Sacred Texts  Bible  Index 
Polyglot  KJV  Sep:JdB  Sep:JdA  Vul 

Judges (Shoftim) Index
  Previous  Next 

Tanach (Hebrew): Judges (Shoftim) Chapter 14

1 ‏וַיֵּ֥רֶד שִׁמְשׁ֖וֹן תִּמְנָ֑תָה וַיַּ֥רְא אִשָּׁ֛ה בְּתִמְנָ֖תָה מִבְּנ֥וֹת פְּלִשְׁתִּֽים׃

2 ‏וַיַּ֗עַל וַיַּגֵּד֙ לְאָבִ֣יו וּלְאִמּ֔וֹ וַיֹּ֗אמֶר אִשָּׁ֛ה רָאִ֥יתִי בְתִמְנָ֖תָה מִבְּנ֣וֹת פְּלִשְׁתִּ֑ים וְעַתָּ֕ה קְחוּ־אוֹתָ֥הּ לִּ֖י לְאִשָּֽׁה׃

3 ‏וַיֹּ֨אמֶר ל֜וֹ אָבִ֣יו וְאִמּ֗וֹ הַאֵין֩ בִּבְנ֨וֹת אַחֶ֤יךָ וּבְכָל־עַמִּי֙ אִשָּׁ֔ה כִּֽי־אַתָּ֤ה הוֹלֵךְ֙ לָקַ֣חַת אִשָּׁ֔ה מִפְּלִשְׁתִּ֖ים הָעֲרֵלִ֑ים וַיֹּ֨אמֶר שִׁמְשׁ֤וֹן אֶל־אָבִיו֙ אוֹתָ֣הּ קַֽח־לִ֔י כִּֽי־הִ֖יא יָשְׁרָ֥ה בְעֵינָֽי׃

4 ‏וְאָבִ֨יו וְאִמּ֜וֹ לֹ֣א יָדְע֗וּ כִּ֤י מֵיְהוָה֙ הִ֔יא כִּי־תֹאֲנָ֥ה הֽוּא־מְבַקֵּ֖שׁ מִפְּלִשְׁתִּ֑ים וּבָעֵ֣ת הַהִ֔יא פְּלִשְׁתִּ֖ים מֹשְׁלִ֥ים בְּיִשְׂרָאֵֽל׃ פ

5 ‏וַיֵּ֧רֶד שִׁמְשׁ֛וֹן וְאָבִ֥יו וְאִמּ֖וֹ תִּמְנָ֑תָה וַיָּבֹ֙אוּ֙ עַד־כַּרְמֵ֣י תִמְנָ֔תָה וְהִנֵּה֙ כְּפִ֣יר אֲרָי֔וֹת שֹׁאֵ֖ג לִקְרָאתֽוֹ׃

6 ‏וַתִּצְלַ֨ח עָלָ֜יו ר֣וּחַ יְהוָ֗ה וַֽיְשַׁסְּעֵ֙הוּ֙ כְּשַׁסַּ֣ע הַגְּדִ֔י וּמְא֖וּמָה אֵ֣ין בְּיָד֑וֹ וְלֹ֤א הִגִּיד֙ לְאָבִ֣יו וּלְאִמּ֔וֹ אֵ֖ת אֲשֶׁ֥ר עָשָֽׂה׃

7 ‏וַיֵּ֖רֶד וַיְדַבֵּ֣ר לָאִשָּׁ֑ה וַתִּישַׁ֖ר בְּעֵינֵ֥י שִׁמְשֽׁוֹן׃

8 ‏וַיָּ֤שָׁב מִיָּמִים֙ לְקַחְתָּ֔הּ וַיָּ֣סַר לִרְא֔וֹת אֵ֖ת מַפֶּ֣לֶת הָאַרְיֵ֑ה וְהִנֵּ֨ה עֲדַ֧ת דְּבוֹרִ֛ים בִּגְוִיַּ֥ת הָאַרְיֵ֖ה וּדְבָֽשׁ׃

