‎1 ‏קִרְב֤וּ גוֹיִם֙ לִשְׁמֹ֔עַ וּלְאֻמִּ֖ים הַקְשִׁ֑יבוּ תִּשְׁמַ֤ע הָאָ֙רֶץ֙ וּמְלֹאָ֔הּ תֵּבֵ֖ל וְכָל־צֶאֱצָאֶֽיהָ׃

‎2 ‏כִּ֣י קֶ֤צֶף לַֽיהוָה֙ עַל־כָּל־הַגּוֹיִ֔ם וְחֵמָ֖ה עַל־כָּל־צְבָאָ֑ם הֶחֱרִימָ֖ם נְתָנָ֥ם לַטָּֽבַח׃

‎3 ‏וְחַלְלֵיהֶ֣ם יֻשְׁלָ֔כוּ וּפִגְרֵיהֶ֖ם יַעֲלֶ֣ה בָאְשָׁ֑ם וְנָמַ֥סּוּ הָרִ֖ים מִדָּמָֽם׃

‎4 ‏וְנָמַ֙קּוּ֙ כָּל־צְבָ֣א הַשָּׁמַ֔יִם וְנָגֹ֥לּוּ כַסֵּ֖פֶר הַשָּׁמָ֑יִם וְכָל־צְבָאָ֣ם יִבּ֔וֹל כִּנְבֹ֤ל עָלֶה֙ מִגֶּ֔פֶן וּכְנֹבֶ֖לֶת מִתְּאֵנָֽה׃

‎5 ‏כִּֽי־רִוְּתָ֥ה בַשָּׁמַ֖יִם חַרְבִּ֑י הִנֵּה֙ עַל־אֱד֣וֹם תֵּרֵ֔ד וְעַל־עַ֥ם חֶרְמִ֖י לְמִשְׁפָּֽט׃

‎6 ‏חֶ֣רֶב לַיהוָ֞ה מָלְאָ֥ה דָם֙ הֻדַּ֣שְׁנָה מֵחֵ֔לֶב מִדַּ֤ם כָּרִים֙ וְעַתּוּדִ֔ים מֵחֵ֖לֶב כִּלְי֣וֹת אֵילִ֑ים כִּ֣י זֶ֤בַח לַֽיהוָה֙ בְּבָצְרָ֔ה וְטֶ֥בַח גָּד֖וֹל בְּאֶ֥רֶץ אֱדֽוֹם׃

‎7 ‏וְיָרְד֤וּ רְאֵמִים֙ עִמָּ֔ם וּפָרִ֖ים עִם־אַבִּירִ֑ים וְרִוְּתָ֤ה אַרְצָם֙ מִדָּ֔ם וַעֲפָרָ֖ם מֵחֵ֥לֶב יְדֻשָּֽׁן׃

‎8 ‏כִּ֛י י֥וֹם נָקָ֖ם לַֽיהוָ֑ה שְׁנַ֥ת שִׁלּוּמִ֖ים לְרִ֥יב צִיּֽוֹן׃

‎9 ‏וְנֶהֶפְכ֤וּ נְחָלֶ֙יהָ֙ לְזֶ֔פֶת וַעֲפָרָ֖הּ לְגָפְרִ֑ית וְהָיְתָ֣ה אַרְצָ֔הּ לְזֶ֖פֶת בֹּעֵרָֽה׃

‎10 ‏לַ֤יְלָה וְיוֹמָם֙ לֹ֣א תִכְבֶּ֔ה לְעוֹלָ֖ם יַעֲלֶ֣ה עֲשָׁנָ֑הּ מִדּ֤וֹר לָדוֹר֙ תֶּחֱרָ֔ב לְנֵ֣צַח נְצָחִ֔ים אֵ֥ין עֹבֵ֖ר בָּֽהּ׃

‎11 ‏וִירֵשׁ֙וּהָ֙ קָאַ֣ת וְקִפּ֔וֹד וְיַנְשׁ֥וֹף וְעֹרֵ֖ב יִשְׁכְּנוּ־בָ֑הּ וְנָטָ֥ה עָלֶ֛יהָ קַֽו־תֹ֖הוּ וְאַבְנֵי־בֹֽהוּ׃

‎12 ‏חֹרֶ֥יהָ וְאֵֽין־שָׁ֖ם מְלוּכָ֣ה יִקְרָ֑אוּ וְכָל־שָׂרֶ֖יהָ יִ֥הְיוּ אָֽפֶס׃

‎13 ‏וְעָלְתָ֤ה אַרְמְנֹתֶ֙יהָ֙ סִירִ֔ים קִמּ֥וֹשׂ וָח֖וֹחַ בְּמִבְצָרֶ֑יהָ וְהָיְתָה֙ נְוֵ֣ה תַנִּ֔ים חָצִ֖יר לִבְנ֥וֹת יַעֲנָֽה׃

‎14 ‏וּפָגְשׁ֤וּ צִיִּים֙ אֶת־אִיִּ֔ים וְשָׂעִ֖יר עַל־רֵעֵ֣הוּ יִקְרָ֑א אַךְ־שָׁם֙ הִרְגִּ֣יעָה לִּילִ֔ית וּמָצְאָ֥ה לָ֖הּ מָנֽוֹחַ׃

‎15 ‏שָׁ֣מָּה קִנְּנָ֤ה קִפּוֹז֙ וַתְּמַלֵּ֔ט וּבָקְעָ֖ה וְדָגְרָ֣ה בְצִלָּ֑הּ אַךְ־שָׁ֛ם נִקְבְּצ֥וּ דַיּ֖וֹת אִשָּׁ֥ה רְעוּתָֽהּ׃

‎16 ‏דִּרְשׁ֨וּ מֵֽעַל־סֵ֤פֶר יְהוָה֙ וּֽקְרָ֔אוּ אַחַ֤ת מֵהֵ֙נָּה֙ לֹ֣א נֶעְדָּ֔רָה אִשָּׁ֥ה רְעוּתָ֖הּ לֹ֣א פָקָ֑דוּ כִּֽי־פִי֙ ה֣וּא צִוָּ֔ה וְרוּח֖וֹ ה֥וּא קִבְּצָֽן׃

‎17 ‏וְהֽוּא־הִפִּ֤יל לָהֶן֙ גּוֹרָ֔ל וְיָד֛וֹ חִלְּקַ֥תָּה לָהֶ֖ם בַּקָּ֑ו עַד־עוֹלָם֙ יִֽירָשׁ֔וּהָ לְד֥וֹר וָד֖וֹר יִשְׁכְּנוּ־בָֽהּ׃ ס

1 qirəḇû ḡwōyim lišəmō‘a ûlə’ummîm haqəšîḇû tišəm^a‘ hā’āreṣ ûməlō’āh tēḇēl wəḵāl-ṣe’ĕṣā’eyhā:

2 kî qeṣef layhwâ ‘al-kāl-hagwōyim wəḥēmâ ‘al-kāl-ṣəḇā’ām heḥĕrîmām nəṯānām laṭṭāḇ^aḥ:

3 wəḥaləlêhem yušəlāḵû ûfiḡərêhem y^a‘ăleh ḇā’əšām wənāmassû hārîm midāmām:

4 wənāmaqqû kāl-ṣəḇā’ haššāmayim wənāḡōllû ḵassēfer haššāmāyim wəḵāl-ṣəḇā’ām yibwōl kinəḇōl ‘āleh migefen ûḵənōḇeleṯ mitə’ēnâ:

5 kî-riûəṯâ ḇaššāmayim ḥarəbî hinnēh ‘al-’ĕḏwōm tērēḏ wə‘al-‘am ḥerəmî ləmišəpāṭ:

6 ḥereḇ layhwâ mālə’â ḏām hudašənâ mēḥēleḇ midam kārîm wə‘atûḏîm mēḥēleḇ kiləywōṯ ’êlîm kî zeḇ^aḥ layhwâ bəḇāṣərâ wəṭeḇ^aḥ gāḏwōl bə’ereṣ ’ĕḏwōm:

7 wəyārəḏû rə’ēmîm ‘immām ûfārîm ‘im-’abîrîm wəriûəṯâ ’arəṣām midām w^a‘ăfārām mēḥēleḇ yəḏuššān:

8 kî ywōm nāqām layhwâ šənaṯ šillûmîm lərîḇ ṣîywōn:

9 wənehefəḵû nəḥāleyhā ləzefeṯ w^a‘ăfārāh ləḡāfərîṯ wəhāyəṯâ ’arəṣāh ləzefeṯ bō‘ērâ:

10 layəlâ wəywōmām lō’ ṯiḵəbeh lə‘wōlām y^a‘ăleh ‘ăšānāh midwōr lāḏwōr teḥĕrāḇ lənēṣ^aḥ nəṣāḥîm ’ên ‘ōḇēr bāh:

11 wîrēšûhā qā’aṯ wəqipwōḏ wəyanəšwōf wə‘ōrēḇ yišəkənû-ḇāh wənāṭâ ‘āleyhā qaw-ṯōhû wə’aḇənê-ḇōhû:

12 ḥōreyhā wə’ên-šām məlûḵâ yiqərā’û wəḵāl-śāreyhā yihəyû ’āfes:

13 wə‘āləṯâ ’arəmənōṯeyhā sîrîm qimmwōś wāḥwōḥa bəmiḇəṣāreyhā wəhāyəṯâ nəwēh ṯannîm ḥāṣîr liḇənwōṯ y^a‘ănâ:

14 ûfāḡəšû ṣîyîm ’eṯ-’îyîm wəśā‘îr ‘al-rē‘ēhû yiqərā’ ’aḵə-šām hirəgî‘â llîlîṯ ûmāṣə’â lāh mānwōḥa:

15 šāmmâ qinnənâ qipwōz watəmallēṭ ûḇāqə‘â wəḏāḡərâ ḇəṣillāh ’aḵə-šām niqəbəṣû ḏayywōṯ ’iššâ rə‘ûṯāh:

16 dirəšû mē‘al-sēfer yəhwâ ûqərā’û ’^aḥaṯ mēhēnnâ lō’ ne‘ədārâ ’iššâ rə‘ûṯāh lō’ fāqāḏû kî-fî hû’ ṣiûâ wərûḥwō hû’ qibəṣān:

17 wəhû’-hipîl lâen gwōrāl wəyāḏwō ḥilləqatâ lâem baqqāw ‘aḏ-‘wōlām yîrāšûhā ləḏwōr wāḏwōr yišəkənû-ḇāh: s