‎1 ‏וַיְהִ֥י דְבַר־יְהוָ֖ה אֵלַ֥י לֵאמֹֽר׃

‎2 ‏בֶּן־אָדָ֕ם הִנָּבֵ֖א עַל־רוֹעֵ֣י יִשְׂרָאֵ֑ל הִנָּבֵ֣א וְאָמַרְתָּ֩ אֲלֵיהֶ֨ם לָרֹעִ֜ים כֹּ֥ה¹ אָמַ֣ר׀ אֲדֹנָ֣י יְהוִ֗ה ה֤וֹי רֹעֵֽי־יִשְׂרָאֵל֙ אֲשֶׁ֤ר הָיוּ֙ רֹעִ֣ים אוֹתָ֔ם הֲל֣וֹא הַצֹּ֔אן יִרְע֖וּ הָרֹעִֽים׃

‎3 ‏אֶת־הַחֵ֤לֶב תֹּאכֵ֙לוּ֙ וְאֶת־הַצֶּ֣מֶר תִּלְבָּ֔שׁוּ הַבְּרִיאָ֖ה תִּזְבָּ֑חוּ הַצֹּ֖אן לֹ֥א תִרְעֽוּ׃

‎4 ‏אֶֽת־הַנַּחְלוֹת֩ לֹ֨א חִזַּקְתֶּ֜ם וְאֶת־הַחוֹלָ֣ה לֹֽא־רִפֵּאתֶ֗ם וְלַנִּשְׁבֶּ֙רֶת֙ לֹ֣א חֲבַשְׁתֶּ֔ם וְאֶת־הַנִּדַּ֙חַת֙ לֹ֣א הֲשֵׁבֹתֶ֔ם וְאֶת־הָאֹבֶ֖דֶת לֹ֣א בִקַּשְׁתֶּ֑ם וּבְחָזְקָ֛ה רְדִיתֶ֥ם אֹתָ֖ם וּבְפָֽרֶךְ׃

‎5 ‏וַתְּפוּצֶ֖ינָה מִבְּלִ֣י רֹעֶ֑ה וַתִּהְיֶ֧ינָה לְאָכְלָ֛ה לְכָל־חַיַּ֥ת הַשָּׂדֶ֖ה וַתְּפוּצֶֽינָה׃

‎6 ‏יִשְׁגּ֤וּ צֹאנִי֙ בְּכָל־הֶ֣הָרִ֔ים וְעַ֖ל כָּל־גִּבְעָ֣ה רָמָ֑ה וְעַ֨ל כָּל־פְּנֵ֤י הָאָ֙רֶץ֙ נָפֹ֣צוּ צֹאנִ֔י וְאֵ֥ין דּוֹרֵ֖שׁ וְאֵ֥ין מְבַקֵּֽשׁ׃

‎7 ‏לָכֵ֣ן רֹעִ֔ים שִׁמְע֖וּ אֶת־דְּבַ֥ר יְהוָֽה׃

‎8 ‏חַי־אָ֜נִי נְאֻ֣ם׀ אֲדֹנָ֣י יְהוִ֗ה אִם־לֹ֣א יַ֣עַן הֱיֽוֹת־צֹאנִ֣י׀ לָבַ֡ז וַתִּֽהְיֶינָה֩ צֹאנִ֨י לְאָכְלָ֜ה לְכָל־חַיַּ֤ת הַשָּׂדֶה֙ מֵאֵ֣ין רֹעֶ֔ה וְלֹֽא־דָרְשׁ֥וּ רֹעַ֖י אֶת־צֹאנִ֑י וַיִּרְע֤וּ הָֽרֹעִים֙ אוֹתָ֔ם וְאֶת־צֹאנִ֖י לֹ֥א רָעֽוּ׃ ס

‎9 ‏לָכֵן֙ הָֽרֹעִ֔ים שִׁמְע֖וּ דְּבַר־יְהוָֽה׃

‎10 ‏כֹּה־אָמַ֞ר אֲדֹנָ֣י יְהוִ֗ה הִנְנִ֨י אֶֽל־הָרֹעִ֜ים וְֽדָרַשְׁתִּ֧י אֶת־צֹאנִ֣י מִיָּדָ֗ם וְהִשְׁבַּתִּים֙ מֵרְע֣וֹת צֹ֔אן וְלֹא־יִרְע֥וּ ע֛וֹד הָרֹעִ֖ים אוֹתָ֑ם וְהִצַּלְתִּ֤י צֹאנִי֙ מִפִּיהֶ֔ם וְלֹֽא־תִהְיֶ֥יןָ לָהֶ֖ם לְאָכְלָֽה׃ ס

‎11 ‏כִּ֛י כֹּ֥ה אָמַ֖ר אֲדֹנָ֣י יְהוִ֑ה הִנְנִי־אָ֕נִי וְדָרַשְׁתִּ֥י אֶת־צֹאנִ֖י וּבִקַּרְתִּֽים׃

‎12 ‏כְּבַקָּרַת֩ רֹעֶ֨ה עֶדְר֜וֹ בְּיוֹם־הֱיוֹת֤וֹ בְתוֹךְ־צֹאנוֹ֙ נִפְרָשׁ֔וֹת כֵּ֖ן אֲבַקֵּ֣ר אֶת־צֹאנִ֑י וְהִצַּלְתִּ֣י אֶתְהֶ֗ם מִכָּל־הַמְּקוֹמֹת֙ אֲשֶׁ֣ר נָפֹ֣צוּ שָׁ֔ם בְּי֥וֹם עָנָ֖ן וַעֲרָפֶֽל׃

‎13 ‏וְהוֹצֵאתִ֣ים מִן־הָעַמִּ֗ים וְקִבַּצְתִּים֙ מִן־הָ֣אֲרָצ֔וֹת וַהֲבִיאֹתִ֖ים אֶל־אַדְמָתָ֑ם וּרְעִיתִים֙ אֶל־הָרֵ֣י יִשְׂרָאֵ֔ל בָּאֲפִיקִ֕ים וּבְכֹ֖ל מוֹשְׁבֵ֥י הָאָֽרֶץ׃

‎14 ‏בְּמִרְעֶה־טּוֹב֙ אֶרְעֶ֣ה אֹתָ֔ם וּבְהָרֵ֥י מְרֽוֹם־יִשְׂרָאֵ֖ל יִהְיֶ֣ה נְוֵהֶ֑ם שָׁ֤ם תִּרְבַּ֙צְנָה֙ בְּנָ֣וֶה טּ֔וֹב וּמִרְעֶ֥ה שָׁמֵ֛ן תִּרְעֶ֖ינָה אֶל־הָרֵ֥י יִשְׂרָאֵֽל׃

‎15 ‏אֲנִ֨י אֶרְעֶ֤ה צֹאנִי֙ וַאֲנִ֣י אַרְבִּיצֵ֔ם נְאֻ֖ם אֲדֹנָ֥י יְהוִֽה׃

‎16 ‏אֶת־הָאֹבֶ֤דֶת אֲבַקֵּשׁ֙ וְאֶת־הַנִּדַּ֣חַת אָשִׁ֔יב וְלַנִּשְׁבֶּ֣רֶת אֶחֱבֹ֔שׁ וְאֶת־הַחוֹלָ֖ה אֲחַזֵּ֑ק וְאֶת־הַשְּׁמֵנָ֧ה וְאֶת־הַחֲזָקָ֛ה אַשְׁמִ֖יד אֶרְעֶ֥נָּה בְמִשְׁפָּֽט׃

‎17 ‏וְאַתֵּ֣נָה צֹאנִ֔י כֹּ֥ה אָמַ֖ר אֲדֹנָ֣י יְהוִ֑ה הִנְנִ֤י שֹׁפֵט֙ בֵּֽין־שֶׂ֣ה לָשֶׂ֔ה לָאֵילִ֖ים וְלָעַתּוּדִֽים׃

‎18 ‏הַמְעַ֣ט מִכֶּ֗ם הַמִּרְעֶ֤ה הַטּוֹב֙ תִּרְע֔וּ וְיֶ֙תֶר֙ מִרְעֵיכֶ֔ם תִּרְמְס֖וּ בְּרַגְלֵיכֶ֑ם וּמִשְׁקַע־מַ֣יִם תִּשְׁתּ֔וּ וְאֵת֙ הַנּ֣וֹתָרִ֔ים בְּרַגְלֵיכֶ֖ם תִּרְפֹּשֽׂוּן׃

‎19 ‏וְצֹאנִ֑י מִרְמַ֤ס רַגְלֵיכֶם֙ תִּרְעֶ֔ינָה וּמִרְפַּ֥שׂ רַגְלֵיכֶ֖ם תִּשְׁתֶּֽינָה׃ ס

