‎1 ‏ה֚וֹי אֲרִיאֵ֣ל אֲרִיאֵ֔ל קִרְיַ֖ת חָנָ֣ה דָוִ֑ד סְפ֥וּ שָׁנָ֛ה עַל־שָׁנָ֖ה חַגִּ֥ים יִנְקֹֽפוּ׃

‎2 ‏וַהֲצִיק֖וֹתִי לַֽאֲרִיאֵ֑ל וְהָיְתָ֤ה תַֽאֲנִיָּה֙ וַֽאֲנִיָּ֔ה וְהָ֥יְתָה לִּ֖י כַּאֲרִיאֵֽל׃

‎3 ‏וְחָנִ֥יתִי כַדּ֖וּר עָלָ֑יִךְ וְצַרְתִּ֤י עָלַ֙יִךְ֙ מֻצָּ֔ב וַהֲקִֽימֹתִ֥י עָלַ֖יִךְ מְצֻרֹֽת׃

‎4 ‏וְשָׁפַלְתְּ֙ מֵאֶ֣רֶץ תְּדַבֵּ֔רִי וּמֵֽעָפָ֖ר תִּשַּׁ֣ח אִמְרָתֵ֑ךְ וְֽ֠הָיָה כְּא֤וֹב מֵאֶ֙רֶץ֙ קוֹלֵ֔ךְ וּמֵעָפָ֖ר אִמְרָתֵ֥ךְ תְּצַפְצֵֽף׃

‎5 ‏וְהָיָ֛ה כְּאָבָ֥ק דַּ֖ק הֲמ֣וֹן זָרָ֑יִךְ וּכְמֹ֤ץ עֹבֵר֙ הֲמ֣וֹן עָֽרִיצִ֔ים וְהָיָ֖ה לְפֶ֥תַע פִּתְאֹֽם׃

‎6 ‏מֵעִ֨ם יְהוָ֤ה צְבָאוֹת֙ תִּפָּקֵ֔ד בְּרַ֥עַם וּבְרַ֖עַשׁ וְק֣וֹל גָּד֑וֹל סוּפָה֙ וּסְעָרָ֔ה וְלַ֖הַב אֵ֥שׁ אוֹכֵלָֽה׃

‎7 ‏וְהָיָ֗ה כַּֽחֲלוֹם֙ חֲז֣וֹן לַ֔יְלָה הֲמוֹן֙ כָּל־הַגּוֹיִ֔ם הַצֹּבְאִ֖ים עַל־אֲרִיאֵ֑ל וְכָל־צֹבֶ֙יהָ֙ וּמְצֹ֣דָתָ֔הּ וְהַמְּצִיקִ֖ים לָֽהּ׃

‎8 ‏וְהָיָ֡ה כַּאֲשֶׁר֩ יַחֲלֹ֨ם הָרָעֵ֜ב וְהִנֵּ֣ה אוֹכֵ֗ל וְהֵקִיץ֮ וְרֵיקָ֣ה נַפְשׁוֹ֒ וְכַאֲשֶׁ֨ר יַחֲלֹ֤ם הַצָּמֵא֙ וְהִנֵּ֣ה שֹׁתֶ֔ה וְהֵקִיץ֙ וְהִנֵּ֣ה עָיֵ֔ף וְנַפְשׁ֖וֹ שׁוֹקֵקָ֑ה כֵּ֣ן יִֽהְיֶ֗ה הֲמוֹן֙ כָּל־הַגּוֹיִ֔ם הַצֹּבְאִ֖ים עַל־הַ֥ר צִיּֽוֹן׃ ס

‎9 ‏הִתְמַהְמְה֣וּ וּתְמָ֔הוּ הִשְׁתַּֽעַשְׁע֖וּ וָשֹׁ֑עוּ שָֽׁכְר֣וּ וְלֹא־יַ֔יִן נָע֖וּ וְלֹ֥א שֵׁכָֽר׃

