Sacred Texts  Bible  Index 
Polyglot  KJV  Sep  Vul 

Esther (Esther) Index
  Previous  Next 

Tanach (Hebrew): Esther (Esther) Chapter 5

1 ‏וַיְהִ֣י׀ בַּיּ֣וֹם הַשְּׁלִישִׁ֗י וַתִּלְבַּ֤שׁ אֶסְתֵּר֙ מַלְכ֔וּת וַֽתַּעֲמֹ֞ד בַּחֲצַ֤ר בֵּית־הַמֶּ֙לֶךְ֙ הַפְּנִימִ֔ית נֹ֖כַח בֵּ֣ית הַמֶּ֑לֶךְ וְ֠הַמֶּלֶךְ יוֹשֵׁ֞ב עַל־כִּסֵּ֤א מַלְכוּתוֹ֙ בְּבֵ֣ית הַמַּלְכ֔וּת נֹ֖כַח פֶּ֥תַח הַבָּֽיִת׃

2 ‏וַיְהִי֩ כִרְא֨וֹת הַמֶּ֜לֶךְ אֶת־אֶסְתֵּ֣ר הַמַּלְכָּ֗ה עֹמֶ֙דֶת֙ בֶּֽחָצֵ֔ר נָשְׂאָ֥ה חֵ֖ן בְּעֵינָ֑יו וַיּ֨וֹשֶׁט הַמֶּ֜לֶךְ לְאֶסְתֵּ֗ר אֶת־שַׁרְבִ֤יט הַזָּהָב֙ אֲשֶׁ֣ר בְּיָד֔וֹ וַתִּקְרַ֣ב אֶסְתֵּ֔ר וַתִּגַּ֖ע בְּרֹ֥אשׁ הַשַּׁרְבִֽיט׃ ס

3 ‏וַיֹּ֤אמֶר לָהּ֙ הַמֶּ֔לֶךְ מַה־לָּ֖ךְ אֶסְתֵּ֣ר הַמַּלְכָּ֑ה וּמַה־בַּקָּשָׁתֵ֛ךְ עַד־חֲצִ֥י הַמַּלְכ֖וּת וְיִנָּ֥תֵֽן לָֽךְ׃

4 ‏וַתֹּ֣אמֶר אֶסְתֵּ֔ר אִם־עַל־הַמֶּ֖לֶךְ ט֑וֹב יָב֨וֹא הַמֶּ֤לֶךְ וְהָמָן֙ הַיּ֔וֹם אֶל־הַמִּשְׁתֶּ֖ה אֲשֶׁר־עָשִׂ֥יתִי לֽוֹ׃

5 ‏וַיֹּ֣אמֶר הַמֶּ֔לֶךְ מַהֲרוּ֙ אֶת־הָמָ֔ן לַעֲשׂ֖וֹת אֶת־דְּבַ֣ר אֶסְתֵּ֑ר וַיָּבֹ֤א הַמֶּ֙לֶךְ֙ וְהָמָ֔ן אֶל־הַמִּשְׁתֶּ֖ה אֲשֶׁר־עָשְׂתָ֥ה אֶסְתֵּֽר׃

6 ‏וַיֹּ֨אמֶר הַמֶּ֤לֶךְ לְאֶסְתֵּר֙ בְּמִשְׁתֵּ֣ה הַיַּ֔יִן מַה־שְּׁאֵלָתֵ֖ךְ וְיִנָּ֣תֵֽן לָ֑ךְ וּמַה־בַּקָּשָׁתֵ֛ךְ עַד־חֲצִ֥י הַמַּלְכ֖וּת וְתֵעָֽשׂ׃

7 ‏וַתַּ֥עַן אֶסְתֵּ֖ר וַתֹּאמַ֑ר שְׁאֵלָתִ֖י וּבַקָּשָׁתִֽי׃

8 ‏אִם־מָצָ֨אתִי חֵ֜ן בְּעֵינֵ֣י הַמֶּ֗לֶךְ וְאִם־עַל־הַמֶּ֙לֶךְ֙ ט֔וֹב לָתֵת֙ אֶת־שְׁאֵ֣לָתִ֔י וְלַעֲשׂ֖וֹת אֶת־בַּקָּשָׁתִ֑י יָב֧וֹא הַמֶּ֣לֶךְ וְהָמָ֗ן אֶל־הַמִּשְׁתֶּה֙ אֲשֶׁ֣ר אֶֽעֱשֶׂ֣ה לָהֶ֔ם וּמָחָ֥ר אֶֽעֱשֶׂ֖ה כִּדְבַ֥ר הַמֶּֽלֶךְ׃

