Sacred Texts  Bible  Index 
Polyglot  KJV  Sep  Vul 

Genesis (Bereshit) Index
  Previous  Next 

Tanach (Hebrew): Genesis (Bereshit) Chapter 20

1 ‏וַיִּסַּ֨ע מִשָּׁ֤ם אַבְרָהָם֙ אַ֣רְצָה הַנֶּ֔גֶב וַיֵּ֥שֶׁב בֵּין־קָדֵ֖שׁ וּבֵ֣ין שׁ֑וּר וַיָּ֖גָר בִּגְרָֽר׃

2 ‏וַיֹּ֧אמֶר אַבְרָהָ֛ם אֶל־שָׂרָ֥ה אִשְׁתּ֖וֹ אֲחֹ֣תִי הִ֑וא וַיִּשְׁלַ֗ח אֲבִימֶ֙לֶךְ֙ מֶ֣לֶךְ גְּרָ֔ר וַיִּקַּ֖ח אֶת־שָׂרָֽה׃

3 ‏וַיָּבֹ֧א אֱלֹהִ֛ים אֶל־אֲבִימֶ֖לֶךְ בַּחֲל֣וֹם הַלָּ֑יְלָה וַיֹּ֣אמֶר ל֗וֹ הִנְּךָ֥ מֵת֙ עַל־הָאִשָּׁ֣ה אֲשֶׁר־לָקַ֔חְתָּ וְהִ֖וא בְּעֻ֥לַת בָּֽעַל׃

4 ‏וַאֲבִימֶ֕לֶךְ לֹ֥א קָרַ֖ב אֵלֶ֑יהָ וַיֹּאמַ֕ר אֲדֹנָ֕י הֲג֥וֹי גַּם־צַדִּ֖יק תַּהֲרֹֽג׃

5 ‏הֲלֹ֨א ה֤וּא אָֽמַר־לִי֙ אֲחֹ֣תִי הִ֔וא וְהִֽיא־גַם־הִ֥וא אָֽמְרָ֖ה אָחִ֣י ה֑וּא בְּתָם־לְבָבִ֛י וּבְנִקְיֹ֥ן כַּפַּ֖י עָשִׂ֥יתִי זֹֽאת׃

6 ‏וַיֹּאמֶר֩ אֵלָ֨יו הָֽאֱלֹהִ֜ים בַּחֲלֹ֗ם גַּ֣ם אָנֹכִ֤י יָדַ֙עְתִּי֙ כִּ֤י בְתָם־לְבָבְךָ֙ עָשִׂ֣יתָ זֹּ֔את וָאֶחְשֹׂ֧ךְ גַּם־אָנֹכִ֛י אֽוֹתְךָ֖ מֵחֲטוֹ־לִ֑י עַל־כֵּ֥ן לֹא־נְתַתִּ֖יךָ לִנְגֹּ֥עַ אֵלֶֽיהָ׃

7 ‏וְעַתָּ֗ה הָשֵׁ֤ב אֵֽשֶׁת־הָאִישׁ֙ כִּֽי־נָבִ֣יא ה֔וּא וְיִתְפַּלֵּ֥ל בַּֽעַדְךָ֖ וֶֽחְיֵ֑ה וְאִם־אֵֽינְךָ֣ מֵשִׁ֗יב דַּ֚ע כִּי־מ֣וֹת תָּמ֔וּת אַתָּ֖ה וְכָל־אֲשֶׁר־לָֽךְ׃

8 ‏וַיַּשְׁכֵּ֨ם אֲבִימֶ֜לֶךְ בַּבֹּ֗קֶר וַיִּקְרָא֙ לְכָל־עֲבָדָ֔יו וַיְדַבֵּ֛ר אֶת־כָּל־הַדְּבָרִ֥ים הָאֵ֖לֶּה בְּאָזְנֵיהֶ֑ם וַיִּֽירְא֥וּ הָאֲנָשִׁ֖ים מְאֹֽד׃

9 ‏וַיִּקְרָ֨א אֲבִימֶ֜לֶךְ לְאַבְרָהָ֗ם וַיֹּ֨אמֶר ל֜וֹ מֶֽה־עָשִׂ֤יתָ לָּ֙נוּ֙ וּמֶֽה־חָטָ֣אתִי לָ֔ךְ כִּֽי־הֵבֵ֧אתָ עָלַ֛י וְעַל־מַמְלַכְתִּ֖י חֲטָאָ֣ה גְדֹלָ֑ה מַעֲשִׂים֙ אֲשֶׁ֣ר לֹא־יֵֽעָשׂ֔וּ עָשִׂ֖יתָ עִמָּדִֽי׃

