‎1 ‏וַיִּקְרָ֥א יַעֲקֹ֖ב אֶל־בָּנָ֑יו וַיֹּ֗אמֶר הֵאָֽסְפוּ֙ וְאַגִּ֣ידָה לָכֶ֔ם אֵ֛ת אֲשֶׁר־יִקְרָ֥א אֶתְכֶ֖ם בְּאַחֲרִ֥ית הַיָּמִֽים׃

‎2 ‏הִקָּבְצ֥וּ וְשִׁמְע֖וּ בְּנֵ֣י יַעֲקֹ֑ב וְשִׁמְע֖וּ אֶל־יִשְׂרָאֵ֥ל אֲבִיכֶֽם׃

‎3 ‏רְאוּבֵן֙ בְּכֹ֣רִי אַ֔תָּה כֹּחִ֖י וְרֵאשִׁ֣ית אוֹנִ֑י יֶ֥תֶר שְׂאֵ֖ת וְיֶ֥תֶר עָֽז׃

‎4 ‏פַּ֤חַז כַּמַּ֙יִם֙ אַל־תּוֹתַ֔ר כִּ֥י עָלִ֖יתָ מִשְׁכְּבֵ֣י אָבִ֑יךָ אָ֥ז חִלַּ֖לְתָּ יְצוּעִ֥י עָלָֽה׃ פ

‎5 ‏שִׁמְע֥וֹן וְלֵוִ֖י אַחִ֑ים כְּלֵ֥י חָמָ֖ס מְכֵרֹתֵיהֶֽם׃

‎6 ‏בְּסֹדָם֙ אַל־תָּבֹ֣א נַפְשִׁ֔י בִּקְהָלָ֖ם אַל־תֵּחַ֣ד כְּבֹדִ֑י כִּ֤י בְאַפָּם֙ הָ֣רְגוּ אִ֔ישׁ וּבִרְצֹנָ֖ם עִקְּרוּ־שֽׁוֹר׃

‎7 ‏אָר֤וּר אַפָּם֙ כִּ֣י עָ֔ז וְעֶבְרָתָ֖ם כִּ֣י קָשָׁ֑תָה אֲחַלְּקֵ֣ם בְּיַעֲקֹ֔ב וַאֲפִיצֵ֖ם בְּיִשְׂרָאֵֽל׃ ס

‎8 ‏יְהוּדָ֗ה אַתָּה֙ יוֹד֣וּךָ אַחֶ֔יךָ יָדְךָ֖ בְּעֹ֣רֶף אֹיְבֶ֑יךָ יִשְׁתַּחֲוּ֥וּ¹ לְךָ֖ בְּנֵ֥י אָבִֽיךָ׃

‎9 ‏גּ֤וּר אַרְיֵה֙ יְהוּדָ֔ה מִטֶּ֖רֶף בְּנִ֣י עָלִ֑יתָ כָּרַ֨ע רָבַ֧ץ כְּאַרְיֵ֛ה וּכְלָבִ֖יא מִ֥י יְקִימֶֽנּוּ׃

‎10 ‏לֹֽא־יָס֥וּר שֵׁ֙בֶט֙ מִֽיהוּדָ֔ה וּמְחֹקֵ֖ק מִבֵּ֣ין רַגְלָ֑יו עַ֚ד כִּֽי־יָבֹ֣א שילה שִׁיל֔וֹ וְל֖וֹ יִקְּהַ֥ת עַמִּֽים׃

‎11 ‏אֹסְרִ֤י לַגֶּ֙פֶן֙ עירה עִיר֔וֹ וְלַשֹּׂרֵקָ֖ה בְּנִ֣י אֲתֹנ֑וֹ כִּבֵּ֤ס בַּיַּ֙יִן֙ לְבֻשׁ֔וֹ וּבְדַם־עֲנָבִ֖ים סותה סוּתֽוֹ׃

‎12 ‏חַכְלִילִ֥י עֵינַ֖יִם מִיָּ֑יִן וּלְבֶן־שִׁנַּ֖יִם מֵחָלָֽב׃ פ

‎13 ‏זְבוּלֻ֕ן לְח֥וֹף יַמִּ֖ים יִשְׁכֹּ֑ן וְהוּא֙ לְח֣וֹף אֳנִיּ֔וֹת וְיַרְכָת֖וֹ עַל־צִידֹֽן׃ ס

