעָ֖ד אֶל־הַקָּהָֽל׃

9 ‏וַיִּתְפָּקֵ֖ד הָעָ֑ם וְהִנֵּ֤ה אֵֽין־שָׁם֙ אִ֔ישׁ מִיּוֹשְׁבֵ֖י יָבֵ֥שׁ גִּלְעָֽד׃

10 ‏וַיִּשְׁלְחוּ־שָׁ֣ם הָעֵדָ֗ה שְׁנֵים־עָשָׂ֥ר אֶ֛לֶף אִ֖ישׁ מִבְּנֵ֣י הֶחָ֑יִל וַיְצַוּ֨וּ אוֹתָ֜ם לֵאמֹ֗ר לְ֠כוּ וְהִכִּיתֶ֞ם אֶת־יוֹשְׁבֵ֨י יָבֵ֤שׁ גִּלְעָד֙ לְפִי־חֶ֔רֶב וְהַנָּשִׁ֖ים וְהַטָּֽף׃

11 ‏וְזֶ֥ה הַדָּבָ֖ר אֲשֶׁ֣ר תַּעֲשׂ֑וּ כָּל־זָכָ֗ר וְכָל־אִשָּׁ֛ה יֹדַ֥עַת מִשְׁכַּב־זָכָ֖ר תַּחֲרִֽימוּ׃

12 ‏וַֽיִּמְצְא֞וּ מִיּוֹשְׁבֵ֣י׀ יָבֵ֣ישׁ גִּלְעָ֗ד אַרְבַּ֤ע מֵאוֹת֙ נַעֲרָ֣ה בְתוּלָ֔ה אֲשֶׁ֧ר לֹֽא־יָדְעָ֛ה אִ֖ישׁ לְמִשְׁכַּ֣ב זָכָ֑ר וַיָּבִ֨יאוּ אוֹתָ֤ם אֶל־הַֽמַּחֲנֶה֙ שִׁלֹ֔ה אֲשֶׁ֖ר בְּאֶ֥רֶץ כְּנָֽעַן׃ ס

13 ‏וַֽיִּשְׁלְחוּ֙ כָּל־הָ֣עֵדָ֔ה וַֽיְדַבְּרוּ֙ אֶל־בְּנֵ֣י בִנְיָמִ֔ן אֲשֶׁ֖ר בְּסֶ֣לַע רִמּ֑וֹן וַיִּקְרְא֥וּ לָהֶ֖ם שָׁלֽוֹם׃

14 ‏וַיָּ֤שָׁב בִּנְיָמִן֙ בָּעֵ֣ת הַהִ֔יא וַיִּתְּנ֤וּ לָהֶם֙ הַנָּשִׁ֔ים אֲשֶׁ֣ר חִיּ֔וּ מִנְּשֵׁ֖י יָבֵ֣שׁ גִּלְעָ֑ד וְלֹֽא־מָצְא֥וּ לָהֶ֖ם כֵּֽן׃

15 ‏וְהָעָ֥ם נִחָ֖ם לְבִנְיָמִ֑ן כִּֽי־עָשָׂ֧ה יְהוָ֛ה פֶּ֖רֶץ בְּשִׁבְטֵ֥י יִשְׂרָאֵֽל׃

16 ‏וַיֹּֽאמְר֨וּ זִקְנֵ֣י הָעֵדָ֔ה מַה־נַּעֲשֶׂ֥ה לַנּוֹתָרִ֖ים לְנָשִׁ֑ים כִּֽי־נִשְׁמְדָ֥ה מִבִּנְיָמִ֖ן אִשָּֽׁה׃

17 ‏וַיֹּ֣אמְר֔וּ יְרֻשַּׁ֥ת פְּלֵיטָ֖ה לְבִנְיָמִ֑ן וְלֹֽא־יִמָּחֶ֥ה שֵׁ֖בֶט מִיִּשְׂרָאֵֽל׃

18 ‏וַאֲנַ֗חְנוּ לֹ֥א נוּכַ֛ל לָתֵת־לָהֶ֥ם נָשִׁ֖ים מִבְּנוֹתֵ֑ינוּ כִּֽי־נִשְׁבְּע֤וּ בְנֵֽי־יִשְׂרָאֵל֙ לֵאמֹ֔ר אָר֕וּר נֹתֵ֥ן אִשָּׁ֖ה לְבִנְיָמִֽן׃ ס

19 ‏וַיֹּאמְר֡וּ הִנֵּה֩ חַג־יְהוָ֨ה בְּשִׁל֜וֹ מִיָּמִ֣ים׀ יָמִ֗ימָה אֲשֶׁ֞ר מִצְּפ֤וֹנָה לְבֵֽית־אֵל֙ מִזְרְחָ֣ה הַשֶּׁ֔מֶשׁ לִמְסִלָּ֔ה הָעֹלָ֥ה מִבֵּֽית־אֵ֖ל שְׁכֶ֑מָה וּמִנֶּ֖גֶב לִלְבוֹנָֽה׃

20 ‏ויצו וַיְצַוּ֕וּ אֶת־בְּנֵ֥י בִנְיָמִ֖ן לֵאמֹ֑ר לְכ֖וּ וַאֲרַבְתֶּ֥ם בַּכְּרָמִֽים׃

21 ‏וּרְאִיתֶ֗ם וְ֠הִנֵּה אִם־יֵ֨צְא֥וּ בְנוֹת־שִׁילוֹ֮ לָח֣וּל בַּמְּחֹלוֹת֒ וִֽיצָאתֶם֙ מִן־הַכְּרָמִ֔ים וַחֲטַפְתֶּ֥ם לָכֶ֛ם אִ֥ישׁ אִשְׁתּ֖וֹ מִבְּנ֣וֹת שִׁיל֑וֹ וַהֲלַכְתֶּ֖ם אֶ֥רֶץ בִּנְיָמִֽן׃

22 ‏וְהָיָ֡ה כִּֽי־יָבֹ֣אוּ אֲבוֹתָם֩ א֨וֹ אֲחֵיהֶ֜ם לרוב לָרִ֣יב׀ אֵלֵ֗ינוּ וְאָמַ֤רְנוּ אֲלֵיהֶם֙ חָנּ֣וּנוּ אוֹתָ֔ם כִּ֣י לֹ֥א לָקַ֛חְנוּ אִ֥ישׁ אִשְׁתּ֖וֹ בַּמִּלְחָמָ֑ה כִּ֣י לֹ֥א אַתֶּ֛ם נְתַתֶּ֥ם לָהֶ֖ם כָּעֵ֥ת תֶּאְשָֽׁמוּ׃ ס

23 ‏וַיַּֽעֲשׂוּ־כֵן֙ בְּנֵ֣י בִנְיָמִ֔ן וַיִּשְׂא֤וּ נָשִׁים֙ לְמִסְפָּרָ֔ם מִן־הַמְּחֹלְל֖וֹת אֲשֶׁ֣ר גָּזָ֑לוּ וַיֵּלְכ֗וּ וַיָּשׁ֙וּבוּ֙ אֶל־נַ֣חֲלָתָ֔ם וַיִּבְנוּ֙ אֶת־הֶ֣עָרִ֔ים וַיֵּשְׁב֖וּ בָּהֶֽם׃

24 ‏וַיִּתְהַלְּכ֨וּ מִשָּׁ֤ם בְּנֵֽי־יִשְׂרָאֵל֙ בָּעֵ֣ת הַהִ֔יא אִ֥ישׁ לְשִׁבְט֖וֹ וּלְמִשְׁפַּחְתּ֑וֹ וַיֵּצְא֣וּ מִשָּׁ֔ם אִ֖ישׁ לְנַחֲלָתֽוֹ׃

25 ‏בַּיָּמִ֣ים הָהֵ֔ם אֵ֥ין מֶ֖לֶךְ בְּיִשְׂרָאֵ֑ל אִ֛ישׁ הַיָּשָׁ֥ר בְּעֵינָ֖יו יַעֲשֶֽׂה׃

1 wə’îš yiśərā’ēl nišəba‘ bammiṣəpâ lē’mōr ’îš mimmennû lō’-yitēn bitwō ləḇinəyāmin lə’iššâ:

2 wayyāḇō’ hā‘ām bêṯ-’ēl wayyēšəḇû šām ‘aḏ-hā‘ereḇ lifənê hā’ĕlōhîm wayyiśə’û qwōlām wayyiḇəkû bəḵî ḡāḏwōl:

3 wayyō’mərû lāmâ yəhwâ ’ĕlōhê yiśərā’ēl hāyəṯâ zzō’ṯ bəyiśərā’ēl ləhipāqēḏ hayywōm mîyiśərā’ēl šēḇeṭ ’eḥāḏ:

4 wayəhî mimmāḥŏrāṯ wayyašəkîmû hā‘ām wayyiḇənû-šām mizəbēḥa wayya‘ălû ‘ōlwōṯ ûšəlāmîm: f

5 wayyō’mərû bənê yiśərā’ēl mî ’ăšer lō’-‘ālâ ḇaqqâāl mikāl-šiḇəṭê yiśərā’ēl ’el-yəhwâ kî haššəḇû‘â hagəḏwōlâ hāyəṯâ la’ăšer lō’-‘ālâ ’el-yəhwâ hammiṣəpâ lē’mōr mwōṯ yûmāṯ:

6 wayyinnāḥămû bənê yiśərā’ēl ’el-binəyāmin ’āḥîw wayyō’mərû niḡəda‘ hayywōm šēḇeṭ ’eḥāḏ mîyiśərā’ēl:

7 mah-nna‘ăśeh lâem lannwōṯārîm lənāšîm wa’ănaḥənû nišəba‘ənû ḇayhwâ ləḇilətî tēṯ-lâem mibənwōṯênû lənāšîm:

8 wayyō’mərû mî ’eḥāḏ miššiḇəṭê yiśərā’ēl ’ăšer lō’-‘ālâ ’el-yəhwâ hammiṣəpâ wəhinnēh lō’ ḇā’-’îš ’el-hammaḥăneh mîyāḇêš gilə‘āḏ ’el-haqqâāl:

9 wayyiṯəpāqēḏ hā‘ām wəhinnēh ’ên-šām ’îš mîywōšəḇê yāḇēš gilə‘āḏ:

10 wayyišələḥû-šām hā‘ēḏâ šənêm-‘āśār ’elef ’îš mibənê heḥāyil wayəṣaûû ’wōṯām lē’mōr ləḵû wəhikîṯem ’eṯ-ywōšəḇê yāḇēš gilə‘āḏ ləfî-ḥereḇ wəhannāšîm wəhaṭṭāf:

11 wəzeh hadāḇār ’ăšer ta‘ăśû kāl-zāḵār wəḵāl-’iššâ yōḏa‘aṯ mišəkaḇ-zāḵār taḥărîmû:

12 wayyiməṣə’û mîywōšəḇê| yāḇêš gilə‘āḏ ’arəba‘ mē’wōṯ na‘ărâ ḇəṯûlâ ’ăšer lō’-yāḏə‘â ’îš ləmišəkaḇ zāḵār wayyāḇî’û ’wōṯām ’el-hammaḥăneh šilōh ’ăšer bə’ereṣ kənā‘an: s

13 wayyišələḥû kāl-hā‘ēḏâ wayəḏabərû ’el-bənê ḇinəyāmin ’ăšer bəsela‘ rimmwōn wayyiqərə’û lâem šālwōm:

14 wayyāšāḇ binəyāmin bā‘ēṯ hahî’ wayyitənû lâem hannāšîm ’ăšer ḥîyû minnəšê yāḇēš gilə‘āḏ wəlō’-māṣə’û lâem kēn:

15 wəhā‘ām niḥām ləḇinəyāmin kî-‘āśâ yəhwâ pereṣ bəšiḇəṭê yiśərā’ēl:

16 wayyō’mərû ziqənê hā‘ēḏâ mah-nna‘ăśeh lannwōṯārîm lənāšîm kî-nišəməḏâ mibinəyāmin ’iššâ:

17 wayyō’mərû yəruššaṯ pəlêṭâ ləḇinəyāmin wəlō’-yimmāḥeh šēḇeṭ mîyiśərā’ēl:

18 wa’ănaḥənû lō’ nûḵal lāṯēṯ-lâem nāšîm mibənwōṯênû kî-nišəbə‘û ḇənê-yiśərā’ēl lē’mōr ’ārûr nōṯēn ’iššâ ləḇinəyāmin: s

19 wayyō’mərû hinnēh ḥaḡ-yəhwâ bəšilwō mîyāmîm| yāmîmâ ’ăšer miṣṣəfwōnâ ləḇêṯ-’ēl mizərəḥâ haššemeš liməsillâ hā‘ōlâ mibêṯ-’ēl šəḵemâ ûminneḡeḇ liləḇwōnâ:

20 wayəṣaw wayəṣaûû ’eṯ-bənê ḇinəyāmin lē’mōr ləḵû wa’ăraḇətem bakərāmîm:

21 ûrə’îṯem wəhinnēh ’im-yēṣə’û ḇənwōṯ-šîlwō lāḥûl bamməḥōlwōṯ wîṣā’ṯem min-hakərāmîm waḥăṭafətem lāḵem ’îš ’išətwō mibənwōṯ šîlwō wahălaḵətem ’ereṣ binəyāmin:

22 wəhāyâ kî-yāḇō’û ’ăḇwōṯām ’wō ’ăḥêhem lārwōḇ lārîḇ| ’ēlênû wə’āmarənû ’ălêhem ḥānnûnû ’wōṯām kî lō’ lāqaḥənû ’îš ’išətwō bammiləḥāmâ kî lō’ ’atem nəṯatem lâem kā‘ēṯ te’əšāmû: s

23 wayya‘ăśû-ḵēn bənê ḇinəyāmin wayyiśə’û nāšîm ləmisəpārām min-hamməḥōləlwōṯ ’ăšer gāzālû wayyēləḵû wayyāšûḇû ’el-naḥălāṯām wayyiḇənû ’eṯ-he‘ārîm wayyēšəḇû bâem:

24 wayyiṯəhalləḵû miššām bənê-yiśərā’ēl bā‘ēṯ hahî’ ’îš ləšiḇəṭwō ûləmišəpaḥətwō wayyēṣə’û miššām ’îš lənaḥălāṯwō:

25 bayyāmîm hâēm ’ên meleḵə bəyiśərā’ēl ’îš hayyāšār bə‘ênāyw ya‘ăśeh:


Next: 1 Samuel (1 Shmuel) Chapter 1