‎20 ‏לָכֵ֗ן כֹּ֥ה אָמַ֛ר אֲדֹנָ֥י יְהוִ֖ה אֲלֵיהֶ֑ם הִנְנִי־אָ֕נִי וְשָֽׁפַטְתִּי֙ בֵּֽין־שֶׂ֣ה בִרְיָ֔ה וּבֵ֥ין שֶׂ֖ה רָזָֽה׃

‎21 ‏יַ֗עַן בְּצַ֤ד וּבְכָתֵף֙ תֶּהְדֹּ֔פוּ וּבְקַרְנֵיכֶ֥ם תְּנַגְּח֖וּ כָּל־הַנַּחְל֑וֹת עַ֣ד אֲשֶׁ֧ר הֲפִיצוֹתֶ֛ם אוֹתָ֖נָה אֶל־הַחֽוּצָה׃

‎22 ‏וְהוֹשַׁעְתִּ֣י לְצֹאנִ֔י וְלֹֽא־תִהְיֶ֥ינָה ע֖וֹד לָבַ֑ז וְשָׁ֣פַטְתִּ֔י בֵּ֥ין שֶׂ֖ה לָשֶֽׂה׃

‎23 ‏וַהֲקִמֹתִ֨י עֲלֵיהֶ֜ם רֹעֶ֤ה אֶחָד֙ וְרָעָ֣ה אֶתְהֶ֔ן אֵ֖ת עַבְדִּ֣י דָוִ֑יד ה֚וּא יִרְעֶ֣ה אֹתָ֔ם וְהֽוּא־יִהְיֶ֥ה לָהֶ֖ן לְרֹעֶֽה׃

‎24 ‏וַאֲנִ֣י יְהוָ֗ה אֶהְיֶ֤ה לָהֶם֙ לֵֽאלֹהִ֔ים וְעַבְדִּ֥י דָוִ֖ד נָשִׂ֣יא בְתוֹכָ֑ם אֲנִ֥י יְהוָ֖ה דִּבַּֽרְתִּי׃

‎25 ‏וְכָרַתִּ֤י לָהֶם֙ בְּרִ֣ית שָׁל֔וֹם וְהִשְׁבַּתִּ֥י חַיָּֽה־רָעָ֖ה מִן־הָאָ֑רֶץ וְיָשְׁב֤וּ בַמִּדְבָּר֙ לָבֶ֔טַח וְיָשְׁנ֖וּ בַּיְּעָרִֽים׃

‎26 ‏וְנָתַתִּ֥י אוֹתָ֛ם וּסְבִיב֥וֹת גִּבְעָתִ֖י בְּרָכָ֑ה וְהוֹרַדְתִּ֤י הַגֶּ֙שֶׁם֙ בְּעִתּ֔וֹ גִּשְׁמֵ֥י בְרָכָ֖ה יִֽהְיֽוּ׃

‎27 ‏וְנָתַן֩ עֵ֨ץ הַשָּׂדֶ֜ה אֶת־פִּרְי֗וֹ וְהָאָ֙רֶץ֙ תִּתֵּ֣ן יְבוּלָ֔הּ וְהָי֥וּ עַל־אַדְמָתָ֖ם לָבֶ֑טַח וְֽיָדְע֞וּ כִּי־אֲנִ֣י יְהוָ֗ה בְּשִׁבְרִי֙ אֶת־מֹט֣וֹת עֻלָּ֔ם וְהִ֨צַּלְתִּ֔ים מִיַּ֖ד הָעֹבְדִ֥ים בָּהֶֽם׃

‎28 ‏וְלֹא־יִהְי֨וּ ע֥וֹד בַּז֙ לַגּוֹיִ֔ם וְחַיַּ֥ת הָאָ֖רֶץ לֹ֣א תֹאכְלֵ֑ם וְיָשְׁב֥וּ לָבֶ֖טַח וְאֵ֥ין מַחֲרִֽיד׃

‎29 ‏וַהֲקִמֹתִ֥י לָהֶ֛ם מַטָּ֖ע לְשֵׁ֑ם וְלֹֽא־יִהְי֨וּ ע֜וֹד אֲסֻפֵ֤י רָעָב֙ בָּאָ֔רֶץ וְלֹֽא־יִשְׂא֥וּ ע֖וֹד כְּלִמַּ֥ת הַגּוֹיִֽם׃

‎30 ‏וְיָדְע֗וּ כִּ֣י אֲנִ֧י יְהוָ֛ה אֱלֹהֵיהֶ֖ם אִתָּ֑ם וְהֵ֗מָּה עַמִּי֙ בֵּ֣ית יִשְׂרָאֵ֔ל נְאֻ֖ם אֲדֹנָ֥י יְהוִֽה׃

