Sacred Texts  Bible  Index 
Polyglot  KJV  Sep  Vul 

Isaiah (Yisheyah) Index
  Previous  Next 

Tanach (Hebrew): Isaiah (Yisheyah) Chapter 59

1 ‏הֵ֛ן לֹֽא־קָצְרָ֥ה יַד־יְהוָ֖ה מֵֽהוֹשִׁ֑יעַ וְלֹא־כָבְדָ֥ה אָזְנ֖וֹ מִשְּׁמֽוֹעַ׃

2 ‏כִּ֤י אִם־עֲוֹנֹֽתֵיכֶם֙ הָי֣וּ מַבְדִּלִ֔ים בֵּינֵכֶ֕ם לְבֵ֖ין אֱלֹֽהֵיכֶ֑ם וְחַטֹּֽאותֵיכֶ֗ם הִסְתִּ֧ירוּ פָנִ֛ים מִכֶּ֖ם מִשְּׁמֽוֹעַ׃

3 ‏כִּ֤י כַפֵּיכֶם֙ נְגֹאֲל֣וּ בַדָּ֔ם וְאֶצְבְּעוֹתֵיכֶ֖ם בֶּֽעָוֹ֑ן שִׂפְתֽוֹתֵיכֶם֙ דִּבְּרוּ־שֶׁ֔קֶר לְשׁוֹנְכֶ֖ם עַוְלָ֥ה תֶהְגֶּֽה׃

4 ‏אֵין־קֹרֵ֣א בְצֶ֔דֶק וְאֵ֥ין נִשְׁפָּ֖ט בֶּאֱמוּנָ֑ה בָּט֤וֹחַ עַל־תֹּ֙הוּ֙ וְדַבֶּר־שָׁ֔וְא הָר֥וֹ עָמָ֖ל וְהוֹלֵ֥יד אָֽוֶן׃

5 ‏בֵּיצֵ֤י צִפְעוֹנִי֙ בִּקֵּ֔עוּ וְקוּרֵ֥י עַכָּבִ֖ישׁ יֶאֱרֹ֑גוּ הָאֹכֵ֤ל מִבֵּֽיצֵיהֶם֙ יָמ֔וּת וְהַזּוּרֶ֖ה תִּבָּקַ֥ע אֶפְעֶֽה׃

6 ‏קֽוּרֵיהֶם֙ לֹא־יִהְי֣וּ לְבֶ֔גֶד וְלֹ֥א יִתְכַּסּ֖וּ בְּמַֽעֲשֵׂיהֶ֑ם מַֽעֲשֵׂיהֶם֙ מַֽעֲשֵׂי־אָ֔וֶן וּפֹ֥עַל חָמָ֖ס בְּכַפֵּיהֶֽם׃

7 ‏רַגְלֵיהֶם֙ לָרַ֣ע יָרֻ֔צוּ וִֽימַהֲר֔וּ לִשְׁפֹּ֖ךְ דָּ֣ם נָקִ֑י מַחְשְׁבֽוֹתֵיהֶם֙ מַחְשְׁב֣וֹת אָ֔וֶן שֹׁ֥ד וָשֶׁ֖בֶר בִּמְסִלּוֹתָֽם׃

8 ‏דֶּ֤רֶךְ שָׁלוֹם֙ לֹ֣א יָדָ֔עוּ וְאֵ֥ין מִשְׁפָּ֖ט בְּמַעְגְּלוֹתָ֑ם נְתִיבֽוֹתֵיהֶם֙ עִקְּשׁ֣וּ לָהֶ֔ם כֹּ֚ל דֹּרֵ֣ךְ בָּ֔הּ לֹ֥א יָדַ֖ע שָׁלֽוֹם׃

9 ‏עַל־כֵּ֗ן רָחַ֤ק מִשְׁפָּט֙ מִמֶּ֔נּוּ וְלֹ֥א תַשִּׂיגֵ֖נוּ צְדָקָ֑ה נְקַוֶּ֤ה לָאוֹר֙ וְהִנֵּה־חֹ֔שֶׁךְ לִנְגֹה֖וֹת בָּאֲפֵל֥וֹת נְהַלֵּֽךְ׃

10 ‏נְגַֽשְׁשָׁ֤ה כַֽעִוְרִים֙ קִ֔יר וּכְאֵ֥ין עֵינַ֖יִם נְגַשֵּׁ֑שָׁה כָּשַׁ֤לְנוּ בַֽצָּהֳרַ֙יִם֙ כַּנֶּ֔שֶׁף בָּאַשְׁמַנִּ֖ים כַּמֵּתִֽים׃

11 ‏נֶהֱמֶ֤ה כַדֻּבִּים֙ כֻּלָּ֔נוּ וְכַיּוֹנִ֖ים הָגֹ֣ה נֶהְגֶּ֑ה נְקַוֶּ֤ה לַמִּשְׁפָּט֙ וָאַ֔יִן לִֽישׁוּעָ֖ה רָחֲקָ֥ה מִמֶּֽנּוּ׃