‎10 ‏כִּֽי־נָסַ֨ךְ עֲלֵיכֶ֤ם יְהוָה֙ ר֣וּחַ תַּרְדֵּמָ֔ה וַיְעַצֵּ֖ם אֶת־עֵֽינֵיכֶ֑ם אֶת־הַנְּבִיאִ֛ים וְאֶת־רָאשֵׁיכֶ֥ם הַחֹזִ֖ים כִּסָּֽה׃

‎11 ‏וַתְּהִ֨י לָכֶ֜ם חָז֣וּת הַכֹּ֗ל כְּדִבְרֵי֮ הַסֵּ֣פֶר הֶֽחָתוּם֒ אֲשֶֽׁר־יִתְּנ֣וּ אֹת֗וֹ אֶל־יוֹדֵ֥עַ הספר סֵ֛פֶר לֵאמֹ֖ר קְרָ֣א נָא־זֶ֑ה וְאָמַר֙ לֹ֣א אוּכַ֔ל כִּ֥י חָת֖וּם הֽוּא׃

‎12 ‏וְנִתַּ֣ן הַסֵּ֗פֶר עַל֩ אֲשֶׁ֨ר לֹֽא־יָדַ֥ע סֵ֛פֶר לֵאמֹ֖ר קְרָ֣א נָא־זֶ֑ה וְאָמַ֕ר לֹ֥א יָדַ֖עְתִּי סֵֽפֶר׃ ס

‎13 ‏וַיֹּ֣אמֶר אֲדֹנָ֗י יַ֚עַן כִּ֤י נִגַּשׁ֙ הָעָ֣ם הַזֶּ֔ה בְּפִ֤יו וּבִשְׂפָתָיו֙ כִּבְּד֔וּנִי וְלִבּ֖וֹ רִחַ֣ק מִמֶּ֑נִּי וַתְּהִ֤י יִרְאָתָם֙ אֹתִ֔י מִצְוַ֥ת אֲנָשִׁ֖ים מְלֻמָּדָֽה׃

‎14 ‏לָכֵ֗ן הִנְנִ֥י יוֹסִ֛ף לְהַפְלִ֥יא אֶת־הָֽעָם־הַזֶּ֖ה הַפְלֵ֣א וָפֶ֑לֶא וְאָֽבְדָה֙ חָכְמַ֣ת חֲכָמָ֔יו וּבִינַ֥ת נְבֹנָ֖יו תִּסְתַּתָּֽר׃ ס

‎15 ‏ה֛וֹי הַמַּעֲמִיקִ֥ים מֵֽיהוָ֖ה לַסְתִּ֣ר עֵצָ֑ה וְהָיָ֤ה בְמַחְשָׁךְ֙ מַֽעֲשֵׂיהֶ֔ם וַיֹּ֣אמְר֔וּ מִ֥י רֹאֵ֖נוּ וּמִ֥י יוֹדְעֵֽנוּ׃

‎16 ‏הַ֨פְכְּכֶ֔ם אִם־כְּחֹ֥מֶר הַיֹּצֵ֖ר יֵֽחָשֵׁ֑ב כִּֽי־יֹאמַ֨ר מַעֲשֶׂ֤ה לְעֹשֵׂ֙הוּ֙ לֹ֣א עָשָׂ֔נִי וְיֵ֛צֶר אָמַ֥ר לְיוֹצְר֖וֹ לֹ֥א הֵבִֽין׃

‎17 ‏הֲלוֹא־עוֹד֙ מְעַ֣ט מִזְעָ֔ר וְשָׁ֥ב לְבָנ֖וֹן לַכַּרְמֶ֑ל וְהַכַּרְמֶ֖ל לַיַּ֥עַר יֵחָשֵֽׁב׃

‎18 ‏וְשָׁמְע֧וּ בַיּוֹם־הַה֛וּא הַחֵרְשִׁ֖ים דִּבְרֵי־סֵ֑פֶר וּמֵאֹ֣פֶל וּמֵחֹ֔שֶׁךְ עֵינֵ֥י עִוְרִ֖ים תִּרְאֶֽינָה׃