‎31 ‏וְאַתֵּ֥ן צֹאנִ֛י צֹ֥אן מַרְעִיתִ֖י אָדָ֣ם אַתֶּ֑ם אֲנִי֙ אֱלֹ֣הֵיכֶ֔ם נְאֻ֖ם אֲדֹנָ֥י יְהוִֽה׃ פ

1 wayəhî ḏəḇar-yəhwâ ’ēlay lē’mōr:

2 ben-’āḏām hinnāḇē’ ‘al-rwō‘ê yiśərā’ēl hinnāḇē’ wə’āmarətā ’ălêhem lārō‘îm kōh¹ ’āmar| ’ăḏōnāy yəhwih hwōy rō‘ê-yiśərā’ēl ’ăšer hāyû rō‘îm ’wōṯām hălwō’ haṣṣō’n yirə‘û hārō‘îm:

3 ’eṯ-h^aḥēleḇ tō’ḵēlû wə’eṯ-haṣṣemer tiləbāšû habərî’â tizəbāḥû haṣṣō’n lō’ ṯirə‘û:

4 ’eṯ-hann^aḥəlwōṯ lō’ ḥizzaqətem wə’eṯ-h^aḥwōlâ lō’-ripē’ṯem wəlannišəbereṯ lō’ ḥăḇašətem wə’eṯ-hannid^aḥaṯ lō’ hăšēḇōṯem wə’eṯ-hā’ōḇeḏeṯ lō’ ḇiqqašətem ûḇəḥāzəqâ rəḏîṯem ’ōṯām ûḇəfāreḵə:

5 watəfûṣeynâ mibəlî rō‘eh watihəyeynâ lə’āḵəlâ ləḵāl-ḥayyaṯ haśśāḏeh watəfûṣeynâ:

6 yišəgû ṣō’nî bəḵāl-hehārîm wə‘al kāl-giḇə‘â rāmâ wə‘al kāl-pənê hā’āreṣ nāfōṣû ṣō’nî wə’ên dwōrēš wə’ên məḇaqqēš:

7 lāḵēn rō‘îm šimə‘û ’eṯ-dəḇar yəhwâ:

8 ḥay-’ānî nə’um| ’ăḏōnāy yəhwih ’im-lō’ y^a‘an hĕywōṯ-ṣō’nî| lāḇaz watihəyeynâ ṣō’nî lə’āḵəlâ ləḵāl-ḥayyaṯ haśśāḏeh mē’ên rō‘eh wəlō’-ḏārəšû rō‘ay ’eṯ-ṣō’nî wayyirə‘û hārō‘îm ’wōṯām wə’eṯ-ṣō’nî lō’ rā‘û: s

9 lāḵēn hārō‘îm šimə‘û dəḇar-yəhwâ:

10 kōh-’āmar ’ăḏōnāy yəhwih hinənî ’el-hārō‘îm wəḏārašətî ’eṯ-ṣō’nî mîyāḏām wəhišəbatîm mērə‘wōṯ ṣō’n wəlō’-yirə‘û ‘wōḏ hārō‘îm ’wōṯām wəhiṣṣalətî ṣō’nî mipîhem wəlō’-ṯihəyeynā lâem lə’āḵəlâ: s

11 kî kōh ’āmar ’ăḏōnāy yəhwih hinənî-’ānî wəḏārašətî ’eṯ-ṣō’nî ûḇiqqarətîm:

12 kəḇaqqāraṯ rō‘eh ‘eḏərwō bəywōm-hĕywōṯwō ḇəṯwōḵə-ṣō’nwō nifərāšwōṯ kēn ’ăḇaqqēr ’eṯ-ṣō’nî wəhiṣṣalətî ’eṯəhem mikāl-hamməqwōmōṯ ’ăšer nāfōṣû šām bəywōm ‘ānān w^a‘ărāfel:

13 wəhwōṣē’ṯîm min-hā‘ammîm wəqibaṣətîm min-hā’ărāṣwōṯ wahăḇî’ōṯîm ’el-’aḏəmāṯām ûrə‘îṯîm ’el-hārê yiśərā’ēl bā’ăfîqîm ûḇəḵōl mwōšəḇê hā’āreṣ:

14 bəmirə‘eh-ṭṭwōḇ ’erə‘eh ’ōṯām ûḇəhārê mərwōm-yiśərā’ēl yihəyeh nəwēhem šām tirəbaṣənâ bənāweh ṭṭwōḇ ûmirə‘eh šāmēn tirə‘eynâ ’el-hārê yiśərā’ēl:

15 ’ănî ’erə‘eh ṣō’nî wa’ănî ’arəbîṣēm nə’um ’ăḏōnāy yəhwih:

16 ’eṯ-hā’ōḇeḏeṯ ’ăḇaqqēš wə’eṯ-hannid^aḥaṯ ’āšîḇ wəlannišəbereṯ ’eḥĕḇōš wə’eṯ-h^aḥwōlâ ’ăḥazzēq wə’eṯ-haššəmēnâ wə’eṯ-h^aḥăzāqâ ’ašəmîḏ ’erə‘ennâ ḇəmišəpāṭ:

17 wə’atēnâ ṣō’nî kōh ’āmar ’ăḏōnāy yəhwih hinənî šōfēṭ bên-śeh lāśeh lā’êlîm wəlā‘atûḏîm:

18 hamə‘aṭ mikem hammirə‘eh haṭṭwōḇ tirə‘û wəyeṯer mirə‘êḵem tirəməsû bəraḡəlêḵem ûmišəq^a‘-mayim tišətû wə’ēṯ hannwōṯārîm bəraḡəlêḵem tirəpōśûn:

19 wəṣō’nî mirəmas raḡəlêḵem tirə‘eynâ ûmirəpaś raḡəlêḵem tišəteynâ: s

20 lāḵēn kōh ’āmar ’ăḏōnāy yəhwih ’ălêhem hinənî-’ānî wəšāfaṭətî bên-śeh ḇirəyâ ûḇên śeh rāzâ:

21 y^a‘an bəṣaḏ ûḇəḵāṯēf tehədōfû ûḇəqarənêḵem tənagəḥû kāl-hann^aḥəlwōṯ ‘aḏ ’ăšer hăfîṣwōṯem ’wōṯānâ ’el-h^aḥûṣâ:

22 wəhwōš^a‘ətî ləṣō’nî wəlō’-ṯihəyeynâ ‘wōḏ lāḇaz wəšāfaṭətî bên śeh lāśeh:

23 wahăqimōṯî ‘ălêhem rō‘eh ’eḥāḏ wərā‘â ’eṯəhen ’ēṯ ‘aḇədî ḏāwîḏ hû’ yirə‘eh ’ōṯām wəhû’-yihəyeh lâen lərō‘eh:

24 wa’ănî yəhwâ ’ehəyeh lâem lē’lōhîm wə‘aḇədî ḏāwiḏ nāśî’ ḇəṯwōḵām ’ănî yəhwâ dibarətî:

25 wəḵāratî lâem bərîṯ šālwōm wəhišəbatî ḥayyâ-rā‘â min-hā’āreṣ wəyāšəḇû ḇammiḏəbār lāḇeṭ^aḥ wəyāšənû bayyə‘ārîm:

26 wənāṯatî ’wōṯām ûsəḇîḇwōṯ giḇə‘āṯî bərāḵâ wəhwōraḏətî hagešem bə‘itwō gišəmê ḇərāḵâ yihəyû:

27 wənāṯan ‘ēṣ haśśāḏeh ’eṯ-pirəywō wəhā’āreṣ titēn yəḇûlāh wəhāyû ‘al-’aḏəmāṯām lāḇeṭ^aḥ wəyāḏə‘û kî-’ănî yəhwâ bəšiḇərî ’eṯ-mōṭwōṯ ‘ullām wəhiṣṣalətîm mîyaḏ hā‘ōḇəḏîm bâem:

28 wəlō’-yihəyû ‘wōḏ baz lagwōyim wəḥayyaṯ hā’āreṣ lō’ ṯō’ḵəlēm wəyāšəḇû lāḇeṭ^aḥ wə’ên m^aḥărîḏ:

29 wahăqimōṯî lâem maṭṭā‘ ləšēm wəlō’-yihəyû ‘wōḏ ’ăsufê rā‘āḇ bā’āreṣ wəlō’-yiśə’û ‘wōḏ kəlimmaṯ hagwōyim:

30 wəyāḏə‘û kî ’ănî yəhwâ ’ĕlōhêhem ’itām wəhēmmâ ‘ammî bêṯ yiśərā’ēl nə’um ’ăḏōnāy yəhwih:

31 wə’atēn ṣō’nî ṣō’n marə‘îṯî ’āḏām ’atem ’ănî ’ĕlōhêḵem nə’um ’ăḏōnāy yəhwih: f