‎14 ‏יִשָּׂשכָ֖ר חֲמֹ֣ר גָּ֑רֶם רֹבֵ֖ץ בֵּ֥ין הַֽמִּשְׁפְּתָֽיִם׃

‎15 ‏וַיַּ֤רְא מְנֻחָה֙ כִּ֣י ט֔וֹב וְאֶת־הָאָ֖רֶץ כִּ֣י נָעֵ֑מָה וַיֵּ֤ט שִׁכְמוֹ֙ לִסְבֹּ֔ל וַיְהִ֖י לְמַס־עֹבֵֽד׃ ס

‎16 ‏דָּ֖ן יָדִ֣ין עַמּ֑וֹ כְּאַחַ֖ד שִׁבְטֵ֥י יִשְׂרָאֵֽל׃

‎17 ‏יְהִי־דָן֙ נָחָ֣שׁ עֲלֵי־דֶ֔רֶךְ שְׁפִיפֹ֖ן עֲלֵי־אֹ֑רַח הַנֹּשֵׁךְ֙ עִקְּבֵי־ס֔וּס וַיִּפֹּ֥ל רֹכְב֖וֹ אָחֽוֹר׃

‎18 ‏לִֽישׁוּעָתְךָ֖ קִוִּ֥יתִי יְהוָֽה׃

‎19 ‏גָּ֖ד גְּד֣וּד יְגוּדֶ֑נּוּ וְה֖וּא יָגֻ֥ד עָקֵֽב׃ ס

‎20 ‏מֵאָשֵׁ֖ר שְׁמֵנָ֣ה לַחְמ֑וֹ וְה֥וּא יִתֵּ֖ן מַֽעֲדַנֵּי־מֶֽלֶךְ׃ ס

‎21 ‏נַפְתָּלִ֖י אַיָּלָ֣ה שְׁלֻחָ֑ה הַנֹּתֵ֖ן אִמְרֵי־שָֽׁפֶר׃ ס

‎22 ‏בֵּ֤ן פֹּרָת֙ יוֹסֵ֔ף בֵּ֥ן פֹּרָ֖ת עֲלֵי־עָ֑יִן בָּנ֕וֹת צָעֲדָ֖ה עֲלֵי־שֽׁוּר׃

‎23 ‏וַֽיְמָרֲרֻ֖הוּ וָרֹ֑בּוּ וַֽיִּשְׂטְמֻ֖הוּ בַּעֲלֵ֥י חִצִּֽים׃

‎24 ‏וַתֵּ֤שֶׁב בְּאֵיתָן֙ קַשְׁתּ֔וֹ וַיָּפֹ֖זּוּ זְרֹעֵ֣י יָדָ֑יו מִידֵי֙ אֲבִ֣יר יַעֲקֹ֔ב מִשָּׁ֥ם רֹעֶ֖ה אֶ֥בֶן יִשְׂרָאֵֽל׃

‎25 ‏מֵאֵ֨ל אָבִ֜יךָ וְיַעְזְרֶ֗ךָּ וְאֵ֤ת שַׁדַּי֙ וִיבָ֣רְכֶ֔ךָּ בִּרְכֹ֤ת שָׁמַ֙יִם֙ מֵעָ֔ל בִּרְכֹ֥ת תְּה֖וֹם רֹבֶ֣צֶת תָּ֑חַת בִּרְכֹ֥ת שָׁדַ֖יִם וָרָֽחַם׃

‎26 ‏בִּרְכֹ֣ת אָבִ֗יךָ גָּֽבְרוּ֙ עַל־בִּרְכֹ֣ת הוֹרַ֔י עַֽד־תַּאֲוַ֖ת גִּבְעֹ֣ת עוֹלָ֑ם תִּֽהְיֶ֙ין֙¹ לְרֹ֣אשׁ יוֹסֵ֔ף וּלְקָדְקֹ֖ד נְזִ֥יר אֶחָֽיו׃ פ

‎27 ‏בִּנְיָמִין֙ זְאֵ֣ב יִטְרָ֔ף בַּבֹּ֖קֶר יֹ֣אכַל עַ֑ד וְלָעֶ֖רֶב יְחַלֵּ֥ק שָׁלָֽל׃

‎28 ‏כָּל־אֵ֛לֶּה שִׁבְטֵ֥י יִשְׂרָאֵ֖ל שְׁנֵ֣ים עָשָׂ֑ר וְ֠זֹאת אֲשֶׁר־דִּבֶּ֨ר לָהֶ֤ם אֲבִיהֶם֙ וַיְבָ֣רֶךְ אוֹתָ֔ם אִ֛ישׁ אֲשֶׁ֥ר כְּבִרְכָת֖וֹ בֵּרַ֥ךְ אֹתָֽם׃

