Sacred Texts  Bible  Index 
Polyglot  KJV  Sep  Vul 

Exodus (Shemot) Index
  Previous  Next 

Tanach (Hebrew): Exodus (Shemot) Chapter 38

1 ‏וַיַּ֛עַשׂ אֶת־מִזְבַּ֥ח הָעֹלָ֖ה עֲצֵ֣י שִׁטִּ֑ים חָמֵשׁ֩ אַמּ֨וֹת אָרְכּ֜וֹ וְחָֽמֵשׁ־אַמּ֤וֹת רָחְבּוֹ֙ רָב֔וּעַ וְשָׁלֹ֥שׁ אַמּ֖וֹת קֹמָתֽוֹ׃

2 ‏וַיַּ֣עַשׂ קַרְנֹתָ֗יו עַ֚ל אַרְבַּ֣ע פִּנֹּתָ֔יו מִמֶּ֖נּוּ הָי֣וּ קַרְנֹתָ֑יו וַיְצַ֥ף אֹת֖וֹ נְחֹֽשֶׁת׃

3 ‏וַיַּ֜עַשׂ אֶֽת־כָּל־כְּלֵ֣י הַמִּזְבֵּ֗חַ אֶת־הַסִּירֹ֤ת וְאֶת־הַיָּעִים֙ וְאֶת־הַמִּזְרָקֹ֔ת אֶת־הַמִּזְלָגֹ֖ת וְאֶת־הַמַּחְתֹּ֑ת כָּל־כֵּלָ֖יו עָשָׂ֥ה נְחֹֽשֶׁת׃

4 ‏וַיַּ֤עַשׂ לַמִּזְבֵּ֙חַ֙ מִכְבָּ֔ר מַעֲשֵׂ֖ה רֶ֣שֶׁת נְחֹ֑שֶׁת תַּ֧חַת כַּרְכֻּבּ֛וֹ מִלְּמַ֖טָּה עַד־חֶצְיֽוֹ׃

5 ‏וַיִּצֹ֞ק אַרְבַּ֧ע טַבָּעֹ֛ת בְּאַרְבַּ֥ע הַקְּצָוֹ֖ת לְמִכְבַּ֣ר הַנְּחֹ֑שֶׁת בָּתִּ֖ים לַבַּדִּֽים׃

6 ‏וַיַּ֥עַשׂ אֶת־הַבַּדִּ֖ים עֲצֵ֣י שִׁטִּ֑ים וַיְצַ֥ף אֹתָ֖ם נְחֹֽשֶׁת׃

7 ‏וַיָּבֵ֨א אֶת־הַבַּדִּ֜ים בַּטַּבָּעֹ֗ת עַ֚ל צַלְעֹ֣ת הַמִּזְבֵּ֔חַ לָשֵׂ֥את אֹת֖וֹ בָּהֶ֑ם נְב֥וּב לֻחֹ֖ת עָשָׂ֥ה אֹתֽוֹ׃ ס

8 ‏וַיַּ֗עַשׂ אֵ֚ת הַכִּיּ֣וֹר נְחֹ֔שֶׁת וְאֵ֖ת כַּנּ֣וֹ נְחֹ֑שֶׁת בְּמַרְאֹת֙ הַצֹּ֣בְאֹ֔ת אֲשֶׁ֣ר צָֽבְא֔וּ פֶּ֖תַח אֹ֥הֶל מוֹעֵֽד׃ ס

9 ‏וַיַּ֖עַשׂ אֶת־הֶחָצֵ֑ר לִפְאַ֣ת׀ נֶ֣גֶב תֵּימָ֗נָה קַלְעֵ֤י הֶֽחָצֵר֙ שֵׁ֣שׁ מָשְׁזָ֔ר מֵאָ֖ה בָּאַמָּֽה׃

10 ‏עַמּוּדֵיהֶ֣ם עֶשְׂרִ֔ים וְאַדְנֵיהֶ֥ם עֶשְׂרִ֖ים נְחֹ֑שֶׁת וָוֵ֧י הָעַמֻּדִ֛ים וַחֲשֻׁקֵיהֶ֖ם כָּֽסֶף׃

11 ‏וְלִפְאַ֤ת צָפוֹן֙ מֵאָ֣ה בָֽאַמָּ֔ה עַמּוּדֵיהֶ֣ם עֶשְׂרִ֔ים וְאַדְנֵיהֶ֥ם עֶשְׂרִ֖ים נְחֹ֑שֶׁת וָוֵ֧י הָֽעַמּוּדִ֛ים וַחֲשֻׁקֵיהֶ֖ם כָּֽסֶף׃

12 ‏וְלִפְאַת־יָ֗ם קְלָעִים֙ חֲמִשִּׁ֣ים בָּֽאַמָּ֔ה עַמּוּדֵיהֶ֥ם עֲשָׂרָ֔ה וְאַדְנֵיהֶ֖ם עֲשָׂרָ֑ה וָוֵ֧י הָעַמֻּדִ֛ים וַחֲשׁוּקֵיהֶ֖ם כָּֽסֶף׃

13 ‏וְלִפְאַ֛ת קֵ֥דְמָה מִזְרָ֖חָה חֲמִשִּׁ֥ים אַמָּֽה׃

14 ‏קְלָעִ֛ים חֲמֵשׁ־עֶשְׂרֵ֥ה אַמָּ֖ה אֶל־הַכָּתֵ֑ף עַמּוּדֵיהֶ֣ם שְׁלֹשָׁ֔ה וְאַדְנֵיהֶ֖ם שְׁלֹשָֽׁה׃

15 ‏וְלַכָּתֵ֣ף הַשֵּׁנִ֗ית מִזֶּ֤ה וּמִזֶּה֙ לְשַׁ֣עַר הֶֽחָצֵ֔ר קְלָעִ֕ים חֲמֵ֥שׁ עֶשְׂרֵ֖ה אַמָּ֑ה עַמֻּדֵיהֶ֣ם שְׁלֹשָׁ֔ה וְאַדְנֵיהֶ֖ם שְׁלֹשָֽׁה׃

16 ‏כָּל־קַלְעֵ֧י הֶחָצֵ֛ר סָבִ֖יב שֵׁ֥שׁ מָשְׁזָֽר׃

17 ‏וְהָאֲדָנִ֣ים לָֽעַמֻּדִים֮ נְחֹשֶׁת֒ וָוֵ֨י הָֽעַמּוּדִ֜ים וַחֲשׁוּקֵיהֶם֙ כֶּ֔סֶף וְצִפּ֥וּי רָאשֵׁיהֶ֖ם כָּ֑סֶף וְהֵם֙ מְחֻשָּׁקִ֣ים כֶּ֔סֶף כֹּ֖ל עַמֻּדֵ֥י הֶחָצֵֽר׃

18 ‏וּמָסַ֞ךְ שַׁ֤עַר הֶחָצֵר֙ מַעֲשֵׂ֣ה רֹקֵ֔ם תְּכֵ֧לֶת וְאַרְגָּמָ֛ן וְתוֹלַ֥עַת שָׁנִ֖י וְשֵׁ֣שׁ מָשְׁזָ֑ר וְעֶשְׂרִ֤ים אַמָּה֙ אֹ֔רֶךְ וְקוֹמָ֤ה בְרֹ֙חַב֙ חָמֵ֣שׁ אַמּ֔וֹת לְעֻמַּ֖ת קַלְעֵ֥י הֶחָצֵֽר׃

19 ‏וְעַמֻּֽדֵיהֶם֙ אַרְבָּעָ֔ה וְאַדְנֵיהֶ֥ם אַרְבָּעָ֖ה נְחֹ֑שֶׁת וָוֵיהֶ֣ם כֶּ֔סֶף וְצִפּ֧וּי רָאשֵׁיהֶ֛ם וַחֲשֻׁקֵיהֶ֖ם כָּֽסֶף׃

20 ‏וְֽכָל־הַיְתֵדֹ֞ת לַמִּשְׁכָּ֧ן וְלֶחָצֵ֛ר סָבִ֖יב נְחֹֽשֶׁת׃ ס

21 ‏אֵ֣לֶּה פְקוּדֵ֤י הַמִּשְׁכָּן֙ מִשְׁכַּ֣ן הָעֵדֻ֔ת אֲשֶׁ֥ר פֻּקַּ֖ד עַל־פִּ֣י מֹשֶׁ֑ה עֲבֹדַת֙ הַלְוִיִּ֔ם בְּיַד֙ אִֽיתָמָ֔ר בֶּֽן־אַהֲרֹ֖ן הַכֹּהֵֽן׃

22 ‏וּבְצַלְאֵ֛ל בֶּן־אוּרִ֥י בֶן־ח֖וּר לְמַטֵּ֣ה יְהוּדָ֑ה עָשָׂ֕ה אֵ֛ת כָּל־אֲשֶׁר־צִוָּ֥ה יְהוָ֖ה אֶת־מֹשֶֽׁה׃

23 ‏וְאִתּ֗וֹ אָהֳלִיאָ֞ב בֶּן־אֲחִיסָמָ֛ךְ לְמַטֵּה־דָ֖ן חָרָ֣שׁ וְחֹשֵׁ֑ב וְרֹקֵ֗ם בַּתְּכֵ֙לֶת֙ וּבָֽאַרְגָּמָ֔ן וּבְתוֹלַ֥עַת הַשָּׁנִ֖י וּבַשֵּֽׁשׁ׃ ס

24 ‏כָּל־הַזָּהָ֗ב הֶֽעָשׂוּי֙ לַמְּלָאכָ֔ה בְּכֹ֖ל מְלֶ֣אכֶת הַקֹּ֑דֶשׁ וַיְהִ֣י׀ זְהַ֣ב הַתְּנוּפָ֗ה תֵּ֤שַׁע וְעֶשְׂרִים֙ כִּכָּ֔ר וּשְׁבַ֨ע מֵא֧וֹת וּשְׁלֹשִׁ֛ים שֶׁ֖קֶל בְּשֶׁ֥קֶל הַקֹּֽדֶשׁ׃

25 ‏וְכֶ֛סֶף פְּקוּדֵ֥י הָעֵדָ֖ה מְאַ֣ת כִּכָּ֑ר וְאֶלֶף֩ וּשְׁבַ֨ע מֵא֜וֹת וַחֲמִשָּׁ֧ה וְשִׁבְעִ֛ים שֶׁ֖קֶל בְּשֶׁ֥קֶל הַקֹּֽדֶשׁ׃

26 ‏בֶּ֚קַע לַגֻּלְגֹּ֔לֶת מַחֲצִ֥ית הַשֶּׁ֖קֶל בְּשֶׁ֣קֶל הַקֹּ֑דֶשׁ לְכֹ֨ל הָעֹבֵ֜ר עַל־הַפְּקֻדִ֗ים מִבֶּ֨ן עֶשְׂרִ֤ים שָׁנָה֙ וָמַ֔עְלָה לְשֵׁשׁ־מֵא֥וֹת אֶ֙לֶף֙ וּשְׁלֹ֣שֶׁת אֲלָפִ֔ים וַחֲמֵ֥שׁ מֵא֖וֹת וַחֲמִשִּֽׁים׃

27 ‏וַיְהִ֗י מְאַת֙ כִּכַּ֣ר הַכֶּ֔סֶף לָצֶ֗קֶת אֵ֚ת אַדְנֵ֣י הַקֹּ֔דֶשׁ וְאֵ֖ת אַדְנֵ֣י הַפָּרֹ֑כֶת מְאַ֧ת אֲדָנִ֛ים לִמְאַ֥ת הַכִּכָּ֖ר כִּכָּ֥ר לָאָֽדֶן׃

28 ‏וְאֶת־הָאֶ֜לֶף וּשְׁבַ֤ע הַמֵּאוֹת֙ וַחֲמִשָּׁ֣ה וְשִׁבְעִ֔ים עָשָׂ֥ה וָוִ֖ים לָעַמּוּדִ֑ים וְצִפָּ֥ה רָאשֵׁיהֶ֖ם וְחִשַּׁ֥ק אֹתָֽם׃

29 ‏וּנְחֹ֥שֶׁת הַתְּנוּפָ֖ה שִׁבְעִ֣ים כִּכָּ֑ר וְאַלְפַּ֥יִם וְאַרְבַּע־מֵא֖וֹת שָֽׁקֶל׃

30 ‏וַיַּ֣עַשׂ בָּ֗הּ אֶת־אַדְנֵי֙ פֶּ֚תַח אֹ֣הֶל מוֹעֵ֔ד וְאֵת֙ מִזְבַּ֣ח הַנְּחֹ֔שֶׁת וְאֶת־מִכְבַּ֥ר הַנְּחֹ֖שֶׁת אֲשֶׁר־ל֑וֹ וְאֵ֖ת כָּל־כְּלֵ֥י הַמִּזְבֵּֽחַ׃

31 ‏וְאֶת־אַדְנֵ֤י הֶֽחָצֵר֙ סָבִ֔יב וְאֶת־אַדְנֵ֖י שַׁ֣עַר הֶחָצֵ֑ר וְאֵ֨ת כָּל־יִתְדֹ֧ת הַמִּשְׁכָּ֛ן וְאֶת־כָּל־יִתְדֹ֥ת הֶחָצֵ֖ר סָבִֽיב׃

1 wayya‘aś ’eṯ-mizəbaḥ hā‘ōlâ ‘ăṣê šiṭṭîm ḥāmēš ’ammwōṯ ’ārəkwō wəḥāmēš-’ammwōṯ rāḥəbwō rāḇû‘a wəšālōš ’ammwōṯ qōmāṯwō:

2 wayya‘aś qarənōṯāyw ‘al ’arəba‘ pinnōṯāyw mimmennû hāyû qarənōṯāyw wayəṣaf ’ōṯwō nəḥōšeṯ:

3 wayya‘aś ’eṯ-kāl-kəlê hammizəbēḥa ’eṯ-hassîrōṯ wə’eṯ-hayyā‘îm wə’eṯ-hammizərāqōṯ ’eṯ-hammizəlāḡōṯ wə’eṯ-hammaḥətōṯ kāl-kēlāyw ‘āśâ nəḥōšeṯ:

4 wayya‘aś lammizəbēḥa miḵəbār ma‘ăśēh rešeṯ nəḥōšeṯ taḥaṯ karəkubwō milləmaṭṭâ ‘aḏ-ḥeṣəywō:

5 wayyiṣōq ’arəba‘ ṭabā‘ōṯ bə’arəba‘ haqqəṣāwōṯ ləmiḵəbar hannəḥōšeṯ bātîm labadîm:

6 wayya‘aś ’eṯ-habadîm ‘ăṣê šiṭṭîm wayəṣaf ’ōṯām nəḥōšeṯ:

7 wayyāḇē’ ’eṯ-habadîm baṭṭabā‘ōṯ ‘al ṣalə‘ōṯ hammizəbēḥa lāśē’ṯ ’ōṯwō bâem nəḇûḇ luḥōṯ ‘āśâ ’ōṯwō: s

8 wayya‘aś ’ēṯ hakîywōr nəḥōšeṯ wə’ēṯ kannwō nəḥōšeṯ bəmarə’ōṯ haṣṣōḇə’ōṯ ’ăšer ṣāḇə’û peṯaḥ ’ōhel mwō‘ēḏ: s

9 wayya‘aś ’eṯ-heḥāṣēr lifə’aṯ| neḡeḇ têmānâ qalə‘ê heḥāṣēr šēš māšəzār mē’â bā’ammâ:

10 ‘ammûḏêhem ‘eśərîm wə’aḏənêhem ‘eśərîm nəḥōšeṯ wāwê hā‘ammuḏîm waḥăšuqêhem kāsef:

11 wəlifə’aṯ ṣāfwōn mē’â ḇā’ammâ ‘ammûḏêhem ‘eśərîm wə’aḏənêhem ‘eśərîm nəḥōšeṯ wāwê hā‘ammûḏîm waḥăšuqêhem kāsef:

12 wəlifə’aṯ-yām qəlā‘îm ḥămiššîm bā’ammâ ‘ammûḏêhem ‘ăśārâ wə’aḏənêhem ‘ăśārâ wāwê hā‘ammuḏîm waḥăšûqêhem kāsef:

13 wəlifə’aṯ qēḏəmâ mizərāḥâ ḥămiššîm ’ammâ:

14 qəlā‘îm ḥămēš-‘eśərēh ’ammâ ’el-hakāṯēf ‘ammûḏêhem šəlōšâ wə’aḏənêhem šəlōšâ:

15 wəlakāṯēf haššēnîṯ mizzeh ûmizzeh ləša‘ar heḥāṣēr qəlā‘îm ḥămēš ‘eśərēh ’ammâ ‘ammuḏêhem šəlōšâ wə’aḏənêhem šəlōšâ:

16 kāl-qalə‘ê heḥāṣēr sāḇîḇ šēš māšəzār:

17 wəhā’ăḏānîm lā‘ammuḏîm nəḥōšeṯ wāwê hā‘ammûḏîm waḥăšûqêhem kesef wəṣipûy rā’šêhem kāsef wəhēm məḥuššāqîm kesef kōl ‘ammuḏê heḥāṣēr:

18 ûmāsaḵə ša‘ar heḥāṣēr ma‘ăśēh rōqēm təḵēleṯ wə’arəgāmān wəṯwōla‘aṯ šānî wəšēš māšəzār wə‘eśərîm ’ammâ ’ōreḵə wəqwōmâ ḇərōḥaḇ ḥāmēš ’ammwōṯ lə‘ummaṯ qalə‘ê heḥāṣēr:

19 wə‘ammuḏêhem ’arəbā‘â wə’aḏənêhem ’arəbā‘â nəḥōšeṯ wāwêhem kesef wəṣipûy rā’šêhem waḥăšuqêhem kāsef:

20 wəḵāl-hayəṯēḏōṯ lammišəkān wəleḥāṣēr sāḇîḇ nəḥōšeṯ: s

21 ’ēlleh fəqûḏê hammišəkān mišəkan hā‘ēḏuṯ ’ăšer puqqaḏ ‘al-pî mōšeh ‘ăḇōḏaṯ haləwîyim bəyaḏ ’îṯāmār ben-’ahărōn hakōhēn:

22 ûḇəṣalə’ēl ben-’ûrî ḇen-ḥûr ləmaṭṭēh yəhûḏâ ‘āśâ ’ēṯ kāl-’ăšer-ṣiûâ yəhwâ ’eṯ-mōšeh:

23 wə’itwō ’âŏlî’āḇ ben-’ăḥîsāmāḵə ləmaṭṭēh-ḏān ḥārāš wəḥōšēḇ wərōqēm batəḵēleṯ ûḇā’arəgāmān ûḇəṯwōla‘aṯ haššānî ûḇaššēš: s

24 kāl-hazzâāḇ he‘āśûy lamməlā’ḵâ bəḵōl məle’ḵeṯ haqqōḏeš wayəhî| zəhaḇ hatənûfâ tēša‘ wə‘eśərîm kikār ûšəḇa‘ mē’wōṯ ûšəlōšîm šeqel bəšeqel haqqōḏeš:

25 wəḵesef pəqûḏê hā‘ēḏâ mə’aṯ kikār wə’elef ûšəḇa‘ mē’wōṯ waḥămiššâ wəšiḇə‘îm šeqel bəšeqel haqqōḏeš:

26 beqa‘ laguləgōleṯ maḥăṣîṯ haššeqel bəšeqel haqqōḏeš ləḵōl hā‘ōḇēr ‘al-hapəquḏîm miben ‘eśərîm šānâ wāma‘əlâ ləšēš-mē’wōṯ ’elef ûšəlōšeṯ ’ălāfîm waḥămēš mē’wōṯ waḥămiššîm:

27 wayəhî mə’aṯ kikar hakesef lāṣeqeṯ ’ēṯ ’aḏənê haqqōḏeš wə’ēṯ ’aḏənê hapārōḵeṯ mə’aṯ ’ăḏānîm limə’aṯ hakikār kikār lā’āḏen:

28 wə’eṯ-hā’elef ûšəḇa‘ hammē’wōṯ waḥămiššâ wəšiḇə‘îm ‘āśâ wāwîm lā‘ammûḏîm wəṣipâ rā’šêhem wəḥiššaq ’ōṯām:

29 ûnəḥōšeṯ hatənûfâ šiḇə‘îm kikār wə’aləpayim wə’arəba‘-mē’wōṯ šāqel:

30 wayya‘aś bāh ’eṯ-’aḏənê peṯaḥ ’ōhel mwō‘ēḏ wə’ēṯ mizəbaḥ hannəḥōšeṯ wə’eṯ-miḵəbar hannəḥōšeṯ ’ăšer-lwō wə’ēṯ kāl-kəlê hammizəbēḥa:

31 wə’eṯ-’aḏənê heḥāṣēr sāḇîḇ wə’eṯ-’aḏənê ša‘ar heḥāṣēr wə’ēṯ kāl-yiṯəḏōṯ hammišəkān wə’eṯ-kāl-yiṯəḏōṯ heḥāṣēr sāḇîḇ:


Next: Exodus (Shemot) Chapter 39