9 ‏וַיִּרְדֵּ֣הוּ אֶל־כַּפָּ֗יו וַיֵּ֤לֶךְ הָלוֹךְ֙ וְאָכֹ֔ל וַיֵּ֙לֶךְ֙ אֶל־אָבִ֣יו וְאֶל־אִמּ֔וֹ וַיִּתֵּ֥ן לָהֶ֖ם וַיֹּאכֵ֑לוּ וְלֹֽא־הִגִּ֣יד לָהֶ֔ם כִּ֛י מִגְּוִיַּ֥ת הָאַרְיֵ֖ה רָדָ֥ה הַדְּבָֽשׁ׃

10 ‏וַיֵּ֥רֶד אָבִ֖יהוּ אֶל־הָאִשָּׁ֑ה וַיַּ֨עַשׂ שָׁ֤ם שִׁמְשׁוֹן֙ מִשְׁתֶּ֔ה כִּ֛י כֵּ֥ן יַעֲשׂ֖וּ הַבַּחוּרִֽים׃

11 ‏וַיְהִ֖י כִּרְאוֹתָ֣ם אוֹת֑וֹ וַיִּקְחוּ֙ שְׁלֹשִׁ֣ים מֵֽרֵעִ֔ים וַיִּהְי֖וּ אִתּֽוֹ׃

12 ‏וַיֹּ֤אמֶר לָהֶם֙ שִׁמְשׁ֔וֹן אָחֽוּדָה־נָּ֥א לָכֶ֖ם חִידָ֑ה אִם־הַגֵּ֣ד תַּגִּידוּ֩ אוֹתָ֨הּ לִ֜י שִׁבְעַ֨ת יְמֵ֤י הַמִּשְׁתֶּה֙ וּמְצָאתֶ֔ם וְנָתַתִּ֤י לָכֶם֙ שְׁלֹשִׁ֣ים סְדִינִ֔ים וּשְׁלֹשִׁ֖ים חֲלִפֹ֥ת בְּגָדִֽים׃

13 ‏וְאִם־לֹ֣א תוּכְלוּ֮ לְהַגִּ֣יד לִי֒ וּנְתַתֶּ֨ם אַתֶּ֥ם לִי֙ שְׁלֹשִׁ֣ים סְדִינִ֔ים וּשְׁלֹשִׁ֖ים חֲלִיפ֣וֹת בְּגָדִ֑ים וַיֹּ֣אמְרוּ ל֔וֹ ח֥וּדָה חִידָתְךָ֖ וְנִשְׁמָעֶֽנָּה׃

14 ‏וַיֹּ֣אמֶר לָהֶ֗ם מֵהָֽאֹכֵל֙ יָצָ֣א מַאֲכָ֔ל וּמֵעַ֖ז יָצָ֣א מָת֑וֹק וְלֹ֥א יָכְל֛וּ לְהַגִּ֥יד הַחִידָ֖ה שְׁלֹ֥שֶׁת יָמִֽים׃

15 ‏וַיְהִ֣י׀ בַּיּ֣וֹם הַשְּׁבִיעִ֗י וַיֹּאמְר֤וּ לְאֵֽשֶׁת־שִׁמְשׁוֹן֙ פַּתִּ֣י אֶת־אִישֵׁ֗ךְ וְיַגֶּד־לָ֙נוּ֙ אֶת־הַ֣חִידָ֔ה פֶּן־נִשְׂרֹ֥ף אוֹתָ֛ךְ וְאֶת־בֵּ֥ית אָבִ֖יךְ בָּאֵ֑שׁ הַלְיָרְשֵׁ֕נוּ קְרָאתֶ֥ם לָ֖נוּ הֲלֹֽא׃

16 ‏וַתֵּבְךְּ֩ אֵ֨שֶׁת שִׁמְשׁ֜וֹן עָלָ֗יו וַתֹּ֙אמֶר֙ רַק־שְׂנֵאתַ֙נִי֙ וְלֹ֣א אֲהַבְתָּ֔נִי הַֽחִידָ֥ה חַ֙דְתָּ֙ לִבְנֵ֣י עַמִּ֔י וְלִ֖י לֹ֣א הִגַּ֑דְתָּה וַיֹּ֣אמֶר לָ֗הּ הִנֵּ֨ה לְאָבִ֧י וּלְאִמִּ֛י לֹ֥א הִגַּ֖דְתִּי וְלָ֥ךְ אַגִּֽיד׃

