Sacred Texts  Bible  Index 
Polyglot  KJV  Sep  Vul 

Ezekiel (Yechezqel) Index
  Previous  Next 

Tanach (Hebrew): Ezekiel (Yechezqel) Chapter 30

1 ‏וַיְהִ֥י דְבַר־יְהוָ֖ה אֵלַ֥י לֵאמֹֽר׃

2 ‏בֶּן־אָדָ֕ם הִנָּבֵא֙ וְאָ֣מַרְתָּ֔ כֹּ֥ה אָמַ֖ר אֲדֹנָ֣י יְהוִ֑ה הֵילִ֖ילוּ הָ֥הּ לַיּֽוֹם׃

3 ‏כִּֽי־קָר֣וֹב י֔וֹם וְקָר֥וֹב י֖וֹם לַֽיהוָ֑ה י֣וֹם עָנָ֔ן עֵ֥ת גּוֹיִ֖ם יִֽהְיֶֽה׃

4 ‏וּבָאָ֥ה חֶ֙רֶב֙ בְּמִצְרַ֔יִם וְהָיְתָ֤ה חַלְחָלָה֙ בְּכ֔וּשׁ בִּנְפֹ֥ל חָלָ֖ל בְּמִצְרָ֑יִם וְלָקְח֣וּ הֲמוֹנָ֔הּ וְנֶהֶרְס֖וּ יְסוֹדֹתֶֽיהָ׃

5 ‏כּ֣וּשׁ וּפ֤וּט וְלוּד֙ וְכָל־הָעֶ֣רֶב וְכ֔וּב וּבְנֵ֖י אֶ֣רֶץ הַבְּרִ֑ית אִתָּ֖ם בַּחֶ֥רֶב יִפֹּֽלוּ׃ פ

6 ‏כֹּ֚ה אָמַ֣ר יְהוָ֔ה וְנָֽפְלוּ֙ סֹמְכֵ֣י מִצְרַ֔יִם וְיָרַ֖ד גְּא֣וֹן עֻזָּ֑הּ מִמִּגְדֹּ֣ל סְוֵנֵ֗ה בַּחֶ֙רֶב֙ יִפְּלוּ־בָ֔הּ נְאֻ֖ם אֲדֹנָ֥י יְהוִֽה׃

7 ‏וְנָשַׁ֕מּוּ בְּת֖וֹךְ אֲרָצ֣וֹת נְשַׁמּ֑וֹת וְעָרָ֕יו בְּתוֹךְ־עָרִ֥ים נַחֲרָב֖וֹת תִּֽהְיֶֽינָה׃

8 ‏וְיָדְע֖וּ כִּֽי־אֲנִ֣י יְהוָ֑ה בְּתִתִּי־אֵ֣שׁ בְּמִצְרַ֔יִם וְנִשְׁבְּר֖וּ כָּל־עֹזְרֶֽיהָ׃

9 ‏בַּיּ֣וֹם הַה֗וּא יֵצְא֨וּ מַלְאָכִ֤ים מִלְּפָנַי֙ בַּצִּ֔ים לְהַחֲרִ֖יד אֶת־כּ֣וּשׁ בֶּ֑טַח וְהָיְתָ֨ה חַלְחָלָ֤ה בָהֶם֙ בְּי֣וֹם מִצְרַ֔יִם כִּ֥י הִנֵּ֖ה בָּאָֽה׃ ס

10 ‏כֹּ֥ה אָמַ֖ר אֲדֹנָ֣י יְהוִ֑ה וְהִשְׁבַּתִּי֙ אֶת־הֲמ֣וֹן מִצְרַ֔יִם בְּיַ֖ד נְבוּכַדְרֶאצַּ֥ר מֶלֶךְ־בָּבֶֽל׃

11 ‏ה֠וּא וְעַמּ֤וֹ אִתּוֹ֙ עָרִיצֵ֣י גוֹיִ֔ם מֽוּבָאִ֖ים לְשַׁחֵ֣ת הָאָ֑רֶץ וְהֵרִ֤יקוּ חַרְבוֹתָם֙ עַל־מִצְרַ֔יִם וּמָלְא֥וּ אֶת־הָאָ֖רֶץ חָלָֽל׃

12 ‏וְנָתַתִּ֤י יְאֹרִים֙ חָֽרָבָ֔ה וּמָכַרְתִּ֥י אֶת־הָאָ֖רֶץ בְּיַד־רָעִ֑ים וַהֲשִׁמֹּתִ֞י אֶ֤רֶץ וּמְלֹאָהּ֙ בְּיַד־זָרִ֔ים אֲנִ֥י יְהוָ֖ה דִּבַּֽרְתִּי׃ ס

13 ‏כֹּֽה־אָמַ֞ר אֲדֹנָ֣י יְהוִ֗ה וְהַאֲבַדְתִּ֨י גִלּוּלִ֜ים וְהִשְׁבַּתִּ֤י אֱלִילִים֙ מִנֹּ֔ף וְנָשִׂ֥יא מֵאֶֽרֶץ־מִצְרַ֖יִם לֹ֣א יִֽהְיֶה־ע֑וֹד וְנָתַתִּ֥י יִרְאָ֖ה בְּאֶ֥רֶץ מִצְרָֽיִם׃

14 ‏וַהֲשִׁמֹּתִי֙ אֶת־פַּתְר֔וֹס וְנָתַ֥תִּי אֵ֖שׁ בְּצֹ֑עַן וְעָשִׂ֥יתִי שְׁפָטִ֖ים בְּנֹֽא׃

15 ‏וְשָׁפַכְתִּ֣י חֲמָתִ֔י עַל־סִ֖ין מָע֣וֹז מִצְרָ֑יִם וְהִכְרַתִּ֖י אֶת־הֲמ֥וֹן נֹֽא׃

16 ‏וְנָתַ֤תִּי אֵשׁ֙ בְּמִצְרַ֔יִם ח֤וּל תחיל תָּחוּל֙ סִ֔ין וְנֹ֖א תִּהְיֶ֣ה לְהִבָּקֵ֑עַ וְנֹ֖ף צָרֵ֥י יוֹמָֽם׃

17 ‏בַּח֥וּרֵי אָ֛וֶן וּפִי־בֶ֖סֶת בַּחֶ֣רֶב יִפֹּ֑לוּ וְהֵ֖נָּה בַּשְּׁבִ֥י תֵלַֽכְנָה׃

18 ‏וּבִֽתְחַפְנְחֵס֙ חָשַׂ֣ךְ הַיּ֔וֹם בְּשִׁבְרִי־שָׁם֙ אֶת־מֹט֣וֹת מִצְרַ֔יִם וְנִשְׁבַּת־בָּ֖הּ גְּא֣וֹן עֻזָּ֑הּ הִ֚יא עָנָ֣ן יְכַסֶּ֔נָּה וּבְנוֹתֶ֖יהָ בַּשְּׁבִ֥י תֵלַֽכְנָה׃

19 ‏וְעָשִׂ֥יתִי שְׁפָטִ֖ים בְּמִצְרָ֑יִם וְיָדְע֖וּ כִּֽי־אֲנִ֥י יְהוָֽה׃ פ

20 ‏וַיְהִ֗י בְּאַחַ֤ת עֶשְׂרֵה֙ שָׁנָ֔ה בָּֽרִאשׁ֖וֹן בְּשִׁבְעָ֣ה לַחֹ֑דֶשׁ הָיָ֥ה דְבַר־יְהוָ֖ה אֵלַ֥י לֵאמֹֽר׃

21 ‏בֶּן־אָדָ֕ם אֶת־זְר֛וֹעַ פַּרְעֹ֥ה מֶֽלֶךְ־מִצְרַ֖יִם שָׁבָ֑רְתִּי וְהִנֵּ֣ה לֹֽא־חֻ֠בְּשָׁה לָתֵ֨ת רְפֻא֜וֹת לָשׂ֥וּם חִתּ֛וּל לְחָבְשָׁ֥הּ לְחָזְקָ֖הּ לִתְפֹּ֥שׂ בֶּחָֽרֶב׃ ס

22 ‏לָכֵ֞ן כֹּה־אָמַ֣ר׀ אֲדֹנָ֣י יְהוִֹ֗ה הִנְנִי֙ אֶל־פַּרְעֹ֣ה מֶֽלֶךְ־מִצְרַ֔יִם וְשָֽׁבַרְתִּי֙ אֶת־זְרֹ֣עֹתָ֔יו אֶת־הַחֲזָקָ֖ה וְאֶת־הַנִּשְׁבָּ֑רֶת וְהִפַּלְתִּ֥י אֶת־הַחֶ֖רֶב מִיָּדֽוֹ׃

23 ‏וַהֲפִצוֹתִ֥י אֶת־מִצְרַ֖יִם בַּגּוֹיִ֑ם וְזֵרִיתִ֖ם בָּאֲרָצֽוֹת׃

24 ‏וְחִזַּקְתִּ֗י אֶת־זְרֹעוֹת֙ מֶ֣לֶךְ בָּבֶ֔ל וְנָתַתִּ֥י אֶת־חַרְבִּ֖י בְּיָד֑וֹ וְשָׁבַרְתִּי֙ אֶת־זְרֹע֣וֹת פַּרְעֹ֔ה וְנָאַ֛ק נַאֲק֥וֹת חָלָ֖ל לְפָנָֽיו׃

25 ‏וְהַחֲזַקְתִּ֗י אֶת־זְרֹעוֹת֙ מֶ֣לֶךְ בָּבֶ֔ל וּזְרֹע֥וֹת פַּרְעֹ֖ה תִּפֹּ֑לְנָה וְֽיָדְע֞וּ כִּֽי־אֲנִ֣י יְהוָ֗ה בְּתִתִּ֤י חַרְבִּי֙ בְּיַ֣ד מֶֽלֶךְ־בָּבֶ֔ל וְנָטָ֥ה אוֹתָ֖הּ אֶל־אֶ֥רֶץ מִצְרָֽיִם׃

26 ‏וַהֲפִצוֹתִ֤י אֶת־מִצְרַ֙יִם֙ בַּגּוֹיִ֔ם וְזֵרִיתִ֥י אוֹתָ֖ם בָּאֲרָצ֑וֹת וְיָדְע֖וּ כִּֽי־אֲנִ֥י יְהוָֽה׃ ס

1 wayəhî ḏəḇar-yəhwâ ’ēlay lē’mōr:

2 ben-’āḏām hinnāḇē’ wə’āmarətā kōh ’āmar ’ăḏōnāy yəhwih hêlîlû hāh layywōm:

3 kî-qārwōḇ ywōm wəqārwōḇ ywōm layhwâ ywōm ‘ānān ‘ēṯ gwōyim yihəyeh:

4 ûḇā’â ḥereḇ bəmiṣərayim wəhāyəṯâ ḥaləḥālâ bəḵûš binəfōl ḥālāl bəmiṣərāyim wəlāqəḥû hămwōnāh wəneherəsû yəswōḏōṯeyhā:

5 kûš ûfûṭ wəlûḏ wəḵāl-hā‘ereḇ wəḵûḇ ûḇənê ’ereṣ habərîṯ ’itām baḥereḇ yipōlû: f

6 kōh ’āmar yəhwâ wənāfəlû sōməḵê miṣərayim wəyāraḏ gə’wōn ‘uzzāh mimmiḡədōl səwēnēh baḥereḇ yipəlû-ḇāh nə’um ’ăḏōnāy yəhwih:

7 wənāšammû bəṯwōḵə ’ărāṣwōṯ nəšammwōṯ wə‘ārāyw bəṯwōḵə-‘ārîm naḥărāḇwōṯ tihəyeynâ:

8 wəyāḏə‘û kî-’ănî yəhwâ bəṯitî-’ēš bəmiṣərayim wənišəbərû kāl-‘ōzəreyhā:

9 bayywōm hahû’ yēṣə’û malə’āḵîm milləfānay baṣṣîm ləhaḥărîḏ ’eṯ-kûš beṭaḥ wəhāyəṯâ ḥaləḥālâ ḇâem bəywōm miṣərayim kî hinnēh bā’â: s

10 kōh ’āmar ’ăḏōnāy yəhwih wəhišəbatî ’eṯ-hămwōn miṣərayim bəyaḏ nəḇûḵaḏəre’ṣṣar meleḵə-bāḇel:

11 hû’ wə‘ammwō ’itwō ‘ārîṣê ḡwōyim mûḇā’îm ləšaḥēṯ hā’āreṣ wəhērîqû ḥarəḇwōṯām ‘al-miṣərayim ûmālə’û ’eṯ-hā’āreṣ ḥālāl:

12 wənāṯatî yə’ōrîm ḥārāḇâ ûmāḵarətî ’eṯ-hā’āreṣ bəyaḏ-rā‘îm wahăšimmōṯî ’ereṣ ûməlō’āh bəyaḏ-zārîm ’ănî yəhwâ dibarətî: s

13 kōh-’āmar ’ăḏōnāy yəhwih wəha’ăḇaḏətî ḡillûlîm wəhišəbatî ’ĕlîlîm minnōf wənāśî’ mē’ereṣ-miṣərayim lō’ yihəyeh-‘wōḏ wənāṯatî yirə’â bə’ereṣ miṣərāyim:

14 wahăšimmōṯî ’eṯ-paṯərwōs wənāṯatî ’ēš bəṣō‘an wə‘āśîṯî šəfāṭîm bənō’:

15 wəšāfaḵətî ḥămāṯî ‘al-sîn mā‘wōz miṣərāyim wəhiḵəratî ’eṯ-hămwōn nō’:

16 wənāṯatî ’ēš bəmiṣərayim ḥûl tāḥîl tāḥûl sîn wənō’ tihəyeh ləhibāqē‘a wənōf ṣārê ywōmām:

17 baḥûrê ’āwen ûfî-ḇeseṯ baḥereḇ yipōlû wəhēnnâ baššəḇî ṯēlaḵənâ:

18 ûḇiṯəḥafənəḥēs ḥāśaḵə hayywōm bəšiḇərî-šām ’eṯ-mōṭwōṯ miṣərayim wənišəbaṯ-bāh gə’wōn ‘uzzāh hî’ ‘ānān yəḵassennâ ûḇənwōṯeyhā baššəḇî ṯēlaḵənâ:

19 wə‘āśîṯî šəfāṭîm bəmiṣərāyim wəyāḏə‘û kî-’ănî yəhwâ: f

20 wayəhî bə’aḥaṯ ‘eśərēh šānâ bāri’šwōn bəšiḇə‘â laḥōḏeš hāyâ ḏəḇar-yəhwâ ’ēlay lē’mōr:

21 ben-’āḏām ’eṯ-zərwō‘a parə‘ōh meleḵə-miṣərayim šāḇārətî wəhinnēh lō’-ḥubəšâ lāṯēṯ rəfu’wōṯ lāśûm ḥitûl ləḥāḇəšāh ləḥāzəqāh liṯəpōś beḥāreḇ: s

22 lāḵēn kōh-’āmar| ’ăḏōnāy yəhwōih hinənî ’el-parə‘ōh meleḵə-miṣərayim wəšāḇarətî ’eṯ-zərō‘ōṯāyw ’eṯ-haḥăzāqâ wə’eṯ-hannišəbāreṯ wəhipalətî ’eṯ-haḥereḇ mîyāḏwō:

23 wahăfiṣwōṯî ’eṯ-miṣərayim bagwōyim wəzērîṯim bā’ărāṣwōṯ:

24 wəḥizzaqətî ’eṯ-zərō‘wōṯ meleḵə bāḇel wənāṯatî ’eṯ-ḥarəbî bəyāḏwō wəšāḇarətî ’eṯ-zərō‘wōṯ parə‘ōh wənā’aq na’ăqwōṯ ḥālāl ləfānāyw:

25 wəhaḥăzaqətî ’eṯ-zərō‘wōṯ meleḵə bāḇel ûzərō‘wōṯ parə‘ōh tipōlənâ wəyāḏə‘û kî-’ănî yəhwâ bəṯitî ḥarəbî bəyaḏ meleḵə-bāḇel wənāṭâ ’wōṯāh ’el-’ereṣ miṣərāyim:

26 wahăfiṣwōṯî ’eṯ-miṣərayim bagwōyim wəzērîṯî ’wōṯām bā’ărāṣwōṯ wəyāḏə‘û kî-’ănî yəhwâ: s


Next: Ezekiel (Yechezqel) Chapter 31