10 ‏וַיֹּ֥אמֶר אֲבִימֶ֖לֶךְ אֶל־אַבְרָהָ֑ם מָ֣ה רָאִ֔יתָ כִּ֥י עָשִׂ֖יתָ אֶת־הַדָּבָ֥ר הַזֶּֽה׃

11 ‏וַיֹּ֙אמֶר֙ אַבְרָהָ֔ם כִּ֣י אָמַ֗רְתִּי רַ֚ק אֵין־יִרְאַ֣ת אֱלֹהִ֔ים בַּמָּק֖וֹם הַזֶּ֑ה וַהֲרָג֖וּנִי עַל־דְּבַ֥ר אִשְׁתִּֽי׃

12 ‏וְגַם־אָמְנָ֗ה אֲחֹתִ֤י בַת־אָבִי֙ הִ֔וא אַ֖ךְ לֹ֣א בַת־אִמִּ֑י וַתְּהִי־לִ֖י לְאִשָּֽׁה׃

13 ‏וַיְהִ֞י כַּאֲשֶׁ֧ר הִתְע֣וּ אֹתִ֗י אֱלֹהִים֮ מִבֵּ֣ית אָבִי֒ וָאֹמַ֣ר לָ֔הּ זֶ֣ה חַסְדֵּ֔ךְ אֲשֶׁ֥ר תַּעֲשִׂ֖י עִמָּדִ֑י אֶ֤ל כָּל־הַמָּקוֹם֙ אֲשֶׁ֣ר נָב֣וֹא שָׁ֔מָּה אִמְרִי־לִ֖י אָחִ֥י הֽוּא׃

14 ‏וַיִּקַּ֨ח אֲבִימֶ֜לֶךְ צֹ֣אן וּבָקָ֗ר וַעֲבָדִים֙ וּשְׁפָחֹ֔ת וַיִּתֵּ֖ן לְאַבְרָהָ֑ם וַיָּ֣שֶׁב ל֔וֹ אֵ֖ת שָׂרָ֥ה אִשְׁתּֽוֹ׃

15 ‏וַיֹּ֣אמֶר אֲבִימֶ֔לֶךְ הִנֵּ֥ה אַרְצִ֖י לְפָנֶ֑יךָ בַּטּ֥וֹב בְּעֵינֶ֖יךָ שֵֽׁב׃

16 ‏וּלְשָׂרָ֣ה אָמַ֗ר הִנֵּ֨ה נָתַ֜תִּי אֶ֤לֶף כֶּ֙סֶף֙ לְאָחִ֔יךְ הִנֵּ֤ה הוּא־לָךְ֙ כְּס֣וּת עֵינַ֔יִם לְכֹ֖ל אֲשֶׁ֣ר אִתָּ֑ךְ וְאֵ֥ת כֹּ֖ל וְנֹכָֽחַת׃

17 ‏וַיִּתְפַּלֵּ֥ל אַבְרָהָ֖ם אֶל־הָאֱלֹהִ֑ים וַיִּרְפָּ֨א אֱלֹהִ֜ים אֶת־אֲבִימֶ֧לֶךְ וְאֶת־אִשְׁתּ֛וֹ וְאַמְהֹתָ֖יו וַיֵּלֵֽדוּ׃

18 ‏כִּֽי־עָצֹ֤ר עָצַר֙ יְהוָ֔ה בְּעַ֥ד כָּל־רֶ֖חֶם לְבֵ֣ית אֲבִימֶ֑לֶךְ עַל־דְּבַ֥ר שָׂרָ֖ה אֵ֥שֶׁת אַבְרָהָֽם׃ ס

1 wayyissa‘ miššām ’aḇərâām ’arəṣâ hanneḡeḇ wayyēšeḇ bên-qāḏēš ûḇên šûr wayyāḡār biḡərār:

2 wayyō’mer ’aḇərâām ’el-śārâ ’išətwō ’ăḥōṯî hiw’ wayyišəlaḥ ’ăḇîmeleḵə meleḵə gərār wayyiqqaḥ ’eṯ-śārâ:

3 wayyāḇō’ ’ĕlōhîm ’el-’ăḇîmeleḵə baḥălwōm hallāyəlâ wayyō’mer lwō hinnəḵā mēṯ ‘al-hā’iššâ ’ăšer-lāqaḥətā wəhiw’ bə‘ulaṯ bā‘al:

4 wa’ăḇîmeleḵə lō’ qāraḇ ’ēleyhā wayyō’mar ’ăḏōnāy hăḡwōy gam-ṣadîq tahărōḡ:

5 hălō’ hû’ ’āmar-lî ’ăḥōṯî hiw’ wəhî’-ḡam-hiw’ ’āmərâ ’āḥî hû’ bəṯām-ləḇāḇî ûḇəniqəyōn kapay ‘āśîṯî zō’ṯ:

6 wayyō’mer ’ēlāyw hā’ĕlōhîm baḥălōm gam ’ānōḵî yāḏa‘ətî kî ḇəṯām-ləḇāḇəḵā ‘āśîṯā zzō’ṯ wā’eḥəśōḵə gam-’ānōḵî ’wōṯəḵā mēḥăṭwō-lî ‘al-kēn lō’-nəṯatîḵā linəgō‘a ’ēleyhā:

7 wə‘atâ hāšēḇ ’ēšeṯ-hā’îš kî-nāḇî’ hû’ wəyiṯəpallēl ba‘aḏəḵā weḥəyēh wə’im-’ênəḵā mēšîḇ da‘ kî-mwōṯ tāmûṯ ’atâ wəḵāl-’ăšer-lāḵə:

8 wayyašəkēm ’ăḇîmeleḵə babōqer wayyiqərā’ ləḵāl-‘ăḇāḏāyw wayəḏabēr ’eṯ-kāl-hadəḇārîm hā’ēlleh bə’āzənêhem wayyîrə’û hā’ănāšîm mə’ōḏ:

9 wayyiqərā’ ’ăḇîmeleḵə lə’aḇərâām wayyō’mer lwō meh-‘āśîṯā llānû ûmeh-ḥāṭā’ṯî lāḵə kî-hēḇē’ṯā ‘ālay wə‘al-maməlaḵətî ḥăṭā’â ḡəḏōlâ ma‘ăśîm ’ăšer lō’-yē‘āśû ‘āśîṯā ‘immāḏî:

10 wayyō’mer ’ăḇîmeleḵə ’el-’aḇərâām mâ rā’îṯā kî ‘āśîṯā ’eṯ-hadāḇār hazzeh:

11 wayyō’mer ’aḇərâām kî ’āmarətî raq ’ên-yirə’aṯ ’ĕlōhîm bammāqwōm hazzeh wahărāḡûnî ‘al-dəḇar ’išətî:

12 wəḡam-’āmənâ ’ăḥōṯî ḇaṯ-’āḇî hiw’ ’aḵə lō’ ḇaṯ-’immî watəhî-lî lə’iššâ:

13 wayəhî ka’ăšer hiṯə‘û ’ōṯî ’ĕlōhîm mibêṯ ’āḇî wā’ōmar lāh zeh ḥasədēḵə ’ăšer ta‘ăśî ‘immāḏî ’el kāl-hammāqwōm ’ăšer nāḇwō’ šāmmâ ’imərî-lî ’āḥî hû’:

14 wayyiqqaḥ ’ăḇîmeleḵə ṣō’n ûḇāqār wa‘ăḇāḏîm ûšəfāḥōṯ wayyitēn lə’aḇərâām wayyāšeḇ lwō ’ēṯ śārâ ’išətwō:

15 wayyō’mer ’ăḇîmeleḵə hinnēh ’arəṣî ləfāneyḵā baṭṭwōḇ bə‘êneyḵā šēḇ:

16 ûləśārâ ’āmar hinnēh nāṯatî ’elef kesef lə’āḥîḵə hinnēh hû’-lāḵə kəsûṯ ‘ênayim ləḵōl ’ăšer ’itāḵə wə’ēṯ kōl wənōḵāḥaṯ:

17 wayyiṯəpallēl ’aḇərâām ’el-hā’ĕlōhîm wayyirəpā’ ’ĕlōhîm ’eṯ-’ăḇîmeleḵə wə’eṯ-’išətwō wə’aməhōṯāyw wayyēlēḏû:

18 kî-‘āṣōr ‘āṣar yəhwâ bə‘aḏ kāl-reḥem ləḇêṯ ’ăḇîmeleḵə ‘al-dəḇar śārâ ’ēšeṯ ’aḇərâām: s


Next: Genesis (Bereshit) Chapter 21