17 ‏וַתֵּ֤בְךְּ עָלָיו֙ שִׁבְעַ֣ת הַיָּמִ֔ים אֲשֶׁר־הָיָ֥ה לָהֶ֖ם הַמִּשְׁתֶּ֑ה וַיְהִ֣י׀ בַּיּ֣וֹם הַשְּׁבִיעִ֗י וַיַּגֶּד־לָהּ֙ כִּ֣י הֱצִיקַ֔תְהוּ וַתַּגֵּ֥ד הַחִידָ֖ה לִבְנֵ֥י עַמָּֽהּ׃

18 ‏וַיֹּ֣אמְרוּ לוֹ֩ אַנְשֵׁ֨י הָעִ֜יר בַּיּ֣וֹם הַשְּׁבִיעִ֗י בְּטֶ֙רֶם֙ יָבֹ֣א הַחַ֔רְסָה מַה־מָּת֣וֹק מִדְּבַ֔שׁ וּמֶ֥ה עַ֖ז מֵאֲרִ֑י וַיֹּ֣אמֶר לָהֶ֔ם לוּלֵא֙ חֲרַשְׁתֶּ֣ם בְּעֶגְלָתִ֔י לֹ֥א מְצָאתֶ֖ם חִידָתִֽי׃

19 ‏וַתִּצְלַ֨ח עָלָ֜יו ר֣וּחַ יְהוָ֗ה וַיֵּ֨רֶד אַשְׁקְל֜וֹן וַיַּ֥ךְ מֵהֶ֣ם׀ שְׁלֹשִׁ֣ים אִ֗ישׁ וַיִּקַּח֙ אֶת־חֲלִ֣יצוֹתָ֔ם וַיִּתֵּן֙ הַחֲלִיפ֔וֹת לְמַגִּידֵ֖י הַחִידָ֑ה וַיִּ֣חַר אַפּ֔וֹ וַיַּ֖עַל בֵּ֥ית אָבִֽיהוּ׃ פ

20 ‏וַתְּהִ֖י אֵ֣שֶׁת שִׁמְשׁ֑וֹן לְמֵ֣רֵעֵ֔הוּ אֲשֶׁ֥ר רֵעָ֖ה לֽוֹ׃

1 wayyēreḏ šiməšwōn timənāṯâ wayyarə’ ’iššâ bəṯimənāṯâ mibənwōṯ pəlišətîm:

2 wayya‘al wayyagēḏ lə’āḇîw ûlə’immwō wayyō’mer ’iššâ rā’îṯî ḇəṯimənāṯâ mibənwōṯ pəlišətîm wə‘atâ qəḥû-’wōṯāh llî lə’iššâ:

3 wayyō’mer lwō ’āḇîw wə’immwō ha’ên biḇənwōṯ ’aḥeyḵā ûḇəḵāl-‘ammî ’iššâ kî-’atâ hwōlēḵə lāqaḥaṯ ’iššâ mipəlišətîm hā‘ărēlîm wayyō’mer šiməšwōn ’el-’āḇîw ’wōṯāh qaḥ-lî kî-hî’ yāšərâ ḇə‘ênāy:

4 wə’āḇîw wə’immwō lō’ yāḏə‘û kî mêəhwâ hî’ kî-ṯō’ănâ hû’-məḇaqqēš mipəlišətîm ûḇā‘ēṯ hahî’ pəlišətîm mōšəlîm bəyiśərā’ēl: f

5 wayyēreḏ šiməšwōn wə’āḇîw wə’immwō timənāṯâ wayyāḇō’û ‘aḏ-karəmê ṯimənāṯâ wəhinnēh kəfîr ’ărāywōṯ šō’ēḡ liqərā’ṯwō:

6 watiṣəlaḥ ‘ālāyw rûḥa yəhwâ wayəšassə‘ēhû kəšassa‘ hagəḏî ûmə’ûmâ ’ên bəyāḏwō wəlō’ higîḏ lə’āḇîw ûlə’immwō ’ēṯ ’ăšer ‘āśâ:

7 wayyēreḏ wayəḏabēr lā’iššâ watîšar bə‘ênê šiməšwōn:

8 wayyāšāḇ mîyāmîm ləqaḥətāh wayyāsar lirə’wōṯ ’ēṯ mapeleṯ hā’arəyēh wəhinnēh ‘ăḏaṯ dəḇwōrîm biḡəwîyaṯ hā’arəyēh ûḏəḇāš:

9 wayyirədēhû ’el-kapāyw wayyēleḵə hālwōḵə wə’āḵōl wayyēleḵə ’el-’āḇîw wə’el-’immwō wayyitēn lâem wayyō’ḵēlû wəlō’-higîḏ lâem kî migəwîyaṯ hā’arəyēh rāḏâ hadəḇāš:

10 wayyēreḏ ’āḇîhû ’el-hā’iššâ wayya‘aś šām šiməšwōn mišəteh kî kēn ya‘ăśû habaḥûrîm:

11 wayəhî kirə’wōṯām ’wōṯwō wayyiqəḥû šəlōšîm mērē‘îm wayyihəyû ’itwō:

12 wayyō’mer lâem šiməšwōn ’āḥûḏâ-nnā’ lāḵem ḥîḏâ ’im-hagēḏ tagîḏû ’wōṯāh lî šiḇə‘aṯ yəmê hammišəteh ûməṣā’ṯem wənāṯatî lāḵem šəlōšîm səḏînîm ûšəlōšîm ḥălifōṯ bəḡāḏîm:

13 wə’im-lō’ ṯûḵəlû ləhagîḏ lî ûnəṯatem ’atem lî šəlōšîm səḏînîm ûšəlōšîm ḥălîfwōṯ bəḡāḏîm wayyō’mərû lwō ḥûḏâ ḥîḏāṯəḵā wənišəmā‘ennâ:

14 wayyō’mer lâem mēhā’ōḵēl yāṣā’ ma’ăḵāl ûmē‘az yāṣā’ māṯwōq wəlō’ yāḵəlû ləhagîḏ haḥîḏâ šəlōšeṯ yāmîm:

15 wayəhî| bayywōm haššəḇî‘î wayyō’mərû lə’ēšeṯ-šiməšwōn patî ’eṯ-’îšēḵə wəyageḏ-lānû ’eṯ-haḥîḏâ pen-niśərōf ’wōṯāḵə wə’eṯ-bêṯ ’āḇîḵə bā’ēš haləyārəšēnû qərā’ṯem lānû hălō’:

16 watēḇəḵḵə ’ēšeṯ šiməšwōn ‘ālāyw watō’mer raq-śənē’ṯanî wəlō’ ’ăhaḇətānî haḥîḏâ ḥaḏətā liḇənê ‘ammî wəlî lō’ higaḏətâ wayyō’mer lāh hinnēh lə’āḇî ûlə’immî lō’ higaḏətî wəlāḵə ’agîḏ:

17 watēḇəḵḵə ‘ālāyw šiḇə‘aṯ hayyāmîm ’ăšer-hāyâ lâem hammišəteh wayəhî| bayywōm haššəḇî‘î wayyageḏ-lāh kî hĕṣîqaṯəhû watagēḏ haḥîḏâ liḇənê ‘ammāh:

18 wayyō’mərû lwō ’anəšê hā‘îr bayywōm haššəḇî‘î bəṭerem yāḇō’ haḥarəsâ mah-mmāṯwōq midəḇaš ûmeh ‘az mē’ărî wayyō’mer lâem lûlē’ ḥărašətem bə‘eḡəlāṯî lō’ məṣā’ṯem ḥîḏāṯî:

19 watiṣəlaḥ ‘ālāyw rûḥa yəhwâ wayyēreḏ ’ašəqəlwōn wayyaḵə mēhem| šəlōšîm ’îš wayyiqqaḥ ’eṯ-ḥălîṣwōṯām wayyitēn haḥălîfwōṯ ləmagîḏê haḥîḏâ wayyiḥar ’apwō wayya‘al bêṯ ’āḇîhû: f

20 watəhî ’ēšeṯ šiməšwōn ləmērē‘ēhû ’ăšer rē‘â lwō:


Next: Judges (Shoftim) Chapter 15