12 ‏כִּֽי־רַבּ֤וּ פְשָׁעֵ֙ינוּ֙ נֶגְדֶּ֔ךָ וְחַטֹּאותֵ֖ינוּ עָ֣נְתָה בָּ֑נוּ כִּֽי־פְשָׁעֵ֣ינוּ אִתָּ֔נוּ וַעֲוֹנֹתֵ֖ינוּ יְדַֽעֲנֽוּם׃

13 ‏פָּשֹׁ֤עַ וְכַחֵשׁ֙ בַּֽיהוָ֔ה וְנָס֖וֹג מֵאַחַ֣ר אֱלֹהֵ֑ינוּ דַּבֶּר־עֹ֣שֶׁק וְסָרָ֔ה הֹר֧וֹ וְהֹג֛וֹ מִלֵּ֖ב דִּבְרֵי־שָֽׁקֶר׃

14 ‏וְהֻסַּ֤ג אָחוֹר֙ מִשְׁפָּ֔ט וּצְדָקָ֖ה מֵרָח֣וֹק תַּעֲמֹ֑ד כִּֽי־כָשְׁלָ֤ה בָֽרְחוֹב֙ אֱמֶ֔ת וּנְכֹחָ֖ה לֹא־תוּכַ֥ל לָבֽוֹא׃

15 ‏וַתְּהִ֤י הָֽאֱמֶת֙ נֶעְדֶּ֔רֶת וְסָ֥ר מֵרָ֖ע מִשְׁתּוֹלֵ֑ל וַיַּ֧רְא יְהוָ֛ה וַיֵּ֥רַע בְּעֵינָ֖יו כִּֽי־אֵ֥ין מִשְׁפָּֽט׃

16 ‏וַיַּרְא֙ כִּֽי־אֵ֣ין אִ֔ישׁ וַיִּשְׁתּוֹמֵ֖ם כִּ֣י אֵ֣ין מַפְגִּ֑יעַ וַתּ֤וֹשַֽׁע לוֹ֙ זְרֹע֔וֹ וְצִדְקָת֖וֹ הִ֥יא סְמָכָֽתְהוּ׃

17 ‏וַיִּלְבַּ֤שׁ צְדָקָה֙ כַּשִּׁרְיָ֔ן וְכ֥וֹבַע יְשׁוּעָ֖ה בְּרֹאשׁ֑וֹ וַיִּלְבַּ֞שׁ בִּגְדֵ֤י נָקָם֙ תִּלְבֹּ֔שֶׁת וַיַּ֥עַט כַּמְעִ֖יל קִנְאָֽה׃

18 ‏כְּעַ֤ל גְּמֻלוֹת֙ כְּעַ֣ל יְשַׁלֵּ֔ם חֵמָ֣ה לְצָרָ֔יו גְּמ֖וּל לְאֹֽיְבָ֑יו לָאִיִּ֖ים גְּמ֥וּל יְשַׁלֵּֽם׃

19 ‏וְיִֽירְא֤וּ מִֽמַּעֲרָב֙ אֶת־שֵׁ֣ם יְהוָ֔ה וּמִמִּזְרַח־שֶׁ֖מֶשׁ אֶת־כְּבוֹד֑וֹ כִּֽי־יָב֤וֹא כַנָּהָר֙ צָ֔ר ר֥וּחַ יְהוָ֖ה נֹ֥סְסָה בֽוֹ׃

20 ‏וּבָ֤א לְצִיּוֹן֙ גּוֹאֵ֔ל וּלְשָׁבֵ֥י פֶ֖שַׁע בְּיַֽעֲקֹ֑ב נְאֻ֖ם יְהוָֽה׃

21 ‏וַאֲנִ֗י זֹ֣את בְּרִיתִ֤י אוֹתָם֙ אָמַ֣ר יְהוָ֔ה רוּחִי֙ אֲשֶׁ֣ר עָלֶ֔יךָ וּדְבָרַ֖י אֲשֶׁר־שַׂ֣מְתִּי בְּפִ֑יךָ לֹֽא־יָמ֡וּשׁוּ מִפִּיךָ֩ וּמִפִּ֨י זַרְעֲךָ֜ וּמִפִּ֨י זֶ֤רַע זַרְעֲךָ֙ אָמַ֣ר יְהוָ֔ה מֵעַתָּ֖ה וְעַד־עוֹלָֽם׃ ס

1 hēn lō’-qāṣərâ yaḏ-yəhwâ mēhwōšî‘a wəlō’-ḵāḇəḏâ ’āzənwō miššəmwō‘a:

2 kî ’im-‘ăwōnōṯêḵem hāyû maḇədilîm bênēḵem ləḇên ’ĕlōhêḵem wəḥaṭṭō’wṯêḵem hisətîrû fānîm mikem miššəmwō‘a:

3 kî ḵapêḵem nəḡō’ălû ḇadām wə’eṣəbə‘wōṯêḵem be‘āwōn śifəṯwōṯêḵem dibərû-šeqer ləšwōnəḵem ‘awəlâ ṯehəgeh:

4 ’ên-qōrē’ ḇəṣeḏeq wə’ên nišəpāṭ be’ĕmûnâ bāṭwōḥa ‘al-tōhû wəḏaber-šāwə’ hārwō ‘āmāl wəhwōlêḏ ’āwen:

5 bêṣê ṣifə‘wōnî biqqē‘û wəqûrê ‘akāḇîš ye’ĕrōḡû hā’ōḵēl mibêṣêhem yāmûṯ wəhazzûreh tibāqa‘ ’efə‘eh:

6 qûrêhem lō’-yihəyû ləḇeḡeḏ wəlō’ yiṯəkassû bəma‘ăśêhem ma‘ăśêhem ma‘ăśê-’āwen ûfō‘al ḥāmās bəḵapêhem:

7 raḡəlêhem lāra‘ yāruṣû wîmahărû lišəpōḵə dām nāqî maḥəšəḇwōṯêhem maḥəšəḇwōṯ ’āwen šōḏ wāšeḇer biməsillwōṯām:

8 dereḵə šālwōm lō’ yāḏā‘û wə’ên mišəpāṭ bəma‘əgəlwōṯām nəṯîḇwōṯêhem ‘iqqəšû lâem kōl dōrēḵə bāh lō’ yāḏa‘ šālwōm:

9 ‘al-kēn rāḥaq mišəpāṭ mimmennû wəlō’ ṯaśśîḡēnû ṣəḏāqâ nəqaûeh lā’wōr wəhinnēh-ḥōšeḵə linəḡōhwōṯ bā’ăfēlwōṯ nəhallēḵə:

10 nəḡašəšâ ḵa‘iwərîm qîr ûḵə’ên ‘ênayim nəḡaššēšâ kāšalənû ḇaṣṣâŏrayim kannešef bā’ašəmannîm kammēṯîm:

11 nehĕmeh ḵadubîm kullānû wəḵayywōnîm hāḡōh nehəgeh nəqaûeh lammišəpāṭ wā’ayin lîšû‘â rāḥăqâ mimmennû:

12 kî-rabû fəšā‘ênû neḡədeḵā wəḥaṭṭō’wṯênû ‘ānəṯâ bānû kî-fəšā‘ênû ’itānû wa‘ăwōnōṯênû yəḏa‘ănûm:

13 pāšō‘a wəḵaḥēš bayhwâ wənāswōḡ mē’aḥar ’ĕlōhênû daber-‘ōšeq wəsārâ hōrwō wəhōḡwō millēḇ diḇərê-šāqer:

14 wəhussaḡ ’āḥwōr mišəpāṭ ûṣəḏāqâ mērāḥwōq ta‘ămōḏ kî-ḵāšəlâ ḇārəḥwōḇ ’ĕmeṯ ûnəḵōḥâ lō’-ṯûḵal lāḇwō’:

15 watəhî hā’ĕmeṯ ne‘ədereṯ wəsār mērā‘ mišətwōlēl wayyarə’ yəhwâ wayyēra‘ bə‘ênāyw kî-’ên mišəpāṭ:

16 wayyarə’ kî-’ên ’îš wayyišətwōmēm kî ’ên mafəgî‘a watwōša‘ lwō zərō‘wō wəṣiḏəqāṯwō hî’ səmāḵāṯəhû:

17 wayyiləbaš ṣəḏāqâ kašširəyān wəḵwōḇa‘ yəšû‘â bərō’šwō wayyiləbaš biḡəḏê nāqām tiləbōšeṯ wayya‘aṭ kamə‘îl qinə’â:

18 kə‘al gəmulwōṯ kə‘al yəšallēm ḥēmâ ləṣārāyw gəmûl lə’ōyəḇāyw lā’îyîm gəmûl yəšallēm:

19 wəyîrə’û mimma‘ărāḇ ’eṯ-šēm yəhwâ ûmimmizəraḥ-šemeš ’eṯ-kəḇwōḏwō kî-yāḇwō’ ḵannâār ṣār rûḥa yəhwâ nōsəsâ ḇwō:

20 ûḇā’ ləṣîywōn gwō’ēl ûləšāḇê feša‘ bəya‘ăqōḇ nə’um yəhwâ:

21 wa’ănî zō’ṯ bərîṯî ’wōṯām ’āmar yəhwâ rûḥî ’ăšer ‘āleyḵā ûḏəḇāray ’ăšer-śamətî bəfîḵā lō’-yāmûšû mipîḵā ûmipî zarə‘ăḵā ûmipî zera‘ zarə‘ăḵā ’āmar yəhwâ mē‘atâ wə‘aḏ-‘wōlām: s


Next: Isaiah (Yisheyah) Chapter 60