‎29 ‏וַיְצַ֣ו אוֹתָ֗ם וַיֹּ֤אמֶר אֲלֵהֶם֙ אֲנִי֙ נֶאֱסָ֣ף אֶל־עַמִּ֔י קִבְר֥וּ אֹתִ֖י אֶל־אֲבֹתָ֑י אֶל־הַ֨מְּעָרָ֔ה אֲשֶׁ֥ר בִּשְׂדֵ֖ה עֶפְר֥וֹן הַֽחִתִּֽי׃

‎30 ‏בַּמְּעָרָ֞ה אֲשֶׁ֨ר בִּשְׂדֵ֧ה הַמַּכְפֵּלָ֛ה אֲשֶׁ֥ר עַל־פְּנֵי־מַמְרֵ֖א בְּאֶ֣רֶץ כְּנָ֑עַן אֲשֶׁר֩ קָנָ֨ה אַבְרָהָ֜ם אֶת־הַשָּׂדֶ֗ה מֵאֵ֛ת עֶפְרֹ֥ן הַחִתִּ֖י לַאֲחֻזַּת־קָֽבֶר׃

‎31 ‏שָׁ֣מָּה קָֽבְר֞וּ אֶת־אַבְרָהָ֗ם וְאֵת֙ שָׂרָ֣ה אִשְׁתּ֔וֹ שָׁ֚מָּה קָבְר֣וּ אֶת־יִצְחָ֔ק וְאֵ֖ת רִבְקָ֣ה אִשְׁתּ֑וֹ וְשָׁ֥מָּה קָבַ֖רְתִּי אֶת־לֵאָֽה׃

‎32 ‏מִקְנֵ֧ה הַשָּׂדֶ֛ה וְהַמְּעָרָ֥ה אֲשֶׁר־בּ֖וֹ מֵאֵ֥ת בְּנֵי־חֵֽת׃

‎33 ‏וַיְכַ֤ל יַעֲקֹב֙ לְצַוֹּ֣ת אֶת־בָּנָ֔יו וַיֶּאֱסֹ֥ף רַגְלָ֖יו אֶל־הַמִּטָּ֑ה וַיִּגְוַ֖ע וַיֵּאָ֥סֶף אֶל־עַמָּֽיו׃

1 wayyiqərā’ y^a‘ăqōḇ ’el-bānāyw wayyō’mer hē’āsəfû wə’agîḏâ lāḵem ’ēṯ ’ăšer-yiqərā’ ’eṯəḵem bə’^aḥărîṯ hayyāmîm:

2 hiqqāḇəṣû wəšimə‘û bənê y^a‘ăqōḇ wəšimə‘û ’el-yiśərā’ēl ’ăḇîḵem:

3 rə’ûḇēn bəḵōrî ’atâ kōḥî wərē’šîṯ ’wōnî yeṯer śə’ēṯ wəyeṯer ‘āz:

4 p^aḥaz kammayim ’al-twōṯar kî ‘ālîṯā mišəkəḇê ’āḇîḵā ’āz ḥillalətā yəṣû‘î ‘ālâ: f

5 šimə‘wōn wəlēwî ’^aḥîm kəlê ḥāmās məḵērōṯêhem:

6 bəsōḏām ’al-tāḇō’ nafəšî biqəhālām ’al-tēḥaḏ kəḇōḏî kî ḇə’apām hārəḡû ’îš ûḇirəṣōnām ‘iqqərû-šwōr:

7 ’ārûr ’apām kî ‘āz wə‘eḇərāṯām kî qāšāṯâ ’ăḥalləqēm bəy^a‘ăqōḇ wa’ăfîṣēm bəyiśərā’ēl: s

8 yəhûḏâ ’atâ ywōḏûḵā ’^aḥeyḵā yāḏəḵā bə‘ōref ’ōyəḇeyḵā yišət^aḥăûû¹ ləḵā bənê ’āḇîḵā:

9 gûr ’arəyēh yəhûḏâ miṭṭeref bənî ‘ālîṯā kār^a‘ rāḇaṣ kə’arəyēh ûḵəlāḇî’ mî yəqîmennû:

10 lō’-yāsûr šēḇeṭ mîhûḏâ ûməḥōqēq mibên raḡəlāyw ‘aḏ kî-yāḇō’ šîlōh šîlwō wəlwō yiqqəhaṯ ‘ammîm:

11 ’ōsərî lagefen ‘îrōh ‘îrwō wəlaśśōrēqâ bənî ’ăṯōnwō kibēs bayyayin ləḇušwō ûḇəḏam-‘ănāḇîm sûṯōh sûṯwō:

12 ḥaḵəlîlî ‘ênayim mîyāyin ûləḇen-šinnayim mēḥālāḇ: f

13 zəḇûlun ləḥwōf yammîm yišəkōn wəhû’ ləḥwōf ’ŏnîywōṯ wəyarəḵāṯwō ‘al-ṣîḏōn: s

14 yiśśāsḵār ḥămōr gārem rōḇēṣ bên hammišəpəṯāyim:

15 wayyarə’ mənuḥâ kî ṭwōḇ wə’eṯ-hā’āreṣ kî nā‘ēmâ wayyēṭ šiḵəmwō lisəbōl wayəhî ləmas-‘ōḇēḏ: s

16 dān yāḏîn ‘ammwō kə’^aḥaḏ šiḇəṭê yiśərā’ēl:

17 yəhî-ḏān nāḥāš ‘ălê-ḏereḵə šəfîfōn ‘ălê-’ōr^aḥ hannōšēḵə ‘iqqəḇê-sûs wayyipōl rōḵəḇwō ’āḥwōr:

18 lîšû‘āṯəḵā qiûîṯî yəhwâ:

19 gāḏ gəḏûḏ yəḡûḏennû wəhû’ yāḡuḏ ‘āqēḇ: s

20 mē’āšēr šəmēnâ l^aḥəmwō wəhû’ yitēn m^a‘ăḏannê-meleḵə: s

21 nafətālî ’ayyālâ šəluḥâ hannōṯēn ’imərê-šāfer: s

22 bēn pōrāṯ ywōsēf bēn pōrāṯ ‘ălê-‘āyin bānwōṯ ṣā‘ăḏâ ‘ălê-šûr:

23 wayəmārăruhû wārōbû wayyiśəṭəmuhû b^a‘ălê ḥiṣṣîm:

24 watēšeḇ bə’êṯān qašətwō wayyāfōzzû zərō‘ê yāḏāyw mîḏê ’ăḇîr y^a‘ăqōḇ miššām rō‘eh ’eḇen yiśərā’ēl:

25 mē’ēl ’āḇîḵā wəy^a‘əzəreḵḵā wə’ēṯ šaday wîḇārəḵeḵḵā birəḵōṯ šāmayim mē‘āl birəḵōṯ təhwōm rōḇeṣeṯ tāḥaṯ birəḵōṯ šāḏayim wārāḥam:

26 birəḵōṯ ’āḇîḵā gāḇərû ‘al-birəḵōṯ hwōray ‘aḏ-ta’ăwaṯ giḇə‘ōṯ ‘wōlām tihəyeyn¹ lərō’š ywōsēf ûləqāḏəqōḏ nəzîr ’eḥāyw: f

27 binəyāmîn zə’ēḇ yiṭərāf babōqer yō’ḵal ‘aḏ wəlā‘ereḇ yəḥallēq šālāl:

28 kāl-’ēlleh šiḇəṭê yiśərā’ēl šənêm ‘āśār wəzō’ṯ ’ăšer-diber lâem ’ăḇîhem wayəḇāreḵə ’wōṯām ’îš ’ăšer kəḇirəḵāṯwō bēraḵə ’ōṯām:

29 wayəṣaw ’wōṯām wayyō’mer ’ălēhem ’ănî ne’ĕsāf ’el-‘ammî qiḇərû ’ōṯî ’el-’ăḇōṯāy ’el-hammə‘ārâ ’ăšer biśəḏēh ‘efərwōn h^aḥitî:

30 bammə‘ārâ ’ăšer biśəḏēh hammaḵəpēlâ ’ăšer ‘al-pənê-mamərē’ bə’ereṣ kənā‘an ’ăšer qānâ ’aḇərâām ’eṯ-haśśāḏeh mē’ēṯ ‘efərōn h^aḥitî la’ăḥuzzaṯ-qāḇer:

31 šāmmâ qāḇərû ’eṯ-’aḇərâām wə’ēṯ śārâ ’išətwō šāmmâ qāḇərû ’eṯ-yiṣəḥāq wə’ēṯ riḇəqâ ’išətwō wəšāmmâ qāḇarətî ’eṯ-lē’â:

32 miqənēh haśśāḏeh wəhammə‘ārâ ’ăšer-bwō mē’ēṯ bənê-ḥēṯ:

33 wayəḵal y^a‘ăqōḇ ləṣaûōṯ ’eṯ-bānāyw wayye’ĕsōf raḡəlāyw ’el-hammiṭṭâ wayyiḡəw^a‘ wayyē’āsef ’el-‘ammāyw: