Sacred Texts  Bible  Index 
Polyglot  KJV  Sep:JdB  Sep:JdA  Vul 

Judges (Shoftim) Index
  Previous  Next 

Tanach (Hebrew): Judges (Shoftim) Chapter 9

1 ‏וַיֵּ֨לֶךְ אֲבִימֶ֤לֶךְ בֶּן־יְרֻבַּ֙עַל֙ שְׁכֶ֔מָה אֶל־אֲחֵ֖י אִמּ֑וֹ וַיְדַבֵּ֣ר אֲלֵיהֶ֔ם וְאֶל־כָּל־מִשְׁפַּ֛חַת בֵּית־אֲבִ֥י אִמּ֖וֹ לֵאמֹֽר׃

2 ‏דַּבְּרוּ־נָ֞א בְּאָזְנֵ֨י כָל־בַּעֲלֵ֣י שְׁכֶם֮ מַה־טּ֣וֹב לָכֶם֒ הַמְשֹׁ֨ל בָּכֶ֜ם שִׁבְעִ֣ים אִ֗ישׁ כֹּ֚ל בְּנֵ֣י יְרֻבַּ֔עַל אִם־מְשֹׁ֥ל בָּכֶ֖ם אִ֣ישׁ אֶחָ֑ד וּזְכַרְתֶּ֕ם כִּֽי־עַצְמֵכֶ֥ם וּבְשַׂרְכֶ֖ם אָנִֽי׃

3 ‏וַיְדַבְּר֨וּ אֲחֵֽי־אִמּ֜וֹ עָלָ֗יו בְּאָזְנֵי֙ כָּל־בַּעֲלֵ֣י שְׁכֶ֔ם אֵ֥ת כָּל־הַדְּבָרִ֖ים הָאֵ֑לֶּה וַיֵּ֤ט לִבָּם֙ אַחֲרֵ֣י אֲבִימֶ֔לֶךְ כִּ֥י אָמְר֖וּ אָחִ֥ינוּ הֽוּא׃

4 ‏וַיִּתְּנוּ־לוֹ֙ שִׁבְעִ֣ים כֶּ֔סֶף מִבֵּ֖ית בַּ֣עַל בְּרִ֑ית וַיִּשְׂכֹּ֨ר בָּהֶ֜ם אֲבִימֶ֗לֶךְ אֲנָשִׁ֤ים רֵיקִים֙ וּפֹ֣חֲזִ֔ים וַיֵּלְכ֖וּ אַחֲרָֽיו׃

5 ‏וַיָּבֹ֤א בֵית־אָבִיו֙ עָפְרָ֔תָה וַֽיַּהֲרֹ֞ג אֶת־אֶחָ֧יו בְּנֵֽי־יְרֻבַּ֛עַל שִׁבְעִ֥ים אִ֖ישׁ עַל־אֶ֣בֶן אֶחָ֑ת וַיִּוָּתֵ֞ר יוֹתָ֧ם בֶּן־יְרֻבַּ֛עַל הַקָּטֹ֖ן כִּ֥י נֶחְבָּֽא׃ ס

6 ‏וַיֵּאָ֨סְפ֜וּ כָּל־בַּעֲלֵ֤י שְׁכֶם֙ וְכָל־בֵּ֣ית מִלּ֔וֹא וַיֵּ֣לְכ֔וּ וַיַּמְלִ֥יכוּ אֶת־אֲבִימֶ֖לֶךְ לְמֶ֑לֶךְ עִם־אֵל֥וֹן מֻצָּ֖ב אֲשֶׁ֥ר בִּשְׁכֶֽם׃

7 ‏וַיַּגִּ֣דוּ לְיוֹתָ֗ם וַיֵּ֙לֶךְ֙ וַֽיַּעֲמֹד֙ בְּרֹ֣אשׁ הַר־גְּרִזִ֔ים וַיִּשָּׂ֥א קוֹל֖וֹ וַיִּקְרָ֑א וַיֹּ֣אמֶר לָהֶ֗ם שִׁמְע֤וּ אֵלַי֙ בַּעֲלֵ֣י שְׁכֶ֔ם וְיִשְׁמַ֥ע אֲלֵיכֶ֖ם אֱלֹהִֽים׃

8 ‏הָל֤וֹךְ הָֽלְכוּ֙ הָעֵצִ֔ים לִמְשֹׁ֥חַ עֲלֵיהֶ֖ם מֶ֑לֶךְ וַיֹּאמְר֥וּ לַזַּ֖יִת מלוכה מָלְכָ֥ה עָלֵֽינוּ׃

9 ‏וַיֹּ֤אמֶר לָהֶם֙ הַזַּ֔יִת הֶחֳדַ֙לְתִּי֙ אֶת־דִּשְׁנִ֔י אֲשֶׁר־בִּ֛י יְכַבְּד֥וּ אֱלֹהִ֖ים וַאֲנָשִׁ֑ים וְהָ֣לַכְתִּ֔י לָנ֖וּעַ עַל־הָעֵצִֽים׃

10 ‏וַיֹּאמְר֥וּ הָעֵצִ֖ים לַתְּאֵנָ֑ה לְכִי־אַ֖תְּ מָלְכִ֥י עָלֵֽינוּ׃

11 ‏וַתֹּ֤אמֶר לָהֶם֙ הַתְּאֵנָ֔ה הֶחֳדַ֙לְתִּי֙ אֶת־מָתְקִ֔י וְאֶת־תְּנוּבָתִ֖י הַטּוֹבָ֑ה וְהָ֣לַכְתִּ֔י לָנ֖וּעַ עַל־הָעֵצִֽים׃

12 ‏וַיֹּאמְר֥וּ הָעֵצִ֖ים לַגָּ֑פֶן לְכִי־אַ֖תְּ מלוכי מָלְכִ֥י עָלֵֽינוּ׃

13 ‏וַתֹּ֤אמֶר לָהֶם֙ הַגֶּ֔פֶן הֶחֳדַ֙לְתִּי֙ אֶת־תִּ֣ירוֹשִׁ֔י הַֽמְשַׂמֵּ֥חַ אֱלֹהִ֖ים וַאֲנָשִׁ֑ים וְהָ֣לַכְתִּ֔י לָנ֖וּעַ עַל־הָעֵצִֽים׃

14 ‏וַיֹּאמְר֥וּ כָל־הָעֵצִ֖ים אֶל־הָאָטָ֑ד לֵ֥ךְ אַתָּ֖ה מְלָךְ־עָלֵֽינוּ׃

15 ‏וַיֹּ֣אמֶר הָאָטָד֮ אֶל־הָעֵצִים֒ אִ֡ם בֶּאֱמֶ֣ת אַתֶּם֩ מֹשְׁחִ֨ים אֹתִ֤י לְמֶ֙לֶךְ֙ עֲלֵיכֶ֔ם בֹּ֖אוּ חֲס֣וּ בְצִלִּ֑י וְאִם־אַ֕יִן תֵּ֤צֵא אֵשׁ֙ מִן־הָ֣אָטָ֔ד וְתֹאכַ֖ל אֶת־אַרְזֵ֥י הַלְּבָנֽוֹן׃

16 ‏וְעַתָּ֗ה אִם־בֶּאֱמֶ֤ת וּבְתָמִים֙ עֲשִׂיתֶ֔ם וַתַּמְלִ֖יכוּ אֶת־אֲבִימֶ֑לֶךְ וְאִם־טוֹבָ֤ה עֲשִׂיתֶם֙ עִם־יְרֻבַּ֣עַל וְעִם־בֵּית֔וֹ וְאִם־כִּגְמ֥וּל יָדָ֖יו עֲשִׂ֥יתֶם לֽוֹ׃

17 ‏אֲשֶׁר־נִלְחַ֥ם אָבִ֖י עֲלֵיכֶ֑ם וַיַּשְׁלֵ֤ךְ אֶת־נַפְשׁוֹ֙ מִנֶּ֔גֶד וַיַּצֵּ֥ל אֶתְכֶ֖ם מִיַּ֥ד מִדְיָֽן׃

18 ‏וְאַתֶּ֞ם קַמְתֶּ֨ם עַל־בֵּ֤ית אָבִי֙ הַיּ֔וֹם וַתַּהַרְג֧וּ אֶת־בָּנָ֛יו שִׁבְעִ֥ים אִ֖ישׁ עַל־אֶ֣בֶן אֶחָ֑ת וַתַּמְלִ֜יכוּ אֶת־אֲבִימֶ֤לֶךְ בֶּן־אֲמָתוֹ֙ עַל־בַּעֲלֵ֣י שְׁכֶ֔ם כִּ֥י אֲחִיכֶ֖ם הֽוּא׃

19 ‏וְאִם־בֶּאֱמֶ֨ת וּבְתָמִ֧ים עֲשִׂיתֶ֛ם עִם־יְרֻבַּ֥עַל וְעִם־בֵּית֖וֹ הַיּ֣וֹם הַזֶּ֑ה שִׂמְחוּ֙ בַּאֲבִימֶ֔לֶךְ וְיִשְׂמַ֥ח גַּם־ה֖וּא בָּכֶֽם׃

20 ‏וְאִם־אַ֕יִן תֵּ֤צֵא אֵשׁ֙ מֵאֲבִימֶ֔לֶךְ וְתֹאכַ֛ל אֶת־בַּעֲלֵ֥י שְׁכֶ֖ם וְאֶת־בֵּ֣ית מִלּ֑וֹא וְתֵצֵ֨א אֵ֜שׁ מִבַּעֲלֵ֤י שְׁכֶם֙ וּמִבֵּ֣ית מִלּ֔וֹא וְתֹאכַ֖ל אֶת־אֲבִימֶֽלֶךְ׃

21 ‏וַיָּ֣נָס יוֹתָ֔ם וַיִּבְרַ֖ח וַיֵּ֣לֶךְ בְּאֵ֑רָה וַיֵּ֣שֶׁב שָׁ֔ם מִפְּנֵ֖י אֲבִימֶ֥לֶךְ אָחִֽיו׃ פ

22 ‏וַיָּ֧שַׂר אֲבִימֶ֛לֶךְ עַל־יִשְׂרָאֵ֖ל שָׁלֹ֥שׁ שָׁנִֽים׃

23 ‏וַיִּשְׁלַ֤ח אֱלֹהִים֙ ר֣וּחַ רָעָ֔ה בֵּ֣ין אֲבִימֶ֔לֶךְ וּבֵ֖ין בַּעֲלֵ֣י שְׁכֶ֑ם וַיִּבְגְּד֥וּ בַעֲלֵי־שְׁכֶ֖ם בַּאֲבִימֶֽלֶךְ׃

24 ‏לָב֕וֹא חֲמַ֖ס שִׁבְעִ֣ים בְּנֵֽי־יְרֻבָּ֑עַל וְדָמָ֗ם לָשׂ֞וּם עַל־אֲבִימֶ֤לֶךְ אֲחִיהֶם֙ אֲשֶׁ֣ר הָרַ֣ג אוֹתָ֔ם וְעַל֙ בַּעֲלֵ֣י שְׁכֶ֔ם אֲשֶׁר־חִזְּק֥וּ אֶת־יָדָ֖יו לַהֲרֹ֥ג אֶת־אֶחָֽיו׃

25 ‏וַיָּשִׂ֣ימוּ לוֹ֩ בַעֲלֵ֨י שְׁכֶ֜ם מְאָרְבִ֗ים עַ֚ל רָאשֵׁ֣י הֶהָרִ֔ים וַיִּגְזְל֗וּ אֵ֛ת כָּל־אֲשֶׁר־יַעֲבֹ֥ר עֲלֵיהֶ֖ם בַּדָּ֑רֶךְ וַיֻּגַּ֖ד לַאֲבִימֶֽלֶךְ׃ פ

26 ‏וַיָּבֹ֞א גַּ֤עַל בֶּן־עֶ֙בֶד֙ וְאֶחָ֔יו וַיַּעַבְר֖וּ בִּשְׁכֶ֑ם וַיִּבְטְחוּ־ב֖וֹ בַּעֲלֵ֥י שְׁכֶֽם׃

27 ‏וַיֵּצְא֨וּ הַשָּׂדֶ֜ה וַֽיִּבְצְר֤וּ אֶת־כַּרְמֵיהֶם֙ וַֽיִּדְרְכ֔וּ וַֽיַּעֲשׂ֖וּ הִלּוּלִ֑ים וַיָּבֹ֙אוּ֙ בֵּ֣ית אֱ‍ֽלֹֽהֵיהֶ֔ם וַיֹּֽאכְלוּ֙ וַיִּשְׁתּ֔וּ וַֽיְקַלְל֖וּ אֶת־אֲבִימֶֽלֶךְ׃

28 ‏וַיֹּ֣אמֶר׀ גַּ֣עַל בֶּן־עֶ֗בֶד מִֽי־אֲבִימֶ֤לֶךְ וּמִֽי־שְׁכֶם֙ כִּ֣י נַעַבְדֶ֔נּוּ הֲלֹ֥א בֶן־יְרֻבַּ֖עַל וּזְבֻ֣ל פְּקִיד֑וֹ עִבְד֗וּ אֶת־אַנְשֵׁ֤י חֲמוֹר֙ אֲבִ֣י שְׁכֶ֔ם וּמַדּ֖וּעַ נַעַבְדֶ֥נּוּ אֲנָֽחְנוּ׃

29 ‏וּמִ֨י יִתֵּ֜ן אֶת־הָעָ֤ם הַזֶּה֙ בְּיָדִ֔י וְאָסִ֖ירָה אֶת־אֲבִימֶ֑לֶךְ וַיֹּ֙אמֶר֙ לַאֲבִימֶ֔לֶךְ רַבֶּ֥ה צְבָאֲךָ֖ וָצֵֽאָה׃

30 ‏וַיִּשְׁמַ֗ע זְבֻל֙ שַׂר־הָעִ֔יר אֶת־דִּבְרֵ֖י גַּ֣עַל בֶּן־עָ֑בֶד וַיִּ֖חַר אַפּֽוֹ׃

31 ‏וַיִּשְׁלַ֧ח מַלְאָכִ֛ים אֶל־אֲבִימֶ֖לֶךְ בְּתָרְמָ֣ה לֵאמֹ֑ר הִנֵּה֩ גַ֨עַל בֶּן־עֶ֤בֶד וְאֶחָיו֙ בָּאִ֣ים שְׁכֶ֔מָה וְהִנָּ֛ם צָרִ֥ים אֶת־הָעִ֖יר עָלֶֽיךָ׃

32 ‏וְעַתָּה֙ ק֣וּם לַ֔יְלָה אַתָּ֖ה וְהָעָ֣ם אֲשֶׁר־אִתָּ֑ךְ וֶאֱרֹ֖ב בַּשָּׂדֶֽה׃

33 ‏וְהָיָ֤ה בַבֹּ֙קֶר֙ כִּזְרֹ֣חַ הַשֶּׁ֔מֶשׁ תַּשְׁכִּ֖ים וּפָשַׁטְתָּ֣ עַל־הָעִ֑יר וְהִנֵּה־ה֞וּא וְהָעָ֤ם אֲשֶׁר־אִתּוֹ֙ יֹצְאִ֣ים אֵלֶ֔יךָ וְעָשִׂ֣יתָ לּ֔וֹ כַּאֲשֶׁ֖ר תִּמְצָ֥א יָדֶֽךָ׃ ס

34 ‏וַיָּ֧קָם אֲבִימֶ֛לֶךְ וְכָל־הָעָ֥ם אֲשֶׁר־עִמּ֖וֹ לָ֑יְלָה וַיֶּאֶרְב֣וּ עַל־שְׁכֶ֔ם אַרְבָּעָ֖ה רָאשִֽׁים׃

35 ‏וַיֵּצֵא֙ גַּ֣עַל בֶּן־עֶ֔בֶד וַיַּעֲמֹ֕ד פֶּ֖תַח שַׁ֣עַר הָעִ֑יר וַיָּ֧קָם אֲבִימֶ֛לֶךְ וְהָעָ֥ם אֲשֶׁר־אִתּ֖וֹ מִן־הַמַּאְרָֽב׃

36 ‏וַיַּרְא־גַּעַל֮ אֶת־הָעָם֒ וַיֹּ֣אמֶר אֶל־זְבֻ֔ל הִנֵּה־עָ֣ם יוֹרֵ֔ד מֵרָאשֵׁ֖י הֶהָרִ֑ים וַיֹּ֤אמֶר אֵלָיו֙ זְבֻ֔ל אֵ֣ת צֵ֧ל הֶהָרִ֛ים אַתָּ֥ה רֹאֶ֖ה כָּאֲנָשִֽׁים׃ ס

37 ‏וַיֹּ֨סֶף ע֣וֹד גַּעַל֮ לְדַבֵּר֒ וַיֹּ֕אמֶר הִנֵּה־עָם֙ יֽוֹרְדִ֔ים מֵעִ֖ם טַבּ֣וּר הָאָ֑רֶץ וְרֹאשׁ־אֶחָ֣ד בָּ֔א מִדֶּ֖רֶךְ אֵל֥וֹן מְעוֹנְנִֽים׃

38 ‏וַיֹּ֨אמֶר אֵלָ֜יו זְבֻ֗ל אַיֵּ֨ה אֵפ֥וֹא פִ֙יךָ֙ אֲשֶׁ֣ר תֹּאמַ֔ר מִ֥י אֲבִימֶ֖לֶךְ כִּ֣י נַעַבְדֶ֑נּוּ הֲלֹ֨א זֶ֤ה הָעָם֙ אֲשֶׁ֣ר מָאַ֣סְתָּה בּ֔וֹ צֵא־נָ֥א עַתָּ֖ה וְהִלָּ֥חֶם בּֽוֹ׃ ס

39 ‏וַיֵּ֣צֵא גַ֔עַל לִפְנֵ֖י בַּעֲלֵ֣י שְׁכֶ֑ם וַיִּלָּ֖חֶם בַּאֲבִימֶֽלֶךְ׃

40 ‏וַיִּרְדְּפֵ֣הוּ אֲבִימֶ֔לֶךְ וַיָּ֖נָס מִפָּנָ֑יו וַֽיִּפְּל֛וּ חֲלָלִ֥ים רַבִּ֖ים עַד־פֶּ֥תַח הַשָּֽׁעַר׃

41 ‏וַיֵּ֥שֶׁב אֲבִימֶ֖לֶךְ בָּארוּמָ֑ה וַיְגָ֧רֶשׁ זְבֻ֛ל אֶת־גַּ֥עַל וְאֶת־אֶחָ֖יו מִשֶּׁ֥בֶת בִּשְׁכֶֽם׃

42 ‏וַֽיְהִי֙ מִֽמָּחֳרָ֔ת וַיֵּצֵ֥א הָעָ֖ם הַשָּׂדֶ֑ה וַיַּגִּ֖דוּ לַאֲבִימֶֽלֶךְ׃

43 ‏וַיִּקַּ֣ח אֶת־הָעָ֗ם וַֽיֶּחֱצֵם֙ לִשְׁלֹשָׁ֣ה רָאשִׁ֔ים וַיֶּאֱרֹ֖ב בַּשָּׂדֶ֑ה וַיַּ֗רְא וְהִנֵּ֤ה הָעָם֙ יֹצֵ֣א מִן־הָעִ֔יר וַיָּ֥קָם עֲלֵיהֶ֖ם וַיַּכֵּֽם׃

44 ‏וַאֲבִימֶ֗לֶךְ וְהָרָאשִׁים֙ אֲשֶׁ֣ר עִמּ֔וֹ פָּשְׁט֕וּ וַיַּ֣עַמְד֔וּ פֶּ֖תַח שַׁ֣עַר הָעִ֑יר וּשְׁנֵ֣י הָֽרָאשִׁ֗ים פָּֽשְׁט֛וּ עַֽל־כָּל־אֲשֶׁ֥ר בַּשָּׂדֶ֖ה וַיַּכּֽוּם׃

45 ‏וַאֲבִימֶ֜לֶךְ נִלְחָ֣ם בָּעִ֗יר כֹּ֚ל הַיּ֣וֹם הַה֔וּא וַיִּלְכֹּד֙ אֶת־הָעִ֔יר וְאֶת־הָעָ֥ם אֲשֶׁר־בָּ֖הּ הָרָ֑ג וַיִּתֹּץ֙ אֶת־הָעִ֔יר וַיִּזְרָעֶ֖הָ מֶֽלַח׃ פ

46 ‏וַֽיִּשְׁמְע֔וּ כָּֽל־בַּעֲלֵ֖י מִֽגְדַּל־שְׁכֶ֑ם וַיָּבֹ֣אוּ אֶל־צְרִ֔יחַ בֵּ֖ית אֵ֥ל בְּרִֽית׃

47 ‏וַיֻּגַּ֖ד לַאֲבִימֶ֑לֶךְ כִּ֣י הִֽתְקַבְּצ֔וּ כָּֽל־בַּעֲלֵ֖י מִֽגְדַּל־שְׁכֶֽם׃

48 ‏וַיַּ֨עַל אֲבִימֶ֜לֶךְ הַר־צַלְמ֗וֹן הוּא֮ וְכָל־הָעָ֣ם אֲשֶׁר־אִתּוֹ֒ וַיִּקַּח֩ אֲבִימֶ֨לֶךְ אֶת־הַקַּרְדֻּמּ֜וֹת בְּיָד֗וֹ וַיִּכְרֹת֙ שׂוֹכַ֣ת עֵצִ֔ים וַיִּ֨שָּׂאֶ֔הָ וַיָּ֖שֶׂם עַל־שִׁכְמ֑וֹ וַיֹּ֜אמֶר אֶל־הָעָ֣ם אֲשֶׁר־עִמּ֗וֹ מָ֤ה רְאִיתֶם֙ עָשִׂ֔יתִי מַהֲר֖וּ עֲשׂ֥וּ כָמֽוֹנִי׃

49 ‏וַיִּכְרְת֨וּ גַם־כָּל־הָעָ֜ם אִ֣ישׁ שׂוֹכֹ֗ה וַיֵּ֨לְכ֜וּ אַחֲרֵ֤י אֲבִימֶ֙לֶךְ֙ וַיָּשִׂ֣ימוּ עַֽל־הַצְּרִ֔יחַ וַיַּצִּ֧יתוּ עֲלֵיהֶ֛ם אֶֽת־הַצְּרִ֖יחַ בָּאֵ֑שׁ וַיָּמֻ֜תוּ גַּ֣ם כָּל־אַנְשֵׁ֧י מִֽגְדַּל־שְׁכֶ֛ם כְּאֶ֖לֶף אִ֥ישׁ וְאִשָּֽׁה׃ פ

50 ‏וַיֵּ֥לֶךְ אֲבִימֶ֖לֶךְ אֶל־תֵּבֵ֑ץ וַיִּ֥חַן בְּתֵבֵ֖ץ וַֽיִּלְכְּדָֽהּ׃

51 ‏וּמִגְדַּל־עֹז֮ הָיָ֣ה בְתוֹךְ־הָעִיר֒ וַיָּנֻ֨סוּ שָׁ֜מָּה כָּל־הָאֲנָשִׁ֣ים וְהַנָּשִׁ֗ים וְכֹל֙ בַּעֲלֵ֣י הָעִ֔יר וַֽיִּסְגְּר֖וּ בַּעֲדָ֑ם וַֽיַּעֲל֖וּ עַל־גַּ֥ג הַמִּגְדָּֽל׃

52 ‏וַיָּבֹ֤א אֲבִימֶ֙לֶךְ֙ עַד־הַמִּגְדָּ֔ל וַיִּלָּ֖חֶם בּ֑וֹ וַיִּגַּ֛שׁ עַד־פֶּ֥תַח הַמִּגְדָּ֖ל לְשָׂרְפ֥וֹ בָאֵֽשׁ׃

53 ‏וַתַּשְׁלֵ֞ךְ אִשָּׁ֥ה אַחַ֛ת פֶּ֥לַח רֶ֖כֶב עַל־רֹ֣אשׁ אֲבִימֶ֑לֶךְ וַתָּ֖רִץ אֶת־גֻּלְגָּלְתּֽוֹ׃

54 ‏וַיִּקְרָ֨א מְהֵרָ֜ה אֶל־הַנַּ֣עַר׀ נֹשֵׂ֣א כֵלָ֗יו וַיֹּ֤אמֶר לוֹ֙ שְׁלֹ֤ף חַרְבְּךָ֙ וּמ֣וֹתְתֵ֔נִי פֶּן־יֹ֥אמְרוּ לִ֖י אִשָּׁ֣ה הֲרָגָ֑תְהוּ וַיִּדְקְרֵ֥הוּ נַעֲר֖וֹ וַיָּמֹֽת׃

55 ‏וַיִּרְא֥וּ אִֽישׁ־יִשְׂרָאֵ֖ל כִּ֣י מֵ֣ת אֲבִימֶ֑לֶךְ וַיֵּלְכ֖וּ אִ֥ישׁ לִמְקֹמֽוֹ׃

56 ‏וַיָּ֣שֶׁב אֱלֹהִ֔ים אֵ֖ת רָעַ֣ת אֲבִימֶ֑לֶךְ אֲשֶׁ֤ר עָשָׂה֙ לְאָבִ֔יו לַהֲרֹ֖ג אֶת־שִׁבְעִ֥ים אֶחָֽיו׃

57 ‏וְאֵ֗ת כָּל־רָעַת֙ אַנְשֵׁ֣י שְׁכֶ֔ם הֵשִׁ֥יב אֱלֹהִ֖ים בְּרֹאשָׁ֑ם וַתָּבֹ֣א אֲלֵיהֶ֔ם קִֽלֲלַ֖ת יוֹתָ֥ם בֶּן־יְרֻבָּֽעַל׃ פ

1 wayyēleḵə ’ăḇîmeleḵə ben-yəruba‘al šəḵemâ ’el-’ăḥê ’immwō wayəḏabēr ’ălêhem wə’el-kāl-mišəpaḥaṯ bêṯ-’ăḇî ’immwō lē’mōr:

2 dabərû-nā’ bə’āzənê ḵāl-ba‘ălê šəḵem mah-ṭṭwōḇ lāḵem haməšōl bāḵem šiḇə‘îm ’îš kōl bənê yəruba‘al ’im-məšōl bāḵem ’îš ’eḥāḏ ûzəḵarətem kî-‘aṣəmēḵem ûḇəśarəḵem ’ānî:

3 wayəḏabərû ’ăḥê-’immwō ‘ālāyw bə’āzənê kāl-ba‘ălê šəḵem ’ēṯ kāl-hadəḇārîm hā’ēlleh wayyēṭ libām ’aḥărê ’ăḇîmeleḵə kî ’āmərû ’āḥînû hû’:

4 wayyitənû-lwō šiḇə‘îm kesef mibêṯ ba‘al bərîṯ wayyiśəkōr bâem ’ăḇîmeleḵə ’ănāšîm rêqîm ûfōḥăzîm wayyēləḵû ’aḥărāyw:

5 wayyāḇō’ ḇêṯ-’āḇîw ‘āfərāṯâ wayyahărōḡ ’eṯ-’eḥāyw bənê-yəruba‘al šiḇə‘îm ’îš ‘al-’eḇen ’eḥāṯ wayyiûāṯēr ywōṯām ben-yəruba‘al haqqāṭōn kî neḥəbā’: s

6 wayyē’āsəfû kāl-ba‘ălê šəḵem wəḵāl-bêṯ millwō’ wayyēləḵû wayyaməlîḵû ’eṯ-’ăḇîmeleḵə ləmeleḵə ‘im-’ēlwōn muṣṣāḇ ’ăšer bišəḵem:

7 wayyagiḏû ləywōṯām wayyēleḵə wayya‘ămōḏ bərō’š har-gərizîm wayyiśśā’ qwōlwō wayyiqərā’ wayyō’mer lâem šimə‘û ’ēlay ba‘ălê šəḵem wəyišəma‘ ’ălêḵem ’ĕlōhîm:

8 hālwōḵə hāləḵû hā‘ēṣîm liməšōḥa ‘ălêhem meleḵə wayyō’mərû lazzayiṯ məlwōḵâ māləḵâ ‘ālênû:

9 wayyō’mer lâem hazzayiṯ heḥŏḏalətî ’eṯ-dišənî ’ăšer-bî yəḵabəḏû ’ĕlōhîm wa’ănāšîm wəhālaḵətî lānû‘a ‘al-hā‘ēṣîm:

10 wayyō’mərû hā‘ēṣîm latə’ēnâ ləḵî-’atə māləḵî ‘ālênû:

11 watō’mer lâem hatə’ēnâ heḥŏḏalətî ’eṯ-māṯəqî wə’eṯ-tənûḇāṯî haṭṭwōḇâ wəhālaḵətî lānû‘a ‘al-hā‘ēṣîm:

12 wayyō’mərû hā‘ēṣîm lagāfen ləḵî-’atə məlwōḵî māləḵî ‘ālênû:

13 watō’mer lâem hagefen heḥŏḏalətî ’eṯ-tîrwōšî haməśammēḥa ’ĕlōhîm wa’ănāšîm wəhālaḵətî lānû‘a ‘al-hā‘ēṣîm:

14 wayyō’mərû ḵāl-hā‘ēṣîm ’el-hā’āṭāḏ lēḵə ’atâ məlāḵə-‘ālênû:

15 wayyō’mer hā’āṭāḏ ’el-hā‘ēṣîm ’im be’ĕmeṯ ’atem mōšəḥîm ’ōṯî ləmeleḵə ‘ălêḵem bō’û ḥăsû ḇəṣillî wə’im-’ayin tēṣē’ ’ēš min-hā’āṭāḏ wəṯō’ḵal ’eṯ-’arəzê halləḇānwōn:

16 wə‘atâ ’im-be’ĕmeṯ ûḇəṯāmîm ‘ăśîṯem wataməlîḵû ’eṯ-’ăḇîmeleḵə wə’im-ṭwōḇâ ‘ăśîṯem ‘im-yəruba‘al wə‘im-bêṯwō wə’im-kiḡəmûl yāḏāyw ‘ăśîṯem lwō:

17 ’ăšer-niləḥam ’āḇî ‘ălêḵem wayyašəlēḵə ’eṯ-nafəšwō minneḡeḏ wayyaṣṣēl ’eṯəḵem mîyaḏ miḏəyān:

18 wə’atem qamətem ‘al-bêṯ ’āḇî hayywōm wataharəḡû ’eṯ-bānāyw šiḇə‘îm ’îš ‘al-’eḇen ’eḥāṯ wataməlîḵû ’eṯ-’ăḇîmeleḵə ben-’ămāṯwō ‘al-ba‘ălê šəḵem kî ’ăḥîḵem hû’:

19 wə’im-be’ĕmeṯ ûḇəṯāmîm ‘ăśîṯem ‘im-yəruba‘al wə‘im-bêṯwō hayywōm hazzeh śiməḥû ba’ăḇîmeleḵə wəyiśəmaḥ gam-hû’ bāḵem:

20 wə’im-’ayin tēṣē’ ’ēš mē’ăḇîmeleḵə wəṯō’ḵal ’eṯ-ba‘ălê šəḵem wə’eṯ-bêṯ millwō’ wəṯēṣē’ ’ēš miba‘ălê šəḵem ûmibêṯ millwō’ wəṯō’ḵal ’eṯ-’ăḇîmeleḵə:

21 wayyānās ywōṯām wayyiḇəraḥ wayyēleḵə bə’ērâ wayyēšeḇ šām mipənê ’ăḇîmeleḵə ’āḥîw: f

22 wayyāśar ’ăḇîmeleḵə ‘al-yiśərā’ēl šālōš šānîm:

23 wayyišəlaḥ ’ĕlōhîm rûḥa rā‘â bên ’ăḇîmeleḵə ûḇên ba‘ălê šəḵem wayyiḇəgəḏû ḇa‘ălê-šəḵem ba’ăḇîmeleḵə:

24 lāḇwō’ ḥămas šiḇə‘îm bənê-yərubā‘al wəḏāmām lāśûm ‘al-’ăḇîmeleḵə ’ăḥîhem ’ăšer hāraḡ ’wōṯām wə‘al ba‘ălê šəḵem ’ăšer-ḥizzəqû ’eṯ-yāḏāyw lahărōḡ ’eṯ-’eḥāyw:

25 wayyāśîmû lwō ḇa‘ălê šəḵem mə’ārəḇîm ‘al rā’šê hehārîm wayyiḡəzəlû ’ēṯ kāl-’ăšer-ya‘ăḇōr ‘ălêhem badāreḵə wayyugaḏ la’ăḇîmeleḵə: f

26 wayyāḇō’ ga‘al ben-‘eḇeḏ wə’eḥāyw wayya‘aḇərû bišəḵem wayyiḇəṭəḥû-ḇwō ba‘ălê šəḵem:

27 wayyēṣə’û haśśāḏeh wayyiḇəṣərû ’eṯ-karəmêhem wayyiḏərəḵû wayya‘ăśû hillûlîm wayyāḇō’û bêṯ ’ĕ‍lōhêhem wayyō’ḵəlû wayyišətû wayəqaləlû ’eṯ-’ăḇîmeleḵə:

28 wayyō’mer| ga‘al ben-‘eḇeḏ mî-’ăḇîmeleḵə ûmî-šəḵem kî na‘aḇəḏennû hălō’ ḇen-yəruba‘al ûzəḇul pəqîḏwō ‘iḇəḏû ’eṯ-’anəšê ḥămwōr ’ăḇî šəḵem ûmadû‘a na‘aḇəḏennû ’ănāḥənû:

29 ûmî yitēn ’eṯ-hā‘ām hazzeh bəyāḏî wə’āsîrâ ’eṯ-’ăḇîmeleḵə wayyō’mer la’ăḇîmeleḵə rabeh ṣəḇā’ăḵā wāṣē’â:

30 wayyišəma‘ zəḇul śar-hā‘îr ’eṯ-diḇərê ga‘al ben-‘āḇeḏ wayyiḥar ’apwō:

31 wayyišəlaḥ malə’āḵîm ’el-’ăḇîmeleḵə bəṯārəmâ lē’mōr hinnēh ḡa‘al ben-‘eḇeḏ wə’eḥāyw bā’îm šəḵemâ wəhinnām ṣārîm ’eṯ-hā‘îr ‘āleyḵā:

32 wə‘atâ qûm layəlâ ’atâ wəhā‘ām ’ăšer-’itāḵə we’ĕrōḇ baśśāḏeh:

33 wəhāyâ ḇabōqer kizərōḥa haššemeš tašəkîm ûfāšaṭətā ‘al-hā‘îr wəhinnēh-hû’ wəhā‘ām ’ăšer-’itwō yōṣə’îm ’ēleyḵā wə‘āśîṯā llwō ka’ăšer timəṣā’ yāḏeḵā: s

34 wayyāqām ’ăḇîmeleḵə wəḵāl-hā‘ām ’ăšer-‘immwō lāyəlâ wayye’erəḇû ‘al-šəḵem ’arəbā‘â rā’šîm:

35 wayyēṣē’ ga‘al ben-‘eḇeḏ wayya‘ămōḏ peṯaḥ ša‘ar hā‘îr wayyāqām ’ăḇîmeleḵə wəhā‘ām ’ăšer-’itwō min-hamma’ərāḇ:

36 wayyarə’-ga‘al ’eṯ-hā‘ām wayyō’mer ’el-zəḇul hinnēh-‘ām ywōrēḏ mērā’šê hehārîm wayyō’mer ’ēlāyw zəḇul ’ēṯ ṣēl hehārîm ’atâ rō’eh kā’ănāšîm: s

37 wayyōsef ‘wōḏ ga‘al ləḏabēr wayyō’mer hinnēh-‘ām ywōrəḏîm mē‘im ṭabûr hā’āreṣ wərō’š-’eḥāḏ bā’ midereḵə ’ēlwōn mə‘wōnənîm:

38 wayyō’mer ’ēlāyw zəḇul ’ayyēh ’ēfwō’ fîḵā ’ăšer tō’mar mî ’ăḇîmeleḵə kî na‘aḇəḏennû hălō’ zeh hā‘ām ’ăšer mā’asətâ bwō ṣē’-nā’ ‘atâ wəhillāḥem bwō: s

39 wayyēṣē’ ḡa‘al lifənê ba‘ălê šəḵem wayyillāḥem ba’ăḇîmeleḵə:

40 wayyirədəfēhû ’ăḇîmeleḵə wayyānās mipānāyw wayyipəlû ḥălālîm rabîm ‘aḏ-peṯaḥ haššā‘ar:

41 wayyēšeḇ ’ăḇîmeleḵə bā’rûmâ wayəḡāreš zəḇul ’eṯ-ga‘al wə’eṯ-’eḥāyw miššeḇeṯ bišəḵem:

42 wayəhî mimmāḥŏrāṯ wayyēṣē’ hā‘ām haśśāḏeh wayyagiḏû la’ăḇîmeleḵə:

43 wayyiqqaḥ ’eṯ-hā‘ām wayyeḥĕṣēm lišəlōšâ rā’šîm wayye’ĕrōḇ baśśāḏeh wayyarə’ wəhinnēh hā‘ām yōṣē’ min-hā‘îr wayyāqām ‘ălêhem wayyakēm:

44 wa’ăḇîmeleḵə wəhārā’šîm ’ăšer ‘immwō pāšəṭû wayya‘aməḏû peṯaḥ ša‘ar hā‘îr ûšənê hārā’šîm pāšəṭû ‘al-kāl-’ăšer baśśāḏeh wayyakûm:

45 wa’ăḇîmeleḵə niləḥām bā‘îr kōl hayywōm hahû’ wayyiləkōḏ ’eṯ-hā‘îr wə’eṯ-hā‘ām ’ăšer-bāh hārāḡ wayyitōṣ ’eṯ-hā‘îr wayyizərā‘ehā melaḥ: f

46 wayyišəmə‘û kāl-ba‘ălê miḡədal-šəḵem wayyāḇō’û ’el-ṣərîḥa bêṯ ’ēl bərîṯ:

47 wayyugaḏ la’ăḇîmeleḵə kî hiṯəqabəṣû kāl-ba‘ălê miḡədal-šəḵem:

48 wayya‘al ’ăḇîmeleḵə har-ṣaləmwōn hû’ wəḵāl-hā‘ām ’ăšer-’itwō wayyiqqaḥ ’ăḇîmeleḵə ’eṯ-haqqarədummwōṯ bəyāḏwō wayyiḵərōṯ śwōḵaṯ ‘ēṣîm wayyiśśā’ehā wayyāśem ‘al-šiḵəmwō wayyō’mer ’el-hā‘ām ’ăšer-‘immwō mâ rə’îṯem ‘āśîṯî mahărû ‘ăśû ḵāmwōnî:

49 wayyiḵərəṯû ḡam-kāl-hā‘ām ’îš śwōḵōh wayyēləḵû ’aḥărê ’ăḇîmeleḵə wayyāśîmû ‘al-haṣṣərîḥa wayyaṣṣîṯû ‘ălêhem ’eṯ-haṣṣərîḥa bā’ēš wayyāmuṯû gam kāl-’anəšê miḡədal-šəḵem kə’elef ’îš wə’iššâ: f

50 wayyēleḵə ’ăḇîmeleḵə ’el-tēḇēṣ wayyiḥan bəṯēḇēṣ wayyiləkəḏāh:

51 ûmiḡədal-‘ōz hāyâ ḇəṯwōḵə-hā‘îr wayyānusû šāmmâ kāl-hā’ănāšîm wəhannāšîm wəḵōl ba‘ălê hā‘îr wayyisəgərû ba‘ăḏām wayya‘ălû ‘al-gaḡ hammiḡədāl:

52 wayyāḇō’ ’ăḇîmeleḵə ‘aḏ-hammiḡədāl wayyillāḥem bwō wayyigaš ‘aḏ-peṯaḥ hammiḡədāl ləśārəfwō ḇā’ēš:

53 watašəlēḵə ’iššâ ’aḥaṯ pelaḥ reḵeḇ ‘al-rō’š ’ăḇîmeleḵə watāriṣ ’eṯ-guləgālətwō:

54 wayyiqərā’ məhērâ ’el-hanna‘ar| nōśē’ ḵēlāyw wayyō’mer lwō šəlōf ḥarəbəḵā ûmwōṯəṯēnî pen-yō’mərû lî ’iššâ hărāḡāṯəhû wayyiḏəqərēhû na‘ărwō wayyāmōṯ:

55 wayyirə’û ’îš-yiśərā’ēl kî mēṯ ’ăḇîmeleḵə wayyēləḵû ’îš liməqōmwō:

56 wayyāšeḇ ’ĕlōhîm ’ēṯ rā‘aṯ ’ăḇîmeleḵə ’ăšer ‘āśâ lə’āḇîw lahărōḡ ’eṯ-šiḇə‘îm ’eḥāyw:

57 wə’ēṯ kāl-rā‘aṯ ’anəšê šəḵem hēšîḇ ’ĕlōhîm bərō’šām watāḇō’ ’ălêhem qilălaṯ ywōṯām ben-yərubā‘al: f


Next: Judges (Shoftim) Chapter 10