Sacred Texts  Bible  Index 
Polyglot  KJV  Sep  Vul 

Isaiah (Yisheyah) Index
  Previous  Next 

Tanach (Hebrew): Isaiah (Yisheyah) Chapter 8

1 ‏וַיֹּ֤אמֶר יְהוָה֙ אֵלַ֔י קַח־לְךָ֖ גִּלָּי֣וֹן גָּד֑וֹל וּכְתֹ֤ב עָלָיו֙ בְּחֶ֣רֶט אֱנ֔וֹשׁ לְמַהֵ֥ר שָׁלָ֖ל חָ֥שׁ בַּֽז׃

2 ‏וְאָעִ֣ידָה לִּ֔י עֵדִ֖ים נֶאֱמָנִ֑ים אֵ֚ת אוּרִיָּ֣ה הַכֹּהֵ֔ן וְאֶת־זְכַרְיָ֖הוּ בֶּ֥ן יְבֶרֶכְיָֽהוּ׃

3 ‏וָאֶקְרַב֙ אֶל־הַנְּבִיאָ֔ה וַתַּ֖הַר וַתֵּ֣לֶד בֵּ֑ן וַיֹּ֤אמֶר יְהוָה֙ אֵלַ֔י קְרָ֣א שְׁמ֔וֹ מַהֵ֥ר שָׁלָ֖ל חָ֥שׁ בַּֽז׃

4 ‏כִּ֗י בְּטֶ֙רֶם֙ יֵדַ֣ע הַנַּ֔עַר קְרֹ֖א אָבִ֣י וְאִמִּ֑י יִשָּׂ֣א׀ אֶת־חֵ֣יל דַּמֶּ֗שֶׂק וְאֵת֙ שְׁלַ֣ל שֹׁמְר֔וֹן לִפְנֵ֖י מֶ֥לֶךְ אַשּֽׁוּר׃ ס

5 ‏וַיֹּ֣סֶף יְהוָ֔ה דַּבֵּ֥ר אֵלַ֛י ע֖וֹד לֵאמֹֽר׃

6 ‏יַ֗עַן כִּ֤י מָאַס֙ הָעָ֣ם הַזֶּ֔ה אֵ֚ת מֵ֣י הַשִּׁלֹ֔חַ הַהֹלְכִ֖ים לְאַ֑ט וּמְשׂ֥וֹשׂ אֶת־רְצִ֖ין וּבֶן־רְמַלְיָֽהוּ׃

7 ‏וְלָכֵ֡ן הִנֵּ֣ה אֲדֹנָי֩ מַעֲלֶ֨ה עֲלֵיהֶ֜ם אֶת־מֵ֣י הַנָּהָ֗ר הָעֲצוּמִים֙ וְהָ֣רַבִּ֔ים אֶת־מֶ֥לֶךְ אַשּׁ֖וּר וְאֶת־כָּל־כְּבוֹד֑וֹ וְעָלָה֙ עַל־כָּל־אֲפִיקָ֔יו וְהָלַ֖ךְ עַל־כָּל־גְּדוֹתָֽיו׃

8 ‏וְחָלַ֤ף בִּֽיהוּדָה֙ שָׁטַ֣ף וְעָבַ֔ר עַד־צַוָּ֖אר יַגִּ֑יעַ וְהָיָה֙ מֻטּ֣וֹת כְּנָפָ֔יו מְלֹ֥א רֹֽחַב־אַרְצְךָ֖ עִמָּ֥נוּ אֵֽל׃ ס

9 ‏רֹ֤עוּ עַמִּים֙ וָחֹ֔תּוּ וְהַֽאֲזִ֔ינוּ כֹּ֖ל מֶרְחַקֵּי־אָ֑רֶץ הִתְאַזְּר֣וּ וָחֹ֔תּוּ הִֽתְאַזְּר֖וּ וָחֹֽתּוּ׃

10 ‏עֻ֥צוּ עֵצָ֖ה וְתֻפָ֑ר דַּבְּר֤וּ דָבָר֙ וְלֹ֣א יָק֔וּם כִּ֥י עִמָּ֖נוּ אֵֽל׃ ס

11 ‏כִּי֩ כֹ֨ה אָמַ֧ר יְהוָ֛ה אֵלַ֖י כְּחֶזְקַ֣ת הַיָּ֑ד וְיִסְּרֵ֕נִי מִלֶּ֛כֶת בְּדֶ֥רֶךְ הָֽעָם־הַזֶּ֖ה לֵאמֹֽר׃

12 ‏לֹא־תֹאמְר֣וּן קֶ֔שֶׁר לְכֹ֧ל אֲשֶׁר־יֹאמַ֛ר הָעָ֥ם הַזֶּ֖ה קָ֑שֶׁר וְאֶת־מוֹרָא֥וֹ לֹֽא־תִֽירְא֖וּ וְלֹ֥א תַעֲרִֽיצוּ׃

13 ‏אֶת־יְהוָ֥ה צְבָא֖וֹת אֹת֣וֹ תַקְדִּ֑ישׁוּ וְה֥וּא מוֹרַאֲכֶ֖ם וְה֥וּא מַֽעֲרִֽצְכֶֽם׃

14 ‏וְהָיָ֖ה לְמִקְדָּ֑שׁ וּלְאֶ֣בֶן נֶ֠גֶף וּלְצ֨וּר מִכְשׁ֜וֹל לִשְׁנֵ֨י בָתֵּ֤י יִשְׂרָאֵל֙ לְפַ֣ח וּלְמוֹקֵ֔שׁ לְיוֹשֵׁ֖ב יְרוּשָׁלִָֽם׃

15 ‏וְכָ֥שְׁלוּ בָ֖ם רַבִּ֑ים וְנָפְל֣וּ וְנִשְׁבָּ֔רוּ וְנוֹקְשׁ֖וּ וְנִלְכָּֽדוּ׃ ס

16 ‏צ֖וֹר תְּעוּדָ֑ה חֲת֥וֹם תּוֹרָ֖ה בְּלִמֻּדָֽי׃

17 ‏וְחִכִּ֙יתִי֙ לַיהוָ֔ה הַמַּסְתִּ֥יר פָּנָ֖יו מִבֵּ֣ית יַעֲקֹ֑ב וְקִוֵּ֖יתִֽי־לֽוֹ׃

18 ‏הִנֵּ֣ה אָנֹכִ֗י וְהַיְלָדִים֙ אֲשֶׁ֣ר נָֽתַן־לִ֣י יְהוָ֔ה לְאֹת֥וֹת וּלְמוֹפְתִ֖ים בְּיִשְׂרָאֵ֑ל מֵעִם֙ יְהוָ֣ה צְבָא֔וֹת הַשֹּׁכֵ֖ן בְּהַ֥ר צִיּֽוֹן׃ ס

19 ‏וְכִֽי־יֹאמְר֣וּ אֲלֵיכֶ֗ם דִּרְשׁ֤וּ אֶל־הָאֹבוֹת֙ וְאֶל־הַיִּדְּעֹנִ֔ים הַֽמְצַפְצְפִ֖ים וְהַמַּהְגִּ֑ים הֲלוֹא־עַם֙ אֶל־אֱלֹהָ֣יו יִדְרֹ֔שׁ בְּעַ֥ד הַחַיִּ֖ים אֶל־הַמֵּתִֽים׃

20 ‏לְתוֹרָ֖ה וְלִתְעוּדָ֑ה אִם־לֹ֤א יֹֽאמְרוּ֙ כַּדָּבָ֣ר הַזֶּ֔ה אֲשֶׁ֥ר אֵֽין־ל֖וֹ שָֽׁחַר׃

21 ‏וְעָ֥בַר בָּ֖הּ נִקְשֶׁ֣ה וְרָעֵ֑ב וְהָיָ֨ה כִֽי־יִרְעַ֜ב וְהִתְקַצַּ֗ף וְקִלֵּ֧ל בְּמַלְכּ֛וֹ וּבֵאלֹהָ֖יו וּפָנָ֥ה לְמָֽעְלָה׃

22 ‏וְאֶל־אֶ֖רֶץ יַבִּ֑יט וְהִנֵּ֨ה צָרָ֤ה וַחֲשֵׁכָה֙ מְע֣וּף צוּקָ֔ה וַאֲפֵלָ֖ה מְנֻדָּֽח׃

23 ‏כִּ֣י לֹ֣א מוּעָף֮ לַאֲשֶׁ֣ר מוּצָ֣ק לָהּ֒ כָּעֵ֣ת הָרִאשׁ֗וֹן הֵקַ֞ל אַ֤רְצָה זְבֻלוּן֙ וְאַ֣רְצָה נַפְתָּלִ֔י וְהָאַחֲר֖וֹן הִכְבִּ֑יד דֶּ֤רֶךְ הַיָּם֙ עֵ֣בֶר הַיַּרְדֵּ֔ן גְּלִ֖יל הַגּוֹיִֽם׃

1 wayyō’mer yəhwâ ’ēlay qaḥ-ləḵā gillāywōn gāḏwōl ûḵəṯōḇ ‘ālāyw bəḥereṭ ’ĕnwōš ləmahēr šālāl ḥāš baz:

2 wə’ā‘îḏâ llî ‘ēḏîm ne’ĕmānîm ’ēṯ ’ûrîyâ hakōhēn wə’eṯ-zəḵarəyâû ben yəḇereḵəyâû:

3 wā’eqəraḇ ’el-hannəḇî’â watahar watēleḏ bēn wayyō’mer yəhwâ ’ēlay qərā’ šəmwō mahēr šālāl ḥāš baz:

4 kî bəṭerem yēḏa‘ hanna‘ar qərō’ ’āḇî wə’immî yiśśā’| ’eṯ-ḥêl dammeśeq wə’ēṯ šəlal šōmərwōn lifənê meleḵə ’aššûr: s

5 wayyōsef yəhwâ dabēr ’ēlay ‘wōḏ lē’mōr:

6 ya‘an kî mā’as hā‘ām hazzeh ’ēṯ mê haššilōḥa hahōləḵîm lə’aṭ ûməśwōś ’eṯ-rəṣîn ûḇen-rəmaləyâû:

7 wəlāḵēn hinnēh ’ăḏōnāy ma‘ăleh ‘ălêhem ’eṯ-mê hannâār hā‘ăṣûmîm wəhārabîm ’eṯ-meleḵə ’aššûr wə’eṯ-kāl-kəḇwōḏwō wə‘ālâ ‘al-kāl-’ăfîqāyw wəhālaḵə ‘al-kāl-gəḏwōṯāyw:

8 wəḥālaf bîhûḏâ šāṭaf wə‘āḇar ‘aḏ-ṣaûā’r yagî‘a wəhāyâ muṭṭwōṯ kənāfāyw məlō’ rōḥaḇ-’arəṣəḵā ‘immānû ’ēl: s

9 rō‘û ‘ammîm wāḥōtû wəha’ăzînû kōl merəḥaqqê-’āreṣ hiṯə’azzərû wāḥōtû hiṯə’azzərû wāḥōtû:

10 ‘uṣû ‘ēṣâ wəṯufār dabərû ḏāḇār wəlō’ yāqûm kî ‘immānû ’ēl: s

11 kî ḵōh ’āmar yəhwâ ’ēlay kəḥezəqaṯ hayyāḏ wəyissərēnî milleḵeṯ bəḏereḵə hā‘ām-hazzeh lē’mōr:

12 lō’-ṯō’mərûn qešer ləḵōl ’ăšer-yō’mar hā‘ām hazzeh qāšer wə’eṯ-mwōrā’wō lō’-ṯîrə’û wəlō’ ṯa‘ărîṣû:

13 ’eṯ-yəhwâ ṣəḇā’wōṯ ’ōṯwō ṯaqədîšû wəhû’ mwōra’ăḵem wəhû’ ma‘ăriṣəḵem:

14 wəhāyâ ləmiqədāš ûlə’eḇen neḡef ûləṣûr miḵəšwōl lišənê ḇātê yiśərā’ēl ləfaḥ ûləmwōqēš ləywōšēḇ yərûšālāim:

15 wəḵāšəlû ḇām rabîm wənāfəlû wənišəbārû wənwōqəšû wəniləkāḏû: s

16 ṣwōr tə‘ûḏâ ḥăṯwōm twōrâ bəlimmuḏāy:

17 wəḥikîṯî layhwâ hammasətîr pānāyw mibêṯ ya‘ăqōḇ wəqiûêṯî-lwō:

18 hinnēh ’ānōḵî wəhayəlāḏîm ’ăšer nāṯan-lî yəhwâ lə’ōṯwōṯ ûləmwōfəṯîm bəyiśərā’ēl mē‘im yəhwâ ṣəḇā’wōṯ haššōḵēn bəhar ṣîywōn: s

19 wəḵî-yō’mərû ’ălêḵem dirəšû ’el-hā’ōḇwōṯ wə’el-hayyidə‘ōnîm haməṣafəṣəfîm wəhammahəgîm hălwō’-‘am ’el-’ĕlōhāyw yiḏərōš bə‘aḏ haḥayyîm ’el-hammēṯîm:

20 ləṯwōrâ wəliṯə‘ûḏâ ’im-lō’ yō’mərû kadāḇār hazzeh ’ăšer ’ên-lwō šāḥar:

21 wə‘āḇar bāh niqəšeh wərā‘ēḇ wəhāyâ ḵî-yirə‘aḇ wəhiṯəqaṣṣaf wəqillēl bəmaləkwō ûḇē’lōhāyw ûfānâ ləmā‘əlâ:

22 wə’el-’ereṣ yabîṭ wəhinnēh ṣārâ waḥăšēḵâ mə‘ûf ṣûqâ wa’ăfēlâ mənudāḥ:

23 kî lō’ mû‘āf la’ăšer mûṣāq lāh kā‘ēṯ hāri’šwōn hēqal ’arəṣâ zəḇulûn wə’arəṣâ nafətālî wəhā’aḥărwōn hiḵəbîḏ dereḵə hayyām ‘ēḇer hayyarədēn gəlîl hagwōyim:


Next: Isaiah (Yisheyah) Chapter 9