‎19 ‏וְיָסְפ֧וּ עֲנָוִ֛ים בַּֽיהוָ֖ה שִׂמְחָ֑ה וְאֶבְיוֹנֵ֣י אָדָ֔ם בִּקְד֥וֹשׁ יִשְׂרָאֵ֖ל יָגִֽילוּ׃

‎20 ‏כִּֽי־אָפֵ֥ס עָרִ֖יץ וְכָ֣לָה לֵ֑ץ וְנִכְרְת֖וּ כָּל־שֹׁ֥קְדֵי אָֽוֶן׃

‎21 ‏מַחֲטִיאֵ֤י אָדָם֙ בְּדָבָ֔ר וְלַמּוֹכִ֥יחַ בַּשַּׁ֖עַר יְקֹשׁ֑וּן וַיַּטּ֥וּ בַתֹּ֖הוּ צַדִּֽיק׃ ס

‎22 ‏לָכֵ֗ן כֹּֽה־אָמַ֤ר יְהוָה֙ אֶל־בֵּ֣ית יַֽעֲקֹ֔ב אֲשֶׁ֥ר פָּדָ֖ה אֶת־אַבְרָהָ֑ם לֹֽא־עַתָּ֤ה יֵבוֹשׁ֙ יַֽעֲקֹ֔ב וְלֹ֥א עַתָּ֖ה פָּנָ֥יו יֶחֱוָֽרוּ׃

‎23 ‏כִּ֣י בִ֠רְאֹתוֹ יְלָדָ֞יו מַעֲשֵׂ֥ה יָדַ֛י בְּקִרְבּ֖וֹ יַקְדִּ֣ישֽׁוּ שְׁמִ֑י וְהִקְדִּ֙ישׁוּ֙ אֶת־קְד֣וֹשׁ יַֽעֲקֹ֔ב וְאֶת־אֱלֹהֵ֥י יִשְׂרָאֵ֖ל יַעֲרִֽיצוּ׃

‎24 ‏וְיָדְע֥וּ תֹֽעֵי־ר֖וּחַ בִּינָ֑ה וְרוֹגְנִ֖ים יִלְמְדוּ־לֶֽקַח׃

1 hwōy ’ărî’ēl ’ărî’ēl qirəyaṯ ḥānâ ḏāwiḏ səfû šānâ ‘al-šānâ ḥagîm yinəqōfû:

2 wahăṣîqwōṯî la’ărî’ēl wəhāyəṯâ ṯa’ănîyâ wa’ănîyâ wəhāyəṯâ llî ka’ărî’ēl:

3 wəḥānîṯî ḵadûr ‘ālāyiḵə wəṣarətî ‘ālayiḵə muṣṣāḇ wahăqîmōṯî ‘ālayiḵə məṣurōṯ:

4 wəšāfalətə mē’ereṣ təḏabērî ûmē‘āfār tišš^aḥ ’imərāṯēḵə wəhāyâ kə’wōḇ mē’ereṣ qwōlēḵə ûmē‘āfār ’imərāṯēḵə təṣafəṣēf:

5 wəhāyâ kə’āḇāq daq hămwōn zārāyiḵə ûḵəmōṣ ‘ōḇēr hămwōn ‘ārîṣîm wəhāyâ ləfeṯ^a‘ piṯə’ōm:

6 mē‘im yəhwâ ṣəḇā’wōṯ tipāqēḏ bər^a‘am ûḇər^a‘aš wəqwōl gāḏwōl sûfâ ûsə‘ārâ wəlahaḇ ’ēš ’wōḵēlâ:

7 wəhāyâ k^aḥălwōm ḥăzwōn layəlâ hămwōn kāl-hagwōyim haṣṣōḇə’îm ‘al-’ărî’ēl wəḵāl-ṣōḇeyhā ûməṣōḏāṯāh wəhamməṣîqîm lāh:

8 wəhāyâ ka’ăšer y^aḥălōm hārā‘ēḇ wəhinnēh ’wōḵēl wəhēqîṣ wərêqâ nafəšwō wəḵa’ăšer y^aḥălōm haṣṣāmē’ wəhinnēh šōṯeh wəhēqîṣ wəhinnēh ‘āyēf wənafəšwō šwōqēqâ kēn yihəyeh hămwōn kāl-hagwōyim haṣṣōḇə’îm ‘al-har ṣîywōn: s

9 hiṯəmahəməhû ûṯəmâû hišət^a‘ašə‘û wāšō‘û šāḵərû wəlō’-yayin nā‘û wəlō’ šēḵār:

10 kî-nāsaḵə ‘ălêḵem yəhwâ rûḥa tarədēmâ wayə‘aṣṣēm ’eṯ-‘ênêḵem ’eṯ-hannəḇî’îm wə’eṯ-rā’šêḵem h^aḥōzîm kissâ:

11 watəhî lāḵem ḥāzûṯ hakōl kəḏiḇərê hassēfer heḥāṯûm ’ăšer-yitənû ’ōṯwō ’el-ywōḏē‘a hassēfer sēfer lē’mōr qərā’ nā’-zeh wə’āmar lō’ ’ûḵal kî ḥāṯûm hû’:

12 wənitan hassēfer ‘al ’ăšer lō’-yāḏ^a‘ sēfer lē’mōr qərā’ nā’-zeh wə’āmar lō’ yāḏ^a‘ətî sēfer: s

13 wayyō’mer ’ăḏōnāy y^a‘an kî nigaš hā‘ām hazzeh bəfîw ûḇiśəfāṯāyw kibəḏûnî wəlibwō riḥaq mimmennî watəhî yirə’āṯām ’ōṯî miṣəwaṯ ’ănāšîm məlummāḏâ:

14 lāḵēn hinənî ywōsif ləhafəlî’ ’eṯ-hā‘ām-hazzeh hafəlē’ wāfele’ wə’āḇəḏâ ḥāḵəmaṯ ḥăḵāmāyw ûḇînaṯ nəḇōnāyw tisətatār: s

15 hwōy hamm^a‘ămîqîm mêhwâ lasətir ‘ēṣâ wəhāyâ ḇəm^aḥəšāḵə m^a‘ăśêhem wayyō’mərû mî rō’ēnû ûmî ywōḏə‘ēnû:

16 hafəkəḵem ’im-kəḥōmer hayyōṣēr yēḥāšēḇ kî-yō’mar m^a‘ăśeh lə‘ōśēhû lō’ ‘āśānî wəyēṣer ’āmar ləywōṣərwō lō’ hēḇîn:

17 hălwō’-‘wōḏ mə‘aṭ mizə‘ār wəšāḇ ləḇānwōn lakarəmel wəhakarəmel layy^a‘ar yēḥāšēḇ:

18 wəšāmə‘û ḇayywōm-hahû’ h^aḥērəšîm diḇərê-sēfer ûmē’ōfel ûmēḥōšeḵə ‘ênê ‘iwərîm tirə’eynâ:

19 wəyāsəfû ‘ănāwîm bayhwâ śiməḥâ wə’eḇəywōnê ’āḏām biqəḏwōš yiśərā’ēl yāḡîlû:

20 kî-’āfēs ‘ārîṣ wəḵālâ lēṣ wəniḵərəṯû kāl-šōqəḏê ’āwen:

21 m^aḥăṭî’ê ’āḏām bəḏāḇār wəlammwōḵîḥa bašš^a‘ar yəqōšûn wayyaṭṭû ḇatōhû ṣadîq: s

22 lāḵēn kōh-’āmar yəhwâ ’el-bêṯ y^a‘ăqōḇ ’ăšer pāḏâ ’eṯ-’aḇərâām lō’-‘atâ yēḇwōš y^a‘ăqōḇ wəlō’ ‘atâ pānāyw yeḥĕwārû:

23 kî ḇirə’ōṯwō yəlāḏāyw m^a‘ăśēh yāḏay bəqirəbwō yaqədîšû šəmî wəhiqədîšû ’eṯ-qəḏwōš y^a‘ăqōḇ wə’eṯ-’ĕlōhê yiśərā’ēl y^a‘ărîṣû:

24 wəyāḏə‘û ṯō‘ê-rûḥa bînâ wərwōḡənîm yiləməḏû-leq^aḥ: