Sacred Texts  Bible  Index 
Polyglot  KJV  Sep  Vul 

Exodus (Shemot) Index
  Previous  Next 

Tanach (Hebrew): Exodus (Shemot) Chapter 37

1 ‏וַיַּ֧עַשׂ בְּצַלְאֵ֛ל אֶת־הָאָרֹ֖ן עֲצֵ֣י שִׁטִּ֑ים אַמָּתַ֨יִם וָחֵ֜צִי אָרְכּ֗וֹ וְאַמָּ֤ה וָחֵ֙צִי֙ רָחְבּ֔וֹ וְאַמָּ֥ה וָחֵ֖צִי קֹמָתֽוֹ׃

2 ‏וַיְצַפֵּ֛הוּ זָהָ֥ב טָה֖וֹר מִבַּ֣יִת וּמִח֑וּץ וַיַּ֥עַשׂ ל֛וֹ זֵ֥ר זָהָ֖ב סָבִֽיב׃

3 ‏וַיִּצֹ֣ק ל֗וֹ אַרְבַּע֙ טַבְּעֹ֣ת זָהָ֔ב עַ֖ל אַרְבַּ֣ע פַּעֲמֹתָ֑יו וּשְׁתֵּ֣י טַבָּעֹ֗ת עַל־צַלְעוֹ֙ הָֽאֶחָ֔ת וּשְׁתֵּי֙ טַבָּע֔וֹת עַל־צַלְע֖וֹ הַשֵּׁנִֽית׃

4 ‏וַיַּ֥עַשׂ בַּדֵּ֖י עֲצֵ֣י שִׁטִּ֑ים וַיְצַ֥ף אֹתָ֖ם זָהָֽב׃

5 ‏וַיָּבֵ֤א אֶת־הַבַּדִּים֙ בַּטַּבָּעֹ֔ת עַ֖ל צַלְעֹ֣ת הָאָרֹ֑ן לָשֵׂ֖את אֶת־הָאָרֹֽן׃

6 ‏וַיַּ֥עַשׂ כַּפֹּ֖רֶת זָהָ֣ב טָה֑וֹר אַמָּתַ֤יִם וָחֵ֙צִי֙ אָרְכָּ֔הּ וְאַמָּ֥ה וָחֵ֖צִי רָחְבָּֽהּ׃

7 ‏וַיַּ֛עַשׂ שְׁנֵ֥י כְרֻבִ֖ים זָהָ֑ב מִקְשָׁה֙ עָשָׂ֣ה אֹתָ֔ם מִשְּׁנֵ֖י קְצ֥וֹת הַכַּפֹּֽרֶת׃

8 ‏כְּרוּב־אֶחָ֤ד מִקָּצָה֙ מִזֶּ֔ה וּכְרוּב־אֶחָ֥ד מִקָּצָ֖ה מִזֶּ֑ה מִן־הַכַּפֹּ֛רֶת עָשָׂ֥ה אֶת־הַכְּרֻבִ֖ים מִשְּׁנֵ֥י קצוותו קְצוֹתָֽיו׃

9 ‏וַיִּהְי֣וּ הַכְּרֻבִים֩ פֹּרְשֵׂ֨י כְנָפַ֜יִם לְמַ֗עְלָה סֹֽכְכִ֤ים בְּכַנְפֵיהֶם֙ עַל־הַכַּפֹּ֔רֶת וּפְנֵיהֶ֖ם אִ֣ישׁ אֶל־אָחִ֑יו אֶל־הַכַּפֹּ֔רֶת הָי֖וּ פְּנֵ֥י הַכְּרֻבִֽים׃ פ

10 ‏וַיַּ֥עַשׂ אֶת־הַשֻּׁלְחָ֖ן עֲצֵ֣י שִׁטִּ֑ים אַמָּתַ֤יִם אָרְכּוֹ֙ וְאַמָּ֣ה רָחְבּ֔וֹ וְאַמָּ֥ה וָחֵ֖צִי קֹמָתֽוֹ׃

11 ‏וַיְצַ֥ף אֹת֖וֹ זָהָ֣ב טָה֑וֹר וַיַּ֥עַשׂ ל֛וֹ זֵ֥ר זָהָ֖ב סָבִֽיב׃

12 ‏וַיַּ֨עַשׂ ל֥וֹ מִסְגֶּ֛רֶת טֹ֖פַח סָבִ֑יב וַיַּ֧עַשׂ זֵר־זָהָ֛ב לְמִסְגַּרְתּ֖וֹ סָבִֽיב׃

13 ‏וַיִּצֹ֣ק ל֔וֹ אַרְבַּ֖ע טַבְּעֹ֣ת זָהָ֑ב וַיִּתֵּן֙ אֶת־הַטַּבָּעֹ֔ת עַ֚ל אַרְבַּ֣ע הַפֵּאֹ֔ת אֲשֶׁ֖ר לְאַרְבַּ֥ע רַגְלָֽיו׃

14 ‏לְעֻמַּת֙ הַמִּסְגֶּ֔רֶת הָי֖וּ הַטַּבָּעֹ֑ת בָּתִּים֙ לַבַּדִּ֔ים לָשֵׂ֖את אֶת־הַשֻּׁלְחָֽן׃

15 ‏וַיַּ֤עַשׂ אֶת־הַבַּדִּים֙ עֲצֵ֣י שִׁטִּ֔ים וַיְצַ֥ף אֹתָ֖ם זָהָ֑ב לָשֵׂ֖את אֶת־הַשֻּׁלְחָֽן׃

16 ‏וַיַּ֜עַשׂ אֶֽת־הַכֵּלִ֣ים׀ אֲשֶׁ֣ר עַל־הַשֻּׁלְחָ֗ן אֶת־קְעָרֹתָ֤יו וְאֶת־כַּפֹּתָיו֙ וְאֵת֙ מְנַקִּיֹּתָ֔יו וְאֶת־הַקְּשָׂוֹ֔ת אֲשֶׁ֥ר יֻסַּ֖ךְ בָּהֵ֑ן זָהָ֖ב טָהֽוֹר׃ פ

17 ‏וַיַּ֥עַשׂ אֶת־הַמְּנֹרָ֖ה זָהָ֣ב טָה֑וֹר מִקְשָׁ֞ה עָשָׂ֤ה אֶת־הַמְּנֹרָה֙ יְרֵכָ֣הּ וְקָנָ֔הּ גְּבִיעֶ֛יהָ כַּפְתֹּרֶ֥יהָ וּפְרָחֶ֖יהָ מִמֶּ֥נָּה הָיֽוּ׃

18 ‏וְשִׁשָּׁ֣ה קָנִ֔ים יֹצְאִ֖ים מִצִּדֶּ֑יהָ שְׁלֹשָׁ֣ה׀ קְנֵ֣י מְנֹרָ֗ה מִצִּדָּהּ֙ הָֽאֶחָ֔ד וּשְׁלֹשָׁה֙ קְנֵ֣י מְנֹרָ֔ה מִצִּדָּ֖הּ הַשֵּׁנִֽי׃

19 ‏שְׁלֹשָׁ֣ה גְ֠בִעִים מְֽשֻׁקָּדִ֞ים בַּקָּנֶ֣ה הָאֶחָד֮ כַּפְתֹּ֣ר וָפֶרַח֒ וּשְׁלֹשָׁ֣ה גְבִעִ֗ים מְשֻׁקָּדִ֛ים בְּקָנֶ֥ה אֶחָ֖ד כַּפְתֹּ֣ר וָפָ֑רַח כֵּ֚ן לְשֵׁ֣שֶׁת הַקָּנִ֔ים הַיֹּצְאִ֖ים מִן־הַמְּנֹרָֽה׃

20 ‏וּבַמְּנֹרָ֖ה אַרְבָּעָ֣ה גְבִעִ֑ים מְשֻׁ֨קָּדִ֔ים כַּפְתֹּרֶ֖יהָ וּפְרָחֶֽיהָ׃

21 ‏וְכַפְתֹּ֡ר תַּחַת֩ שְׁנֵ֨י הַקָּנִ֜ים מִמֶּ֗נָּה וְכַפְתֹּר֙ תַּ֣חַת שְׁנֵ֤י הַקָּנִים֙ מִמֶּ֔נָּה וְכַפְתֹּ֕ר תַּֽחַת־שְׁנֵ֥י הַקָּנִ֖ים מִמֶּ֑נָּה לְשֵׁ֙שֶׁת֙ הַקָּנִ֔ים הַיֹּצְאִ֖ים מִמֶּֽנָּה׃

22 ‏כַּפְתֹּרֵיהֶ֥ם וּקְנֹתָ֖ם מִמֶּ֣נָּה הָי֑וּ כֻּלָּ֛הּ מִקְשָׁ֥ה אַחַ֖ת זָהָ֥ב טָהֽוֹר׃

23 ‏וַיַּ֥עַשׂ אֶת־נֵרֹתֶ֖יהָ שִׁבְעָ֑ה וּמַלְקָחֶ֥יהָ וּמַחְתֹּתֶ֖יהָ זָהָ֥ב טָהֽוֹר׃

24 ‏כִּכָּ֛ר זָהָ֥ב טָה֖וֹר עָשָׂ֣ה אֹתָ֑הּ וְאֵ֖ת כָּל־כֵּלֶֽיהָ׃ פ

25 ‏וַיַּ֛עַשׂ אֶת־מִזְבַּ֥ח הַקְּטֹ֖רֶת עֲצֵ֣י שִׁטִּ֑ים אַמָּ֣ה אָרְכּוֹ֩ וְאַמָּ֨ה רָחְבּ֜וֹ רָב֗וּעַ וְאַמָּתַ֙יִם֙ קֹֽמָת֔וֹ מִמֶּ֖נּוּ הָי֥וּ קַרְנֹתָֽיו׃

26 ‏וַיְצַ֨ף אֹת֜וֹ זָהָ֣ב טָה֗וֹר אֶת־גַּגּ֧וֹ וְאֶת־קִירֹתָ֛יו סָבִ֖יב וְאֶת־קַרְנֹתָ֑יו וַיַּ֥עַשׂ ל֛וֹ זֵ֥ר זָהָ֖ב סָבִֽיב׃

27 ‏וּשְׁתֵּי֩ טַבְּעֹ֨ת זָהָ֜ב עָֽשָׂה־ל֣וֹ׀ מִתַּ֣חַת לְזֵר֗וֹ עַ֚ל שְׁתֵּ֣י צַלְעֹתָ֔יו עַ֖ל שְׁנֵ֣י צִדָּ֑יו לְבָתִּ֣ים לְבַדִּ֔ים לָשֵׂ֥את אֹת֖וֹ בָּהֶֽם׃

28 ‏וַיַּ֥עַשׂ אֶת־הַבַּדִּ֖ים עֲצֵ֣י שִׁטִּ֑ים וַיְצַ֥ף אֹתָ֖ם זָהָֽב׃

29 ‏וַיַּ֜עַשׂ אֶת־שֶׁ֤מֶן הַמִּשְׁחָה֙ קֹ֔דֶשׁ וְאֶת־קְטֹ֥רֶת הַסַּמִּ֖ים טָה֑וֹר מַעֲשֵׂ֖ה רֹקֵֽחַ׃ פ

1 wayya‘aś bəṣalə’ēl ’eṯ-hā’ārōn ‘ăṣê šiṭṭîm ’ammāṯayim wāḥēṣî ’ārəkwō wə’ammâ wāḥēṣî rāḥəbwō wə’ammâ wāḥēṣî qōmāṯwō:

2 wayəṣapēhû zâāḇ ṭâwōr mibayiṯ ûmiḥûṣ wayya‘aś lwō zēr zâāḇ sāḇîḇ:

3 wayyiṣōq lwō ’arəba‘ ṭabə‘ōṯ zâāḇ ‘al ’arəba‘ pa‘ămōṯāyw ûšətê ṭabā‘ōṯ ‘al-ṣalə‘wō hā’eḥāṯ ûšətê ṭabā‘wōṯ ‘al-ṣalə‘wō haššēnîṯ:

4 wayya‘aś badê ‘ăṣê šiṭṭîm wayəṣaf ’ōṯām zâāḇ:

5 wayyāḇē’ ’eṯ-habadîm baṭṭabā‘ōṯ ‘al ṣalə‘ōṯ hā’ārōn lāśē’ṯ ’eṯ-hā’ārōn:

6 wayya‘aś kapōreṯ zâāḇ ṭâwōr ’ammāṯayim wāḥēṣî ’ārəkāh wə’ammâ wāḥēṣî rāḥəbāh:

7 wayya‘aś šənê ḵəruḇîm zâāḇ miqəšâ ‘āśâ ’ōṯām miššənê qəṣwōṯ hakapōreṯ:

8 kərûḇ-’eḥāḏ miqqāṣâ mizzeh ûḵərûḇ-’eḥāḏ miqqāṣâ mizzeh min-hakapōreṯ ‘āśâ ’eṯ-hakəruḇîm miššənê qaṣəwwōṯāw qəṣwōṯāyw:

9 wayyihəyû hakəruḇîm pōrəśê ḵənāfayim ləma‘əlâ sōḵəḵîm bəḵanəfêhem ‘al-hakapōreṯ ûfənêhem ’îš ’el-’āḥîw ’el-hakapōreṯ hāyû pənê hakəruḇîm: f

10 wayya‘aś ’eṯ-haššuləḥān ‘ăṣê šiṭṭîm ’ammāṯayim ’ārəkwō wə’ammâ rāḥəbwō wə’ammâ wāḥēṣî qōmāṯwō:

11 wayəṣaf ’ōṯwō zâāḇ ṭâwōr wayya‘aś lwō zēr zâāḇ sāḇîḇ:

12 wayya‘aś lwō misəgereṯ ṭōfaḥ sāḇîḇ wayya‘aś zēr-zâāḇ ləmisəgarətwō sāḇîḇ:

13 wayyiṣōq lwō ’arəba‘ ṭabə‘ōṯ zâāḇ wayyitēn ’eṯ-haṭṭabā‘ōṯ ‘al ’arəba‘ hapē’ōṯ ’ăšer lə’arəba‘ raḡəlāyw:

14 lə‘ummaṯ hammisəgereṯ hāyû haṭṭabā‘ōṯ bātîm labadîm lāśē’ṯ ’eṯ-haššuləḥān:

15 wayya‘aś ’eṯ-habadîm ‘ăṣê šiṭṭîm wayəṣaf ’ōṯām zâāḇ lāśē’ṯ ’eṯ-haššuləḥān:

16 wayya‘aś ’eṯ-hakēlîm| ’ăšer ‘al-haššuləḥān ’eṯ-qə‘ārōṯāyw wə’eṯ-kapōṯāyw wə’ēṯ mənaqqîyōṯāyw wə’eṯ-haqqəśāwōṯ ’ăšer yussaḵə bâēn zâāḇ ṭâwōr: f

17 wayya‘aś ’eṯ-hammənōrâ zâāḇ ṭâwōr miqəšâ ‘āśâ ’eṯ-hammənōrâ yərēḵāh wəqānāh gəḇî‘eyhā kafətōreyhā ûfərāḥeyhā mimmennâ hāyû:

18 wəšiššâ qānîm yōṣə’îm miṣṣideyhā šəlōšâ| qənê mənōrâ miṣṣidāh hā’eḥāḏ ûšəlōšâ qənê mənōrâ miṣṣidāh haššēnî:

19 šəlōšâ ḡəḇi‘îm məšuqqāḏîm baqqāneh hā’eḥāḏ kafətōr wāferaḥ ûšəlōšâ ḡəḇi‘îm məšuqqāḏîm bəqāneh ’eḥāḏ kafətōr wāfāraḥ kēn ləšēšeṯ haqqānîm hayyōṣə’îm min-hammənōrâ:

20 ûḇammənōrâ ’arəbā‘â ḡəḇi‘îm məšuqqāḏîm kafətōreyhā ûfərāḥeyhā:

21 wəḵafətōr taḥaṯ šənê haqqānîm mimmennâ wəḵafətōr taḥaṯ šənê haqqānîm mimmennâ wəḵafətōr taḥaṯ-šənê haqqānîm mimmennâ ləšēšeṯ haqqānîm hayyōṣə’îm mimmennâ:

22 kafətōrêhem ûqənōṯām mimmennâ hāyû kullāh miqəšâ ’aḥaṯ zâāḇ ṭâwōr:

23 wayya‘aś ’eṯ-nērōṯeyhā šiḇə‘â ûmaləqāḥeyhā ûmaḥətōṯeyhā zâāḇ ṭâwōr:

24 kikār zâāḇ ṭâwōr ‘āśâ ’ōṯāh wə’ēṯ kāl-kēleyhā: f

25 wayya‘aś ’eṯ-mizəbaḥ haqqəṭōreṯ ‘ăṣê šiṭṭîm ’ammâ ’ārəkwō wə’ammâ rāḥəbwō rāḇû‘a wə’ammāṯayim qōmāṯwō mimmennû hāyû qarənōṯāyw:

26 wayəṣaf ’ōṯwō zâāḇ ṭâwōr ’eṯ-gagwō wə’eṯ-qîrōṯāyw sāḇîḇ wə’eṯ-qarənōṯāyw wayya‘aś lwō zēr zâāḇ sāḇîḇ:

27 ûšətê ṭabə‘ōṯ zâāḇ ‘āśâ-lwō| mitaḥaṯ ləzērwō ‘al šətê ṣalə‘ōṯāyw ‘al šənê ṣidāyw ləḇātîm ləḇadîm lāśē’ṯ ’ōṯwō bâem:

28 wayya‘aś ’eṯ-habadîm ‘ăṣê šiṭṭîm wayəṣaf ’ōṯām zâāḇ:

29 wayya‘aś ’eṯ-šemen hammišəḥâ qōḏeš wə’eṯ-qəṭōreṯ hassammîm ṭâwōr ma‘ăśēh rōqēḥa: f


Next: Exodus (Shemot) Chapter 38