9 ‏וַיֵּצֵ֤א הָמָן֙ בַּיּ֣וֹם הַה֔וּא שָׂמֵ֖חַ וְט֣וֹב לֵ֑ב וְכִרְאוֹת֩ הָמָ֨ן אֶֽת־מָרְדֳּכַ֜י בְּשַׁ֣עַר הַמֶּ֗לֶךְ וְלֹא־קָם֙ וְלֹא־זָ֣ע מִמֶּ֔נּוּ וַיִּמָּלֵ֥א הָמָ֛ן עַֽל־מָרְדֳּכַ֖י חֵמָֽה׃

10 ‏וַיִּתְאַפַּ֣ק הָמָ֔ן וַיָּב֖וֹא אֶל־בֵּית֑וֹ וַיִּשְׁלַ֛ח וַיָּבֵ֥א אֶת־אֹהֲבָ֖יו וְאֶת־זֶ֥רֶשׁ אִשְׁתּֽוֹ׃

11 ‏וַיְסַפֵּ֨ר לָהֶ֥ם הָמָ֛ן אֶת־כְּב֥וֹד עָשְׁר֖וֹ וְרֹ֣ב בָּנָ֑יו וְאֵת֩ כָּל־אֲשֶׁ֨ר גִּדְּל֤וֹ הַמֶּ֙לֶךְ֙ וְאֵ֣ת אֲשֶׁ֣ר נִשְּׂא֔וֹ עַל־הַשָּׂרִ֖ים וְעַבְדֵ֥י הַמֶּֽלֶךְ׃

12 ‏וַיֹּאמֶר֮ הָמָן֒ אַ֣ף לֹא־הֵבִיאָה֩ אֶסְתֵּ֨ר הַמַּלְכָּ֧ה עִם־הַמֶּ֛לֶךְ אֶל־הַמִּשְׁתֶּ֥ה אֲשֶׁר־עָשָׂ֖תָה כִּ֣י אִם־אוֹתִ֑י וְגַם־לְמָחָ֛ר אֲנִ֥י קָֽרוּא־לָ֖הּ עִם־הַמֶּֽלֶךְ׃

13 ‏וְכָל־זֶ֕ה אֵינֶ֥נּוּ שׁוֶֹ֖ה לִ֑י בְּכָל־עֵ֗ת אֲשֶׁ֨ר אֲנִ֤י רֹאֶה֙ אֶת־מָרְדֳּכַ֣י הַיְּהוּדִ֔י יוֹשֵׁ֖ב בְּשַׁ֥עַר הַמֶּֽלֶךְ׃

14 ‏וַתֹּ֣אמֶר לוֹ֩ זֶ֨רֶשׁ אִשְׁתּ֜וֹ וְכָל־אֹֽהֲבָ֗יו יַֽעֲשׂוּ־עֵץ֮ גָּבֹ֣הַּ חֲמִשִּׁ֣ים אַמָּה֒ וּבַבֹּ֣קֶר׀ אֱמֹ֣ר לַמֶּ֗לֶךְ וְיִתְל֤וּ אֶֽת־מָרְדֳּכַי֙ עָלָ֔יו וּבֹֽא־עִם־הַמֶּ֥לֶךְ אֶל־הַמִּשְׁתֶּ֖ה שָׂמֵ֑חַ וַיִּיטַ֧ב הַדָּבָ֛ר לִפְנֵ֥י הָמָ֖ן וַיַּ֥עַשׂ הָעֵֽץ׃ פ

1 wayəhî| bayywōm haššəlîšî watiləbaš ’esətēr maləḵûṯ wata‘ămōḏ baḥăṣar bêṯ-hammeleḵə hapənîmîṯ nōḵaḥ bêṯ hammeleḵə wəhammeleḵə ywōšēḇ ‘al-kissē’ maləḵûṯwō bəḇêṯ hammaləḵûṯ nōḵaḥ peṯaḥ habāyiṯ:

2 wayəhî ḵirə’wōṯ hammeleḵə ’eṯ-’esətēr hammaləkâ ‘ōmeḏeṯ beḥāṣēr nāśə’â ḥēn bə‘ênāyw wayywōšeṭ hammeleḵə lə’esətēr ’eṯ-šarəḇîṭ hazzâāḇ ’ăšer bəyāḏwō watiqəraḇ ’esətēr watiga‘ bərō’š haššarəḇîṭ: s

3 wayyō’mer lāh hammeleḵə mah-llāḵə ’esətēr hammaləkâ ûmah-baqqāšāṯēḵə ‘aḏ-ḥăṣî hammaləḵûṯ wəyinnāṯēn lāḵə:

4 watō’mer ’esətēr ’im-‘al-hammeleḵə ṭwōḇ yāḇwō’ hammeleḵə wəhāmān hayywōm ’el-hammišəteh ’ăšer-‘āśîṯî lwō:

5 wayyō’mer hammeleḵə mahărû ’eṯ-hāmān la‘ăśwōṯ ’eṯ-dəḇar ’esətēr wayyāḇō’ hammeleḵə wəhāmān ’el-hammišəteh ’ăšer-‘āśəṯâ ’esətēr:

6 wayyō’mer hammeleḵə lə’esətēr bəmišətēh hayyayin mah-ššə’ēlāṯēḵə wəyinnāṯēn lāḵə ûmah-baqqāšāṯēḵə ‘aḏ-ḥăṣî hammaləḵûṯ wəṯē‘āś:

7 wata‘an ’esətēr watō’mar šə’ēlāṯî ûḇaqqāšāṯî:

8 ’im-māṣā’ṯî ḥēn bə‘ênê hammeleḵə wə’im-‘al-hammeleḵə ṭwōḇ lāṯēṯ ’eṯ-šə’ēlāṯî wəla‘ăśwōṯ ’eṯ-baqqāšāṯî yāḇwō’ hammeleḵə wəhāmān ’el-hammišəteh ’ăšer ’e‘ĕśeh lâem ûmāḥār ’e‘ĕśeh kiḏəḇar hammeleḵə:

9 wayyēṣē’ hāmān bayywōm hahû’ śāmēḥa wəṭwōḇ lēḇ wəḵirə’wōṯ hāmān ’eṯ-mārədŏḵay bəša‘ar hammeleḵə wəlō’-qām wəlō’-zā‘ mimmennû wayyimmālē’ hāmān ‘al-mārədŏḵay ḥēmâ:

10 wayyiṯə’apaq hāmān wayyāḇwō’ ’el-bêṯwō wayyišəlaḥ wayyāḇē’ ’eṯ-’ōhăḇāyw wə’eṯ-zereš ’išətwō:

11 wayəsapēr lâem hāmān ’eṯ-kəḇwōḏ ‘āšərwō wərōḇ bānāyw wə’ēṯ kāl-’ăšer gidəlwō hammeleḵə wə’ēṯ ’ăšer niśśə’wō ‘al-haśśārîm wə‘aḇəḏê hammeleḵə:

12 wayyō’mer hāmān ’af lō’-hēḇî’â ’esətēr hammaləkâ ‘im-hammeleḵə ’el-hammišəteh ’ăšer-‘āśāṯâ kî ’im-’wōṯî wəḡam-ləmāḥār ’ănî qārû’-lāh ‘im-hammeleḵə:

13 wəḵāl-zeh ’ênennû šwōeh lî bəḵāl-‘ēṯ ’ăšer ’ănî rō’eh ’eṯ-mārədŏḵay hayyəhûḏî ywōšēḇ bəša‘ar hammeleḵə:

14 watō’mer lwō zereš ’išətwō wəḵāl-’ōhăḇāyw ya‘ăśû-‘ēṣ gāḇōhha ḥămiššîm ’ammâ ûḇabōqer| ’ĕmōr lammeleḵə wəyiṯəlû ’eṯ-mārədŏḵay ‘ālāyw ûḇō’-‘im-hammeleḵə ’el-hammišəteh śāmēḥa wayyîṭaḇ hadāḇār lifənê hāmān wayya‘aś hā‘ēṣ: f


Next: Esther (Esther) Chapter 6